TBP Balochi

آواران ءِ جتائیں جاھاں پاکستانی پوج ءِ زوراکی برجاہ اَنت

دی بلوچستان پوسٹ

سر بیتگیں ھالانی رد ءَ آواران ءِ بازیں ھند ءُ دمگاں پاکستانی پوج ءِ زوراکی برجاہ اَنت ءُ پوج ءَ میتگ وتی انگیر ءَ کرتگ ءُ مردماں ھمک روچ پوجی بنجل ءَ روگ ءُ پیش بیگی اِنت –

دمگی مردمانی رد ءَ گوستگیں روچ ءَ پاکستانی پوج ءَ آواران ءِ دمگ گیشکور ءَ مھلوک گپتگ ءُ ٹرک ءَ سوار کرتگ اَنت ءُ بنجل ءَ برتگ ءُ اود ءَ جتگ ءُ ومیگ کرتگ اَنت –

آئی ءَ گْوشت کہ پاکستانی پوج وتی سنگر ءُ بنجل ءِ دیوال ءِ جوڑ کنگ ءَ دمگی مردماں گِرگ ءُ برگ ءُ زورانسری کاربندگ اِنت ءُ ھمے وھداں مردماں لٹ ءُ کُٹ ھم کنگ اِنت –

ھمے وڑ ءَ آواران ءِ دمگ بزداد ءَ سر بیتگیں ھالانی رد ءَ بزداد ےُ شے کنھری ءَ پاکستانی پوج ءَ دمگی دو پوریاگر سرجمیں شپ ءَ وتی بنجل ءِ کَش ءُ گوراں کاربستگ اَنت ءُ گْوشتگ اَنت کہ اگاں شما لائیٹ یا دگہ چیزے دیست گڑا مارا سرپد بہ اِنت ءُ پوریاگر جتگ ءُ ھوش چوپ ھم کرتگ اَنت –

زانگ بہ بیت بلوچستان ءِ جتائیں جاھاں پاکستانی پوج ءِ زوراکی یکشل ءَ برجاہ اَنت ءُ سیاسی مردمانی گوشگ اِنت کہ پاکستانی پوج زوراکیانی وھداں لس مردماں بیگواہ ھم کنت –

آیانی گوشگ اِنت کہ جھانی رسانکدر ءُ انسانی ھکانی بے تواری ءَ چَہ پاکستانی پوج ھمک آیوکیں روچاں بلوچستان ءَ وتی زوراکیاں گیش کنان اِنت –

