چاگی ءَ بس ٍاڈے ءَ چہ ایس ایچ او، اے ایس آئی گل شاہ سلاہ بندیں مردماں آوار جتگ-
پولیس ءِ رِد ءَ اے ایس آئی گل شاہ چاگی ءِ بس اڈے ءِ سر ءَ ایوک ساڑی بیتگ ءُ اے میان ءَ چار سلاہ بندیں مردم یک گاڑی ءَ چہ اتکگ اَنت ءُ وتی ھمراھی ءَ برتگ اِِت-
وئیل ءِ ھال سر بیگ ءَ پد پولیس ءَ پٹ ءُ پول بندات کتگ، وھدے کہ اے ایس آئی گل شاہ ءِ شوھازگ ءِ ھاتر ءَ گامگیج زیرگ بیگ ءَ اِنت-
ایس ایس پی چاگی ءِ رِد ءَ وئیل ءَ گیش پٹ ءُ پول برجاہ ءَ اِنت ءُ جتاجتائیں سرپدی ء یکجاہ کنگ بیگ ءَ اِنت-
بلوچستان ءَ جتا جتائیں دمگ ماشکیل ءُ پنجگور ءَ سلاہ بندیں اُرشانی تہ ءَ پاکستانی لشکر ءَ تاوانانی دیمپانی بیتگ۔
گوستگیں روچ ءَ ماشکیل ءِ گلوگہ ءَ سلاہ بندیں مردماں پاکستانی لشکر ءِ کاروان ءِ گاڑیانی سربستگ ءُ اُرش کتگ۔ دمگی مردمانی رد ءَ فورسز ءِ دو گاڑی تچک ءَ اُرش ءِ آماچ بوتگ اَنت کہ ایشی ءِ آسر ءَ 6 کارندہ بیران ءُ ٹپیگ بوتگ اَنت۔
اے درگت ءَ انگت ءَ واکداراں ھچ وڑیں ھال ءُ اھوال نہ داتگ۔
مروچی سھب ءَ پنجگور ءِ دمگ پروم ءِ شکاری بازار ءَ سلاہ بندیں مردماں سلاہ بندیں اُرش ءَ فوج نشانگ جوڑ کتگ۔ اُرش ءَ پد مزنیں کساسے ءَ لشکر دمگ ءَ سر بوتگ بلے واکداراں اے درگت ءَ ھچ وڑیں ھال ءُ اھوال شنگ نہ کتگ۔
بلوچستان ءِ دمگ مند ءَ پاکستانی پوج ءَ کواڈ کاپٹرانی بمب گواری ءَ پنچ مردم زدگ بیتگ انت-
گیشیں اھوالانی رد ءَ گوستگیں روچ ءَ بلوچستان ءِ دمگ مند ءَ بلوچ سلاہ بندیں گلانی کنٹرول کنگ ءَ پد پاکستانی پوج ءَ کواڈ کاپٹر بال داتگ انت-
اھوالانی رد ءَ کواڈ کاپٹر مند بلوچ آباد ءَ بمبگواری کتگ ءُ چریشی ءَ پنچ مردم زدگ بیتگ انت-
زانگ بہ بیت گوستگیں روچ ءِ بیگاہ ءَ بازیں کچے ءَ سلاہ بندیں مردماں مند ءِ دمگ بلوچ آباد ءُ بلو ءَ کنٹرول کتگ ءُ اود ءُ دگ بستگ انت –
بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں ھپدہ ستمبر 2026 ء جھل مگسی ءَ زورگریں پوج ءِ چیردستی ءَ پُرکاریں ریاستی ڈیتھ اسکواڈ کارندھانی سر ءَ یک مزنیں اُرشے کتگ- اے کاروائی ءِ آسر ءَ ڈیتھ اسکواڈ ءِ دو کارندہ مرتگ ءُ بازین ئِے ٹپی بیتگ اَنت، وھدے کہ آ دگہ کارندہ تُرس آماچ بیتگ ءُ جاہ پہ جاھی تتکگ اَنت-
