TBP Balochi

بلوچستان ءِ تیابدپی شھر گوادر ءَ ھوار تربت ءَ تیرگواری ءِ دو وئیلاں پولیس کارندھے بیران، پنچ مردم زدگ بیتگ انت-

گیشیں اھوالانی رد ءَ گوادر ءَ پنجاپ ءِ جھمنندیں مردمانی کوارٹر ءِ سر ءَ دزبمب اُرش، تیرگواری ءِ آسر ءَ چار مردم زدگ بیتگ انت-

ناشناسیں مردماں سید ھاشمی ایوینیو ءَ بلال مسیت ءِ نزیک ءَ پنجاپ ءِ جھمنندانی کوارٹر ءِ سر ءَ بمبے چگل داتگ ءُ تیرگواری کتگ ءُ پشت مانداتگ ءُ شتگ انت-

تیرگواری ءِ آسر ءَ پنجاپ ءِ جھمنندیں سَے مردم زدگ بیتگ انت – کہ آ جی ڈی اے ھسپتال ءَ برگ بیتگ انت-

دمگی اھوالانی رد ءَ اُرش ءَ پد پولیس ءُ اُرشکارانی میان ءَ تیرگواری بیتگ، چریشی ءِ آسر ءَ پولیس ءِ یک کارندھے زدگ بیتگ ءُ پد ءَ آئی ءَ ٹپانی درد نہ سگ اتگ ءُ بیران بیتگ ءُ گمانی رنگ ءَ یک اُرشکارے ھم ھمے جاہ ءَ جنگ بیتگ-

وئیل ءَ پد ءَ پورسز ءَ دمگ انگیر کتگ ءُ پٹ ءُ پول بندات کتگ-

ھمے وڑ تربت پولیس ءِ رد ءَ سنٹر جیل ءِ نزیک ءَ ھجامے ءِ دکان ءَ پرپٹ سواریں مردماں تیرگواری کتگ ءُ سندھ بفین ءَ سیادی داروکیں دو مردم زدگ کتگ انت کہ آیانی پجار مھمد ھسین ء مھمد ءُ عبدالکریم ء اھمد ناماں زانگ بیتگ انت-

گیشیں پٹ ءُ پول پولیس کنگ ءَ انت-

بلوچستان ءِ دمگ پنجگور ءِ ھند گرمکان رخشان کور ءَ یکشمبے ءِ روچ ءَ تیرسپتگیں لاشے دزکپتگ-

لاش پنجگور ءِ نادراھجاہ ءَ سر کنگ بیتگ کہ اود ءَ آئی ءِ پجار وھید ء کریمداد جھمنند عیسی کور ءِ نام ءَ زانگ بیتگ-

وھید 31 مارچ2021 ءَ پاکستانی پوج ءَ بیگواہ کتگ بیتگ-

زانگ بہ بیت بلوچستان ءَ پوج ءِ دست ءَ آوار جتگیں مردمانی کوشانی درچ برجاہ انت – چریشی ءِ سبب ءَ بیگواھیں مردمانی کھول سَک ءَ پریشانی ءِ دیمپان انت-

زانگ بہ بیت گوستگیں روچ ءَ چہ ھوشاپ کیچ ءَ یک دروگیں میڑے ءَ سَے بندیگیں مردم کشگ بیتگ انت –

اے مردم جتا جتائیں وھداں پوج ءَ آوار جتگ ءُ بیگواہ کتگ انت ءُ گوستگیں روچ ءَ آیانی تیر جتگیں لاش دزکپتگ انت-

اُستاد کمانچر

نبشتہ کار : شرھاتون بلوچ

دی بلوچستان پوسٹ

تو پہ من ءَ تھنا یک اکسکارے نہ بوتگ ئے تو منی استاد ھم بوتگ ئے۔ ترا چہ من بازیں چیزے دربُرتگ، اکسکاری بہ بیت یا بلوچی لبزانک۔ تئی وڑیں اُستادے ءِ روگ پہ یک شاگِردے ءَ مزنیں تاوانے۔

