TBP Balochi

گِلَگداریں راھگْوز

نبشتہ کار: نودان بلوچ

دی بلوچستان پوسٹ

اِے ھما گیابان اِنت پیسری وھداں ماں بر ءُ بھار بوتگ بَلے انی ویرانگ اِنت۔ دوستین ءَ درائینت۔ ھو، نی گُڑا پرچا چُش اِنت، زانا کسے ءَ ایشی ءِ دُرستیں براناں سُوتکگ یا ھاوند ءَ وت ویران کُتگ۔؟ زُبیر ءَ پُرس اِت۔ ناں پُل اے گیابان ءِ بلاھیں کسھے ھست اِنت، ھِچ مانا کنگ نہ بیت۔دوستین ءَ گوں ملوریں داب ءَ پسّو دات۔ چو وَ نہ اِنت کہ ھِچ گپ کنگ مہ بیت۔ زُبیر ءَ ٹھک دات کہ ھبر ءَ دیم ءَ بہ بارت۔ ھیر، اگاں تو زانگ لوٹ ئے گُڑا بیا بہ نِند گوشدار دوستین ءَ درائینت۔ بس شر اِنت من ساجو آں۔

ھما ھُشکین درچک ءَ گندگ ءَ ئے گِند ئے بلاھیں ڈوکے کش ئِے کپتگ؟ ، مردُمانی گُشگ اِنت کہ اِے ڈوک پیسر ءَ یک بلاھیں جناورے بیتگ ءُ دُرستیں درچک ءُ دار ئِے وارتگ اَنت رَند ءَ مھلوک ءِ بازیں دُوا ءُ پاتیھاں گوں ھاوَند ءَ اے ڈوکے جوڈ کُتگ۔من یار پھمگ ءَ نہ آں تو شوک بزانت ءَ پدّر بہ کن۔ زُبیر ءَ پُرس اِت۔ من ترا پیسر ءَ گُشت کہ اِے بلاھیں کِسّھے، اینچو Direct گُشگ نہ بیت۔دوستین ءَ پسّہ دات بَلے پد ءَ بی تو شوکیں رنگے ءَ من ءَ بہ پھمین چو وَ نہ اِنت پُل ھیر!! دیم ءَ گوشدار۔

اِے جاہ پیسر ءَ سکّیں شوکیں جاھے بیتگ ،بَلے اِد ءِ مردُماں تُشے اوں نیّت نہ بوتگ، ھرچ نوکیں مُساپِرے کہ اِے راہ ءِ سر ءَ گوستگ داں سجّھیں بازار ءِ مردُماں آئی ءَ را زاہ ءُ بد گُشتگ ءُ چہ اِے راہ ءَ پہ در آیگ ءَ لاچار کُتگ ایشانی بس ھمے یکین بوتگ کہ اِے مئے جاہ اِنت ءُ مارا پِتو پیرُکاں بکشاتگ، اگاں دَری مردُم بیا اَنت گُڑاں اِے بازار ءَ چہ ما پچ گِر اَنت ءُ واجھانی دیَنت۔

گُڑا یک روچے کیت کہ یک وانِندگیں ورنا یے پہ گْوست ءِ چیزانی پٹ ءُ پول ءِ ھاتر ءَ سرجنان ءَ آئی ءِ سر ھمے بازار ءَ کپ اِیت کہ آ را بازیں چیزانی پٹ ءُ پول ءِ موہ گِندگ ءَ کیت ۔ چہ دُرستان پیش آ ورنا روت ھمے بازار ءِ واجہ ءِ لوگ ءَ، بِگند ئے واجہ منی کُمک ءَ بہ کنت ءُ ھمے کار سرجم بہ بیت۔ بَلے آ سرپد نہ اَت کہ اِد ءِ مستریں مُناپِک ءُ بد نِیّت ھمے واجہ اِنت۔ انچُش کہ آ ورنا ماں واجہ ءِ گْور ءَ سر بیت ءُ وتی کار ءِ بارو ءَ تران کنت داں واجہ آ ورنا ءَ زُور اِیت ءُ بازار ءِ نیام ءَ بارت ءُ کوکّار کنگ ءَ بِنا کنت، گُڑا سجھیں بازار ءِ مردُم گوں ھیرانی ءَ کاینت ءُ واجہ ءَ گوشدار اَنت۔ واجہ گوں سِلّیں دُروشم ءَ گُش اِیت۔ اِے ورنا چہ شھر ءَ اَتکگ ءُ نوکیں پندلے سازگ ءَ اِنت کہ مئے ھلک ءِ مردُم آئی ءِ پندلانی بھر جوڑ بہ بنت ءُ ودان ودان ءَ اِے بازار بھر ءُ بانگ بہ بیت، بزانکہ اِے بازار ءِ سودا ءَ جنگ ءَ اِنت ماں واجھانی گْور ءَ۔ شُما یک گپے ءَ سرپد اِت کہ اِے بازار مئے وتی پت ءُ پیرُکاں مارا بکشاتگ ءُ ما وتی زِند ءِ تہ ءَ چِینچو شادماناں ؟ اگاں شُما لوٹ اِت کہ مئے سرجمیں وشّی ماں گم ءُ رنجانی تہ ءَ بدل بہ بنت گُڑا اِے ورنا ءَ جاہ بدے اِت۔من شُتاں شُما بزان اِت ءُ اِے ورنا بزانت، چہ واجہ ءِ دُروگیں پندلاں رند بازار ءِ دُرستیں مردُم ھما ورنا ءَ زُور اَنت ءُ ھاکشان ئِے کن اَنت ءُ چہ میتگ ءَ دُور یک بَلاھیں ڈوکے یے چیر ءَ کَل ئِے کن اَنت۔ دُرست گَل ءَ بال بنت کہ ما مُروچی سکّیں شوکیں کارے کُتگ ءُ ھمے کار ءِ مُزّ ءَ مروچی یک ساز ءُ زیمری دیوانے کن اَنت۔ شپ بیت، دُرستیں بازار ءِ مردُم کاینت ءُ دیوان جاہ ءَ ساڑی بنت، واجہ ھم کیت، چہ دیوان جاہ ءِ نِندگ ءَ پیسر واجہ گند اِیت، داں پو اِد ءَ وَ ورگ ءُ چرَگ اِنت، ڈُھل ءُ چاپ اِنت گُڑا واجہ وتی دِل ءَ جیڑ اِیت کہ اِے ورنا ءَ وَ ھِچ گُناہ نہ کُتگ اَت بَلے منی ھبر ءِ کیمت چہ اِے ورنا ئیگ ءَ گِیشتِر اَت، منی ھیال ءَ نو من ھرچ رَدیں ھبرے یا کارے بہ کناں اِد ءِ مردُم باید کہ من ءَ سر ءُ سوج بہ کن اَنت بلکیں ایمان ھم کار اَنت۔ دیوان تاں دیر ءَ برجم بیت ءُ مھلوک وتی دِل ءِ پیم ءَ ناچ ءُ گانا کن اَنت داں سجھیں شپ ھمے نِند ءُ گِند برجم بیت۔ انچُش کہ روچ وتی رُوژنائیں پردگ ءَ سھرا کنت گُڑا دُرست وتی لوگ ءَ رو اَنت، ماں وتی کاراں گُلائیش بنت۔

