TBP Balochi

بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءِ تہ ءَ گوشتگ کہ بی ایل اے ءِ سرمچاراں زامران ءُ پنجگور ءَ زورگریں پاکستانی پوج ءِ سرا پنچ اُرش کتگ چریشی ءَ زورگریں پوج ءِ چار کارمند مُرتگ انت ۔ اے اُرشاں زورگریں پوج ءِ جاسوس کیمرہ تباہ کتگ انت وھدیکہ بی ایل اے سرمچار سنگت ریاز پنام ءِ امان نمیران بوتگ ۔

جارکش ءَ گوشتگ کہ بی ایل اے ءِ سرمچاراں مروچی سھب ءِ ادار ھشت ءِ نزیک ءَ زامران ءِ دمگ دشتوک بامبلو ءَ زورگریں پوج ءِ سرا ھما وھد ءَ ریموٹ کنٹرول بمب اُرش ءِ کتگ وھدیکہ پوجی کارمند پیادگ ءَ بمب ڈسپوزل ٹولی ءِ ھمراھی ءَ راہ ءِ چارگ ءَ بوتگ انت ۔ تراک ءِ آسرا زورگریں پوج ءِ دو کارمند ھما دمان ءَ مرتگ ءُ یکے زدگ بوتگ ۔

آئی ءَ گوشتگ کہ زامران ءِ دمگ زامری ءَ ھم سرمچاراں زورگریں پوج ءِ کارمند بمب اُرش ءِ نشانگ کتگ انت ۔ اے اُرش ھما وھد ءَ کنگ بوتگ وھدیکہ پوجی کارمند وتی بنجل ءِ نزیک ءَ واٹر سپلائی ءَ آپ آرگ ءَ بوتگ انت ۔ تراک ءَ پوج ءِ یک کارمند ءِ مُرتگ ۔

جارکش ءَ گوشتگ کہ سرمچاراں سیزدہ جون ءَ آدینگ ءِ روچ ءَ زامران ءِ دمگ ساہ دیم ءَ زورگریں پوج ءِ نیمگ ءَ کل کنگ بوتگیں جاسوسی کیمرہ نشانگ کتگ ءُ تباہ کتگ انت ۔ ھمے وھد ءَ زورگریں پوج ءَ سرمچارانی چارگ ءِ ھاتر ءَ کواڈ کاپٹر ھم کارمرز کتگ گڈا سرمچاراں آ ھم نشانگ کتگ ۔

آئی ءَ گوشتگ کہ آدینگ ءِ شپ ءَ سرمچاراں یک دگہ اُرش ءِ پنجگور ءِ دمگ جتکان ءَ کلم چوک ءَ برجاھیں زورگریں پوج ءِ پانگسے ءِ سرا کتگ کہ اودا سرمچاراں پانگس ءِ سرا دزبمب ءِ جتگ چریشی ءَ کم چہ کم یک دژمن کارمندے مُرتگ ءُ دو زدگ بوتگ انت ۔

بی ایل اے ءِ جارکش جیئند بلوچ ءَ وتی درشان ءِ تہ ءَ دیمتر ءَ گوشتگ کہ گوستگیں روچ ءَ سیاجی ءِ کوھی دمگ دشت ملائی نگور ءَ بلوچ لبریشن آرمی ءِ سرمچار ریاز پنام ءِ امان پاکستانی پوج ءِ نیمگ ءَ کل کنگ بوتگیں تراکناکیں شورانی زد ءَ اتکگ ءُ نمیران بوتگ ۔ اے وئیل ھما وھد ءَ بوتگ وھدیکہ سنگت امان گل ءِ کارے ءِ ھاتر ءَ پند ءَ بوتگ ۔

آئی ءَ گوشتگ کہ نمیرانیں سنگت ریاز پنام ءِ امان ءِ کادر بکش کیچ ءِ دمگ دشت شولی ءِ نندوک بوتگ ۔ دلیری ءُ ایمانداری ءِ بے درور سنگت ریاز سال دوھزار ءُ شانزدہ ءَ سلاہ بندیں جھد ءَ بندوک بوتگ ۔ آئی ءَ دشت ءِ کوسٹل ھند ، مند ، تمپ ءُ زامران ءِ سنگرانی تہ ءَ جوانمردی ءَ گوں دژمن ءَ جنگ داتگ ۔

