نوشکی ءِ جھمنندیں مردم ءِ لاش ھاران ءِ دمگ لجے ءَ دزکپتگ۔ اے مرد ءَ سلاہ بندیں مردماں گوں وت برتگ ات۔
لجے ءِ دمگ بوربنج ءَ تیرگواری ءَ چہ بیران بوتگیں مردے ءِ لاش دست کپتگ۔ بلے لیویز فورس ءَ لاش چہ جاہ ءَ پتکن نادراھجاہ ءَ سر کتگ۔
پد ءَ گْوشگ بیتگیں مردم ءِ پجار نوشکی ءِ نندوکیں فتح محمد سرپرہ ءِ چُک سمیع سرپرہ ءِ نام ءَ بوتگ۔
دمگی مردمانی رد ءَ اے مرد گْوستگیں روچاں ناکہ بندی ءِ وھد ءَ کردگاپ ءِ دمگ ءَ سلاہ بندیں مردماں چہ پجار کنگ ءَ پد گوں وت برتگ ۔
بلوچستان لبریشن فرنٹ ءِ جارکش میجر گوھرام بلوچ ءَ شنگ کتگیں درشان ءِ تہ ءَ بلوچستان ءَ جتاجتائیں اُرشانی زمہ واری منّ اِتگ اَنت-
جارکش ءَ گوشتگ بی ایک ایف ءِ سرمچاراں بیست یک جون ءَ مستونگ ءِ دمگ کردگاپ شھر ءَ لیویز تھانہ، نادرا کارگس ءُ اسسٹنٹ کمشنر ءِ کارگس سر ءَ اُرش کتگ دستیگ کتگ اَنت- کاروائی ءِ میان ءَ سرمچاراں لیویز تھانہ ءَ ساڑی سرجمیں سرکاری سلاہ ءُ دگہ ساز ءُ سامان برتگ اَنت کہ آیانی تہ ءَ چار کلاشنکوپ، یک جی تھری، شانزدہ رائفل ءُ یک پرپٹے ھوار اِنت- سرمچاراں تھانہ ءَ ساڑی گاڑی، کرسی ءُ ڈیبل ءُ ریکارڈاں ھوار تھانہ مانداشتگ- کاروائی سرجم کنگ ءَ پد سرمچاراں سرجمیں دمگ ءَ گشت جتگ-
جارکش ءَ گْوشتگ کہ اے میان ءَ سرمچاراں کردگاپ تاں منگوچر دگ سر ءَ ناکہ بندی کتگ، کردگاپ ھوٹل ءُ پٹرول پمپ سر ءَ ناکہ بندی ءِ میان ءَ سرمچاراں سے دری مردم دزگیر کتگ اَنت ءُ گیس بروکیں ھپت بوزر گاڑی نشانگ کتگ ءُ تاوان داتگ اَنت-
جارکش ءَ گْوشتگ کہ دومی ناکہ بندی کردگاپ کراس سر ءَ بیتگ اود ءَ گیس بروکیں پنچ بوزر گاڑیانی ٹائیر تاوان داتگ اَنت ءُ پٹ ءُ پول میان ءَ دری مردم دزگیر کتگ اَنت-
جارکش ءَ گْوشتگ کہ بی ایل ایف ءِ سرمچاراں زی بیگاہ ءِ ھپت ءَ شال، نوشکی، تفتان بُنجاھی شھدگ سر ءَ ناکہ بندی کتگ شپ ءِ دوازدہ ءَ تاں وتی دستیگ کتگ ءُ گاڑی پٹ ءُ پول کتگ اَنت- پنچ کلاک ءَ اے ناکہ بندی ءِ میان ءَ دُژمن ھچ وڑ سُر ءُ پُری نہ بیتگ-
جارکش ءَ دگہ یک درشانے ءِ تہ ءَ گْوشتگ کہ مروچی سُھب یازدہ ءَ بی ایل ایف ءِ سرمچاراں ھُزدار ءِ دمگ وڈھ ڈھکلو ءَ گرانبھائیں سنگ ءُ مڈی بروکیں دو گاڑیانی سر ءَ اُرش کتگ ءُ اُرش آسر ءَ گاڑی ءُ لوڈیں سامان تاوان داتگ اَنت-
جارکش ءَ گْوشتگ کہ بلے ڈرائیوراں ھچ وڑیں جانی تاوان نداتگ –