جارکش ءَ گوشتگ پانزدہ ستمبر 2026 ءَ بی ایل ایف ءِ سرمچاراں شال شھر ءَ سریاب دگ ءُ اشی ءِ کش ءُ گوراں یک پوجی کاروائی ءِ رِد ءَ بُنجاھی شھدگ سر سرجمی ءَ ناکہ بندی جتگ ءُ تر ءُ گرد کتگ ءُ اسنیپ چیکنگ کتگ، وھدے کہ سرکاری ماڑی ءُ بینک ھم نشانگ کتگ ءُ تاوان داتگ –
جارکش ءَ گْوشتگ پانزدہ ستمبر 2026 ءَ سرمچاراں دالبندین ءِ دمگ دالبندین کراس سر ءَ کاروائی کنان ءَ پولیس کارندہ راج ءَ چہ زرگری ءِ وھد ءَ دزگیر کتگ اَنت آیانی گور ءَ چہ وتاس دستیگ کتگ – اے کاروائی دمگی راج ءِ نیمگ ءَ چہ یکشل ءَ سر بیتگیں شکایت ءِ پشدر ءَ کتگ- سرمچاراں اے کارندہ پہ گلی ھساب ءَ تُرندیں کڈن کنگ ءَ پد یل داتگ اَنت-
جارکش ءَ گْوشتگ کہ بی ایل ایف پولیس کارندھاں کڈن کنت کہ آ راج ءَ را وسر ءَ دلسیاہ کنگ، تُرسینگ ءُ زرگری وڑیں جرم ءَ چہ سرجمی ءَ پھریز بہ کن اَنت اگاں ناں گُڑا آیانی ھلاپ ءَ تُرندیں کاروائی کنگ بیت-
آئی ءَ گوشتگ کہ ھمے روچ دگہ یک کاروائی ءَ، سرمچاراں زامران ءِ دمگ آرچنان کور ھند سر ءَ برجاہ زورگریں پوج ءِ پھازداری چوکی سر ءَ مزنیں سلاہ ءُ وتکاریں سلاھاں چہ اُرش کتگ چریشی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-
جارکش ءَ گوشتگ چاردہ ستمبر 2026 ءَ سرمچاراں گریشہ ءِ دمگ تاپگو ءَ یک کاروائی ءِ میان ءَ ریاستی ڈیتھ اسکواڈ ءِ سروک شفیق مینگل ءِ ھاسیں کارندہ اھسان ء حضور بخش آئی ءِ لوگ ءَ تیرگواری کتگ کُشتگ – اے مرد تچکی ءَ پوجی زوراکی، کمکاری ءُ مئے سنگتیں سرمچار شھید زبیر بلوچ، شھید قندیل ءُ شھید سفر ءِ شھیدی ءَ تچکی ءَ ھوار بیتگ- اشی ءَ اَبید دمگ ءَ دُزی، دمگی تاجر ءُ باپاری مردماں چہ زرگری ءُ دگہ چاگردی سلّکاریاں ھوار بیتگ- سرمچاراں پیسلہ کتگیں کاروائی کنان ءَ اے مرد گُڈی آسر ءَ سر کتگ-
جارکش ءَ گْوشتگ سیزدہ ستمبر 2026 ءَ بی ایل ایف ءِ سرمچاراں نال ءِ دمگ کوڑاسک ءَ زورگریں پوج ءِ چیردستی ءَ پُرکاریں ڈیتھ اسکواڈ ءِ سروک صمد ءِ کارندہ اُرش ءِ نشانگ کتگ اَنت – اے کاروائی ءِ آسر ءَ دو ڈیتھ اسکواڈ کارندہ سک ٹپی بیتگ اَنت، آیانی سرجمیں سلاہ سرمچاراں دستیگ کتگ اَنت-
