TBP Balochi

نبشتانک: ترانگ

نبشتہ کار: عتیقہ بلوچ

دی بلوچستان پوسٹ

کسانی ءِ ترانگ چوناھی ءَ هجبر اچ ما جُتا بوت نہ کن انت ءُ چہ اے ارواه ءِ اوتاگاں سِست نہ کن انت.
بلے اے زند ءِ همک روچی تَچ ءُ تاگاں جیڑ ءُ جنجالانی گِر ءُ داراں ابید اے دگہ تک ءُ پھناتانی پیڑاتگیں زمزیلاں هچ موه نرسیت کہ مردم وتی کسانی ءِ همبلاں گوں هور ءُ یکجاه بہ بیت. بلے هردیں کہ اے زند موه دنت گرا ما پد ءَ وتی کسانی ءِ همبلاں گیر کاریں ءُ یکجاه بہ ایں.

گڑا مئے گُلگدار دیوان ءُ بُنگپ پد ءَ هما کسانی ءِ یات ءُ ترانگ بنت.
کسانی ءِ شیتانی مسکرا کندگ لیب گوازی درس دیم ءَ چو تامورے ءَ نکش بنت.
مروچی هم پد ءَ اینچو وهد ءِ گوزگ ءَ پد گوں وتی کسانی ءِ مهروانیں همبل ءَ نند ءُ نیادے بوت.

گوست ءِ گپ ءُ ترانگانی پد ءَ سپرے بندات بوت.
وتی میتگ گوادر ءِ رنگ ءُ زیبائی….. همیں دمک ءُ بازار ءَ گوں بستگیں چاگرد ءِ پد ءَ مولُم ءُ مارشتاں مارا بندوک کُت.
گوادر ءِ وشبو ، کِشک ، میتگ ، درچک ، دار کوه ، زِر ءُ چولانی توار هم مئے گوست ءُ کسانی ءِ کِسھاں نازینگ ءَ ات اَنت.

هما کِسہ ……. کہ گوں تئی شھدیں کندگاں گوں بِنا بوت ،تئی پُر مهریں بچکند ءُ چمانی رُژنائی کسھاں زِر ءِ چول پدر کنان ات اِنت.
کسہ…. اے شهر ءِ کِسہ ….
کِسہ … مئے گوست ءِ کِسہ
کِسہ … هما کِشک ءُ دمکانی کہ مارا لوگ ءَ سر اِش کتگ .
اسکول ءُ وانگ ءِ کِسہ میتگ ءُ مردمانی کِسہ ….
وانگ جاه ءَ موکل ءَ پد لوگ ءِ ودار ءِ کِسہ ….. چیچک ، بیدام ءُ چکو ءِ سِندگ ءِ کِسہ …. بیگاه ءَ تیاب دپ ءَ لیب ءُ گوازی ءِ کِسہ …. کِسہ گوستگیں ترانگانی کِسہ ….
ما همے کِسھانی تہ ءَ زند ءِ وشی ءُ کودکی گوازینتگ انت. کسانی ءِ سپر کدی سرجم بوت ءُ ما چو مزن بوتیں مارا هچ سما نہ بوت…
ھو اڑے کسانی ……ھو اڑے کسانی ءِ ترانگ.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نِمدی یے تارک پیشکانی ءِ نام ءَ‌َ

نبشتہ کار: دیدگ گُل

دی بلوچستان پوسٹ

تارک پیشکانی!

