TBP Balochi

سندھودیش روولیوشنری آرمی ءِ جارکش سوڈھو سندھی ءَ بلوچستان ءِ آجوئی ءِ روچ ءِ درگت ءَ شنگ کتگین درشان ءَ گْوشتگ کہ برسگیر ءِ سر ءَ سد سال ءَ برطانیہ ءِ دستیگی بوتگ کہ ایشی ءِ ھلاپ ءَ یک کرنے ءِ آجوئی ءِ جنگ بوتگ۔ دومی جھانی جنگ ءُ زیردستانی برجاھیں گھگیری ءِ سبب ءَ نزور بوتگیں برطانیہ ءِ سامراج ءَ وتی دیم کشگی بوتگ بلے تچگ ءِ وھد ءَ پنجابی لشکر ءِ چیردستی ءَ پاکستان ءِ وڑیں ایجنٹ ریاستے جوڑ کنگ بوتگ۔ کہ رند ءَ پہ ماتیں راجاں ھون وار سابت بوتگ۔

آئی ءَ گوشت کہ 11 اگست 1947 ءَ برطانیہ ءَ بلوچستان ءِ آزاتیں بستار من اِتگ۔ چار روچ ءَ پد 15 اگست ءَ ھندوستان ءِ بَھر ءُ بانگ ءُ ھندوستان ءُ پاکستان ٹھینگ بیتگ انت ءُ آجوئی ءَ پد بلوچ ءَ جمھوری پارلیمنٹے جوڑ کُتگ۔

جارکش ءَ گْوشتگ کہ بلے زوت پاکستان بلوچستان ءِ سر ءَ اُرش کنت ءُ آیانی آجوئی ءَ پچ گپت کہ تاں روچ ء مرچی برجاہ اِنت۔ اے زورگری ءَ بلوچ ءِ زند، پجار، دود ءُ ربیدگ ءُ دودمان ھلاس کتگ ءُ دمگ ءِ جاوراں ھم سان داتگ۔ یک آجوئیں بلوچستانے ءِ دمگ ءِ ھاترا آپبندی، وشھالی ءُ مذھبی رواداری ءِ زامن بوت کنت۔ بلے نوں اے دمگ بلوچستان ءِ گلامی ءِ زھریں تام ءَ گوزگ ءَ انت-

ایس آر اے ءِ جارکش ءَ گْوشتگ: بلوچ آجوئی ءِ جنز دیم ءَ روان اِنت ءُ یک پیسلہ داریں وھدے ءَ رھادگ اِنت ۔

بلوچ راج ءِ کُربانی ءُ جُھد مُدامی سبوت اَنت کہ بلوچ راج ءِ انوگیں پیسلہ داریں جنگ نوں پاکستانی ءُ پنجابی لشکر ءِ گوں جنگ ءَ یک آجوئیں بلوچستان ءِ جوڑ کنگ ءِ نیمگ ءَ بارت۔ سندھی ءُ بلوچ یک ھواریں دژمنے (پنجاب سامراج) ءِ شریک انت، پمیشکا سندھی راج گوں بلوچ براتاں ھرپڑ ءَ وتی کرد ءَ پیلو کنت۔

بلوچستان ءِ جتا جتائیں دمگاں پاکستانی پوج اُرشاں نشانگ جوڑ کنگ بوتگ، ایشی ءِ تہ ءَ بمب تراک، کیمپانی سر ءَ اُرش ءُ لیویز ءِ پوسٹانی گرگ ھوار اَنت۔ گوادر، کیچ ءُ آواران ءِ جتائیں دمگاں اے اُرش کنگ بوتگ انت۔

گوستگیں شپ ءَ گوادر شھر ءِ نیو ٹاؤن ءَ ناشناسیں مردماں پاکستانی لشکر ءِ کاروان ءِ گاڑی آئی ای ڈی اُرش ءِ نشانگ کتگ-