آئی ءَ گوشتگ کہ ھمے روچ ءَ دگہ یک کاروائی ءَ سرمچاراں نال ءِ دمگ کوڑاسک ءَ برجاہ یوفون ءِ ھال اِھوالی ٹاور تیرگواری کتگ ناکارہ کتگ اشی ءِ سرجمیں مشینری مانداشتگ ءُ تباہ کتگ اَنت-
جارکش ءَ گوشتگ کہ ھمے روچ سرمچاراں بیلہ ءُ اوتھل ءِ میانی دمگاں ٹیھاور ء وایاری ءِ ھندانی سر ءَ برجاہ پولیس ءِ دو چیک پوسٹانی سر ءَ کاروائی کنان ءَ دوئیں پوسٹ سرجمی ءَ دستیگ کتگ اَنت- سرمچاراں اود ءَ ھستیں سرجمیں کارندھاں چہ ساز ءُ سامان وتی دستیگ کتگ اَنت، بلے اود ءَ ساڑی پولیس کارندھانی دزگیر کنگ ءَ پد گلی راہ ءُ راھبندانی ءُ انسانی ہمدردی بُنیاد ءَ بید تاوان ءَ پہ سلامتی یل داتگ اَنت-
آئی ءَ گوشتگ ھمے روچ ءَ کلات ءِ دمگ گراڑی ءَ ٹول پلازہ نزیک ءَ سرمچاراں کاروائی کنان ءَ آئی ایس آئی ء کارندہ انسپکٹر غفار خلجی دزگیر کتگ- ھمے مرد اے وھد ءَ گل ءِ دست ءَ اِنت ءُ جُست ءُ پُرس برجاہ ءَ اِنت-
جارکش ءَ گوشتگ کہ سیزدہ ستمبر ءَ سرمچاراں تربت ءِ دمگ نودز ءَ سے کلاکاں تاں یکشل ءَ ناکہ بندی کتگ اسنیپ چیکنگ کتگ- اے ناکہ بندی ءِ مول ءُ مراد دمگ ءَ گل ءِ کار ءُ توانمندی برجاہ دارگ ءُ زورگریں پوج ءُ آئی ءِ دمگی کمکارانی سُر ءُ پراں نگاہ ایر کنگ اِنت-
جارکش ءَ گوشتگ کہ دوازدہ ستمبر 2026 سرمچاراں آواران ءِ دمگ کولواہ ءَ مالار شم ھند ءِ سر ءَ گشت ءَ بیتگ اَنت کہ زورگریں پوج ءِ چیردستی ءَ برجاہ ڈیتھ اسکواڈ ءِ سلاہ بندیں ٹولی ءَ سرمچارانی راہ دارگ جُھد کتگ- جاڑیگیں سرمچاراں زوت کاروائی کنان ءَ ڈیتھ اسکواڈ سر ءَ اُرش کتگ- سرمچارانی کاروائی ءِ آسر ءَ ڈیتھ اسکواڈ کارندہ تُرس آماچ بیتگ ءُ شنگ شانگ بیتگ اَنت ءُ وتی موٹر سائیکل جاہ پہ جاھی یل داتگ ءُ تچگ ءَ سوبمند بیتگ اَنت-
گُڈی ءَ بی ایل ایف ءَ سرجمیں اُرشانی زمہ واری منّ اِتگ اَنت-
بلوچ آجوئی لوٹوک دمگ ءَ پُترتگ اَنت، دستیگ برجاہ داشتگ، پاکستانی پوج ءِ بمبگواری-
بلوچستان ءِ دمگ کیچ ءِ ھند چہ مند ءَ ھالانی رِد ءَ بلوچ آجوئی لوٹوک مند ءِ دمگ بلوچ آباد ءُ بلو ءَ مزنیں کچے ءَ پُترتگ اَنت ءُ دمگ دستیگ کتگ اَنت-
اے میان ءَ دمگ ءَ پاکستانی پوج ءِ نیمگ ءَ چہ کواڈ کاپٹراں چہ بمبگواری کتگ، بلے ھچ وڑیں جانی تاوان ھال نہ بیتگ-
