TBP Balochi

گل ءَ ستمبر ءِ ماہ ءَ پاکستانی لشکر ءِ سر ءَ اُرش، بندش ءُ دگہ کارروائیانی ھال شنگ کتگ اَنت۔

بلوچ آجوئی ءِ جھدکاراں گوں ھمگرنچیں سگار میڈیا ءَ بلوچ لبریشن آرمی ءِ ستمبر 2025 ءِ ماھانہ سلاہ بندیں کارانی رپورٹ شنگ کتگ کہ ایشی ءِ تہ ءَ پاکستانی لشکر ءِ سر ءَ اُرش، بندش ءُ ریاستی ھال رسانی کنوکانی سر ءَ اُرشانی اھوال ھوار اَنت۔

کچ ءُ کساسانی رد ءَ بی ایل اے ءَ بلوچستان ءِ جتا جتائیں دمگاں سرجم ءَ 47 اُرش کتگ انت کہ ایشی ءِ تہ ءَ 115 کارندہ بیران ءُ 61 ٹپی بوتگ اَنت ءُ 13 مردم دزگیر کنگ بوتگ اَنت۔

ھال ءِ رد ءَ اے ماہ ءَ بی ایل اے ءِ سئے سرمچار بیران بوتگ کہ آ مجید بریگیڈ ءِ بھر بوتگ اَنت ءُ دشت اُرش ءِ بھر بوتگ اَنت۔

رپورٹ ءِ رد ءَ بی ایل اے ءِ جتا جتائیں دمگاں 14 آئی ای ڈی اُرش کنگ بوتگ، 12 چاریگ نشانگ جوڑ کنگ بوتگ، 7 آپریشن ءَ سلاہ دست کپتگ، 2 کواڈ کاپٹر ءِ سر ءَ تیرگواری کنگ بوتگ، وھدیکہ 4 آپریشن ءَ چھاپہ ءُ روڈ بلاک ھوار انت۔

ستمبر ءَ بلوچ لبریشن آرمی ءِ نیمگ ءَ کیچ ءَ آئی ای ڈی ءِ اُرش ءَ پاکستانی لشکر ءِ یک کپتانے ءَ ھوار 8 کارندہ بیران بوتگ اَنت وھدے کہ 18 ستمبر ءَ بلوچ لبریشن آرمی ءِ مجید بریگیڈ ءَ پاکستانی لشکر ءِ کاروان ءِ سر ءَ وت کُشیں اُرشے ءِ زمہ واری زرتگ کہ پاکستانی لشکر ءِ 32 آفیسر ءُ کارندہ کشگ بیتگ انت-

بلوچستان ءَ پاکستانی پوج ءُ آئی ءِ چیردستی ءَ کارکنوکیں ڈیتھ اسکواڈ کارندھانی زوراکی یکشل ءَ برجاہ ءَ اِنت، زھری ءَ ڈرون اُرش ءَ چار مردم بیران، کیچ ءَ ڈیتھ اسکواڈ ءِ کارندھانی تیرگواری ءَ چہ ٹپی بیتگ یک ورنایے بیران بیتگ وھدے کہ شال، گوادر ءُ کیچ ءَ چار مردم زورانسری آوار جنی ءِ نشانگ کنگ بیتگ اَنت-

بلوچستان ءِ دمگ ھُزدار ءِ تھسیل زھری ءَ جاور یکشل ءَ ناگیگ- پوج مزنیں کچے ءَ دمگ ءَ پیشگامی کنگ ءَ اِنت وھدے کہ دمگ ءَ لین، ھال اھوالی دگہ آسراتی اسرمند اَنت-

نوکیں ھالانی رِد ءَ ءِ نیمگ ءَ چہ زھری ءِ دمگ نورگامہ ءَ ڈرون اُرش کنگ بیتگ چریشی ءِ آسر ءَ چار مردم بیران بیتگ-

دمگی اِھوالکار ءِ رِد ءَ لَس مردم کہ کشارانی کر ءَ نندوک بیتگ اَنت کہ ڈرون اُرش ءِ نشانگ کنگ بیتگ اَنت-

زانگ بہ بیت پاکستانی پوج ءِ نیمگ ءَ چہ اشی ءَ ساری زھری ءِ دو جتاجتائیں ھنداں جیٹ بالگرد ءُ ڈرون بمبگواری ءِ نشانگ کنگ بیتگ اَنت چریشی ءِ آسر ءَ ھپت مردم بیران ءُ پنچ ٹپی بیتگ اَنت، بیران بیتگیں مردمانی تہ ءَ زالبول ھم ھوار بیتگ اَنت-

