TBP Balochi

بلوچستان ءَ دگ ءِ وئیلانی تہ ءَ بے کساس گیشی اتکگ کہ چریشی ءَ تھنا مردم مرگ ءِ دیمپان بوگ ءَ نہ انت بلکین ھزارانی کچ ءَ کھول ماژگی ، مالی ءُ جانی ازیتانی دیمپانی ءَ کنگ ءَ انت ۔

میڈیکل ایمرجنسی ریسپانس سینٹر ءِ رپورٹ ءِ رد ءَ ھمے سال ءَ جنوری ءَ بگر تاں جون ءَ سرجمیں بلوچستان ءَ 12,110 دگ ءِ وئیل بوتگ انت چریشی ءَ 239 مردم بیران ءُ 15690 زدگ بوتگ انت-

رپورٹ ءِ رد ءَ ایوک ءَ N25 وندر ءَ 724 وئیل بوتگ انت کہ اود ءَ 952 مردم زدگ ءُ 25 بیران بوتگ انت ۔ وھدیکہ این 50 ٹراما ژوب ءَ 4201 وئیل ءُ این 25 ٹراما ھزدار ءَ 2412 وئیل بوتگ انت ۔

رپورٹ ءِ تہ ءَ گوشگ بوتگ کہ جون ءِ ماہ ءَ 2454 وئیل بوتگ انت کہ اودا 3449 مردم زدگ ءُ پنجاہ ءُ یک بیران بوتگ انت اے وئیلانی تہ ءَ گیشتر وئیل ھزدار ، ژوب ، سبی، ءُ پشین ءَ بوتگ انت ۔

ھمے وڑ 4 جولائی 2025 ءَ یک روچ ءِ تہ ءَ بیمناکیں دگ ءِ وئیلے بوتگ ات کہ 69 وئیلاں 97 مردم زدگ بوتگ ات بلے وش بھتی ءَ ھچ وڑیں بیرانی نہ بوتگ ات ۔

زانتکارانی رد ءَ بلوچستان ءَ دگ ءِ وئیلانی سوب یکے ھمیش ایں کہ تیز روانی انت، دگ پرشتگ انت دگی کانود ءِ بگیری بوگ ءَ انت ءُ ادارھانی نا دلگوشی ۔ لس مھلوک مدامی ھمے گپ ءَ جنگ ءَ انت کہ سرکار ءِ بٹاکاں ابید ھم دگ شر کنگ بوگ ءَ نہ انت ریسکیو ءِ ھچ آسراتی نیست ۔

ھمے وڑ گوستگیں سال ءَ 2024 ءَ سرجمی ءَ 20300 دگ ءِ وئیلاں 471 مردم بیران ءُ 17500 ءَ گیش زدگ بوتگ انت یا وَ لنگ ءُ لچ انت ۔

دمگی مردم ، چاگردی گل ءُ انسانی ھکانی باسکاں مدامی اے کچ ءِ سرا دلپدردی درشان اتگ ءُ مدامی زھرشانی کتگ ءُ وتی لوٹ کتگ انت کہ بلوچستان ءِ دگ شر کنگ ءُ آیانی سرا گامگیج زورگ بہ بیت ۔

بلے پد ءَ ھم سرکار ءِ نیمگ ءَ ھچ وڑیں ریسپونس دیم ءَ نہ اتکگ چریشی ءَ مھلوک زھری گیش ودان انت ۔

بلوچستان ءِ جتاجتائیں دمگاں بیتگیں وئیلانی یکجاھی ھساب ءَ دو چُکاں ھوار شش مردم بیران وھدے کہ دو مردم ٹپی بیتگ اَنت-

گیشیں ھالانی رِد ءَ کلات ءِ ھند غوث آباد ءَ ناشناسیں مردمانی تیرگواری ءَ چہ سلمان احمد ء عبد القدوس زھری بیران بیتگ، کلات پولیس جاہ پہ جاھی سر بیتگ لاش ءِ چار ءُ ٹپاس کنگ ھاتر ءَ ڈسٹرکٹ ہیڈکوارٹر ھسپتال ءَ برتگ-

