TBP Balochi

بلوچ لبریشن آرمی ءَ دزگیریں پولیس کارندھانی اکس شنگ کتگ اَنت کہ دو روچ پیش بندیگ کنگ بیتگ اَنت۔

بی ایل اے ءِ آفیشل میڈیا چینل ھکل ءَ پنچ پولیس ءِ کارندھانی اکس شنگ کتگ انت۔

پولیس ءِ کارندھانی دزگیر کنگ ھما وھد ءَ بوتگ کہ سرمچاراں کلات ءِ شھر منگچر ءِ نزیک ءَ مزنیں شھدگ ءِ سر ءَ ناکہ بندی ءِ وھد ءَ آ دزگیر کتگ اَنت۔

زانگ بہ بیت کہ بلوچ لبریشن آرمی ءِ گچینی لشکر فتح اسکواڈ ءَ بازیں کلاکاں منگچر ءِ شھر ءِ سر ءَ وتی دستیگی برجاہ داشتگ ءُ اود ءَ آیاں نادر ءِ کارگس، جوڈیشل کمپلیکس ءُ بینک ءَ ھوار دگہ سرکاری ماڑی ھم وتی دست ءَ زرتگ ءُ سوتکگ اَنت ءُ ھمے وھد ءَ لشکر ھم نشانگ جوڑ کنگ بوتگ۔

واکداراں ءپولیس ءِ کارندہ آوار جنگ ءِ ھال راست کتگ ءُ گشتگ کہ آ حب پولیس ءِ سب انسپکٹر انور بلوچ، اے ایس آئی غلام سرور، کانسٹیبل شبیر احمد، فراز احمد ھوالدار، محمد اقبال شیخ کانسٹیبل ءُ محمد ناصر کانسٹیبل ءِ چار ءُ گزاری ءَ روان دیگ بوتگ انت۔ اھوالانی رد ءَ آدینگ ءِ شپ ءَ ھما وھد ءَ کہ زندانیان ءِ وین کہ پرائیویٹ ہائیلکس وینے ءَ کلات منگچر ءِ دمگ ءَ سر بوتگ انت ناشناسیں سلاہ بندیں مردماں گاڑی ءِ سر ءَ تیرگواری کتگ ءُ اوشتارینتگ ءُ گوں وت ءَ ناشناسیں جاھے ءَ برتگ اَنت۔

بی ایل اے ءِ جارکش جیئند بلوچ ءَ وتی یک بیانے ءِ تہ ءَ گْوشتگ کہ پولیس ءِ کارندھانی سر ءَ بلوچ راجی آمیدگس کارروائی کنگ ءَ اَنت کہ آھانی یل کنگ یا سزا دیگ ءِ پیسلہ آمیدگس کنت انت۔

زالبول ءُ چُکاں جنازہ ءِ نماز ءَ بھر زرتگ ءُ مانشانی سر ءَ پُل ءُ چادر مانپوش اتگ-

ڈنک ءَ پاکستانی لشکر ءِ گون ءَ جنگ ءَ بیران بوتگیں نبیل ھوت، عمر زکا اللہ ءُ فیروز ءِ ناساڑی ئیں جنازہ ءِ نماز یک شمبے ءِ روچ ءَ گوگدان ءِ کبرستان ءَ وانینگ بوتگ۔

جنازہ ءِ نماز ءَ مزنیں کساسے ءَ مردین ءُ ھمے رنگ ءَ جنین ءُ چُک ھم ھوار بوتگ اَنت۔

جنازہ ءِ نماز ءَ پد زالبولاں کبرانی سر ءَ پُل ءُ چادر ایر کتگ ءُ بیران بوتگیں مردماناں داد بکش اتگ۔

دمگی اھوالانی رد ءَ ھواریں مردماں گْوشتگ کہ نبیل ھوت ءُ عمر زکا اللہ ءُ فیروز ساربان ”راجی جُھد ءِ سپاھیگ“ ءِ بستار ءَ یات کنگ بنت۔

بلوچ لبریشن آرمی ءَ رسانکدر ءَ داتگیں بیانے ءَ گْوشتگ کہ 29 اپریل ءِ شپ ءَ زورگریں پاکستانی لشکر ءَ تربت ءِ دمگ ڈنک ءَ بلوچ لبریشن آرمی ءِ شھری گوریلا نیٹ ورک ءِ باسکاناں انگیر کنگ ءِ کوشست کتگ ءُ پد ءَ سرمچاراں پوج ءِ سر ءَ زبردستیں اُرش کتگ۔ شپ ءِ سئے ءُ نیم ءَ بندات بوتگیں اُرش داں سھب ءِ روچ ءِ ٹک ءَ برجاہ بیتگ۔