وھد کِساس روچے پنچ بج بیت کہ کمّو اِدار لوٹ اِیت ماں شپ ءَ ، مھلوک انگت چہ وتی ھما کُتگیں کاراں شمُشکار نہ بنت انگت وشبھتی ءِ ھیال ءِ تہ ءَ لیب کن اَنت۔

اِے کار ءَ ھپتگے نہ گْوز اِیت کہ یک شُوانگے گوں ھیسکارگاں تچان ءَ کیت ءُ سرجمیں بازار ءَ ھمے ھال ءَ شِنگ کنت کہ ھما کل کُتگیں ورنا ءِ جاہ ءَ چہ یک بَلاھیں جناورے در اَتکگ ءُ سک باز تاکت ور اِنت، منی دُرستیں دِلوت یک دپ ئِے کُتگ ءُ وارتگ اَنت ئِے ، نو دیم پہ بازار ءِ نیمگ ءَ پیداک اِنت۔چہ اِے ھبر ءِ اُشکنگ ءَ بازار ءِ دُرستیں مردُم آئی ءِ سر ءَ مسکرا کن اَنت ءُ آ را ھمے تژن ءَ جن اَنت کہ تو وَ پیسر ءَ چہ سر ءَ شر شر نہ بوتگ ئے نُوں مئے ھیال ءَ تئی نادُراھی گیشتِر اِنت۔ دیر نہ بیت کہ ھما جناور زُوت ءَ بازار ءِ کش گْوراں رس اِیت ءُ مردُمانی دِلوتاں اَبید دُرستیں درچک ءُ داراں ءَ ھم وران کَنت۔ گوں جناور ءِ گِندگ ءَ نُوں مردُم ھوش کن اَنت کہ واکی ما سکّیں بلاھیں رَدی یے کُتگ۔ گُڑا بازار ءِ دُرستیں مردُم تَچان ءَ رو اَنت واجہ ءِ گْور ءَ ءُ وتی اُزر ءَ پیش کن اَنت، ءُ گُش اَنت واجہ! ما چونیں گُنایے کُتگ کہ چُشیں بلاھیں ازابے مئے سر ءَ اتکگ۔ چہ اے ھبر ءِ اُشکنگ ءَ واجہ یک رندے وتی تہ ءَ وت جیڑگ ءَ لگّ اِیت، ءُ رند ءَ پُرس اِیت۔زاناں چی بوتگ، آزمانی ازابے اتکگ یا دِگہ توپانے؟ دُرستیں مردُم یکجائی ءَ پسّہ دینت۔ ناں واجہ !! اِے ناں آزمانی ءِ ناں کہ دِگہ توپانے، ایش یک بَلاھیں جناورے، ھنچیں بلاھیں دپے پر ئِے کہ مئے سجھیں مال ءُ دلوتاں یک دپ ئِے کُتگ ءُ نُوں مئے ورگ ءَ پیداک اِنت۔ گُڑا واجہ گُش اِیت۔ شُما ھما ورنا ءَ گوں چی کُرتگ، ھما ورنا ءَ بیار اِت باریں۔ بِگند ئے چہ ھمائی ءِ دِلپروشی ءِ سوب ءَ اِے اَزاب اتکگ۔ گوں واجہ ءِ اِے گپّ ءَ گُش ئے چہ جناور ءَ ابید دِگہ توپانے اَتک، انچو ھاموشی ءَ مانشانتگ اَت۔ لھتیں کترہ ءَ رَند چمے مردُماں چہ یک کماشے وتارا ڈَڈ کنت ءُ دیمتر ءَ کیت اُوشت اِیت۔ کماش گوں اَجکھی ءَ گُش اِیت۔ واجہ! چہ تئی روَگ ءَ رَند اِے دُرستیں مردُماں ورنا زُرتگ ءُ ھما کوہ گْور ءَ دَرچک ءِ بُن ءَ کَل کُتگ، اِے جناور چہ ھمے درَچک ءِ بُنا در اَتکگ ءُ مئے گْور ءَ اَتکگ۔ واجہ اِے ھبر ءِ اُشکنگ ءَ رَند پاد کیت ءُ گوں ھاموشی ءَ تچان بیت داں مسیت ءَ روت، واجہ ءِ پُشت ءَ دُرستیں مردُم اوں تچان ءَ کاینت مسیت ءَ، یک رَندے پد ءَ واجہ ءَ سوال کن اَنت کہ واجہ تو گوں ھاموشی ءَ مسیت ءَ اَتک ئے ، تئی مسیت ءَ آیگ ءِ بِزانت چی اِنت مارا اوں بُہ گش گوں ۔ واجہ وتی چمّانی ارساں ساپ کنت ءُ پسّو دنت۔ شُما نہ زان اِت کہ چہ شُمے اِے کار ءَ مئے سر ءَ چِینچو بلاھیں ازابے اَتکگ؟ شُما گوں اِے ورنا ءَ شر نہ کُتگ، ھاوند وت من ءَ بہ بکش اِیت من زاناں نُوں پہ ما ھِچ پشت نہ کپتگ، آ ھِر اِے جناور مارا اوں یک دپ کنت، بیا اِت بہ نِند اِت وتی کُتگیں رَدیانی پلگار کنَگ ءِ دُوا ءَ کنین ءُ چہ ھاوند ءَ ھمے لوٹیں کہ اِے اَزاب ءَ مئے سر ءَ دُور بہ کنت، دِگہ چُشیں راہ نیست اَبید ء دُوا کنَگ ءَ۔ نُوں گُڑا دُرست مردُم ھوش کن اَنت کہ ھرچیز بوتگ چہ ھمے واجہ ءَ بوتگ ، بِگند ئے آ ورنا ساپ دِلے بوتگ ءُ واجہ ءَ پہ زور مئے دست ءَ گُنایے کنائینتگ۔ رَند ءَ مردُم واجہ ءَ چہ مسیت ءَ در کن اَنت، دست ءُ پادان بند اَنت ھما جناور ءِ کش گْوراں راہ ءِ سرا ایر ئِے کن اَنت۔ اَنچش کہ جناور ھمے راہ ءِ کش ءُ گْوراں کیت ھمے واجہ ءَ گِند اِیت ءُ یک دپ ئِے کنت، پَد ءَ واتر روت ھما درَچک ءِ بُن ءَ اُوشت اِیت۔ دُرستیں مردُم گوں ھیسکارَگاں تَچان بنت ءُ دوبَر مسیت ءَ روَ اَنت، دستاں چِست کن اَنت ءُ وتی ردیانی پلگارگ ءِ دوا ءَ کن اَنت۔ بِگند ئے ھاوند ءَ بکش داتگ یا نداتگ اَنت بَلے چہ ایشانی بازیں دُوایاں گوں ھمے جناور پَد ءَ ھما ڈوکانی چیر ءَ روت، داں روچ ء مروچی ھمے گُشگ بیت کہ آ جناور ھست ءُ زِندگ اِنت، ھمے ڈوک ءِ تہ ءَ اِنت- شھر شھرے نہ بُوت، گْوستگیں دیوان، کندگ ،مزاک دُرست گار بوت اَنت چہ اِے اَزاب ءَ رَند۔ مھلوک در کاینت اِے بازار ھم ویران بیت ناں مال ءُ دِلوت پہ آیاں پشت کپ اِیت ناں کہ دِگہ لوگ ءُ جاگھے۔ چما روچ ءَ رَند اِے شھر ھمے وڑ ءَ ویرانگ اِنت۔ دوستین ءَ گوں کِسّہ ءِ ھلاسی ءَ گُشت۔زُبیر ءَ وتی چم دْرنگ داتگ اِت اَنت ءُ گوں ھاموشی ءَ گوشدارگ ءَ اَت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

کماش شوکت بے تواریں جھدکارے اَت

نبشتہ کار: کندیل بلوچ

دی بلوچستان پوسٹ

سال 2008 اَت سرجمیں بلیدہ پرسیگ اَت ،بلیدہ ناں بگند ئے سرجمیں بلوچستان پریسگ اَت ،هر نیمگ ءَ جلسه جلوس ،ریلی اَت ھمک نیمگ ءَ یکیں توار گوشاں کپتگ اَت “الطاف جان تیرے خون سے انقلاب آئے گا”-

ما اے وھد ءَ کسان اِت ایں بی ایس او ( آزاد ) ءِ بیرک مارا دست ءَ اَت بلے اے وھد ءَ مئے سیاسی ردوم اینچو نه بوتگ اَت بس ریلی جلسه،جلوساں گون اِت ایں-

داگانی سر ءَ ٹیر مان دارگ ءَ اِت ایں ،پاکستان ءِ بیرک ءَ لس مھلوک چه اسکولانی سر ءَ دور کنگ ءُ دگانی سر ءَ مان دارگ ءَ اَت،انچو سما بوگ ءَ اَت که مرچی ناں باندا گلامیں زمین چه کبزه گیریں استان ءَ آجو بیت۔ وھد گْوزان زوراور چکچینی تہ ءَ گیشی آرگ ءَ اَت-

