TBP Balochi

بلیدہ ءَ نشہ ءِ ھلاپ ءَ زھرشانی

دی بلوچستان پوسٹ

دی بلوچستان پوسٹ پتر ھال ءَ سر بیتگیں ھالانی رد ءَ بلیدہ ءِ دمگ الندور ءَ نشہ باپاری کنوکانی ھلاپ ءَ زھرشانی کنگ بیتگ –

زھرشانی ءَ نودربراں ھوار چاگردی مردماں بھر زرتگ ءُ زھرشانی کنوکانی دست ءَ نبشتگ کرتگیں تاکانی سر نبشتگ کنگ بہ بیتگ کہ دمگ ءَ نشہ باپاری کنگ بند کنگ بہ بیت –

بلوچستان ءِ جتائیں جاھاں سرکاری پلامرزی ءَ نشہ چوں دکانی سامانانی پیم ءَ بھا بیگ ءَ اِنت –

آیاں گْوشت کہ نشہ ءَ سرجمیں چاگرد ءِ سیاہ شپ ءَ تھار کرتگ ءُ ھمک نوک ردوکیں ورناہ نشہ ءِ آماچ اِنت ءُ آ چہ وتی جند ءَ بے سما اِنت –

زھرشانی ءَ ھواریں مردماں گْوشت کہ ما ھما وھد ءَ وتی زھرشانی ھلاس نہ کن ایں دانکہ دمگ ءَ نشہ باپاری ءِ یک بنجلے ھست ءُ آ داں بند کنگ نہ بیت مئے زھرشانی گیش ترندتر کنگ بیت اِنت –

زانگ بہ بیت گوستگیں روچ ءَ ھم الندور ءَ لس دمگی ءُ چاگردی مردمانی نیمگ ءَ نشہ باپاری ءِ ھلاپ ءَ روانک کشگ بیتگ اَت –

آیاں گوشت کہ یک کسانیں میتگے ءِ تہ ءَ سد ءَ چَہ گیش نشہ بھا کنوک ھست اَنت کہ کس آیانی ناماں گپت نہ کنت اگاں کَسے ءَ اشانی ھلاپ ءَ باھند گڑا سرکاری مردم آئی ءِ سر ءَ مِک بنت –

آیاں چَہ لس چاگرد ءُ دمگداراں لوٹ کرت ءُ گوشت کہ مئے آیوکیں چاگرد ءَ بہ رکین اِت ءُ نشہ باپاری کنوکاں بہ گر اَنت ءَ ڈنڈ بہ دے اَنت –

اورماڑہ ءَ دگ ءِ ویل ءَ ایف سی ءِ لیفٹینٹ کرنل مرتگ، میجر زدگ

دی بلوچستان پوسٹ

بلوچستان ءِ دمگ اورماڑہ ءَ پیش اتکگیں دگ ءِ ویل ءَ ایف سی ساؤتھ کیچ ءِ لیفٹننٹ مرتگ –

تربت ءَ چَہ کیچ ءَ روکیں گاڑی مزن شھدگ ءِ دمگ بسول ءِ ھند ءَ پیش اتکگ چریشی ءِ آسر ءَ ایف سی ساؤتھ کیچ ءِ لیفٹینٹ کرنل اشتیاک اھمد مرتگ ھمے وڑ ءَ میجر شھباز ءُ ڈرائیور نواز اھمد زدگ بیتگ اَنت –

لیویز بنشون ءِ رد ءَ پوج ءِ زدگ بیتگیں مردم اورماڑہ ءِ نادراہ جاہ ءَ برتگ اَنت ءُ اود ءَ آ درمان کنگ بیگ ءَ اَنت –

