TBP Balochi

انسانی ھکانی باسک ءُ بلوچ یکجھتی کمیٹی ءِ باسک گلزادی بلوچ بندیگجاہ ءَ چہ بندیگ ءَ یک ماھے سرجم بیتگ وھدے کہ تھری ایم پی او ءِ بُنیاد ءَ آئی ءِ دزگیری دگہ یک ماھے گیش کنگ بیتگ-

انسانی ھکانی باسک گلزادہ بلوچ ھپت اپریل ءَ چہ شال ءَ پاکستانی پوج ءُ چیریں ادارھانی کارمنداں آوار جنگ ءَ پد بازیں کلاکاں ناشناسیں جاھے ءَ داشتگ اَت-

بی وائی سی ءِ رِد ءَ گلزادی بلوچ سی ٹی ڈی ءِ آپیسر ءُ پولیس ءَ زورانسری برتگ – بازیں کلاکاں چہ جاگہ ناشناس بیتگ وھدے کہ ھدہ بندیگجاہ ءَ شال ءُ آرگ ءَ چہ ساری سی ٹی ڈی ءِ مردین ءِ کارندھانی دست ءَ لَٹ ءُ کُٹانی نشانگ کنگ بیتگ-

بی وائی سی ءَ درشان ءِ تہ ءَ گْوشتگ کہ گلزادی بلوچ چار کلاکاں چہ گیش جسمانی ھساب ءَ لَٹ ءُ کُٹانی نشانگ کنگ بیتگ-

گلزادی بلوچ ءَ بندیگجاہ ءَ چہ نشبتہ کتگیں یک نمدی یے تہ ءَ وتی سر ءَ زوراکی ءِ نام گپتگ آئی ءِ دست ءُ پاد بستگ ءُ بازیں کلاکاں چہ آئی ءِ سر ءَ زوراکی کتگ-

بلوچ یکجھتی کمیٹی ءِ رھشون ڈاکٹر ماہ رنگ بلوچ ءَ ھوار گلزادی بلوچ، بیبو بلوچ، بیبرگ بلوچ ءُ شاہ جی صبغت اللہ بازیں ماہ ءَ چہ بندیگ اَنت اے میان ءَ آیانی سر ءَ لَٹ ءُ کُٹ وئیل ھم نکش بیتگ اَنت- بیبو بلوچ گوستگیں روچاں تُرندیں لَٹ ءُ کُٹ ءَ پد پشین ءَ برتگ-

بی وائی سی ءِ رھشونانی تھری ایم پی او ءِ بُنیاد ءَ دزگیری ءَ یکشل ءَ دراجکش کنگ بیگ ءَ اِنت- آمیدگسی پرمانانی پد ھم رھشون ءُ باسک یل کنگ نہ بیتگ اَنت-

بلوچ یکجھتی کمیٹی ءِ گوشگ اِنت کہ رھشوناں ءُ باسکانی کالونیل کانود تھری ایم پی او ءِ بُنیاد ءَ ھدہ بندیگجاہ شال ءُ بلوچستان ءِ دگہ بندیگجاھاں درکانودی ھساب ءَ بندیگ کتگ اَنت-

آئی ءَ گْوشتگ کہ آیانی درکانودی دزگیری ءِ ھلاپ ءَ گل ءِ آمیدگس ءَ شتگ ایں ءُ کانودی ھساب ءَ چہ وتی رھشونانی کیس آمیدگس ءَ ایر کتگ اَنت- بلے آمیدگس گوستگیں دو ماھاں چہ آیانی کیساں یکشل ءَ پشگیجی ءِ پندل ءَ کارمرز کنگ ءَ اِنت- اے میان یکیں بینچ ءَ باز رند ءَ کیس گوشدارینگ بیتگ ءُ ھرچ رند ءَ سرکاری وکیل مئے رھشونانی ھلاپ ءَ ھچ وڑیں منانک یا دلیل پیش کنگ ءَ بے سوب بیتگ – اشی ءَ اَبید جج پیسلہ اش کنگ ءَ پشگیجی ءِ کار ءُ کنگ ءَ اِنت-