ءُ سال 2008/8 اَت ( نواب اکبر ھان بگٹی دومی سال روچ اَت ،مزن شھر ءِ کیچ ءِ یک مزنیں ریلی یے نواب ساھب ءِ یاد ءَ کشگ بوت ،کیچ ءِ مھلوک جم اِتگ اَت ،ترند ترند اوگام جنگ بوگ ءَ اَت ،اے اوگام ریاست ءَ اوپار نه کت اَنت ءُ ریلی ءِ سر ءَ اُرش کت، چه ھمے ارش ءَ یک سپاھی یے ڈارک تپنگ ء ءِ نل ءَ گوں التاپ جان ءَ کنت که ھمیشی ءِ آسر ءَ التاپ جان نمیران بوت-

سال( 2008/12 /8 ) یک نیمگے التاپ جان ءِ پرس پتر ءَ ایر اَت دومی نیمگ ءَ روانک کشگ بوگ ءَ اَت که اے روانکانی گیشتر سروکی کماش شوکت جان دگہ لهتیں ورنا کنگ ءَ اَت ،هر نیمگ ءَ آزاد بلوچستان زندگ بات ،پاکستانی پوج مرده باد ءُ دگہ باز اوگام هر لوگ ءُ میتگ ءَ سر بوان اَت، کماش سروکی کنگ ءَ اَت ورنا ءُ لس مھلوک ھمے گشگ ءَ اَت مہ مر ئے وپتگیں واب ءَ مہ مر ئے ،مر اِت په مردی به مر اِت اے زمین مرچی مارا شمارا گوانک جنگ ءَ اِنت اے چه شما ھون لوٹ اِیت مرچی التاپ بوتگ باندا من باں پونشی تو بہ ئے اے ریاست کس ءَ ماپ‌ نه کنت اے نه نچار اِیت که‌ تو گریبی چکے ئے ترا گشگی نه اِنت یا تو سیرینے ءِ چک ئے ،بلکیں ریاست مارا بلوچ کنگ ءَ اِنت ءُ کشگ ءَ اِنت گڑا مارا شمارا ھم بلوچ بوگی اِنت ءُ وتی ماتیں زمین چه اے زور آور ءَ رکینگی اِنت ،پرچا که زمین مات اِنت گڑا چک ءِ پرز بیت که وتی مات ءِ رکینگ چک پد ءَ مه‌ بیت اِنت مرگ وَ چوناهی ءَ ھست اِنت په بنی آدم ءَ بلے بیا انچیں مرگے کن ایں تاں جھان ھست اِنت تو ھست مان به بئے ،مرچی اے کبرستان ءَ هزارانی کساس ءَ مھلوک کل اَنت ،بلے ھمے کبرستان ءِ تہ ءَ انچیں کبر ھست اَنت که آئی ءِ سر ءَ بلوچستان ءِ بیرک مک اِنت ،اے کبر نمیرانیں التاپ جان ئیگ اِنت که آئی ءَ وتارا په اے ماتیں زمین ءَ ندر کتگ۔

ءُ کماش مرچی تو ھم په اے ماتیں زمین ءَ ندر بوت ئے ،کماش ھما جھدکار اَت که چه لوگ ءَ دور ،چه مات ءُ پت گھار ،برات درستیں مھلوک ءَ چه دور بس گوں ایمانداری ءَ گوں جھد ءَ مشکول اَت ،برے بچار لباچ ءَ ،برے بچار دگہ ھند ءُ دمگاں جاور مٹ بوان بوت اَنت بلوچ جھدکار نمیران کنگ بوت اَنت،بازینے زندانی کنگ بوت تاں روچ ء مروچی زندانی اَنت بازینے سلاه بندیں جھد ءَ ھور بوت ءُ بازینے لگور بوت ءُ بازینے ءَ په وت ءَ کمپنی جوڑ کت، بلے کماش مھکم اَت گوں بے تواری ءَ شپ ءُ روچ جھد ءَ اَت په گل ءَ نوک نوکیں پالسی اڈ کنگ ءَ اَت۔

سال 2024 ءَ ریاست ءَ کماش ءِ سر ءَ درانڈیھ ءِ ارش کنگ ءَ بیت ،سک باز ٹپ ءُ ٹوری کنگ بیت ،بلے کماش انگت مھکم اَت بس جھد ءَ اَت که کار کنگی اِنت جھد گیش ءَ چہ گیش مھکم کنگی اِنت –

“کماش ترا رکست نه گش ایں ”
“بس ھواریں تاں آجوئی ءَ”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ جتاجتائیں دمگاں پاکستانی پوج ءُ آئی ءِ شرکتانی سر ءَ سلاہ بندانی اُرش یکشل ءَ برجاہ ءَ اِنت دومی نیمگ ءَ اے اُرشانی زمہ واری بلوچ آجوئی لوٹوکیں سلاہ بندیں گل بلوچ لبریشن آرمی ءُ بلوچستان لبریشن فرنٹ ءَ زرتگ اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مروچی ھاران ءَ زورگریں پاکستانی پوج یک اُرشے ءَ نشانگ کتگ ءُ تاوان داتگ-

جارکش ءَ گوشتگ کہ بی ایل اے ءِ سرمچاراں ھاران ءِ دمگ گرک ءَ ڈیم ءِ نزیک ءَ برجاہ زورگریں پاکستانی پوج ءِ پوسٹ ءِ سر ءَ یکیں وھد ءَ دو نیمگی ءَ چہ اُرش کتگ- سرمچاراں وتکار ءُ نوکیں سلاھاں چہ زورگریں پوج ءِ سنگر نشانگ کتگ اَنت، چریشی ءِ آسر ءَ زورگریں پوج ءِ پنچ کارندہ جاہ پہ جاھی مرتگ ءُ بازین ئِے ٹپی بیتگ اَنت-