نبشتانک: بانک نبیلہ مھراب

نبشتہ کار: آجو کینگی بلوچ

دی بلوچستان پوسٹ

من نیم واب ءُ نیم آگاہ اِت آں کہ منی سرون ءِ نیمگ ءَ شانتُلے ءَ کوکو کنگ ءَ اَت ءُ من ءَ سَے سال بیتگ اَت کہ من شانتُل ءِ کوکو نہ اِشکتگ ءَ اِت اَنت من ھمے مار اِت بلکیں من وابے گِندگ ءَ آں بلے وھدیکہ من وتی چم پچ کت اَنت ءُ چار اِت کہ ڈنی نیمگ ءَ کہ درچک ءِ شاھڑ ءِ سر ءَ شانتے نشتگ ءُ کوکو کنگ اِنت من وتی گوانکو چست کت کہ اکس ءَ ئِے کشاں بلے منی دست ءِ چست کنگ ءَ گوں بال ئِے کت ءُ شُت۔ شانتل ءَ زانت کہ درآمدے من ءَ چارگ ءَ اِنت بلکیں من ءَ بہ گپت ءُ زندانی بہ کنت۔ گُڑا گوانکو منی دست ءَ اَت من ھمے جیڑھانی چُل ءَ اُژناگ ءَ اِت آں کہ شانتل ءِ چم پمن کپت اَنت پمیشکا بال ئِے کت ءُ شُت البت الم من ءَ پجا آرت ئِے کہ درآمدے ۔
گوں ھمے جیڑگانی تھ ءَ من وھدیکہ پد ءَ وتی گوانکو دست ءَ کُت ءُ مدامی ئیں ڈول ءَ پیام ءُ چَہ تندجاھاں ھال ءُ اھوالاں چمشانک دیان اِت آں کہ ھمے پیامانی تھ ءَ سنگتے ءَ منی سر ءَ کسانیں تامُرے روان داتگ اَت گُڑا من زوت تامُر پچ کت ءُ چار اِت بلوچی زبان ءَ نبشتہ ءِ وانگ اِنت آئی ءِ توار ءَ من ءَ وتی نیمگ ءَ کشان کت من ھما توار ءِ نیمگ ءَ روان ءُ گار بیت آں۔۔۔۔۔۔۔۔۔
وھدے من چارگ ءَ ئِے بُست کُت نبشتہ آئی انچیں رنگے ءَ نبشتہ کتگ اَت کہ ندارہ منی چمانی دیم ءَ ھمے وڑ بُوتگ اَت بلے من چہ شانتل ءَ بے ھیال بیت آں گْوش ئے اے ندارگ من ساری ءَ دیستگ من ھمے ندارگ ءَ بندوکاں اے ندارگ منی اِنت کہ کسے گْوشگ اِنت اے کسہ من گوں کَے ءَ کتگ کہ ایشی ءَ منی کسہ نبشتہ کتگ ءُ وانگ ءَ انت ئِے۔۔۔۔۔۔۔۔
آئی توار ءِ ءُ نبشتہ کتگیں نبشتانک گوں یکدومی ءُ جنگ اَت توار ءِ وتی چُل ءُ روانی گوں وشیں انداز ءَ نبشتہ کتگیں لبزانی کماھگ ءُ آیانی روانی ھچ وڑیں جھلی بُرزی من نہ گندگ ءَ اِت آں پمیشکا من ھمے جیڑ اِت کہ ایشی ءَ سک وش نبشتہ کتگ ءُ بلے کمال کتگ ایشی ءَ کہ وش وانگ اِنت ئِے۔
لکوک ءَ وتی لبز جوانیں رنگے ءَ کماتگ اَنت بلے وانوک ءَ آئی ءِ دراھیں ھک پیلو کُتگ اَنت من گوں ھمے جیڑگانی تھ ءَ کہ ھمے راھداتگیں تامر ءَ رند ھمے سنگت ءَ من ءَ پیگامے دات، رند ءَ جُست کُت ءُ گْوشت ئِے “تو اے تامُر تو چار اِت بریں چون اَت ترا دوست بیت”
من درائینت “ھو من چار اِت!!” البت ءَ من ءَ آئی ءِ نبشتہ کتگیں نبشتانک ءُ آئی ءِ وانگ ءِ داب سک دوست بوت۔
بلے!ایشی ءِ نبشتہ کنوک بانُک نبیلہ مھراب اِنت وانوک کے اِنت ؟
اگاں بلوچی زبان ءِ تھ ءَ چُشیں نبشتہ کار ءُ وانوک بہ بیت گُڑا ما دلجم اِیں کہ بلوچی زبان کدی گار ءُ بیگواہ نہ بیت سنگت ءَ من ءَ گْوشت ایشی نبشتہ کنوک ءُ وانوک دوئیں نبیلہ اِنت۔
بس منی دپ ءَ ھمے ھبر درتک ایشی ءَ وَ کمال کتگ راستی ءَ بلوچ ءِ لبزانک ءَ شیر زالیں بانک نبیلہ مھراب ءِ وڑیں نبشتہ کار ودیگ کتگ اگاں کسے ءَ پہ وتی راج ءُ زمین ءَ مھر بہ بیت پہ وتی زبان ءَ اِشک بہ بیت الم نبیلہ ءِ وڑیں ھزاراں گْوھار درکپ ایت۔