بیان ءِ رد ءَ اے وئیل ءِ تہ ءَ بلوچ لبریشن آرمی ءِ سئے سرمچار بیران بوتگ اَنت کہ آھانی تہ ءَ سنگت نبیل پنام ءِ علی ، سنگت فیروز ساربان پنام ءِ نود بندگ ، ءُ سنگت محمد عمر زکا پنام ءِ گرو ھوار اَنت ۔

زانگ بہ بیت کہ بیران بوتگیں مردمانی لاش پنچ روچ ءَ فورسز ءِ نیمگ ءَ بندیگ کنگ بوتگ اَنت کہ اے وھد ءَ سی پیک ءِ شھدگ ءِ سر ءَ ھم سئے روچ ءَ لاشانی نہ دیگ ءِ ھلاپ ءَ زھرشانی برجاہ بوتگ۔

خضدار ءِ دمگ فیروز آباد ءَ دست کپتگیں لاش ءِ پجار چار روچ ءَ پد محمد رمضان ء حاجی احمد دوستینزئی ءِ نام ءَ بوتگ۔

گشگ بوھگ ءَ اِنت کہ اے مرد کہ 14 اگست 2014 ءَ پاکستانی لشکر ءَ زورانسری بیگواہ کتگ ءُ آئی ءِ ٹپ ءُ ٹوریں لاش چہ بازیں بیگواھی ءَ پد دزکپتگ۔

بلوچستان ءِ تہ ءَ گیر کانونی کوش ءِ اولی وئیل نہ اِنت۔ گوستگیں وھد ءَ ھم ھزاراں مردم بندیگ جاھاں کشگ بیتگ اَنت۔ بلوچ راجدوستیں پارٹی ءُ انسانی ھکانی باسک گوستگیں دو دھکاں چہ اے وئیلانی ھلاپ ءَ زھرشانی کنگ ءَ اَنت۔

کالونائیزڈ ءِ مرگ ءَ ھم کالونائیزر گِچین کنت -(نوشکی)

نبشتہ کار: نادیہ بلوچ

دی بلوچستان پوسٹ

مرگ اژدری ئیں سانے کہ بنی آدم ءِ سر ءَ الّم کپ اِیت اے مزن ءُ شاھگانیں دُگنیا ءَ مردُم بازیں ابرمی چیزاں مکن کنت لھتیں مرگ ءَ چہ پد زندگ بوگ ءِ منّوک نہ اِنت، لھتیں بھشت ءُ دوزه ءِ منّوک نہ اِنت، ءُ لھتیں ھُدا ءِ ھستانک ( وجود) ءَ ھم مکن کنت بلے چُشیں مردمے نیست کہ مرگ ءَ ڈالچار بہ کنت ھرکس ءَ مِرگ ءِ سر ءَ بیسہ اِنت ءُ ھرکس ءَ مرگ ءِ تام الّم چَشگی اِنت‌.

بلے لھتیں مردُمانی مرگ ءَ دگہ گِچین کنت آ مردُمانی رِدّ ءَ بلوچ ھم ھوار اَنت۔ بلوچ ءُ بلوچ ءِ زندما‌ن مزنیں اڑ ءُ جنجالانی دیمپان اِنت بلوچ ھما سر زمین ءِ وارس اِنت کہ آ سر زمین ابرمی مال ءُ مڈّیاں سرءُ چیر اِنت ھما مال ءُ مڈّی کہ آیانی سر ءَ انگریزانی چمّ ھم بیتگ اَنت کہ بہ پُلّ اِیت اِش بلے بلوچ چو سیاجی ءَ انگریزانی ھمُک ساز اِتگیں پندلانی دیم ءَ مکّ بیتگ اَنت مُھکم بیتگ اَنت وتی سر جھل اِش نہ کُتگ ءُ وتی زمین اِش پھاز اِتگ-

بلے بلوچ ءِ‌ بد بھتی ءَ بہ چار کہ بلوچ ءَ پہ سھت ءِ آجوئی زند گوازینگ ءِ موه نہ رس اِت. ھردے انگریزاں وتی ناکامی دیست ءُ وتی پُشت پِر کُت ءُ شُت اَنت گُڑا دگہ بہ دود ءُ بے سمائیں راجے ءَ مئے سر ءَ وتواجھی بِنا کُت ءُ مارا گوں اَنچیں سانکلاں بندیگ کُت کہ پہ ما ساھے زورگ گران کُت. اے اَنچییں بہ دودیں راجے مئے سر ءَ وتواجھی کنگ ءَ اِنت کہ مئے زند وتی جاہ ءَ مئے مرگ ءَ ھم وت گِچین کنت. اِنچو ھم موہ نہ دنت کہ ما وھد سر ءَ بہ مِر ایں ھُدا مارا بہ کُش اِیت۔ مئے مھلوک ءِ بزّگی ءَ بہ چار مئے کُشوک کالونائیزر اِنت ءُ آ مئے مرگ ءَ چہ ھُدا ءَ گِلگ دار اَنت-

