TBP Balochi

ڈاکٹر ماہ رنگ بلوچ، شاہ جی صبغت اللہ ءَ ھوار دگہ بندیگیں رھشونانی درکانودی بندیگ ھلاپ ءَ میانی استمانی دلگوش گور کنگ جُھد-

تربت ءَ بلوچ یکجھتی کمیٹی ءِ نیمگ ءَ چہ ڈاکٹر ماہ رنگ بلوچ، شاہ جی صبغت اللہ، بیبو بلوچ، بیبگر بلوچ ءَ ھوار دگہ بیگواھیں رھشونانی دزگیری ءِ ھلاپ ءَ جتگیں سے روچی چیدگی شُدکشیں ھڑتالی بُنجل آسر بیتگ-

آسری ءَ تربت ھنکین نیمگ ءَ چہ یک پریس کانفرنسے کنگ بیتگ کہ اود ءَ گوشگ بوتگ کہ اے زھرشانی میان استمانی ءُ انسانی ھکانی ادارہ بلوچستان ءَ برجاہ گیرآئینی گامگیج ءَ سرپد کنگ یک سنجیدھیں جُھدے بیتگ-

پریس کانفرنس ءَ تربت ھنکین جارکش ءَ اے اِھد کتگ کہ پُرایمنیں زھرشانیانی درچ تاں ھما وھد ءَ برجاہ بنت دانکہ بندیگیں رھشون کانودی ءُ آئینی ھساب ءَ آمیدگس ءَ پیش کنگ نہ بنت ءُ آیانی یل کنگ دلجمی ندے اَنت-

سے روچی شُدکُشیں ھڑتالی بُنجل ءَ یکجھتی ءِ درشان کنگ واستا جتاجتائیں سیاسی پارٹیانی رھشونانی نمائندگ کہ آیانی تہ ءَ نیشنل پارٹی، بلوچستان نیشنل پارٹی ( مینگل) سول سوسائٹی، وکیل، انسانی ھکانی کارکنان، دمگی نودربر، زالبول ءُ رسانکدر ءِ نمائندگانی مزنیں کچے ءَ بھر زرتگ-

جارکش ءَ گوشتگ یکجاھی واستا آؤکیں سرجمیں سیاسی پارٹیاں، ادارھاں ءُ مردمانی منت گپتگ ءُ گوشتگ کہ راجی پلامرزی ھما توانمندی اِنت کہ ایردست ءِ توار ءَ تاکت دنت – آیاں دیمتر ءَ ھم کمک ءِ اُمیت زاھر کتگ-

اِھوالکار رِد ءَ بی وائی سی ءِ شُدکشیں ھڑتال ءِ میان ءَ ھکومت بلوچستان نیمگ ءَ چہ یک تھریٹ الرٹ شنگ کتگ اَنت آئی ءِ تہ ءَ بی وائی سی ءِ سروک سمی دین بلوچ ءُ ڈاکٹر صبیحہ بلوچ ءَ ناشرکاریں گل لشکر خراسان نیمگ ءَ نشانگ کنگ تُرس پدر کتگ- اے تھریٹ الرٹ ءَ شُدکشیں ھڑتالی بُنجل سر ءَ گمانی بمب یا کہ وتکش تراک اُرش ءِ بیھار ھم ھوار بیتگ-

اے ھالاں ابید تربت ءَ بُنجل پُرایمنی ءَ گوں برجاہ بیتگ ءُ اشی ءَ ھواریں مردماں تُرس ءِ ماھول رد کنان ءَ زھرشانی وتی جمھوری ھک گوشتگ-

بی وائی سی ءِ گوشگ اِنت کہ اگاں ھکومتی ھساب ءَ سیکیورٹی دیگ ءِ ٹاہ جنگ بیتگ بلے زمینی ھساب ءَ انتزامیہ نیمگ ءَ چہ بے پرواھی ءَ بازیں جُستے ایر کتگ-