بلے وئیل ءِ سوب زانگ نہ بیتگ، گیشیں پٹ ءُ پول انتزامیہ کنگ ءَ اِنت-

کلات ءَ شال کراچی راجی شھدگ سر ءَ بینچہ ءِ ھند سر ءَ ٹویوٹا ٹوڈی ءُ دگہ گاڑی یے میان ءَ ڈک وارتگ چریشی ءِ آسر ءَ دو مردم جاہ پہ جاھی مرتگ اَنت وھدے کہ دو ٹپی بیتگ اَنت – ٹپی زوت ڈی ایچ کیو ھسپتال کلات ءَ برتگ اَنت-

جعفر آباد ءِ بُنجاھی شھر ڈیرہ اللہ یار ءَ لین کرنٹ لگگ ءَ دو جتاجتائیں وئیل دیم ءَ اَتکگ اَنت کہ آیانی تہ ءَ یک بیست دو سالی ئیں ورنایے ءُ یک چار سالی ئیں چُکے بیران بیتگ اَنت-

بنداتی وئیل بھٹی مھلہ ءَ بیتگ اود ءَ بیست دو سالی ئیں امجد پٹھان لوگ چت سر ءَ لین ءِ ویر ءَ جنگ ءَ بیتگ کہ آناگاہ ءَ لین اَتکگ ءَ آئی ءَ تُرندیں جٹکھے لگگ ءِ سبب ءَ آ سُتکگ ءُ جاہ پہ جاھی بیران بیتگ-

دومی وئیل جتوئی کالونی ءَ۔بیتگ اود ءَ چار سالی ئیں چُک بگن جتوئی لوگ ءَ لیب ءَ بیتگ کہ لین ءِ برھنگیں ویر دست جتگ، چریشی ءِ سبب ءَ آ سُتکگ ءُ بیران بیتگ-

ھمے وڑ سے روچ ءَ ساری سریاب دگ چکی شاھوانی ءِ دمگ لوگ ءِ لاپ ءَ لیب کنان ءَ کسانیں چُک بی بی مومنہ ناشناسیں نیمگے ءَ اتکگ ایں تیر ءِ نشانگ جوڑ بیتگ ءُ سک ٹپی بیتگ، ءُ ٹپانی درد نہ سگّ اِتگ ءُ دومی روچ ءَ ٹراما سینٹر ءَ ساہ داتگ ءُ بیران بیتگ-

ایمنسٹی انٹرنیشنل ءَ یک شنگ کتگیں درشانے شنگ کتگ پاکستان واکدار ءَ چہ لوٹ کتگ کہ آ بلوچ یکجھتی کمیٹی ءِ بندیگیں سرجمیں رھشوناں بے شرت ءَ یل بکنت-

بندیگیں رھشونانی تہ ءَ ڈاکٹر ماہ رنگ بلوچ، بیبگر زھری، بیبو بلوچ، شاہ جی صبغت اللہ، غفار قمبرانی ءُ گل زادی بلوچ ھوار اَنت-

ایمنسٹی ءِ رِد ءَ اے سرجمیں مردم پُرایمنیں جُھد ءُ انسانی ھکانی واستا توار چست کنگ “جرم” ءَ دزگیر کتگ اَنت، کہ میان اُستمانی ءُ ڈیھی کانودی ءِ سر ءَ سر ھلاپ ورزی اِنت- آیانی دزگیری بلوچستان ءَ برجاہ ریاستی کریک ڈاؤن بھر اَنت، آئی ءِ مول ءُ مراد پُرایمنی زھرشانی، آجوئی ءِ لیکہ ءُ سیاسی پُرکاریاں ایرموش کنگ اِنت-

اے گپ دلگوش کنگی اِنت کہ اھ رھشون سے ماہ ءَ تاں تھری ایم پی او ءِ بُنیاد ءَ بندیگجاہ ءَ دارگ ء پد انّیگ ءَ انسداد ناشرکاری ءِ آمیدگس ءَ پیش کنگ بیتگ، کہ اود آیانی سر ءَ ناشرکاری بھتام جنگ بیتگ ءُ بندیگجاہ ءَ برگ بیتگ اَنت-

ایمنسٹی انٹرنیشنل ءَ وتی رپورٹ ءِ تہ ءَ تُرس پدر کتگ کہ اے مردماں بندیگجاہ ءِ تہ ءَ دوا درمانی آسراتی دیگ بیگ ءَ نہ اِنت کہ آ ناشریں رویشگ یا لَٹ ءُ لُٹ وڑیں سنگین ھترہ ءِ دیمپان اَنت-

