TBP Balochi

بلوچستان ءِ دمگ قلات ءِ ھند منگچر ءِ کوچّگ چوٹانک ءَ برجاھیں لشکری آپریشن ءِ میانجی ءَ یک ورنایے ءِ دزگیری ءَ پد کُشگ بیتگ۔

ورنا ءِ پجّار چہ سعود ء نیچاری ءِ نام ءَ بوتگ، آئی ءِ جون چہ یک باگے ءَ دزکپتگ۔

ھندی ھالانی رِد ءَ پاکستانی لشکر ءَ داں دو روچ ءَ سرچ آپریشن برجا داشتگ بوتگ، چہ ایشی ءَ پد پاکستانی لشکر یک باگے ءِ تہ ءَ پُتر اَنت کہ آ باگ سعود نیچاری مڈی گْوشگ بوتگ۔

ھندی مردمانی گْوشگ اِنت کہ لشکر ءَ سعود ءَ را دزگیر ئِے کُتگ، باز ٹپ ءُ ٹوراں پد تیر جَتگ ءُ کُشتگ ءُ آئی ءِ جون چموداں یل داتگ۔

شاھد ءُ گواھانی رِد ءَ سعود نیچاری ءِ جسم ءُ اندام ءِ سر ءَ شش تیرانی ٹپ ءُ نشان پِر بوتگ، چہ جاور ءَ پد جون ھندی کمک ءِ وسیلہ ءَ نادراھجاہ رسینتگ۔

ھالانی رسگ ءِ رِد ءَ رَند ءَ لشکر ءَ وت ھندی پولیس ءَ را ھال داتگ ءُ ڈپٹی کمشنر ءُ دگہ انتزامی افسراناں گُشتگ اِش کہ یک جونے ھند ءَ موجود اِنت چمیشی ءَ چہ رند انتزامیہ ھما ساھت رس اتگ ءُ جون ءَ را نادراھجاہ ءَ رسینتگ۔

زانگ بیت کہ سعود نیچاری سال 2015 ءَ پانزدہ سال ءِ اُمر زورانسری آوارجنی ءِ نشانگ بوتگیں کفایت اللہ نیچاری ءِ برات بوتگ، کہ گوستگیں چنکیاس سالاں چہ پاکستانی لشکر ءِ دستاں بیگواہ کنگ بوتگ

چہ کھول ءِ نیمگ ءَ کفایت اللہ نیچاری ءِ یل کنائینگ ءِ ھاتر ءَ اسلام آباد ءَ زھرشانی ھم داتگ بوتگ، چمیشی ءَ پد پاکستانی لشکر ءَ آیانی لوگانی سر ءَ بیڑ بُرتگ بوتگ۔

کفایت اللہ نیچاری تنی وھدی گار اِنت ءُ آئی ءِ کھول ءَ آئی ءِ جان سلامتی ءِ بابت ءَ چوشیں ھچ مالومات نہ رس اتگ-

بلوچستان ءِ دمگ کلات ءَ سیادی داروکیں ورنائیں سید انس شاہ ء سید نور شاہ پاکستانی پوج ءَ آوار جتگ – اے وئیل سیزدہ جون دوھزار ءُ بیست ءُ پنچ ءَ ھما وھد ءَ پیش اتکگ آ چہ شال ءَ دیم پہ کلات ءَ روگ ءَ بیتگ-

دمگی مردمانی رد ءَ سید انس شاہ یک مساپر وینے ءَ سوار بیتگ ءُ چہ شال ءَ دیم پہ کلات ءَ روگ ءَ بیتگ کہ راہ ءُ مستونگ کھڈکوچہ ءَ پاکستانی پوج ءَ ایر گپتگ ءُ گون وت برتگ-

اے وئیل ءَ پد سید انس شاہ ءِ بارو ءَ ھچ سرپدی نہ بیتگ انت-

زانگ بہ بیت بلوچستان ءَ زورانسری بیگواھیانی درچ یکشل ءُ برجاہ انت کہ انسانی ھکانی دلگوشداری بیتگ-

