TBP Balochi

پولیس ءِ دست ءَ بندیگیں غفار قمبرانی یل کنگ بیتگ-

گیشیں ھالانی رِد ءَ شال ءَ پولیس ءِ دست ءَ تھری ایم پی او ءَ پد ناشرکاری ءِ بھتام ءِ بُنیاد ءَ دزگیر کتگ نیشنل پارٹی ءَ چہ ھمگرنچ سیاسی ءُ انسانی ھکانی باسک عبدالغفار قمبرانی مروچی چہ بندیگجاہ ءَ آجو بیتگ-

عبدالغفار قمبرانی ھمے سال شش اپریل ءَ پاکستانی پوج ءُ پولیس ءَ یک بیڑے ءِ وھد ءَ آوار جتگ ءُ ناشناسیں جاھے ءَ برتگ-

اشی ءَ پد آ دگہ بی وائی سی ءِ سروکانی ھمراھی ءَ تھری ایم پی او ءِ بُنیاد ءَ ھدہ بندیگجاہ ءَ برتگ اَنت-

عبدالغفار قمبرانی ءَ چہ ساری آئی ءِ جنک بیبو بلوچ ھم پولیس ءَ آوار جتگ اَنت بلے بیبو بلوچ انگت ماہ رنگ بلوچ ءَ ھوار دگہ بی وائی سی ءِ سروکانی ءِ ھمراھی ءَ پولیس ءَ آوار جتگ اَنت ءُ جتاجتائیں ایف آئی آر دیمپانی اِنت-

سرکاری پلامرزی ٹولی ءَ تیرگواری کتگ شھری کشتگ-

گیشیں ھالانی رِد ءَ پشمبے ءِ بیگاہ ءَ بلوچستان ءِ دمگ کیچ ءِ تھسیل تمپ ءِ دمگ کوشکلات ءَ پولیس تھانہ تمپ ءِ نزیک ءَ ناشناسیں سلاہ بندیں مردماں تیرگواری کتگ اکمل ء صالح محمد، جھمنند کوشکلات تمپ کُشتگ-

وئیل ءَ پد میاربار تچگ ءَ سوبمند بیتگ اَنت، وھدے کہ پولیس ءَ لاش دستیگ کتگ ءُ نادُراھجاہ ء برتگ-

پولیس ءِ نیمگ ءَ چہ وئیل سوب دیم ءَ نیتکگ، بلے دمگی اِھوالکار ءِ گوشگ اِنت کہ تیرگواری کنوکیں مردمانی سیادی پاکستانی پوج ءِ پلامرزی ءِ یک ٹولی ءَ اِنت-

زانگ بہ بیت اے وھد ءَ بلوچستان ءَ ھاسکار مکران نیمگ ءَ جتاجتائیں دمگاں سرکاری پلامرزی ٹولی کہ آیاں ڈیتھ اسکواڈ گوش اَنت شھریانی آوار جنگ ءُ ٹارگٹ کلنگ ءِ وئیل یکرندے پد ءَ گیشی گندگ اتکگ-

اے ٹولیانی نیمگ ءَ چہ بلوچ سیاسی کارکنان اے سیادانی، دمگی واجکار ءُ جتاجتائیں پڑ ءِ مردماں نشانگ کنگ ءَ اَنت-

سول سوسائٹی ءُ سیاسی گلاں بازیں رند ءَ ھکومت ءَ چہ اے مردمانی پُرکاریانی دارگ ءِ لوٹ کتگ بلے ھکومت نیمگ ءَ چہ تنی وھدے ھچ وڑیں گامگیج زیرگ نہ بیتگ-

بلوچستان ءِ بُنجاھی شھر شال، پاکستان ءِ بُنجاھی شھر اسلام آباد ءُ کراچی ءَ بیگواھیں مردمانی ءُ ورنا ء ناھکیں کوش ءِ ھلاپ ءَ زھرشانیانی درچ برجاہ ءَ اِنت-