رپورٹ ءِ تہ ءَ گوشگ بوتگ کہ انسداد ناشرکاری ءُ راجی گر ءُ دار ءَ ھمگرنچیں کانود ءِ سیاسی کارکنانی ھلاپ ءِ چو سلاہ ءِ وڑ ءَ کارمرز کنگ ءَ اِنت، بُنکی انسانی ھکانی سنگین ءِ ھلاپ ورزی اِنت-

ایمنسٹی انٹرنیشنل ءَ میان اُستمانی، انسانی ھکانی ءِ کارکنان ءُ سول سوسائٹی ءَ چہ دزبندی کتگ کہ آ پاکستان ھکومت ءَ زور بدنت دانکہ اے سرجمیں بلوچ رھشوناں زوت یل بہ کنت ءُ بلوچستان ءَ شھری آجوئی ءِ شرپ ءِ دلجمی جوڑ بکنت-

پشتو زبان ءِ نامداریں شائر مطیع اللہ تراب دوشمبے ءِ روچ ءَ دل ءِ نادراھی ءِ سوب ءَ بیران بوتگ۔

افغان رسانکدر ءِ رد ءَ مطیع اللہ تراب سئے شمبے ءِ روچ ءَ اُستان ننگرھار ءَ کل ءُ کسارت کنگ بوتگ-

پشتون لبزانکی تک ءُ پھنات، شائر، ءُ لبزانک دوستاں آئی ءِ بیرانی ءِ سر ءَ سکیں رنج ءُ گم ءِ درشانی کتگ۔

تالبان سرکار ءِ جارکش زبیح اللہ مجاھد ءَ ھم ایکس ءِ سر ءَ نبشتگ کہ ” راج دوستیں شائر مطیع اللہ تراب صاحب ءِ بیرانی ءَ مارا رنجیگ کتگ ، ما چہ اللہ تعالیٰ ءَ دعا کنیں کہ آئی ءَ جنت فردوست ءُ آئی ءِ ھاندان ءُ سیاد ءُ وارساں سبر ءُ اوپار بہ دنت-

مطیع اللہ تراب ءَ اوگانستان ءَ نامداریں “نرنج گل مشاعرہ” ءَ ایراد گری شائری ءَ نام دراھرتگ۔ آئی ءِ شَیر سوشل میڈیا ءُ راجی ٹی وی چینلاں باز شنگ بوتگ انت۔ آئی ءَ باز براں اوگانستان ءَ درملکی لشکر ءِ ھست بوھگ ءِ سر ءَ ایراد گپتگ۔

اے سال ءِ مارچ ءَ جلال آباد ءَ نارنج گل مشاعرہ ءِ وھد ءَ تراب ءَ اسٹیج ءِ سر ءَ انچیں شَیرے گشتگ کہ ایشی ءَ چہ جنجال ءِ سبب جوڑ بوتگ۔ آیاں جنکیں وانگجاھانی پچ کنگ ءِ لوٹ کتگ ءُ تالبان ءِ سروک ملا ھیبت اللہ اخندزادہ ءَ گوں تران کنان ءَ گْوشتگ کہ اگاں تو شرتریں حکومت داری لوٹ ئے گڑا تو قندھار ءِ بدل ءَ کابل ءَ بیا۔

مطیع اللہ تراب مارچ 1971 ءَ اوگانستان ءِ رودراتکی دمگ ننگرھار ءِ ھند خوگیانی ءَ ودی بوتگ۔ آئی ءَ وتی زند ءِ گیشتریں بھر گوں وتی ھاندان ءَ ماں خوست ءِ زرباری اُستان ءَ گوازینتگ کہ اود ءَ آئی ءَ گاڑی ءِ مرمت ءِ کارجاھے بوتگ ءُ ھمے کار ءِ سبب ءَ پہ وتی ھاندان ءِ زند گوازینگ ءِ روچاں گوازینگ ءَ بوتگ۔

گوستگیں بازیں سالاں آئی ءَ پشتون رداجدوستی ءُ افغان راجی پکر ءِ بنیاد ءَ شائری کتگ۔

گوستگیں سرکار ءِ دور ءَ ھم آئی ءَ سرکاری شائری ءِ میلھانی تہ ءَ یک ایراد گری شائری ءِ بستار ءَ وتی توار چست کنگ ءَ برجاہ داشتگ ءُ 2021 ءَ پد ھم تالبان ءِ دور ءَ ھم جتا جتائیں ھاسیں مراگشاں بھر زورگ ءَ گندگ بوتگ۔