تراک ءِ آسر ءَ پورسز ءِ شش کارندھانی بیران بوھگ ءِ ھال ھست بلے واکداراں اے درگت ءَ ھچ وڑیں ھال ءُ اھوال نہ داتگ۔

چمدیستگیں مردمانی رد ءَ مرچی سھب ءِ 10بج ءَ پورسز ءِ تباہ بوتگیں گاڑی چِست کنگ بیتگ۔ پورسز ءَ چہ گوستگیں شپ ءَ ھمے جاہ انگیر کتگ۔

مند ءِ دمگ مھیر ءُ سورو ءَ پاکستانی لشکر ءِ کیمپ پشت ماں پشت ےَ سلاہ بندیں مردماں نشانگ جوڑ کتگ۔ دمگی مردمانی گشگ ءِ رد ءَ مزنیں تیرگواری ءُ تراکانی توار بوتگ انت۔

ایشی ءَ چہ پیسر آواران ءِ دمگ جھاؤ ءَ مین روڈ ءِ سر ءَ لیویز پوسٹ ءِ سر ءَ سلاہ بندیں مردماں اُرش کتگ ءُ گپتگ ۔ کارندھانی دراہیں سلاہ پچگپتگ ءَ پد پوسٹ سوتکگ۔

دومی نیمگ ءَ جھاؤ نندرہ ءَ پاکستانی لشکر ءِ یک پوسٹے ءِ سر ءَ ھم اُرش کنگ بیتگ ۔ اے اُرش ءِ وھد ءَ کواڈ کاپٹر ھم اُرش کنوکاں تیر گواری کتگ۔

ھمے وڑ زیارت ءَ ناشناسیں سلاہ بندیں مردماں اسسٹنٹ کمشنر ”اے سی“ زیارت افضل باکی گوں وتی چُک ءَ آوار جتگ۔ اے وئیل زیزری ءِ سیل ءُ سواد ءِ جاہ ءَ بوتگ کہ اود ءَ اے سی زیارت زاتی تر ءُ تاب ءَ بوتگ۔

لیویز ءِ بنشون ءِ رد ءَ سلاہ بندیں مردماں اے سی ءِ گارڈ ءُ ڈرائیور یل داتگ انت بلے آھانی سرکاری گاڑی سوتکگ-

گوستگیں روچ ءَ شال ءَ گوں ہمگرنچیں مستونگ ءِ سپیزنڈ دمگ دشت ءَ چہ شال ءَ راولپنڈی ءَ روکیں جعفر ایکسپریس ءَ را نشانگ جوڑ کتگ ایشی ءِ آسر ءَ ٹرین ءِ شش بوگی ریل ءَ چہ دراتکگ انت۔

جعفر ایکسپریس ءِ سر ءَ اُرش ءَ پد بلوچستان ءَ چہ دگہ دمگاں ریل ءِ روگ ءُ آیگ بند کنگ بوتگ ۔

بلوچستان ءَ ایمنی ءِ جیڑھانی سبب ءَ واکداراں انٹرنیٹ سروس سرجمی ءَ بند کتگ انت ۔ بندش تاں 31 اگست ءَ برجاہ بیت بلے بندش ءِ سبب ءَ واکدارانی سر ءَ ترندیں ایراد گرگ بوگ ءَ انت۔

ثناء بلوچ ایف آئی اے ءَ پٹ ءُ پول ءَ پد ناشناسیں جاھے ءَ برتگ-

نیشنل ڈیموکریٹک پارٹی ءِ گوشگ اِنت بُنجاھی آرگنائزنگ کمیٹی ءِ باسک ثناء بلوچ چہ ملتان ایئرپورٹ ءَ زورانسری بیگواہ کتگ اود ءَ چہ آ عمرہ ءِ واستا سعودی عرب ءَ روگ ءِ چن ءُ لانچ ءَ بیتگ-