جارکش ءَ گْوشتگ بلوچستان لبریشن فرنٹ اے سرجمیں اُرشانی زمہ واریاں منّ اِیت ءُ بلوچستان ءِ وتواجھی ءَ تاں اُرشاں برجاہ دار اِیت-
بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ مئے سرمچاراں کلات ءُ مستونگ ءَ سے جتاجتائیں اُرشاں زورگریں پاکستانی پوج ءُ وتگڑیں کاؤنٹر ٹیررازم دیپارنمنٹ ( سی ٹی ڈی ) ءِ کارندہ نشانگ کتگ اَنت – سرمچاراں بُنجاھی شھدگ سر ءَ ناکہ بندی کتگ سیندک پروجیکٹ گاڑی مانداشتگ اَنت-
جارکش ءَ گْوشتگ کہ بی ایل اے ءِ سرمچاراں مروچی کلات ءِ دمگ کوھک ءَ زورگریں پاکستانی پوج کاروان آئی ای ڈی اُرش ءَ نشانگ کتگ – زورگریں پوج ءِ کاروان سر ءَ ھما وھد ءَ اُرش کنگ بیتگ وھدے آ دمگ ءَ زوراکی نئیت پیشکدمی کنگ جُھد کنگ ءَ بیتگ- تراک زد ءَ آؤکیں پرپٹ ءَ سواریں دو کارندہ جاہ پہ جاھی مرتگ اَنت ءُ آیانی پرپٹ تباہ بیتگ
جارکش ءَ گْوشتگ مروچی مگرب وھد ءَ بلوچ لبریشن آرمی ءِ سرمچاراں مستونگ ءَ بلوچستان ھوٹل نزیک ءَ شال کراچی بُنجاھی شھدگ سر ءَ ناکہ بندی کتگ ءَ یک کلاکے ءَ تاں پٹ ءُ پول کتگ – اے میان ءَ سرمچاراں پُلپنانچیں سیندک پروجیکٹ ءِ دو گاڑی مانداشتگ ءُ تباہ کتگ اَنت-
بی ایل اے ءِ سرمچاراں گوستگیں روچ ءَ مستونگ کلی دتو ءِ نزیک ءَ وتگڑیں سی ٹی ڈی ءِ کارندہ شکیل بنلگزئی ءُ آئی ءِ ھمرای عدنان دھوار ءِ ھمراھی ءَ کُشتگ اَنت – شکیل بنلگزئی زورگریں پوج ءِ جوڑ کتگیں دیتھ اسکواڈ ءِ باسکے ھم بیتگ-
جارکش ءَ گْوشتگ کہ شکیل بنگلزئی مستونگ ءُ کش گوراں زورگریں پوج ءِ کمکاری، لوگانی سر ءَ بیڑ ءُ ورنایانی زورانسری بیگواہ کنگ ءَ تچکی ءَ ھوار بیتگ- اگست دوھزار بیست دو ءَ مستونگ ءِ دمگ کلی کاریز سور ءِ جھمنندیں ورنا فرید شاھوانی زورانسری بیگواھی ءَ شکیل ءُ آئی ءِ ٹولی ھوار بیتگ اَنت- پد ءَ زورگریں پوج ءَ اپریل دوھزار بیست سے ءَ ائید ءَ یکروچے ساری اے ورنا شھید کتگ ءُ لاش چگل داتگ-
جارکش ءَ گْوشتگ کہ شکیل بنگلزئی سلاہ بند بیتگ لشکر کشی ءَ زورگریں پوج ءِ ھمراھی ءَ ھوار بیتگ -شکیل بنگلزئی راجدروھی ءِ جرم ءَ بلوچ لبریشن آرمی نشانگ لسٹ ءَ ایر بیتگ ءُ آ کشتگ ءُ گُڈی آسر ءَ سر کتگ-
جارکش ءَ گْوشتگ بلوچ لبریشن آرمی اے سرجمیں اُرشانی زمہ واری ءَ منّ اِیت-
بلوچستان ءِ دمگ مستونگ ءَ سلاہ بندیں مردماں سبی شھدگ سر ءَ ناکہ بندی کتگ لیویز تھانہ دشت دستیگ کتگ ءُ تھانہ مانداشتگ-
