بلوچستان ءِ دمگ کیچ ءَ پاکستانی پوج ءِ بنجل ءِ سر ءَ سلاہ بندیں مردماں اُرش کتگ ۔ اے اُرش ءَ سلاہ بندیں مردماں راکٹ ءُ دگہ سلاہ کارمرد کتگ اَنت۔
گوستگیں شپ ءَ ھوشاپ ءِ دمگ گونڈسرین ءَ سی پیک ءِ راہ ءِ پھریزگ ءِ ھاترا جوڑ کتگیں پاکستانی لشکر ءِ کیمپ ءِ سر ءَ سلاہ بندیں مردماں اُرش کتگ۔
دمگی اھوالانی رد ءَ اُرش کنوکاں گوں راکٹ ءُ دگہ مزنیں سلاھاں پورسز کیمپ ءِ سر ءَ اُرش کتگ ءُ ایشی ءِ آسر ءَ پورسز ءَ را تاوان ءِ ھال بوتگ۔
واکداراں اے درگت ءَ انگت ءَ ھچ وڑیں ھال دیم ءَ نیاؤرتگ انت-
جیکب آباد ءَ ریل ءں ٹریک ءِ سر ءَ تراک بوتگ کہ چریشی ءِ آسر ءَ جعفر ایکسپریس ءِ 6 بوگی ریل ءَ چہ ایر کپتگ اَنت۔ بلوچ ریپبلکن گارڈز( بی آر جی) ءَ زمہ واری من اتگ۔
پولیس ءِ بنشون ءَ گشتگ کہ اے وئیل ءَ ھچ وڑیں جانی تاوان نہ بوتگ۔ ریل ءِ ٹریک ءِ سر ءَ تراک ءَ پد سیکورٹی کارندھاں دمگ انگر کتگ ۔
پولیس ءِ بنشون ءِ رد ءَ تراک صدر پولیس اسٹیشن ءِ سیمسراں بولان پمپ ءِ دمگ ءَ بوتگ ۔ تراک ءَ زمین بازیں کچے ءَ ترک اتگ-
گوستگیں روچاں بلوچستان ءِ دمگ بولان مچھ ءَ ریل ءِ پٹری ءِ نزیک ءَ تراک بوتگ کہ ایشی ءِ آسر ءَ ریل ءِ کارندھے ٹپی بوتگ۔
بلوچ سلاہ بندیں آجوئی گل بلوچ ریپبلکن گارڈز ءَ جعفر ایکسپریس ءُ چاگی ریکو دیک پروجیکٹ ءِ کنٹینر ءِ سر ءَ اُرشانی زمہ واری زرتگ انت۔
گل ءِ جارکش دوستین بلوچ ءَ رسانکدر ءَ دیم داتگیں بیانے ءِ تہ ءَ گْوشتگ کہ بلوچ ریپبلکن گارڈز ءِ سرمچاراں مرچی جیکب آباد ءِ مویشی منڈی ءِ نزیک ءَ ریموٹ کنٹرول بمب تراکے ءَ چہ شال ءَ پنجاب ءَ روکیں جعفر ایکسپریس ٹرین نشانگ کتگ۔ تراک ءِ آسر ءَ ٹرین ءِ شش بوگی ریل ءِ پٹری ءَ لگوشتگ انت-
جارکش ءَ گوشت کہ جعفر ایکسپریس ءَ زورگیریں پاکستانی لشکر وتی کارندھانی روگ ءُ آیگ ءِ واستا کارمرد کنت، دیم ءَ مئے اُرش سک باز بنت۔
جارکش ءَ گیش گوشتگ گوستگیں روچ ءَ چاگی ءَ بلوچ ریپبلکن گارڈ ءِ سرمچاراں ریکو دیک کنٹینر ءِ سواریں گاڑی ءِ سر ءَ تیرگواری کتگ۔ اے اُرش ءَ گاڑی ءَ را سک باز تاوان رس اتگ۔
جارکش ءَ گیش گوشتگ کہ مئے گل اے اُرشانی زمہ واریاً منّ اِیت۔ مئے اے وڑیں ارش داں بلوچستان ءِ آجوئی ءَ برجاہ مان اَنت۔