ندر پہ باریگ بالادیں وسیم پنام ءِ چراگ ءَ

شائر: ث. ن بلوچ

دی بلوچستان پوسٹ

جی بونستان ءِ سھرچکیں بچیگ
جی مئے کاشانی پلگدیں سالونک
وش ترا نازین اَنت جننک هلکے
برات رنجیگ آں پہ تئی دیدار ءَ
سنگت ءُ بیلاں گير رنجین اَنت
کدھاں نوشاں تئی زھیرانی
یک گمے انچیں باتن ءَ نشتگ
داں کیامت ءَ باتن ءَ نشتگ
گوں تئی زپتیں زهیراں بیگار اِنت
زهیر من ءَ نیلنت ساهتے نینداں
گير تئی بشامی جوڑ ءَ گون اَنت
زهیر گواران اَنت چاریں آتراپاں
چوں بہ سھڑیناں درد ءُ اندوھاں
چوں بہ باں ایمن سرجمیں زند ءَ
چوں کراریناں اندر ءِ تبد ءَ
بے ترا زند ءِ گرانتریں واهگ
بے نَپ ءُ سیت اِنت
چو چراگ ءَ تو میتگ ءَ روک
سیاه شپ ءُ تاموراں رُژن درپشوکے
جی منی ڈیھ ءِ گلزمین زادگ
پہ بلوچانی نوکیں باندات ءَ
زندگی بمبانی دپ ءَ داتگ
نام تئی البرز ءَ بلند باتیں
راج تئی وشیں نوباتاں باتیں
جی بونستان ءِ سھرچکیں ورنا
جی مئے کاشانی پلگدیں سالونک
داں جهاں هست اِنت تو نمیران ئے

بلوچستان ءِ دمگ کیچ ءَ یک چیرکتگیں شوروانی تراک ءَ چہ سرمچارے بیران بیتگ-

دمگی اِھوالکار رِد ءَ وئیل دشت ءِ دمگ ملائی نگور ءَ بیتگ کہ اود ءَ سیاھجی کوھی دمگ نیمگ ءَ رؤکیں راہ سر ءَ چیرکتگیں شورو ترکّ اِتگ اَنت چریشی ءِ آسر ءَ ریاض نامیں مردمے بیران بیتگ – گوشگ بیگ ءَ اِنت کہ اے تراکناکیں شورو گمانی پاکستانی پوج نیمگ ءَ چیر کنگ بیتگ-

اِھوالکار رِد ءَ پاکستانی پوج ءَ سیاھجی نیمگ ءَ رؤکیں راھانی سر ءَ تراکناکیں شورو کل کتگ اَنت- ریاض کہ دشت شولی جھمنند اِنت، ءَ بلوچ آجوئی لوٹوکیں سلاہ بندیں گلے ءِ باسک بیتگ ءَ وئیل وھد ءَ دگہ سنگتانی ھمراھی ءَ دمگ ءَ گشت بیتگ-

بلے تنی وھدے اے وئیل سر ءَ بلوچ آجوئی لوٹوکیں سلاہ بندیں ءُ واکدار پوجی بنشون نیمگ ءَ ھچ وڑیں درشان شنگ کنگ نہ بیتگ-

بلوچ ریپبلکن آرمی ءِ جارکش سرباز بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بلوچ سرمچاراں ڈیرہ بگٹی تھسیل سوئی گیس فیلڈ ءَ چہ کراچی ء رؤکیں سی شش انچ گیس پائپ لائن ءِ دو ڈنڈائی ءِ ھند سر ءَ تراکناکیں شورواں چہ تباہ کتگ- تراک ءَ پد گیس پائپ لائن ءَ آس کپتگ ءُ گیس پُجّارینگ بند بیتگ-