بی وائی سی تربت ءِ رھشوناں پریس کانفرنس ءِ دیمتر ءَ گْوشتگ کہ شُدکشیں ھڑتال بُنجاھی شیڈول رِد ءَ کنگ بیتگ ڈاکٹر ماہ رنگ ءً ھوار رھشونانی دزگیری ءِ ھلاپ ءَ زھرشانی مھم بلوچستان ءِ آ دگہ دمگاں ھم کنگ بیت دانکہ میانی اسمتانی زمیر پاد کنگ بہ بیت-

پریس کانفرنس ءِ گُڈی ءَ گوشگ بیتگ کہ بلوچستان ءَ ورنایانی تہ ءَ شئور ھست ءُ آئینی ءُ انسانی ھکانی ھاتر ءَ پُرایمن جُھد ءَ وتی یکیں راہ سرپد بنت- بندیگیں رھشونانی یل کنائینگ ھاتر ءَ کانودی، جمھوری ءُ سپارتی اِھولکار ءِ کارمرزی ءَ برجاہ دار ایں-

زانگ بہ بیت کہ بی وائی سی ءِ زھرشانی بُنجل ءِ پُشدر ءَ کاؤنٹر ٹیررزم ڈیپارنمنٹ کیچ ءَ تربت سول سوسائٹی ءِ کنوینر گلزار دوست ءُ وسیم سفر ءِ وارنٹ دزگیری شنگ کتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں کلات ءَ یکشلیں اُرشاں زورگریں پاکستانی پوج سک تاوان ءِ دیمپان کتگ پانزدہ کارندہ کشتگ اَنت- اے اُرشاں آئی ای ڈی ءُ تچکی ءَ اُرش ھوار اَنت-

جارکش ءَ گْوشتگ کہ بی ایل اے ءِ سرمچاراں مروچی کلات ءِ دمگ منگچر ڈیم ءِ نزیک ءَ زورگریں پاکستانی لشکر ءِ کارندہ ھما وھد ءَ ریموٹ کنٹرول آئی ای ڈی اُرش ءَ نشانگ کتگ اَنت وھدے آ دُژمنیں پوج ءِ کاروان ءَ سیکیورٹی دیگ ھاتر ءَ ھداروکی سنگر ءَ سر بیتگ اَنت، اود ءَ سرمچاراں پیسر ءَ چہ تراکناکیں شورو چیر کتگ-تراک آسر ءَ دُژمنیں پوج ءِ دو کارندہ جاہ پہ جاھی مرتگ اَنت-

جارکش ءَ گْوشتگ اے ھند سر ءَ سرمچاراں زورگریں پوج ءِ کارندہ دومی آئی ای ڈی اُرش ءَ ھما وھد ءَ نشانگ کتگ اَنت وھدے آ یک جاھے مُچ بیتگ اَنت- تراک ءِ آسر ءَ شش کارندھانی تہ ءَ دو جاہ پہ جاھی مرتگ اَنت ءُ چار سک ٹپی بیتگ اَنت-

جارکش ءَ گْوشتگ ھمے وڑ بلوچ لبریشن آرمی ءِ سرمچاراں کلات ءِ دمگ موڑگند ءِ نزیک ءَ مکئی ءِ ھند سر ءَ زورگریں پاکستانی پوج ءِ کاروان سیکیورٹی واستا ھداروکی سنگراں سر بیتگیں کارندہ آئی ای ڈی اُرش ءَ نشانگ کتگ اَنت چریشی ءَ دو جاہ پہ جاھی مرتگ اَنت-

جارکش ءَ گْوشتگ کہ سرمچاراں دمگ ءَ کلئیرنس ءَ دلگوشیں زورگریں پاکستانی پوج ءِ یک گاڑی یے ھم سرمچاراں ریموٹ کنٹرول آئی ای ڈی اُرش ءَ نشانگ کتگ اَنت چریشی ءِ آسر ءَ گاڑی سرجم ءَ تباہ بیتگ ءُ اشی ءَ سوار سرجمیں چاریں کارندہ مرتگ اَنت-