بلوچ لبریشن آرمی ءَ رسانکدر ءَ شنگ کتگیں درشان ءَ گوشتگ سرمچاراں کلات ءِ دمگ منگچر ءَ کاروائی ءِ وھد ءَ دزگیر کتگیں پولیس کارندہ یل داتگ انت-

جارکش ءَ گوشتگ اے ایس آئی گلام سرور، فراز علی، رفیق اھمد چنہ، مھمد ناصر ءُ فراز اھمد بی ایل اے ءِ گچینی ٹولی فتح اسکواڈ ءَ ھما وھد ءَ دزگیر کتگ انت کہ وھدیکہ منگچر ءَ اسٹریٹجک گچینی شھر ءَ کنٹرول کتگ –

آئی ءَ گوشتگ بی ایل اے اے گپ تچک کنت اِنت ایشانی نیزوری یا سرپدی ءِ چیدگ ناں بلکیں بلوچ راجی زرمبشت ءِ اکلاکی انت، سیاسی پھتوئی ءُ گچینی گامگیجانی درچ انت – ما اے کارندھاناں یک موھے داتگ کہ آ وت ءَ بلوچ تاجی زرمبشت ءِ ھلاپ ءَ جنگی سرپاں گستاھی بہ کن انت، ءُ اے کلوہ ءَ سر بہ کن اَنت کہ آ زورگریں پوجی نزام ءِ بھر بیتگ ءُ وتی مردمانی ھوناں ریچگ ءَ انت-

آئی ءَ گوشتگ ما سرپد بہ ایں بازیں بلوچ وردیاں ابید نوآبادیاتی ءِ ھلاپ ءَ نپرت کن اَنت – بلے اگاں شما وتی توپک ءَ دشمن ءِ سرپ ءَ ایر کن ئے گڑا شمئے پجار بلوچ نہ بیت انت گڑا شما زورگر ءِ وردی ءُ آئی ءِ لوٹانی درچ بیت اِنت-

گیش آئی ءَ گوشتگ مروچی ایشانی یل دیگ یک دروازگے کہ ما تچک ءَ یل داتگ، یک موھے ما داتگ، بلے اگاں پولیس ءَ وتی ھستیں رویش برجاہ داشت گڑا ما شمارا ھم ایشی ءَ دشمن ءِ نگاھاں چاریں ءُ گڑا آسری داتگ-

درشان ءِ گڈسر ءَ ما لوٹ ایں کہ اے کلوہ ءَ بلوچستان ءِ ھمک تھانہ، ھمک چیک پوسٹ ءُ ھمک وردی والویں بلوچاں سر بہ کنت کہ بلوچ لبریشن آرمی شمارا تیر جنگ نہ لوٹ ایت بلے شمارا پیسلہ کنگ لوٹ ایت شما دشمن ءِ توپک ءِ بھر بہ ئے یا بلوچ راج ءِ پجار ءِ جنگ ءَ جتا بنت اِنت-

بلوچستان ءِ دمگ پنجگور ءَ بیگواھیں مردم ءِ لاش دزکپتگ ءُ تربت ءَ سی ٹی ڈی ءِ دست ءَ دو مردم بیگواہ ءُ تربت لاء کالج ءَ نودربر ءِ بیگواھی ءَ زھرشانی کنگ بیتگ-

چہ پنجگور تسپ ءَ یک مئی ءَ پاکستانی پوج ءِ دست ءَ بیگواہ بیتگیں سمیر ء سبزل ءِ لاش مروچی پنجگور ءِ دمگ بالی سوراپ ءَ دزکپتگ-