چوناھا اُستاد تو اکسکاری ءِ پِڑ ءِ تہ ءَ چہ دُرستاں دیم ءَ اِت ئے۔ من کہ نوک نوک اکسکاری بندات کُتگ اَت ، گُڑا من تئی اکس گوں تئی نام ءَ دیست اَنت ۔ ھردیں کہ تئی اکس منی چمانی دیم ءَ کپت اَنت۔ من ھمے مار اِت کہ ترا گوں زمین ءَ بے کساس مھر اِنت ۔

چد ءُ ساری کہ من دگہ اکسکار ھم دیستگ اَت ۔ بلے آ وڑ ءَ کہ تو مارا بلوچستان پیش داشتگ آ وھد ءَ آ اکسکاراں ۔ بلوچستان تئی وڑ ءَ پیش نہ داشتگ ۔ تو ھما وڑ ءَ کہ بلوچستان دگُنیا دیم ءَ آؤرتگ اَت، دگہ کسی اکسانی تہ ءَ اے پیم ءَ بلوچستان من ءَ دَست نہ کپتگ۔ تئی اکسانی تہ ءَ بازیں گم ءُ رنج ، بزّگی ءُ بیچارگی ، لاچاری ءُ شُد لاپ ، دگ ءِ لمب ءَ نشتگیں چُکے پریاد ، پُرشتگیں بانے ءِ دیوال ، دشت ءِ پُل مھر ارشتیں پُلک ، ءُ بلوچ ءِ گیدی دل بند ءِ گْوست ءِ کسّہ ردوم زُرتگیں کسّھانی گورستان ، ھانی ءِ تھنائی ءِ کبر ءُ شے مرید ءِ نہ بوگ ءِ گْواہ دُرست ، بلوچستان ءِ مات کوہ ءِ بُرزیں زید ءِ ندارگ ، بہ بیت یا کہ کوہ ءِ سلیمان ءِ وش تبیں نودے شنزگ ءَ بہ بیت ، یاکہ بازار ءِ تہ ءَ نشتگیں ھما چُک کہ سواس ساپ کنت روچ گْوازین اِیت ، یاکہ ھور ءُ ھار ءَ بُرتگیں گِس بہ بَنت ، یا کہ مات ءِ دزبندی بہ بیت ، اے کُل تو مارا وتی سپر ءِ ھمراھی ءَ پیش داشتگ اَنت ، اے کُل تو پریم ءَ کُتگ اَنت-

من ءَ یات کنت یک روچے من تو ھمے گپ ءِ سر ءَ دیوان کُت کہ “اکس ھبر کن اَنت ءُ اکساں زبان پِر اِنت ۔ باز مردم وتی گل ءُ شادیانی ءَ ، ایردستیں راج ءِ بزّگ ءُ لاچاری ءَ اکسانی دُروشم ءَ درشان کن اَنت۔ ءُ باید اِنت مردم ھمراداری بہ کن اَنت” تو پسّو دات “شر گُشگ ءَ ئے ، بلے اے گپ کمو گیشینگ لوٹ اِیت من پد ءَ یک روچے ھمے سرھال ءِ سر ءَ گپ کناں “۔ منی ءُ تئی دیوان سرجم نہ اَت، تو پیسر ءَ مارا یلو دات ءُ شُت ئے۔ تو سرپد ئے استاد تئی بیران بوگ ءَ رند درستیں اکسکار پہ تو اکس سوگات کنگ ءَ اِت اَنت ۔