اے داب ءَ کہ ھر روچ بلوچستان ءَ مھلوکانی تیر سُپتگیں جون دگّانی سر ءَ دست کپ اَنت پرچاکہ پنجاب ءَ چُشیں تیر سُپتگیں جون دست نہ کپ اِیت ؟ پرچا پنجاب ءِ مردم گار نہ بنت؟ کالونائیزر کالونائیزڈ ءِ مرگ ءِ گِچین کنوک اِنت آ گِچین کنت کہ بلوچ کُجام وھد ءَ کجام جاہ ءَ چوں کُشگی اِنت. چاگی ءِ پاکیں دلبند ءِ سر ءَ دور داتگیں نیوکلیئر بمب ھُدا ءَ چہ آزمان ءَ دور نہ دات ھمے بہ دلیں اِستان ءَ دور دات کہ روچ ء مروچی اود ءِ مردم نادُراھی ءِ آماچ اَنت۔ کُجام کُجام ویلاں بلوچ وتی نسیب پھم اِیت ءُ پراموش کنت؟ تاں چُنت وھد ءَ بلوچ وتی براتانی جوناں پُرّ بوگ ءَ چار اِیت؟

نوشکی ءِ بیتگیں دِلسوزیں ویل اگاں مرچی پنجاب ءُ اسلام آباد ءَ بیتیں گُڑا جاورھال ھمے داب ءَ بیتگ اِت اَنت کہ مرچی بلوچستان ءِ ئیگ اَنت ؟ نوشکی ءَ بیتگیں ٹرک ءِ ویل ءُ سُتکگیں مردُمانی اِلاج ءِ آسراتی اگاں مروچی بلوچستان ءَ بوتین اَنت گُڑا مئے زدگ بیتگیں مردُماں تاں 145 میٹر کوئٹہ ءِ سپر کنگ نہ کپتگ اَت ءُ پد ءَ بلوچ ءِ گیشیں بد بھتی ءَ بہ چار کوئٹہ ءَ شرّیں آسراتی نہ بوگ ءِ سوَب ءَ پد ءَ 9۔689 کلومیٹر تاں کراچی ءَ سپر کنگ کپ اِیت اے ھما سرزمین ءِ نادُاره اَنت کہ اود ءِ زمین ءُ مال ءُ مڈّیانی واجہ اِنت بلے ھمے سرزمین ءِ مردُمانی گْور ءَ آ دگہ آسراتی وتی جاہ زندگ بوگ ءِ آسراتی نیست. مئے زدگیں مردُماں ھم پہ اِلاج ءِ ھاتر ءَ پند بُرگ کپ اِیت ءُ انچیں نادُاره نیم راه ءَ ساه دے اَنت تو‌ کُجام کُجام دروگیں ٹاھاں راست کن ئے کہ تو بلوچستان آباد کُتگ‌ ،بلوچ آباد کُتگ اَنت اے راست اَنت کہ تو بلوچستان ءِ بلوچ کبرستان ءَ آباد کُتگ اَنت. اے‌ سُتکگیں مردُم ءُ تیر سُپتگیں جون کالونائیزر ءِ نیمگ چہ کالونائیزڈ ءِ واستا داد اَنت کہ ابرمی مال ءُ مڈّیانی بدل ءَ رسگ ءَ اَنت.

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشانے ءِ تہ ءَ گوشتگ کہ مئے سرمچارانی گچینی ٹولی پتھ اسکواڈ ءَ کلات ءِ شھر منگچر، خزینئی، گراڑی ءُ رحیم آباد ھند ءَ ھوار شال ءُ کراچی ءِ شاھدگ (این 25) وتی انان ءَ کتگ ءُ سرمچاراں بازیں جاھاں سنگر گپتگ ءُ نشتگ انت ـ شھر ءُ ایندگہ جاھ سھب ءَ داں سرمچارانی انان ءَ بوتگ –

جارکش ءَ گوشتگ کہ منگچر ءَ نادراہ کارگس، ھوڈیشل کمپلیکس، بینک ءُ دگہ سرکاری بلڈنگ وتی انان ءَ کتگ انت، سلاہ ءُ ریکارڈ دستیگ کتگ انت ءُ پد ءَ بلڈنگ مانداشتگ انت – ھمے میان ءَ سرمچارانی دگہ ٹولی ءَ زورگریں پاکستانی پوج ءِ بنجل ءِ سر ءَ اُرش کتگ کہ اود ءَ کم چہ کم چار دژمن کارمند کُشتگ ءُ بازینے زدگ کتگ انت –