زانگ بہ بیت اے دمگ ءَ بلوچ آجوئی لوٹوکیں سلاہ بند گل پُرکار اَنت، بلے اے وئیل ءِ زمہ واری انگت ھچ گل ءَ نہ زرتگ-
چاگی ءِ دمگ دالبندین ءِ ھند امین آباد ءَ پاکستانی لشکر ءُ سلاہ بندیں مردمانی نیام ءَ جنگ ءُ چوپ ، جانی تاوانانی ھال-
دمگی مردمانی رد ءَ دمگ ءَ مزنیں تیرگواری ءُ تراک ءِ توار اشکنگ بوگ ءَ اِنت ءُ شھر ءِ دگہ دمگاں بازیں کچے ءَ لشکر دارگ بوتگ-
زانگ بہ بیت کہ گْوشگ بیتگیں دمگ ءَ بلوچ آجوئی ءِ سلاہ بندیں گل پرکار اَنت، بلے مرچی بوتگیں جنگ ءُ چوپاں واکدارانی یا آجوئی لوٹوکیں مردمانی لیکہ انگت دیم ءَ نہ اتکگ انت-
پاکستان ءِ اُستان خیبر پختونخوا ءِ شھر کوھاٹ ءَ کوھنیں پولیس لائنز ءَ بوتگیں تراک ءَ چہ 5 پولیس کارمند ءَ ھوار 16 مردم بیران ءُ 30 ءَ چہ گیش ٹپیگ بوتگ انت۔
پولیس ءِ انسپکٹر جنرل خیبر پختونخوا ذوالفقار حمید ءَ گشتگ کہ بنداتی ھالانی رد ءَ تراکناکیں چیزاں چہ پُریں گاڑی اولڈ پولیس لائنز ءَ ٹکر جتگ، وھدیکہ تراک ءَ پد سلاہ بندیں مردمانی گوما تیرگواری ھم برجاہ بوتگ۔
ریسکیو 1122 ءِ جارکش بلال احمد فیضی ءِ رد ءَ تراک نیمروچ ءِ یک ءُ نیم ءِ نزیک ءَ بوتگ۔
کیچ ءِ دمگ الندور ءِ نندوکیں چنگیز ء مھمد ابراھیم ءِ کھول ءِ گوشگ انت کہ آ پاکستانی لشکر ءِ دست ءَ بیران بوتگ ءُ لشکر ءَ آئی ءِ لاش ءِ دیگ ءَ انکاری کتگ۔
کھول ءِ رد ءَ 24 سالی ئیں چنگیز ء مھمد ابراھیم 4ستمبر 2026 ءِ شپ ءِ ساھت یازدہ ءَ آپسر تربت ءَ پاکستانی فرنٹیئر کور ءِ کارندھاں دزگیر کنگ ءَ پد آوار جتگ ءُ بیگواہ کتگ-
کھول ءَ گوشتگ کہ چنگیز ءَ پیسر ءَ پاکستانی انٹیلی جنس ایجنسیاں کڈن کنگ بوتگ کہ آ بلوچ سیاسی باسکانی ھلاپ ءَ ھال بہ دنت۔
کھول ءِ گْوشگ اِنت چنگیز بلوچ ءِ پچ گرگ ءِ واستا آیاں جتاجتائیں ادارھ ءُ مردماں گوں رھوت کتگ، بلے پد ءَ پاکستانی لشکر ءَ آھاں ھال داتگ کہ چنگیز بندی جاہ ءَ بیران بوتگ ءُ لشکر ءَ آ کل کتگ۔ کھول ءِ گشگ ءِ رد ءَ فورسز ءَ چنگیز ءِ لاش ءِ اکس ھم پیش داشتگ۔
زانگ بہ بیت کہ چہ ایشی ءَ پیسر ءَ ھم انچیں وئیلے بوتگ کہ بلوچ مھلوک پاکستانی لشکر ءِ دست ءَ کُشگ ءُ آوانی لاش آھانی کھول ءِ نہ دیگ ءِ ھال دیم ءَ اتکگ انت ۔
