TBP Balochi

روکپتی اوگانستان ءَ سَے شمبے ءِ شپ ءَ یک مساپر بریں بس ءِ ٹرک ءُ موٹر سائیکل ءَ گوں ٹکر جنگ ءَ 76 مردم بیران بوتگ انت۔

بس ءِ تہ ءَ اوگان مھاجرین سوار بوتگ اَنت کہ چہ ایران ءَ انوگیں وھد ءَ واتر بوتگ اَنت۔

ھرات پولیس ءِ رد ءَ اے ویل غزرا ءَ ھرات ءِ نزیک ءَ بوتگ ، بس ‘ ترند روگ ءُ بے پرواھی ’ ءَ پیش اتکگ-

اُستانی گورنر ءِ جارکش مھمد یوسف سعیدی ءَ اے ایف پی ءَ گوں گوشتگ مساپر بریں بس ءَ اوگان شھری سوات بیتگ انت کہ اسلام قلعہ بارڈر ءِ کراسنگ ءَ سوار بیتگ ءُ کابل ءِ نیمگ ءَ آیگ ءَ بیتگ انت-

پولیس ءِ رد ءَ بس ءَ اولی رند ءَ موٹر سائیکل ءُ پد ءَ ٹیل ءَ پُریں ٹرک ءَ را ٹکر جتگ ءُ پد ءَ آس چِست بوتگ۔ بس ءِ تہ ءَ سواریں سئے مسافر چہ وئیل ءَ زندگی ءَ بچ اتگ انت ءُ ٹرک ءِ تہ ءَ سواریں دو مردم ءُ موٹر سائیکل ءِ سواریں دو مردم ھم بیران بوتگ اَنت۔

یک اھوالکارے ءِ گشگ ءِ رد ءَ بس ءُ دگہ تاوان بوتگیں گاڑیانی چہ وئیل ءَ پد ھم بازیں کلاکاں سڑک ءِ سر ءَ بوتگ اَنت۔

اقوام متحدہ ءِ پناہ گزینانی ادارہ ءِ رد ءَ اے سال ءَ تاں انوگ ءَ کم چہ کم پانزدہ لک اوگان چہ ایران ءُ پاکستان ءَ وتی ڈیھ ءَ واتر بوتگ اَنت۔ ایران ءَ لکانی اوگان پناہ گزینانی سر ءَ چہ ملک ءَ درکپگ ءِ زور ءِ پد ءَ گوستگیں ماھاں پد ءَ واتر بوھگ ءِ تہ ءَ ترندی اتکگ۔

اوگانستان ءَ ٹریپک ءِ ویل ھمک روچ پیش آیگ ءَ انت کہ ایشی ءِ مستریں سبب نا وشیں راہ، نا ایمنیں گاڑی ءِ ڈرائیونگ ءُ کانون ءِ گر ءُ دسری ءِ کمی انت۔ گوستگیں سال ءِ دسمبر ءَ میانی اوگانستان ءَ دو جتا جتائیں بس ءِ ویلاں کم چہ کم 52 مردم بیران بوتگ انت۔

پاکستان ءِ مھکمہ ءِ موسمیات ءِ رد ءَ بحیرہ عرب ءُ خلیج بنگال ءِ نیمگ ءَ چہ تُرندیں بَشی ھور ڈیھ ءِ گیشتریں دمگاں ھاسیں رنگ ءَ رودراتکی دمگاں یکشل ءَ آیگ ءَ انت کہ ایشی ءِ سان ءِ چیر ءَ آیوکیں دو روچانی تہ ءَ سندھ ءُ بلوچستان ءَ ھئور ءُ توپان ءِ ھترہ ھست انت۔

محکمہ موسمیات ءِ رد ءَ سندھ، کراچی، حیدرآباد، مٹھی، تھرپارکر، عمرکوٹ، میرپورخاص، شہید بینظیر آباد، ٹھٹا، بدین، سجاول، ٹنڈو اللہ یار، ٹنڈو محمد خان، سانگھڑ، جامشورو ءَ ترندیں گوات ءُ گرند ءُ گروکانی ھواری ءَ ھَورانی گمان اِنت ءُ جھلگیں دمگاں توپان ءِ ھترہ اِنت۔