نوشکی ءَ سیادی داروکیں اسکالر ءُ نیشنل ڈیموکریٹک پارٹی ءِ باسک غنی بلوچ ءِ زورانسری بیگواھی ءَ 50 روچ سرجم بوھگ ءِ درگت ءَ سوشل میڈیا ءِ ترامجاھاں کمپین بندات کنگ بیتگ۔

غنی بلوچ 25 مئی ءَ چہ شال ءَ کراچی ءَ روگ ءِ وھد ءَ ھزدار ءِ ھند ءَ پاکستانی لشکر ءُ انٹیلی جنس ءِ کارندھاں پجار کنگ ءَ پد آوار جتگ ءُ برتگ۔ آئی ءَ ‘زاور کیتابجاہ اینڈ پبلشنگ ھاؤس’ ءِ ھم کار کتگ۔

مھم ءِ بھر ءَ ھوارنوکیں این ڈی پی ءِ زاھد ارشاد بلوچ ءَ نبشتہ کتگ کہ “غنی بلوچ ءَ 50 روچ زندان ءَ سرجم کتگ۔ اگاں تو آئی ءَ چہ وتی نودربریں زمانگ ءَ بگر داں مرچیگیں روچ ءَ دیستگ گڑا تو آئی ءَ گوں کتاباں دیستگ یا باوست کنگ ءَ دیستگ۔ تجربگکار زان انت کہ آئی ءِ گندوک ءَ پد واتری ءِ ھچ جُست پشت نہ کپ ایت یا کتاب ءِ نام الم زھن ءَ نکش بیت انت-

بلوچ وومن فورم ءِ سلتانہ بلوچ ءَ پوسٹ ءِ تہ ءَ نبشتگ ء”منی جرم؟منی گناہ؟ءُ منی میار؟من یک ادیب ءُ نبشتہ کارے آں کہ من وتی بلوچ راج ءَ وانیناں ءُ رژنائی ءِ واستا کتاب گوں وت داشتگ اَنت۔کہ آئی ءِ ھاتر ءَ مرچی من اے زالمیں ریاست ءِ زندان ءَ آں“۔

ودود بلوچ ءَ گوں غنی بلوچ ءِ یلہ کنگ ءِ لوٹ ءَ نبشتہ کتگ کہ ”کتابانی بھر کنگ ءِ مردم مرچی انساپ ءِ جُست جوڑ بوتگ۔“۔ آئی ءَ دگہ پوسٹے ءِ تہ ءَ نبشتہ کتگ کہ جنگ نہ بلکیں علم تالان کنوک، بمب نہ انت کتاب زرتگ ءُ دراتکگ پرچا کید؟ “

این ڈی پی ءِ رھشون ایڈووکیٹ شاھزیب بلوچ ءَ وتی پوسٹ ءِ تہ ءَ گشتگ کہ ” غنی بلوچ ءِ زورانسری بیگواہ کنگ ءِ ھلاپ ءَ بلوچستان ھائی کورٹ شال ءُ دومی درھواست ڈسٹرکٹ اینڈ سیشن ادالت ھزدار ءَ بہ نام ءِ ’’چاکیدگی‘‘ ءِ سرھال ءَ جرمدار ءِ ھلاف ءَ داروک انت بلے تاں انوگ ءَ نہ غنی بلوچ یل دیگ بیتگ نا کہ جرمدار ءِ ھلاپ ءَ کانونی کاروائی امل ءَ آرگ بیتگ”

زانگ بہ بیت غنی بلوچ ءِ زورانسری بیگواہ کنگ ءِ ھلاپ ءَ نوشکی ءِ مزنیں شھدگ ءِ سر ءَ کھول ءَ زھرشانی مچی ءُ نندانک داتگ- کھول ءَ را دمگدار ءِ واکدارانی دلجمی ءَ پد وتی زھرشانی اوشتارینتگ-

کھول ءِ گْوشگ اِنت کہ اگاں غنی بلوچ یل کنگ نہ بوت گُڑا آ زھرشانی ءِ راہ ءَ گرگ ءَ لاچار بنت کہ ایشی ءِ تہ ءَ آر سی ڈی ءِ مستریں شھدگ سر ءَ بے مھتلیں دھرنا ھم ھوار اِنت۔