سرمچاراں منگچر ءِ بازار ءَ بیڑ برتگ ءُ زورگریں پاکستانی پوج ءِ کمک کارعبدالقدوس دزگیر کتگ – بی ایل اے پیسر ءَ اے مرد ءِ شوھاز ءَ بوتگ کہ جست ءُ پد برجاہ انت-

جارکش ءَ گوشتگ کہ بی ایل اے ءِ سرمچاراں خزینئی ءِ ھند ءَ بنجاھی شھدگ بستگ ءُ ھمے وھد ءَ گڈانی ءَ بگر تاں شال ءَ رؤکیں پولیس کارمند دزگیر کتگ انت کہ آ وین ءِ سر ءَ بندیگیاں برگ ءَ بوتگ انت – سرمچاراں اے ایس آئی ءِ گلام سرور ءَ ھوار پنچ کارمند گوں سلاھاں دزگیر کتگ انت وھدیکہ دھ بندیگ یل کنگ بوتگ انت کہ بلوچ راجی آمیدگس ءَ پولیس کارمندانی چار ءُ ٹپاس برجاہ انت کہ آیانی یل بوگ یا سزائے درگت ءَ شئور کنگ بیت انت –

آئی ءَ گوشتگ کہ سرمچارانی یک دگہ ٹولی ءَ منگچر رحیم آباد ھند ءَ بنجاھی پُھل ءِ چیر ءَ تراکناکیں شورو کل کتگ ءُ تباہ کتگ اے جاہ ءَ زورگریں پاکستانی پوج ءِ بکتربند ءَ ھوار چار گاڑی سر بوتگ انت کہ سرمچاراں پیش ءَ سنگر بستگ ءُ آیانی سر ءَ اُرش کتگ کہ چریشی ءَ زورگریں پوج ءِ سَے کارمند ھما دمان ءَ مرتگ انت ءُ زدگ بوتگ انت وھدیکہ آیانی یک گاڑی ءِ اُرشے ءِ زد ءَ اتکگ ءُ پُر بوتگ – ترندیں اُرش ءَ ترس آماچیں دژمن ءَ وتی گاڑی یل داتگ ءُ تتکگ انت وھدیکہ بکتر بند گاڑی پدکنز اِتگ –

جارکش ءَ گوشتگ کہ سرمچارانی دگہ ٹولی ءَ سھب ءِ وھد ءَ کلات ٹول پلازہ ءِ نزیک ءَ گراڑی ءَ زورگریں پوج ءِ کاروانے ءِ سر ءَ ریموٹ کنٹرول اُرشے کتگ –

جارکش ءَ گوشتگ اے کار بلوچ لبریشن آرمی ءِ آجوئی جھد ءِ درچ یے کہ آئی ءِ مول بلوچ سرڈگار چہ دریاں رکینگ وتی آزات ءُ وت واکی ءَ برجم دارگ – آئی ءَ گوشتگ ما اے گپ ءَ تچک کن ایں کہ زورگریں ریاست ءِ ھر ادارہ، ھر یک کمکار ءُ پوج ءَ مئے جنگ ءِ دیمپانی کنگ کپ ایت – تاں ھما وھد ءَ بلوچ راج ءِ گوستانکی، سیاسی آجوئی ءَ سرجمی ءَ نگر ایت-

بلوچستان لبریشن فرنٹ ءِ جارکش میجر گوھرام بلوچ ءَ شنگ کتگیں درشان ءِ تہ ءَ گْوشتگ کہ سے مئی ءِ سُھب ءَ زورگریں پاکستانی پوج ءَ کولواہ ءِ جتاجتائیں میتگ انگیر ءَ کتگ اَنت کہ آیانی تہ ءَ کنری، سیاکل، گشانگ ءُ بانی ھوار اَنت زورگریں پوج ءَ لوگانی دودماناں لگتمال کنان ءَ لوگ لوگ ءَ پٹ ءُ پول کتگ، نیم روچ دوازدہ چل ءَ سرمچاراں بانی ھند سر ءَ سنگر گپتگ ءُ چہ گیشکور ءَ آؤکیں پوج ءِ چار گاڑیانی ھمگرنچیں پوجی کاروان سر ءَ مزنیں سلاھاں چہ اُرش کتگ – اُرش ءَ دو گاڑی سک اُرش ءِ زد ءَ اَتکگ اَنت چریشی ءِ آسر ءَ دُژمنیں پوج ءَ جانی ءُ مالی تاوان چست کنگ کپتگ-

جارکش ءَ گوشتگ کہ یات بہ بہ اِت پاکستانی پوج ءِ چیردستی ءَ پُرکاریں ڈیتھ اسکواڈ ءِ کارندھاں دو مئی ءَ آواران ءِ دمگ دراسکی ءَ کولواہ سیاکل ءِ جھمنند راجد بلوچ ء اللہ داد تیر جتگ ءُ شھید کتگ-