بلے من نہ کُت پرچاکہ من ھما اکس کہ ترا پیسر ءَ سوگات کُتگ اَت آ ترا انگت ءَ تک سر کُت نہ کُت من ءَ بہ بَکش ، گُڑا نوں من چوں اکس سوگات بہ کناں کہ پیسری اکس انگت تک ترا سر نہ بوتگ؟ ما باز کم دیوان کُت بلے ھردیں کہ ما دوچار کپت ایں۔ ما اکسانی بابت ءَ ھبر کُت۔ من ءَ تئی اکسانی تہ ءَ دُرستاں چہ گیش باھڑ ءُ سَمّی ءِ اکس دوست بوت اَنت ۔ من ھردیں کہ ایشانی اکس دیست اَنت من ءَ وشی رس اِت۔ نوں باھڑ ءُ سَمی ءِ شوکیں بچکنداں کے مارا تک سر کُت کنت؟ بلوچستان اے گپ ءِ شاھِد اِنت کہ تو گوں بلوچستان ءَ مھر کُتگ، بلوچستان ءِ ھرچ دمک ءُ دمگاں گوں مھر کُتگ، بلوچستان ءِ کوہ ءُ کوچُگ شر سرپد اَنت کہ تئی پادانی نشان اگاں زمین ءِ لاچار ءُ بزّگیں میتگ ءُ ھلک ایر اَنت، تو وتی زمین ءِ ھک ادا کُتگ۔ تو وتی گُڈی وھد ءَ تک کیمراہ ءَ گُٹ ءَ لوپ کُتگ ، بلوچستان ءِ ندارگانی اکسکاری بوتگ اَنت، دُگنیا ءَ پیش دارگ ءَ بوتگ ئے اے جھان ءَ یک زمینے ھَست کہ آ چینچو بزگ ءُ لاچار اِنت اے گیمُرتگیں ندارگ چینچو زیبا اَنت، دود ءُ ربیدگ ءُ ادب چون اِنت ۔ اے درچک، دار، میتگ، کِشک اے سرجمیں چیز تئی کیمراہ ءِ لینس ءِ تہ ءَ بوتگ اَنت ساہ دار بوتگ یا کہ ساہ دار نہ بوتگ تو آئی ءِ ارزشت زانتگ۔ من اگاں اے ھبر ءَ بہ کن آں بوت کنت من رد مہ باں کہ تو مارا وَ یلو داتگ بلے تو وتی زمین انگت یلو نہ داتگ، اے گپ ھم ھراب نہ بیت کہ تو ھَست ئے وتی زمین ءِ دلبند ءَ واب ئے ، تو گوں زمین ءَ انچو مھر کُتگ کہ زمین ءَ وتی دلبند ءَ ترا جاگہ داتگ ۔ انچو گُش اَنت کہ زمین مات اِنت ، مات ءَ گوں مھر پاک ءُ پلگار بیت ۔ تو بلوچستان وتی مات کُتگ آئی ءَ ترا وتی چُک کُتگ وتی سینگ ءَ جاہ ئِے داتگ ۔۔ شُما انگت یک ءُ دومی ءَ گوں ھما رنگ ءَ مھر کنگ اِت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءَ پاکستانی پوج ءَ دگہ یک دروگیں میڑ، سے بیگواھیں مردم کشتگ اَنت-

ٹینچنگ نادُراھجاہ تربت انتزامیہ رِد ءَ مردگ جاہ ءَ سے مردمانی لاش آرگ بیتگ اَنت-

دمگی اِھوالکار رِد ءَ ٹیچنگ نادُراھجاہ ءَ آرگ بیتگیں لاش ھوشاپ ءَ دروگیں میڑ ءَ جنگ بیتگیں مردمانیگ اَنت-

نادُراھجاہ ءَ آرگ بیتگیں سئیں لاشانی پجّار پیسر ءَ چہ زورانسری بیگواہ مردماں بیتگ اَنت- آیانی تہ ءَ عمران ء عبدالواحد جھمنند دشتی بازار ءَ بیگواہ کنگ بیتگ، حامد ء مولا داد جھمنند آپسر چاردہ اپریل دوھزار بیست پنچ ءَ چہ آپسر ءَ بیگواہ کنگ بیتگ- ارشاد ء زباد جھمنند جت بازار کولواہ نام ءَ چہ بیتگ اَنت-