وئیل ءَ ھچ وڑیں جانی تاوان ھال سر نہ بیتگ، وھدے کہ اُرشکاراں کاروائی سرجم کنگ ءَ سوبمند بیتگ اَنت-
زانگ بہ بیت کہ اے وئیل وئیل ءَ چہ لھتے کلاکاں ساری مستونگ ءِ دمگ بلوچستان ھوٹل ھند سر ءَ سیندک پروجیکٹ ءَ چہ ھمگرنچیں گاڑی داشتگ ءُ مانداشتگ اَنت- سلاہ بندیں مردماں شھدگ بند کتگ رؤکیں ءُ آؤکیں گاڑی پٹ ءُ پول کتگ اَنت-
گوستگیں لھتے ھپتگانی میان ءَ بلوچستان ءِ جتاجتائیں دمگاں آجوئی لوٹوکانی کاروائیانی تہ ءَ گیشی گندگ اَتکگ- بلوچستان ءَ بازیں اُرشے رپورٹ بیتگ اَنت کہ اود ءَ اُرشکاراں سرکاری تھانھانی سر ءَ دستیگ، سلاھانی دستیگ کنگ، ءُ سرکاری ریکارڈ مانداشتگ اَنت- اشی ءَ اَبید مزنیں شھر کہ مستونگ ءُ زھری وڑیں دمگاں ھداروکی دستیگ ھم گون اِنت-
گیشتریں وئیلاں گندگ اَتکگ کہ اُرشکاراں کاروائی ءَ پد تتکگ اَنت-
زانتکارانی گوشگ اِنت کہ بلوچستان ءَ ریاستی تُرندیں پالیسیان آجوئی لوٹاکانی درشان توانمندی داتگ اَنت- ءُ پاکستان پوج ءُ ھکومت بلوچستان ءَ راجی پلامرزی ءَ چہ زبھر بیگ ءَ اِنت-
بلوچستان ءِ دمگ مستونگ ءَ بلوچستان ھوٹل ءِ نزیک ءَ مزن شھدگ ءِ سر ءَ سلاہ بنداں چیک پوسٹ جوڑ کتگ ءُ راہ بند کتگ۔
ھالانی رد ءَ سلاہ بندیں مردم گوزوکیں گاڑیاں پٹ ءُ پول کنگ ءَ انت۔
دمگی مردمانی رد ءَ سیندک پروجیکٹ ءِ گاڑی سلاہ بندیں مردماں داشتگ ءُ مانداشتگ انت۔ بازیں گاڑی سرجم ءَ سُتکگ اَنت۔
زانگ بہ بیت سیندک پروجیکٹ پاکستان ءُ چین ءِ یکجائی کان کنی پروجیکٹ انت کہ گوست ءَ ھم آجوئی ءِ جھدکارانی نشانگ جوڑ بوتگ۔
جمدیستگیں مردماں گشتگ کہ چیک پوسٹ ءِ سر ءَ سلاہ بندیں مردم نوکیں سلاھاں گوں اوشتوک انت ءُ سرجمیں دمگ وتی کنٹرول ءَ کتگ ئے۔
زانگ بہ بیت کہ بلوچستان ءَ گْوستگیں روچاں اے رنگیں ویلانی تہ ءَ گیشی گندگ بوتگ ۔ ھمے رنگیں ویل گوستگیں روچ ءَ مستونگ ءِ کردگاپ ءِ دمگ ءَ بوتگ۔ بلوچستان لبریشن فرنٹ ءَ اے اُرش ءِ زمہ واری من اِتگ۔
بی ایل ایف ءِ جارکش ءَ گشتگ کہ اے کارروائیانی تہ ءَ سرکاری کارگسانی دستیگ کنگ ءُ سلاھانی دستیگ کنھ، گاڑیانی سوچگءُ مزنیں شھدگانی بند کنگ ھوار انت۔
بلے انگت ءَ مرچیگیں ویل ءِ زمہ واری کس ءَ نہ زرتگ۔
بلوچستان ءِ دمگ ھُزدار ءِ ھند وڈھ ءَ گوستگیں شپ ءَ ناشناسیں سلاہ بندیں مردماں اُرش ءَ ھکومتی پلامرزی سلاہ بندیں ٹولی ” ڈیتھ اسکواڈ ” ءِ سروک شفیق مینگل ءِ برات عطاالرحمٰن بیران بیتگ، وھدے کہ آئی ءِ چُک مطیع الرحمٰن مینگل اُرش ءَ ٹپی اِنت-