ھمے وڑ بلوچستان ءِ بارکھان، موسیٰ خیل، لورالائی، سبی، ژوب، قلعہ سیف اللہ، ھزدار، لسبیلہ، آواران، کیچ، گوادر ءُ پنجگور ءِ دمگاں ترندیں گوات، گرند ءُ گروکانی ھواری ءَ وھد وھد ءَ ھورانی گوارگ ءِ گمان انت-

زانگ بہ بیت گوستگیں روچ ءَ کراچی ءَ توپانی ھوراں بازیں جاھاں آپ لوھڑ بیتگ ءُ دگانی سر ءَ مَلگی ندارگ ءَ گندگ بیتگ کہ چریشی ءَ شھریانی زند سانمند بیتگ-

کراچی ءِ ھند ناظم آباد شاھراہ فیصل ءُ دگہ جاھاں دگانی سر ءَ آپ چو ھار ءِ پیم ءَ ملگ ءَ گندگ بیتگ کہ اود ءَ گاڑی ءُ پرپٹانی راہ بند بیتگ انت-

انتزامیہ ءَ مھلوک کڈن کتگ کہ آ اے وھد ءَ چہ گِساں ڈن در مئیت ءُ وتی سلامتی ءَ ستکی بہ کنت-

کراچی پریس کلب ءِ دیم ءَ زورانسری بیگواہ زاھد بلوچ ءِ کھول ءِ زھرشانی برجاہ، بلوچ بیگواھیں مردمانی کھول وتی دوستناکانی یل کنائینگ ءِ ھاتر ءَ توپانی موسم ءَ ھم زھرشانی برجاہ داشتگ – کراچی پریس کلب ءِ ڈن ءَ بیگواھیں ورنا زاھد علی بلوچ ءِ کھول گوستگیں پانزدہ روچ ءَ چہ نندانک ءَ نشتگ-

زاھد علی بلوچ ءِ پت، حمید بلوچ ءَ سے شمبے ءِ روچ ءَ ھور ءِ سر ءَ رسانکدر ءَ چہ تران کنان ءَ گوشتگ کہ آئی ءِ چُک ءِ بیگواھی ءَ یک ماھے ءَ گیش گوستگ کہ آ انگت یل بیت یا ساڑی بیگ ءِ درگت ءَ ھچ وڑیں ھال دز نہ کپتگ-

آئی ءَ گوشتگ کہ زاھد 17 جولائی ءِ بیگاہ پنچ ءَ کراچی ءَ سواری ءِ ودار ءَ بیتگ کہ ریاستی ادارھانی کارمنداں زورانسری آوار جتگ، چریشی ءَ پد آ بیگواہ ءَ اِنت – آئی ءِ رِد ءَ نو سی سے روچ گوستگ کہ بلے مارا ھچ سرپدی نیست کہ مئے چُک کجا اِنت کجام ھال ءِ تہ ءَ اِنت-

حمید بلوچ ءَ لوٹ کتگ کہ اگاں زاھد سر ءَ کجام وڑیں بھتامے ھست گُڑا آئین ءُ کانود ءِ رِد ءَ آئی ءَ آمیدگس ءَ پیش بہ کن اِت، بلے اے وڑ بیگواہ کنگ یک کھولے ءَ اوپار نہ کنوکیں دردے-

آئی ءَ دیمتر ءَ گوشتگ زھرشانی بُنجل تاں ھما وھد ءَ برجاہ بیت دانکہ زاھد یل کنگ نہ بیت- حمید بلوچ ءَ انسانی ھکانی گلاں ،سول سوسائٹی، اِھوالکار، آمیدگس ءُ انساپ دوستیں مردماں چہ دزبندی کتگ کہ آ زاھد ءِ یل کنائینگ ءِ ھاتر ءَ توار چست بہ کن اَنت-

کیچ ءِ دمگ چہ دازن تمپ ءَ سادی داروکیں ورناہ سھیل احمد ء عبداللہ لشکراں آجو بیتگ ءُ وتی لوگ ءَ سر بیتگ-

زانگ بہ بیت کہ سھیل احمد یازدہ اکتوبر 2024 ءَ چہ دازن ءِ تھسیل تمپ ءَ پاکستانی پوج ءَ آوار جتگ ءُ بیگواہ کتگ ، بلے گوستگیں دہ ماہ ءَ زورانسری بیگواھی ءَ پد آ آجو بیتگ-