اسلام آباد ءَ بی وائی سی ءِ سروکانی ءُ بیگواھیں مردمانی یل کنائینگ ءِ ھاتر ءَ مروچی سی ھشتمی روچ ءَ ھم زھرشانی نندانک برجاہ ءَ اِنت-

چاردہ جون ءَ دزگیر کنگ بیتگیں بی وائی سی ءِ سروکانی کھول ءُ زورانسری بیگواہ کنگ بیتگیں سانمندیں کھول ءَ نیشنل پریس کلب ءِ ڈن ءَ نندانک دیگ ءِ جُھد کتگ-

اسلام آباد پولیس ءَ پُرایمنیں زھرشانی ءِ بے توار کنگ ءِ ھاتر ءَ بدیں رویشگ ءُ بیھار کارمرز کنان ءَ آ داشتگ اَنت-

ھور ءُ تُرسنیگ ءَ پد کھول اے لوٹ ءَکنت، بی وائی سی ءِ رھشونانی یل کنگ، زورانسری آوار جنی ءِ ھلاسی بلوچستان ءَ درکانودی کوش ءِ دْرچ بند کنگ بہ بیت-

بلے اسلام آباد ءِ رویشگ مدامی وڑ ءَ زوراک بیتگ انساپ اناں-

ھمے وڑ چہ کراچی ءَ ھپدہ جولائی 2025 ءَ بیست پنچ سالی ئیں نودربر زاھد بلوچ ءِ یک کنائینگ ءِ ھاتر ءَ کھول ءِ ھپدھمی روچ ءَ ھم زھرشانی برجاہ-

زاھد بلوچ ءَ وتی کھول ءِ لاپ دیگ ءِ ھاتر ءَ روچ ءِ یک نیمے بھرے ءَ رکشہ چلائینتگ یک نیم بھرے ءَ ونتگ-

آئی ءِ پت، عبدالحمید ھیپاٹائٹس ءِ نادُراھی ءِ آماچ اِنت، زھرشانی کنگ ءِ واستا سک نزور اِنت بلے آئی ءِ گور ءَ دگہ ھچ راہ نیست-

یک نادُراھیں پتے، یک بیگواھیں چُکے، یک کھول انساپ ءِ لوٹ ءَ کنگ ءَ اَنت-

دومی نیمگ ءَ چہ شال ءَ پریس کلب ءِ دیم ءَ پانزدہ اگست ءَ مستونگ ءِ لک پاس ءِ نزیک ءَ پاکستانی پوج ءِ تیرگواری ءَ چہ بیران بیتگیں ھپدہ سالی ئیں احسان شاہ ءِ مات ءَ زھرشانی بُنجل جتگ-

آ وتی چُک ءِ یل کنائینگ ءِ ھاتر ءَ یازدہ اِنت کہ گرم ءِ سر ءَ نشتگ – انساپ ءِ جاہ احسان ءِ مات ءَ را تُرسینگ، تُرسینگ ءُ بیھار ءُ ھیال گور کنگ ءِ دیمپانی کنگ کپتگ-

پانزدہ اگست ءَ شال پولیس ءَ آ گوں کسانی سالی ئیں جنکو ءَ ھوار زھرشانی بُنجل ءِ تہ ءَ چہ دزگیر کتگ- دوئیں درکانودی ھساب ءَ بندیگ کتگ اَنت، آیانی سر ءَ لَٹ ءُ لُٹ کنگ ءَ پد آ واتر مستونگ ءَ راہ داتگ اَنت-

زانگ بہ بیت کُشگ بیتگ احسان شاہ ءِ مات ءِ لوٹ ھمش اِنت کہ آئی کوش ءَ ھواریں ایف سی ءِ کارندہ سازا دیگ بہ بنت بلے آیانی سزا دیگ جاہ ءَ کھول زوراکیانی دیمپان اِنت-