شفیق مینگل سر ءَ بلوچ ورنایانی زورانسری آوار جنی، ٹارگٹ کلنگ ءُ مُچی کبراں کل کنگ ءِ سنگینیں بھتام سر ءَ ھست بیتگ، وھدے کہ آئی ءِ سیادی سرکاری پلامرزی ٹولی ” ڈیتھ اسکواڈ ” ءَ چہ ھم ھمگرنچ کنگ بیگ ءَ اِنت-
دوھزار یازدہ ءَ بلوچ لبریشن آرمی ءِ مجید برگیڈ ءَ اولی اُرش شفیق مینگل وتکش تراک ءِ اُرش نشانگ کتگ اَت چریشی ءِ آسر ءَ آ رکّ اِتگ وھدے کہ آئی ءِ بازیں ھمراھی کشگ بیتگ ءُ ٹپی بیتگ اَنت-
وئیل سوب انگت زانگ نہ بیتگ نانکہ دگہ گلے ءَ اے اُرش زمہ واری منّ اِتگ-
بلوچستان ءِ دمگ کلات ءَ پاکستانی لشکر ءِ کاروان برجاہ داریں سَے بمب تراکانی نشانگ جوڑ کنگ بوتگ۔ گوستگیں روچ ءَ ھم پاکستانی پوج پنچ تراکانی نشانگ کنگ ءُ پد ءَ سنگر گپتگیں مردماں اُرش کتگ-
کلات ءِ ھند کوھک ءَ پاکستانی لشکر ءِ کارواناں اُرشاں تاوان رس اتگ۔ دمگی مردماں ٹی بی پی ءَ را گشتگ کہ آپریشن ءِ مول ءُ مراد ءِ ھاتر ءَ دیم ءَ جنزوکیں پورسز ءِ کاروان سئے تراکانی نشانگ جوڑ کنگ بوتگ۔
یک بمب تراکے ءِ آسر ءَ پرپٹ سواریں پورسز ءِ دو کارندہ مرتگ انت بلے پورسز ءَ گیش جانی ءُ مالی تاوان ھم بوتگ۔
گوستگیں روچ ءَ بلوچ لبریشن آرمی ءَ منگچر ءُ مورگند ءَ ھوار کلات ءِ جتا جتائیں دمگاں پاکستانی لشکر سلاہ بندیں اُرشانی تہ ءَ پاکستانی لشکر نشانگ کتگ ءُ بازیں کساسے ءَ تاوانانی دیمپانی اش بیتگ۔
جارکش جیئند بلوچ ءَ وتی بیان ءَ گْوشتگ کہ اے اُرشانی تہ ءَ پاکستانی اُرد ءِ سرجم ءَ 15 کارندہ مرتگ اَنت وھدے کہ واکداراں دو کارندہ ءِ بیرانی ءُ چار ٹپیگ بوھگ ءِ پدرائی کتگ۔
بلوچستان ءَ رسانکدر ءِ آجوئی ءَ چمشانکے
نبشتہ کار: جیھند بلوچ
دی بلوچستان پوسٹ
بلوچستان یک ھساس ءُ تاریکی دمگے کہ چہ زمینی مڈیاں سرریچ انت، اے وھد ءَ سرجم ءَ جار نہ پررینتگیں پوجی ءِ کبزہ ءِ چیر ءَ اِنت۔ پاکستان ءِ بنجاھی سرکار ءُ آئی ءِ زوراکیں لشکر ءَ ناں ایوک ءَ آئی ءِ جگراپیائی ءُ سیاسی وت واجھی ءِ سر ءَ بندش جتگ بلکیں گپ ءُ ھبر کنگ ءِ آجوئی ءِ سر ءَ ھم بے کساس بندش جتگ۔ سر زاھر ءَ جمھوری کانود ءِ پُشت ءَ کپتگیں اے پوجی ھاکمیت ءَ بلوچستان ءِ ھر ادارہ ءِ سر ءَ وتی واک گیش کتگ۔