نمیرانیں سنگت ریاز ءَ براس ءِ آپریشن آنی تہ ءَ ھم وتی کرد جوانی ءَ پیلو کتگ ۔ پروری سال دوھزار ءُ بیست ءَ دشت ءِ دمگ درچکو ءَ براس آپریشن آسریچ ءَ زورگریں پوج ءِ بنجل ءِ گرگ ءِ وھد ءَ آ اولی سرپ ءَ بوتگ کہ آئی ءَ پاد ءَ تیر ھم وارتگ ءُ زدگ بوتگ ۔

آئی ءَ گوشتگ کہ سنگت ریاز بلوچ پنام ءِ امان وتی گڈی ساہ ءَ تاں آجوئی گپ ءِ سرا بوتگ ءُ ھمے گپ ءِ سرا نمیران بوتگ ۔ بلوچ لبریشن آرمی اے کول ءَ کنت کہ زوت یا دیر ءَ نمیرانیں سرانی اے پُرمنگھیں مشن ءَ الم منزل ءَ سر کنت ۔

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں سیزدہ جون ءِ نیم روچ ءِ ادار سے نیم ءَ زامران ءِ ھند گیشتردان ءَ مبارکی ھل سر برجاھیں پاکستانی پوج ءِ چیک پوسٹ ءِ سر ءَ اُرش کُتگ دژمنیں پوج جانی ءُ مالی تاوان داتگ ۔ ھمے وھد ءَ سرمچارانی دومی ٹولی ءَ چیک پوسٹ ءِ نزیک ءَ بند ساچی شرکت ءِ یک سرکاری بلڈوزرے ھم نشانگ کُتگ ءُ مشینری مانداشتگ اَنت۔

جارکش ءَ گْوشتگ دگہ اُرشے ءَ بی ایل ایف ءِ سرمچاراں چاردہ جون ءِ شپ ءِ ادار نُھ ءِ نزیک ءَ گریشہ سرریج کراس ءَ پاکستانی پوج ءِ چیک پوسٹ ءِ سر ءَ اُرش کُتگ ءُ سک نزیک ءَ چہ دژمن نشانگ کُتگ چریشی ءَ ڈن ءَ اُوشتوکیں یک کارندھے جاہ پہ جاھی مُرتگ ءُ دگہ سے ٹپی بیتگ اَنت – اُرش نیم ادار ءَ برجاہ بیتگ اُرش ءِ پسو ءَ دژمنیں پوج ءَ سرمچار مارٹر گولاں ءُ دگہ نوکیں سلاھاں گوں نشانگ کنگ ءِ جھد کُتگ بلے سرمچار اُرش ءَ پد پہ سلامتی در کپگ ءَ سوبین بیتگ اَنت

جارکش ءَ گْوشتگ بلوچستان لبریشن فرنٹ زامران ءُ گریشہ ءَ پاکستانی پوج ءُ بند ساچی شرکت ءِ سر ءَ بیتگیں اُرشانی زمہ واری ءَ منّ اِیت –

بلوچستان ءِ دمگ چہ ھُزدار ءَ سیادی داروکیں بیگواھیں نودربر عابد عزیز ءِ کھول ءَ ھُزدار ءَ یک اشتاپی کانفرنس کنان ءَ بھتام جتگ کہ 13 جون 2025 ءِ شپ نُھ، پاکستانی پوج ءُ آئی ءِ ورنائیں برات شھر ءِ بُنجاھی ءِ دمگ چہ زورانسری بیگواہ کتگ-

کھول رِد ءَ عابد عزیز ء عبدالعزیز، مھلہ بالینہ کھٹان ءِ جھمنند ءُ بلوچستان شھدربرجاہ، پشین کیمپس ءَ کانود ءِ نودربرے، وئیل ءِ روچ ءَ آ وتی برات ءِ ھمراھی ءَ علامہ محمد عمر دینپوری لائبریری ءَ چہ لوگ ءَ واتر روگ ءَ بیتگ دیم پوشیں سلاہ بندیں مردماں آ یک اسپیتیں کرولا گاڑی ءَ سر بازار زورانسری آوار جتگ-وئیل درزنانی چمّگدانی دیم ءَ بیتگ-

پریس کانفرنس ءَ کھول ءَ گْوشتگ کہ عابد یک بے میاریں نودربر ءُ مھنتی ورنایے کہ ھچ وڑیں بے کانودی پُرکاریاں چہ سیادی نیست- آیانی گوشگ اِنت کہ یک وانندھیں ورنایے اے وڑ ءَ لَٹ ءُ کُٹانی نشانگ کنان ءَ آوار جنگ ناں تھنا در انسانی کارے بلکیں انسانی ھکانی سنگین ھلاپ ورزی اِنت ھم-