ھمے وڑ کیچ ءِ تھسیل بلیدہ ءَ پاکستانی پوج ءِ چیردستی ء پُرکاریں سلاہ بندیں ٹولی کہ دمگی ءِ ھساب ءَ ڈیتھ اسکواڈ گوش اَنت، کہ تیرگواری ءَ چہ ٹپی ئیں ورنا حاشم ء عبدالقادر جھمنند بلیدہ الندور چار الاج ءَ پد بیران بیتگ-

چار روچ ءَ ساری حاشم تیرگواری ءِ نشانگ کنگ بیتگ چریشی ءِ آسر ءَ آسک ٹپی بیتگ، پد ءَ آ الاج ھاتر ءَ کراچی ءَ برگ بیتگ اود ءَ آئی ءَ ٹپّانی درد نہ سگ اِتگ ءُ بیران بیتگ-

دومی نیمگ ءَ سی ستمبر 2025 ءَ کیچ ءِ دمگ چہ بلیدہ ءَ پاکستانی پوج ءَ دو مردم آوار جتگ ءُ بیگواہ کتگ اَنت کہ آیانی پجّار نیک سال ء دلوش ءُ قدوس بلوچ ء امید ناماں چہ بیتگ اَنت- دوئینانی سیادی بلیدہ ءِ دمگ چہ گردانک ءَ گوشگ بیگ ءَ اَنت ءُ سیمسر ءَ کار ءُ بار ءَ ڈرائیور بیتگ- دزگیری ءَ پد آئی ءِ ھچ ھال نیست-

اشی ءَ ساری بیست ھشت ستمبر ءَ گوادر ءِ تھسیل پسنی ءِ دمگ چہ ببّر شور ءَ جھانزیب بلوچ ء روشن پاکستانی پوج ءَ زورانسری بیگواہ کتگ، جھانزیب بلوچ یک مزدورے ھساب ءَ کار ءَ بیتگ لوگ ءِ مردم تُرس ءِ آماچ-

ھمے وڑ بیست پنچ ستمبر ءَ شال ءِ دمگ چہ سریاب کلی جدید میان خان بیراؤ ءَ نور احمد ء عبدالفتح آئی ءِ لوگ ءَ چہ کاؤنٹر ٹیررازم ڈیپارنمنٹ ءَ آوار جتگ ءُ پد ءَ بیگواہ کتگ- نور احمد یک ٹرانسپورٹ شرکتے ءَ مزدوری ءَ بیتگ-

زانگ بہ بیت بلوچستان ءَ پاکستانی پوچ ءِ زوراکی روچ پہ روچ گیش بوان اِنت-

بلوچستان ءِ دمگ کلات ءَ پاکستانی لشکر بمب تراک ءِ نشانگ کنگ ءَ پد سلاہ بنداں اُرش کتگ-

ناشناسیں مردماں گوستگیں روچ ءَ کلات ءِ دمگ جوھان ءَ بمب تراکے ءَ پاکستانی لشکر ءِ پیادگیں کارندہ نشانگ جوڑ کتگ اَنت ءُ لشکر ھما وھد ءَ نشانگ کنگ بیتگ ءَ آ دیم ءَ جنزگ ءَ بیتگ- تراک ءِ آسر ءَ فورسز ءَ را تاوان رس اتگ۔

دمگی مردماں ٹی بی پی ءَ گوں تران کنان ءَ گْوشتگ کہ گوستگیں شپ ءَ پد ھمے دمگ ءَ سلاہ بندیں مردماں فورسز ءِ کارندھانی سر ءَ اُرش کتگ کہ ایشی ءِ تہ ءَ پورسز گیشتر تاوان بوتگ ءُ پد ءَ کشگ ءَ مجبور بوتگ اَنت ءُ اُرش کنوکاں پورسز ءِ چگل داتگیں سلاہ گون وت برتگ انت-

دمگی مردمانی رد ءَ مرچی سھب ءَ چہ سئے کلاک ءَ گیش دمگ ءَ تیرگواری ءُ تراکانی توار بوتگ انت۔

بلوچستان ءِ دمگ کیچ بلیدہ ءَ ناشناسیں سلاہ بندیں مردماں یک کمپنی ءِ پھل ءَ کار ءَ جاڑیگیں مشینری ءُ گاڑی مانداشتگ انت ایشی ءِ آسر ءَ کمپنی ءَ تاوانانی دیمپانی بیتگ-

دمگی مردمانی رد ءَ اُرشکاراں بند ءُ ساچی شرکت ءِ ساز ءُ سامان ءُ مشینری مانداشتگ انت چریشی ءِ آسر ءَ بازیں گاڑی سوتکگ ءُ پُر بیتگ انت-