پوجی اسٹیبلشمنٹ ءُ آئی ءِ چیر دستیں( اندیمین ادارہ) انٹیلی جنس ایجنسی نہ ایوک ءَ ھر پڑ ءَ ھست اِنت، ایشانی تہ ءَ سوبائی ھکومت، بیوروکریسی، ادلیہ ءُ رسانکدر ھم ھوار اِنت بلکیں آیانی سر ءَ املی کنٹرول ھم ھست اِنت۔ گچینکاری اسٹیبلشمنٹ ءِ وپاداراں مھلوکانی سر ءَ ایرماد کنگ ءِ مول ءُ مراد ءَ بس (شو آف) پیش دارگی جوڑ بوتگ اَنت۔ زور، ترس، لب ءُ لالچ ءُ رسانکدر ءِ دستاں کنگ ءِ پندل پہ اکتلاپ داروکیں تواراں بے توار کنگ ءَ کارمرز کنگ بنت۔
ریاستی بیانیہ ءُ رسانکدر ءِ کرد۔
بلوچستان ءَ روایتی ءُ نوکیں رسانکدر ءِ کرد ءِ سر ءَ بژن ءِ گپ ایش اِنت کہ آ ریاستی بیانیہ ءِ دیمروی ءَ گوں بندوک بوتگ۔ الیکٹرانک ءُ پرنٹ میڈیا ءِ گیشتریں بھر سرکاری اشتھارانی سوب ءَ بلوچستان ءِ ھستیں راست ءُ ھکیکتاں چہ چماں شانک دیگ ءُ دیم ءَ آرگ ءِ بجا ءَ تھنا پروپیگنڈا مشین جوڑ بوتگ اَنت۔ رسانکدر ءِ آجوئی ءِ داوا ھست اَنت بلے راستی ءَ اھوالکاری ءِ تھنا کار ھمیش اِنت کہ آ جنگی آپریشن، بلوچ سیاسی گلانی سر ءَ ریاستی بھتام ءُ سرکاری پالیسیانی سر ءَ بے تنکید ءَ لس مھلوک ءِ دیم ءَ پیش بہ کنت۔
پیسر ءَ بلوچ نودربر گل “بی ایس او آزات” ءَ اے رنگیں میڈیا ھاؤسانی ھلاپ ءَ میڈیا بلیک آؤٹ کمپین کتگ اَت کہ ایشی ءِ آسر ءَ چیزے وھد ءَ آیانی شنگ ءُ تالان تانسر ءَ بند بوتگ اَت۔ بلے ریاستی زور ءُ لب ءَ ملامانی سوب ءَ اے مزاھمت داں دیر ءَ نہ جل اِت۔
پرنٹ میڈیا ءِ جاور
بلوچستان ءَ چاپ بوؤکیں لھتیں دمگی روتاک چوش کہ “روزنامہ آزادی کوئٹہ” ءُ “روزنامہ انتکاب ھب” ءَ پیش ءُ گیشاں سیاسی جیڑھانی سر ءَ ھال ءُ اھوال یاکہ گلانی بیان داتگ اَت بلے گوستگیں یک سالے ءَ آیانی آجوئی چہ دست ءَ گرگ بوتگ۔ بلوچستان سرکار ءِ جارکش شاھد رند ءِ نگرانی ءَ اے روتاک اشتھار ءِ بندش ءِ وسیلہ ءَ مجبور کنگ بوتگ اَنت کہ ناں ایوک ءَ بلوچ راجدوستیں گلانی چشکہ بی این پی (مینگل) بی وائی سی، ءُ ڈاکٹر ماہ رنگ ءِ ھالاں چہ رکّینگ بہ بیت بلکیں آ سرجم ءَ بلیک آؤٹ کنگ بہ بنت۔
کوئٹہ ءِ مزنیں اھوالکارے ءَ گوش مالومداری داتگ اَت کہ ڈیلی انتکاب ءُ ڈیلی آزادی ءَ گوستگیں سال ءَ 100 ھزار کلدار ءِ بزاں یک کروڈ ءَ کم و گیش ءِ سرکاری اشتھار دیگ بوتگ اَنت۔ آئی ءِ گشگ ءِ ھساب ءَ 2024 ءَ 8.5 ملین زرّ ادارہ ءِ پالیسی ءِ کنٹرول کنگ ءِ ھاتر ءَ ”ٹولز“ ءِ بستار ءَ کارمرز کنگ بوتگ اَنت۔ اے دوئیں روتاک نوں بی وائی سی، ڈاکٹر ماہ رنگ ءُ بی این پی مینگل ءُ سردار اختر مینگل ءِ بابت ءَ ھم نبشتہ نہ کن اَنت ءُ آیانی بیاناں ھم چاپ نہ کن اَنت، اے گپ ءِ پدرائی (تصدیق) دوئیں روتاکاں گوں ھمگرنچیں دو جتا جتائیں دمگی اھوالکاراں کتگ۔