جارکش ءَ گوشتگ کہ بلوچ لبریشن آرمی اے اُرش ءِ زمہ واری ءَ منّ اِیت ءُ دُژمن ءِ سر ءَ اُرشاں برجاہ دارگ ءِ کول کنت-

ھمے وڑ بلوچستان لبریشن فرنٹ ءِ جارکش میجر گوھرام بلوچ ءَ رسانکدر ءَ وتی شنگ کُتگیں درشان ءِ تہ ءَ گوشتگ کہ بی ایل ایف ءِ سرمچاراں شش اکتوبر 2025 ءَ شپ ءِ ساھت دہ ءِ نزیک ءَ آواران ءِ ھند پیراندر جھگرو ءَ ڈیم ھڑ کنوکیں شرکت ءِ سرجمیں مشینری نشانگ کتگ ءُ تباہ کتگ اَنت ۔

جارکش ءَ دیمتر ءَ گوشتگ کہ اے ڈیم زورگریں پاکستانی پوج ءَ را آپ دیگ ھاتر ءَ پوج ءِ پھازداری ءَ چہ جوڑ بیگ ءَ بیتگ ۔ چہ اُرش ءِ سوب ءَ شرکت ءِ سرجمیں مشینری ءَ آس لگ اِتگ ءُ زورگریں پاکستانی پوج ءِ نیمگ ءَ چہ مک کتگیں چاریگی سے مزنیں کیمرہ ھم سرمچاراں تیرگواری کتگ ءُ تباہ کتگ اَنت ۔

جارکش ءَ گُڈی ءَ گوشتگ کہ بلوچستان لبریشن فرنٹ آواران ءَ ڈیم ھڑ کنوکیں شرکت ءِ مشینری ءُ چاریگی کیمراھاں نشانگ کنگ ءِ زمہ واری ءَ منّ اِیت ءُ سرجمیں بلوچستان ءَ پہ زورگریں پاکستانی پوج ءِ آسراتی ءِ ھاتر ءَ ھڑ بیوکیں بند ساچی ءُ پُلپانچیں شوربندیانی سر ءَ کار کنوکیں شرکت ءُ ٹھیکیداراں کُڈن کن ایں کہ آ زورگریں پاکستانی پوج ءِ چیردستی ءَ کار کنگ ءَ پھریز بکن اَنت ۔

زھری ءِ گوات ءِ وشبویں آشوب

نبشتہ کار: دلشان بزدار

اولی بھر

دی بلوچستان پوسٹ

شپ ءِ بنداتی بھر اَت آسمان ءَ جمبراں مانپوش اِتگ اَت ءُ ماہ ءَ وتی دیم چیر داتگ اَت ھنچش سما بوگ ءَ اَت یکے ءَ رازے چیر داتگ کوھانی دامن ءَ زھری ءِ دلبُریں زھیر اِت اَنت دلجان ءُ باسد ءِ یاتانی منگیر وتی امبازاں پچ کنان اِت اَنت ءُ ھما جاہ اَت کہ گوات ءِ دنزانی توک ءَ لوڑاں چِست بیتگیں وشبو اَت ءُ شوروانی وشبو پد ءَ وتی انداز ءَ پریچان اِت اَنت-

زھری ءِ دلبند ءَ ھنچش سما بوگ ءَ اَت ھئی جان ءِ ھونانی وشبو ءُ آئی ءِ دلبنداں ٹپ ءُ ٹوریں ٹپ تاجگ بوگ ءَ اِت اَنت ءُ کسے ءَ چراگ ءِ لالٹنے ءَ گوں میتگ ءِ مھلوک ءَ گوانک جنان اِت ءُ دل ءَ جیڑگ بندات کت ءُ چمانی روک ءَ گندگ بوگ کَسے کوھنیں چشمکے ءَ گوں امبازیں دردانی کِسھاں کنگ ءَ اِنت-

ماسی نوری گوشگ ءَ اَت اے میتگ دلو ءُ باسو ءِ میتگ اِنت اد ءَ کسے ءَ باج وتی جاہ ءَ باج ءِ واستا ھیال کنوک ھم پرشتگ ءُ زمین ءَ کپتگ اَنت آ کجا دلو ءُ باسو ءِ زمین ءَ درامدے وتی کت کنت؟ من جیڑ اِت چوش بوت نہ کنت ماسی نوری ءِ گپانی توک ءَ من ءَ کوھیں اسلم ءُ آئی ءِ سنگتانی کوھی بولان یات آیگ ءَ اَت دل ءَ گشت یکبرے اسلم ءِ گرنچ داتگیں یاتاں پریچ بلے چوش نہ بوت-

ماسی نوری یکشل ءَ وھدیکہ گپ کنت آئی ءِ گپانی توک ءَ وزن ھست آ وھدیکہ نازینک جنت گوشگ ءَ آئی ءِ نازینکاں بولان ءِ تِھُریں ھسارانی جنگولانی کِسو ھوار اَنت ءُ برے گپ کنت ءُ پورو سما بیت آ ھیر بکش مری ءِ دیوان ءَ نشتگیں آشوبی باسکے بیتگ ءُ میتگ ءِ دراھیں چابڑیں بچک ماسی نوری ءِ نازینکانی گوشدارگ ءَ تلوس اَنت-