بلوچستان ءِ دمگ ھزدار ءِ ھند زھری ءَ مرچی پاکستان ءِ فوج سلاہ بندیں اُرشانی نشانگ جوڑ کنگ بوتگ۔

ھالانی رد ءَ زھری ءِ دمگ گزان، سوھندہ ءُ سنی ءَ پاکستانی پوج ءِ سر ءَ ترندیں نوکیں اُرشانی دیمپانی کنگ کپتگ۔ اھوالانی رد ءَ اے اُرشانی تہ ءَ لشکر ءَ تاوان رس اتگ۔

اے درگت ءَ انگت ءَ واکداراں ھچ وڑیں ھال ءُ اھوال دیم ءَ نیاؤرتگ انت۔ بلے گوستگیں دہ روچاں زھری بلوچ آجوئی لوٹوکاں وتی کنٹرول ءَ کتگ۔

اے اُرش ھما وھد ءَ بندات بوتگ اَنت کہ بلوچ سلاہ بندیں آجوئی لوٹوکاں 11 اگست ءَ زھری شھر ءَ راج ءَ گوں تران کتگ، لشکر ءَ دمگ ءَ پیشگامی ءِ جھد کتگ کہ اود ءَ سلاہ بندیں مردماں جتا جتائیں جاھاں سنگر گپتگ ءُ اُرش کتگ انت –

بلوچ یکجھتی کمیٹی ءِ رھشون سمی دین بلوچ ءَ گشتگ کہ میر یوسف قلندرانی 17 اگست ءَ سیکورٹی فورسز ءَ چہ کراچی ءَ زورانسری بیگواہ کتگ۔

آئی ءَ گْوشتگ کہ یوسف قلندرانی ءِ سئے برات پیسر ءَ چہ 2011 ءَ گوں دگہ سیاد ءُ وارسانی ھواری ءَ زورانسری ءَ بیگواہ کنگ ءِ آماچ بوتگ اَنت ءُ تاں روچ ء مرچی اے گپ زانگ نہ بیت کہ آ کجا اَنت ءُ کجام جاور ءَ دارگ بوگ ءَ اَنت۔

سمی دین ءَ گشتگ کہ ریاستی زُلم، بلوچ نسل کُشی ءُ زورانسری بیگواہ کنگ ءَ بلوچستان ءِ تہ ءَ ھچ لوگ ایمنی ءُ سلامتی ءَ یل نہ داتگ ۔ درناکی ایش انت کہ ھما ھاندان کہ گوستگیں چاردہ سالاں وتی گاریں نزیکیں مردمانی پچ گرگ ءِ جھد ءَ وتی زند گوازینتگ آھاں انساپ نہ رس اتگ بلے ھمے لوگانی گیشتریں مردم ھم زورانسری ءَ بیگواہ کنگ بیگ ءَ انت۔

آئی ءَ گڈسرا ایراد گپتگ کہ اگاں اے نسل کُشی ءُ کمتری ءِ نزام نہ انت گڑا دگہ چے انت؟

ھُزدار ءِ دمگ زھری ءَ گوستگیں دہ روچ ءَ چہ بلوچ آجوئی لوٹوکانی دستیگ اِنت، جتاجتائیں ھندانی سر ءَ پاکستانی پوج ءَ را تُرندیں اُرشانی دیمپانی کنگ کپتگ-

یازدہ اگست ءَ بلوچ آجوئی لوٹوکاں زھری شھر ءَ مُچی ءَ گوں تران کنان کتگ وھدے کہ دمگ ءَ پیشگامی ءِ جُھد کنوکیں پوجی کاروان جتاجتائیں ھندانی سر ءَ اُرشانی نشانگ کتگ اَنت-

دمگی اِھوالکار ءِ رِد ءَ ٹی بی پی ءَ گوشتگ کہ سرمچاراں شوربندی بُنیاد ءَ پُترگی راھانی سر ءَ سنگر گپتگ وھدے کہ سنی ءَ تاں نورگامہ ءَ ھوار دگہ ھندانی سر ءَ دگ بلڈوز کتگ اَنت-