گُڈسر ءَمن گْوشت اگاں ایشی ءِ دگہ چُشیں تامر ءُ نبشتہ تئی کرّ ءَ درکیت پمن راہ دے گْوشت ئِے من کوشش کناں۔
من گوں پھر ءَ گْوش آں کہ مئے مات ءُ گْوھار ھچ رنگ ءَ ءُ چہ آدگہ راجانی زالبولاں ھچ وڑ ءَ پد ءَ نہ اَنت۔۔۔۔۔۔۔۔
چہ راج ءِ نوجواناں ھر پِڑ ءَ مرچی مئے مات ءُ گْوھار راج ءَ ھواراں لبزانک بہ بیت یاکہ بھادری۔ مئے مات ءُ گْوھار دژمن ءِ زلم ءُ زوراکیانی آماچ اَنت پرچی ءَ کہ دژمن ءِ زور ھمش اِنت بلوچ ءُ بلوچی زبان گار ءُ بیگواہ بہ بیت اے گُلزمین ءِ سر ءَ بلوچ ءُ بلوچی زبان ءِ نشانی یے گِندگ مہ بیت مرچی دژمن بلوچ راج ءِ لبزانکی ءُ سیاسی سنگتاں چِست کنگ ءُ گار ءُ بیگواہ کنگ اِنت ءُ مئے مات ءُ گْوھار ھمے چِست کنگ ءُ گار ءُ بیگوھی ءِ تھ ءَ ھوار اَنت۔

ما بچار ایں مئے مات ءُ گھار مئے ھمراھی ءَ گون اَنت بلوچ ءِ زالبول ھچ وڑ ءَ پُشت ءَ نہ کنز اتگ ۔۔۔۔۔۔۔۔۔۔۔۔ بلوچ راج ءِ تھ ءَ ھچ وڑیں ھُنر ءُ بود ( ٹیلنٹ) ءِ کمی نہ اِنت بس بلوچ ءَ بے زمینی ءَ جتگ اگاں بلوچ وتی زمین ءِ مالک وت بِہ بیت بلوچ ءِ کرا ھچ کمی نہ بیت۔

چوناھیگا بلوچ ناونندہ ءُ ناسرپدیں راجے نہ اِنت بلوچ ءِ زمین چہ ھزانگ ءُ تلاہ ءَ پُر اِنت بلے بلوچ راج ءِ ھر نوجوان ءُ ھر زال پہ بلوچ راج ءَ ءُ پہ بلوچ لبزانک ءَ تلاہ اَنت
بلوچ راج ءِ کر ءَ بود ءُ زانت ءِ کمی نہ انت بس بلوچ سر ءُ سوج کنگ لوٹ ایت، دلبڈی دیگ لوٹ ایت ھمراھداری کنگ لوٹ ایت

دگنیا ءِ تہ ءَ ھر لبزانکے ءِ وتی بستارے بلے بلوچ ءِ لبزانک ءَ چہ دگنیا ءِ لبزانکاں ھچ پد ءَ نہ اِنت بلوچ ءِ لبزانک ءَ بازیں شائر ءُ نبشتہ کار ودیگ کتگ وھدے من ھمے شائر ءُ نبشتہ کاراں وھدے وان آں گُڑا من باز گَل ءَ بال بہ آں پرچی ءَ کہ مئے وتی جتائیں زبانے، جتائیں زمینے ءُ وتی دود ءُ ربیدگے، رسم ءُ رواج وتی دود ءُ رھبند چہ دگنیا ءِ کلیں راج جُتا اَنت۔۔۔۔۔۔۔۔۔
” کول ء سید زھو شاہ ھاشمی ءَ کہ راج من ءَ وت ءَ ھست، زبان وت ءَ ھست، زمین وت ءَ ھست من پرچی ءَ دگہ راجانی چمبردار بہ بَہ آں “
من گوں دل ءِ جُھلانک ءَ اے گُشاں تانکہ بانُک نبیلہ مھراب ءِ وڑیں گْوھار بلوچی لبزانک ءِ تھ ءَ ھست بلوچی نبشتہ کنان ءُ بلوچی ءِ سر ءَ نبیس انت بلوچی زبان کدی گار ءُ بیگواہ نہ بیت اے ھبر ءَ من الم زاناں بانک نبیلہ مھراب ءَ چہ دگہ بازیں گُھار ھست اَنت بلے آیانی دلبڈی نہ بیگ ءُ یاکہ آیانی کرّ ءَ چُشیں آسراتی نیست کہ آیانی نبشتانک ءُ آیانی توار بلوچ راج ءِ چم ءُ گوشاں بہ کپ اَنت.