جارکش ءَ گْوشتگ اے کاروائی گوستگیں روچ ءَ بے میاریں ورنایانی دروگیں میڑ ءَ شھیدی ءِ پُشدر ءَ کنگ بیتگ- اے اُرش ءَ زمہ واری ءَ بی آر اے ءَ منّ اِتگ-

اسرائیل ءِ ایمرجنسی سروسز ءِ رد ءَ ایران ءِ نوکیں میزائل اُرش ءَ کساس 10 مردم ٹپیگ بوتگ اَنت۔

ایکس ءَ برجاھیں بیان ءَ گْوشتگ: گوستگیں لھتیں دمانانی تہ ءَ ریڈ الرٹ سائرن ءِ توار ءَ پد ایمرجنسی میڈیکل ٹیکنیشن ءُ پیرامیڈکس راکٹ ءِ اُرش ءِ جاھاں روان دیگ بوتگ اَنت۔

بیان ءِ تہ ءَ گیش گْشگ بوت کہ ٹپیگیں مردمانی تہ ءَ کسانیں میان ءِ درجہ ءِ ٹپ ءُ ٹور بوتگ اَنت۔

اسرائیلی لشکر ءَ (آئی ڈی ایف) ءَ وتی یک نوکیں پوسٹ ءِ تہ ءَ گْوشتگ کہ ایران ءَ چہ شنگ بوتگیں میزائلانی پجارینگ ءَ پد اسرائیل ءِ بازیں دمگاں الرٹ شنگ کنگ بوتگ اَنت۔

پوسٹ ءِ تہ ءَ گْوشگ بیتگ کہ اسرائیل ءِ بالی اُرد ”تھمدانی دیم ءَ دارگ ءُ ھما جاہ ءَ کہ لوٹ اِیت بدلی ءِ کار ءَ ھوار اِنت“۔ چہ راج ءَ لوٹ کنگ بیت کہ آ ھوم فرنٹ کمانڈ ءِ ھدایتانی سرا عمل بہ کن انت پرچا کہ “دفاعی نظام سرجم ءَ ناقابل نفوذ نہ انت۔

دگہ پوسٹے ءَ کہ کمو وھد ءَ پد جوڑ کنگ بوتگ آئی ءَ گْوشتگ کہ مردم چہ ایمنیں جاھاں درکپت کن اَنت بلے نزیکیں دمگاں بہ نند اَنت۔

امریکی رسانکدر ءِ رد ءَ ایران ءِ بدلی اُرشانی تہ ءَ اسرائیل ءَ یک جنینے بیران بوتگ۔

اسرائیل ءِ سفیر ءَ امریکہ ءَ سی این این ءَ گوں تران کنان ءَ گْوشتگ کہ یک جنینے بیران ءُ ”کساس 40 مردم“ ٹپیگ بوتگ اَنت۔

نیویارک ٹائمز ءَ یک اسرائیلی پولیسے ءَ جارکش ءِ رد ءَ گْوشتگ کہ اے جنین ءِ مرگ یک مضافاتی دمگ ءَ بوتگ۔ جمعہ ءِ شپ ءَ ایران ءِ میزائل ءَ اُرش کنگ بوتگ۔

میان اُستمان ءِ تہ ءَ ایران ءِ سفیر ءِ گشگ انت کہ ایران ءَ اسرائیل ءِ اُرشانی تہ ءَ 78 مردم بیران بوتگ انت کہ آھانی تہ ءَ مزنیں فوجی افسر ھم ھوار انت ءُ 320 ءَ چہ گیش مردم ٹپی بوتگ انت کہ آھانی تہ ءَ گیشتریں بھر لس مردم بوتگ انت۔