دمگدار ءِ گوشگ اِنت کہ ویل ٹائر ءِ ترکگ ءِ سوب ءَ بیتگ –

نبشتانک: گُڈّی نِمدی

نبشتہ کار : مھروان کمبر

دی بلوچستان پوسٹ

مروچی جنگ ءِ چارومی روچ اَت کہ آئی ءَ تیر وارت ءُ سک ٹپّی بوت۔ ھما روچ ءَ کہ جنگ بِندات بوت ھمے شپ ءَ آئی ءَ وابے دیست کہ آ دیر سریں کَورے ءِ مْیان ءَ اُوشتوک اِنت ءُ کَور ءَ ھار کُتگ۔ کَور ءِ ھما دست ءَ مِنجیں کَھیرے ءُ کَھیرے چیر ءَ گْوانزگے دْرتکگ ءُ یک کبرے ءُ کبرے سر ءَ ھُشکیں نازبوہ ءِ تاک اَنت ءُ لَھتیں اگربتی ءِ بُنڈُک اَنت ۔ کَور ءِ آپ گیش بُوَان اِنت ءُ آپ ءِ رنگ مٹان اِنت ءُ سُھر بُوَان اِنت۔۔۔ھمے دمان ءَ آئی ءَ واب ءَ چہ بُست کُت ءُ کَوش پہ دابے کشّگ ءَ اَت، بَلے آ انگت چہ ھید ءَ میچل اَت۔۔چاگل ءَ چَہ آپ ئِے وارت ءُ پد ءَ وپت۔ ساھتے ءَ چہ رند آئی ءِ کش ءِ اِیریں واھرلیس سیٹ ءِ گیژ گیژ ءَ گُڑینت ۔ گاٹ دیوکیں ورنا ءِ توار اَت کہ ھیلیانی توار اِنت ، دُور اَنچو گُمان بیت زمینی لشکر اوں سُر ءُ پُر کنان ءُ دیم ءَ جنزان اَنت۔۔
آ گُشاد گُشاد ءَ پاد اتک وتی دْرستیں وابیں سنگت پاد کُت اَنت ءُ سامان نزّار اِت اَنت تاں ھیلی سر بیت اَنت ۔۔۔پد ءَ ھیلیانی شیلِنگ بِندات بوت۔۔ بے کِساس تیرانی توار۔۔۔ ھمے دمان ءَ آئی ءِ راستیں کش ءَ سنگر گِپتگیں سنگت ءَ تیر وارت ءُ شھید بوت۔بلے آ گوں جَوزگ ءَ جنگ دیان اَت وتی سنگتانی کشّگ ءِ جُھد ءَ اَت۔۔۔
مروچی کہ جنگ ءِ چارومی روچ اَت دو سنگت شھید بیتگ اَت ، گیشتریں سنگت درایگ ءَ سُوب مند بیتگ اِت اَنت. دُژمن سک تاوان بار اَت کہ آئی ءَ تیر وارت ءُ سک ٹپّی بوت۔۔۔ آئی ءَ وت ءَ نزیک ءِ دازے ءِ تہ ءَ سر کُت ءُ جاٹہ ءَ چہ کاپی ءِ تاکے ءُ کلمے کش اِت وتی نوک ودی بیتگیں بچّ ءِ نام ءَ نِمدی یے نبشتہ کنگ ءِ بندات کُت۔۔

منی نوک ودی بیتگیں بچّ وشیانی منگیراں بات ئے!