جیئند بلوچ ءَ گْوشتگ کہ اے دمگ ءَ پیشکدمی کنوکیں زورگریں پاکستانی پوج ءِ پرپٹ ءُ گاڑیانی ھمگرنچیں کاروان سر ءَ سرمچاراں بستگ ءُ اُرش کتگ- زورگریں پوج ءِ یک گاڑی یے سرجمی ءَ اُرش ءِ زد ءَ اَتکگ چریشی ءِ آسر ءَ دُژمنیں پوج ءِ سے کارندہ جاہ پہ جاھی مرتگ اَنت ءُ دو سک ٹپی بوتگ اَنت-

درشان ءِ گُڈی ءَ بلوچ لبریشن آرمی ءَ اے سرجمیں اُرشانی زمہ واری منّ اِتگ اَنت، ءُ دُژمنیں پوج سر ءَ اُرشانی دْرچ ءَ برجاہ دارگ اِھد کن ایں-

بلوچستان ءِ دمگ کردگاپ سلاہ بنداں کنٹرول کتگ، بنجاھی شھدگ جتاجتائیں جاھاں بند کتگ-

گیشیں اھوالانی رد ءَ سلاہ بنداں ٹوھیں کچے ءَ شال ءُ تپتان ءِ مزن شھدگ جتا جتائیں جاھاں بند کتگ ءُ ”کردگپ“ ءِ شھر کنٹرول کتگ-

ھمے وھد ءَ لیویز پولیس اسٹیشن دستیگ کنگ بیتگ انت ، سرکاری گاڑی ، سلاہ ءُ دگہ سامان برتگ ءُ پد ءَ پولیس اسٹیشن آس دیگ بوتگ ، ھمے وھد ءَ نادر ءِ کارگس ھم ماندارگ بوتگ ءُ سرکاری کمپلیکس ءِ سر ءَ وتی دست ءِ گرگ ءَ پد سلاہ بندیں مردماں سرکاری ریکارڈ گوں وت برتگ اَنت ۔

گڈی اھوالانی رد ءَ سلاہ بندانی ناکہ بندی ءُ پٹ ءُ پول برجاہ انت-

بلوچ ریپبلکن گارڈز ءِ جارکش دوستین بلوچ ءَ ماں رسانکدر ءَ وتی شنگ کتگیں درشان ءَ گوشتگ کہ بی آر جی ءِ سرمچاراں جھل مگسی ءِ ھند گنداواہ ءَ سرکار ءِ چیردستی ءَ دگ ءَ کار کنوکیں لشکری بند ءُ ساچی شرکت گوں بمب ءَ نشانگ کتگ۔تراک ءِ آسر ءَ شرکت ءَ کار کنوکاں جانی ءُ مالی تاوان بوتگ۔

آئی ءَ گوشتگ کہ ما ٹیکداراں کڈن کن ایں کہ آ چہ ریاستی شوربندیاں وت ءَ دور بہ دار اَنت۔ اگاں نا گڑا وتی جانی ءُ مالی تاوان ءِ زمہ وار وت بہ اَنت۔

دوستین بلوچ ءَ اُرش ءِ زمہ واری من اِتگ ءُ گوشتگ کہ مئے اے وڑیں اُرش داں بلوچستان ءِ آجوئی ءَ برجاہ بنت انت۔

بلوچستان ءِ دو جتا جتائیں جاھاں پوج ءُ کمپنیانی سر ءَ سلاہ بندیں مردمانی نیمگ ءَ بمب اُرش کنگ بیتگ انت-

اھوالانی رد ءَ جھل مگسی ءِ دمگ گنداواہ ءَ آئی ای ڈی اُرشے بیتگ-

ایس پی جھل مگسی ءِ رد ءَ دگ ءِ کش ءَ ناشناسیں مردماں بمبے تراکینتگ کہ اود ءَ بند ءُ ساچی شرکت انت-

تراک ءَ دگہ جاھانی تاوان نہ بیتگ انت-

ھمے وڑ ءَ بلوچستان ءِ دمگ کلات ءَ پوج پنچ تراکانی نشانگ کنگ ءِ ھواری ءَ سنگر گپتگیں مردماں نشانت کتگ کہ چریشی ءَ بازیں کچے ءَ پوج ءَ جانی ءُ مالانی تاوانانی دیمپانی انت ءُ واکداراں بیرانی ھال راست کتگ-