ھمے وڑ تربت لاء کالج تربت ءِ نودربر انضمام بلوچ زورانسری بیگواھی ءِ ھلاپ ءَ لاء کالج ءِ نودربراں کیمپس یک پرامنیں واکے کشگ بیتگ-

اے روانک ءَ بازیں کچے ءَ نودربراں بھر زرتگ ءُ انضمام بلوچ ءِ یل دیگ ءِ لوٹ کتگ-

ھمے وڑ ءَ کاؤنٹر ٹیررزم ڈیپارٹمنٹ ءِ سی ٹی ڈی ءَ گوستگیں شپ ءَ بلوچستان ءِ دمگ کیچ کلاتک ءَ بیڑ برتگ ءُ نامی ئیں پبلشر ءُ اھوالکار جمیل امام ءِ کستریں کامران امام ءَ ھوار دو مردم دزگیر کتگ ءُ برتگ انت-

کھول ءِ رد ءَ سی ٹی ڈی ءِ کارندھاں بازیں کچے ءَ شپ ءِ دو بج ءَ دو لوگانی سر ءَ بیڑ برتگ ءُ لوگانی پرشت ءُ پروش کتگ ءُ زالبول ءُ کماش جتگ انت ءُ ھمے وھد ءَ کامران امام ءُ پد ءَ نزیکیں لوگ ءِ امتیاز ھیال نامیں مردمے دزگیر کتگ ءُ برتگ انت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ ھشت مئی دوھزار بیست پنچ ءِ بیگاہ ءِ ساھت پنچ ءِ نزیک ءَ بی ایل ایف ءِ سرمچاراں چاگی ءِ دمگ کلی داودی ءَ پاکستان ایئرفورس ءِ دو کارندہ ھما وھد ءَ نشانگ کتگ اَنت وھدے آ بازار ءَ سامان زیرگ ءَ پد بُنجل نیمگ ءَ روگ ءَ بیتگ اَنت- اُرش ءَ دوئیں کارندہ جاہ پہ جاھی مرتگ اَنت-

آئی ءَ گْوشتگ کہ مرتگیں دوئیں کارندہ “فضائیہ” ءَ کارپورل رینک نان کمیشنڈ ٹیکنیشن بیتگ اَنت ءُ اے وھد ءَ چاگی ءَ “پاک فضائیہ ” ءِ ریڈار سر ءَ ڈیوٹی ءَ بیتگ اَنت-

جارکش ءَ گْوشتگ کہ کشگ بیتگیں کارندھانی پجّار محمد طاہر ء طارق محمود جھمنند کھوٹہ راولپنڈی ءُ محمد شفیق ء امیر خان جھمنند تلہ گنگ نام ءَ چہ بیتگ اَنت-

آئی ءَ گْوشتگ کہ سرمچاراں دُژمنیں پوج ءِ سر ءَ اُرش کنگ ءَ پد آ وتی مُھریں اوتاکاں سر بیتگ اَنت-

جارکش ءَ گْوشتگ کہ بلوچستان لبریشن فرنٹ چاگی ءُ پاکستانی ایئرفورس ءِ دوئیں کارندھانی کوش زمہ واری ءَ منّ اِیت ءُ سرجمیں بلوچستان ءَ زورگریں پاکستانی پوج ءَ نشانگ کن ایں-

بلوچستان ءِ دمگ تربت ءُ مستونگ ءَ پاکستانی لشکر ءُ مڈی بروکیں گاڑی نشانگ کتگ انت-

تربت ءِ دمگ دھات ءَ سی پیک ءِ راہ ءَ پاکستانی اُرد ءِ پوسٹ ءِ سر ءَ سلاہ بندیں مردماں اُرش کتگ۔ اُرش ءِ وھد ءَ بازیں تراک ءُ مزنیں تیر گواریانی توار اشکنگ بیتگ انت۔