ایران ءَ اے گپ پدر کتگ کہ آ انگت اسرائیل ءِ اُرشانی زوراکی ءَ پسو دیگ ءِ تاکت ءَ دار اِیت۔ جمعہ ءِ روچ ءَ اسرائیل ءَ ایران ءِ سر ءَ یکشلیں اُرش کتگ ءُ جوھری آسراتی ءُ میزائل ءِ بنجاھاں نشانگ جوڑ کتگ۔

بازیں کلیدی جاھانی سر ءَ اُرش کنگ بوتگ کہ ایشی ءِ تہ ءَ نتانز ءِ یورینیم افزودگی ءِ بُنجاہ ءُ اصفھان ءِ ایٹمی آسراتی ھوار اَنت ءُ ھمے وھد ءَ مزنیں فوجی کمانڈر ءُ ایٹمی زانتکار ھم بیران بوتگ اَنت۔

اے اُرشاں ایران ءُ اسرائیل ءِ نیام ءَ دیریں کش ءُ گور ءِ جیڑھانی تہ ءَ مزنیں ءُ ھترناکیں کِشک ءِ دروشم ءَ ثابت بوتگ انت۔

اسرائیل ءِ مزن وزیر بینجمن نیتن یاھو ءَ سالانی سال اِنت کہ اے وڑیں اُرش ءِ حمایت کتگ ءُ ایران ءَ ناں ایوک ءَ اسرائیل ءِ ھاتر ءَ، بلکیں سرجمیں دگنیا ءِ ھاتر ءَ ھترہ لیک اِتگ۔

جمعہ ءِ روچ ءَ وتی بیان ءِ تہ ءَ نیتن یاھو ءَ ایرانی راج ءَ چہ لوٹ کتگ کہ آ وتی آجوئی ءِ واستا پاد بیا اَنت۔

ایشی ءِ پسو ءَ ایران ءَ اسرائیل ءِ سر ءَ بازیں ڈرون ءُ بیلسٹک میزائل اُرش کتگ۔ سُھب ءِ اولی اُرش ناکام بوت بلے شپ ءِ نزیک بوگ ءَ گوں سائرن ءِ توار بندات بوت ءُ بیت المقدس ءَ ھوار بازیں دمگاں آزمان چہ تراک ءُ رژنائی ءَ پُر بوت۔

تل ابیب ءَ دوتانی جمبر ساھیل بوت اَنت زبردستیں تراک بوت ءُ ایشی ءَ پد شھری ھما وڑا کہ آہاں ہدایت کنگ بوتگ ات انت پناہ گاھاں شُتگ ات انت۔

ایران ءَ اے گپ پدر کتگ کہ مرچی چہ یک ءُ دو سال پیسر ءَ نزور تر بوت کنت بلے انگت اسرائیل ءِ بے دروریں اُرش ءِ زوراکی ءَ پسو دیگ ءِ تمردی ءَ دار اِیت۔

تھران ءِ سر ءَ اسرائیل ءِ اُرش برجاہ بوگ ءِ ھال ھست انت۔ تھران ءِ ھالانی رد ءَ انگت ءَ شھر ءِ جتا جتائیں دمگاں تراک ءُ ھوائی دفاع ءِ سرگرمی ءِ توار گوشدارگ بوگ ءَ اِنت۔

ویڈیو ءُ رپورٹانی رد ءَ ورداورڈ ءِ دمگ ءَ راڈار ءِ جاہ ءَ نشانگ جوڑ کنگ بوتگ۔

ھمے ھال ھم ھست کہ ریڈار ءِ جاہ دگہ لھتیں جاھاں نشانگ جوڑ کنگ بوتگ اَنت ایشانی تہ ءَ ایران ءِ جنوب ءِ عبدانان ءِ دمگ ھم ھوار اِنت۔

ایرانی رسانکدر ءَ ھال داتگ کہ تھران ءِ رودراتکی دمگ حکیمیہ ءُ تھران پارس ءَ ھم تراک ءِ توار شنگ بوتگ۔