راستی وَ ایش انت بلوچی لبزانک یک دریایے ءُ دریایے توک ءَ ھر وڑیں لُلوک ءُ ساھدار ودیگ بیت بلے ھما ساھدار ءُ لُلوکانی رودینگ ءُ پھریزگ زبان زانت ءُ ادیبانی کار اِنت ھما زبان زانت شاھزانت آیانی دلبڈی ءَ بہ کن اَنت آیاں سر ءُ سوج بکن اَنت آیانی کُمک ءَ بکن اَنت چُش مہ بیت مئے زانتکار ءُ زبان زانتاں دلپروش ءُ دلرنج بِہ بنت ۔

من پد ءَ یک رندے چَہ وتی بانکیں گْوھار نبیلہ مھراب ءَ اُمیت کناں کہ وتی جُھد ءَ گیش ءَ چہ گیش بدار ایت وتی نبشتانک ءُ توار ءَ پہ بلوچ راج ءُ بلوچی زبان ءِ گوشداروکاں روان بد اَنت۔ من چہ وتی آ دگہ بلوچ شائر ءُ ادیباں امیت کناں کہ بانک نبیلہ مھراب ءِ ءُ دگہ بازیں گُھار ءُ برات ھست اَنت یا شائری پِڑ بِہ بیت یا توری نبشتانک ءِ منی وڑیں نودربرے یا دگہ باز اِنت کہ ما شُمے وڑیں زانتکار ءُ ادیبانی دلبڈیِانی رھچاراَنت شُمئے دلبڈی ءُ سر ءُ سوج بلوچ لبزانک ءُ بلوچ راج ءِ زندگ بیگ شاھدی انت۔
بلوچی شالا دیمرویِ ءَ سربات ءُ بلوچ زندگ بات.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ تمپ دازن ءَ بیتگیں ویل ءِ ھلاپ ءَ کیچ ءِ بنجاھی شھر تربت ءَ زھرشانی کنگ بیتگ –

زھرشانی ءَ چُک ءُ جنیناں ھوار سیاسی ءُ چاگردی باسکاں ھوار جتائیں تکاں مردماں بھر زرتگ –

زھرشانی کنوکاں تران کنان ءَ گْوشت کہ سرکار وتی داشتگیں دُزاں نِی ھلاس بہ کنت –

آیاں گْوشت کہ سرکاری پُشت ءُ پناھی ءَ جوڑ بیتگیں ڈیتھ اسکواڈ ءِ داشتگیں مردم ھمک روچ ویل ءِ پُشت ءُ ویل کنگ ءَ اَنت ءُ ھمے ویلانی تہ ءَ بلوچ زالبولانی کوش ءُ دُزی ءُ ڈنگی ھوار اَنت –

زھرشانی ءَ بھر زورکیں مردماں گْوشت کہ سرکار باید وتی اگدواں دزکَش بہ بیت کہ ویلانی پُشدر ءَ آئی ءِ گام سست اَنت –

زانگ بہ بیت گوستگیں دو روچ ءَ پیسر تمپ ءِ دمگ دازن ءَ یک لوگے ءَ دُزاں دور کرتگ ءُ اود ءَ دُزاں گلسوم نامے زالبولے چار چُکانی دیم ءَ کُشتگ ویل ءَ پد دمگ ءَ سیاسی ءُ چاگردی مردم برانز گپتگ ءُ زھرشانی اِش بندات کرتگ گوستگیں روچ ءَ تمپ ءَ زھرشانی کنگ بیتگ ءُ مروچی ھمے ویل ءِ پُشدر ءَ کیچ ءِ بنجاھی شھر تربت ءَ لس چاگردی ءُ سیاسی مردماں زھرشانی کرتگ ءُ کشندھانی دزگیری ءِ لوٹ کنگ بیتگ –