بلوچ یکجھتی کمیٹی ءِ رھشون ڈاکٹر ماھرنگ بلوچ ءِ گھار نادیہ بلوچ ءِ رد ءَ مروچی دو شمبے ءِ روچ ءَ وھدیکہ آ ہدہ جیل ءَ وتی گھار ءِ گندگ ءَ ءُ وکالت نامہ ءِ سرا دزنشان جنگ ءَ شتگ گڈا جیل ءِ سپریڈنٹ ھمید اللہ پیچہی ءَ آ دزنشان جنگ ءَ نہ اشتگ ءُ آ بیھار داتگ ءُ بد رد کتگ ۔
نادیہ بلوچ ءَ گوشتگ کہ آ سھب ءِ دھ ءَ جیل ءَ ساڈی بوتگ ڈاکٹر ماھرنگ بلوچ ءَ وکالت نامہ ءِ سرا دزنشان جتگ بوتگ ءُ بس سپریڈنٹ ءِ مھر بچ اتگ بوتگ تاکہ کانودی کار سرجم بہ بنت بلے پدا ھم سریڈنٹ پہ زور کار نہ کتگ انت گڈسر ءَ آئی ءَ تچکی ءَ گوشتگ کہ من مھر یا دزنشان نہ جناں ۔
آئی ءَ دیمتر ءَ گوشتگ وھدیکہ سپریڈنٹ کانود ءِ باروا جست کنگ بوتگ گڈا آئی ءَ گوشتگ کہ آئی جی جیل ھانہ ءِ گوشگ ءَ ابید ھچ وڈیں کاگد دیم ءَ راہ دیگ نہ بیت ءُ آ ھچ وڈیں موکل ءَ ابید ھچ کت نہ کنت ۔
نادیہ ءَ گوشتگ کہ جیل ءِ واکداراں منی گوم ءَ درانسانی رویشت داشتگ ، مارا بار بار ترسینگ بوتگ ، بازیں پولیس ءِ آرگ بوتگ ءُ مئے موبائیل پچ گرگ ءِ جھد کتگ ۔ اے دراہ مئے ھاموش کنگ ءُ مارا چہ کانودی ھک دور دارگے جھدے بوتگ ۔
آئی ءَ گوشتگ کہ ھنوگیں سپریڈنٹ ریاست ءِ چیریں ادارھانی وش کنگ ءِ ھاتر ءَ ڈاکٹر ماھرنگ ءُ بی وائی سی ءِ ایندگہ رھشوناں دلسیاہ کنگ ءَ انت ، آیانی کھولاں ھم بیھار دیگ ءَ انت ۔
نادیہ بلوچ ءِ رد ءَ مارا گوشگ بوتگ کہ اگاں شما ھاموش نہ بوت ءِ گڈا شمے گوما شر نہ بیت ۔
نادیہ ءَ گوشتگ کہ ڈی جی آئی ایس پی آر ءِ ھنو ڈاکٹر ماھرنگ ءِ سرا جتگیں بھتام دراہ وتگڑین انت ۔ ڈاکٹر ءَ گوشتگ کہ اگاں کانود موکل بہ دنت گڈا پوج ءِ جارکش ءِ بگیری ءَ آ شرپ ءِ ارزی ءَ ھم نبشتہ کنت بلے ریاستی ادارہ آئی ءِ کانودی راہ ءَ اڈاند انت ءُ جیل ءِ تہ ءَ ھم آئی ءِ استحصال ءَ کنگ ءَ انت ۔
بلوچ یکجھتی کمیٹی ءِ بُنجاھی بیان ءِ تہ ءَ گشگ بوتگ کہ گل ءِ آرگنائزر ڈاکٹر مھرنگ بلوچ، مرکزی کمیٹی ءِ باسک بیبگر بلوچ، سبگت اللہ شاھجی، گل ءِ باسک بیبو بلوچ، گلزادی بلوچ، ءُ بلوچ سیاسی رھشون ماما گپار بلوچ ءُ چیرمین عمران بلوچ ءِ کیس آمیدگس جما کنگ بوتگ۔