دْروت ءُ دْراه بات ئے

من وھدے کہ تئی وانگی “تَلک” (گوشکندانی کتاب) ءِ وانگ ءَ بندات کُت گڑا اے دِل ءَ دم نہ بُرت کہ یل ءَ بدیان ئِے ۔ پرچاکہ اے کتاب گمیگیں دِل ءَ کندین اِیت پمیشکا من اے کتاب ءَ چہ باز دربُرت ، اگاں کسّے گمیگ بہ بیت من اگاں گوشکندے بہ گُشان ئِے بلکیں آ گَل بیت۔

تئی گوشکند کہ من وانتگ اَنت گڑا ھما وھد ءَ گوں کسانیں دیوانے ءَ گشتگ اَنت ھما کہ من ءَ سک دوست بوتگ ، گڑا باز سنگت ءَ من ءَ مُدام گشتگ کہ ایشاں تو اردو یا انگریزی ءَ رجانک بہ کن باز جوانیں گوشکند اَنت پرچاکہ منی بلوچی سک نزور اِنت ھمیش اِنت نوں دربرگ ءَ آں۔باز گوشکند من وتی گوانکو ءِ تہ ءَ نبشتہ کتگ ءُ باز سنگت ءِ سر ءَ دیم داتگ ءُ ایشانی مُدام جُست ھمے بوتگ کہ تو گوشکنداں کُجا چہ کار ئے ؟۔

ترا اگاں باور کنت تئی وانگی من اندازہ بیست مردم ءَ داتگ پد ءَ آیاں چنچو مردم ءَ داتگ بے ھساب من ءَ اے ھساب گُور نہ اِنت ءُ منی گپ ءِ مُول ءُ مراد ایش نہ اِنت کہ تئی وانگی ءِ تاریپ ءَ بے پائدگ بہ کناں،تئی وانگی لائک ء تاریپ اِنت۔ منی مُول ءُ مراد بزاں مردم ھما کتاب ءَ چاپ ءُ شنگ بہ کنت ، ھما کہ وتی چاگرد ءَ وشّیں دروشمے ءَ گندگ ءَ بئیت۔اے تئی وانگی اِنت بزانکہ کُل بلوچستان ءَ بازیں مردمے ءَ وانتگ پرچاکہ اے وانگی ءِ وانگ ءَ مارا تاھیر رس اِیت ءُ دِل ءَ مُدام کندین اِیت۔

یک دگہ ھبرے من ءَ تئی وانگی ءِ تہ ءَ سک دوست بوت ءُ ھمے ھبر ءَ من ءَ سکّین دات کہ پہ تو نمدی یے نبشتہ بہ کن آں۔تو وتی پیشگال ءِ تہ ءَ نبشتہ کتگ اَت کہ “باز سنگت ءَ من ءَ گشتگ کہ اے وانگی ءَ کہ تو شنگ کنگ ءَ ئے بے کار اِنت ” من ترا سلام کن آں کہ اے کار تو بے دلبڈی ءَ کتگ ءُ دیم ءَ آؤرتگ۔اگاں اے گپّ ءَ من بہ گُش آں ترا مردماں گُشتگ کہ گوشکندی وانگی کار ءَ نئیت اِنت من گُش آں اے باز جوانیں کارے تو کتگ پرچاکہ اے اولی مردم تو ئے کہ گوشکندی وانگی یے شنگ کتگ۔اگاں ما بہ رُو ایں دُکانے ءَ آ دُکان ءَ کم چیز بہ بیت گڑا من گیشتر دگہ دُکاناں رو اَنت، ھما دُکان ءَ کہ گیشتر چیز مان پرچاکہ یک جاھے تئی کار بیت زاھر اِنت تو دگہ جاگہ ءَ نہ رو ئے ءُ انچو کہ نارُشت ءَ کم چیز مان بہ بیت گڑا آ گیشتر وشّ تام نہ بیت۔ اگاں تو گیشتر چیزے مان کن ئے آ وت تامدار بیت ، انچوش کہ بلوچی ءَ گیشتر چیز بہ بیت بزانکہ نبشتانک ،کسّہ،شئر،گوشکند ءُ دگہ باز چیز ھما کہ زبان ءَ جوان کن اَنت۔