زانگ بہ بیت چِد ءُ پیسر تربت ءِ دمگ ڈنک ءَ پاکستانی پوج ءِ چیردستی ءَ جوڑ بیتگیں ڈیتھ اسکواڈ ءَ گوں بندوکیں مردماں یک لوگے ءَ دور کرتگ ءُ اود ءَ ملکناز نامے زالبولے کُشتگ ءُ آئی ءِ کسان سالیں زھگ برمش زدگ کرتگ –

ویل ءَ پد بلوچستان ءَ ھوار درملکاں برمش یکجھتی کمیٹی ءِ نیمگ ءَ زھرشانی کنگ بیتگ اَنت –

دازن ویل ءَ سے روچ سرجم بیگ ءَ پد ھم دزانی بگیری ءَ سرکار ءِ ترندیں گام گندگ بیگ ءَ نہ اِنت ءُ تنی وھدی دازن ءَ ھواریں جرمکار دزگیر کنگ نہ بیتگ اَنت –

سنگت اَلی ایسا ءِ نام ءَ پچیں نمدی یے

نبشتہ کار: ابدلستار بُگٹی

رمس: 17 جُلکان 2020

دی بلوچستان پوسٹ

سنگت اَلی ایسا دْروت ءُ دْراہ بات ئے، من اُمیت کن آن کہ وش ءُ جوڑ ئے ءُ شالا تئی نیمگ ءَ ھیر ءُ ایمنی بات۔ انچوشکہ سَے روچ بیتگ کہ من ءُ تو وٹس ایپ ءَ گپ ءُ رپ ءَ ایں۔ چوناھیگا من ترا وَ نہ زان آں ءُ نیکہ من ءُ تو پیسراں ھم ٹوک ءُ توار بیتگ اِت ایں بلے رمس 15 جّلکان 2020 ءَ چَہ یک ناشناسیں لمبر شمارے ءَ یک دْراجیں نبشتانک آتکگ اَت۔ گُڑا من ھیال کت کہ وھدے دزھُورک بہ آں گُڑا نبشتانک ءَ چمشانکے دے آن ءُ شَر وان آن ئِے گُڑا نبشتانک ءِ پیلوئی ءَ وانگ ءَ رند من چار اِت کہ اے تو ئے ءُ تئی وشنام اَلی ایسا بلوچ اِنت ءُ سَکی وش بیتگ کہ گوں تو دراھی بیتگ۔ البت چَہ نبشتانک ءِ وانگ ءَ پد ءَ من زانت کہ اے یک کلوھے اَت ءُ چہ ھمے کلوہ ءِ وانگ ءَ من زانت کہ تو من ءَ یک بلاھیں تھمتے ھم جت کہ من وتی راج ءِ نودربراں بے راھاں پرینگ ءَ آں ءُ ما تئی نادانیں دوست ایں۔ دومی تئی کلوھیں نبشتانک کہ ھمیشی ءِ لاپ ءَ تو من ءَ تھمت جنَگ ءَ ئے، ماں چاگِردی رسانکدر ءِ شنگ ءُ شانگ انت چریشی ءَ من سَک دلگران بوتگ آں۔