بلوچستان ءَ دیمروئی ءِ نام ءِ سر ءَ کار کنوکیں کمپنی گوستگیں زمانگ ءَ ھم اے وڑیں اُرشانی آماچ بوتگ اَنت۔ اے دابیں اُرشاں گیشتر بلوچ آجوئی لوٹوکیں سلاہ بندیں گل کنگ ءَ انت-

کارشناسانی گشگ انت کہ اے وڑیں ویل نہ ایوک ءَ دیمروئی ءِ امل ءَ را رکاوٹ جوڑ کن انت بلکیں دمگ ءِ راھداری ءِ بنجل ءَ ھم تاوان دے اَنت ءُ ایشی ءَ بلوچ سلاہ بندانی گشگ انت کہ اگاں اے دابیں کار سرجم بہ بنت گڑا بلوچستان ءَ زوراکی کنگ ءَ لشکر ءُ آئی ءِ چاریگاں آسانی ودی بوت کنت-

امریکہ ءِ صدر ڈونلڈ ٹرمپ ءَ ھماس ءَ را “غزہ ءِ ایمنی منسوبہ”ءِ پسو ءِ الٹی میٹم داتگ ءُ آئی ءِ رھشوناں اے منسوبہ ءِ سر ءُ چار ءُ تپاسی بندات کتگ کہ ایشی ءِ اسرائیل ءِ ھم پلامرزی ھست انت۔

فرانس ءِ ھال سر کنوکیں ادارہ اے ایف پی ءِ رد ءَ امریکہ صدر ءَ ھماس ءَ چہ لوٹ کتگ کہ آ ’’سے ءُ چار روچ ءِ تہ ءَ پسو بہ دنت‘‘۔

وائٹ ھاؤس ءِ نیمگ ءَ شنگ بوتگیں بیست نکاتی دزنشانی ءِ تہ ءَ جنگ بندی ءِ مسام ءِ ھاتر ءَ نکات ھوار اَنت، جماس ءِ دست ءَ بوتگیں الگاریانی یل کنگ ءِ بدل ءَ اسرائیل ءِ بندیگ جاہ ءَ چہ فلسطینیانی یل کنگ، غزہ ءَ چہ لشکر ءِ درکنگ، ھماس ءِ بے سلاہ کنگ ءُ میان اُستمانی برادری ءِ کمک ءَ غزہ ءِ آباد کنگ ءِ نکات ھوار اَنت۔

دگہ نکاتانی رد ءَ اقوام متحدہ ءُ دگہ لس کمکی ادارھاں ءَ کمکی ساماناں غزہ ءَ سر کنگ ءِ اجازت دیگ بیت ءُ فلسطینیاں چہ اے دمگ ءَ زوراکی ءَ درکنگ نہ بنت۔

امریکہ عرب ءُ دگہ میام اُستمانی شریدارانی گوما کار کنت ءُ غزہ ءِ ایمنی ءِ چار ءُ تپاسی ءِ ھاترا یک ازاروکی اتھارٹی ءِ جوڑ کنگ ءَ کار کنت۔

میان استمانی تک ءَ منگ بوتگیں فلسطین اتھارٹی ءِ بنداتی رنگ ءَ یک کسانیں کردے بیت، آئی ءِ کرد ءَ را گیش کنگ ءَ پیسر چار ءُ تپاسی کنگ بنت، ایشی ءِ مول ءُ مراد ایش انت کہ آ گڈی ءَ اے نزام ءَ را چلائینگ ءِ کار ءَ کت بہ کنت۔

سعودی عرب، مسلمانیں ملک ءُ دگہ مزنیں دگنیا ءِ تاکتاں اے پیش کرتگیں منسوبہ ءِ وش آتک کتگ بلے ھماس ءَ انگت ءَ پسو نہ داتگ۔ اے منسوبہ ءِ سر ءَ امل کنگ ءِ وھد ءِ بابت ءَ جُست کنگ ءِ وھد ءَ امریکہ ءِ صدر ڈونلڈ ٹرمپ ءَ گشتگ کہ آ سئے ءُ چار روچ ءِ تہ ءَ اے منسوبہ ءِ سر ءَ کار کنگ ءَ انت۔

آئی ءَ گیش کرتگ: ما بس ھمے ودار ءَ ایں کہ جماس اے پیسلہ ءَ بہ کنت کہ آ اے کار ءَ کنت یا نہ کنت، اگاں اے کار ءَ نہ کنت گڑا جاور ھال یک گمناکیں آسرے ءِ نیمگ ءَ روت۔ صدر ٹرمپ ءَ دو شمبے ءِ روچ ءَ وائٹ ہاؤس ءَ اسرائیل ءِ مزن وزیر بنیامین نیتن یاھو ءَ گوں گند ءُ نند ءَ پد یکجائی پریس کانفرنس ءِ تہ ءَ غزہ ءِ ایمنی ءِ منسوبہ ءِ جار جتگ کہ اسرائیل ءِ مزن وزیر ءَ ھم ایشی ءِ ھمایت کتگ۔