زانگ بہ بیت کہ 27اگست 2025 ءَ عمران علی نامیں ورنا پولیس ءِ انسداد ناشرکاری ءِ محکمہ ءِ نیمگ ءَ چہ شال ءَ زورانسری بیگواہ کنگ بوتگ۔ کساس یک سالے ءَ آئی ءِ لوگ ءِ مردم آئی ءِ جاہ ءُ بنجل ءِ بابت ءَ ھرچ وڑیں زانتکاری ءَ چہ زبھر بوتگ انت۔
6اگست 2026 ءَ زورانسری بیگواہ کنگ ءِ انکوائری کمیشن ءِ دیم ءَ عمران علی ءِ کیس ءِ گوشدارگ ءِ وھد ءَ پولیس ءِ کارندھے ءَ اولی رند ءَ گوشتگ کہ عمران علی 23 مئی 2026 ءَ سلاہ بندیں دیم پہ دیم ءَ بیران بوتگ ءُ دپن کنگ بوتگ۔
کھول ءَ اے گپ رد کتگ، پرچا کہ آھانی گشگ ءِ رد ءَ عمران علی ءِ بیرانی ءَ پیسر پولیس ءِ دست ءَ نزیک ءَ 11 ماہ بوتگ۔ چہ بندیگ جاہ ءَ دزکپتگیں دگہ سئے مردماں ھم اے گپ ءِ پدرائی کتگ کہ آ پولیس ءِ بندیگ جاہ ءَ اَنت۔
میان استمان ءَ عمران علی ءِ بیرانی ءِ درستیں تک ءُ پھناتانی سر ءَ سرجمی، آزات ءُ جتائیں رنگے ءَ پٹ ءُ پول کنگ ءِ لوٹ کتگ۔
میان اُستمان ءِ رد ءَ عمران علی ءِ بندیگ کنگ، آئی ءِ بیرانی ءِ جاور ءُ آئی ءِ چیرکائی کل کنگ ءِ جاوراں ھوار سرجمیں تک ءِ سر ءَ سرجمیں ءُ تچکیں رنگے ءَ چار ءُ ٹپاسی کنگ بہ بیت۔
چہ بلوچستان ءَ بلوچ سیاسی، انسانی ھکانی باسکاں یکشل ءَ پاکستان ءِ زوراکیانی دیمپانی انت –
میان اُستمان ءَ انسانی ھکانی نیاد ءِ وھد ءَ بلوچ یکجھتی کمیٹی ءِ رھشون ءُ باسکانی بندیگی ءِ ھلاپ ءَ توار چِست کنگ بیتگ-
جنیوا ءَ گلوبل ھیومن رائٹس ڈیفنس ءِ نیمگ ءَ میان اُستمانی انسانی ھکانی کونسل ءِ ششست ءُ سیمی ءِ نیاد ءَ بلوچستان ءَ بلوچ یکجھتی کمیٹی ءِ رھشونانی درکانودی بندیگی ءُ انسانی ھکانی لگتمالی ءِ سر ءَ پدردی درشان کتگ-
آئی ءَ گوشتگ بی وائی سی ءِ رھشون ماھرنگ بلوچ، سبگت اللہ، بیبو بلوچ ءُ گلزادی درکانودی بازیں وھداں بندیگ انت ءُ ھمے سال ءَ ماھرنگ ءُ ساجی سبگت اللہ ءَ اُمر ءِ کید درکانودی ءَ ٹرائل کنگ بیتگ-
آئی ءَ گوشتگ بلوچستان ءَ بازیں کچے ءَ پاکستان ءِ نیمگ ءَ بلوچ سیاسی باسک دزگیر کنگ ءُ بیگواہ کنگ بوگ ءَ انت ءُ ایشانی درکانودی بیگواہ کنگ انسانی ھکانی لگتمالی انت-