ماسی نوری ءِ لُنٹانی سر ءَ ھر وھد ءَ بچکند ھست اَنت بلے چمانی توک ءَ آئی ءِ چماں مدام مردم ءَ کوہ گردین بَچ گندگ ءَ کاینت ، برے برے ھنچش آئی ءِ چمانی توک ءَ شھر ءِ نامداریں نودربرانی رھشونی گندگ ءَ کاینت –

برے برے ماسی نوری ءِ یات ھنچش بے توار بنت ءُ گڑا واتر بنت گڑا ھنچش سما بیت اد ءَ یکے ھنچیں آسے بیتگ ءُ دلاں سوچ اِیت ءُ وپتگیں مردماں پچگُڑین اِیت –

ماسی نوری ھنچش برے برے ورنائیں جنکے ءِ دروشم ءَ بیت چِلیم ءَ پِر کنت ءُ ٹھک ٹھکیں کندگاں دیوان ءَ وشنود کنت ھنچش سما بیت چہ شھر ءَ کسے واتر بوگ ءَ اِنت آئی ءِ دستاں مھر ءِ تاک اِنت ءُ چندے گلاب دابیں پُل اَنت-

ماسی نوری وتی ھم دیواناں گوش اِیت شما زان اِت شمئے زمین ءِ بچانی جنگ ءُ انگِر کنگ ءَ دشمن ءَ ٹوپ ءُ بمبانی امبار آؤرتگ، شما اے سما ءَ کنگ ءَ اِت کسے مارا انگِر کنگ ءِ جھد ءَ اِنت گڑا ھمے دمان ءَ ماسی نوری ءِ دیوان ءَ ھجگیں جنکے آشوبی بیرک ءَ چِست بیت ءُ گوش اِیت آشوبی شرنگیں ھورکاں چِست بہ بیت دامناں بہ درک اِت راھسراں بہ جنز اِت ٹیھلاں –

پد ءَ آ وتی دست ءَ زمین ءَ سک دنت ءُ چنکے ھاک چِست کنت ءُ سوگند وارت اے وارسانی میتگ ءُ زمین ءِ ھجگ دابیں ھوراں شمئے سُھل ءُ تران شمئے بیتگ اَنت ءُ شمارا کس داشت نہ کنت ءُ بس وتی یاتاں مہ مٹین اِت ءُ وتی پوشکاں مٹ مہ کن ات-

پد ءَ ھمے دمان ءَ گوات ءَ وتی دیم ترینت ءُ شال ءِ سارت دابیں گوات ءِ وشبو ءَ ھیر بکش مری ءِ سرکلاں نندوک جنرل اسلم ءِ منگیریں یاتاں درشان کنگ ءَ اَت-

روان انت—

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

گْوادر ءَ ورگی آپ ءِ نہ بوگ ءِ ھلاپ ءَ، ٹی ٹی سی کالونی، بکشی کالونی، شمبے ازمائیل ءُ نیوٹاؤن ءِ جھمننداں جی ڈی اے دپتر ءِ دیم ءَ زھرشانی کُتگ۔

گیشیں ھالانی رِد ءَ گْوادر ءِ سیول سوسائیٹی ءِ ءُ آ دگہ درستیں پارئیزانی مردماں ھوار لس مھلوکاں ھم زھرشانی ءَ بھر زُرتگ۔

مھلوکانی گُش اِنت کہ ادراھانی ھاموشی ءِ مستریں مول ءُ مراد ایش اِنت کہ گْوادر ءِ لس مھلوک چہ گْوادر ءَ بہ لڈّ اَنت ءُ چِداں برو اَنت، آیانی گُشگ اِنت کہ سرکار گْوادر ءِ زمینانی درکار اِنت ءُ مھلوک چہ تُن ءَ بہ پِسک اَنت چداں چِہ برو اَنت۔

گْوادر ءِ دیمروی ادارگانی گُش اِنت کہ گْوادر ءَ ما دیمروی دیگ ءَ اِیں بلے راستی چہ ایشی ءَ چپ اِنت کہ گْوادر ءِ مھلوک پہ پِٹّے آپے ءَ تلوسگ ءَ اَنت۔

اورکزئی ءَ پاکستان فوج ءِ کاروان ءِ سر ءَ سلاہ بندیں مردمانی اُرش ءَ دو افسر ءَ ھوار 11 فوجی بیران، سئے ٹپیگ ءُ 6 بیگواہ اَنت۔

پاک فوج ءِ جارکش آئی ایس پی آر ءَ ٹاہ داتگ کہ انٹیلی جنس ءِ رد ءَ ضلع اورکزئی ءَ آپریشن ءِ وھد ءَ 19 جنگول بیران بوتگ اَنت وھدے کہ کرنل ءُ میجر ءَ ھوار 11 کارندہ ھم بیران بوتگ اَنت۔

چار شمبے ءِ روچ ءَ راولپنڈی ءَ آئی ایس پی آر ءِ نیمگ ءَ چہ شنگ بوتگیں بیان ءِ رد ءَ 7 ءُ 8 اکتوبر ءِ شپ ءَ دمگ ءَ جنگولانی ھست بوھگ ءِ بابت ءَ انٹیلی جنس ءِ اھوال ءِ پژدر ءَ آپریشن کتگ-

بیان ءِ تہ ءَ گوشگ بوتگ کہ ‘آپریشن ءِ وھد ءَ فورسز ءِ تیرگواری ءَ 19 جنگول بیران بوتگ انت۔’