زانگ بہ بیت کہ بلوچستان ءَ زورانسری آوار جنی ءِ ھلاپ ءَ وائس فار بلوچ مسنگ پرسنز، بلوچ یکجھتی کمیٹی ءُ کھول ءِ نیمگ ءَ چہ زھرشانی برجاہ – وھدے کہ دومی نیمگ ءَ ھمکروچی ھساب ءَ زورانسری آوار جنی ءِ کیس نکش بیگ ءَ اَنت-

پنجگور ءِ دمگ سوردو ءَ گوستگیں شپ ءَ ناشناسیں سلاہ بندیں مردماں یک لوگے ءِ سر ءَ تیرگواری کتگ چار مردم بیران بیتگ اَنت-

اِھوالکار ءِ رِد ءَ بیران بیتگیں مردمانی پجّار غلام سرور ء محمد نور ، اسلام ءُ نظام ء غلام سرور ( جھمنند گچک، سوردو ) حبیب اللہ ء شاہ محمد ( جھمنند گریشہ ھُزدار ) ءُ علی احمد ( جھمنند شال ) ناماں چہ بیتگ اَنت-

دمگی اِھوالکار ءِ گوشگ اِنت کہ جنگ بیتگیں مردمانی سیادی یک سرکاری پلامرزی سلاہ بندیں ٹولی ءَ چہ بیتگ اَنت کہ دمگ ءَ چاگردی سلّکاریاں ھوار ورنایانی آوار جنگ ءُ دکانودی کوش ءَ ھمگرنچ بیتگ اَنت-

اے وئیل انگت ھچ وڑیں سلاہ بندیں گلاں نہ منّ اِتگ، بلے گوستانک ءَ اے وڑیں اُرشانی زمہ واری بلوچ سلاہ بندیں آجوئی لوٹوکیں گلاں زرتگ اَنت-

سردار علی محمد قلندرانی ءَ ایکس ءَ وتی کلوہ ءَ گْوشتگ کہ آئی ءِ چُک سردار یوسف قلندرانی ءَ گوستگیں روچ ءَ کراچی ءَ پاکستانی لشکر ءَ برتگ، اے اولی ویل نہ اِنت کہ آئی ءِ ھاندان ءَ دیم ءَ اتکگ؛ پانزدہ سال پیسر آئی ءِ سئے زھگ ءُ سی ءَ چہ گیش نزیکیں مردم چہ توتک ءَ بیگواہ بوتگ اَنت کہ تاں روچ ء مرچی واتر نہ بوتگ اَنت۔

آئی ءَ گوشتگ کہ مرچی آ یک رندے پد ءَ ھمے دردناکیں زند ءَ گوازینگ ءَ لاچار انت، ھچ پت وتی چار زھگانی زورانسری بیگواہ کنگ ءِ درد ءَ برداشت نہ کنت۔

آئی ءَ چہ رسانکدر، انسانی ھکانی پھزدار ءُ ھرچ زمیرداراں توار ءَ گوں دزبندی کتگ کہ آئی ھمراھی ءَ بہ اوشت اَنت ءُ آئی ءِ زھگاں ھوار دراھیں بیگواھیں مردمانی واستا وتی توار ءَ چست بہ کن اَنت۔

یوسف قلندرانی پاکستانی پوج ءَ گوستگیں شپ ءَ چہ کراچی ءَ زورانسری بیگواہ کتگ-

گیشیں ھالانی رِد ءَ گوستگیں شپ ءَ میر یوسف قلندرانی کہ قلندرانی ٹک ءِ سردار علی محمد قلندرانی ءِ چُک اِنت پوج ءَ چہ کراچی ءَ دزگیر کتگ ءُ بیگواہ کتگ-

یوسف قلندرانی ءِ برات ءَ چاگردی رسانکدر ایکس ءَ برات ءَ پوج ءِ دست ءَ پوج ءِ دست ءَ زورانسری بیگواھی ءِ گپ داتگ ءُ گْوشتگ کہ سندھ پولیس ءِ ساڑی بیگ ءَ یوسف قلندرانی پوج ءَ آوار جتگ ءُ چریشی ءَ پد آئی ءِ درگت ءَ ھچ وڑیں ھال نیست-