منی یلیں بچّ! زِند جیڑگ ءِ نام اِنت ، پہ وشیں بانداتے ءِ ھاتر ءَ جُنزگ ءِ نام اِنت ، ھر وھدے کہ تو دیم ءَ جنزان بَہ ئے گُڑا سبک ءِ ھاتر ءَ پُشت ءَ ھم چَکّے بجن بِہ چار گوں۔۔۔ من ءَ ارمان اِنت کہ من تئی واستا سُتکگ ءُ پُر بوتگیں اُمیتانی دنیایے یل کنگ ءُ رَوگایاں۔۔۔ردیانی سر ءَ کُتگیں ردیانی دنیایے۔۔۔گم ءُ رنجانی دنیایے۔۔ھونانی سر ءَ تلکار بستگیں ھونانی دنیایے۔۔
منی بچّیگ من ءَ پھل کن۔۔۔۔ گْوست ءِ ردیانی زانت ترا بہ بیت ، بَلے دیم ءَ وتی آیوکیں زِند ءِ سر ءَ چمّے ایر بکن ءُ رُژنائیں سُھبے ءِ ٹِکّ دَیَگ ءِ ودار ءَ بِہ کن. وتی زند ءَ گوں مھر بِہ کن بَلے مرگ ءِ تُرس ءَ وتی دل ءَ کدی ھم میار۔اگاں وتی زندگی ءِ گون ءَ مھر نہ کن ئے گُڑا اے زندگی ھچ درد ءِ دوا نہ بیت ءُ بے مُزّیں زندگی یے گْوشگ بیت۔بلے باز رند ءَ گیشیِں مھر ھم شر نہ اِنت ،انچیں جاور کاینت زندگی ءَ گُڑا مردُم ءَ مرگ امباز کنگی اِنت۔اے وڑیں جاور اگاں تئی زندگی ءَ اتک اَنت، تو اوں چو میر کمبر ءَ مرگ ءَ پہ ھلو ھالو وش اتک بِہ کن۔ وتی پت ءُ پیروکی کبراں امبوہ بِہ کن ۔۔
منی بچّ، وتی تھ ءِ جوان مردی ءُ جوش ءَ مُدام زِندگ بدار، بَلے اِیشی ءَ لگام بِہ دے۔ تئی جوزگانی آس تئی آیوکیں سالاں، تئی اندر ءِ دنیا ءَ انسان ءَ گوں مھر ءِ باگ ءَ گُل ءُ گُلزار کنت۔ اے آس انچیں آسے کہ تو اِیشی ءِ بْرانزاں آجو کن۔وتی دیدگانی اندر ءَ انچیں کندیلے بلین کہ تو زندگی ءِ گُڈّی سیمسراں سر بِہ بَہ ئے، گُڑا تئی پدریچ ءَ مِنزل ءِ نیمگ ءَ رَوَگ ءِ واستا تھاریں شپاں راھے پیش بدار اِیت۔
پہ وت مُدام ھیرانی ءُ کراماتاں شوھاز بِہ کن، پہ نوکیں چیزانی ھاتر ءَ وتی اندر ءِ دنیا ءَ چراگاں بالین۔ چمّاں انچو بُرز ءَ شانک بِہ دے کہ آزمان ءِ گُڈّی سیمسراں ھم بِہ گِند ئے۔ اے دراہ تئی جند ءَ تئی اندر ءَ زندگ کن اَنت۔ ایشی ءَ ابید گوں گْرانیں ساھتاں ھم دیم پہ دیم بُوَگ ءِ سکت وتی تہ ءَ ودی بِہ کن۔ دُگنیا ءَ یک انچیں دودے ھست کہ آ ھچبر بدل نہ بیت۔ آ ایش اِنت کہ ھر تھاری ءَ پد بامے بلیت ءُ رُژن تالان بیت۔ اے دود یک دائمی دودے کہ مُدام ھست اِنت ءُ اے دود ءَ یات کن۔
تو ھر کارے کہ کن ئے وتی سرجمیں دلگوش ءَ آئی ءِ سر ءَ ایر کن۔ مُدام ھِمت، توکل، دلیری ءُ بھادری ءَ وتی تہ ءَ زِندگ بِدار۔ تُرس ءَ چہ تُرسگ بے دِلی اِنت، ھاں تُرس ءِ گٹ گِرّگ ءُ تُرس ءَ لگام دَیگ لوٹ اِیت۔ اگاں اے دُگنیا ءَ تو مردُماں پہ بَدّی گِندئے کہ چینچو بدکاری کن اَنت، چہ ایشاں دلپروش مہ بو۔ پرچاکہ رُژنائی چہ درد ءُ گمانی جمبراں چہ درکَیت۔ ھمے راہ ءَ جُنزان بو، تئی باتِن ءَ ھمے چاڑانی دریا اِنت کہ مُدام چَول جَنّگ ءَ اِنت۔
وتی ھمبلانی گون ءَ مُدام وشیاں گون لیب بِہ کن، بَلے اگاں ھما چیز ءَ تو گِند ئے ھراب اِنت گُڑا گْوشگ ءَ اوں چَک ءُ پد مہ بَہ ئے۔ وتی زمین ءِ ھر نِدارگانی تہ ءَ زند ءِ وشیاں شوھاز بِہ کن ھوری تْرمپ بِہ بَہ اَنت یا چو پُکّی ءَ رِتکگیں برپانی ٹُکّر بہ بَہ اَنت۔۔۔درچکانی سر ءَ رِتکگیں نمب بِہ بَہ اَنت یا مُرگانی ڈولداریں بانزُل بِہ بَہ نت۔ کاڑے ءِ بچکند بِہ بَہ اَنت یا کہ تیاب لمب ءَ سنجارو ءِ نِدارگ، جلّیں نیمروچے ءِ روچ ءِ برانز بِہ بَہ اَنت یا کہ کَوش ءِ شیکّگ، دریا ءِ چَول، مُرگانی توار، گْونڈ گْونڈیں چیزانی تہ ءَ زند ءِ وشیاں شوھاز بِہ کن۔۔
منی بچّ ، مئے زُور گپتگیں زمین ءِ آجو کنگ ءِ ھاتر ءَ من گوں وتی ھمبلاں ھوناں ریچگ ءَ آں ھمے زمین ءَ گوں مھر بِہ کن ، زمین ءِ موکگ ءَ تو ھم مات کوھاں درا ءُ منی تُوپک ءَ کپگ ءَ مَیل۔
بَہ کَول ء شائر ئیگ ءَ اے جنگ ءِ گیشتریں بھر ھلاس بیتگ اَنت ءُ بس تئی بھر ءِ تیراں کہ پش کپتگ اَنت۔۔۔۔۔۔۔
نِمدی ھمد ءَ رستگ اَت کہ آئی ءِ زُور ھلاس ءُ چمّ تھار بُوَان اِت اَنت ۔۔۔آئی ءِ ارواہ ءَ بال کُت پہ وتن نمیران بوت۔۔۔۔۔۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گریس ءَ برمش یکجھتی کمیٹی ءِ نیمگ ءَ زھرشانی