ایران ءِ ھال رسانکی ادارہ ایسنا ءِ رد ءَ کمکی ٹیم حکیمیہ ءَ روان دیگ بوتگ انت۔

سرکاری وسیلگاں مھرآباد ءِ دمگ ءَ مزنیں تراکے ءِ پدر کنگ بوتگ۔

شنگ بوتگیں تامرانی تہ ءَ آتشزدگی ءُ سیاہ رنگیں دنز ءُ تامور دمگ ءَ گندگ بنت۔

بلے لھتیں وسیلگاں مھر آباد ءِ نزیک ءَ آزادی ٹاور ءِ تاوان ءِ ھالانی منّ اِتگ اَنت۔

بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ مئی 2025 ءِ رپورٹ شنگ کتگ ، چریشی ءِ تہ ءَ بلوچستان ءَ انسانی ھکانی جاور درشان کنگ بیتگ انت۔

پانک ءِ کچ ءُ کساسیں رپورٹانی رد ءَ بلوچستان ءَ مئی 2025 ءَ پاکستانی لشکر ءَ 128 مردم زورانسری بیگواہ کتگ انت ، 27 درکانودی کشگ بیتگ انت۔چہ درستاں گیش 32 مردم چہ گوادر ءَ زور بیگواہ کنگ بیتگ۔ چہ ایشی ءَ پد چہ کیچ ءَ 27 ، چہ کراچی ءَ 10 ، چہ آواران ءَ 9 ، چہ شال ءَ 8 ، چہ پنجگور ءُ مستونگ ءَ 7 ، چہ چاگی ءَ 5 ، چہ ڈیرہ بگٹی ءَ 4 ، چہ نوشکی ءَ 6 ، موسی خیل، کلات ءُ ھزدار ءَ 3 ، بارکھان ، ھرنائی ءَ 2 ءُ چہ واشک ءَ یک مردمے زوراسنری بیگواہ کنگ بیتگ۔

در کانودی کوشانی رد ءَ ھم مئی ءِ ماہ چہ درستاں بدتر بوتگ۔27 مردم پاکستانی پوج ءُ گوں آئی ءَ ھمگرنچیں ادارہ ، پاکستان ءِ داشتگیں ڈیتھ اسکواڈ ءَ کشتگ۔1 مئی ءَ پنجگور ءِ ھند تسپ ءَ سمیر اھمد دزگیری ءَ پد زورانسر بیگواہ کنگ بیتگ ءُ 9 مئی ءَ آئی ءِ لاش دزکپتگ۔5 مئی ءَ 15 سالی ئیں علی ، پاکستانی ڈیتھ اسکواڈ ءَ ماں تمپ ، کیچ ءَ کشتگ۔ 10 مئی ءَ وحید چہ پنجگور ءَ آوار جنگ بیتگ ءُ دومی روچ ءَ آئی ءِ تیرسپتگیں لاش دزکپتگ۔

سوپی طارق چہ گوادر ءِ ھند جیمڑی ءَ آوار جنگ ءَ پد کشگ بیتگ ، فھد لھڑی ءِ لاش 13 مئی ءَ چہ شال ءَ دزکپتگ۔2014 ءَ زورانسری بیگواہ کنگ بیتگیں محمد رمزان ءِ لاش ھم مئی ءَ دزکپتگ۔ یونس ماں مالار ، آواران ءَ کشگ بیتگ ، بختیار احمد کلات ءَ ھما وھد ءَ نشانگ کنگ ءُ کشگ بیتگ کہ پاکستانی لشکر ءِ کارپدانی بگیری ءَ زھرشانی یے کتگ۔

