TBP Balochi

پاکستانی لشکر ءَ لوگانی پٹ ءُ پول ءِ وھد ءَ مردم لٹ شاپ کتگ ءُ چار مردم دزگیر کتگ ءُ ناشناسیں جاھے ءَ برتگ انت۔

گیشیں ھالانی رد ءَ بلوچستان ءِ دمگ ھزدار ءِ ھند زھری انگت ءَ پاکستانی لشکر ءِ انگر ءَ انت کہ اود ءَ لشکر ءَ کرفیو جتگ ءُ روگ ءُ آیگی دراھیں راہ بند کتگ انت۔

چہ زھری ءَ رس اتگیں ھالانی رد ءَ اے وھد ءَ نورگامہ شھر ءَ پاکستانی لشکر ٹوھیں کساسے جاڑیگ انت ءُ شھر ءِ نندوکیں مردماں وتی لوگاں نندگ ءِ کڈن کنگ بوتگ۔

مرچی رس اتگیں ھالانی رد ءَ پاکستانی لشکر ءَ یک جنینے ءَ ھوار چار مردم لوگانی سر ءَ چھاپہ ءِ وھد ءَ دزگیر کتگ ءُ ناشناسیں جاھے ءَ برتگ اَنت ۔

زهری ءَ پاکستانی لشکر ءِ نیمگ ءَ دزگیر کنگ بوتگیں جنین ءِ پجار صفیہ بی بی ءِ نام ءَ بوتگ ءُ مردینانی پجارزاھد ء عزیز، آصف بلوچ ءُ اسد ءِ نام ءَ بوتگ انت۔

زانگ بہ بیت کہ 15 ستمبر ءَ پاکستانی لشکر ءِ برزء اُرشانی تہ ءَ دو جنین ءَ ھوار ھپت مردم بیران بوتگ اَنت، ایشی ءَ چہ دہ روچ ءَ پد پاکستانی لشکر ءَ 27ستمبر ءَ زمینی آپریشن بندات کتگ۔

اے وھد ءَ ھال ھم رس اِتگ کہ بازیں نندوکیں مردم دزگیر کنگ بیتگ اَنت۔

زہری ءَ برجاھیں آپریشن ءِ سبب ءَ گوستگیں دو ھپتگ ءَ دمگ ءِ نندوکیں مردم انگر ءَ اَنت ءُ پورسز ءَ زہری ءِ روگ ءُ آیگ ءِ سرجمیں راہ بند کتگ اَنت ءُ دمگ ءَ انٹرنیٹ ءُ موبائل سروس ھم بند کنگ بوتگ اَنت۔

بلوچستان ءِ دمگ ھاران ءَ سلاہ بندیں مردماں آمیدگس ءِ ماڑی مانداشتگ ءُ قاضی محمد جان بلوچ آوار جتگ۔

ھالانی رد ءَ ھاران ءَ مزنیں کساسے ءَ سلاہ بنداں آمیدگس ءِ ماڑی انگر کتگ ءُ آس داتگ ءَ پد ءَ آھاں قاضی محمد جان بلوچ آوار جتگ۔

زانگ بہ بیت گوستگیں روچاں بلوچستان ءَ سرکاری مزن مزنیں اگدہ دارانی آوار جنگ ءِ تہ ءَ گیشی اتکگ۔ پیش ءَ کیچ ءِ دمگ تمپ ءِ ڈپٹی کمشنر ءُ زیارت ءِ ڈپٹی کمشنر ھم وتی زھگ ءِ ھمراھی ءَ آوار جنگ بوتگ ات انت۔

تمپ ءِ ڈی سی ءِ آوار جنگ ءِ زمہ واری بلوچستان لبریشن فرنٹ ءَ زرتگ ات کہ رند ءَ آ یل کنگ بوتگ ات، وھدے کہ زیارت ءِ ڈی سی ءُ آئی ءِ چک انگت بیگواہ انت۔

بلے مرچی ھاران ءِ وئیل ءِ زمہ واری کس ءَ نہ زرتگ۔

بلوچ اسٹوڈنٹ آرگنائزیشن ءُ بلوچ اسٹوڈنٹ آرگنائزیشن پجار ءِ چیردستی ءَ زبیر بلوچ ءُ نثار بلوچ ءِ یات ءَ یکجاھی ءَ پرسی دیوانے برجم دارگ بوتگ کہ اود ءَ بلوچستان ءِ بازیں سیاسی پاٹی ءُ انسانی ھکانی گلانی رھشوناں بھر زرتگ ۔