بیان ءِ تہ ءَ گیش گْوشگ بیتگ کہ بلے ’ ترندیں تیرگواری ءِ تہ ءَ 39 سالی لیفٹیننٹ کرنل جنید عارف ءُ 33 سالی میجر طیب راھت گوں 9 دگہ کارندھاں بیران بوتگ اَنت۔‘‘ دوئیں فوجی افسر راولپنڈی ءَ گوں سیادی دار اَنت۔

آئی ایس پی آر ءِ رد ءَ ’دگہ 9 کارندہ نائب صبیدار اعظم گل، نیک عادل حسین، نائیک گل امیر، لانس نیک شیر خان، لانس نیک تالش فراز، لانس نیک ارشاد حسین، سپائے طفیل خان، سپائے عاقب علی ءُ سپائے محمد ھوار اَنت۔

ھُزدار ءِ تھسیل زھری ءَ پاکستانی پوج ءِ آپریشن ءَ دو ھپتگ ءَ چہ گیش برجاہ ءَ اِنت- چریشی ءَ دمگی ِآبادی تُرس ءِ آماچ-دمگ ءَ انٹرنیٹ، موباھل ءُ دگہ ھال اھوالی نزام گوستگیں بازیں روچ ءَ سرجمی ءَ بند اَنت، وھدے کہ تھی ءُ ڈن راہ یکشل ءَ بند اَنت چریشی ءِ سبب ءَ زھری دگہ بلوچستان ءَ چہ سندگ بیتگ-

دمگی اِھوالکار ءِ گوشگ اِنت کہ پوج ءِ کارندھاں کڈن کتگ کہ اگاں کسے کھول وتی سرجمیں مردم ، ھاسکار مردیناں بُنجل ءَ پیش کنگ ءَ بے سوب بیت اَنت گُڑا آیانی آسر شر نہ بنت- اے کڈن ءَ پد دمگ ءَ یک تُرسے وھدے بیتگ، وھدے کہ شھری وت ءَ مُھر سرپد بیگ ءَ نہ اَنت-

زھری ءِ جھمنندانی رِد ءَ بازیں لوگانی سر ءَ پیسر ءَ بیڑبرتگ ءُ بازیں مردمے آوار جتگ ءُ ناشناسیں جاھے ءَ برتگ اَنت، وھدے کہ زورانسری آوار جنی ءِ نشانگ کنگ بیتگ اَنت زالبول ھم ھوار اَنت-

زانگ بہ بیت کہ زھری ءَ پانزدہ ستمبر بُرزی اُرشانی آسر ءَ دو زالبولاں ھوار ھپت شھری بیران بیتگ اَنت، چریشی ءَ پد بیست ھپت ستمبر ءَ پوج ءَ جھلی لشکر کشی بندات کتگ، تنی وھدے بُرزی اُرشاں یازدہ شھریانی ٹپی بیگ ھال اِنت-

پاکستانی پوج ءِ نیمگ ء چہ زھری ءِ جتاجتائیں دمگاں چہ بازیں مردمے آوار جتگ ءُ بیگواہ کتگ اَنت وھدے کہ زھری بازار ءَ ھوار بازیں ھندانی سر ءَ پاکستانی پوج ءِ مزنیں کچے ءَ کارندہ ساڑی اَنت-

بلوچستان ءِ سیاسی ءُ انسانی ھکانی پارٹیاں اے درگت ءَ تُرس پدر کنان ءَ زوت لشکر کشی ءِ دارگ، بیگواہ کنگ بیتگیں مردمانی یل کنائینگ ءُ ھال اھوالی نزام ءِ پچ کنگ لوٹ کتگ-

بلوچستان ءِ دمگ کیچ ءُ پنجگور ءِ میانجی ءِ ھند بالگتر ءَ ناشناسیں سلاہ بندیں مردماں فرنٹیئر کور (ایف سی) ءِ یک بنجلے ءِ سر ءَ اُرش کتگ ۔

سرکار ءَ اُرش ءِ ھال راست کتگ ءُ گوشتگ سے پوجی مرتگ ءُ چار ٹپی بیتگ انت۔

دمگی ھالانی رد ےَ بیرانی توک ءَ بیرانی کساس گیشتر بوت کن انت-

سرکاری ھالانی رد ءَ ارش سے شمبے ءِ بیگاہ ءَ بیتگ ۔ ءُ اُرش کاراں گوں نوکین ءُ وتکاریں سلاھاں اُرش کتگ ۔

زانگ بہ بیت ھمے زوتیں ماھاں بلوچستان ءِ دگہ دگہ دمگاں پاکستانی لشکر ءِ سر ءَ اَرشاں گیشی گندگ بیتگ ۔

دومی نیمگ ءَ بلوچستان لبریشن فرنٹ ءِ جارکش میجر گوھرام بلوچ ءَ بالگتر ءَ پوج ءِ سر ءَ بیتگیں اُرش ءِ زمہ واری من اتگ ءُ گشتگ سرمچاراں پوجی بنجل دستیگ کتگ-

جارکش ءَ گوشتگ بلوچستان لبریشن فرنٹ (بی ایل ایف) ءِ سرمچاراں مرچیگیں بیگاہ ءَ ادار شش ءِ نزیک ءَ بالگتر ءَ تش ءِ ھند ءَ چائنہ پاکستان اکنامک کوریڈور (سی پیک) ءَ پاکستانی لشکر ءِ بنجل چاریں نیمگاں انگر ءَ گپتگ ءُ سے ادار ءِ جنگ ءَ رند سرمچاراں بنجل سرجم ءَ گپتگ ۔