سئے شمبے ءِ روچ ءَ فلسطینی بنشونے ءَ وتی نام ءِ شنگ نہ کنگ ءِ شرت ءَ گْوشتگ کہ ھماس ءَ پیش کرتگیں ایمنی منسوبہ ءِ سر ءَ شور ءُ سلاھ بندات کتگ کہ ایشی ءِ تہ ءَ فلسطین یا درملک ءَ آئی ءِ سیاسی ءُ جنگولی سروک ھوار اَنت۔

سوروس ءَ اے ھم گْوشتگ کہ “ گپ ءُ تران بازیں روچاں برجاہ بوت کنت پرچا کہ جاور ھال سک جھلانک اَنت۔”

قطر کہ ھماس ءِ درانڈھی ءِ سروکی ءِ میزبانی ءَ کنت آئی ءَ گشتگ کہ اے گل ءِ لیکہ ’’زمہ واری‘‘ ءِ سر ءَ پٹ ءُ پول کنگ ءِ کول کتگ ءُ گشتگ کہ آ سئے شمبے ءِ روچ ءَ پد ھماس ءُ ترکی ءَ گوں گند ءُ نند کنت۔ قطر ءِ دری کارانی وزارت ءِ جارکش مجید الانصاری ءَ گْوشتگ: اے پسو ءِ بابت ءَ گپ جنگ انگت زوت اِنت بلے ما سک وشیں ھالے ءِ نیمگ ءَ جنزگ ءَ ایں پرچا کہ اے منسوبہ سک ءَ گچین انت-

بلوچستان ءِ جتاجتائیں دمگ واشک سوراب ءَ دگ وئیل ءَ ھشت مردم بیران ءُ یکے ٹپی ، وھدے کہ ھرنائی ءَ جنکے ءُ بچکے لاش دزکپتگ اَنت-

ھرنائی ءِ دمگ شاھرگ کلی امبو ءَ یک بچکے ءُ جنکے لاش دزکپتگ اَنت، لیویز ءَ لاش وتی دستیگ کتگ سول نادُراھجاہ شاھرگ ءَ برتگ اَنت-

لیویز واکدار ءِ رِد ءَ کُشگ بیتگینانی پجّار 22 سالی ئیں فیض اللہ ء قاہر ٹک نورزئی جھمنند بوستان جھمنند چہ پشین ءَ بیتگ وھدے جنک ءِ بچّار بیست سے سالی ئیں ثمینہ بی بی ء عبدالسلام ٹک سلیمان خیل جھمنند شاھرگ ءَ چہ بیتگ-

لیویز ءِ رِد ءَ کوش ءِ سوب زانگ نہ بیتگ اَنت، بلے وئیل ءِ پٹ ءُ پول بندات کتگ-

دومی نیمگ ءَ شال کراچی بُنجاھی شھدگ این ، 25 سر ءَ سوراب ءِ دمگ نغاڑ ءِ نزیک ءَ گاڑی ءُ ٹرکے ءِ میان ءَ ڈِک وارتگ، چریشی ءِ آسر ءَ گاڑی ءَ سوار کراچی ءَ چہ سیادی داروکیں پنچ مردم جاہ پہ جاھی مرتگ اَنت-

پولیس ءِ رِد ءَ وئیل ءَ پد شھدگ ءِ ساپ کنگ کار بندات کنگ بیتگ، وھدے کہ ریسکیو ٹولی لاشاں نادُراھجاہ ءَ برتگ اَنت-

ھمے وڑ واشک ءِ تھسیل ناگ ءُ پنجگور ءِ میان ءَ دو گاڑیاں ڈک وارتگ چریشی ءَ پد آس چست بیتگ، چریشی ءِ سبب ءَ سے مردم سُتکگ ءُ بیران بیتگ اَنت ءُ یک مردمے ٹپی بیتگ-

ریسکیو 1122 ءِ کُمکاراں ٹپی ءُ لاش ٹیچنگ نادُراھجاہ پنجگور ءَ برتگ اَنت-

بلوچستان ءِ دمگ زھری ءَ پوج ءِ زوراکی برجاہ، کیچ ءَ یک مردمے بیگواہ کنگ بیتگ-

گیشیں ھالانی رِد ءَ زھری ءَ ڈرون اُرش، جتاجتائیں دمگاں گولہ گواری ءُ ڈرون اُرش ءَ جانی تاوان ءِ ھال اِنت-