شال بلوچستان ءِ سرکار ءِ اھوالی کارگل ءِ نیمگ ءَ جار جنگ بوتگ کہ بلوچستان ءِ بازیں ھند ءُ دمگاں سلاہ بند کایاں گڑا لس مردم آیانی گون ءَ سیلپی ، اکس ءُ تامر جوڑ کن انت اے کرتن ایوک ءَ گیرزمہ داری نہ ایں بلکیں اے وڑیں مردم پاکستان ءِ کانودانی رد ءَ کتکار زانگ بنت ۔

اھوالی کارگل ءِ رد ءَ سلاہ بندانی کارکنگ ءِ وھد ءَ یا پد ءَ رند ءَ شکی ئیں جاھاں ساڑی بوگ ، مچی کنگ یا تامر جوڑ کنگ ءِ وھد ءَ کانودی کاروائی بوت کت کنت ءُ پوج آیانی سر ءَ تیرگواری کت کنت چریشی ءَ آ وتی زند ءَ زبھر بوت کت کن انت ۔

زانگ بہ بیت بلوچستان ءَ ھر وھد ءَ کہ بلوچ آجوئی لوٹوکیں گل دگ بندی یا بازارانی کبزہ کنگ ءَ کایاں گّڑا لس مردم آیانی ھمدردی گوں آیاں ھمکوپگی درشان کنگ ءَ پہ سیلپی کش انت ءُ آیانی دستاں چُک انت وشی درنگاز انت۔ باز جاہ ءَ اے ھم گندگ ءَ کئیت وھدیکہ آجوئی لوٹوکیں سلاہ بند بازارانی تہ ءَ پُتر انت گڑا مھلوک مچی ءِ دروشم ءَ آیاں وش اتک کن انت ۔

بلوچستان سرکار ءِ اے بندش ءَ بازیں مردمے آجوئی لوٹوکانی لیکہ لیک انت کہ بلوچ راج آجوئی لوٹوکانی پلامرزی ءَ کن انت ۔

بلوچ یکجھتی کمیٹی ءِ سروک ڈاکٹر مھرنگ بلوچ ءِ گْوھار ءَ گْوشتگ کہ گوستگیں ھپتگ ءَ چہ آمیدگس ءَ پیش بوگ ءَ پد مھرنگ، بیبو، گلزادی، سبگت اللہ شاھجی ءُ بیبرگ زھری جتا جتائیں تھانھانی تہ ءَ دیم دیگ بوتگ اَنت کہ اے آئینی ءُ لوٹانی پدّریں ھلاپ ورزی اِنت۔

ڈاکٹر مھرنگ بلوچ ءِ گْوھار ءَ وتی رِد ءُ بندیں بیان ءَ پدر کتگ کہ اگاں چہ دو جتا جتائیں ایردستیں آمیدگساں ھاسیں پرمان داتگ ات کہ بندیگاں وتی پھاز ءِ تیاری ءِ ھاتر ءَ کانونی کمک ءُ ھاندان ءِ گند ءُ نند ءِ موکل دیگ بہ بیت بلے پولیس اے بنیاتی ھک ءَ مدام رد کنگ ءَ انت یا آھاں کانونی دستاویزات ءِ سر ءَ دزنبشت کنگ ءِ ھاتر ءَ ساھتانی ساھتاں ودار کنگ ءَ انت۔

بیان ءِ تہ ءَ گْوش بوتگ کہ ھاسیں رنگ ءَ زالبولیں بندیگانی بندیگ کنگ ءِ ذمہ واریں کارندہ نہ ایوک ءَ نا کمکی ءَ توھین ءِ رویہ ءِ زورگ ءَ اَنت بلکیں پاکستان ءِ آئین ءَ آرٹیکل 10 ءُ 10 اے ھم پدریں ھلاپ ورزی ءَ کنگ ءَ اَنت کہ ایشی ءِ تہ ءَ برابری مقدمہ ءِ کانونی نمائندگی ءِ ھک ھوار اِنت۔