آئی ءَ گْوشتگ کہ گوستگیں سئے ماہ ءَ بلوچ رھشون ءُ سیاسی کارکن ریاستی ادارھانی نیمگ ءَ ناجائز ءُ در آئینی بندیگ جاہ ءَ اَنت، کہ آ نوآبادیاتی دور ءِ جنجالی کانود ‘3MPO’ ءِ رد ءَ زندان ءَ دارگ بوتگ اَنت۔ بلوچ یکجھتی کمیٹی ءَ اے دزگیریانی ھلاپ ءَ کانونی ءُ ھمے رنگ ءَ سیاسی کارروائی کتگ ات، ءُ بلوچستان ھائی کورٹ ءَ دیم داتگ ات۔
آئی ءَ گْوشتگ کہ بلے بلوچستان ھائی کورٹ ءِ دو ججاں انساپ ءِ لوٹانی پیلو کنگ ءِ بدل ءَ صوبائی وتگڑیں سرکار ءُ ریاستی انٹیلی جنس ادارھانی دل ءَ وش کنگ ءَ بستار داتگ ءُ ایشی ءِ آسر ءَ اے کیس دو ماہ ءَ ھلاس کنگ بوتگ ءُ گُڈ سر ءَ رد کنگ بوتگ۔
بلوچ یکجھتی کمیٹی ءَ مزن آمیدگس ءِ اے پیسلہ ءِ ھلاپ ءَ آمیدگس ءَ درخواست داتگ۔ ما امیت کنیں کہ سپریم کورٹ ھکومت ءُ چیریں ادارھانی زور ءُ دزمانجنی ءَ چہ نادلگوش بہ بیت ءُ کانون ءُ انساپ ءِ رد ءَ پیسلہ دنت۔
بیان ءِ گڈسر ءَ گشگ بوتگ کہ ما اے گپ ءَ پدر کنیں کہ کانونی جھد ءِ ھمراھی ءَ مئے سیاسی جُنز ھم گیش ءُ گیوار بیت ءُ ما اے زلم ءُ زوراکی ءُ ناانساپی ءِ دیم ءَ ھچبر بے توار نہ بَہ اِیں۔
چہ بلوچ اسٹوڈنٹس ایکشن کمیٹی ءِ نیمگ ءَ نال ءِ دمگ گریشگ ءَ وانگی ءُ لبزانکی مراگشے نمیرانیں سنگت شعیب بلوچ ءُ ماسٹر وھاب ءِ یات ءَ برجم دارگ بیتگ۔ مراگش جتاجتائیں بھرانی تہ ءَ بھر بوتگ کہ آھانی تہ ءَ گُشتانک، پینل تران، کسمانک، ڈاکیومنٹری، زھگانی تران ءُ باوست، گام وانگ، پٹ ءُ پولی تاکانی وانگ، کتاب میڑہ ءَ ھوار شَیر ءُ شائری ہوار بیتگ اَنت۔
شنگ بیتگیں درشان ءَ گوشگ بیتگ مراگش ءَ بنجاھی سنگت مھمد بلوچ، جویریہ بلوچ ءُ فھد بلوچ ساڑی بیتگ اَنت۔مراگش ءِ بندات چہ بلوچ راجی سوت ءَ گوں کنگ بیتگ۔
مراگش ءَ ترانکاراں تران کنان ءَ گوشت کہ بلوچ کہ مدام یک ایردستیں زند ءِ گوازینگ ءَ اِنت آئی تہ ءَ بازیں وتسریں گپ ءُ باوستاں جاہ کُرتگ، ھمے گپ ءُ باوستاں چہ مئے راج ءِ بازیں مردمے سانمند بوان ءَ جتا جتائیں نادراھیانی آماچ انت۔ بزانکہ مئے راج ءِ تہ ءَ ھما مردم کہ اِستانی بیانیہ ءُ آئی ءِ گپ ءُ پالیسیاں وتی نازانتی ءِ بنیات ءَ وڑے نہ وڑے ءَ دیم ءَ برگ ءُ مھکم کنگ ءَ انت بزانکہ ھمے مردم بلوچ ءِ ایردستی ءِ دراجکشی ءَ ھوار انت۔ استان ءَ مارا گُشتگ کہ شما نا وانندگ ات نابلد اِت گڑا ما ھمے گپّاں راستی سرپد بوان ءَ آئی داتگیں بیانیہ زُرتگ ءُ گشتگ کہ وانگی اِنت۔ بلئے اے گپ نہ مارِتگ کہ چے وانگی انت ءُ چوں وانگی اِنت۔ یاکہ مئے مردم ھمے اُمیت ءَ وتی زھگاں وانین اَنت کہ باندا روچ مئے بچ مئے کمک بنت، بلئے بژن ھمدا بیت کہ مئے ورنا کہ وان انت گڑا وتی پجار، زبان، راج ءُ وتی مھلوک ءَ بے ھیال کن اَنت۔ نہ تھنا بے ھیال کن اَنت بلکیں وت ءَ ھمے زمہ واریاں چہ دور دارنت ءُ وتی زاتی اَنا ءُ سیتاں گوں ھمگرنچ بنت، ھمے چیز استانی لوٹاں سرجم کنگ ءِ وسیلہ جوڑ بنت۔ مئے راج ءِ ورنا ءُ ایدگہ مھلوک ءَ سرپد بوگ لوٹ ایت کہ مئے راجی زمہ واری، راجی لوٹ، سیاسی زرورت چے اَنت ءُ مارا چے کنگ لوٹ ایت-
مراگش ءَ دیمترا گپ کنان ءَ گشت اش کہ لھتے مردم کہ مرگ ءَ پد نازینگ بنت گڑا آیاں وتی زند گوں زات ءَ بندوک نہ کرتگ بگندئے راجی لوٹانی ھساب ءَ وتی زند اِش گوازینگ ءِ یک جھدے کُرتگ، مروچی مئے دیوان ءُ ڈسکیشنانی بھر اَنت۔
دیوان ءِ دیمتری بھر پینل ڈسکشن اَت کہ اے جتا جتائیں سرھالانی سر ءَ بھر اَت۔ پینل ڈسکشن ءِ مھماندار نور بلوچ بوتگ، مھمان نادر بلوچ، گوہرام بلوچ ءُ فوزیہ بلوچ بوتگ اَنت۔ سنگتاں نودربر سیاست، آئی ارزشت ءُ لوٹ ءُ مروچیگیں وھد ءَ نودربر سیاست، میڈیا ءِ ارزشت ءُ مروچیگیں لوٹاں گوں ھوار پروپیگنڈا، بیانیہ ءُ ڈسکورس ءِ سر ءَ گپ ءُ تران کُت۔ ایشاں ابید لس مھلوک ءِ سیاست ءُ سیاسی جاور ھالاں گوں ھوار ھوار استان ءِ کریک ڈاؤن، سیاسی پروگرامانی سر ءَ بندش ءُ ایدگہ جیڑھانی سر ءَ سنگتاں جوانیں وڑے ءَ گپ ءُ تران کرتگ۔
مراگش ءِ جتا جتائیں بھر یک یک ءَ سوبمندی ءَ گوں برجم دارگ بیت اَنت۔ گڈسری بھر سوگاتی بھر اَت کہ دیوان ءِ تہ ءَ ساڑی ئیں مھمان ءُ ایدگہ بھر زرتگیں مردمان ءَ کتاب سوگات کنگ بوت۔ مراگش ءِ تہ ءَ ھَندی نودربر، ورنا، استاد ءُ ایدگہ پِڑ ءِ مردماں بھر زُرتگ ءُ مراگش سوبمند کتگ۔
پاکستانی پوج ءَ سیاسی باسک دزگیر کتگ ءُ بیگواہ کتگ ات-