مراگش ءَ بی ایس او پجار ءِ کمک سرکماش ملک بابلئےبلوچ ، بی ایس او ءِ بنجاھی مزن کمک سرکماش نزر بلوچ ، بنجاھی سیکریٹری جنرل صمند بلوچ ، ایڈوکیٹ ساجد ترین ، میر کبیر احمد محمد شھی ، علی احمد لانگو، غلام نبی مری، طاہر شاہ (صدر پشتون اسٹوڈنٹس فیڈریشن بلوچستان)، نصراللہ بلوچ، ایڈوکیٹ اسحاق بلوچ، حوران بلوچ، اور آغا حق نواز شاہ ءَ تران کتگ ۔

ترانکاراں زبیر بلوچ ءُ نثار بلوچ ءِ دیمھونیانی سر ءَ ستک شانی درشان اتگ ءُ گوشتگ کہ آیانی مشن ءَ دیم ءَ برگ ءِ کول ءَ کن ایں ۔

ترانکاراں گوشتگ کہ نمیرانیں زبیر بلوچ یک رھبندار ، بے دروریں سیاسی باسکے بوتگ کہ آئی ءَ وتی زند بلوچ راج ءِ بنکی ھک ءُ انساپ ءِ ھاتر ءَ ندر کتگ ۔

آئی ءَ زورانسری آوارجنی ، درکانودی کشت ءُ کوش ءُ ریاستی زوراکیانی بگیری ءَ توار چست کتگ ءُ بلوچ نودربراں زانشت ءُ گل ءِ راہ پیشداشتگ ۔

ترانکاراں گوشتگ کہ آ یک سازشی ءِ رد ءَ نشانگ کنگ بوتگ تاکہ ھک ءِ ھاتر ءَ چست بوتگیں بلوچ راج ءِ توار ایرموش کنگ بہ بیت ۔

مراگش ءَ ریاستی درشان رد کنگ بوتگ ءُ ھمے گوشگ بوتگ کہ نمیرانیں زبیر بلوچ کوش درکانودی کوشے ، ءُ آئی ءِ جھد پہ بلوچ راج ءَ یک رژنائیں درورے کہ زوراکیانی بگیری ءَ گھگیری ءِ زرمبشت ءَ زندگ دار ایت ۔

ھمے وڑ ترانکاراں نثار بلوچ ءَ را ھم دروت ندر کتگ ءُ گوشتگ کہ آئی ءَ راج دوستی یکجاھی ءُ انساپ ءِ ھاتر ءَ وتی جان ءِ دیمھونی داتگ ۔

مراگش ءِ گڈسر ءَ آیاں چہ بلوچ نودربر ، سیاسی باسک ءُ درسیں ھک لوٹوکیں مردماں گوں لوٹ کتگ کہ آ نمیرانیں سرانی مشن ءَ وتیگی بہ کن انت ءُ زلم ءُ زوراکی ءِ بگیری ءَ وتی توار ءَ چست بہ کن ایت ءُ بلوچ راج ءِ ھکانی ھاتر ءَ وتی جھد ءَ برجاہ بہ دار انت ۔

آیاں لوٹ کتگ کہ درکانودی کشت ءُ کوش ءُ زورانسری آوار جنی ءِ درچ زوت بند کنگ بہ بیت ۔

آیاں کول کتگ کہ نمیرانیں سرانی دیمھونی مدامی یات کنگ بنت ءُ آیانی مشن جھد ءِ رھشونی ءَ کنان کنت ۔

بلوچستان ءِ جتاجتائیں دمگاں پاکستانی پوج ءُ آئی چاریگانی سر ءَ بلوچ آجوئی لوٹوکیں گلانی نیمگ ءَ یکشل ءَ اُرش برجاہ ءَ اِنت-

دومی نیمگ ءَ اے بیتگیں جتاجتائیں اُرشانی زمہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءُ بلوچ لبریشن آرمی ءَ منّ اِتگ اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ کلات ءِ دمگ زاوہ ءَ زورگریں پاکستانی پوج ءِ یک پوسٹے ءِ سر ءَ اُرش کتگ – سرمچاراں راکٹ ءُ دگہ مزنیں سلاھاں چہ زورگریں پوج نشانگ کتگ، چریشی ءِ آسر ءَ دو کارمند مرتگ ءُ بازین ئِے ٹپی بیتگ اَنت- اُرش ءِ میان ءَ ٹپی بیتگیں بازیں دژمنیں کارندھاں وتی سنگر یل کتگ ءُ تتکگ اَنت-