سبگت اللہ شاھجی ءُ بیبرگ زھری ءِ جاور ھال ءَ را ھاسیں رنگ ءَ جیڑگ ءِ سبب لیکگ بوتگ، پرچا کہ آ کینٹ پولیس اسٹیشن ءَ بند کنگ بوگ ءَ اَنت ءُ اود ءَ نہ ھاندان ءُ نیکہ وکیلاں موکل دیگ بوگ ءَ اِنت کہ آ گوں آھاں اھوال بہ کن اَنت ءُ نہ آھانی وشھالی ءِ پٹ ءُ پول ءَ بہ کن اَنت۔ اے جاور ھال آمید گس ءِ پرمان ءُ ناجائزیں بندیگ کنگ ءِ رھبند ءِ ھلاپ ورزی ءِ برابر اِنت۔

بیان ءِ رد ءَ زالبولانی پولیس اسٹیشن کہ اود ءَ ڈاکٹر مھرنگ، بیبو ءُ گلزادی بندیگ انت آ سول پولیس ءِ نہ بلکیں انسداد ناشرکاری ءِ محکمہ ءُ انٹیلی جنس ادارھانی کنٹرول ءَ انت۔

مھرنگ بلوچ ءِ مات ءَ اے جیڑہ درشان کتگ کہ بندیگاں ذھنی آزار ءُ اذیت، دھمکی ءُ زندانیانی ھکاں چہ زبھر کنگ ءِ آماچ بوگ ءَ اِنت، ایشی ءِ تہ ءَ وکیل، ھاندان ءُ دوا ءُ درمان ءِ آسراتی ھم ھوار اَنت کہ اے نہ ایوک ءَ پولیس رولز 1934 ءِ بند 974 ءِ ھلاپ اِنت بلکیں پاکستان ءِ میان اُستمانی انسانی ھک ءِ ھلاپ اِنت۔

بیان ءَ گیشتر پدر کتگ کہ وت ھم چہ انٹیلی جنس ءِ کارندھاں آزار ءُ اذیت ءِ آماچ اِنت کہ آ نیم شپ ءَ پد آئی ءِ لوگ ءِ دپ ءَ دیم ءَ اتکگ اَنت، اے گامگیج چہ اے گپ ءَ پدّر اِنت کہ زور ءُ زوراکی ءِ جھد ءُ کانونی گھگیر ءَ بے توار کنگ ءِ جھد اِنت۔

آئی ءَ یورپی یونین ءُ میان اُستمان ءِ انسانی ھکانی ادارگاں چہ اپیل کتگ کہ آ پاکستانی ھکومت ءَ را اے سنگینیں ھلاپ ورزیانی احتساب ءَ بہ کن اَنت ءُ بنجاھی آمید گس ءِ پیسلہ ءُ میاں اوستمانی پرمانانی سر ءَ اَمل کنگ ءَ را دل یکیمی بہ کن اَنت۔

بیان ءِ گڈسر ءَ پاکستان ءِ آمیدگس، سول سوسائٹی، بار کونسل ءُ میان استمانی انسانی ھکّانی ادارھانی نیمگ ءَ چہ زوتیں مداخلت ءِ اپیل کنگ بوتگ کہ آ کانون ءِ ھاکمیت ءِ بحالی ءُ بندیگانی بنیاتی انسانی ھکانی رکینگ بہ بیت۔

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ بی ایل اے ءِ سرمچاراں کیچ ءِ دمگ تمپ ءَ زورگریں پوج ءِ پند ءَ رؤکیں کارندھانی سر ءَ اُرش کتگ ءُ جانی تاوان داتگ انت-

آئی ءَ گوشتگ سرمچاراں گوستگیں روچ ءِ نیمروچ ءِ ساھت دوازدہ ءَ تمپ میر آباد ءَ زورگریں پاکستانی پوج ءِ راہ بستگ ءُ ھما وھد ءَ اُرش کتگ دشمنیں پوج ءِ ھشت کارندہ یک کاروانے ءِ پھزداری ءَ پد وتی پوسٹ ءَ روگ ءَ بیتگ انت- سرمچارانی اُرش ءَ زورگریں پوج ءِ دو کارندہ جاہ پہ جاہ ءَ مرتگ انت ءُ یکے سک زدگ بیتگ ءُ آ دگہ کارندھاں وتی ھمراہ یل داتگ ءُ تتکگ انت-