دمگی اھوالانی رد ءَ اے اُرش ءَ لشکر ءَ را جانی تاوان ءُ مالی تاوانانی دیمپانی کنگ کپتگ – بلے واکداراں اے درگت ءَ دگہ گپ پیش نہ کتگ انت-

دومی نیمگ ءَ مستونگ ءِ دمگ کھڈ کوچہ ءَ مردماں سلاہ بندیں اُرش ءَ مڈی بروکیں شش گاڑی نشانگ جوڑ کتگ اَنت۔

اُرش ءِ تہ ءَ نشانگ جوڑ بوتگیں گاڑیانی تہ ءَ کرومائٹ ءُ دگہ مڈی بروک ھوار بوتگ اَنت۔ تیرگواری ءِ آسر ءَ گاڑیاں تاوان بوتگ انت۔

زانگ بہ بیت کہ گوستگیں روچ ءَ مستونگ ءِ چوتو ءِ دمگ ءَ مڈی بروکیں دو گاڑی نشانگ جوڑ کنگ بوتگ ات کہ ایشی ءِ زمہ واری بلوچ لبریشن آرمی ءَ زرتگ۔

گوستگیں روچ ءَ چہ شال، تمپ، تربت ءُ مستونگ ءَ پاکستانی لشکر ھپت اُرشاں نشانگ جوڑ کنگ بوتگ ءُ لشکر ءِ تہ ءَ بیران بوھگ ءِ ھال بوتگ۔

بلوچستان ءِ دمگ کیچ ءَ لشکر کشی ءَ ھواریں پاکستانی لشکر سلاہ بندیں مردماں اُرش ءِ نشانگ جوڑ کتگ ۔

ھالانی رد ءَ چہ گوستگیں روچ ءَ تمپ ءَ پاکستانی پوج لشکر کشی ءَ دزبند انت۔ دمگ ءَ پیادگیں کارندہ سُر ءُ پُر ءَ گندگ بوتگ انت کہ ایشی ءِ تہ ءَ بازیں گاڑیانی کاروان ھم ھوار اَنت۔

کوھاڈ ءِ دمگ ءَ سلاہ بندیں مردماں سنگر گپتگ ءُ آپریشن ءَ گوں دزبندیں پوجی کارندہ نشانگ جوڑ کتگ انت کہ چریشی ءِ آسر ءَ پوج ءَ جانی تاوانانی دیمپانی کنگ ءِ گمان انت-

اُرش ءَ پد ایمبولینس دمگ ءَ روگ ءَ گندگ بوتگ انت بلے واکداراں انگت ءَ ھچ وڑیں ھال ءُ اھوال نہ داتگ ءُ ھمے وھد ءَ پورسز ءَ دمگ ءَ مدامی ڈول ءَ مارٹر گولہ آس دیگ بندات کتگ-

بلوچستان ءَ پاکستانی لشکر ءِ سر ءَ اُرشانی تہ ءَ گیشی گندگ بوتگ اَنت۔ گوستگیں شپ ءَ سلاہ بندیں اُرشاں بنجاھی شھر شال ءَ فرنٹیئر کور ءِ بنجاھی کارگس ءَ ھوار چار جاھاں یکیں وھد ءَ پورس پوسٹ نشانگ جوڑ کتگ اَنت۔

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ ھشت مئی دوھزار بیست پنچ ءَ بیگاہ چار نزیک ءَ کولواہ ڈنڈار ءِ دمگ مادگ کلات ءَ سرمچاراں زورگریں پاکستانی پوج ءِ پوسٹ سر ءَ اسنائپر اُرش کتگ، چریشی ءِ آسر ءَ یک پوجی یے جاہ پہ جاہ مرتگ- سرمچاراں وئیل ءِ تامُر ھم گپتگ، کہ زوت بی یل ایف رسانکدر چینل آشوب ءَ زوت شنگ کنت-