دی بلوچستان پوسٹ

بلوچستان ءَ ھوار دراں ڈیھاں تربت ڈنک ءِ ویل ءِ ھلاپ ءَ زھرشانیانی درچ برجاہ اَنت –

دی بلوچستان پوسٹ پتر ھال ءَ سر بیتگیں ھالانی رد ءَ برمش یکجھتی کمیٹی گریس ءِ نیمگ ءَ ڈنک ویل ءِ ھلاپ ءَ مرچی 13 جون 2020 ءَ ایتھنز کیپسیلی اسکوائر ءَ یک زھرشانی یے برجم دارگ بیتگ – کہ اے زھرشانی ءَ بلوچ کمیونٹی ءُ ماں گریس ءَ انسانی ھکاں پہ کار کنوکیں این جی اوز ءِ مردماں بھر زرتگ –

زھرشانی ءَ برمش یکجھتی کمیٹی ءِ سنگتاں دری مھلوک ءِ سرپدی ءِ ھاتر ءَ ماں یونانی ءُ انگریزی زبان ءَ پمفلٹ (پنتاک) بھر کرتگ –

برمش یکجھتی کمیٹی ءِ مردماں چہ میان اُستمانی آمدگساں لوٹ کرتگ، یورپی یونین ءُ یو این او ءَ کہ پاکستان بلوچستان ءِ سر ءَ زوگری ءَ پد جتائیں ریپک ءُ ھنراں بلوچ ءِ نسل کشی ءَ کنگ ءَ اِنت،ڈنک ویل ءَ پد اے چیز دنیا ءِ دیما پدر بیتگ کہ ڈیتھ اسکواڈ ءِ پشت ءُ کمکی ءَ پاکستانی آرمی ءُ آئی ءِ چیریں ادارہ کنگ ءَ اَنت –

زھرشانی ءَ بھر زورکیں مردماں گوں لوٹ کُرت ءُ گْوشت کہ دودمانیں دنیا ءِ زمہ واری بیت کہ بلوچستان ءِ سر ءَ پاکستانی زُلم ءُ زوراکیاں بہ دار اَنت-

آیاں گْوشت کہ بلوچ ءِ راج ءِ نسلی ءَ کُشی ءِ سر ءَ پاکستانی فوج ءَ آئی جوڑ کرتگیں ڈیتھ اسکواڈ ءِ کارمنداں بہ دار اَنت –

شئیب گوستگیں پنچ سالاں ریاست ءِ چیردستی ءَ بلوچانی آوار جنگ، دُزی ءُ زور زرگری ءَ ھوار بیتگ – بیبگر بلوچ

دی بلوچستان پوسٹ

بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں بیان ءِ تہ ءَ گْوشتگ کہ مئے سرمچاراں مروچی پنجگور ءِ دمگ چتکان ءَ تیرگواری کُتگ ءُ شئیب نامے ریاستی کارمندئے کُشتگ کہ آ گوستگیں پنچ سالاں چہ ریاستی ادارھانی چیردستی ءَ کار کنگ ءَ بیتگ –