زانگ بہ بیت پاکستانی پوج ءَ ٹاہ داتگ اَت کہ اے مردم ما یک میرے ءَ جتگ اَنت بلے ھرسئیانی پجّار چہ پیسر ءَ بیگواہ بیتگیں مردماں چہ بیتگ اَنت-

ھمے وڑ گوستگیں شپ ءَ پنجگور ءَ پاکستانی پوج ءَ گاڑی سر ءَ تیرگواری ءَ چہ تاپلو زامران ءِ جھمنند لعل جان الٰھی بخش بیران بیتگ-

کھول رِد ءَ پوج ءَ رؤکیں گاڑی سر ءَ تیرگواری کتگ چریشی ءِ آسر ءَ لعل بیران بیتگ – مروچی آ تربت ءَ کل ءُ کسارت کنگ بیتگ-

شمبے ءِ روچ ءَ ھم بلوچستان ءِ جتاجتائیں دمگاں پاکستانی لشکر ءُ سرکاری مڈیانی سر ءَ ھترناکیں اُرش برجاہ بوتگ اَنت۔

ھالانی رد ءَ کیچ ءِ تمپ ءَ گریڈ اسٹیشن ءَ پاکستانی پوج ملٹری انٹیلی جنس کارگس ءِ سر ءَ اُرش کنگ بوتگ ایشی ءَ پد دمگ ءَ تراک ءُ تیر گواری ءِ توار بوتگ ۔ اے وئیل ءَ پد چیک پوسٹ ءُ نزیکیں کیمپانی کش ءُ گور ءَ گشت گیش کنگ بوتگ اَنت۔

چہ پنجگور ءَ ھالانی رد ءَ گوستگیں شپ ءَ رخشان ءَ بنجاھی شھدگ بازیں کلاکاں سلاہ بندیں مردماں بند کتگ کہ ایشی ءِ تہ ءَ گاڑیانی پٹ ءُ پول کنگ بوتگ انر۔

ھمے رنگ ءَ بلیدہ ءِ دمگ الندور ءَ پاکستانی لشکر ءِ پوسٹ ءِ سر ءَ سلاہ بندیں مردماں اُرش کتگ ءُ ایف ڈبلیو او ءِ مشینریاناں تاوان داتگ۔

بلیدہ ءِ دمگ گیلی ءَ فورس چیک پوسٹ ءَ ھم تیرگواری بوتگ۔

زمران ءِ دمگ تولنگی ءَ پاکستانی لشکر ءِ سر ءَ اسنائپر اُرش کنگ بوتگ ءُ کلوکی ءَ دگہ اسنائپر اُرش ءَ لشکر ءِ کارندھے بیران بوتگ۔

ایشی ءَ ابید کیچ ءِ دمگ تمپ خیر آباد ءَ سلاہ بندیں مردماں راکٹ ءُ وتکاریں سلاھاں گوں لورسز کیمپ ءِ سر ءَ اُرش کتگ کہ ایشی ءَ پد بازیں وھدے ءَ تیرگواری ءُ تراکانی توار اشکنگ بوتگ انت۔

اھوالدار ءں گشگ انت کہ اے اُرشانی تہ ءَ پاکستانی لشکر ءَ مزنیں تاوان رس اتگ بلے انگت ءَ اے وئیلانی بابت ءَ سرکار ءِ نیمگ ءَ ھچ وڑیں راستی یا سرکاری بیان شنگ نہ بوتگ انت۔

زانگ بہ بیت کہ بی ایل اے ءَ مرچی سھب ءَ شنگ بوتگیں یک کسانیں بیانے ءَ بلوچستان ءِ 39 جتا جتائیں جاھانی سر ءَ اُرشانی زمہ واری زرتگ ءُ گْوشتگ کہ اے کارروائی انگت ءَ برجاہ اَنت۔