چوناھیگا تئی نبشتانک سَک دْراج اَت ءُ تو چہ وتی نبشتانک ءَ یا کلوہ ئِے ھم گوش ئے، چہ ایشی ءِ لاپ ءَ تو رَدیں درنگازی یے کنگ ءَ ئے کہ من دو پیوندگال انچوشکہ یک ٹوک کنوک ءِ پیوندگال “آں” ءُ باز ٹوک کنوک ءِ پیوندگال “ایں” ءَ، ایشاں کُمکّار گال ھم گوش انت، رد کارمرز کنگ ءَ آن اش۔ چہ درستاں پیش من راج ءِ دیم ءَ اے ٹوک ءَ پدر کن آں کہ تو وت گْوشت کہ بلوچ راج ءِ رواج گِپتگیں نبیسّگ ءِ رھبند راجی نمیران ھُدامُرزی سید ھاشمی ئیگ انت ءُ چہ تئی اے ٹوک ءَ من ءَ ھم سک وشی بوت کہ تو ھم اے ٹوک ءَ منّ ئے بلوچ راج ءَ سید رھبند منّگی انت۔
تو دیم ءَ گْوشگ ءَ ئے کہ من سید رھبند ءِ منّوگِر بوگ ءَ رند من (ابدلستار بُگٹی) چہ سید رھبند ءَ بجگ ءَ آں، ھاسکن “آں” ءُ “ایں” چی ءَ جتا نبیسّگ ءَ آں؟ تو گْوش ئے کہ من باید انت اے کُمکّار گالاں گوں کار ءُ نامگال ءَ ھوار کن آں بزاں ایشانی نیام ءَ شملگ مہ دے آں؟ انچوشکہ

• من نگناں وراں
• ما سارتیں آپ وریں
  سنگ تو گوں اے دروراں سید ھاشمی ءِ سْیاھگ راست نبیسّگ ءِ تاکدیم ءُ درونت لمبرانی نشاندھی ءَ گْوشگ ءَ اِت ئے
  بلے سنگت ترا دزبندی انت کہ در لمبر 26 ءُ تاکدیم لمبر 82 ءَ پد ءَ بہ چار کہ اود ءَ سید ھاشمی گوشگ ءَ اِنت کہ
• ما بلوچ ایں
• ما نشتگ ایں
  ھم راست انت انچوشکہ ھلاسی ءِ نشان ئِے جتگ۔ اگاں تو ایشاں ھوار کن ئے گُڑا ھم راست انت دلجم بہ ئے کہ دوئیں وڑ ءَ راست انت تو در لمبر 26 جْوانی ءَ نہ چار اتگ پمیشکا تو منی سر ءَ برانز ئے البت منی وڑیں نازانتکار گْوش انت کہ بلوچ راج ءِ پدریچ ءَ ماں وانگجاھاں وتی راجی زبان ءِ وانگ ءُ نبیسّگ ءَ موہ نہ رس اتگ چمیشکا بلوچ راج ءِ راجی زبان بلوچی ءَ چو پارسی، ھندی، اَربی ءُ انگریزی ءِ وڑ ءَ دیمروی نہ کتگ پمیشکا باید انت ما بلوچ ماں راجی زبان ءِ کُمکّار گال، کارگال ءُ رنگ گالاں جتا نبیسّگ ایں کہ راج ءِ نودربر وانگ ءِ ساھتاں تکانسر مہ بنت بلکیں چہ وانگ ءِ ھیل گِرگ ءَ نبیسّگ دربر انت انچوشکہ اگاں تو “ایں” ءِ “ا” ءَ کش ئے گڑا تئی اے پیوندگال(کُمکّار گال) رنگ گالے درشماں دنت ءُ پیوندگال ءِ زاھری یے نہ دنت انچوشکہ
  تو وت رد ئے۔ چوناھیگا تئی نبشتانک ءَ ردی سَک باز انت بلے من تئی کلوہ ءِ اولی گالِرد ءِ بارو ءَ کمیں گْوش آں کہ رد انت ئِے تئی اولی گالرِد رَد انت گُڑا تو چون دِگراں سرپدی دات کن ئے۔
  انچوشکہ تو نبیس اتگ
• ما ءُ شُما اے گپ ءَ جْوانی ءَ سرپدیں۔
  اد ءَ ” سرپدیں” رنگ گالے ءِ دروشماں ودی کنگ ءَ انت ءُ پیوندگالے نہ بیگ انت انچوشکہ ” سارتیں”گنوکیں” ءُ کْوھنیں” اے دْراہ رنگ گال انت
  گُڑا تئی رِد ءَ اے جھل ءِ گالِرد اے وڑ ءَ بنت
• ما سرپدیں مردمیں۔
• ما سارتیں آپ وریں