کھول ءَ ریاستی ادارھاں، ھکومت بلوچستان ، وزار داخلہ، آمیدگس، انسانی ھکانی کمیشن، سول سوسائٹی ءُ راجی ءُ میان استمانی رسانکدر ءَ چہ لوٹ کتگ کہ آ عابد عزیز ءَ زوت ءُ سلامتی یل کنائینگ ءَ کرد ءَ پیلو بہ کن اَنت- آیاں گوشتگ کہ ریاستی ادارھاں بیست چار کلاکانی وھد داتگ کڈن کتگ کہ اگاں عابد یل کنگ نہ بیت گُڑا آ راھبندے ھساب ءَ زھرشانی ءِ راہ ءَ گچین کن ایں-

کھول ءَ بلوچستان ءَ برجاھیں زورانسری آوار جنی ءِ وئیل سر ءَ سک دلپدردی درشان کنان ءَ لوٹ کتگ کہ آ اے وئیلاں ھلاس کنگ لوٹ کتگ ءُ اے جرم ءَ ھواریں مردماں جست بگر اِت-

بلوچستان ءِ دمگ کیچ ءِ بُنجاھی شھر تُربت ءَ پاکستانی لشکر ءِ دست ءَ بیست شش مئی ءَ زورانسری آوار جنی بیتگیں غلام جان ءِ کھول زھرشانی نندانک سی پیک دگ سر ءَ پنچمی روچ ءَ چہ برجاہ ءَ اِنت-

اِھوالکار رِد ءَ ، زھرشانی ءَ مزنیں کچے ءَ مردین ، زالبول ءُ چُک ھوار بیتگ اَنت ، بلے تنی وھدے ریاستی واکدارانی نیمگ ءَ چہ زھرشانی کنوکانی لوٹانی سر ءَ ھچ وڑیں گامگیج زیرگ نہ بیتگ-

بیگواھیں غلام جان کھول ءَ گْوشتگ آیانی تھنا یک لوٹے اگاں غلام جان سر ءَ ھرچ وڑیں بھتامے ھست گُڑا آئی ءَ آمیدگس ءَ پیش بہ کن اِت، اگاں اناں آئی ءَ زوت یل بہ کن اِت-

زانگ بہ بیت کہ ھمے سال ءَ بلوچستان ءَ زورانسری آوار جنی ءِ تہ ءَ گیشی گندگ اَتکگ- اشی ءَ ساری ھم بلوچستان ءِ جتاجتائیں دمگاں بیگواہ کنگ بیتگیں مردمانی کھول وتی دوستناکانی یل کنائینگ ھاتر ءَ بازیں روچ ءُ ھپتگاں تاں زھرشانی کتگ اِت-

زھرشانی کنوکاں وتی دوستناکانی یل کنائینگ ءُ انساپ لوٹ کنگ ءُ آیگ ءَ اَنت، بلے واکدار ءَ نیمگ ءَ چہ تھنا دروگیں کول کنگ زھرشانی ھلاس کنائینگ جُھد کتگ، وھدے کہ زورانسری بیگواھیں مردم یل کنگ نہ بیتگ اَنت-

بلوچستان ءِ دمگ ڈیرہ بگٹی ءِ تھسیل سوئی ءِ دمگ طوطا کالونی ءَ شمبے ءِ شپ ءَ سلاہ بندیں مردمانی نیمگ ءَ چہ سی ٹی ڈی کارگس ءُ گشتی کارندھانی سر ءَ راکٹ ءُ مزنیں سلاھاں چہ اُرش کتگ، چریشی ءِ آسر ءَ پولیس کارندہ بیران ءُ ٹپی بیگ ھال سر بیتگ-

دمگی اِھوالکار رِد ءَ اُرش ءِ وھد ءَ تراکانی ءُ تیرگواری توار دیر دیر اش کنگ بیتگ-

جارکش بلوچ ریپبلکن آرمی ءِ سرباز بلوچ ءَ شنگ کتگیں درشان ءِ تہ ءَ اُرش زمہ واری منّ اِتگ گْوشتگ کہ سرمچاراں سوئی ءَ سی ٹی ڈی کارگس راکٹاں، دستی بمب ءُ وتکاریں سلاھاں چہ اُرش نشانگ کتگ اَنت-