جارکش ءَ گْوشتگ کہ کولواہ مادگ کلات ءَ دُژمنیں پوج سر ءَ بیتگیں اُرش زمہ واری ءَ منّ ایں ءُ مئے کاروائی زورگریں پاکستانی پوج ءِ دراھگ ءَ تاں برجاہ بنت-

بلوچستان ءِ بُنجاھی شھر چہ شال ءَ ھالانی رِد ءَ پاکستانی پوج ءِ بازیں ھندانی سر ءَ یکجاھی اُرشانی دیمپانی کنگ کپتگ، کہ اود ءَ تراکانی ءُ تُرندیں تیرگواری ءِ ھال سر بیتگ-

اولی اُرش سلاہ بندیں مردماں پاکستانی پوج ءِ فرنٹیئر کور ( ایف سی ) ءِ ھیڈکواٹرز نشانگ کتگ، اُرش وھد ءَ بازیں تراکانی توار اش کنگ بیتگ، ءُ پد ء زوت ءَ تُرندیں تیرگواری ءِ رِد برجاہ بیتگ-

وھدے کہ دومی اُرش شال ءِ دمگ قمبرانک دگ جنگل باگ سر ءَ برجاھیں کیپٹن سفر خان چیک پوسٹ سر ءَ کنگ بیتگ- اِھوالکار رِد ءَ وئیلجاہ کم چہ کم دو تراکانی توار اش کنگ بیتگ-

ھمے وڑ شال ءِ دمگ بزارہ ٹاؤن، کرانی دگ سر ءَ برجاھیں پاکستانی پوج ءِ دگہ یک چوکی یے ھم نشانگ کنگ بیتگ- اُرش ترندی ءَ جانی تاوان درگت ءَ چہ ھچ وڑیں درشان شنگ کنگ نہ بیتگ-

گوشگ بیگ ءَ اِنت کہ سلاہ بندیں مردماں شال ءِ دمگ عارف گلی، بورما ھوٹل ءِ نزیک ءَ برجاھیں اے این ایف ( اینٹی نارکوٹکس فورس ) ءِ بُنجل دستی بمب اُرش ءَ نشانگ کتگ –

بلے واکدار ءَ نیمگ ءَ چہ اے اُرشانی درگت ءَ ھچ وڑیں درشان دیم ءَ نیتکگ-

بلوچستان ءِ دمگ چاگی ءَ مروچی بیگاہ ءَ ناشناسیں سلاہ بندیں مردماں تیرگواری کتگ پاکستان ائیرفورس ءِ دو کارندہ کُشتگ-

اِھوالکار رِد ءَ اے وئیل ھما وھد ءَ بیتگ وھدے دوئیں کارندہ بازار ءَ روگ ءَ بیتگ اَنت- اُرشکاراں آیانی سر ءَ تیرگواری کتگ چریشی ءِ آسر ءَ دوئیں کارندہ جاہ پہ جاھی مرتگ اَنت – وئیل ءَ پد اُرشکار تتکگ اَنت-

وئیل ھال سر بیگ ءَ سیکورٹی فورسز ھما دمان ءَ سر بیتگ ءُ دمگ انگیر ءَ کتگ ءُ پٹ ءُ پول بندات کتگ-

تنی وھدے اے اُرش زمہ واری ھچ گل ءَ نہ زرتگ ءُ نانکہ واکدار نیمگ ءَ چہ اے درگت درشان شنگ کنگ بیتگ-

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشانے ءِ تہ ءَ گوشتگ کہ مئے سرمچاراں کیچ، مستونگ ءُ کچھی ءَ زورگریں پاکستانی پوج ءُ آئی ءِ ھمکارانی سر ءَ شش اُرش کُتگ انت – اے اُرشاں ریموٹ کنٹرول آئی اِی ڈی ھم مان بوتگ کہ زورگریں پاکستانی پوج، آئی ءِ وردن بروک ءُ موبائیل ٹاورانی سر ءَ کنگ بوتگ انت –