دومی نیمگ ءَ کوچو ءِ دمگ ءَ یکشل ءَ گولہ گواری برجاہ، چریشی ءِ آسر ءَ کرپاس ءِ کشت ءُ کشار تراکاں چہ اسرمند بیتگ اَنت- ڈگاراں تاوان ءِ رسگ ءِ سبب ءَ دھکنکاراں مزنیں کچے ءَ مالی تاوان چست کنگ ءِ اوپار کنگ کپگ ءَ اِنت-

ھمے وڑ چشمہ ءِ دمگ ءَ توپ ءُ مارٹر گولہ آس دیگ بیتگ، چریشی ءَ چہ دمگی آبادی تُرس آماچ اَنت- بنداتی ھالانی رِد ءَ تنی وھدے ھچ وڑیں جانی تاوان ھال سر نہ بیتگ-

ھمے وڑ ڈنڈار، مورینکی ءُ نزیکیں دمگ ءَ ھم گولہ گواری ءِ نشانگ ءَ اِنت- گولھانی کپگ ءَ چہ لوگاں تاوان رسگ ءِ ھال سر بیتگ- انتزامیہ اسرمندیں دمگاں جاورانی گر ءُ دار ءُ تاوانان ءِ چارگ ھاتر ءَ کاروائی بندات کتگ-

ھمے وڑ بلیدہ ءَ پروم جھمنندے آوار جنگ ءُ بیگواہ کنگ بیتگ اَنت –

گیشیں ھالانی رِد ءَ پروم جائین ءِ جھمنند نظر ء عرض محمد چہ بلیدہ الندور ءَ ھکومتی پلامرزی ءِ سلاہ بندیں ٹولی ءِ کارندھاں آوار جتگ ءُ وتی ھمراھی ءَ برتگ اَنت-

زانگ بہ بیت بلیدہ ءَ کش گوراں پاکستانی پوج ءِ پلامرزی ٹولی پُرکار اَنت ءُ بلوچاں زورانسری آوار جنی ءَ ھوار درکانودی کوش ءَ ھوار اَنت-

دومی نیمگ ءَ بلوچستان ءَ زورانسری آوار جنی ءِ ھلاپ ءَ وائس فار مسنگ پرسنز ءِ برجاہ زھرشانی بُنجل گل ءِ ایگزیکٹو کمیٹی ءِ باسک نیاز محمد ءِ سروکی ءَ شال پریس کلب دیم ءَ پنچ ھزار نُھ سد پنجاہ چارومی روچ ءَ ھم برجاہ-

اے درگت ءَ جتاجتائیں پڑ ءَ چہ سیادی داروکیں مردم اَتکگ ءُ کھول ءَ چہ ھمدردی درشان کتگ ءُ زورانسری آوار جنی ءِ گر ءَ دار لوٹ کتگ-

بلوچستان ءِ بنجاھی شھر شال ءَ سَے شمبے ءِ روچ ءَ ایف سی ءِ ہیڈ کوارٹر ءِ نزیک ءَ تراک ءَ دہ مردم بیران ءُ بازیں کچے ءَ ٹپیگ بوتگ انت۔

صوبائی جان سلامتی ءِ وزیر بخت کاکڑ ءَ نامداریں نیوز کار بی بی سی ءَ گوں فون ءِ سر ءَ گْوشتگ کہ تراک ءَ پد کم چہ کم 10 لاش نادراھجاہ ءَ سر کنگ بوتگ اَنت۔

آئی ءَ گوشت کہ تراک ءِ سبب ءَ 30 ٹپیگیں مردم ھم پہ دوا ءُ درمان کنگ ءِ واستا ٹراما سنٹر ءَ سر کنگ بوتگ انت۔

وزیر جانسلامتی ءِ رد ءَ بیران ءُ زدگ بیتگیں مردمانی توک ءَ سکیورٹی ءِ کارندہ ھوار انت-

دومی نیمگ ءَ بلوچستان ءِ سرکار ءِ ایکس اکاؤنٹ ءِ نیمگ ءَ شنگ بوتگیں بیانے ءَ ٹاہ دیگ بوتگ کہ اے وئیل ءَ پد سیکورٹی فورسز ءَ ترندیں کارروائی کتگ ءُ چار جنگول کُشتگ اَنت۔

تراک ءَ چہ پد شھر ءِ ماڈل ٹاؤن ءِ دمگ ءَ چہ دودت چست بوھگ ءَ گندگ بوتگ انت ءُ تیرگواری ءِ توار ھم گوشدارگ بوتگ۔

تراک انچو تُرند بیتگ کہ ایشی ءِ زور پشین اسٹاپ، ماڈل ٹاؤن، شھباز ٹاؤن ءُ نزیکیں دگہ دمگاں سماہ کنگ بوتگ، وھدیکہ شال ءخ ایشی ءِ توار دور ءُ دراج ءَ گوشدارگ بوتگ۔