جارکش ءَ گوشتگ بلوچ لبریشن آرمی ءِ سرمچاراں گوستگیں روچ ءَ کلات ءِ دمگ منگچر ءَ بُنجاھی شھدگ سر ءَ ناکہ بندی کتگ، کہ یک کلاکے ءَ گیش برجاہ بیتگ-

جارکش ءَ گوشتگ سرمچارانی دگہ یک ٹولی ءَ چہ منگچر بازار ءَ زھور نامیں مردمے دزگیر کتگ کہ آئی ءِ جُست ءُ پُرس برجاہ ءَ اِنت ءُ بلوچ راجی آمیدگس ءِ درگت ءَ پیسلہ دے ایں-

جارکش ءَ گوشتگ بلوچ لبریشن آرمی ءِ سرمچاراں سی ستمبر ءَ پنجگور ءِ دمگ سبزآپ ءَ سی پیک دگ سر ءَ زورگریں پاکستانی پوج ءِ کاروان ءَ ھوار یک گاڑی یے ریموٹ کنٹرول آئی ای ڈی اُرش ءَ نشانگ کتگ چریشی ءِ آسر ءَ زورگریں پوج ءِ چار کارندہ مرتگ ءُ چار ٹپی بیتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں جمعہ روچ ءَ تربت ءِ دمگ ھیرونک ءَ زورگریں پاکستانی پوج ءِ چاریگ لکمیر ء سید محمد، جھمنند شاپک، تیرگواری کتگ کُشتگ-

جارکش ءَ گوشتگ زورگریں پاکستانی پوج ءُ چیریں ادراھانی جوڑ کتگیں وتگڑیں ڈیتھ اسکواڈ ءِ بھر بیتگ، کہ شاپک، شھرک ءُ کش گور ءِ دمگاں لوگانی سر ءَ بیڑبرتگ، ورنایانی زورانسری آوار جنی، ءُ زورگریں پوج ءِ کمکاری ءَ تچکی ءَ ھوار بیتگ- آ ورنایانی چمپروشی کتگ ءُ سلاھانی زور ءَ پوج ءِ واستا چاریگ ءِ ھاتر ءَ کار پرمائیگ ءَ ھم ھوار بیتگ-

جارکش ءَ گوشتگ کہ زورگریں پوج ءَ چاریگ ءَ بے لگام کتگ اَنت، کہ منشیات پروشی ءَ ھوار دمگ ءَ مردماں زلیل کنگ ءَ ھوار بیتگ اَنت- گوستگیں روچاں چاریگ ءَ آئی ءِ لوگ بانُک ءُ گوں نُنک ءَ ھوار گاڑی ءَ چہ لگت داتگ ءُ کشتگ اَنت- راجی میارباری ءِ سر ءِ بیگ ءِ سبب ءَ لکمیر بلوچ لبریشن آرمی ءِ نشانگ لسٹ ءَ ھوار بیتگ ، ءُ آئی ءِ سر ءَ سرمچاراں کار کتگ ءُ کُشتگ-

جارکش ءَ گوشتگ بلوچ لبریشن آرمی ءِ سرمچاراں جمعہ ءِ روچ ءَ مچھ ءَ پولیس تھانہ یک دستی بمب اُرش ءَ نشانگ کتگ-

دومی نیمگ ءَ بلوچستان لبریشن فرنٹ ءِ جارکش میجر گوھرام بلوچ ءَ رسانکدر ءَ وتی شنگ کُتگیں درشان ءِ تہ گوشتگ کہ مئے سرمچاراں گل ءِ چیریں ونگ ءِ ھالانی رِد ءَ پنچ اکتوبر ءِ سُھب نُھ ءَ نزیک ءَ واشک ءِ دمگ پتک ءَ چین – پاکستان اقتصادی راھداری ءِ دگ سر ءَ زورگریں پاکستانی پوج ءِ سے گاڑیانی سر ءَ سنگر گپتگ ءُ اُرش کتگ ءُ آ مزنیں سلاھاں چہ نشانگ کتگ اَنت، چریشی ءِ آسر ءَ چار کارندہ جاہ پہ جاھی مرتگ اَنت، وھدے کہ یک آفیسرے ءَ ھوار دو کارندہ ٹپی بیتگ اَنت – سوبمندیں کاروائی ءَ پد سرمچار پہ سلامتی درتکگ ءُ وتی مُھریں اوتاکاں سر بیگ ءَ سوبمند بیتگ اَنت-

گُڈی ءَ دوئیں گلاں اُرشانی زمہ واری منّ اِتگ ءُ گوشتگ داں بلوچستان ءِ وتواجھی ءَ اے وڑیں اُرشانی درچ برجاہ بنت-