من یک نودربرے آں منی باید نہ اِنت کہ من سر ءُ سُوج بہ کن آں بَلے ھیر ھرکس گش اِیت کہ منی گپّ گوھر اَنت پمجشکا من وتی چیزے ھبر گُش آں۔منی سر ءُ سوج ھمیش اِنت کہ ھر کس باید گیشر جھد بہ کنت گیشتر مواد دیم ءَ بیار اِیت ھما مواداں بیار اِیت کہ نوک بہ بنت ،انچُش کہ تارک ءَ یک بلائیں جُھدے کتگ.
بیا اِت وتی شھدیں زبان ءَ گیشتر تامدار کن ایں۔۔

تئی وانوکے دیدگ گُل

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اوتھل ءَ لشکر ءِ زورانسری ملاگری، ٹرانسپورٹرانی زھرشانی

دی بلوچستان پوسٹ

ٹرانسپورٹراں بنجاھی شھدگ زھرشانی کنان بند کرتگ –

بلوچستان ءِ دمگ لسبیلہ ءِ شھر اوتھل ٹرانسپورٹراں لشکر ءِ زورانسری ملامگری ءِ ھلاپ ءَ زھرشانی کرتگ ءُ دگ بند کرتگ –

شال ءُ کراچی ءَ رؤکیں بس دگ ءِ سر ءَ اوشتارینتگ اَنت ءُ دگ بند کرتگ -بازیں اداراں دگ ءِ بند بوگے سوب ءَ گاڑی دمب پہ دمب اَنت ءُ ترندیں گرمی ءِ سوب ءَ مردماں ھم مشکلانی دیمپانی کنگ کپگ اِنت –

زھرشانی کنوکاں گْوشت کہ لیویز مار زورانسری ملام کنگ اِنت –

گڈی ھالانی تہ ءَ زھرشانی برجاہ اِنت ءُ دمگدار ءِ نیمگ ءَ تنی وھدی ھچ وڑیں گامگیج زورگ ءَ گندگ نہ بیتگ-

سر بیتگیں ھالانی رد ءَ جمئیت علماء اسلام ءِ رھشون ھالد ولید سیفی ءِ لوگ ءِ سر ءَ پولیس ءَ تیرگواری کرتگ –

جمیئت ءِ رھشون ءَ چاگردی رسانکجاہ ءَ شنگ کرتگیں یک بیانے ءِ تہ ءَ گْوشتگ کہ تربت ءَ منی لوگ ءِ سر ءَ پولیس ءَ تیرگواری کرتگ ءُ تیرگواری ءَ پد لوگ ءَ جاڑیگیں زالبول ءُ چُکانی گون ءَ بے ھودی کرتگ –

ھالد ولید سیفی ءَ گْوشت کہ آ وتی پاٹی ءِ رھشونے ءِ بیرانی ءِ پُرسی پتر ءَ ڈن ءَ اِنت –

دومی نیمگ ءَ چاگردی رسانک کارمرد کنوکیں مردم ھالد ولید سیفی ءِ لوگ ءِ سر ءَ تیرگواری ءِ ویل ءَ ایر جنگ ءَ اَنت –

جانسلامتی ٹپاسکارانی رد ءَ نیکشھر ءَ ویروس گیش بیت کنت ءُ مردم باید وتی گِساں بہ نند اَنت –

دی بلوچستان پوسٹ

ڈاکٹر ھمایون ءَ گّوشت کہ ویروس ءَ نوک گپتگیں دوازدہ مردم نادراھی ءَ گورجتگ ءُ یک مردمے بیران بیتگ ءُ سرجمیں نادراھانی کَچ شست ءُ شش ءَ سر بیتگ اَنت –

آئی ءَ گوشت کہ آیوکیں روچاں ھمے گمان کنگ بیت کہ نادراھی گیش بیت کنت کہ شھر ءِ مردم وتی ھیال ءُ پھزگ ءَ بہ کن اَنت –

ڈاکٹر ھمایون ءَ گْوشت کہ مردم ابید زلورتیں کارے ءَ ڈن ءَ در مہ کپ اَنت ءُ مُچی ءُ مردم یکجاھی مہ کن اَنت ءُ وتی جان ءَ بہ رکین اَنت ءُ دگرانی جانپھزی ءَ ھم بہ کن اَنت –