جیئند بلوچ ءَ گوشتگ بلوچ لبریشن آرمی اے اُرش ءِ زمہ واری ءَ من ایت-

بلوچستان ءَ برجاھیں بشی ھوراں مزنیں تاوانے داتگ کہ ایشی ءِ آسر ءَ زالبول ءُ زھگاں ھوار کم چہ کم 16 مردم بیران بوتگ اَنت ءُ جتا جتائیں وئیلاں 8 مردم ٹپیگ بوتگ اَنت۔

بیرانیانی سوب لوگانی کپگ، ھاراں بڈگ ءُ دگہ ھورانی سبب ءَ بوتگیں ویل انت-

آماچیں دمگاں ژوب، زیارت، موسیٰ خیل، ھزدار، لورالائی، لسبیلہ ءُ کوہلو ھوار اَنت کہ اود ءَ جھلیں جاگہ آپ ءِ تہ ءَ بڈ اتگ انت ءُ بازیں جاھاں رھوتی راہ بند بوتگ اَنت کہ چہ ایشی ءَ دمگی آبادی ءَ را سکیں تکانسری ءِ دیمپانی انت-

پی ڈی ایم اے بلوچستان ءِ رد ءَ 28 جون ءَ چہ برجاھیں ھور ءِ وھد ءَ اُستان ءِ جتا جتائیں دمگانی تہ ءَ 58 لوگ ءَ تاوان رس اتگ کہ ایشانی تہ ءَ 11 سرجمی ءَ تباہ بوتگ انے ءُ 47 کمے ءَ تاوان بوتگ انت۔

واکدارانی گشگ انت کہ آماچیں دمگاں وردن، تمبو ءُ دگہ بنیاتی کمکی سامان دیگ بوگ ءَ انت وھدے کہ ریسکیو ٹیم، بنجاھی انتزامیہ ءُ پی ڈی ایم اے ءِ واکدار کمکی کاراں گوں دزبند انت۔

مھلوک ءَ را ھال دیگ بوتگ کہ آ بشی ھورانی وھد ءَ کور دپاں دور بہ بنت ءُ بے زلوری ءِ سپر ءَ مہ رو انت ءُ دمگی واکدارانی جارانی سر ءَ امل بہ کن انت ءُ دانکہ ھچ وڑیں گمانی تاوان پیش مہ بیت انت-

انجینئرنگ یونیورسٹی ھُزدار ءِ نودربر، ظفراللہ بنگلزئی ءِ زورانسری آوار جنی ءَ پانزدہ سال سرجم بیتگ، ظفر اللہ سیزدہ جولائی 2010 ءَ وتی ناکو ڈاکٹر سرور ءِ ھمراھی ءَ میتگ ءِ کابو، نزیک اسپلنجی، تھسیل دشت، مستونگ ءَ یک لشکر کشی ءِ میان ءَ آوار جتگ ءُ برتگ کہ ھما اِنت بیگواہ ءَ اِنت-

ظفراللہ بنگلزئی انجینئرنگ یونیورسٹی ھُزدار ءِ سول ٹیکنالوجی ڈیپارنمنٹ ءَ فائیل ایئر ءِ نودربرے بیتگ- آئی ءِ مات ءِ گوشگ رِد ءَ دراجکشیں بیگواھی ءِ کھول ءِ تُرندیں سسّائی ءِ نادُراھی ءِ آماچ اَنت-

ظفراللہ ءِ مات ءَ گْوشتگ کہ مئے لوگ یک کبرستانے جوڑ بیتگ، سرجمیں وشی مئے پُلّگ بیتگ اَنت- ما ریاستی ادارھاں، کمیشنز، آمیدگس ءُ ھرچ وڑیں فورم ءَ چہ شتگ ایں، بلے ھچ کس مئے پریات ءَ گوشدارگ ءَ جاڑیگ نہ اِنت-

نااُمیتی ءَ چہ آئی ءَ میان اُستمانی انسانی ھکانی ادارہ ءُ انساپ ءِ میان اُستمانی ادارھاں چہ دزبندی کتگ کہ آ آئی ءِ چُک یل کنائینگ ھاتر ءَ توار چست بہ کن اَنت-

آئی ءَ گْوشتگ کہ جھان انساپ پسندیں ادارہ ءُ انسانی ھکانی سرجمیں گلاں چہ دزبندی کتگ کہ منی چُک ظفراللہ بنگلزئی ءِ واستا توار چست بہ کن اِت دانکہ آ یل کنگ بہ بیت-