ٹرانسپورٹرانی ھڑتال ءِ سبب ءَ گوستگیں شش روچاں مکران ءَ بگر داں کراچی ءَ روگ ءِ دراھیں بس مھتل دارگ بوتگ انت ءُ ایشی ءِ سبب ءَ ھزاراں مساپر پَسّ اِتگ انت۔

تفصیلات ءِ رد ءَ سندھ بلوچستان کوچ اونرز ایسوسی ایشن گوستگیں شش روچ ءَ چہ کوسٹل ھائی وے ءِ سر ءَ پاکستانی لشکر ءِ جوڑ کتگیں بازیں چیک پوسٹانی ھلاپ ءَ ٹرانسپورٹ بند کنگ ءَ زھرشانی کنگ ءَ انت ءُ مساپراں ​​ساھت چہ ساھتاں بند کنگ ءَ انت ءُ آھاں بے شرپ کنگ ءَ انت۔

سندھ ءُ بلوچستان کوچ ءِ واھندانی انجمن ءِ سروک سیٹھ اقبال شاھزئی ءِ گشگ اِنت کہ سیکورٹی واکدار ءُ سرکار ءِ نیمگ ءَ شپ ءِ سپر ءِ سر ءَ بندش ءِ سبب ءَ درستیں بس یکیں وھد ءَ رھادگ بنت کہ ایشی ءِ آسر ءَ مساپر ءُ ٹرانسپورٹراں ھر چیک ءِ سر ءَ چار ءُ پنچ کلاک ءِ ودار کنگی اِنت کہ اے مشکلیں بوگ ءَ اِنت۔

مکران ءَ بگر داں کراچی ءِ ٹرانسپورٹرانی لوٹ انت کہ شپ ءِ تر ءُ تاب ءِ سر ءَ بندش زوت دیر کنگ بہ بیت، چیکنگ سسٹم ترند ءُ موثر جوڑ کنگ بہ بیت، ءُ مکران ءَ بگر داں یوسف گوٹھ ءَ ھنگول چیک پوسٹ ءَ ھوار دراھیں بے وسی ءِ چیک پوسٹ جلاس کنگ بہ بنت۔

ٹرانسپورٹ ایسوسی ایشن ءَ چہ مزن وزیر، کور کمانڈر بلوچستان، سر وزیر بلوچستان، سیادی داروکیں مزنیں کارندہ، ءُ اے راہ ءِ درستیں ڈپٹی کمشنراں لوٹ کتگ کہ آ وتی جائزیں لوٹاں زوت منّ اَنت اگاں نہ زھرشانی گیشتر گیش ءُ گیوار بیت۔

دومی نیمگ ءَ ھڑتال ءِ سبب ءَ گوستگیں شش روچ ءَ ٹرانسپورٹ سرجمی ءَ بند کنگ بوتگ۔ چہ تربت، گوادر ءُ مکران ءِ ھزاراں مساپر نادراھی ءِ آماچ اَنت ءُ پریشان اَنت۔ سداں مساپر کراچی ءَ اوشتاتگ اَنت ءُ ھزاراں مردم پہ درمان ءُ کاروبار ءِ ھاتر ءَ کراچی ءَ روگ ءَ بے سوب اَنت ءُ وتی سامانانی وھد ءِ سر ءَ سر نہ بوگ ءِ سبب ءَ کاروباری راج تاوان ءِ آماچ اِنت۔

دومی نیمگ ءَ مکران ءِ جتا جتائیں دمگاں چہ ھزاراں مساپر بازیں روچ اِنت کہ یوسپ گوٹھ کراچی بس ٹرمینل ءَ بسانی دوبر کار بندات کنگ ءِ ودار ءَ نشتگ اَنت۔

مساپرانی گشگ اِنت کہ سرکار ءِ بے تواری بژن ءِ گپ اِنت ءُ اے جیڑہ زوتیں گپ ءُ تران ءِ وسیلہ ءَ گیش ءُ گیوار کنگ بہ بیت دانکہ لس مھلوک گیشیں مشکلات ءَ چہ بہ رک ایت۔

کلبر لبزانکی مجلس ءَ شنگ کتگیں درشان ءَ گوشتگ کُلبر لبزانکی مجلس بالیچہ ءِ مراگش گوں سوبمندی ءَ گوں آسر بیتگ ءُ اود ءَ جتا جتائیں لبزانک دوست، شائر ءُ دگہ تک ءُ پھناتاں بندوکیں مردماں بھر زرتگ-