جارکش ءَ گوشتگ کہ وھدے کمک واستا دگہ گیشیں کارندہ ھما دمان ءَ سر بوتگ اَنت گُڑا پیسر ءَ چہ سنگراں نشتگیں سرمچاراں آ ھم نشانگ کتگ اَنت، چریشی ءِ آسر ءَ دگہ سے کاندہ ٹپی بوتگ اَنت-

دمگی انتزامیہ ءَ وئیل راست کنان ءَ گْوشتگ کہ اُرش ءَ دو کارمند ھیڈ کنسٹیبل رحم علی بگٹی ءُ نصردین بگٹی بیران بیتگ اَنت-

پولیس رِد ءَ سلاہ بندیں مردماں اناگاہ ءَ تیرگواری بندات کتگ، چریشی ءِ آسر ءَ دو پولیس کارندہ جاہ پہ جاھی مرتگ اَنت وھدے کہ دگہ دو ٹپی بوتگ اَنت- ٹپی کارندہ زوت نزیکیں نادُراھجاہ ءَ برتگ اَنت کہ اود ءَ آیانی جاور نگیگ گوشگ بوگ ءَ اَنت-

بلوچستان ءِ دمگ کیچ ءِ جتاجتائیں ھنداں پاکستانی پوج ءَ یک بلاھیں لشکر کشی یے بندات کتگ-

دمگی اِھوالکار رِد ءَ اے لشکر کشی یکشمبے ءِ سُھب مھلو بندات بیتگ، ھوشاپ ءِ جتاجتائیں دمگ تل، تل سر، کلگ، جکی ءُ دگہ نزیکیں دمگ لشکر کشی ءِ تہ ءَ اَنت-

بلے لشکر کشی ءِ میان ءَ تنی وھدے ھچ وڑیں دزگیری یا جانی تاوان ھال دز نہ کپتگ-

واکدار نیمگ ءَ ھچ وڑیں درشان دیم ءَ نیتکگ-

پاکستان پروشتگ ءُ لاچار اِنت

نبشتہ کار: شَکّل بلوچ

دی بلوچستان پوسٹ

پاکستان پروشتگ، ناں سیاست مھکم اِنت ءُ نیکہ مالی داب شر اِنت اگاں چہ وتی رکینگ ءَ جُھدے کنگ ءَ اِنت آ ماں چاگردی رسانکدر ءَ ھما ٹاسک کہ فتنہ الھیرامنڈی دھشتگردیں ریاست دنت ھماھانی پُشدر ءَ ماں پیسبُک، ٹک ٹوک ءُ انسٹاگرام ءُ ایکس ءَ بے دریں اکاونٹ جوڑ کن انت ءُ ھمے کار چہ فتنہ الھیرامنڈی ءَ داتگ کہ بی وائی سی ءِ رھشون ڈاکٹر ماھرنگ ءِ ھلاپ رسانکدر ءَ کارمرز بکن اَنت۔ اے باقائدہ کارے کہ فتنہ الھیرامنڈی لس مھلوک ءُ مطالعہ پاکستان ءِ پنجابی نودربر انت کہ ایشاں تنخواہ دیگ ءَ انت کہ شمئے اے کار اِنت کہ پاکستان زندہ باد ءُ بی ایل اے دھشتگرد بگوش اِت۔

ڈاکٹر مھرنگ بلوچ، بی وائی سی ءِ رھشون، بلوچ راج ءِ بی وائی سی، راج ءِ راجی مُچی ءَ اے پدر بوتگ کہ پاکستان پپپلناکام بوتگ، بزاں بلوچستان یک آزات ءُ وتواجھیں اِستانے ءِ بستار ءَ زانگ بوتگ۔ بلوچ راج نوں سرپد ءُ پوہ انت کہ ما یک آزات ءُ وتواجھیں استانے ءِ دروشم ءَ زانگ بوتگ ءُ دیم ءَ بَہ اِیں۔