اگاں بلوچ نوک وانوکے یا نودربرے اے وڑیں گالِرداں چار ایت گُڑا آئی سر تر ایت کہ اے چے یے ءُ چونیں نادْراھی یے۔
باید انت اے وڑ گالرِد اے ڈول ءَ نبیسّگ بنت انچوشکہ

• ما سرپدیں مردم ایں۔
• ما سارتیں آپ ور ایں۔
• ما ءُ شما سرپد ایں۔
  البت من اے نہ گْوشگ ءَ آں کہ ھوار کنگ ءَ رد اَنت ھوار کنگ ءَ ھم راست اَنت ءُ جُتا کنگ ءَ ھم راست اَنت انچوشکہ ھندی ءُ انگریزی ءَ ھم گال ھوار ءُ جتا کنگ بنت انچوشکہ
• میں آپ کیلئے پھل خریدنے شھر جاونگا
• آپکو پتہ ہیکہ نہیں!!

ھمے وڑ ءَ انگریزی ءَ ھم گال ھوار ءُ جتا بنت انچوشکہ
I don’t care whatever happens.
I ‘ldnot be going home now!

بلے منی سنگت بلوچ زیردستیں راجے، پہ راجی زبان ءِ دیمروی ءَ بلوچ ءَ ھچ ڈولیں آسرتی یے نیست ناں کہ بلوچ ماں وانگجاھاں وتی راجی زبان ءَ ونت کُت کنت ءُ نیکہ روتاک، گِندگُش ءُ دگہ وڑیں آسراتی یے ھست انت ئِے پمیشکا ما گْوش ایں کہ بلوچ راج ءِ راجی زبان بلوچی ھساب ءِ پارمولایے ءِ رنگ ءَ وانگ بہ بیت کہ بلوچ راج وتی لوگاں ماں دزھُورکی ءِ وھد ءَ وتی راجی زبان ءَ وان انت ءُ نبیسّگ ءَ دربر انت، پہ ھمے ھاتر ءَ من پی ڈی ایپیں وانگی ءُ سَے تا پنچ ملٹ ءِ گْونڈیں تامُر ھم ٹھینتگ انت کہ راج ءَ چہ کسانیں تامُراں گیشتریں سرپدی بہ رس ایت ءُ وتی راجی زبان ءِ وانگ ءَ بُنگیج بہ کن اَنت۔
دومی تئی جیڑہ “آں” ئیگ انت کہ یک ٹوک کنوک ءَ، بزاں ” من” ءِ واست ءَ ” آں” کارمرز مہ بیت بلکیں “اں” بیت انچوشکہ

• من اُشتراں چاریناں۔
• من ڈاچیاں دوشاں۔

اے وڑ ءَ ھم راست انت بلے چریشاں اے زانگ بیت کہ “اُشتر” ھم باز اَنت ءُ “چارین” ھم باز انت ھمے پیم ءَ “ڈاچی” ھم باز اَنت ءُ “دوش” ھم باز اَنت پمیشکا بلوچ نودربر مڑا ءِ آماچ بنت باید انت اے وڑیں گالرِد اے وڑ ءَ نبیسّگ بنت انچوشکہ

• من اُشتراں چارین آں
• من ڈاچیاں دوش آں
  کہ نودربر زیت “اں” ءُ “آں” ءِ کارمرزی ءَ بہ زان انت۔ چوناھیگا تو وت زان ئے کہ لھتیں رَدیں مردم اے “آں” ءِ گال ءَ پہ گیشتِری ءَ کارمرز کنوک کن اَنت آ پَکّ رَد انت پمیشکا مارا آ ھم راست کنگی اَنت کہ “اں” ءُ “آں” دو جُتائیں چیز اَنت۔