ساجد ، یاسر ، حنیف عزیز ، عبدالطیف ءُ گوس بکش چہ آیانی لوگاں آوار جنگ ءَ پد کشگ بیتگ اَنت۔ اھوالکار عبدالطیف ماں آئی ءِ گس ءَ واب ءِ تہ ءَ کشگ بیتگ ، چہ ایشی ءَ زانگ بیت کہ ماں بلوچستان ءَ رسانک ھم جیڑھانی دیمپان اِنت۔مئی ءَ سَے مردم عبدالرھمان بزدار ، فرید بزدار ءُ سلطان مری ، پولیس ءِ ناشرکاری ءِ گر ءُ دار ءِ تک ( سی ٹی ڈی ) ءَ آوار جتگ اَنت ءُ رند ءَ ماں بارکھان ءَ دروگیں میڑے ءَ کشتگ اَنت۔

26 ءُ 27 مئی ءَ مچی ، مالار ، آواران ءَ لشکر کشی ءِ میان ءَ نئیم ءُ ھواری ءَ کشگ بیتگ اَنت ءُ دگہ جنینے سکا ٹپی بیتگ۔ 22 مئی ءَ شیرخان کیتران چہ بارکھان ءَ دزگیر اش کتگ ءُ آئی ءِ لاش 28 مئی ءَ دزکپتگ۔درمان دو بر ءَ دزگیر کنگ بیتگ ءُ گڈی رند ءَ آئی ءِ لاش 30 مئی ءَ چہ جاھو ءَ دزکپتگ۔ 29 مئی ءَ آپسر، تربت ءَ مساپر نامیں گاڑی ڈرائیورے کشگ بیتگ ، ھمے روچ ءَ نزر ، عبدالعزیز ءُ 30 مئی ءَ لیویز کارمند سگیر اھمد کشگ بیتگ اَنت۔

پانک ءِ رپورات ءَ گْوشگ بیتگ کہ چہ درستیں ویلاں ھمے زانگ بیت کہ بلوچستان ءَ ریاستی ادارہ ءُ آئی ءِ پلامرزی ءَ سلاہ بندیں ٹولی گوں بے مھاری ءَ شھری، کارکن ، نودربر ، اھوالکار ءُ سرکاری کارمنداں نشانگ کنگ ءَ اَنت۔اے ویل ناں ایوک ءَ راھبندانی سکا سک بگیری اَنت بلکیں مچگانیں ڈند ( اجتماعی سزا ) ، ترس ءِ چاگرد ءُ زورانسری بیگواھی ءِ برجاہ دارگ ءِ دْرچ اَنت۔چہ میان راج ءَ لوٹ کنگ بیت کہ آ اے تْرام اتگ ءُ ترسناکیں انسانی ھکانی بگیریانی سر ءَ زیت دلگوش بہ کنت ءُ بلوچستان ءِ بزگیں مردمانی مزدانک دیگ ءَ وتی کرد ءَ پیلو بہ کنت۔

بلوچستان ءِ دمگ پنجگور ءُ زامران ءَ پاکستانی پوج ءَِ دو جتاجتائیں وئیلاں نشانگ کتگ – اُرشاں ءَ پاکستانی پوج ءِ چوکی، چاریگی کیمرہ ءُ یک ڈرونے تباہ کتگ-

اولی وئیل بلوچستان ءِ دمگ پنجگور ءَ بیتگ کہ اود ءَ چتکان ءِ دمگ کلم چوک سر ءَ برجاھیں پاکستانی پوج ءِ چوکی سر ءَ ناشناسیں مردماں دستی بمب ءَ چہ اُرش کتگ-

دمگی اِھوالکار رِد ءَ اُرش ءَ پد دمگ ءَ تیرگواری ءِ توار اش کنگ ھم بیتگ-

دومی وئیل زامران ءِ دمگ ساہ دیم ءَ بیتگ، اود ءَ سلاہ بندیں مردماں پاکستانی پوج ءَ نیمگ ءَ چہ پِٹ جتگیں چاریگی کیمراہ نشانگ کتگ اَنت- اِھوالکار رِد ءَ اُرشکاراں اے کیمرھانی تباہ کنگ ءَ پد بُرز ءَ چست کتگیں یک چاریگی ڈرونے ھم نشانگ کتگ ءُ دور داتگ-