شنگ بیتگیں درشان ءَ گوشگ بیتگ کہ اے مراگش نمیرانیں لچہ کار ماسٹر عیسیٰ انسان، عبدالطیف عادل، دوست محمد توفیق ءُ عبدالواحد شوھاز ءِ یات ءَ لبزانکی مراگشے رمس 4 اکتوبر 2025 ءَ بالیچہ ءَ گوں سوبمندی ءَ برجم دارگ بوتگ۔

آئی ءَ گوشتگ اے مراگش ءِ گُشتانکی بھر ءَ خلیل تگرانی، بجار بلوچ، علی گوھر، نزیر شے مُراد ءُ نبیل دین ءَ گُشتانک داتگ۔

شنگ بیتگیں درشان ءَ گوشگ بیتگ مراگش ءِ دومی بھر ءَ بلوچی زبان ءِ شائر شبیر نور ءِ شئیرانی دپتر “ھوناک” ءِ دیمدرائی بوتگ۔

آئی ءَ گوشتگ سیمی بھر ءِ تہا بلوچی زبان ءِ مزن نامیں شائراں بھر زُرت، آیانی‌ تہ ءَ مراگش ءِ ھاسیں مھمان میر عمر میر، ارشاد پرواز، علی گوھر، عارف عزیز، خلیل تگرانی، امین عاقل، زھیر اشرف، رستم نود، قادر وفا، باقی شاکر، عبدوست رحیم، آصف اختر، مھراج مھر، مروان مھر، ممتاز اشرف، نجیب حبیب، شھزاد فدا، تاج تاھیر، نصرت اللہ میرل، باھڈ تگرانی، قمبر شاد، اسمائیل ساگر، خمیس تگرانی ءُ نعمان مجیب ءَ شئیر ونتگ انت۔

آئی ءَ گوشتگ چارمی ساز ءُ زیملی بھر ءِ تہا بلوچی زبان ءِ نامداریں گشندہ وھاب بلوچ ءُ سلیم بلوچ ءَ مراگش ءِ تب وشنود کُتگ۔

آئی ءَ گوشتگ اے مراگش ءَ علم و ادب پبلشرز، ساچ در لبزانکی گَل مکران ءُ مُلا اسمائیل لبزانکی گَل پُلا‌ آباد ءِ نیمگ ءَ بُک اسٹال جنگ بوتگ۔

شنگ بیتگیں جار ءَ گوشگ بیتگ اے مراگش ءَ بالیچہ ءُ کش ءُ کِر ءِ میتگانی مردماں جوانیں رنگے ءَ بھر زُرتگ۔

تھسیل زھری ءِ انگِر

ٹی بی پی شونگال

بلوچستان ءِ دمگ ھزدار ءِ ھند تھسیل زھری ءَ پاکستانی پوج ءِ برزی ءُ زمینی کارندھانی ھواری ءَ ٹینک، ٹوپ، گن شپ ھیلی کاپٹر ءُ ڈرونانی ھواری ءَ بازیں کچے ءَ آپریشن کنگ ءَ انت ءُ داں انگت ءَ یازدہ مردم بیران بیتگ انت کہ چریشانی توک ءَ گیشتریں مردم زالبول ءُ زھگ ھوار انت-

چہ گوستگیں دو ھپتگاں زھری ءِ ھند ءَ ترندیں انسانی ناگیگانی دیمپان انت؛ گیشتریں ھند پوجی انگر ءُ کرفیو ءِ زد ءَ انت- شھریانی سر ءُ مانسرانی گر ءُ دار ءُ جانسلامتی ءِ دارو ءُ درمانانی بندش ءُ گر ءُ بندی، انجیرہ ءُ نیچارہ پندران، نورگامہ ءُ کمبی ءِ ھنداں وردنی، آپ ءُ ھسپتال ءِ راہ بندش ءُ جیڑھانی دیمپان انت-

زھری ءَ جاورانی ناگیگی 11 اگست ءَ بندات بیتگ انت بلوچ راجی آجوئی سنگر ءِ گھگیرانی ترندیں جنگ ءَ پد دمگ ءَ کنٹرول گپتگ ات – شھر دان دو ماہ گھگیرانی دست ءَ بیتگ، چریشی ءَ پد پوجی برزی ءُ زمینی لشکر کشی بندات بیتگ انت ءُ چریشی ءَ ھزاراں شھری انگِر ءُ بازیں کچے ءَ سا ءُ سر ترس ءِ آماچ بیتگ انت-

