زھری ءِ گوات ءِ وشبویں آشوب
نبشتہ کار: دلشان بزدار
سیمی بھر
دی بلوچستان پوسٹ
بیگاہ ءِ روچ ءِ رولہ ایر بکان اَت آزمان سُھریاں مانپوش اِتگ اَت زھری ءِ دلبند ءَ دنزانی باتن چِست اِت اَنت دمک ءُ دراں یک اجب ڈولیں توارے چِست اَت مھلوک نی اے رندی بے توار نہ اِت اَنت، سُٹ سُٹک ءَ اِت اَنت اولی رند اَت کہ یک لبزے دلاں دراتکگ اَت “مئے زمین ”-
زھری ءِ چار راہ ءِ سر ءَ مھلوک مُچ اِت اَنت، مردین، زالبول، زھگ ءُ کماش درست یکجاہ اِت اَنت میان ءَ کوھنیں اسکول اَت کہ آئی ءِ دیوالانی چَک ءَ ماسی نوری ءَ بس دو لبز نبشتگ کتگ اَت کہ “ یات بہ کن اِت”-
مھلوک ماسی نوری ءِ کش ءُ گوراں مُچ اِت اَنت ءُ ھمے میان ءَ یک ورنایے ءَ درائینت کہ ماسی اگاں زمین مئیگ اِنت گڑا لدیگاں پرچا کاگد ءُ مھر آؤرتگ اَنت؟ آیانی گور ءَ دزرند ھست ءُ ما بس ھاک ءِ نشان ءَ پدر ایں-
ماسی نوری ءَ دست زمین ءَ جت اَنت ءُ پنجوے ھاک چِست کت ءُ گوشت اے شمئے مُھر اِنت ءُ دزرند اِنت- پرک ایش اِنت کہ تو وتی یات گار کتگ اَنت اگاں شمارا وتی زمین لوٹ اِیت گڑا وتی یاتاں واتر بہ کن اِت-
مھلوک ماسی نوری ءِ گپاں گوشدارگ ءُ بے توار بوت اَنت ءُ پد ءَ ھمے میان ءَ یک پیر زالیں ماتے ءَ جست کت اگاں یات بھا کنگ بہ بنت گڑا؟ ماسی نوری ءَ گوشت ھاں ماتی وھدیکہ تو زلم ءِ ھلاپ ءَ راستی ءِ گشتانکاں یل بہ کن ئے گڑا تو بزاں وتی یات بھا کتگ اَنت-
ھمے شپ ءَ ماسی نوری ءَ زھری ءِ جنک درست لوٹائینت اَنت ءُ اسکول ءِ دیم ءَ چراگ روک کتگ اَت زمین ءِ مِسکیں ھاک اَت ءُ جنک گول گول ءَ نشتگ اِت اَنت ءُ ماسی نوری ءَ یک کوھن ءُ دنزاں گپتگیں کاپی ءِ کش اِتگ اَت کہ آئی ءِ اولی تاک ءِ سر ءَ نبشتگ اَت “ آشوب ءِ بنداتی پدانک یات اِنت”-
ماسی نوری ءَ دیوان ءَ گشتانک دیان ءَ گوشت شما درست وتی پت ءُ پیرُکی زمین ءِ بارو ءَ نبشتگ کن اِت ھرکس یات نہ کنت آ ھچبر مَٹ بوت نہ کنت ما توپک ءَ گوں جنگ نہ کن ایں ما یاتاں گون جنگ کن ایں-
گراناز درستاں گیشتر ھوبناکیں جِنک اَت آئی ءَ درائینت اگاں آ توپک بیار اَنت گڑا؟ ماسی نوری ءَ چَم چِست کت اَنت ءُ گوشت “ ما کتاب ءَ چِست کن ایں ”- توپک جسم ءَ جَنت ءُ کتاب یاتاں پَچگڑین اِیت اگاں ھرکس یات بہ کنت آئی ءَ ھچ کس پروش دات نہ کنت-
دومی روچ ءَ دمگ ءِ ٹکی سردار میرو گوں وتی سپاھی ءُ نپر ءُ چاکراں اتک ءُ زھری ءِ میان ءَ ترند ترند ءَ گوشگ ءَ لگ اِت کہ اے زمین نی سرکار ءِ نام ءَ اِنت ھرکس ءَ ایراد گپت گڑا جیل ءَ یا بیگواھی ءِ واستا تیار بہ بیت-
مھلوک ءَ سردار میرو ءِ برانز ءُ ترندیں توار ءِ اشکنگ ءَ پشتکنزی کت بلے ماسی نوری دیم ءَ جنز اِیت ءُ آئی ءِ دست ءَ توپک نیست اَت یک کوھنیں کتابے اَت آئی ءَ گوشت اے زمین سرکار ءِ نہ اِنت راجدپتر ئیگ اِنت ءُ راجدپتر گوش اِیت یات کنوکیں مردم ھچبر گلام نہ بنت-
سردار میرو ءَ وتی بروت تاب دات اَنت ءُ کندگ ءَ لگ اِت چہ کتاب ءَ آشوب آرگ بیت؟
ماسی نوری ءَ پسھی ءَ پسو دات کہ اے کتابے نہ اَنت اے آدینکے ءُ تو وھدیکہ ایشی ءَ گندئے گڑا ترا وتی بربادی ایشی ءِ توک ءَ گندگ ءَ کیت اِنت-
سردار میرو زھر گپت ءُ وتی سپاھیاں ھکم ئِے دات کہ دیم ءَ بہ جنز اِت بلے اے رندی مھلوک ءَ پشتکنزگ ءَ ابید دیم ءَ جنزگ ءَ لگ اِت اَنت ھمے جاہ ءَ گراناز ءَ گوشت ما یات کتگ ءُ نی ما یات نہ کن ایں میتگ ءَ اولی رند ءُ یکیں اوگام چِست بیت اے زمین مئے پت ءُ پیرُکی زمینے ءُ مارا یات بیت اِنت-
ھمے اوگام داں کوھاں سر بوت ءُ ھنچش سما بوت کہ وپتگیں مھلوک چہ واب ءَ پاد کنگ بیت – ماسی نوری ءَ چم چِست کت ءُ گوشت ماہ دراتک ءُ آس چِست بیتگ بلے اے آس داں ھما وھد ءَ روژنا بیت دانکہ یات زندگ اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