جارکش ءَ گْوشتگ کہ بی ایل ایف آواران ءُ کولواہ ءَ جتاجتائیں ھندانی سر ءَ بے میاریں مردمانی ھلاپ ءَ دُزی ءُ ڈُنگی ءُ لَٹ ءُ کُٹ ھال سر بیتگ-

جارکش ءَ گْوشتگ کہ ما چہ رسانکدر ءَ کولواہ ءِ مردماں سرپد کنگ وتی پرز سرپد بہ ایں کہ آیاں کڈن کن ایں کہ آ اے جُھد ھلاپیں مردمانی نشان کنگ واستا زوت سرمچاراں ھال بدے اَنت دانکہ اشاں گُڈی آسر ءَ سر بہ کن ایں ءُ اے راج ءُ چاگرد دُژمنانی سبب ءَ چہ کسے ءِ جان ءُ مال ءَ تاوان مہ رس اِیت-

جارکش ءَ گْوشتگ کہ بی ایل ایف اے اُرش زمہ واری ءَ منّ اِیت ءُ بلوچستان ءِ وتواجھی ءَ تاں زورگریں پوج ءُ پوجی شوربندیاں نشانگ کن ایں-

بلوچ یکجھتی کمیٹی بُنجاھی راھشون سمی دین بلوچ ءَ گْوشتگ کہ بیبو بلوچ پشین جیل ءَ برگ ءَ پد آئی سِھت ءِ ناگیگی ھال دیم ءَ اَتکگ، ءُ آئی ءَ وتی کانودی ٹولی ءَ چہ گند ءُ نند موکل دیگ ءَ نہ اِنت- مئے نوکیں سرپدی رِد ءَ، آ بندیگجاہ ءَ سک لَٹ ءُ کُٹانی نشانگ کتگ، چریشی ءِ آسر ءَ آئی ءِ سِھت سک ھراب اِنت-

سمی دین بلوچ ءَ دیمتر ءَ گْوشتگ کہ آ پیسر ءَ سی ایم ایچ نادُراھجاہ برتگ ءُ پد ءَ شال ھُدا بندیگ ءَ برتگ-

آئی ءَ گْوشتگ کہ بیبو بلوچ تھنا نا انساپی ءِ ھلاپ ءُ توار چست کنگ سزا دیگ بیگ ءَ اِنت- آئی ءِ پُرایمنیں زھرشانی ءِ پسّہ ریاستی لَٹ ءُ کُٹ ءَ چہ دیگ بیگ ءَ اِنت ءُ ما آئی ءِ ناگیگیں جاورانی سر ءَ سک پکر مندیں-

سمی دین بلوچ رِد ءَ بیبو بلوچ، ڈاکٹر مھرنگ بلوچ، گل زادی بلوچ، بیبگر ءُ شاہ جی یک دروگیں ایف آئی آر بنیاد ءَ 3 ایم پی او ءِ بنیاد ءُ دزگیر کتگ چل دو روچ ءَ گیش گوستگ-

بلوچ یکجھتی کمیٹی ءِ نیمگ ءَ یک بیانے شنگ کنگ بوتگ کہ گْوستگیں شپ ءَ پیشین جیل ءَ گل ءِ جھدکار بیبو بلوچ ءِ سر ءَ پولیس ءُ انٹیلی جنس ایجنسی ءِ کارندھاں بے کساس لٹ ءُ کٹ کتگ کہ چریشی ءَ بیبو بلوچ ءِ جاور نگیگ بوتگ اَنت۔ آئی ءَ را نگیگیں جاوراں کمبائیڈ ملٹری ھسپتال شال ءَ دیم دیگ بوتگ، اود ءَ آئی ءَ را لھتیں وھد ءَ دارگ بوتگ ءُ پد ءَ ھمے جاوراں پد ءَ ھدا جیل شال ءَ دیم دیگ بوتگ ءُ ھچ وڑیں الاج نہ بوتگ، اود ءَ آئی ءِ جاور ھال انگت ءَ نگیگ انت۔

زانگ بہ بیت 24 اپریل ءِ شپ ءِ 8 بج ءَ شال پولیس ءُ سی ٹی ڈی ءِ کارندھاں ناجائزیں وڑے ءَ جیل ءِ تہ ءَ شُتگ اَنت ءُ ڈاکٹر مھرنگ بلوچ، بیبو بلوچ، ءُ گلزادی بلوچ ءَ را چہ درستاں گیشتریں لٹ شاپ کتگ انت۔ اے میان ءَ بیبو بلوچ چہ ھدا جیل شال ءَ پہ زور بیگواہ کنگ بیتگ۔ کلاکے ءِ زوراکی ءَ بیگواہ کنگ ءَ پد بیبو بلوچ پشین جیل ءَ دیم دیگ بوتگ کہ اود ءَ آئی ءِ بیرک ءُ انگت واش روم ءَ پہ نگرانی ءَ کیمرہ ایر کنگ بوتگ انت۔