پارٹی ءِ جارکش ءِ رِد ءَ اے میان ءَ وفاقی پٹ ءُ پولی ایف آئی اے واکدار ءَ پارٹی ءِ رھشون ایئرپورٹ سر ءَ بازیں کلاکانی تاں داشتگ ءُ آ یکو جُست ءَ کنگ اَبید ھچ وڑیں سبب نہ گوشتگ، گُڈی ھال ءَ ثناء بلوچ ءَ گوشتگ کہ آئی ءَ دارگ ءَ اَنت، بلے ھچ وڑیں سرپدی دیگ ءَ نہ اِنت-

گل ءَ گوشتگ کہ اشی ءَ پد پارٹی ءُ ثناء بلوچ ءِ سیاداں آیاں گوں ایاں ھال کنگ بند بوتگ، ایپ آئی اے ءِ جُست ءُ پُرس پد آ ناشناسیں مردماں برتگ-

این ڈی پی ءَ پارٹی رھشون ءِ زوت یل کنائینگ لوٹ کنان ءَ گوشتگ کہ بلوچ زورانسری آوار جنی آئینی ءُ انسانی ھکانی ھلاپ ورزی اِنت ما ھکومت ءَ چہ لوٹ کن ایں کہ آ آئی ءَ زوت یل بہ کن اِت-

مروچی مگرب ءِ وھد ءَ جھاؤ ءِ بُنجاھی دگ سر ءَ برجاہ لیویز چوکی سر ءَ سلاہ بندیں مردماں اُرش کتگ چوکی ءِ سر ءَ دستیگ کتگ ءُ اود ءَ ھستیں سرجمیں سلاہ دستیگ کتگ ءَ اشی ءَ پد چوکی مانداشتگ-

اشی ءَ اَبید تھنا سے کلومیٹر ءَ دیر برجاہ جھاؤ نوندڑہ ءَ پاکستانی پوج ءِ چوکی سر ءَ ھم اُرش کتگ – اے اُرش ءِ میان ءَ یک کواڈ کاپٹرے ھم جتگ ءُ دور داتگ-

ھمے وڑ مند ءِ دمگ مھیر ءَ پاکستانی پوج ءِ بُنجل سر ءَ مزنیں کچے ءَ سلاہ بندیں مردماں اُرش کتگ-

دوئیں اُرشانی آسر ءَ پوج ءَ جانی ءُ مالی تاوان ءِ گمان اِنت اُرش ءِ زمہ واری انگت ھچ گل ءَ نہ زرتگ اَنت-

بلوچستان لبریشن فرنٹ ءِ جارکش میجر گوھرام بلوچ ءَ وتی دو جتاجتائیں شنگ کتگیں درشانانی تہ ءَ ھوشاپ، مشکے ءُ کولواہ ءَ پاکستانی پوج ءُ ڈیتھ اسکواڈ کارندھانی سر ءَ بیتگیں اُرشانی زمہ واری منّ اِتگ اَنت-

بی ایل ایف ءَ گوشتگ کہ شش ءُ ھشت اگست ءَ مشکے ءُ کولواہ ءِ جتاجتائیں ھنداں زورگریں پاکستانی پوج ءُ کشندہ ٹولی چار جتاجتائیں اُرشاں نشانگ کتگ اَنت ۔ چریشی ءِ آسر ءَ پنچ کارندہ مرتگ ءُ باز ٹپی بیتگ اَنت۔

جارکش ءَ گوشتگ کہ شش اگست ءَ بی ایل ایپ ءِ سرمچاراں مشکےءِ ھند بنڈکی ءَ پاکستانی پوج ءِ چوکی سر ءَ گوں اسنائپر اُرش ءَ یک کارندھے یے کشتگ ءُ پوج ءِ چوکی گوں ٹوھیں سلاھاں نشانگ کتگ۔