سوشل میڈیا ءُ ویب چینلانی کرد
روایتی رسانکدر ریاست ءِ دستاں و کارمرز بوتگ ءُ بوگ ءَ اِنت بلے سوشل میڈیا ءُ ویب چینل ءُ اھوالکاری پیج یک نوکیں رنگے ءَ دیم ءَ اتکگ اَنت۔ بلے اد ءَ ھم ریاستی اسر ءُ رسوک ءَ چہ آجوئی ایوک ءَ داوا اِنت۔ اسلام آباد ءُ کوئٹہ ءَ چہ بازیں ویب چینل بندات کنگ بوتگ کہ ائی ایس پی آر ءُ پوج تچک ءَ تچک آیانی کمک ءَ کنگ ءَ اِنت۔ “براق” ویب چینل یک پدریں درورے کہ ایشی ءِ مستریں مول ءُ مراد بی وائی سی ءُ بلوچ سیاسی رھشونی ءِ ھلاپ ءَ منپی پروپیگنڈا ءِ شنگ کنگ اِنت۔ ایشی ءَ ابید گوش اشکنگ ءَ اسلام آباد ءَ چہ دو دگہ ویب چینل ھم بندات بوتگ کہ آ بلوچ زرمبش ءَ کاؤنٹر بکن اَنت ءُ ریاستی وت گڑیں بیانیہ ءَ دیم ءَ بہ بر اَنت۔
اے ویب چینلانی رپورٹراں ماھانہ کم چہ کم سی تا پنجاہ ھزار کلدار ءِ پگار دیگ بیت۔ 50،000 ءَ ابید آیانی دپتر ءِ کرایہ، بجلی، انٹرنیٹ ءُ دگہ ھرچ ءُ درچ ایف سی یا انٹیلی جنس ادارھانی نیمگ ءَ چہ دیگ بنت۔ اے وتگڑیں اھوالکار رپورٹنگ ءِ بھانہ ءَ پہ انٹیلی جنس ایجنسیاں جاسوسی کن اَنت ءُ بازیں مردمے گوں آیاں ایجنٹ ءِ بستار ءَ سرگرم اِنت۔
گیر جانبداری ءِ وھم
لھتیں ویب چینل ءُ سوشل میڈیا ءِ تاک کہ وت ءَ ”غیر جانبدار“ ءُ ”آزات“ ءِ رنگ ءَ پیش دار اَنت آ ھم چہ درور ءَ ریاستی منسوبہ ءِ بھر اَنت۔ دمگی اھوالکارانی رد ءَ اے ویب چینلاں مالی کمک ءِ ھمراھی ءَ نوکیں سامان، کیمرہ ءُ دگہ آسراتی ھم دیگ بنت۔ اے سبب اِنت کہ بلوچستان ءَ ھر ھما اھوالکار کہ راستیں ءُ رھبندیں وڑے ءَ رپورٹنگ کنگ بہ لوٹ اِیت آیاں زور ءُ دھمکیاں ابید برے برے دزگیر کنگ ءُ باز وھد ءَ کوش آماچ کنگ ھم بیت کہ ایشی ءِ مستریوں درور لطیف بلوچ ءِ کوش اِنت۔
بلوچستان اے وھد ءَ آجوئی لبز ءُ لیکہ ءِ بدتریں بُھران ءَ گوزگ ءَ اِنت ۔ سھاپت ءِ مکدسیں پیشہ جنگ ءِ سلاہ ءَ بدل کنگ بوتگ کہ ایشی ءِ وسیلہ ءَ پوجی کارروائی پوشیدگ کنگ بنت ءُ ریاستی پروپیگنڈا دیم ءَ برگ بنت۔ ھندی اھوالکاراں ءُ گپ ءَ اے ھبر سھرا بوتگ کہ سرکار ءَ ھر دمگ ءَ پریس کلباں وتی ایجنٹ داشتگ اَنت کہ آ زاھر ءَ اھوال کار اَنت بلے کار پہ سرکار ءَ کنگ ءَ اَنت، اے وڑیں وپاداریں ویب چینل ءُ اھوالکاراں تاں اے اکتیار دیگ بیت کہ آ بلوچ سیاسی گلانی ھالاں شنگ بہ کن اَنت کہ اے تاسر ءَ بہ دنت کہ رسانکدر آجو اِنت، وھدے کہ درھکیکت اے درست یک داشتگیں منسوبہ بندیں رھبندے ءِ بھر اَنت۔