بیان ءِ تہ ءَ گْوشگ بیتگ کہ بیبو بلوچ ءَ پیشین جیل ءَ ٹرانسفر کنگ ءُ زالمیں آزار کنگ ءِ ھلاپ ءَ مدامی بھوک ھڑتال ھلاس کتگ۔ بھوک ءِ ھڑتال گوستگیں شپ ءَ پد ھدا زندان ءَ پد ءَ دیم دیگ ءَ پد ھلاس بوتگ۔ دہ روچ ءِ رند ءَ بھوک ھڑتال ءُ زالمیں ٹارچر ءِ سوب ءَ آئی ءِ جاور ھال اے وھد ءَ سک نگیگ اَنت ءُ مارا آئی ءِ جان سلامتی ءِ بابت ءَ سک باز جیڑہ اِنت۔

آئی ءَ گْوشتگ: ما گوں میان استمان ءَ دزبندی کن ایں کہ آ زندان ءَ بلوچ سیاسی سروکانی رکینگ ءُ یلہ کنگ ءَ یک کردے پیلو بہ کنت، چیاکہ زندان ءَ وتی سروکانی سر ءَ مُدام زوراکی ءِ وئیلانی سبب ءَ مارا آیانی زندمان ءِ سر ءَ سکیں ترس ھست۔

–

بلوچستان ءَ زورانسری آوار جنیانی دْرچ یکشل برجاہ ءَ اِنت-

ھالانی رِد ءَ چہ کیچ ءُ پنجگور ءَ دو مردم پاکستانی پوج ءَ آوار جنگ ءَ پد بیگواہ کتگ اَنت-

کیچ ءِ دمگ چہ ناصر آباد ءَ سیادی داروکیں انضمام ء محمد حسن کھول رِد ءَ گوستگیں شپ ءَ آئی ءِ لوگ سر ءَ بیڑبرتگ آوار جتگ ءُ اشی ءَ پد آ بیگواہ ءَ اِنت-

انضمام حسن تربت شھدربرجاہ ءِ کانون پڑ نودربرے-

ھمے وڑ پنجگور ءِ دمگ چہ تسپ پنچی ءَ سیادی داروکیں ورنا سمیر سبزل یک مئی دوھزار بیست پنچ ءَ پاکستانی پوج ءَ آوار جتگ ءُ بیگواہ کتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ تربت ءُ دکی ءَ زورگریں پاکستانی پوج ءِ گون ءَ جنگ ءُ چوپاں دشمن ءِ 22 کارندہ مرتگ ءُ بازینے زدگ بیتگ انت – ءُ ھمے وڑ بلوچ لبریشن آرمی ءِ شش سرمچار شھید بیتگ ءُ راجی آجوئی ءِ جد ءُ جھد ءَ بے دروریں نکش اش بویس اتگ –

جارکش ءَ گوشتگ تربت ءِ دمگ ڈنک ءَ بیست ءُ نُھ اپریل ءِ شپ ءَ زورگریں پاکستابی پوج ءَ بلوچ لبریشن آرمی ءِ شھری گوریلا نیٹ ورک ءِ باسکانی انگیر کنگ ءِ جھد کتگ کہ چریشی ءَ سرمچاراں دشمن ءِ سر ءَ یک ترندیں اُرشے بناہ کتگ – شپ ءِ ساھت سَے بج ءُ سِی منٹ ءَ بندات بیتگیں جنگ سھب ءِ روچ ٹک ءَ داں بندات بیتگ – سرمچار داں سَے اداراں وتی سنگراں بیتگ انت ءُ دشمن ءَ را نشانگ کنگ ءَ بیتگ انت ھمے وھد ءَ سرمچاراں زورگریں پوج ءِ کاروان نشانگ کتگ ءُ بازیں کچے ءَ جانی تاوان داتگ – اے جنگ ءُ چوپاں دشمن ءِ 13 کارندہ مرتگ انت ءُ بازینے زدگ بیتگ انت-

جنگاں بلوچ لبریشن آرمی ءِ سَے سرمچار شھید بیتگ انت آیانی توک ءَ سنگت نبیل پنام ءِ علی، سنگت فیروز ساربان پنام ءِ نود بندگ ءُ سنگت مھمد عمر زکا پنام ءِ گرو ھوار انت –