جارکش ءَ گوشتگ کہ ھشت اگست ءَ بی ایل ایف ءِ سرمچاراں کولواہ ءِ سئے جتاجتائیں ھنداں پاکستانی پوج ءُ ڈیتھ اسکواڈ ءِ سر ءَ اُرش کتگ۔ اولی اُرش بیگاہ ءِ پنچ ءُ نیم ءِ نزیک ءَ گیشکور ءَ زورگریں پوج ءِ مزنیں بنجل ءِ سر ءَ کتگ کہ اود ءَ سرمچاراں چہ دو نیمگی ءَ پوج ءِ بنجل گوں ٹوھیں سلاھاں نشانگ کتگ۔ اے اُرش داں نیم ادارے ءَ برجاہ بوتگ۔ دژمنیں پوج ءَ وتی بلوچ دژمنی ءِ شوربندی ءِ بنیاد ءَ میتگانی سر ءَ مارٹر ءِ گولا آس داتگ ءُ ٹوھیں سلاہ کارمرز کتگ۔ سرمچار کاروائی ءَ پد پہ سلامتی چہ اود ءَ درکپتگ اَنت۔ دژمن ءَ اے میڑ ءَ جانی ءُ مالی تاوان بیتگ۔

جارکش ءَ گوشتگ کہ دومی اُرش ھم پنچ ءُ نیم ءِ نزیک ءَ گراڈی ءَ کنگ بیتگ۔ اود ءَ سرمچاراں زورگریں پوج ءِ بنجل ءِ سر ءَ لھتیں راکٹ ءِ گولا آس داتگ۔ اے اُرش ءَ دژمن ءِ دو کارندہ مرتگ۔

جارکش ءَ گوشتگ کہ سیمی میڑ کولواہ ڈنڈار ءِ ھند مادگ کلات ءِ ھند بیتگ کہ دژمنیں پوج ءُ ڈیتھ اسکواڈ ءِ کارندھاں پیسر ءَ سرمچارانی راہ بستگ۔ اے دیم پہ دیمی ترندیں میڑ ءَ سرمچاراں گوں جنگی رپک ءُ دلیری ءَ دیم پہ دیمی کتگ ءُ دژمن ءِ دو کارندہ کشتگ۔ سرمچاراں دژمن ءِ انگیر ءَ کپتگیں وتی سنگت کش اتگ اَنت ءُ پہ سلامتی وتی اوتاک ءَ سر بیتگ اَنت۔

جارکش ءَ وتی دگہ یک درشانے ءِ تہ ءَ گوشتگ کہ دہ اگست ءِ بیگاہ ءِ ساھت پنچ ءِ نزیک ءَ مئے سرمچاراں ھوشاپ ءِ دمگ تل ءَ زورگریں پاکِستانی پوج ءِ بُنجل ءِ سر ءَ چہ دو نیمگی ءَ مھکمیں اُرشے کتگ ۔ کاروائی ءِ میان ءَ سرمچاراں گوں راکٹ لانچر ءُ بازیں مارٹر گول ءَ آس داتگ ءُ گوں مزن ءُ وتکاریں سلاھاں چہ یکشل ءَ گولہ آس داتگ چریشی ءِ آسر ءَ دژمن ءِ سنگر اسرمند بیتگ ءُ آئی ءَ مزنیں کچے ءَ جانی ءُ پوجی تاوان چست کنگ کپتگ

جارکش ءَ گوشتگ بلوچستان لبریشن فرنٹ ھوشاپ تل ءَ زورگریں پاکِستانی پوج ءِ سر ءَ اُرش ءِ زمہ واری ءَ منّ اِیت ءُ اے کھول ءَ کنت کہ زورگریں پاکِستانی پوج ءِ سر ءَ اُرش داں بلوچستان ءِ آجوئی ءَ برجاہ بنت ۔

گُڈی ءَ جارکش ءَ گوشتگ کہ کاروائی ءِ میان ءَ گل ءِ رسانکدر ءِ ٹولی ءَ ھمگرنچیں سرمچاراں اُرش ءِ سرجمیں ویڈیو جوڑ کُتگ کہ زوت گل ءِ آپیشل رسانکدر چینل آشوب ءَ شنگ کنگ بیت ۔