پوج گزان ءُ مشک ءَ ھوار دگہ ھندانی سر ءَ اُرشانی نشانگ کنگ بیتگ اَنت وھدے کہ سینکوری ءِ ھند سر ءَ پوج ءِ سر ءَ اُرش ءَ شش کارندھانی ٹپی بیگ ءِ گپ واکدار ءَ راست کتگ-

رسانکدر ءَ جتاجتائیں ویڈیوانی تہ ءَ پاکستانی پوج ءِ تباہ بیتگیں گاڑی ءُ پوجی کارندھانی وردی ءُ دگہ سامان شھدگ سر ءِ کپگ ءَ گندگ بیتگ اَنت- دمگی اِھوالکار ءِ رِد ءَ دمگ تنی وھدے بلوچ آجوئی لوٹوکانی دست ءَ اِنت-

ھمے و انجیرہ آر سی ڈی کراس سر ءَ پوج ءِ شھدگ روگ ءُ آیگ واستا بند کتگ-

اِھوالکار ءِ گوشگ اِنت کہ پوج ءَ زھری ءَ رؤکیں دو ورنا سک لَٹ ءُ کُٹانی نشانگ کنگ ءَ پد وتی ھمراھی ءَ برگ ءِ جُھد کتگ بلے مساپرانی گھگیری ءَ چہ پوج ورنایانی برگ ءَ بے سوب بیتگ-

واکدار ءَ تنی وھدے اے درگت ءَ ھچ وڑیں سرپدی شنگ نہ کتگ وھدے کہ دمگ ءَ انٹرنیٹ سروس یکشل ءَ بند اِنت-

زانگ بہ بیت ھمے سال ءِ بندات ءَ بلوچ سلاہ بندیں آجوئی لوٹوکیں گل بلوچ لبریشن آرمی ءَ زھری شھر بازیں کلاکاں تاں وتی دستیگ کتگ – اے میان ءَ سرمچاراں لیویز ءُ پولیس تھانھاں ھوار سرکاری کارگس ءُ بینک ھم وتی دستیگ کتگ اَنت کارندھانی سلاہ ءُ دگہ گاڑی گوں وت برتگ اَنت-

اے وڑیں کاروائی بلوچ لبریشن آرمی ءَ کلات ءِ شھر منگچر ءُ سوراب شھر ءِ بازیں کلاکاں چہ دستیگ کتگ اَنت-

گوستگیں سال اگست ءِ ماہ ءَ بلوچ لبریشن آرمی ءَ آپریشن ھیروپ ءَ سرجمیں بلوچستان ءَ یکجاھی کاروائی کنان ءَ چاردہ بُنجاھی شھر بُنجاھی شھدگاں ھوار لیویز ءُ پولیس تھانہ دستیگ کتگ اَنت- اے آپریشن ءَ بیلہ ءَ پاکستانی پوج ءِ ھیڈکوارٹر ھم بی ایل اے مجید برگیڈ ءَ اُرش ءِ نشانگ کتگ ءُ ھیڈکوارٹر دستیگ کتگ –

بلوچستان ءِ دمگ کیچ ءَ ناشناسیں مردمانی دست ءَ آوار جنگ بیتگیں ورناہ یل بیتگ –

اھوالانی رد ءَ یل بیتگیں ورنا ءِ پجار ندیم ء سلیم جھمنند گلی بلیدہ ءِ نام ءَ زانگ بیتگ –

ندیم چیزے روچ پیش زوندان بنجل ءِ نزیک ءَ ریاستی پلامرزی ءَ ھستیں سلاہ بندیں ٹولی “ ڈیتھ اسکواڈ ” ءِ کارندھاں آوار جتگ ءُ برتگ بیتگ-