تراک ءِ سبب ءَ بازیں گاڑی ھم تاوان رس اتگ- شنگ بیتگیں تامراں تراک یک سوزوکی گاڑی ءِ توک ءَ انت ءُ تراکے بیت انت- تراک ءَ بیران بیتگیں مردمانی کساس گیشتر بوت کنت انت-

دومی نیمگ ءَ تراک ءِ زمہ واری ٹی ٹی پی ءَ من اتگ-

امریکہ صدر ڈونلڈ ٹرمپ ءَ دو شمبے ءِ روچ ءَ گوشتگ کہ مزن وزیر بنیامین نیتن یاھو ءَ وتی غزہ ءِ ایمنی ءِ پریام ءِ پلامرزی کتگ کہ ایشی ءَ چہ غزہ ءَ زوت جنگ بندی ءِ جار جنگ بیت۔

ھال سر کنوکیں ادارہ اے ایف پی ءِ رد ءَ اے پریام کہ ٹرمپ ءَ گوں بازیں عرب رھشوناں ھم تالان کتگ، نیتن یاھو ءِ گوں گند ءُ نند ءَ پد واشنگٹن ءَ شنگ کنگ بوتگ۔

صدر ٹرمپ ءَ اسرائیل ءِ مزن وزیر نیتن یاھو ءِ گون ءَ پریس کانفرنس ءَ گوں تران کنان ءَ گشتگ کہ نیتن یاھو ءَ اے پریام ءِ سر ءَ تپاک کتگ کہ ایشی ءِ تہ ءَ زوتیں جنگ بندی ءِ تَک ھوار انت ءُ ایشی ءَ پد ھماس ءِ بے سلاہ کنگ ءُ اسرائیل ءِ فوج ءِ درکپگ ءِ تک ھوار انت۔

اگاں چہ ھماس ءَ انگت اے پریام ءِ سر ءَ تپاک نہ کتگ بلے ٹرمپ ءَ امیت درشان کتگ کہ اے جنگولیں گل اے پریام ءِ پلامرزی ءَ کنت-

صدر ٹرمپ ءَ گشتگ کہ “دراھیں گلانی نیمگ ءَ منگ نامہ باز نزیک انت۔’

بیست نکاتی پریام ءِ تہ ءَ گشگ بوتگ کہ اگاں دوئیں نیمگاں تپاک کنگ بہ بیت گڑا جنگ زوت ھلاس بیت ءُ اسرائیل ءِ درکپگ ءِ شرے ایش انت کہ ھماس ءِ دست ءَ بوتگیں گڈی الگاری یل کنگ بہ بیت۔ اے بنداتی بھر ءِ تہ ءَ سرجمیں جنگ بندی بیت۔
ایشی ءَ چہ پیسر اسرائیل ءِ مزن وزیر بنیامین نیتن یابو ءَ دوشمبے ءِ روچ ءَ قطر ءِ امیر ءَ گوں ٹیلی فون ءِ سر ءَ گپ ءُ تران کنان ءَ قطر ءِ بنجاھی شھر دوحہ ءَ اسرائیل ءِ اُرش ءِ سر ءَ اپسوز ءِ درشانی کتگ۔

رائٹرز ءِ رد ءَ اے گپ ءُ تران امریکہ صدر ڈونلڈ ٹرمپ، نیتن یاھو ءُ قطر ءِ امیر ءِ نیام ءَ سئے نیمگی کال ءِ وھد ءَ بوتگ کہ وائٹ ہاؤس ءَ اے گپ ءِ راستی ءِ پدراھی کتگ۔

وائٹ ہاؤس ءِ رد ءَ نیتن یاہو ءَ قطر ءِ حاکمیت ءِ لگتمالی ءِ سر ءَ ھم اپسوز ءِ درشانی کتگ ءُ دلجمی داتگ کہ اسرائیل آیوکیں وھد ءَ پد ءَ چوشیں اُرش نہ کنت۔

صدر ٹرمپ ءَ گوستگیں ھپتگ ءَ اقوام متحدہ ءَ گوں بازیں ھاسیں عرب رہشوناں گند ءُ نند کتگ ءُ یک شمبے ءِ روچ ءَ سوشل میڈیا ءَ نبشتہ کتگ کہ “ھرکس اولی رند ءَ چیزے ءِ سر ءَ تپاک کنت۔” وائٹ ہاؤس ءِ پریس سیکرٹری کیرولین لیویٹ ءَ دوشمبے ءِ روچ ءَ فاکس نیوز ءَ گوں تران کنان ءَ گْوشتگ کہ ”یک جوانیں ءُ متوازنیں ڈیلے ءِ ھاتر ءَ دوئیں نیمگاں لھتیں قربانی لوٹ اِیت ءُ آ چہ میز ءَ کمو نا وش بوت کن اَنت۔“