کلات ءِ دمگ منگچر ڈیم ءَ پاکستانی پوج ءِ سر ءَ سَے بمب تراک کنگ بیتگ انت-

اھوالانی رد ءَ پاکستانی پوج ءِ کاروان پیشگامی کنگ ءَ بیتگ کہ کاروان ءَ ھواریں گاڑیانی سر ءَ بمب تراکے بیتگ پد ءَ پورسز ءَ پھازوکیں سنگر ءِ سر ءَ تراکے بیتگ پد ءَ سیمی تراک ھما وھد ءَ بیتگ کہ پوج یکجاہ ءَ مُچ بوتگ انت –

تراک ءَ ھشت کارندھانی بیران ءُ زدگ بوگ ءِ ھال انت بلے لشکری بنشون ءَ دو کارندھانی مرگ ءُ چار ءِ زدگ بوگ ءِ ھال راست کتگ انت-

ھمے وڑ ءَ کلات ءِ دمت شیخڑی ءَ ھواریں دمگ مورگند ءِ ھند ءَ پاکستانی پوج یک ترندیں اُرشے ءِ نشانگ کنگ بیتگ-

اھوالانی رد ءَ پاکستانی پوج ءِ بمب ڈسپوزل اسکواڈ ءِ پندی کارندھانی سر ءَ بمب تراک ءِ بوگ ءَ پد پورسز ءِ گاڑی ءِ سر ءَ دومی تراک بیتگ ءُ چریشی ءَ گاڑی ءُ پرپٹ ءِ کاروان ءِ سر ءُ سنگر گپتگیں مردماں ٹوھیں کچے ءَ اُرش کتگ-

داں انگت ءَ اے دوئیں اُرشانی زمہ واری کس ءَ پہ وت ءَ نہ زرتگ انت-

بلوچستان ءِ دمگ کیچ ءُ بولان ءَ پاکستانی لشکر ءِ سُر ءُ پرانی توک ءُ گیشی اتکگ انت ءُ لشکر گوں مزنیں جنگی ساماناں دیم ءَ روگ ءِ اھوال انت۔

ھالانی رد ءَ پاکستانی لشکر ءَ کیچ ءِ دمگ دشت ءِ کوھی دمگ سیاجی کوہ ءِ نیمگ ءَ لشکر کشی برجاہ انت ۔ تراک ءُ تیر گواری ءِ توار بوتگ۔

دمگی مردمانی رد ءَ گوستگیں روچ ءَ سھب ءَ پاکستانی لشکر ءَ آپریشن بندات کتگ ءُ بیگاہ ءِ وھد ءَ تیرگواری ءُ تراکانی توار اِش کنگ بوتگ انت کہ چہ ایشی ءَ زانگ بیت کہ لشکر ءُ سلاھبندانی میان ءَ جنگ ءُ چوپ بیتگ انت۔

بلے اے درگت ءَ چہ واکداراں ھچ وڑیں اھوال درشان نہ کتگ انت۔

ایشی ءَ ابید پاکستانی لشکر ءِ مزنیں کساسے بولان ءِ دمگ مچ ءِ بنجاھی بنجل ءَ سر بوتگ۔ اے گپ ءَ چہ دمگ ءَ لشکری ​​آپریشن ءِ ترس ودی بیتگ۔

زانگ بہ بیت بلوچستان ءِ بازیں دمگاں پاکستانی لشکر کارروائی کنگ ءَ اَنت کہ اود ءَ لشکر ءُ سلاھبندیں مردمانی نیام ءَ ھم جنگ ءُ چوپ بوتگ اَنت۔

زانگ بہ بیت کہ اے دمگی مھلوک ءِ تہ ءَ ترس ءُ بیم ھم ودیتگ انت۔ آیاں یک رندے پد ءَ اے ترس ءِ درشانی کتگ کہ اے لشکر سلاہ بندیں مردمانی ھلاپ ءَ آپریشن ءِ نام ءَ دمگی مردماں تاوان بہ دنت ءُ مردم مزنیں کساسے ءَ زوراکی ءَ بیگواہ کنگ ءِ ترس ءَ انت-