آئی ءِ نزیکیں مردمانی رد ءَ آ دوشی یل کنگ بیتگ ءُ وتی لوگ ءَ سر بیتگ-

بلوچستان ءَ “ ڈیتھ اسکواڈ” ھما ٹولی ءِ نام ءَ زانگ بیت انت کہ اے ٹولی ریاستی پلامرزی ءَ اود ءَ ورنایانی آوار جنگ ءُ نشانگ کنگ ءَ دزمانجن انت ءُ ایشی ءِ سر ءَ سیاسی مھلوک ءِ نیمگ ءَ ھم ایراد گرگ بوگ ءَ انت-

گوستگیں روچاں ریاستی ٹولی ءِ بنجل ءِ سر ءَ ماں پنجگور ءَ سلاہ بنداں اُرش کتگ ات کہ اود ءَ ھمے ٹولی ءِ چار کارندہ کشگ بیتگ ات اَنت-

دومی نیمگ ءَ بلوچ لبریشن آرمی ءَ اے اُرش ءِ زمہ واری من اتگ ات ءُ گوشتگ ات کہ اے ٹولی پنجگور ءَ زیشان زھیر ءِ کوش ءَ ھوار دگہ ورنایانی آوار جنگ ءُ کشگ ءُ چاگردی سلکاریاں ھوار بیتگ انت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں پنجگور ءَ یک اُرشے ءَ زورگریں پاکستانی پوج ءُ چیریں ادارھانی جوڑ کتگیں وتگڑیں ڈیتھ اسکواڈ ءِ چار کارندہ کُشتگ اَنت-

جارکش ءَ گوشتگ بی ایل اے ءِ سرمچاراں سے شمبے ءِ شپ ءَ پنجگور ءِ دمگ سوردو ءَ بیڑبرتگ وتگڑیں ڈیتھ اسکواڈ ءِ سروک غلام سرور ءَ ھوار اسلام ء غلام سرور، نظام ء غلام سرور جھمنند پنجگور ءُ حبیب اللہ ء شاہ محمد جھمنند گریشہ ھُزدار کُشتگ اَنت-

جارکش ءَ گْوشتگ کہ سرور زورگریں پاکستانی پوج ءِ سروکی ءَ وتگڑیں ڈیتھ اسکواڈ جوڑ کتگ آئی ءِ سروکی ءَ کنگ ءَ بیتگ کہ گوستگیں بازیں مدتے ءَ چہ گچگ ءَ ھوار پنجگور ءِ دگہ دمگاں پُرکار بیتگ- اے ٹولی ءِ سروکی اے وھد ءَ غلام سرور ءِ چُک اسلام سرور کنگ ءَ بیتگ-اے ٹولی ءَ ورنایانی ٹارگٹ کلنگ ، زورانسری آوار جنی ءَ ھمگرنچ بیگ ءَ ھوار پوجی زوراکی ءَ زورگریں پوج ءِ تچکی ءَ کمکاری ءَ کنگ بیتگ وھدے کہ زورگریں پوج ءِ نیمگ ءَ چہ اے ٹولی منشیات پروشی ، آوار جنگ ءُ زر گرگ ءُ راھانی سر ءَ ناکہ جنگ ءُ زرگرگ ءِ سرجمی ءَ بے لگام کتگ اَنت-

جارکش ءَ گوشتگ سرمچاراں بیڑ وھد ءَ اسلام سرور ءِ اوتاک ءَ چہ سے کلاشنکوف، یک ایم – فور ءُ دگہ سلاھاں ھوار دو گاڑی ءُ سے پرپٹ دستیگ کتگ اَنت، وھدے اے اوتاک ءَ ٹارچر سیل ھساب ءَ ھم کارمرز کنگ بیتگ، اوتاک ءَ کرنٹ دیوک ءُ دگہ دروشم ءَ چہ ٹارچر کنگ ءِ ساز ءُ سامان دزکپتگ اَنت-