گیشیں اھوالانی رد ءَ بلوچستان ءِ بنجاھی شھر شال ءَ پاکستانی پوج ءِ دست ءَ دزگیری ءَ پد بیگواہ بیتگیں سیاسی باسک ناصر کمبرانی یل دیگ بیتگ-
ناصر کمبرانی ھمے سال ءِ 17 مارچ ءَ پوج ءَ چہ جند ءِ لوگ ءَ دزگیر کتگ ءُ پد ءَ بیگواہ بیتگ-
ناصر کمبرانی ءِ بیگواھی ءِ ھلاپ ءَ آئی ءِ کھول ءَ شال ءَ زھرشانی کتگ بیتگ ءُ ھمے وڑ ھیومین رائٹس کونسل آف پاکستان ءَ آئی ءِ بیگواھی ایر جتگ-
ناصر کمبرانی یل بیتگ ءُ وتی گِس ءَ سر بیتگ ءُ کھول ءَ ناصر کمبرانی یل بوگ ءِ ھال راست کتگ ءُ دراھیں مردمانی منت گپتگ ءُ گوشتگ کہ آیاں ناصر کمبرانی ءِ یل بوگ ءِ واستا توار چِست کتگ –
بلوچ ریپبلکن گاردز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی آر جی ءِ سرمچاراں گوستگیں شپ ءَ بلوچستان ءِ بُنجاھی شھر شال ءَ ھزارہ ٹاؤن ھند سر ءَ زورگریں پاکستانی پوج ءِ چیک پوسٹ دستی بمب اُرش ءَ نشانگ کتگ اَنت – اے اُرش ءِ آسر ءَ زورگریں لشکر ءِ یک کارندھے سک ٹپی بیتگ-
جارکش ءَ گْوشتگ کہ اُرش ءَ پد پاکستانی پوج ءُ پولیس کارندھاں سرجمیں دمگ انگیر ءَ کتگ سرچ آپریشن بندات کتگ وھدے کہ مئے سرمچار پہ سلامتی دراھگ ءَ سوبمند بیتگ اَنت-
.
جارکش ءَ گْوشتگ مئے گل اے اُرش زمہ واری ءَ منّ اِیت- مئے اے وڑیں اُرش بلوچستان ءِ وتواجھی ءَ تاں برجاہ بنت-
بلوچی زبان ءِ نامداریں گشندہ استاد مسلم ھمل ءِ کسان سالیں جنک گلزمین بلوچ گوستگیں شپ ءَ بیران بیتگ، ھدامرزی ءِ سیادی بلوچستان ءِ دمگ کیچ ءِ ھند بلیدہ ءَ بیتگ-
کھول ءِ رد ءَ گلزمین گوستگیں شپ ءَ ناگتی ترندیں تپے ءَ گپتگ بلے جاندراھی ءِ ھاسیں آسراتی ءِ نہ بوگ ءَ آئی ءَ ساہ داتگ انت- آئی ءِ بیرانی ءِ سر ءَ بلیدہ ءَ ھوار بلوچستان ءَ لبزانکی ءُ چاگردی تکاں سکا ترندیں گم ءُ رنج سما کنگ بوگ ءَ انت-
گلزمین بلوچ استاد مسلم ھمل ءِ کستریں جنکیں زھگ بوتگ آئی ءِ ودی بوگ ھبدہ سال ءِ دراجیں مدتے ءَ پد بوتگ – آئی ءِ ناگمانی مَرگ ءَ کھول یک ترندین دردناکیں گمے ءِ آماچ کتگ-
بلوچ کواس، چاگردی ءُ دودمانی تکاں استاد مسلم ھمل ءِ گون ءَ پدردی ءِ درشان کنگ یکشل ءَ برجاہ انت ءُ چاگردی ترامجاھاں کلو دیگ ءَ انت-
بلوچستان ءِ دمگ کیچ ءِ بنجاھی شھر تربت ءَ ناشناسیں سلاہ بندیں مردمانی تیرگواری ءَ سلاہ بھا کنوکیں عاقب شکاری بیران بیتگ۔