گوستگیں شپ ءَ ھزدار ءِ دمگ زھری چشمہ ءَ ناشناسیں اُرش کنوکاں خضدار ءِ ڈسٹرکٹ چیئرمین ءُ نواب ثنا اللہ زھری ءِ نزیکیں سنگت صلاح الدین زھری ءِ لوگ ءِ سر ءَ گوں دزبمباں اُرش کتگ۔ دز بمب تراک ءِ ھمراھی ءَ اُرش کنوکاں ترندیں کساسے ءَ تیرگواری ھم کتگ۔

دمگی مردمانی رد ءَ اے ویل شپ ءِ دیر ءَ بوتگ کہ ناشناسیں مردماں صلاح الدین زھری ءِ لوگ نشانگ جوڑ کتگ۔

اُرش ءِ وھد ءَ چیئرمین وت لوگ ءَ نہ بوتگ ھمے سبب اِنت کہ آ اُرش ءَ چہ رک اتگ۔

انگت ءَ اے اُرش ءِ مول ءُ مراد زانگ نہ بیتگ انت ءُ انگت ءَ کس ءَ اے اُرش ءِ زمہ واری نہ زرتگ۔

مستونگ ءَ سلاہ بندیں مردماں یک کاروائی ءِ میان ءَ اینٹی نارکوٹکس افسر میر سلطان احمد زھری دزگیر کتگ آئی ءِ سرکاری سلاہ ءُ گاڑی وتی دستیگ کتگ ءُ پد ءَ اپسر یل داتگ-

گیشیں ھالانی رِد ءَ میر سلطان احمد زھری کہ ایکسائز ٹیکسیشن ءُ اینٹی نارکوٹکس ءِ اپسر اَنت، سلاہ بندیں مردماں اپسر یرگمال کتگ ءُ آیانی سرکاری سلاہ ءُ گاڑی برتگ اَنت ءُ پد ءَ آ کمو رند یل داتگ-.

اے دمگ ءَ بلوچ آجوئی لوٹوکیں سلاہ بندیں ٹولی پُرکار اَنت ءُ ریاستی پوج ءُ ادارھاں نشانگ کنگ ءُ آیگ ءَ اَنت، بلے تنی وھدے اے وئیل زمہ واری انگت ھچ گل ءَ نہ زرتگ-

بلوچستان ءِ دمگ مستونگ ءَ زورانسری آوار جنی ءِ ھلاپ ءَ زھرشانی نندانک ءَ چہ دوازدہ اداراں برجاہ، چریشی ءِ سبب ءَ کراچی – شال شھدگ غلام پڑینز ءِ ھند سر ءَ ھرچ وڑیں گاڑیانی روگ ءُ آیگ بند کنگ بیتگ-

زھرشانی کنوکانی گوشگ اِنت عزیز الرحمن ء ٹکری سفر خان زورانسری بیگواہ کتگ، کہ آئی ءِ ھلاپ ءَ کھول ءُ دمگی مردم زھرشانی کنگ ءَ اَنت- نندانک ءَ زالبول، کماش، شھری ءُ چُک ھوار اَنت-

واکدار نیمگ ءَ چہ زھرشانی ءَ کنوکاں گوں گپ ءُ دیوان دو رند ءَ بے سوب بیتگ- کھول ءَ تچک کتگ دانکہ عزیز الرحمن یل کنگ نہ بیت، زھرشانی ءَ ھلاس نہ کن ایں-

نندانک ءَ نشتگیں مردمانی گوشگ اِنت کہ دمگی انتزامیہ نیمگ ءَ زھرشانی ھلاس کنگ دروشم ءَ لَٹ ءُ کُٹ ءِ بیھار دیگ بیگ ءَ اِنت- اے جاورانی سر ءَ پدکرد کنان ءَ کھول ءَ مکن کتگ نہ اگاں نندانک ءَ نشتگیں مردماں کجام وڑیں جانی ءُ مالی تاوان رس اِنت، گُڑا اشی ءِ زمہ واری ڈپٹی کمشنر مستونگ، اسسٹنٹ کمشنر، ڈی ایس پی ءُ ایس ایچ او سر ءَ بنت-