آئی ءَ گوشت مھلوک سرکار ءِ گوشتگیں گپانی منوک بہ بنت ءُ دور دور بہ بنت ءُ ڈن ءَ درکپگ ءَ دپ بند ءَ دپ ءَ بہ کن اَنت ءُ دستیگ ھم کارمرد بہ کن اَنت

بلوچستان ءِ جتائیں ھند ءُ دمگانی تہ ءَ بلوچ نودربرانی نیمگ ءَ آنلائن کلاسانی ھلاپ ءَ زھرشانی کنگ بیگ ءَ اِنت۔

دی بلوچستان پوسٹ

ھزدار ، گوادر ءُ کراچی ءِ نودربراں زھرشانی بنجل جتگ ءُ زھرشانی درشانیتگ دومی نیمگ ءَ بسیمہ ءُ پنجگور ءِ نودربراں زھرشانی روانک کَش اِتگ ءُ آنلائن کلاسانی ایچ ایس ای ءِ پیسلہ ءَ ایر جتگ ءُ گوشتگ کہ بلوچستان ءَ ٹوجی سروس ھم نیست گُڑا ما چون ءُ چہ کجا آنلائن کلاسزاں گِپت کنیں؟

بلوچ نودربر الائنس ءِ نیمگ ءَ چہ 15 جون ءَ ماں ھزدار ءَ سَے روچی ئیں شُد ھڑتالی بُنجل مروچی دومی روچ ءَ ھم برجاہ بیتگ –

شُد ھڑتالی بُنجل ءَ مزنیں کساسے ءَ نودربر، سیاسی ءُ چاگردی جھدکاراں بھر زُرتگ۔ اے مردمانی تہ ءَ بلوچستان نیشنل پارٹی، بلوچستان ٹیچر ایسوسیشن، ھزدار بار ایسوسیشن، نیشنل ڈیموکریٹک پارٹی، بلوچستان ورکرز کنفڈریشن ءِ باسک ءُ جھدکار ھوار بوتگ اَنت ءُ ایشاں بلوچ نودربرانی ھرچ وڑیں کمک کنگ ءِ گپ جتگ۔

بلوچ نودربر الائنس ءِ باسکاں بُنجل ءَ نندوکیں مردماں گوں تران کنان ءَ گوشتگ کہ ھائیر ایجوکیشن کمیشن ءِ نیمگءَ چہ آنلائن کلاسزانی بندات کنگ گوں نودربراں نا زورواھی اِنت۔ اگاں ھائیر ایجوکیشن کمیشن ءَ لوٹ اِیت کہ نودربرانی باندات زوال مہ بیت گڑا آ نودربراں دُرستیں بُنکی آسراتیاں بہ دنت دانکہ نودربر ابید ءِ دگہ جنجالے ءَ وتی آئن لائن کلاسز اں گپت بکن اَنت۔

ھمے وڑ ءَ گوادر ءِ نودربرانی نیمگ ءَ چہ ھم آل اسٹوڈنٹس گوادر ءِ نام ءَ یک دو روچی ئیں شُد ھڑتالی بنجلے جنگ ءُ زھرشانی کنگ بیتگ کہ مروچی دومی روچ ءَ اے زھرشانی آسر کنگ بیتگ ۔ سربیتگیں ھالانی ردءَ گوادر ءِ نودربراں گوں اسسٹنٹ کمشنر گوادر اتھر اباس گون ءَ نیاد کُتگ ءُ وتی جیڑہ گْوشتگ اَنت نودربراں گوشتگ ایچ ایس سی ھرابیں انٹرنیٹ ءِ جاور ءِ درگت ءَ سرپدی نہ داریت ءُ آنلائن کلاسانی گرگ گوادر ءِ نودربرانی گون ءَ زوراکی اِنت۔