جارکش ءَ گوشتگ دو ماہ ءَ ساری چہ پنجگور ءَ ذیشان زھیر آوار جنگ ءَ پد آئی ءَ شھید کنگ ءَ ھم اسلام سرور تچکی ءَ ھوار بیتگ- ذیشان زھیر ءَ ھوار دگہ ورنایانی کوش ءَ ھمگرنچ دگہ مردمانی نشان ھم بیتگ اَنت کہ آ زوت اسلام سرور ءِ وڑ ءَ گُڈی آسر ءَ سر کنگ بنت-

جارکش ءَ گوشتگ زورگریں پاکستانی پوج ءُ آئی ءِ شریکداراں چہ بلوچ راج ءِ سر ءَ زُلم ءِ ھساب ءَ ھرچ وڑ گر ایں-

بیگواھیں صغیر احمد ءِ گھار ءَ شال ءَ وائس فار بلوچ مسنگ پرسنز ءِ شدھرتالی بنجل ءَ پریس کانفرنسے کنان ءَ گشتگ کہ مرچی دومی رند اِنت کہ من اے پریس کلب ءَ شمئے دیم ءَ اوشتاتگ آں ۔ منی مول ءُ مراد پدّر ءُ تچک اِنت: منی برات سگیر احمد ءُ ناکو زتک اقرار بلوچ ءِ سلامتی ءَ یل کنگ ءِ لوٹ انت۔

آئی ءَ گْوشتگ کہ 11 جون 2025 ءِ شپ ءَ منی برات ءُ کزن پاکستانی سیکورٹی کارندھاں اورماڑہ چیک پوسٹ ءَ دزگیر کتگ ءُ زورانسری ءَ بیگواہ کتگ۔ مرچی ایشانی بیگواھی ءَ شست ءُ یک (۶۱) روچ ءَ گیش بیت۔ اے دراجیں وھد ءِ تہ ءَ ھچ تھانہ ءَ رپورٹ نبشتہ نہ بوتگ ءُ ھچ آمیدگس ءَ پیش نہ بوتگ ءُ ھچ سرکاری ادارہ ءَ مارا ھال نہ داتگ۔

آئی ءَ گیش گوشتگ کہ اے اولی رند نہ اِنت۔ منی برات ھم 20 نومبر 2017 ءَ کراچی یونیورسٹی ءَ چکاس ءِ واستا پیش بوھگ ءَ پد بیگواہ کنگ بوتگ ءُ نزیک ءَ یک سالے ءَ ناشناسیں بندی جاھاں گیر انسانی سلوک ءُ لٹ شاپ کنگ بوتگ۔ اے ٹپ تاں روچ ء مرچی مئے ھاندان ءِ دل ءُ دماگاں تازگ اِنت۔

آئی ءَ گوشتگ کہ صغیر احمد وانندھیں ورنایے۔ کراچی یونیورسٹی ءُ سرگودھا یونیورسٹی ءَ چہ وتی ہائیر ایجوکیشن ءِ وانگ ءَ پد وتی راج ءِ ھزمت کنگ ءِ ھاترا وتی دمگ آواران ءَ واتر بوتگ۔ بلے وھدے کہ روزگار ءِ دست نہ کپت گڑا آ تربت ءَ شُتگ ءُ گوں وتی ناکوزتک اقرار بلوچ ءَ مزدوری ءِ کار ءَ بنداتے کتگ۔ آئی ءِ تھنا ”جرم“ اے بیتگ کہ آ چہ مھنت ءُ بلوچ بوگ ءَ وتی گُزارنی ءِ شوھازگ ءَ بیتگ۔

آئی ءَ گوشتگ کہ اقرار بلوچ گردہ ءِ نادراہ اِنت زوتیں علاج ءِ زلورت اِنت۔ آیاں جمھوری ریاست ءِ تہ ءَ نادراہ ءُ بے گناھیں مردمانی اے وڑیں سلوک منّگ بیت؟ پاکستان ءِ دستور ھمک شھری ءَ برابر ھک دنت، بلے منی جست ایش انت کہ بلوچ ھم ھمے دستور ءِ بھر انت؟ اگاں ھست گُڑا مئے ورنا پرچا آمیدگس ءَ پیش کنگ ءَ ابید بیگواہ کنگ بوگ ءَ اَنت؟