پوجی کاروائی ءُ انگِر ءَ زھری ءِ مھلوک نا ایوک ءَ کَھر ءُ بے ستکی ءِ دیمپان انت – تاکت ءِ کارمرد ءَ نا ایوک ءَ سیاسی ایرادگری ھلاس بیتگ ءُ نا انیگ ءَ کجام ھم استھکام ممکن بیت انت- اگاں ریاست راستی ءَ امن لوٹ ایت گڑا آئی ءَ توپک ءَ ابید گپ ءُ تران، انساپ ءُ سیاسی رھبندانی راہ گرگ لوٹ ایت، اگاں ناں زھری ءِ وڑیں جاور بلوچستان ءِ گوستانک ءَ یک دگہ دردناکیں کسھے ایر بیت انت-

بلوچستان ءِ دمگ نصیر آباد ءُ ڈیرہ بگٹی ءَ گوستگیں شپ ءَ ناشناسیں مردماں گیس پائپ لائن ءُ بند ءُ ساچی شرکت ءِ سر ءَ اُرش کتگ انت-

دومی نیمگ ءَ بلوچ آجوئی لوٹوکیں گل بی آر جی ءِ جارکش دوستین بلوچ ءَ بیتگیں اُرشانی زمہ واری من اتگ انت-

بی آر جی بلوچ سلاہ بندیں گلانی ھواریں گل آجوئی سنگر ءِ ھواریں بھرے ءُ بازیں وھداں بلوچستان ءَ گیس پائپ لائن، سکیورٹی پورسز ءُ دگہ اُرشانی زمہ واریاں منگ ءَ گندگ بیت انت-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شتگ کتگیں یک بیانے ءِ تہ ءَ گْوشتگ کہ گْوستگیں شپ ءَ بلوچ ریپبلکن گارڈز ءِ سرمچاراں نصیر آباد ءِ مزن شھر ڈیرہ مراد جمالی ءَ سرکار ءِ کمک ءَ علی مردان پلال ءِ پناہ گاہ ءِ سر ءَ گوں دستی بمب ءَ اُرش کُتگ۔ علی مردان پلال اے اُرش ءَ چہ رک اتگ۔

آئی ءَ گوشت کہ اے نیام ءَ مئے سرمچاراں ڈیرہ مراد جمالی ءِ پٹ فیڈر میرحسن روڈ ءِ سر ءَ کار کنوکیں فوجی کنسٹرکشن کمپنی ءِ گاڑیانی سر ءَ تیر گواری کتگ ءُ مزنیں تاوانے داتگ انت۔

جارکش ءَ گشتگ کہ ھمے وڑ مئے سرمچاراں ڈیرہ بگٹی ءِ سوئی دمگ پیارا کالونی ءَ سئے گیس پائپ لائن ءِ سر ءَ تراکناکیں شورو ایر کتگ انت کہ یکے سرجم ءَ تباہ بوتگ ءُ دو لائناں سک باز تاوان رس اتگ۔

جارکش ءَ گیش کرتگ کہ مئے گل بی آر جی اے اُرشانی زمہ واریاں من ایت ءُ اے گپ ءَ پدر کنت کہ اے وڑیں اُرش داں بلوچستان ءِ آجوئی ءَ برجاہ مان اَنت۔

شبیر بلوچ ءِ زورانسری آوار جنی ءِ ھلاپ ءَ تربت ءَ شھریانی مزنیں کچے ءَ روانک کش اِتگ ءُ زورانسری آوار جنی ءِ ھلاس کنگ ءَ ھوار بیگواھیں مردمانی یل کنائینگ لوٹ کتگ-

گیشیں ھالانی رِد ءَ بلوچ اسٹوڈنٹس آرگنائزیشن آزاد ءِ رھشون شبیر بلوچ چار اکتوبر 2016 ءَ پاکستانی پوج ءِ دست ءَ زورانسری بیگواہ کنگ بیتگ، آئی ءِ زورانسری آوار جنی ءَ نُھ سال سرجم بیگ ءَ تربت ءَ آئی ءِ کھول ءُ بلوچ وومین فورم ءِ نیمگ ءَ چہ روانک ءُ سیمینار برجم دارگ بیتگ-

اے درگت ءَ روانک کشگ بیتگ جتاجتائیں شھدگاں چہ جُنزان شھید فدا چوک سر بیتگ اَنت اود ءَ سیمینار آسر کتگ-

سیمینار اولی بھر پینل ڈسکشن بیتگ اود ءَ فوزیہ بلوچ، سیما بلوچ، بیگواھیں اسرار بلوچ ءِ مات ءُ ایڈووکیٹ مجید دشتی ھوار بیتگ اَنت، وھدے کہ نصرین بلوچ ءَ بند ءُ بست کتگ-