جیئند بلوچ ءَ گیش گوشتگ دکی ءِ دمے کپوڑی ءَ ھشت اپریل ءَ بلوچ لبریشن آرمی ءِ سرمچار گشت ءَ بیتگ انت کہ دشمنیں پوج ءَ گوں دُچار کپتگ انت – جنگ بازیں اداراں برجاہ بیتگ ءُ سرمچاراں دشمن ءِ نُھ کارندہ کشتگ ءُ بازینے زدگ کتگ انت – اے جنگ ءَ بی ایل اے ءِ سَے سرمچار سنگت عبدالوھاب پنام ءِ دیدگ، سنگت رحیم خان مری پنام ءِ سارنگ، ءُ سنگت زاھد علی پنام ءِ وشدل شھید بیتگ انت-

جارکش ءَ گوشتگ شھید سنگت نبیل اھمد پنام ءِ علی ء رسول بخش ھوت ءِ سیادی تربت ءِ دمگ گوکدان ءَ بیتگ – آ بلوچ اسٹوڈنٹس آرگنائزیشن ءِ پلیٹ پارم ءَ سیاسی باسکے ءِ دروشم ءَ پرکار بیتگ – سال دوھزار ءُ نُھ ءَ آئی ءَ ھمراھیں گل ءَ سلاہ بندیں جھد ءِ بندات کتگ – سال دوھزار ءُ دَہ ءَ زورگریں پوج ءِ بیڑ ءِ وھد ءَ شپ ءِ دوازدہ بج ءَ داں سھب ءِ ھشت ءَ جنگ برجاہ بیتگ – اود ءَ زورگریں پوج ءِ بازیں کارندہ مرتگ ءُ زدگ بیتگ انت ءُ وت سک زدگ بیتگ ءُ دشمن ءَ آ نیم مردگیں جاوراں یل داتگ – آئی ءِ ھمراھی ءَ آئی ءِ گوھار ھم زدگ بیتگ- ءُ آئی ءِ پت ءُ ناکوزتک بیگواہ کنگ بیتگ انت – آئی ءِ برات سنگت مبشر ھوت پنام ءِ شاہ دوست اکتوبر دوھزار ءُ دَہ ءُ کلبر ءَ جنگ ءِ میدان ءَ دشمن ءِ گون ءَ دیم پہ دیمی ءُ شھید بیتگ-

سنگت نبیل مچ، گڈانی ءُ تربت ءِ جیل ءَ پنچ سالاں داں زندانی بیتگ – لٹ ءُ کٹے سگ اتگ ءُ ایشانی اوپار کنگ ءَ ابید ھم وتی راہ ءَ پشتکنز نہ بیتگ – یل جہگ ءَ پد آئی ءَ کوہ وتی پناہگاہ جوڑینتگ انت ءُ بازیں جنگانی سروکی کتگ – اے وھد ءَ آ یونٹ ءِ کمانڈ بیتگ – آ وتی رھبندانی دارگ ءَ گھگیری ءِ اوپار ءَ یک بے دروریں سرمچارے زانگ بیتگ- آئی ءِ زندگی زورگریں ریاست ءِ زندان، لٹ شاپی ءُ ءُ جد ءُ جھد ءِ سنگینے وھداں گوں گوستگ – سنگت نبیل اھمد دشمن ءِ دست ءَ دزگیر بوگ ءَ ابید گڈی تیرے وتی دستاں گوں وتی شھیدی ءِ گچین کتگ-

آئی ءَ گوشتگ شھید سنگت فیروز ساربان پنام ءِ نودبندگ ء ماسٹر اللہ بخش، تربت ءِ دمگ آبسر ڈاکی بازار ءَ سیادی یے بیتگ – آ شھید الیاس نزر ءِ زامات بیتگ- آ سال دوھزار ءُ بیست ءُ دو ءَ سلاہ بندیں جد ءُ جھد ءِ بھر بیتگ ءُ شھری گوریلا ءِ یک سالے ءَ گیش پرکار بیتگ ءُ سال دوھزار ءُ بیست ءُ سَے ءَ کوہ ءَ شتگ – گشندھ ءُ شائری ءِ شوک ءِ دارگ ءِ ھواری ءَ فیروز لاھور ءَ ونتگے ءُ یونیورسٹی آف تربت ءَ بی ایس پولیٹیکل سائنس ءِ نودربرے بیتگ-

فیروز نود بندگ ءَ سیاسی زانشت ءِ ھواری ءَ جنگی رپکاں ھم سرجم بیتگ- آ نا ایوک ءَ جنگ ءِ میدان ءَ بھادرے بیتگ بلکیں پکری دروشم ءَ ھم گھگیرے بیتگ – آئی ءِ جاڑیگی ءَ شھری ءُ کوہ ءِ میدان ءَ گھگیری ءِ زور ءِ چیدگ بیتگ-