جارکش ءَ گْوشت کہ گل ءِ پٹ ءُ پول ءِ رِد ءَ اے کُتگکارا دہ ءَ گیش بزگریں بلوچانی آوار جنگ ءَ ھوار بازیں پوجی آپریشناں گوں تچکی ءَ ھوار بیتگ وھدیکے گچک ءَ چَہ رؤکیں لوکل بسانی تہ ءَ بزگریں بلوچ راج ءِ وردنی پمے ھاتر ءَ پوج ءِ دست ءَ گرائینتگ انت کہ اے مڈی پہ سرمچارانی ھاتر ءَ برگ بوَگ ےَ اَنت- اشی ءِ کُتگکاریانی تہ ءَ اے ھم ھست انت کہ مئے گل ءِ نام ءَ کاروباری مردماں چہ ملام گپتگ ءُ لوگانی تھا دُزّی کنائینتگ- ءُ اے مرد ءَ دُزی کُتگیں مڈی ءُ ملام گوں پنجگور ایم آئی آفیسر ناسر علی ءِ گون ءَ بھر ءُ بانگ کُرتگ انت – اشی ءَ اے سجوئیں کار ھرابی ایم آئی ءِ آفیسر ناسر علی ءِ چیردستی ءَ کرتگ اَنت –

بیبگر بلوچ ءَ دیمترا وتی بیان ءِ تہ ءَ گْوشت کہ ما پیش ءَ گْوشتگ کہ ریاستی پوج ءَ پروش وارتگ، پمے ھاتر ءَ ھندی مردماں گیشتر بلوچ ورنایاں پوڑی دنت ءُ جنز ءُ چاگرد ءِ بگیری ءَ کارمرز کنت، ما یکرندئے پد ءَھمے لوٹ ءَ کن ایں کہ آ ریاستی ھنر ءُ ھیلاں سرپد بہ بنت آئی ءَ چہ دور بہ بہ انت-

بیبگر بلوچ ءَ گْوشت کہ اُرش ءِ میان ءَ بے گناھیں مرد پیربکش ءِ ٹپی بوَگ ءُ پد ءَ رند ءَ آئی ءِ بیرانی ءِ سر ءَ دلپدردی درشانتگ گْوشتگ کہ ما لس مھلوک ءَ چہ لوٹ کن ایں کہ آ ریاستی چاریگ ءُ پوج ءَ چہ دور بہ بہ انت – پرچا کہ ما آھانی بگیری ءَ وتی اُرشاں ترندتر کن ایں –

گُڈسر ءَ جارکش ءَ گْوشتگ کہ مئے اُرش بلوچستان ءِ وتواکی ءَ داں برجاہ مان اَنت –

سربیتگیں ھالانی ردءَ بلوچستان ءِ دمگ تُربت گوگدان ءَ لیویز کارمند نبیل ء خورشید ءَ بی ایس او ءِ گوستگیں سینٹرل کمیٹی ءِ باسکطارق امام ءِ کستریں گھار ءِ لوگ ءَ دور کُتگ ءُ طارق امام ءِ کستریں برات فیصل امام ء امام بخش ءِ سر ءَ کُشگ ءِ ھاتر ءَ اُرشکُتگ ءُ تتکگ۔ 

سربیتگیں ھالانی ردءَ نبیل ء خورشید ایم پی اے لالا رشید ءِ گاٹ اِنت ھم ءُ ھمے درگت ءَ چاگردی رسانکدر ءَ یک عکس ءِ ھم شنگکنگ بیتگ کہ نبیل ءُ لالا رشید یکجاہ گندگ بنت۔ 

دی بلوچستان پوسٹ ءَ سر بیتگیں ھالانی رد ءَ بلوچستان ءَ لوگانی سرا اُرش یکشل ءَ برجاہ اَنت ۔ یک نیمگیں شھید ملکناز ءُ برمش ءَ پہانساپ ءِ لوٹ کنگ ءُ ڈیتھ اسکواڈانی ھلاپ ءَ زھرشانی برجاہ اَنت دومی نیمگ ءَ سلکارانی نیمگ ءَ چہ انگت ھم بلوچ لوگانی تھ ءَدور کنگ ءُ مردماں کُشگ ءُ ٹپی کنگ ءِ کار برجاہ اَنت ۔ 