اسسٹنٹ کمشنر ءَ نودربراں گوشتگ کہ دمگدار اے درگت ءَ سرپدی دارنت ءُ ما گوادر ءِ نودربرانی جیڑھانی درگت ءَ ایچ ایس سی ءَ نِمدی نبشتہ کنیں۔

ھمے درگت ءَ چہ بسیمہ ءَ سربیتگیں ھالانی ردءَ نودربراں دگانی سرا زھرشانی کُتگ ءُ گوشتگ اُستانی واکدار باید اِنت درستاں پیسر آنلائن کلاسزاں بہ دار اَنت ءُ مارا انٹرنیٹ ءُ دگہ آسراتی بہ دے اَنت دانکہ ما آنلائن کلاس زرت بہ کنیں۔ نودربرانی ردءَ ایچ ایس سی اے پیسلہ نا ھق ءُ زوراکیں پیسلہ اِنت چہ ایشی ءَ نودربرانی باندات تاوان بار بیت۔

نودربراں نہ تھنا ایچ ایس سی ءِ پیسلہ ءِ بگیری ءَ اوگام جتگ بلکیں گُشتگ اِش اگاں مئے لوٹ سرجم نہ بیت اَنت گُڑا ما شُد ھڑتال ءَ نند ایں۔

ھمے درگت ءَ زیک پنجگور ءِ نودربرانی نیمگءَ یک زھرشانی روانک ءِ کُشگ بیتگ کہ آئی تہ ءَ نودربراں ایچ ایس سی ءِ پیسلہ ایر جتگ ءُ آنلائن کلاسانی دارگ ءُ بلوچستان ءَ انٹرنیٹ ءِ شریں سروس دیگ ءَ ھوار نودربراں سرجمیں آسراتیانی دیگ ءِ لوٹ کنگ بیتگ۔

نودربراں گُوشتگ کہ زاناں بلوچ نودربران وانگ ءُ زانگ ءِ ھق نیست اگاں بلوچ نودربر ڈیھ ءِ دگہ نودربرانی وڑ ءَ ھاسیں ارزشت نہ دارنت پمیشکا ابید مئے لوٹانی سرجم کنگ ءَ مئے گُٹ ءَ آنلائن کلاسانی لوپ بندگ بیگ ءَ اِنت ۔

زانگ بہ بیت بلوچستان ءِ گیستریں دمگ چہ انٹرنیٹ ءِ آسراتی ءَ چہ چَٹ زبھر اَنت ءُ ھما دمگ کہ آودہ انٹرنیٹ کار کنت اود ءَ ھم تھنا ٹو جی سروس کار کنت کہ آئی ءِ سر ءَ آنلائن کلاس زیرگ وتی جاہ ءَ کلوہ دیم دیگ ءَ مردمانی مزنیں وھد زوال بنت۔

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ مروچی 3 ھزار 9سد ءُ نوَد روچ سرجم بیتگ –

بلوچ اسٹوڈنٹس ایکشن کمیٹی ڈاکٹر سبیھا، بلوچ ایکٹویسٹ ڈاکٹر مھرنگ بلوچ، نیشنل پاٹی ءِ ملک نسیر شاھوانی، میر ابدُل گپار کمبرانی ءَ بنجل ءِ تر ءُ تاب کُرتگ ءَ بیگواھیں مردمانی کھولاں گوں پدردی درشانتگ-

ھمے درگتا وائس فار بلوچ مسنگ پرسنز ءِ کسان کمک سرکماش ماما قدیر بلوچ ءَ گپ کنان ءَ گْوشتگ کہ اے وھد ءَ بلوچ راجی پُرایمنیں جد ءُ جھد ءَ یک منزلے ءِ سر بیتگ ءَ وتی گام ایر کرتگ اَنت – یک نیمگے وانگ ءَ زانشت بلوچستان ءِ کُنڈ کُنڈ ءَ تالان بیان اِنت مردمانی تہ ءَ یک جزبگے ودی بوَگ ءَ اِنت وتی دوستگیں مردمانی یل کنائینگ ءُ اے گلامی ءَ چہ رکگ ءُ جاورانی مٹ کنگے ھاتر ءَ یک جوان سسائیں جھد ءُ کوشستے کنگ ءَ انت ءُ دومی نیمگ ءَ زورگریں ریاست وتی سرجمیں تاگت ءِ گون ءَ مردمانی پُرایمنیں جد ءُ جھد ءَ درگان درگان کنگے جھد ءَ انت –