بلوچستان ءَ دگہ اسسٹنٹ کمشنرے آوار جنگ بوتگ، زیارت ءِ اے سی وتی زھگ ءِ ھمراھی ءَ سلاہ بنداں آوار جتگ-

بلوچستان ءِ دمگ زیارت ءَ ناشناسیں سلاھبنداں اسسٹنٹ کمشنر “ای سی” زیارت افضل باکی گوں وتی چُک ءِ ھمراھی ءَ آوار جتگ۔

اے وئیل زیزری ءِ سیل ءُ سواد ءِ جاہ ءَ بوتگ کہ اود ءَ اے سی زیارت تر ءُ تاب ءَ بوتگ-

لیویز ءِ بنشون ءِ رد ءَ سلاہ بندیں مردماں اے سی ءِ سلاہ بندیں مردم ءُ ڈرائیور یلہ داتگ انت بلے آھانی سرکاری گاڑی مانداشتگ-

انگت ءَ اے وئیل ءِ زمہ واری کس ءَ نہ زرتگ ءُ اے وئیل ءِ تہ ءَ ھواریں مردمانی پجار ھم نہ بیتگ انت-

اے وئیل ھما وھد ءَ بوتگ کہ بلوچستان ءَ سرکاری کارمندانی آوار جنگ ءِ تہ ءَ گیشی گندگ بوگ ءَ انت۔ اے سال ءَ 4 جون ءَ بلوچستان ءِ دمگ کیچ ءِ چہ تھسیل تمپ ءَ اسسٹنٹ کمشنر حنیف نورزی آوار جنگ بوتگ کہ ایشی ءِ زمہ واری بلوچ آجوئی ءِ سلاہ بندیں گل بلوچ لبریشن فرنٹ ءَ من اتگ-

چہ زیارت ءَ آوار جنگ بوتگیں افضل باکی ءِ بابت ءَ انگت ءَ چہ واکداراں ھچ وڑیں سرکاری بیان شنگ نہ کتگ بلے پٹ ءُ پول ءِ ھال ھست۔

چہ بلوچستان ءَ دگہ اُستاناں آیوکیں ٹرین سیکیورٹی ءِ جیڑھانی سبب ءَ مھتل کنگ بیتگ انت-

ریل ءِ واکدارانی رد ءَ سیکیورٹی جیڑھانی سبب ءَ 10اگست ءَ چہ پشاور ءَ شال ءَ روکیں ءُ چہ 11اگست ءَ شال چہ پشاور ءَ روکیں جعفر ایکسپریس ٹرین سیکورٹی ءِ جیڑھانی سبب ءَ تاں 15اگست ءَ مھتل کنگ بوتگ وھدیکہ چہ کراچی ءَ شال ءُ پد ءَ بولان میل ءِ ریل ھم 16اگست ءَ تاں مھتل کنگ بوتگ۔

زانگ بہ بیت گوستگیں لھتیں روچاں بلوچستان ءَ ریل ءِ پٹری ءُ ریلانی سر ءَ بازیں تراک بوتگ کہ چہ ایشی ءَ پد ریل ءِ سروس ءِ بند کنگ ءِ پیسلہ کنگ بوتگ۔

گوست ءَ بیتگیں اُرشانی زمہ واری بلوچ آجوئی لوٹوکیں گلاں من اتگ انت-

مروچی ھم بلوچستان ءِ دمگ مستونگ ءَ شال پشاور پنجاپ ءَ روکیں جعفر ایکسپریس بمب تراکے ءِ نشانگ کنگ بیتگ کہ چریشی ءِ آسر ءَ ٹرین ءِ شش بوگی چہ پٹری ءَ لگوشتگ انت کہ اے اُرش ءِ زمہ واری ھچ گل ءَ پہ وت نہ زرتگ-