ھمے وڑ ءَ مروچی چہ تُربت گوگدان ءَ سر بیتگیں ھالانی ردءَ یک بلوچ لوگے ءِ تھ ءَ نبیل ء خورشید کہ بلوچستان ءِ وزیر لالا رشید ءِ گاٹ اِنت آئی ءَ یک بلوچ سیاسی جھد کار طارق امام ءِ کستریں گھار ءِ لوگ ءَ دور کُتگ ءُ آئی ءِ کستریں برات فیصل امام ءِ سر ءَ اُرشکُتگ۔ 

مھلوکانی گُوشگ اِنت کہ نبیل ء خورشید ءَ لالا رشید مستری گون اِنت ءُ اے ویل ھم ڈنک ویل ءِ وڑءَ بلوچ دود ربیدگانی ھلاپاِنت۔ یات بہ بیت ڈنک ویل ءَ دزگیر بیتگیں مردمانی سیادی گوں سمیر سبزل ءِ ڈیتھ اسکواڈ ءَ بیتگ ءُ مردمانی رد ءَ سمیر سبزل ءَبلوچستان فنانس وزیر زھور بلیدی ءِ کمک ءُ مستری گون اِنت۔ 

ڈنک ویل ءَ پد بلوچستان ءِ مھلوکانی نیمگ ءَ چہ ڈیتھ اسکواڈانی ھلاپ ءَ ءُ آیانی ھلاسی ءِ ھاتر ءَ یکشلیں زھرشانی برجاہ اَنت۔

گوادر، زھری ءُ جرمنی ءِ شھر برلن ءَ پہ برمش روانک کشگ ءُ زھرشانی کنگ بیتگ۔

دی بلوچستان پوسٹ

بیست ءُ شش مئی ءَ تُربت ڈنک ءَ بیتگیں ویل ءِ ھلاپ ءَ انگت زھرشانی برجاہ اَنت۔ مروچی ھم برمش یکجاھی پتر نیمگ بلوچستان ءِ دمگ گوادر ءَ یک مزنیں زھرشانی روانک ءِ کش بیتگ کہ جتا جتاھیں دمگاں اوگام جنان ءَ گُڈ سرا یک مچی ءِ تھءَ بدل بیتگ۔

زھرشانی روانک ءِ تھءَ گوادر ءِ ورناہ،کماش، زھگ ءُ زالبولانی مزنیں کساس ئے ءَ بھر زرتگ ءُ پہ برمش ءَ انساپ ءِ لوٹ کُتگ۔

زھرشانی ءَ گوں ھسین واڈیلہ، سھید پیض، عین قادر ءُ بالاچ قادر ءَ ھوار زالبولاں ھم تران کُتگ۔ تران کنوکاں تران کنانءَ لوٹ کُتگ کہ شھید ملکناز ءِ کوش ءَ ھواریں ڈیتھ اسکواڈ ءِ مردماں تُربت ءِ چوک ءَ پاھو دیگ بہ بیت۔

زھرشانی کنوکاں گوشتگ کہ مئے زھرشانی داں ھما وھد ءَ برجاہ بنت کہ بلوچستان چہ ڈیتھ اسکواڈ سرجمی ءَ ھلاس کنگ نہ بنت ءُ بلوچستان چہ منشیات ءَ پھک کنگ نہ بیتگ۔

ھمے وڑ ءَ بلوچستان ءِ دمگ زھری ءَ ھم برمش یکجاھی پتر ءِ نیمگ ءَ چہ یک روانک ءِ کُشگ بیتگ ءُ مھلوک ءَ لوٹ کُتگ کہ برمش ءَ انساپ دیگ بہ بیت ءُ شھید ملکناز ءِ کوش ءَ ھواریں ءُ برمش بلوچ ءَ ٹپی کنوکیں کُتہ کاراں زیت ءَ زیر سزا دیگ بہ بیت۔

بلوچستان ءُ بلوچستان ءَ چہ ڈن ھم برمش یکجاھی پتر ءِ نیمگ ءَ چہ زھرشانی یک شل ءَ برجاہ اَنت۔ ھمے وڑ ءَ مروچی برمش یکجاھی پتر ءِ نیمگ جرمنی ءِ شھر برلن ءَ یک زھرشانی ءِ کنگ بیتگ کہ ایشی تھءَ بلوچ ورناھانی مزنیں کساس ئے ءَ بھر زرتگ ءُ اوگام جتگ کہ برمش ءَ انساپ دیگ بہ بیت ءُ بلوچ نسل کشی دارگ بہ بیت۔