بلوچستان ءَ انّگیں ماھانی میان ءَ پوج سر ءَ اُرشاں گیشی گندگ اَتکگ- آجوئی لوٹوکیں گلاں گوستناک ءَ اے اُرشانی زمہ واری منّ اِتگ، بلے اے نوکیں وئیلانی درگت ءَ انگت ھچ گل ءَ درشان شنگ نہ کتگ-

بلوچستان ءِ تیاب دپی شھر گوادر ءُ کیچ ءَ پاکستانی پوج ءَ دو جتاجتائیں کاروائیانی میان ءَ دو مردم آوار جنگ ءَ پد بیگواہ کتگ اَنت- چریشی ءَ پد آیانی ھچ وڑیں ھال دز نہ کپتگ-

آوار جنگ ءَ پد بیگواہ کنگ بیتگیں مردمانی پجّار شاہ بخش ء اسماعیل ءُ بخش اللہ ء واحد بخش نام ءَ چہ بیتگ اَنت-

بخش اللہ چہ گوادر ءَ آوار جتگ ءُ بیگواہ کتگ، دومی نیمگ ءَ شاہ بخش چہ کیچ ءِ دمگ دشت ءَ آوار جتگ-

زانگ بہ بیت کہ شاہ بخش اشی ءَ ساری ھم دوھزار نوزدہ ءَ زورانسری آوار جنی ءِ نشانگ کتگ- وھدے آ پاکستانی پوج ءَ آوار جتگ- آ بازیں ماھاں تاں بیگواہ بیتگ ءُ پد ءَ یل کنگ بیتگ ءُ ھنی پد ءَ پد بیگواہ کنگ بیتگ-

بلوچستان ءَ زورانسری آوار جنی ءِ وئیل یک دراجیں مدتے ءَ چہ تُرس ءِ سبب جوڑ بیگ ءَ اِنت- انسانی ھکانی ادارھانی گوشگ اِنت کہ بلوچستان ءَ ھزارانی مردم پاکستانی پوج دست ءَ زورانسری آوار جنی ءِ نشانگ کنگ بیتگ-

فتنہ الھیرامنڈی بلوچستان ءَ دھشتگردی

نبشتہ کار: شَکّل بلوچ

دی بلوچستان پوسٹ

بلوچستان ءَ بے بُنیں ءُ ناشرکاریں پاکستان گوں وتی سِلّیں کاراں برجاہ اِنت۔ بلوچستان ناپاکیں لشکر بلوچ نسل کُشی ءَ گوں زوراں برجاہ داشتگ۔ بلوچ راج پاکستان ءِ اے ناشرکاریں لشکر ءَ ھجبر نہ منّ اِیت ءُ بلوچ راجی لشکر بی ال اے ءُ بی ایل ایپ اے فتہ الھیرامنڈی ءِ ناشرکاریں لشکر ءِ تاچینگ ءَ مرچی سرجم ءَ بلوچ راج اوشتاتگ ءُ ایشی ءِ ھلاپ ءَ جنگ ءَ اِنت۔

ناشرکاریں ءُ وتگڑیں فتنہ الھیرامنڈی بلوچ ڈیھ ءِ لُٹ ءُ پل کنگ ءَ بلوچ راج ءِ چُکچینی ءِ بل ماں وتگڑیں اسمبلی ءَ پاس کُتگ بلے بلوچ راج اے وتگڑیں فتنہ الھیرامنڈی ءِ بل ءَ ھجبر نہ منّ اِیت ءُ ایشی ءِ ھلاپ ءَ بلوچ راج یکمُشت چو کوہ ءَ اوشتاتگ۔