اھوالانی رد ءَ عاقب چہ وتی گس ءَ درکپتگ ءُ تربت شھر ءِ نیمگ ءَ روگ ءَ بیتگ کہ ناشناسیں سلاھبنداں آ نشانگ جوڑ کتگ ۔ ٹپیگیں جاوراں آ پہ دوا ءُ درمان ءِ ھاتر ءَ تربت ٹیچنگ ھسپتال ءَ برگ بوتگ بلے آئی ءَ وتی ٹپیانی درد نہ سگ اتگ ءُ ساہ داتگ انت-
بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ مئے سرمچاراں پانزدہ جون دوھزار بیست پنچ سُھب ءِ دہ نزیک ءَ ملٹری چاریگ دنیا خان مری بلوچ چُکچینی ءَ ھمگرنچ بیگ سر ءَ مرگ پرمان دیگ ءَ پد آئی ءِ سر ءَ کار کتگ-
جارکش ءَ گوشتگ دنیا خان سرمچاراں بی ایل ایف ءِ چیریں ونگ ءِ ھالانی سر ءَ شش جون شپ نُھ ءَ بارکھان، بگاؤ ءَ وئیل آئی ءِ لوگ سر ءَ راجی میارباری ءَ دزگیر کتگ-
جارکش ءَ گوشتگ جُست ءُ پُرس ءِ میان ءَ راجی میارباری ءَ زورگریں پاکستانی پوج ءِ ھمراھی ءَ بلوچ ورنایانی درکانودی کوش زورانسری آوار جنی ءِ کمکاری کنگ، پوجی لشکر کشی ءِ میان ءَ بلوچ راج ءِ لوگانی نشانگ کنگ ءُ سرمچارانی چاریگی کنگ ءِ منّ اِتگ ءُ وتی سرجمیں نیٹ ورک ڈیٹا گل ءَ داتگ-
جارکش گوشتگ ملٹری چاریگی دنیا خان مری ءِ درگت ءَ دزکپتگیں سرپدی رسانکدر ءَ ھما وھد ءَ دیم ءَ کار ایں وھدے گل اے نیٹ ورک ءَ چہ ھمگرنچیں سرجمیں ٹولی ءَ ھلاس کن ایں-
جارکش ءَ گْوشتگ بلوچستان لبریشن فرنٹ بارکھان ءُ آئی ءِ کش گوراں پاکستانی پوج ءِ گوم ءَ بلوچ چُکچینی ءَ ھمگرنچ آئی ءِ سرجمیں چاریگانی رسانکدر ءَ چہ کڈن کن ایں کہ راجی زرمبشت آجوئی ءُ بلوچ راج ءِ ھلاپ ءَ دُژمن ءِ گوم ءَ کمک کنگ، چاریگی ءَ ھوار راجدروھی ءَ یل بکن اَنت گل ءَ آؤکیں وھد ءَ زمانت بدے اَنت اگاں ناں گل اے سرجمیں کردارانی ھلاپ ءَ تُرندیں کاروائی ءِ کنت کہ بلوچ زرمبشت ھلاپیں پُرکاریں ءُ چُکچینی ءِ مراگشاں دُژمن ءِ چریک جوڑ بیتگ اَنت-
جارکش ءَ گوشتگ دگہ یک کاروائی یے ھُزدار ءِ دمگ وڈھ ءَ پانزدہ جون شپ ءَ سرمچاراں وڈھ بازار ءَ برجاہ صادق ھوٹل ءِ نزیک ءَ یوپون موباھل ٹاور سر ءَ اُرش کتگ ءُ ٹاور مشینری ءَ ھوار سولر سسٹم مانداشتگ اَنت-
جارکش ءَ گوشتگ بی ایل ایف ءِ اے دوئیں اُرشانی زمہ واریاں منّ اِیت-