آئی ءَ گوشتگ کہ ما ھرچ وڑیں ناجائزیں کارروائی ءِ ھم ھمایت نہ کناں۔ اگاں صغیر احمد یا اقرار بلوچ ءِ سر ءَ ھرچ وڑیں بھتامے ھست گڑا آ زوت آمید گس ءَ آرگ بہ بنت، وکیل دارگ بہ بیت ءُ تچکیں کانود ءِ چیر دستی ءَ آھانی سر ءَ ارزی کنگ بہ بیت۔ اے آئین ءِ لوٹ اِنت، اے انسانی ھکانی اسل اِنت ءُ اے اقوام متحدہ ءِ زورانسری ءَ بیگواہ کنگ ءِ کنونشن ءِ لوٹ اِنت۔

آئی ءَ گوشتگ کہ وھدے آمید گس بے توار بنت، ایوان بے پرواہ بیت ءُ میڈیا دگہ دگرانی دست ءِ تہ ءَ بنت گڑا یک مزلومیں گھار کجا روت؟ وھدے کہ ریاست وت پہ وتی شھریاں یک ھترہ یے جوڑ بیت گڑا ما کئے ءِ دروازگ ءَ ٹُکّیں؟ بے تواری جرمے ءُ ما اے جرم ءِ تہ ءَ شریک بوت نہ کنیں۔

من چہ سپریم کورٹ، انسانی ھکانی گل، سول سوسائٹی ءُ رسانکدر ءَ دزبندی کن ایں کہ مئے برات ءُ کزن ءِ زوت ءُ ایمنیں جان سلامتی ءِ ھاترا املی گامگیج بہ زور اَنت۔ بلوچ ورناہ پہ گار ءُ بیگواھی ءَ ودی نہ بوتگ اَنت — ما لوٹیں کہ زندگ بہ بئیں، وانگ ءُ زانگ بہ زوریں، شرپداریں زند گوازینگ لوٹیں، ءُ امن ءُ ایمنی ءِ زند گوازینگ لوٹ ایں.

اگاں مارا صغیر احمد ءُ اقرار بلوچ ءِ بابت ءَ سرپدی دئیگ نہ بوت گڑا ما وتی زھرشانی ءَ گیش ءُ گیوار کن ایں ۔ اولی بھر ءَ ما شال پریس کلب ءِ دیم ءَ زھرشانی کن ایں ءُ دومی بھر ءَ ڈی سی آفس آواران ءِ دیم ءَ دھرنا کن ایں ۔ اگاں مارا انگت انساپ نہ رس ایت گڑا ما ھوشاب ءَ راہ بند کن ایں ءُ سرجمی ءَ زھرشانی ءَ ریکارڈ کن ایں۔

بلوچستان ءِ دمگ بلیدہ ءَ پاکستانی پوج ءِ تیرگواری ءَ چہ یک مردمے بیران بیتگ –

دمگی اِھوالکار ءِ رِد ءَ وئیل بلیدہ ءِ دمگ گلی ءَ بیتگ کہ اود ءَ پوج ءَ یک ورنایے ءِ سر ءَ تیرگواری کتگ-

بیران بیتگیں مردم ءِ پجّار بوھیر ء دلجان نام ءَ چہ بیتگ-

چمّگدانی گوشگ اِنت کہ ورنا وتی ڈگاراں چہ واتر آیگ ءَ بیتگ کہ پوج ءَ آئی ءِ سر ءَ تیرگواری کتگ، چریشی ءِ آسر ءَ آ ھما دمان ءَ بیران بیتگ- پد ءَ لاش وئیلجاہ ءَ چہ یل داتگ-