جارکش ءِ رد ءَ اے کارروائیانی تہ ءَ پولیس اسٹیشنانہ دست گرگ، مزنیں شھدگانی بند کنگ، چاریگانی دزگیر کنگ، پاکستانی زورگیریں لشکر ءِ سر ءَ اُرش کنگ ءُُ مڈءانیلٹ ءُُ پُل ءَ گوں بندوکیں کاروان آناں نشانگ جوڑ کنگ ھوار اِنت۔

بلوچستان ءِ دمگ پنجگور ءَ سلاہ بندیں گل بلوچ لبریشن آرمی ءِ نیمگ ءَ پاکستانی لشکر ءِ کاروان ءِ سر ءَ اُرش ءَ کم چہ کم 13 کارندہ بیران بوتگ اَنت۔

اے وئیل گوستگیں شپ ءَ پنجگور ءِ دمگ بونستان ءِ نزیک ءَ بوتگ کہ بی ایل اے ءِ نیمگ ءَ ناکہ بندی کنگ بوتگ۔

دمگی اھوالدار ءِ رد ءَ بلوچ سرمچاراں کاروان ءِ سر بستگ ءُ سئے فوجی گاڑی نشانگ جوڑ کتگ ءُ یک گاڑی یے ءَ آس کپتگ ۔

اھوالدار ءِ رد ءَ اے اُرش ءَ پاکستانی لشکر ءَ مزنیں تاوانے رس اتگ بلے اے درگت ءَ سرکاری تک ءَ ھچ وڑیں گپ ءِ پدر کنگ نہ بوتگ۔

بی ایل اے ءَ مرچی سھب ءَ یک کسانیں بیانے شنگ کتگ ءُ گْوشتگ کہ بلوچستان ءِ 39 جتا جتائیں جاھانی سر ءَ اُرشانی زمہ واریاں من ایں۔ اے اُرش برجاہ اِنت۔

جارکش ءَ گشتگ کہ اے کارروائیانی تہ ءَ پولیس اسٹیشنانی سر ءَ قبضہ کنگ، مزنیں شھدگاں بند کنگ، چاریگانی دزگیر کنگ، زورگیریں پاکستانی پورسز ءِ سر ءَ اُرش کنگ ءُ مڈی لٹ ءُ پُل ءَ گوں بندوکیں کاروانانی سر ءَ اُرش کنگ ھوار انت۔

بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءَ گوشتگ بلوچستان ءِ 39 جاھاں اُرشانی زمہ واریاں من ایں ءُ اے اُرش انگت ءَ برجاہ انت-

جارکش ءَ گوشتگ اے اُرشاں تھانھانی دستیگ کنگ، گچینی شھدگانی سر ءَ ناکہ بندی، چاریگانی دزگیری، زورگریں پاکستانی پوج ءِ سر ءَ اُرش، ءُ مڈی بروکیں کاروانانی سر ءَ اُرش ھوار انت-

جیئند بلوچ ءَ گوشتگ اے اُرشانی سرجمیں اھوالاں زوت رسانکدراں شنگ کن ایں-

بلوچ لبریشن آرمی ءَ کلات ءِ شھر منگچر ءَ چہ دزگیریں پولیس کارندہ یلہ داتگ اَنت ءُ ھمے وھد ءَ یک ویڈیو کلوھے یل داتگیں کارمنداں پہ بلوچ راج ءَ ھاسیں رنگ ءَ پورسز ءِ کارندھاں شنگ کنگ بیتگ۔

اے ویڈیو کلوہ بی ایل اے ءِ آفیشل میڈیا چینل ’’ھکل‘‘ ءَ شنگ کنگ بوتگ کہ ایشی ءِ تہ ءَ دزگیریں پولیس ءِ کارندھانی ھمراھی ءَ نوکیں سلاھاں گوں سلاہ بندیں بلوچ جنگول گندگ بنت۔

بلوچ لبریشن آرمی ءِ یک سرمچارے گل ءِ پیام ءَ درشان کنگ ءِ وھد ءَ گش ایت کہ بلوچ لبریشن آرمی ءِ نیمگ ءَ چہ اے کلوہ گچینی پہ بلوچستان پولیس، لیویز فورس ءُ ھما درستیں بلوچاں کہ ریاستی ادارھانی تہ ءَ وردی ءِ ھمراھی ءَ کار کنگ ءَ انت۔