اے میان ءَ بیگواھیں شبیر بلوچ ءِ گْھار سیما بلوچ ءَ وتی تران ءِ تہ ءَ گوشتگ کہ شبیر ناں تھنا وتی کھول ءِ زمہ واری چست کتگ بیتگ بلکیں آ یک وشتبیں ءُ جوانیں سنگتے بیتگ، آئی ءِ زندمان دو بھرانی سر ءَ ھمگرنچ بیتگ یکے سیاسی کارکن ءُ دومی یک برات ءُ سنگت ءِ دروشم ءَ-

سیما بلوچ ءَ گوشتگ کہ چار اکتوبر ءَ مئے زندمان مدام یک منھوسیں روچ ءِ دروشم ءَ یات کنگ بیت-

آئی ءَ گوشتگ کہ شبیر بلوچ بلوچ راج ءُ بلوچستان ءِ واستا وتی ورنایے دیمونی داتگ آئی ءِ زورانسری چہ ساری ھم مئے لوگ سر ءَ بیڑبرتگ ءُ مارا تنگ اش کتگ، بلے شبیر مدام ڈلبڈی داتگ-

آئی ءَ گوشتگ کہ ما مروچی ھم آئی ءِ بچکند ءُ وشتبیں گپانی وادار ءَ ایں ما آمیدگس ءِ دروازگ ٹُک اِتگ بلے انساپ نہ رس اِتگ زورانسری آوار جنی یک انچیں دردناکیں چیزے کہ ھما آئی ءَ سرپد بیت کنت آ بیگواہ بیتگ-

شبیر بلوچ ءِ لوگ بانُک ءَ اے درگت ءَ گوشتگ کہ آ نُھ سال ءَ چہ درداں گوں ھمگرنچ اَنت اود ءَ آ زانگ ءَ نہ اِنت کہ آئی ءِ لوگ واجہ زندگ اِنت یا اناں آ وت ءَ شبیر ءِ لوگ بانُک سرپد بہ باں یا کہ جنوزام-

آئی ءَ گوشتگ کہ لوگ واجہ ءِ زورانسری آوار جنی ءَ نُھ سال زندمان ءِ بدتریں دلسیاھی ءِ جاوراں چہ سریچیں سال اَنت، ءُ انگت ھم دگانی سر ءَ زھرشانی در کایاں دانکہ اگاں منی لوگ واجہ زندگ اِنت گُڑا آ واتر بئیت-

بی وائی سی کراچی ءِ رھشون فوزیہ بلوچ شاشانی ءَ گوشتگ کہ بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت راجدپتر گواہ ءَ اِنت کہ توانمندیں راج مدام ایردستیں راجانی گوم ءَ واجہ ءُ ایردستی ءِ وڑیں رویشگ کتگ ءُ مروچی بلوچ ھم اشی ءِ نشانگ اَنت مئے دود، زانت، مال تباہ کنگ بیگ ءَ اَنت-

آئی ءَ گوشتگ کہ وھدے بلوچ راج وتی زُلم ءُ زوراکی ءِ ھلاپ ءَ توار چست کتگ، گُڑا آ لگوش گور کنگ نہ بیتگ یا کہ ریاستی زوراکی ءَ چہ ایرموش کنگ بیتگ اسلام آباد نندانک ءَ مئے گوم ءَ درستانی دیم ءَ زُلم کنگ بیتگ ڈاکٹر ماہ رنگ بلوچ ءُ آئی ءِ سنگت مروچی تھنا ھمے ھاتر ءَ آوار جتگ اَنت کہ آیاں زورانسری آوار جنی ءِ ھلاپ ءَ توار چست کتگ-

ایڈووکیٹ مجید دشتی ءَ وتی تران ءِ تہ ءَ گوشتگ کجام ھما مردم بندیگجاہ بند کنگ درکانودی 1973 ءِ آئین ءَ انسانی ھکانی لگمتالی کنگ بیگ ءَ اِنت، شبیر بلوچ زورانسری آوار جنی کابل ایرجنگ اِنت مروچی کساس بیست ھزار بلوچ بیگواہ ءَ اِنت-

آئی ءَ گوشتگ کہ سردار اختر مینگل ءِ نیمگ ءَ چہ وفاقی ھکومت ءَ دیگ بیتگیں لِسٹ ءَ پد کساس پنچ سد مردم یل کنگ بیتگ اَنت، بلے ھزارانی انگت ھم بیگواہ ءَ اَنت جھان ءِ کجام ڈیھ کسے ءَ چاردہ ادار ءَ چہ گیش بند کت نہ کنت بلے اد ءَ سالانی سال بند اَنت-