سرفراز ءِ اے ناشرکاریں، وتگڑیں ھکومت وڑیں وڑیں پندلاں گوں بلوچ چُکچینی ءِ ھلاپ ءَ پالیسی جوڑ کُرتگ، ایشی ءِ تہ ءَ وتگڑیں ناشرکاریں پاکستان ءَ میر ءُ سرداریں بلوچ ءِ پُشدر ءَ وتی سِلّیں کاراں بلوچ راج ءِ چُکچینی تچک ءَ کنگ لوٹ اِیت ءُ دومی نیمگ ءَ دیمروی ءِ نام ءَ بلوچ راج ءِ نام ءَ کارمرز کنگ ءُ دری پنجابیاناں بلوچستان ءَ لوکل جوڑ کنگ ءُ پیشدارگ کہ بلوچستان ءِ مھلوک وتگڑیں پاکستان ءَ منّ اِیت۔ بلے چوناھا اے بلوچ نہ انت، بلکیں دروگیں بلوچستان ءِ جھمنند گُشگ ءُ آیانی پجّاری کارڈ جوڑ کنگ ءُ بلوچ گُشگ منافقیت ءُ زُلم ءَ چہ اَبید دگہ ھچ نیست۔ پاکستان وتی زوراکیانی چیر دیگ ءِ ھاتر ءَ بلوچ راجی لشکر ءِ پروش دیگ ءِ ھاتر ءَ برے قبائیلت ءِ جیڑہ ءِ نام دیگ، برِے انڈیا ءِ ایجنٹ گُشگ بلے ایشی ءَ چہ چپ اِنت۔ پاکستان ءِ وتگڑیں ریاست وت گوں بلوچاں زُلمنءُ زوراکی کنگ ءَ انت۔ بلوچ راج نوں شری ءَ سرپد ءُ پوہ بوتگ کہ پاکستانی ریاست بلوچستان ءِ گواجنانی لُٹ ءُ پل کنگ ءِ ھاتر بلوچستان ءِ جتائیں دمگاں، بلوچ نسل کُشی ءَ ءُ میان اُستمانی کانود ءِ ھلاپ ورزی ءَ کنگ، دنیا ءِ چماں اندیم بوگ پاکستان گوں وتی سِلیں کاراں ھجبر نہ ٹکّ اِیت۔ اسلام ءِ مقدسیں نام ءَ کارمرز کنگ ءُ وت ءَ اسلام ریاست گُشگ دنیا ءِ واست ءَ بلائیں جیڑھے۔ فتنہ الھیرامنڈی پاکستان ءِ پنجابی لشکر ماں بلوچستان ءَ بلوچ لس مھلوکانی سر ءَ تیر گواری کنگ، لس بلوچانی لوگانی سر ءَ بیڑ برگ اے گپ ءَ پدر کنت کہ پاکستان بلوچستان ءَ دہشتگردی ءَ گوں زوراں کنگ ءُ بلوچ لیبریشن آرمی کہ وتی بلوچ لس مھلوک ءُ ڈیھ ءِ رکینگ ءَ پاکستان فتنہ الھیرامنڈی ءِ پنجابیانی ھلاپ ءَ چو کوہ ءَ مِک اِنت۔

پاکستان ءِ اے در ابرمی ریاست ءُ چوناھا اے چہ راجدپتر ءَ زبھر انت۔ بلوچستان ءَ بلوچ زالبولانی آوار جنگ، ورناھاں ماں زندان ءَ ٹارچر سلانی تہ ءَ بندیگ کنگ، ءُ ازیت دیگ چہ وتی زُلم ءُ زوراکیاں بلوچستان ءَ گیش گلامی ءِ آس ءَ سوچگ اے بلوچ راج ءِ ھلاپ اِنت، بلوچ راج ءِ دود ءُ دودمانانی ھلاپ اِنت چمیشکا بلوچ راجی لشکر پاکستانی لشکر پنجابیاں چہ وتی ڈیھ ءَ تاچینگ ءِ ھک ءَ دار اِیت۔
بلوچستان آجو بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-