آ گش ایت کہ ما اے دزگیریں پولیس ءِ کارندھاں مرچی یک پیامے ءِ دروشم ءَ، یک چیدگی گامگیجے ءِ دروشم ءَ، یک نیک راھی ءِ دروشم ءَ یلہ کنگ ءَ ایں. اے یلہ کنگ نزوری ءِ نشانی نہ اِنت بلکیں مئے سیاسی پھتوئی ءِ نشانی اِنت، اکلاکہ چکاری ءِ نشانی اِنت ءُ مئے راج ءَ چہ دژمن ءِ سپاں دور کنگ ءِ جھد اِنت۔

دیمتر ءَ گْوش اِیت کہ بلے نوں مارا گْوشگی اِنت کہ بلوچستان پولیس یک بیمناکیں سیمسر ءِ نزیک ءَ اِنت۔ تو وتی ھست بوگ ءَ بے رھبند دارگ ءِ بدل ءَ پہ زورگیریں لشکر ءَ میدانی لورس جوڑ بوگ ءِ پیسلہ کتگ۔ شما ھما چیک پوسٹانی تہ ءَ اوشتاتگ ئے کہ اود ءَ زورگیریں لورسز بلوچ ورنایاں آوار جنت، آپریشن ءِ نگرانی ءَ کن ئے کہ اود ءَ فدائینانی لاشاں گران کنت اِنت، تو ھما بریفنگزانی بھر ئے کہ اود ءَ بلوچ گھگیری ءَ جرمے گشگ بیت۔

سرمچار گُش ایت ما زانیں کہ تو ھم اے نوآبادیاتی نزام ءِ آماچ بوت کن ئے، بلے وھدے کہ تو دژمن ءِ ھمراھی ءَ، گوں آئی ءِ تپنگ ءُ اوگاماں اوشتات کن ئے گڑا تئی پجار بلوچ ءِ نہ بلکیں زورگیریں وردی ءِ بھر جوڑ بیت۔

آ گیشتر گش ایت کہ مرچیگیں امل ءِ تَک ءَ ما ترا اے ھَد ءَ چہ پد کشگ ءِ موہ دیگ ءَ ایں ۔ ما ترا دژمن ءِ رنگ ءَ گندگ نہ لوٹیں، ما ترا دژمن ءِ رنگ ءَ پیش دارگ نہ لوٹیں بلے اے گپ تئی کارانی سر ءَ بندوک اِنت کہ تو وت ءَ کجام نیمگ ءَ ایر کن ئے۔

آ گش ایت کہ اے یلہ کنگ نیک راھی ءِ درشان اِنت، یک موھے، یک دروازگے کہ ما پچ داشتگ۔ اگاں تو اے سُٹک ءَ سرپد بہ بئے، ءُ زور گیریں لشکر ءِ جنگی مشینری ءَ چہ دور بہ بئے، ما ترا وتی لیکیں ۔ بلے اگاں تو وتی انّیگیں راہ ءَ برجم بہ دار ئے، بلوچ مزاھمت ءِ ھلاپ ءَ سرگرم بہ بئے، گڑا ترا ھمے رنگ ءَ گندگ بیت کہ ما دژمن ءَ گندیں، ءُ آسر ھم ھمے رد ءَ بنت۔

بلوچ لبریشن آرمی ءِ سرمچار گڈسرا گش ایت کہ ما لوٹیں کہ اے کلوہ بلوچستان ءِ ھر پولیس اسٹیشن، ھر چیک پوسٹ، ءُ ھر بلوچ وردی پوشیں مردم ءَ سر بہ بیت کہ بی ایل اے ترا وتی راج ءِ ھلاپ ءَ سلاہ چست کنگ ءَ چہ رکّینگ لوٹ ایت۔ ما تیر پہ دژمن ءَ داریں بلے پہ وتی دروازگ ءَ پچ داریں۔ نوں اے پیسلہ تئی دست ءَ اِنت کہ تو اے موہ ءَ چون کارمرز کن ئے۔