بلوچ یکجھتی کمیٹی کیچ زون نیمگ ءَ چہ بیگواھیں مردمانی یل کنائینگ، راھشونانی درکانودی بندیگجاہ بندیگ کنگ، آمیدگسی نا انساپی ءُ بلوچ چُکچینی ءِ ھلاپ ءَ تربت پریس کلب دیم ءَ برجاہ سی روچی شُدکشیں ھڑتالی بُنجل ءَ مروچی دومی روچ ءَ ھم برجاہ ءَ اِنت-

بُنجل ءِ نشتگیں مردمانی رِد ءَ بی وائی سی ءِ زھرشانی بُنجل ءَ سے رند ءَ جتاجتائیں وئیلانی سبب ءَ تاوان دیگ جُھد کتگ-

زھرشانی کنوکاں کڈن کتگ کہ اگاں کجام شھری ءَ بُنجل ءَ بیوکیں وئیلانی میان ءَ تاوان ءُ ٹپی کنگ بیتگ گُڑا آئی ءِ سرجمیں زمہ واری پولیس ءُ دمگی انتزامیہ سر ءَ بیت-

اے میان ءَ بی وائی سی کیچ زون ءَ یکرندے پد ءَ وتی لوٹان دیم ءَ آورتگ ءُ لوٹ کتگ کہ گل ءِ رھشوناں زوت یل کنگ، بلوچ چُکچینی ءَ بند کنگ زورانسری آوار جنی ءَ ھلاس کنگ ءُ دروگیں میڑاں شھریانی کُشگ ءُ آوار جنی ءِ وئیلاں ایف آئی آر نکش کنگ بہ بیت-

بی وائی سی ءَ بلوچ راج ءَ چہ دزبندی کتگ کہ آ اے پُرایمنیں زھرشانی بُنجل ءَ ھوار بہ بنت وتی دوستناکانی یل کنائینگ ھاتر ءَ توار چست بہ کن اَنت-

گل ءَ اے میان ءَ شھریاں چہ دزبندی کتگ کہ اگاں شمئے پت، چک یا کجام دوستانک زورانسری بیگواہ کنگ بیتگ یا آ دروگیں میڑ ءَ کُشگ بوتگ، شمارا گوں دزبندی اِنت بیا اِت بُنجل ءَ وتی مردمانی بیگواھی ءِ درگت ءَ نشبتہ بہ کن اِت شمئے توار ما اِنت-

تربت ءَ تُرندیں گرمی کہ پنجاہ ڈگری سینٹی گریڈ ءَ سر بیگ ءَ اِنت اشی ءَ اَبید بُنجل ءَ زالبول، کماش، ورنا ءُ زورانسری بیگواھیں مردمانی کھولاں جوانیں وڑے ءَ بھر زرتگ-

بی وائی سی رِد ءَ بُنجل ءَ بیگواھیں مردم ءُ دروگیں میڑانی وئیلاں گوں شریں وڑے ءَ کاگدے دروشم دیگ ءَ اِنت دانکہ آیاں آمیدگس ءَ انسانی ھکانی ادارھاں تاں سر بیت بہ کن ئے-

بی وائی سی گوشگ اِنت کہ پولیس یکشل ءَ دزمانجنی ءُ پھازی چن ءُ لانچ ءَ چہ پھریز ریاستی ادارھانی نیمگ ءَ چہ پُرایمنی زھرشانی ءَ ایرموش کنگ ءَ دگہ یک جُھدے کتگ بلے آ ھچ وڑیں زور دیم ءَ سر ءَ جھل کنوک نہ اَنت اے شُدکشیں ھڑتالی بُنجل ھرچ وڑ برجاہ بیت-

بی وائی سی ءَ میان استمانی ھکانی ادارھاں چہ دزبندی کتگ کہ آ بلوچستان ءَ برجاھیں ریاستی زوراکی ، زورانسری آوار جنی ، درکانودی کوش ءُ آمیدگسی نا انساپیانی سر ءَ زوے گامگیج بزور اَنت ءُ پاکستان ءَ آئین ءُ کانود ءِ پابند بہ کن اَنت-