بلوچستان ءِ جتاجتائیں دمگ کیچ ءُ مستونگ ءَ پاکستانی پوج ءَ پنجاہ ءَ گیش مردم آوار جتگ ءُ بیگواہ کتگ اَنت ، وھدے کہ بیگواھیں زاھد علی ءِ پت عبدالحمید ءِ تبیت ناگیگ-

گیشیں ھالانی رِد ءَ بلوچستان ءِ دمگ مستونگ ءِ ھند دشت ءُ آئی ءِ ھمگرنچیں دمگ کولپور ءِ دمگاں پاکستانی پوج ءَ مزنیِں کچے ءَ لشکر کشی بندات بیتگ، اے میان ءَ سی۔ٹی ڈی، چیریں ادارھانی کارمند ءُ پولیس ءَ دمگ انگِر ءَ کتگ لوگ پٹ ءُ پول کتگ اَنت-

دمگی اِھوالکار ءِ رِد ءَ پوج ءَ کلی جمعہ خان، گلی بنگلزئی ءُ کلی سرپرہ لوگاں پُترتگ اود ءِ مردم لٹ ءُ کُٹانی نشانگ کتگ اَنت-

اِھوالکار ءِ گوشگ اِنت اے میان ءَ پنجاہ ءَ گیش مردین ءُ ورنا آوار جتگ ءُ بیگواہ کتگ اَنت، کہ پد ءَ مروچی بیگواہ ءَ شال جیل ءَ برگ ءِ ھال اِنت-

چہ دشت ءَ آوار جنگ بیتگیں مردمانی کھولانی رِد ءَ آیاں مروچی ھال سر بیتگ کہ آیانی دوستناک شال جیل ءَ برگ بیتگ اَنت، بلے اے زانگ نہ بیتگ کہ سرجمیں دزگیریں مردم جیل ءَ برگ بیتگ اَنت کہ لھتے انگت بیگواہ ءَ اِنت-

کھولاں بھتام جتگ کہ لشکر کشی ءِ میان ءَ پوج ءَ لوگانی تہ ءَ پروشت ءُ پروش کتگ، زالبول ءُ چُک لَٹ ءُ کُٹانی نشانگ کتگ اَنت ءُ آیانی دوستناک آوار جتگ ءُ بیگواہ کتگ اَنت-

زانگ بہ بیت کہ گوستگیں لھتے روچ ءَ چہ بلوچستان ءِ جتاجتائیں دمگ ھُزدار، کلات ءُ مستونگ ءَ جھلی ءُ بُرزی لشکر کشی ءِ ھال سر بیگ ءَ اِنت وھدے کہ مروچی ھم ھُزدار ءِ تھسیل زھری ءَ لشکر کشی ءِ میان ءَ جھلی ءُ بُرزی کاروائی ءِ ھال اِنت-

بلے پوج ءِ نیمگ ءَ چہ اے لشکر کش ءُ زوراکی ءُ زورانسری آوار جنی ءِ ھالاں اَبید واکدار نیمگ ءَ چہ سرکاری ھساب ءَ ھچ وڑیں پدری نیتکگ-

ھمے وڑ کیچ ءِ تھسیل بلیدہ ءِ دمگ گردانک ءَ پاکستانی پوج ءَ یک دمگی دکاندارے آوار جتگ ءُ ناشناسیں جاھے ءَ برتگ-

پاکستانی پوج ءِ دست ءَ آوار جنگ ءَ پد بیگواہ کنگ بیتگیں دکاندار ءِ پجّار شیر علی ء وشی نام ءَ چہ بیتگ-

زورانسری بیگواہ شیر علی ءِ کھول آئی ءِ زورانسری آوار جنی ءِ راست کتگ آئی ءِ پہ سلامتی یل کنائینگ لوٹ کتگ-

دومی نیمگ ءَ چہ کراچی ءَ زورانسری بیگواہ زاھد علی ءِ پت عبدالحمید بلوچ ءِ تبیت ناگیگی ءِ سوب ءَ نادُراھجاہ ءَ برگ بیتگ-

کھول ءِ رِد ءَ آ ھیپاٹائٹس ءِ نادُراھی ءِ آماچ اِنت ءُ دوشمبے ءِ روچ ءَ اناگاہ ءَ تبیت ناگیگ بیتگ پیسر ءَ دمگی کلینک ءُ پد نادُراھجاہ ءَ برگ بیتگ اود ءَ الاج بیگ ءَ اِنت-