بلوچستان ءِ جتا جتائیں جاھاں چہ گوستگیں شپ ءَ یکشل ءَ سلاہ بندانی ناکہ بندی برجاہ بیتگ ءُ بازیں جاھاں تیرگواری ءُ پولیس ءِ گاڑی سوچگ بیتگ انت-

نوشکی اھمد وال ءَ بلوچ آجوئی لوٹوکیں سلاپ بنداں سرجم ءَ وتی کنٹرول ءَ کتگ ءُ بازیں جاھاں سلاہ بنداں سنگر گپتگ انت ءُ شھدگ ءِ سر ءَ ناکہ بندی کتگ-

دمگی مردماں دی بلوچستان پوسٹ ءَ گوں گوشتگ گوستگیں شپ ءَ بازیں اداراں اھمد وال بلوچ آجوئی دوستیں پاٹیانی کنٹرول ءَ بیتگ کہ آیاں بازیں جاھاں پوزیشن سمبالیتگ-

آیاں گوشتگ تفتان – شال ءِ بنجاھی شھدگ N40 ءِ سر ءَ سلاہ بنداں ناکہ بندی کتگ ءُ سرجم ءَ وتی کنٹرول ءَ کتگ –

اھوالانی رد ءَ گوشگ بیتگ پولیس ءُ لیویز ءِ تھانھاں ھوار ریل ءِ اسٹیشن ھم دستیگ کنگ بیتگ انت-

دمگی مردمانی رد ءَ ھمے وھد ءَ مڈی بروکین گاڑی سوچگ بیتگ انت ءُ چار درملکی مردم دزگیر کنگ ءُ برگ بیتگ انت-

زانگ بہ بیت سرجمیں بلوچستان ءَ ھترناکیں اُرش بوگ ءَ انت کہ گوستگیں شپ ءَ شال ءَ ھواریں دمگ دشت،پنجگور، ھوشاپ، مند، تربت، سھبت پور، ڈیرہ مراد جمالی ءَ شھدگ بستگ ءُ ھمے وھد ءَ پورسز ھم نشانگ کنگ بیتگ-

کلات گراپ ءِ ھند ءَ پاکستانی پورسز ءِ بنجاھی بنجل سلاہ بنداں اُرش ءِ نشانگ کتگ کہ اود ءَ بازیں اداراں جنگ برجاہ بیتگ-

اوتھل ءِ شھر ءَ چہ پنجاپ ءَ سیادی داروکیں سَے مردم سلاہ بنداں کشتگ انت-

شال ءِ شھر ءِ توک ءَ پاکستان پورسز ءِ سر ءَ دہ ءَ گیش اُرش بیتگ انت ءُ اے اُرشانی درچ مستونگ، سبی ءُ کیچ ءِ دمگاں ھم برجاہ بیتگ انت-

بلوچستان ءَ سلاہ بندیں گلانی نیمگ ءَ اُرشانی ترندی یکشل ءَ گندگ بوگ ءَ انت کہ اود ءَ بازیں کچے ءَ پورسز نشانگ کنگ بوگ ءَ انت-

بلوچستان ءِ جتا جتائیں جاھاں شھدگانی سر ءَ سلاہ بندانی ناکہ بندی، تیرگواری ، تراک ءُ اوتھل ءَ تیرگواری ءَ سَے دری مردم بیران بیتگ انت-

لسبیلہ ءِ دمگ اوتھل ءَ آدینگ ءِ شپ ءَ ناشناسیں سلاہ بندیں مردماں تیرگواری کتگ ھجامے ءَ ھوار سے مردم کشتگ اَنت آیانی تہ ءَ دو ءِ سیادی چہ پنجاب ءَ اِنت وھدے کہ یکے ءِ سیادی پکتونواہ ءَ چہ گوشگ بیگ ءَ اِنت وھدے کہ اُرش ءَ یک مردمے ٹپی بیتگ-