جارکش ءَ گوشتگ شھید سنگت مھمد عمر زکا پنام ءِ گرو ء علی مھمد ءِ سیادی گوکدان تربت ءَ بیتگ- آئی ءَ سال دوھزار ءُ بیست ءُ یک ءَ بی ایل اے ءَ وت ءَ بھر مند کتگ ءُ وت ءَ راجی آجوئی ءِ واستا ندر کتگ- ریاستی پورسز لیویز ءِ بوگ ءَ ابید آئی ءِ رگانی توک ءَ جد ءُ جھد ءِ راہ بیتگ- سنگت عمر آئی ای ڈی ءِ وائرنگ کنگ ءَ زانتکارے بیتگ- آئی ءِ زانتکاری ءَ دشمن بازیں براں تاوانانی دیمپان کتگ- آئی ءِ گچینی جنگی سلاھتاں آ بی ایل اے ءِ گچینی اسپیشل ٹیکٹیکل آپریشنز اسکواڈ ( ایس ٹی او ایس) ءِ باسکے بیتگ-

جارکش ءَ گوشتگ شھید سنگت عبدالوھاب پنام ءِ دیدگ ء مھمد اعظم زھری خاخوئی زھری ءَ سیادی یے بیتگ- آئی ءَ سال دوھزار ءُ بیست ءُ دو ءَ بی ایل اے ءَ وت ءَ بھر مند کتگ- زوت یونٹ ءِ کمانڈر بیتگ ءُ گچینی ٹولی فتح اسکواڈ ءَ کار کتگ – آئی ءَ بولان ءُ دکی ءِ میدان ءَ بازیں وھداں رھشونی کتگ-

آ زدگیں جاوراں جنگ کنان ءَ گڈی تیر ءَ دشمن ءِ گون ءَ جنگ کنان ءَ نمیران بیتگ ئے آئی ءِ رھبند، وھد ءُ جنگی پیسلاھاں پرکاری ءَ بازیں راجی کار سرجم کتگ انت-

جارکش ءَ گوشتگ شھید سنگت رحیم خان مری پنام ءِ سارنگ ء روزی خان بولان ءِ دمگ یخو ءَ سیادی یے بیتگ- آئی ءَ سال دوھزار ءُ نوزدہ ءَ جد ءُ جھد ءَ وت ءَ بھر مند کتگ – آ اپریل دوھزار ءُ بیست ءُ سَے ءَ بولان ءِ میدان ءَ شھید بیتگیں سنگت گنی خان مری بلوچ پنام ءِ حسن روکی ءِ مستریں برات بیتگ ئے – سنگت رحیم ءَ بولان ءُ ناگاھو ءِ میداناں فتح اسکواڈ ءِ پتر ءَ کار کتگ بیتگ-

بستار ءِ گشتی کمانڈ بوگ ءَ سرمچارانی رھشونی یے کتگ – آئی ءِ جاڑ بوگ ءَ ھرچ وڑ سرجمی بیتگ انت- آئی ءَ ھروھد ءَ سرمچاراناں ھوسلگ – سرپدی ءُ جنگی رپکاریانی سروکی کتگ- آئی ءِ نام جنگی میدان ءَ رھبند ءُ کچ ءُ کساسی ءِ چیدگ بیتگ-

آئی ءَ گوشتگ شھید سنگت زاھد علی پنام ءِ وشدل ء ھزار ھمد جھالڑی ءِ سیادی بولان ءَ بیتگ- آئی ءَ سال دوھزار ءُ ھژدہ ءَ بی ایل اے ءِ بھر بیتگ- مکران، بولان ءُ کاھان ءِ میداناں پرکار بیتگ- آ شھید ناصر مری ءِ ناکوزتک بیتگ- سنگت وشدل ءَ آجوئی ءِ جھد ءَ وتی زندگی ءِ یکیں مول ءُ مراد سرجم کتگ – آئی ءِ ھوموشیں مھنت ءُ دلیری ءِ گامگیج ءَ ھمراھانی پاداں ھاٹیگ داتگ-

جیئند بلوچ ءَ گوشتگ بلوچ لبریشن آرمی اے درستیں سرمچاراں سھریں دروت ندر کنت کہ آیاں وتی گرانبھائیں جان راجی آجوئی ءِ جد ءُ جھد ءَ را چراگے بکش اتگ- دشمن ءِ نوکیں جنگی ساز ءُ سامان ءُ لشکریانی بوگ ءَ ابید مئے سرمچارانی ازم، ھمت ءُ ستکی سلاہ ءَ دشمن ءِ گرور ھاکاں گوں ھوار کتگ- شھیدانی اے کربانی مئے ھوسلگ ءُ مئے گھگیری ءِ بنیاد انت – ایشانی بے ھیال کنگ نا ممکن انت- بی ایل اے یک رندے پد ءَ کول کنت اِنت کہ شھیدانی مشن گڈی آسری ءَ سر کنت اِنت- دشمن ءِ ھمک سنگر پروشگ ءُ بلوچ ڈیھ گلامی ءِ سانکلاں آجو کنگ بیت اِنت-