زانگ بہ بیت کہ اگست ءَ سرجمیں بلوچستان ءَ سیکورٹی ءِ جیڑھانی سبب ءَ انٹرنیٹ ءِ سروس ھم یک ماھے ءِ واستا بند کنگ بیتگ اَنت، وھدیکہ ٹرانسپورٹ ءُ زمینی تر ءُ تاب ءِ سر ءَ ھم بندش جنگ بیتگ اَنت۔

ڈپٹی کمشنر کیچ بشیر احمد بڑیچ ءَ دمگ ءِ تہ ءَ دمگداری ءُ استانداری بس سروسزانی استا نوکیں روانی ءِ وھد ءُ کٹ آف ٹائم ءِ ھوالگ ءَ جار شنگ کتگ۔

نوکیں نوٹیفکیشن ءِ رد ءَ چہ کراچی ءَ تربت ءَ آیوکیں بس اوتھل زیرو پوائنٹ ءَ چہ ایوک ءَ سھب ءِ چاربج ءَ بگر داں نیم روچ ءِ یک بج ءِ نیام ءَ شت کت کن اَنت۔ شنگ کنگ بوتگیں وھد ءَ پد چہ اوتھل ءَ تربت ءِ نیمگ ءَ ھچ بس رھادگ نہ بیت انت۔ ھمے رنگ ءَ چہ تربت ءَ کراچی ءَ روگ ءِ بس ھم چہ تلار ءَ ایوک ءَ سھب ءِ چاربج ءَ بگر داں نیم روچ ءِ یک بج ءِ نیام ءَ رھادگ بوت کن اَنت وھدے کہ اے وھد ءَ پد رھادگ بوھگ ءِ سر ءَ سرجمی ءَ بندش جنگ بیتگ۔

پد ءَ چہ کراچی ءَ تربت ءَ آیوکیں بسانی واستا تالار چیک پوسٹ ءَ بیگاہ ءِ شش ءِ کٹ آف ٹائم ٹھینگ بوتگ کہ ایشی ءَ پد ھچ بس چہ اے ٹک ءَ دیم ءَ شت نہ کنت۔

ھمے رنگ ءَ چہ شال ءَ دیم پہ تربت ءَ آیوکیں بس ھم ھوشاپ زیروپوائنٹ ءَ شپ ءِ شش ءَ پد دیم ءَ روگ ءِ اجازت نہ بیت۔ چہ شال ءَ گوادر ءَ روکیں بسانی واستا ھوشاب زیرو پوائنٹ ءَ کٹ آف ٹائم ساھت 5بج ءَ ہم ٹھینگ بوتگ۔

ڈپٹی کمشنر بشیر احمد بڑیچ ءَ گشتگ اے رھبندانی ھلاپ ورزی کنوکیں ٹرانسپورٹرانی ھلاپ ءَ سکیں کانودی کاروائی کنگ بیت ۔ آئی ءَ درستیں بس آپریٹرز ءَ را اے جارانکی سر ءَ سک امل کنگ ءِ کڈنی کتگ-

پاکستان ءِ بنجاھی شھر اسلام آباد ءُ سندھ ءِ بنجاھی شھر کراچی ءَ بیگواھیں مردمانی کھولانی زھرشانی برجاہ انت-

ماں اسلام آباد ءَ بلوچ یکجھتی کمیٹی ءِ بندیگیں رھشون ءُ چہ بلوچستان ءَ پاکستانی پوج ءِ دست ءَ آوار جنگ ءُ بیگواھی ءَ پد بیتگیں مردمانی کھولانی زھرشانی 26 می روچ ءَ برجاہ انت-