زانگ بہ بیت برمش یکجاھی پتر بلوچستان ءِ تھءَ یک نوکیں زرمبش ءِ وڑ ءَ دیما روگ ءَ اِنت، اے اولی رند اِنت کہ بلوچستان ءِ درستیں سیاسی، چاگردی، ادبی ءُ نودربرانی گل چہ وتی گلانی نیمگ ءَ نہ بلکیں برمش یکجاھی پتر ءِ نیمگ ءَ چہ مھکمیں ءُ یکشلیں زھرشانی کنگءَ اَنت۔

سربیتگیں ھالانی ردءَ بلوچستان ءَ دیمترا ھم زھرشانی اڈ دیگ بنت ءُ ھمے وڑ یورپ ءَ ھم جتاھیں دمگانی تھءَ زھرشانیانی جار پرینگ بیتگ۔

ھزدار ےَ پاکستانی پوج ءَ شش مردم دزگیر کنگ ءَ پد ناشناسیں جاھاں برتگ اَنت

دی بلوچستان پوسٹ

سر بیتگیں ھالانی رد ءَ پاکستانی پوج ءَ ھزدار ءِ دمگ گریشگ ءَ شش ورنا دزگیری ءَ پد ناشناسیں جاھاں برتگ اَنت –

دزگیر کنگ بیتگینانی تہ ءَ آزُم ء داؤد، زاھد ء نیک مھمد، رپیک ء الی، ستار ء مھمد، وزیر ء مراد ءُ تارک ء امین ءِ ناماں زانگ بیتگ اَنت –

گوشگ بیگ ءَ اِنت کہ اے مردمانی لوگاں پوج ءَ بیڑ برتگ ءُ آوار جتگ اَنت – اشانی تہ ءَ آزُم ءُ زاھد گریشگ ءِ ھند زباد، رپیک، ستار کوچہ ءُ تارک گونی ءَ چَہ دزگیر کرتگ ءُ برتگ اَنت –

زانگ بہ بیت گریشگ ءَ گوستگیں ماہ ءَ ھم بازیں ورنایے پوج ءَ دزگیر کرتگ ءُ بیگواہ کرتگ اَنت –

شہید اَمّا ملکناز ءُ کودکیں
بْرمش ءِ نام ءَ

شائر: محسن امام

دی بلوچستان پوسٹ

اے چم جَہلی ءُ
بے حیائی بلوچی کارے
نہ بوتگ پیش ءَ
بلوچ پہ غیرت ءُ حیا انت

بلوچ ءِ بَہت ءَ
بلوچ ءَ دشمن
نہ بوت پہ نام ءَ

اگاں بچارئے
بلوچ ءِ دشمن لگور بوتگ
ءُ کور بوتگ

لگور مُچّ اَنت،
لگور مان اتکگ اَنت
ہمک نیمگا پہ جنگ ءَ
گوں چُک ءُ چوری
گوں زالبولاں
گوں پیر مرد ءُ
کماش ءُ چُکاں

ماں وپتگیں واب ءَ
لوگ ءَ دَور کن
بہ جن، بُکش
چُک ءُ چوریان ءَ
بہ کن پُل ءُ لُٹ
مال ءُ مّڈی
برو وتی واجہ ءِ پَناہ ءَ

برو بدئے ھال
واجہ ءَ من کلات گپتگ

بلوچ بدواہگ ءَ را کسّے
بہ دنت اے ھال ءَ
بلوچ باجو ءُ ریپ کاراں
بلوچ ءِ جنگ ءَ نہ برتگ باجے

بلوچ ءَ بَس
یک جُستے ءِ
پسّہ ءِ ودار اِنت
بلوچ ءِ دشمن
کُجام لگور اِنت
ہمے کہ مرچی
بلوچ ءِ رنگ ءَ
گوں دشمن ءَ اِنت؟
یا دشمن اِنت کہ
بلوچ ءِ رنگ ءَ
بلوچ ءِ چُک چینی ءَ
گُلاش اِنت؟؟

بلوچ غدّار ءُ
جوریں دشمن
دل ءَ بزان اَنت
بلوچ ءِ بیر اِنت
نہ بیت بیگْواہ