تربت ءِ روانک شھریانی گوم ءَ زورانسری بیگواھیں مردمانی کھول ھم مزنیں کچے ءَ ھوار بیتگ اَنت، کہ وتی دوستناکانی یل کنائینگ لوٹ کنگ ءَ اَنت، اے درگت ءَ بیگواھیں اسرار بلوچ ءِ مات ءَ گوشتگ کہ پنچ فروری 2015 ءَ چہ شال ءَ منی چُک اسرار بلوچ بیگواہ کنگ بیتگ، دہ سال ءَ گوزگ ءَ اَبید مارا ھچ وڑیں سرپدی دیگ نہ بیتگ ھرچ جاگہ ءَ وتی توار چست کتگ دانمہ منی چُک ءَ یل بہ کن اَنت-

پینل ڈسکشن ءِ میان ءَ ترانکاراں زور داتگ کہ زورانسری آوار جنی ناں تھنا انسانی ھکانی سنگین ءِ ھلاپ ورزی یے بلکیں چاگردی ءُ نپسیاتی ءَ تباھی ءِ سبب جوڑ بیت-

آیاں ھکومت ءَ چہ لوٹ کتگ کہ سرجمیں بیگواھیں مردماں یل بہ کن اِت ءُ اے کار ءِ زمہ واراں آمیدگس ءَ بیار اَنت-

بلوچستان ءِ دمگ ھزدار ءِ ھند زھری ءَ چہ بازیں روچاں پاکستانی پوج ءِ نیمگ ءَ یکشل ءَ لشکر کنگ بوگ ءَ انت کہ اود ءَ بازیں کچے ءَ مردمانی بیرانی ءُ زدگ ءُ بیگواھیں اھوال آیگ ءَ انت-

ھمے وڑ ءَ پاکستانی پوج ءَ زھری ءَ ٹوھیں کچے ءَ لشکر کشی ءِ اھوال راست کتگ ءُ آپریشن ءَ ٹوپ، ٹینک ءُ گن شپ ھیلی کاپٹر ءُ ڈرون جھاز کارمرد بوگ ءَ انت-

چہ بیست روچاں برجاھیں آپریشن ءَ داں انگت ءَ یازدہ مردمانی بیرانی ءِ ھال راست بیتگ انت کپ چریشانی توک ءَ زالبول ءُ زھگ ھم ھوار انت- ءُ دمگ ءَ پوج ءِ کرفیو برجاہ انت-

دومی نیمگ ءَ بلوچ یکجھتی کمیٹی ءَ زهری ءَ آپریشن ، لس مردمانی انگیریانی ھلاپ ءَ آن لائن کمپئن ءِ ھلائینگ ءِ جار جتگ-

ھالانی رد ءَ اے وھد ءَ زھری ءِ جتا جتائیں دمگاں نوکیں سلاہ بندیں اُرد دگہ فوجی بالی گرابانی کارمرز کنگ ءَ فوجی ٹینک، ڈرون اُرش ءُ بالی آپریشن ءِ ھمراھی ءَ زمینی آپریشن کنگ ءَ انت۔

چہ زھری ءَ رس اتگیں ھالانی رد ءَ زھری ءِ یکیں نادراھجاہ ھم پاکستانی لشکر ءَ وتی دست ءَ کتگ ءُ دکان ءُ بازار ھم بند کنگ بیتگ اَنت۔

زہری ءَ برجاھیں فوجی آپریشن ءِ ھوالگ ءَ شنگ بوتگیں بیان ءِ تہ ءَ بلوچ یکجھتی کمیٹی ءَ گْوشتگ کہ پاکستانی اُرد بے گناھیں لس مھلوک ءِ ھلاپ ءَ مزنیں جرم کنگ ءَ اَنت، ڈرون ءِ اُرش ءُ بے رھبندیں بمبتراک ءَ نندوکیں دمگ تباہ کتگ اَنت ءُ ھزاراں مردمانی واپار، وردن ءُ دوا ءُ درمان بند کنگ ءَ چہ ھزاراں ھاندان ءِ مردمانی جاور ناگیگ انت-

کمیٹی ءِ ردا ٹپی ءُ نادراہ الاج ءِ آسراتی ءَ چہ زبھر کنگ بوھگ ءَ اَنت ءُ کرفیو ءِ سبب ءَ سرجمیں دمگ دم بُکیں انگیر ءِ چیر ءَ اِنت۔