پاکستان یک بے بُنیں استانے اگاں لھتے بلوچ ایشی ءِ آسرا ءَ نشتگ گڑا بزاں آ بلوچ ءَ ھچ آکبت نیست۔ پاکستان ءِ بابت انچُش نمیرنیں بابا ھیر بکش ءَ گُشتگ کہ گوں پاکستان زندگی کنگ ھرام اِنت، اے کفریں ملکے۔ اے وتگڑیں ملک بزاں فتنہ الھیرامنڈی وتی ناکامی ءِ چیر دیگ ءَ ڈاکٹر مھرنگ بلوچ زندان ءَ بند کُتگ، اگاں ما بلوچ اے بابت ءَ شری ءَ سرپدیں کہ ڈاکٹر ماھرنگ ھمے بے بُنیں پاکستانی عدالتاں وتی گار ءُ بیگواھیں بلوچانی واستا گپ کنگ ءَ اَت۔ وھدے فتنہ الھیرامنڈی ءَ چار اِت کہ منی راز پدر بوان اَنت گڑا بی وائی سی ءِ سر ءَ کریک ڈاؤن ئِے کُت۔ بی ایل اے ءُ بی ایل ایف بلوچانی راست ءُ تچکیں راجی پوج اِنت، کُل بلوچ راج وتی راجی آمیدگس ءَ انساپ لوٹ اِیت ءُ فتنہ الھیرامنڈی ءَ چہ وتی ڈیھ ءَ ولگوج بکنت بلوچستان آجو بات، پاکستان مردگ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ کیچ ءَ پاکستانی لشکر بمبے ءِ نشانگ کنگ بیتگ-

مرچی سھب ءَ زمران ءِ دمگ دشتوک ، بامبلو ءَ پاکستانی اُرد ءِ کارندہ ھما وھد ءَ بمبتراک ءِ نشانگ جوڑ کنگ بوتگ اَنت وھدے کہ آ پیادگ ءَ دمگ ءَ گشت کنگ ءَ بیتگ اَنت۔ چہ تراک ءَ کارندھاں تاوان رس اتگ۔

واکداراں اے درگت ءَ انگت ءَ ھچ وڑیں ھال ءُ اھوال دیم ءَ نیاؤرتگ انت۔

انگت ءَ اے اُرش ءِ زمہ واری کس ءَ نہ زرتگ بلے پاکستانی لشکر مُدام سلاہ بندیں بلوچ آجوئی لوٹوکیں مردم نشانگے کنگ ءَ انت-

اے ماہ ءَ شال، کیچ، نوشکی، ءُ قلات ءَ بلوچ لبریشن آرمی ءِ نیمگ ءَ آئی ای ڈی ءِ تراکاں پاکستانی لشکر ءُ ڈیتھ اسکواڈ ءِ باسک نشانگ جوڑ کنگ بوتگ اَنت۔

 پاکستانی پوج ءَ یک مردمے آوار جنگ ءَ پد ناشناسیں جاھے ءَ برتگ-

بلوچستان ءَ پاکستانی پوج ءِ دست ءَ زورانسری آوار جنی ءِ دْرچ یکشل برجاہ ءَ اِنت بلوچستان ءِ دمگ چہ بولان ءَ پاکستانی پوج ءَ یک ورنایے آوار جتگ ءُ بیگواہ کتگ-

ھالانی رِد ءَ گوستگیں شپ ءَ پاکستانی پوج ءَ بولان ءِ دمگ چہ پیراسماعیل ءَ نجیب سمالانی ء نورالحق سمالانی آوار جتگ ءُ وتی ھمراھی ءَ برتگ ءُ پد ءَ آ دیم ءَ آرگ نہ بیتگ-

زانگ بہ بیت کہ بلوچستان ءَ اے وھد ءَ زورانسری آوار جنی ءِ درچ یکرندے پد ءَ گوں تُرندی ءَ برجاہ ءَ اِنت اود ءَ مروچی بلوچستان ءِ دمگ چہ تربت ھُزدار ءُ کلات ءَ دگہ چار مردم زورانسری آوار جنی ءِ ھال سر بیتگ اَنت-

ھمے وڑ ماہ شش ءِ چاردہ روچانی تہ ءَ جتاجتائیں دمگاں چہ سی ھپت ءِ نزیک مردم زورانسری آوار جنی ءِ نشانگ کنگ بیتگ اَنت وھدے کہ دو مردم چہ مستونگ ءَ آوار جنگ ءَ پد کُشتگ اَنت-

زورانسری آوار جنی ءِ نوکیں درچ ءَ پانک رِد ءَ گوستگیں ماہ مئی ءَ پاکستانی پوج ءَ یک سد بیست ھشت مردم زورانسری آوار جنی ءِ نشانگ کتگ اَنت وھدے کہ بیست ھپت مردم درکانودی کُشتگ اَنت-