آئی ءَ چہ میان اُستمان ءَ لوٹ کتگ اے جاورھالانی سر ءَ دلگوش بہ دنت ءُ بی وائی سی ءِ رھشوناں یل کنائینگ ءَ دلستکی بہ کنت ءُ انسانی ھکانی لگتمالی بند کنگ بہ بیت-
زانگ بہ بیت بلوچستان ءَ بیگواھیں مھلوک ءِ ھاتر ءَ توار چِست کنوکیں گل بی وائی سی ءِ رھشوناں ھوار بازیں باسک دزگیر کنگ ءُ بندیگ کنگ بیتگ انت-
چریشی ءَ ابید بی وائی سی ءِ سروک ماھرنگ بلوچ ءُ سبگت اللہ ساجی چرے پاداش ءِ پژدر ءَ اُمرکید کنگ بیتگ انت-
بی وائی سی ءَ وتی رھشونانی اُمر کید کنگ ءِ پژدر ءَ گوشتگ کہ یک نیمگی ءُ چیرکائی رھشونانی ٹرائل کنگ ءُ آ اُمر ءِ کید کنگ ءِ سزا دیگ بیتگ انت کہ اے وئیلانی ھلاپ ءَ بی وائی سی وتی ھر تک ءَ توار ءَ چِست کنت ءُ دومی نیمگ ءَ ھائی کورٹ بلوچستان ءَ دوبر درھواست کنگ ءِ دزبندی بیتگ بلے داں انگت ءَ وھد ءِ وداری ءَ دیم ءَ کنگ بیتگ-
چَہ بلوچستان ءِ جتا جتائیں دمگاں پنچ مردم زورانسری بیگواہ کنگ بیتگ اَنت ءُ چَہ مستونگ ءَ زورانسری بیگواہ کنگ بیتگیں جنینے یل کنگ بیتگ ءُ شال ءَ سر بیتگ-
ھالانی رد ءَ گوستگیں شپ ءَ حافظ شاہ میر ء نواب جھمنند پنجگور عیسیٰ گوستگیں شپ ءَ پاکستانی لشکر ءَ آوار جتگ ءُ بیگواہ کتگ-
چہ شال ءَ کلی جیو ءَ 20 فروری 2026 ءَ 13 سالی ئیں نودربر امان اللہ بنگلزئی ء عنایت اللہ سی ٹی ڈی ءِ کارندہاں 2بج ءَ چہ آئی ءِ لوگ ءَ آوار جتگ ءُ بیگواہ کتگ۔
تربت ءِ دمگ ملائی بازار ءَ 19 اگست 2026 ءَ 20 سالی ئیں نودربر فهد انور ء انرو چہ آئی ءِ لوگ ءَ یک بج ءَ ایم آئی ءُ ایف سی ءِ کارندہاں آوار جتگ ءُ بیگواہ کتگ-
ھمے رنگ ءَ کیچ ءِ دمگ بُلیدہ ءِ نندوکیں 24 سالی ئیں چنگیز ء مھمد ابراھیم 4 ستمبر 2026 ءَ شپ ءِ 11 ءَ تربت ءِ دمگ چہ اپسر ءَ ایف سی ءِ کارندہاں آوار جتگ ءُ بیگواہ کتگ۔
مستونگ ءِ نندوکیں احسان بلوچ ء مھمد اسمائیل 9 ستمبر 2026 ءَ سھب ءِ 9 بج ءَ چہ لک پاس چیک پوسٹ مستونگ ءَ ایم آئی ءُ ایف سی ءِ کارندہاں آوار جتگ ءُ بیگواہ کتگ۔
دومی نیمگ ءَ ماسٹر عبدالستار ءِ جنک سیما بلوچ کہ 11 ستمبر 2026 ءَ پاکستانی لشکر ءَ چہ مستونگ ءِ دمگ کرد گاپ ءَ زورانسری ءَ بیگواہ کتگ ات ، 17 ستمبر ءَ چہ شال ءَ یل کنگ بیتگ ۔
–