کھول ءَ گوشتگ کہ عبدالحمید بلوچ ءِ نادُراھی ءَ اَبید آ گوستگیں ماھے ءُ نیم ءَ کراچی پریس کلب ءِ ڈن ءَ زھرشانی بُنجل ءِ سروکی ءَ کنگ ءَ بیتگ دانکہ وتی بیگواھیں چُک ءِ یل کنائینگ ءِ ھاتر ءَ توار ءَ چست بہ کن اَنت-

زاھد علی ءِ مات ءَ رسانکدر ءَ چہ تران کنان ءَ گوشتگ کہ آیاں انساپ ءِ ھرچ ھرچ دروازگ ٹُک اِتگ بلے ھچ وڑ گپ گوشدارگ نہ بیتگ- آیانی رِد ءَ آمیدگس ءِ کیس نکش اِنت ءُ دمگی تھانہ ءَ ایف آئی آر ھم نکش اِنت، بلے ریاستی ادارہ دنیگت ءَ زاھد علی ءِ دزگیری ءَ منّگ ءَ نہ اِنت-

آئی ءَ لوٹ کتگ کہ اگاں منی چُک سر ءَ کجام وڑیں بھتامے ھست گُڑا آئی ءَ آمیدگس ءَ پیش بہ کن اِت – چیریں بندیگ ءُ درکانودی پندل ھچ وڑ اوپار کنگ نہ بنت-

زاھد علی ءِ مات ءَ دیمتر ءَ گوشتگ کہ آئی ءِ چُک بے میارے ءُ لوگ ءِ یک لاپ دیوک بیتگ، کھول ءَ مالی ءُ نپسیاتی تباھی ءَ سر کتگ-

جرمدار ءَ وتی زال ءِ سر ءَ تیرگواری ءُ کتگ ءُ کشگ ءَ پد تتکگ۔

بلوچستان ءِ دمگ جھل مگسی ءَ سر بوتگیں ھالانی رد ءَ ایریا گوٹھ لنڈہ ءَ اعجاز مگسی نامیں مردمے ءَ وتی زال پہ گیرت ءِ نام ءَ تیر جتگ ءُ کشتگ ءُ پد ءَ تکگ۔

اے وئیل ءِ تہ ءَ بیران بوتگیں جنین ءِ پجار ریھانہ مگسی ءِ نام ءَ بوتگ، پولیس ءَ لاش چِست کتگ ءُ نادراھجاہ ءَ سر کتگ۔

زانگ بہ بیت بلوچستان ءِ بازیں دمگاں گیرت ءِ سر ءَ کوشانی کیس رواج گپتگ بلے تاں انوگ ءَ کانون داروکیں ادارھانی نیمگ ءَ ھچ وڑیں الکاپیں گامگیج زورگ نہ بوتگ۔

عورت فاؤنڈیشن ءِ رپورٹ ءِ رد ءَ اے سال ءَ بلوچستان ءَ 2019 ءَ بگر داں 2024 ءِ نیام ءَ گیرت ءِ نام ءَ کوش ءِ 212 کیس دیم ءَ اتکگ انت۔

2019 ءَ 52 مردم کُشگ بوتگ اَنت، 2020 ءَ 51 مردم کُشگ بوتگ اَنت، 2021 ءَ اے کچ 24 بوتگ ءُ 2022 ءَ 28 مردمانی گیرت ءِ نام ءَ کُشگ ءِ ھال شنگ بوتگ انت۔ 2023 ءَ اے کچ 24 بوتگ ءُ گوستگیں سال ءَ 33 مردم ھاسیں رنگ ءَ جنین آدم گیرت ءِ نام ءَ کُشگ بوتگ اَنت ءُ 2025 ءِ کچ ءُ کساس انگت ءَ ھوار نہ بوتگ اَنت۔

رپورٹ ءِ رد ءَ اے وھد ءَ نصیر آباد ءَ گیرت ءِ کشگ ءِ گیشتریں کیس بوتگ اَنت وھدے کہ جعفر آباد، جھل مگسی، مستونگ، کچھی، کوئٹہ، کلات، سھبت پور، لورالائی، ءُ خضدار ھم ھوار انت-

اے گزارش ءَ اے گپ ءِ سر ءَ سکیں چار ءُ تپاسی درشانی کنگ بوتگ کہ گیشتریں جاوراں یا ملزم دزگیر نہ بنت یا کانونی کارروائی سرجم نہ بنت۔ آمیدگساں کیسانی سستیں کارروائی، پولیس ءِ نیمگ ءَ چہ بے ھمکاری ءُ سیاسی ءُ ٹکی زور اے کیسانی تہ ءَ ادالت ءِ دیم ءَ مزنیں رکاوٹ جوڑ بوتگ اَنت۔