آئی ءَ دیمترا گْوشت کہ ریاست ءَ وتی سرجمیں ریاستی مڈی، ڈیتھ اسکواڈ دیم ءَ آؤرتگ ءُ بلوچ چکچینی، زالبولانی ننگ ءُ ناموس ءِ لگتمالی ، دُزی ءُ ڈنگی، مات ءُ گْوھارانی کوش بلوچ ءِ چکچینی ءِ شوربندی ءِ رنگ ےَ بندات کنگ بیتگ – ریاست یک نیمگے بلوچ مھلوکے سر ءَ آس گوارگ اِنت ءُ مھلوکے کُشت کوش ءَ کنگ انت ءُ دومی نیمگ وتی بنکی کار” بجن ءُ چگل” دت پالیسی ءِ سر ءَ اوشتوک انت-

ماما قدیر بلوچ ءَ گوشتگ کہ مروچی بلوچ پُسگانی، زالبولانی پُرایمنیں جد ءُ جھد جھانی گواچن ءِ تہ ءَ یک مزنیں کردے کہ آھاں وتی بے بھائیں دیمھونی ءُ جھد ءِ زانشتی جنز ھر یک بلوچے ءِ مجگے تہ ءَ ایر کنائینتگ-

آئی ءَ گْوشت کہ ریاست بلوچ ےِ پُرایمنیں جھد ءِ ھلاس کنگ ءِ ھاتر ءَ چمود ءَ وتی لشکری تاگت ءَ بےھساب ءَ کارمرد کنگ انت ءُ چمود ءَ وتی داشتگیں چانیگواراں راج دوستی ءِ دروگیں چادر پردات ءُ بلوچ پُرایمنیں جھد ءَ دنیا ءِ دیم ءَ زوال کنگ ءِ جھد ءَ انت –

بلوچستان ءِ دمگ پنجگور ءُ مستونگ ءَ پیش اتکگیں تیرگواری ءِ جتائیں ویلاں یک مردمے بیران ءُ سَے زدگ بیتگ اَنت –

دی بلوچستان پوسٹ

سر بیتگیں ھالانی رد ءَ پنجگور ءَ گاڑی ءَ سواریں مردمانی تیرگواری ءَ چلہ پلکو ءِ جھمنند ھدا رھم ء دوشمبے بیران بیتگ ھمے وڑ ءَ دومی ویل چتکان ءِ بازار ءَ سیول ھسپتال ءِ گیٹ ءِ دیم ءَ پیش اتکگ کہ اود ءَ ناشناسیں پرپٹ سواریں مردماں تیرگواری کرتگ ءُ زبیر ء دلمراد زدگ کرتگ –

دمگی مردمانی رد ءَ زبیر ءِ جاور نگیگ گوشگ بیگ ءَ اَنت –

ھمے وڑ ءَ مستونگ ءِ بنجاھی دگ ءِ سر ءَ جنگل کراس ءِ نزیک ءَ پَرپٹ سوارانی سر ءَ ناشناسیں سلاہ بندیں مردماں تیرگواری کرتگ ءُ دو مردم ھسین اھمد ءُ مھمد جان نامی ئیں مردم زدگ کرتگ اَنت –

زدگ بیتگیں نواب گوس بکش رئیسانی ھسپتال ءَ برگ بیتگ اَنت اود ءَ بنداتہ درمانی ءَ پد شال ءَ برگ بیتگ اَنت۔