آسر
بلوچستان ءَ رسانکدر نوں وت واجھیں ادارھے نہ اِنت۔ ایوک ءَ الیکٹرانک ءُ پرنٹ میڈیا ناں بلکیں سوشل میڈیا ھم ریاستی کنٹرول ءَ اِنت۔ چشیں جاوراں بلوچستان ءَ آجو، شَپاپ ءُ زمہ واریں اھوالکاری ءِ ھیال یک وابے جوڑ بوتگ۔
بلوچ راج ءِ توار ءِ چیر دیگ،آئی ءِ رنج ءُ گم، آئی ءِ سیاسی جنز ءُ آئی ءِ سر ءَ بیوکیں زُلم ءُ زوراکیانی سرکپ کنگ ناں ایوک ءَ انسانی ھکانی مزنیں لگتمالی یے بلکیں دمگ ءِ تہ ءَ گیشتر آشوب ءُ کینگ ھم ودی کنت۔ یک شھوری، ذمہ وار ءُ گیر جانبداریں رسانکدرے اے بُھران ءِ یکیں گیشواری بوت کنت، شرت ھمیش اِنت کہ آئی ءَ ریاستی کنٹرول ءَ چہ آجو بوگ ءِ اجازت دیگ بہ بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
بلوچستان ءِ دمگ کلات ءِ ھند منگچر ءِ نزیک ءَ دو لاش دزکپتگ اَنت-
آیانی تہ ءَ یکے ءِ پجّار سیف اللہ ء رحیم داد نام ءَ چہ بیتگ- سیف اللہ ءِ کھول رِد ءَ یازدہ جون دوھزار بیست پنچ ءَ زورانسری آوار جنی ءِ نشانگ کنگ بیتگ-
بلے دومی لاش پجّار انگت نہ بیتگ-
ھمے وڑ بلوچستان ءِ تیابدپی شھر گوادر ءِ دمگ نیا آباد ءَ ھم یک لاشے دْرچکانی تہ ءَ کپتگ، چریشی ءِ پجّار فیصل حاصل نام ءَ چہ بیتگ-
فیصل لھتے روچ ءَ ساری بیگواہ بیتگ- پولیس ءُ نادُراھجاہ اِھوالکار گوشگ اِنت کہ لاش لھتے روچ ءَ کوھنینے ءُ آ دْرچکانی تہ ءَ چیر دیگ بیتگ-
فیصل ءِ کھول گوشگ اِنت کہ آئی ءِ موباھل پون انگت پچ اِنت ءُ آئی ءَ ناشناسیں مردم کارمرز کنگ ءَ اِنت-
بلوچستان ءَ زورانسری آوار جنی ءُ لاشانی دستیگ سر ءَ انسانی ھکانی گل ءَ دلپدردی درشان اِتگ- ھمے سال ءَ بلوچستان ءَ زورانسری آوار جنی ءُ لاشانی دزکپگ سر ءَ گوں تُرسناکیں وڑے ءَ گیشی گندگ اَتکگ-
بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل ایف ءِ سرمچاراں بیست جون دوھزار بیست پنچ ءِ بیگاہ وھد ءَ آواران ءِ دمگ جھاؤ، ڈولیجی ءَ برجاھیں زورگریں پاکستانی پوج ءِ یک چوکی یے سر ءَ نوکیں ءُ مزنیں سلاھاں چہ اُرش کتگ چوکی نشانگ کتگ-
جارکش ءَ گْوشتگ کہ اُرش آسر ءَ دُژمنیں پوج ءِ دو کارندہ مرتگ ءُ سے ٹپی بیتگ اَنت-
جارکش ءَ گْوشتگ کہ بلوچستان لبریشن فرنٹ اے اُرش زمہ واری ءَ منّ اِیت-