پولیس ھما دمان ءَ سر بیتگ منانک یکجاہ کتگ ءُ لاش ٹپی نزیکیں نادُراھجاہ ءَ برگ ءَ پد ٹپی گیشیں الاج واستا کراچی ءَ برگ بیتگ اَنت – بلے وئیل سوب انگت زانگ نہ بیتگ-

ھمے وڑ ھوشاپ ءَ سلاہ بندیں مردماں اُرش کتگ ءُ شھر ءِ کنٹرول دستیگ کتگ-

اھوالانی رد ءَ ھوشاپ ءَ لیویز تھانہ، نادرا آفس سوچگ بیتگ ءُ دگ ءِ سر ءَ ناکہ بندی کتگ-

ھمے وڑ پنجگور ءِ دمگ وشبود ءَ سلاہ بنداں دگ بستگ ءُ پولیس ءِ دو گاڑی سوتکگ انت ءُ پولیس کارندھانی سِلاہ پچگپتگ انت-

اھوالانی رد ءَ پولیس ءِ تھانہ ءِ دستیگ کنگ ءَ پد سلاہ برتگ ءُ تھانہ سوتکگ –

پنجگور ءِ دگہ یک دمگے بونستان ءَ سلاہ بنداں دگ بستگ ءُ پولیس ءِ چوکی دستیگ کتگ ءُ ڈیتھ اسکواڈ ءِ کارندھانی سر ءَ اُرش ءِ اھوال ھست انت-

ھمے وڑ شال ءِ نزیکین دمگ دشت تیرہ میل ءَ ھم سلاہ بنداں دگ بستگ ءُ تیرگواری ءُ تراکانی توار اشکنگ بیتگ انت-

ایشاں ھوار کیچ ءَ ھوار بلوچستان ءِ دگہ دگہ جاھاں ھم دگانی سر ءَ بندگ ءُ تیرگواری ءُ تراکانی توار اشکنگ بوگ ءَ انت-

زانگ بہ بیت چہ گوستگیں شپ ءَ بلوچستان ءَ یکشلیں اُرشانی درچ برجاہ انت کہ اود ءَ پوج ءُ پولیس ءَ ھوار دگہ سرکاری ساز ءُ سامان نشانگ کنگ بوگ ءَ انت-

بلوچستان ءَ گوستگیں بیست ءُ چار ساھتانی میان ءَ بازیں کچے ءَ پورسز ءُ دگہ کار سازانی سر ءَ اُرش بیتگ انت-

تنی وھدی سرکار ءِ نیمگ ءَ اے گپانی منانک دیم ءَ نیتکگ انت ءُ نانکہ دگہ سلاہ بنداں اے اُرشانی زمہ واری من اتگ انت-

بلوچستان ءَ بلوچ آجوئی لوٹوکیں سلاہ بندیں گل پرکار انت بلے چیزے وھد ءِ میان ءَ اے اُرشانی توک ءَ یک ترندی یے دیم ءَ آیگ ءَ انت کہ اود ءَ سلاہ بند بازیں وھداں دگانی سر ءَ بندگ ءُ وتی کنٹرول ءَ کنگ ءَ انت-

سیاسی مھلوک ءِ گوشگ انت کہ اے دگ بندیاں چہ ھمے زانگ بیت اِنت کہ بلوچستان ءَ بلوچ سلاہ بنداں وتی کنٹرول ءِ کساس نزیک کتگ ءُ سرکاری زور ھلاس کتگ-

دومی نیمگ ءَ سرکار ءِ ھلاپ ءَ اوشتوکیں اپوزیشن پاٹی ءِ گوشگ انت کہ بلوچستان ءَ سرکار ءِ زور ھلاس بیتگ ءُ بلوچ سلاہ بنداں وتی زور گیش کتگ-