زانگ بہ بیت کہ اے کھول ءِ یازدہ مردم گوستگیں چاردہ سال ءَ چہ زورانسری بیگواہ اَنت کہ آیانی تہ ءَ یوسف قلندرانی ءِ سے برات ءُ دگہ سیاد ھوار اَنت-

پاکستان ءِ بنجاھی شھر اسلام آباد ءَ بلوچ یکجھتی کمیٹی ءِ رھشون ءُ زورانسری بیگواھیں مردمانی یل کنگ ءِ ھاتر ءَ اسلام آباد ءَ بلوچ کھولانی برجاھیں زھرشانی نندانک مرچی سی ءُ چارمی روچ سرجم بیتگ انت-

زھرشانی کنوکاں گْوشتگ ترندیں گرم ءُ ریاستی ادارھانی نیمگ ءَ پاتراپاں ابید ھم ما وتی زھرشانی ءِ تہ ءَ مھکم انت۔ آیانی رد ءَ ناجائزیں وڑے ءَ دزگیریں بی وائی سی ءِ رھشون زوت یل کنگ بہ بنت ءُ بلوچستان ءَ دہ سالاں چہ زوراکیں بیگواھی ءِ سلسلگ ھلاس کنگ بہ بیت۔

زھرشانی کنوکاں اے گپ ءِ سر ءَ زور پر داتگ کہ آیانی لوٹ ایوک ءَ آئین ءُ کانود ءِ رد ءَ نہ اِنت بلکیں یک بنیاتی انسانی ھکے کہ چہ ایشی ءَ گیشتر سرگوز کنگ بے اوپاری انت۔

بلوچستان ءِ دمگ کیچ ءِ دمگ تمپ ءَ یک گسے ءِ سر ءَ دزبمب اُرشے ءَ جنینے ٹپیگ بوتگ۔

دمگی اھوالانی رد ءَ گوستگیں شپ ءَ سریکن ءَ ناشناسیں سلاہ بندیں مردماں سید محمد نامیں مردمے ءِ لوگ ءِ سر ءَ دزبمبے چگل داتگ کہ تراک ءِ سبب ءَ لوگ ءِ تہ ءَ یک جنینے ٹپی بوتگ- زدگ بیتگیں زالبول درمانی ءَ نزیکیں نادراہجاہ ءَ برگ بیتگ-

دمگی مردمانی گشگ اِنت کہ اے اُرش کنوک سرکاری کمک ءِ سلاہ بندیں گل ”ڈیتھ اسکواڈ“ ءَ گوں سیادی دار اَنت۔

زانگ بہ بیت کہ تربت ءُ آئی ءِ کش ءُ گوراں پیسر ءَ ھم سرکاری کمکی گلانی نیمگ ءَ لوگانی سر ءَ ھمے وڑیں اُرش کنگ بوتگ انت کہ ایشی ءِ تہ ءَ زالبول ءُ زھگاں ھوار بازیں مردم ٹپیگ بوتگ اَنت۔

بلوچ ریپلکن گارڈز ءِ جارکش دوستین بلوچ ءَ شنگ کتگیں درشان ءَ گوشتگ گوستگیں شپ ءَ بلوچستان ءِ شھر اوستہ محمد ءَ پولیس اسٹیشن ءِ ریل گیٹ ءِ نزیک ءَ بلوچ ریپبلکن گارڈز ءِ سرمچاراں زورگریں پاکستانی پولیس وین دزبمبے ءِ نشانگ جوڑ کتگ۔ اُرش ھما وھد ءَ کنگ بوتگ کہ آ دمگ ءَ گشت ءَ بوتگ اَنت۔ تراک ءِ آسر ءَ 4 پولیس ءِ کارندہ سک ٹپیگ بوتگ اَنت ءُ گاڑی ءَ را ھم سک باز تاوان رس اتگ۔

جارکش ءَ گوشتگ پولیس ءَ بیھار دے ایں آ لس مھلوک ءِ تنگ کنگ، لب واری ءُ رشوت ءِ زورگ ءَ یل بہ کن اَنت۔ اگاں ناں مئے اُرش چِد ءُ گیشتر مزن بنت-

دوستین بلوچ ءَ گوشتگ مئے گل اے اُرش ءِ زمہ واری ءَ منّ اِیت۔ مئے اے وڑیں اُرش داں بلوچستان ءِ آجوئی ءَ برجاہ مان اَنت۔