جارکش ءَ سرجمیں ھال داتگ ءُ گوشتگ کہ گوستگیں روچ ءَ بلوچ لبریشن آرمی ءِ سرمچاراں زامران ءِ دمگ دشتک ءَ زورگریں پاکستانی پوج ءِ بم ڈسپوزل ٹولی ءِ کارمند ھما وھد ءَ ریمورٹ کنٹرول بمب اُرش ءِ نشانگ کتگ انت کہ آ راہ ءِ پٹ ءُ پول ءُ کلئیر کنگ ءَ دلگوش بوتگ انت – اُرش ءَ زورگریں پوج ءِ یک کارمندے ھما دمان ءَ مُرتگ –

آئی ءَ گوشتگ کہ مئے سرمچاراں زامران ءِ دمگ کٹگان ءَ برجاھیں زورگریں پاکستانی پوج ءِ پانگسے ءِ سر ءَ وتکاریں سلاھاں گوں اُرش کتگ چریشی ءَ زورگریں پوج ءَ جانی تاوان رس اتگ –

ھمے وڑ بلوچ لبریشن آرمی ءِ سرمچاراں زامران ءِ دمگ ساہ دیم ءَ زوگریں پاکستانی پوج ءِ پانگسے ءِ سر ءَ وتکار ءُ مزنیں سلاھاں گوں اُرش کتگ – سرمچاراں زورگریں پوج ءِ پوزیشنانی سر ءَ بازیں گرنیڈ لانچرے آس داتگ کہ سوبمندی ءَ ھما جاہ ءَ شتگ ءُ لگ اِتگ انت چریشی ءَ کم چہ کم دو کارمند مُرتگ ءُ سَے زدگ بوتگ انت –

جارکش ءَ گوشتگ کہ مئے سرمچاراں گوستگیں روچ ءِ نیمروچ ءِ وھد ءَ زامران ءِ ھمے دمگ ءَ ساہ دیم ءَ زورگریں پاکستانی پوج ءِ بنجل ءَ وردن بروکیں یک ٹرک گاڑی ءِ بمب اُرش ءِ نشانگ کتگ چریشی ءَ گاڑی سرجم ءَ تباہ بوتگ –

جارکش جیئند بلوچ ءَ وتی درشان ءِ تہ ءَ گوشتگ کہ سرمچارانی پد ماں پدی اُرشاں پد زورگریں پوج چہ دگہ نیمگاں وتی زلورتاں سرجم کنگ ءِ کوشست ءَ کنگ ءَ انت – زورگریں پاکستانی پوج زامران ءُ تگران ءِ ھندی مردماں ٹوکن ءِ لالچ ءَ دیگ ءُ وتی واستا کارگرگ ءَ انت – بلوچ لبریشن آرمی ءَ پیش ءَ اے گپ تچک کتگ کہ دمگی مردم پاکستانی پوج ءِ ھاتر ءَ سامان یا دگہ ھچ وڈیں کمک مہ کن انت اگاں ناں آ وتی جان ءُ مال ءِ زمہ وار وت بہ انت –

جارکش ءَ وتی درشان ءِ دیمتر ءَ گوشتگ کہ سرمچاراں مستونگ ءِ دمگ جوتو ءَ بلوچ ءِ مڈیانی لُٹ ءُ پل ءَ ھواریں گاڑیانی سرا اُرش کتگ چریشی ءَ گاڑیاں سک باز تاوان رس اِتگ –

آئی ءَ گوشتگ کہ یک دگہ اُرش ءِ کچھی ءِ دمگ حاجی شار ءَ کنگ بوتگ کہ اود ءَ سرمچاراں یوفون کمپنی ءِ ٹاورے ءِ سر ءَ اُرش کتگ ءُ مشینری تباہ کتگ انت –

جارکش ءَ گڈسر ءَ گوشتگ کہ بلوچ راجی لشکر بی ایل اے درسیں اُرشانی زمہ واری ءَ من ایت –