زھرشانی کنوکاں گوشتگ بیست ءُ شش روچ سرجم بیتگ انت بلے اسلام آباد ءِ انتزامیہ ءَ پہ پریس کلب ءِ روگ ءَ راہ انگت ءَ پچ نہ کتگ انت ءُ چریشی ءَ چہ انتزامیہ ءِ سبب ءَ ما گرم ءُ شھری چہ دگ بندی ءَ تکانسر انت-

آیاں گوشتگ مئے اے پرایمنیں زھرشانی ریاست ءُ آئی ءِ رسانکدر ءُ آمیدگس پارلیمنٹ ءُ دگہ واکدارانی گوشاں ٹرکل جن انت ءُ جھان ءَ پیشدار انت کہ اد ءَ چنکس انسانی ھک لگتمال بوگ ءَ انت-

آیاں گوشتگ ما اے دابیں زُلم ءُ زوراکیاں چہ وتی راستی ئیں ھکاں دزکش بوت نہ کن ایں ءُ وتی بندیگیں رھشون ءُ گار ءُ بیگواھیں مردمانی ھاتر ءَ اے زھرشانی برجاہ بیت انت-

دومی نیمگ ءَ سندھ ءِ بنجاھی شھر کراچی ءَ بلوچ ھلک لیاری ءَ ھبدہ جولائی دوھزار ءُ بیست ءُ پنچ ءَ پاکستانی پوج ءِ دست ءَ اوار جنگ بیتگیں زاھد علی ءِ بیگواھی ءِ ھلاپ ءَ مروچی پنچمی روچ ءَ زھرشانی ماں کراچی پریس کلب ءَ ڈن برجاہ –

زھد علی ءِ پِت عبدالحمید ءَ چہ انسانہ ھکانی گل، آمیدگس ءُ انسان دوستیں مھلوک ءَ لوٹ کتگ کہ آ مئے بے وسیں توار ءَ وسے ھوار بہ کن انت ءُ دیم ءَ بہ جنزین انت-

بلوچستان ءِ دمگ کیچ ءِ ھند تمپ میراباد ءَ ناشناسیں سلاہ بندیں مردماں یک لوگے ءِ سر ءَ دستی بمبے چگل داتگ ءُ تیرگواری کتگ بلے اے وئیل ءَ ھچ وڑیں تاوان ءِ ھال سر نہ بیتگ انت- دمگی واکداراں ویل ءِ ھال راست کتگ-

دمگی مردمانی رد ءَ اے اُرش شمبے ءِ شپ ءَ دیر ءَ بوتگ کہ موٹر سائیکل ءِ سواریں دو مردماں لقمان نامیں مردے ءِ لوگ ءِ سر ءَ دستی بمبے چگل داتگ کہ گوں مزنیں تراکے ءَ ترگ اتگ۔ اُرش کنوکاں پشت مانداتگ ءُ شتگ انت-

تراک ءَ چہ لوگ ءِ دیوال ءُ نزیکیں دریگ ءَ تاوان رس اتگ بلے ھچ وڑیں ٹپی ءُ بیرانی ءِ ھال نہ بوتگ۔

دمگی مردمانی گشگ اِنت کہ اے گل ءِ اُرش ءِ رھبدان کہ دمگی ”ڈیتھ اسکواڈ“ ءِ نام ءَ زانگ بیت کہ ایشی ءِ سر ءَ گوستگیں وھداں ٹارگٹ کلنگ، تراک ءُ سیاسی کارکناں نشانگ جوڑ کنگ ءِ الزام جنگ بوتگ انت۔

اے الزاماں آزاتیں رنگے ءَ راست نہ بوتگ انے ءُ نہ کہ واکداراں اے اُرش ءِ زمہ واری ءِ بابت ءَ سرکاری بیان شنگ کتگ۔ انسانی ھکانی جھدکار بازیں وھداں کہ بلوچستان ءَ ”ڈیتھ ءاسکواڈ“ ءِ نام ءَ زانگ بوتگیں سلاہ بندیں گلانی بابت ءَ زھر ءِ درشان دیگ ءَ انت-