جارکش گوھرام بلوچ ءَ گوشتگ سرجمیں اھوال زوت رسانکدراں شنگ کنگ بنت انت-

پاکستانی پوج ءِ زوراکی ءَ یکشل ءَ برجاہ ءَ اِنت یک نیمگے بیگواھیں مردمانی لاش دور دیگ بیگ ءَ اَنت ءُ دومی نیمگ ءَ زورانسری آوار جنی ءِ یکشل ءَ برجاہ ءَ اِنت ھمے وڑ کراچی ءُ بلوچستان ءِ جتاجتائیں دمگاں چار مردم آوار جنگ ءُ بیگواہ کنگ بیتگ اَنت وھدے کہ دگہ یک بیگواھیں مردمے ءِ لاش دزکپتگ-

گیشیں ھالانی رِد ءَ یک اکتوبر 2025 ءَ کراچی ءِ دمگ گلشن اقبال بلاک دہ ءَ سی ٹی ڈی ءِ کارندھاں بیڑبرتگ ھژدہ سالی ئیں نودربر مھران اشرف آوار جتگ ءُ گوں وت برتگ-

مھران ءِ سیادی بلوچستان ءِ دمگ کیچ ءِ ھند چہ آبسر ءَ گوشگ بیگ ءَ اِنت ءُ آ وانگ ءِ ھاتر ءَ کراچی ءَ جھمنند بیتگ-

ھمے وڑ پنچ اکتوبر 2025 ءَ کیچ ءِ بُنجاھی شھر تربت ءَ زور بازار ءَ یک پرپٹے گیریجے ءَ پجّار نہ بوتگیں سلاہ بندیں گاڑی سواراں بیڑبرتگ ءُ رھمت ھالکو زورانسری آوار جتگ ءُ گوں وت برتگ-

دومی نیمگ ءَ دو اکتوبر 2025 ءَ تربت ءِ دمگ گلشن آباد ءَ چیریں ادارھانی کارندھاں یک لوگے ءِ سر ءَ بیڑبرتگ کسان سالی ئیِ ممتاز ء صالح جھمنند دشت کاشاپ آوار جتگ ءُ بیگواہ کتگ-

ھمے وڑ پنچ اکتوبر 2025 ءَ تیاب دپی شھر گوادر ءِ دمگ کُلانچ ءِ ھند داندو ءَ پاکستانی پوج ءِ چیردستی ءَ کارکنوکیں ڈیتھ اسکواڈ ءِ کارندھاں ھامد بلوچ نامیں ورنایے آوار جتگ ءُ بیگواہ کتگ-

دومی نیمگ ءَ تھسیل بیسمہ ءَ چہ پتک قادرآباد ءَ سیادی داروکیں سی ھشت سالی ئیں محمد اعظم ء عبدالرحمان، کہ یک دکاندار ءُ تاجر ءِ دروشم ءَ زانگ بیتگ، یازدہ ستمبر 2025 ءَ وتی دکان ءَ چہ پاکستانی پوج ءَ آوار جتگ ءُ ناشناسیں جاھے ءَ برتگ-

چمّگدانی گوشگ اِنت کہ محمد اعظم پاکستانی پوج ءَ گاڑی ءَ نندارینتگ برتگ، ءُ اشی ءَ پد آئی ءِ ھچ وڑیں ھال سر نہ بیتگ- بلے شش اکتوبر 2025 ءَ کساس بیست پنچ روچ ءَ پد آئی ءِ تیرسُپتگیں لاش واشک ءَ گوورگی ناگ ءِ دمگ ءَ دزکپتگ-

زانگ بہ بیت اے یکیں وئیل نہ اِنت دو دھکاں گیش اِنت بیگواھیں مردمانی لاش دور دیگ بیگ ءَ اَنت برے ماں دروگیں میڑاں برے ماں ویرانگاں لاش دور دیگ بیتگ اَنت-

سندھ ءِ دمگ شکار پور ءَ جعفر ایکسپریس ءِ بمب تراکے ءِ نشانگ جوڑ کنگ بوتگ۔

پولیس ءِ گشگ انت تراک شکار پور ءِ دمگ سلطان کوٹ ءِ میتگ ءِ نزیک ءَ ریل ءِ ٹریک ءِ سر ءَ بوتگ کہ ایشی ءِ آسر ءَ چہ راولپنڈی ءَ شال ءَ رؤکیں جعفر ایکسپریس ءِ 4 بوگی ریل ءَ چہ در اتکگ انت۔

دیمترا آ گشتگ کہ تراک ھما وھد ءَ بوتگ کہ جعفر ایکسپریس سلطان کوٹ اسٹیشن ءَ چہ گوزگ ءَ بوتگ۔ تراک ءِ سبب ءَ ریلانی روگ ءُ آیگ بند بوتگ ۔

اے تراک ءِ زمہ واری بلوچ سلاہ بندیں آجوئی ءِ گل بلوچ ریپبلکن گارڈز ءَ زمہ واری زرتگ۔

بی آر جی ءِ جارکش دوستین بلوچ ءَ یک بیانے شنگ کتگ ءُ گشتگ کہ سرمچاراں ریل ھما وھد ءَ نشانگ کتگ کہ زورگیریں پاکستانی لوج ءِ کارندہ ریل ءِ تہ ءَ سفر کنگ ءَ بوتگ انت۔ اے تراک ءَ بازیں کارندہ بیران ءُ ٹپیگ بوتگ اَنت۔

جارکش ءَ گْوشتگ: بی آر جی اے اُرش ءِ زمہ واری ءَ من ایت ءُ اے وڑیں اُرش داں بلوچستان ءِ آجوئی ءَ برجاہ مان اَنت۔