نی من لھتیں ردیانی سر ءَ درنگازی کن آں ءُ ترا ھم یک دزبندی یے کن آں کہ اے “نکناں، بکناں، نکنیں، اِتاں، گْوشئے ۔۔۔ ھوار نہ بئے ءُ نبوت” انچوشچکہ تو گیشتر اے وڑ ءَ نبیس ئے، اگاں اے وڑیں گالاں ما جُتا نبیس ایں لھتیں درور جھل ءَ اَنت کہ
نہ کن آں، بہ کن آں، اِت آں، گْوش ئے، نہ کن ایں، ھوار بہ ئے ءُ نہ بوت۔۔۔۔
گُڑا نوک وانوک سَک زیت دبر اَنت ءُ وانگ ءِ ساھت ءَ ھچ وڑیں مڑا ءِ آماچ نہ بنت
وھدیکہ من نوک راجی زبان ءِ وانگ بُنگیج کتگ اَت گُڑا من ءَ اے ” نبوت” ءَ سَک کندینت کہ اے ھما اَربی والائیں “نبوت” وَ نہ اِنت۔

دومی اگاں تو چہ بلوچی ءِ “ھست” ءَ گیشتر پارسی ءِ “است” ءَ دوست دار ئے گُڑا منی ءُ تئی جتائیں راہ اَنت۔ تو وتی نیمگ ءَ راج ءَ وانین ءُ سرپدی بہ دے ءُ من وتی جاہ ءَ جُھد کن آں۔ البت من ترا گُڈسری گپے بہ گْوش آں کہ منی سرجمیں بلوچی درونتاں بلوچ راج ءِ ھستیں وھد ءِ زبان زانتکاراں ساری چمشانک جتگ ءُ من ءَ دیم ءَ جُنزان ءِ گْوشت اش۔

چوناھیگا منی جُھد ءِ مول ءُ مراد سلیمانی گالوار ءِ لس مھلوک ءِ تہ ءَ سرپدی یے ودی کنگ ئیگ انت کہ سلیمانی گالوار ءِ بلوچ ھم سید رھبند ءَ راجی زبان ءِ نبیسّگ ءُ وانگ ءَ ھیل کت کن انت البت لھتیں گالانی کُربانی دیگی انت۔ مارا نبشتہ کاری چہ گُپتاری جُتا منّگی انت۔

منی ھیال ءَ منی نمدی یے دْراج بیگ انت ءُ چوناھیگا من ءُ تو بازیں گپ ءُ رپ ماں وٹس ایپ ءَ کتگ۔ ما اُمیت کن ایں کہ تو منی گپاں سرپد بوت ئے بلے من ءَ تو یک بلاھیں تھمتے جت کہ من وتی گُلیں راج ءَ بے راھاں پرینگ ءَ آں ءُ راجی زبان ءَ زیانی ءَ دیگ ءَ آں البت من ترا اے تھمت ءَ ھچبر پھل نہ کن آں۔

تئی دوزواھیں ھمبل ءُ تئی نودربر
ابدلستار بُگٹی

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پوج ءِ دست ءَ دو مردم بیگواہ

دی بلوچستان پوسٹ

بلوچستان ءَ پاکستانی پوج ءِ زوراکی یکشل ءَ برجاہ اَنت ءُ مردمانی بیگواھی ءِ درچ یکشل ءَ برجاہ اَنت –

سر بیتگیں ھالانی رد ءَ کیچ ءِ دمگ تمپ ءِ ھنکین گومازی ءَ پاکستانی پوج ءَ بیڑ برتگ ءُ لشکر کشی کنان ءَ دو مردم آوار جتگ ءُ برتگ –

پوج ءِ دست ءَ آوار جنگ بیتگیں مردمانی پجار اپزل ء دُرا ءُ ماجد ء رشید ءِ ناماں زانگ بیتگ اَنت –

دمگی مردمانی گوشگ اِنت کہ ھردوک وتی لوگ ءَ نندوک بیتگ اَنت ءُ پوج ءَ سھبی آوار جتگ ءُ بیگواہ کرتگ اَنت –

زانگ بہ بیت گوستگیں روچ ءَ ھم تمپ گومازی ءَ نھنگ ءِ کور ءَ پاکستانی پوج ءَ دو مردم آوار جتگ ءُ برتگ –

ھمے وڑ ءَ بلوچستان ءِ دگہ ھند ءُ دمگاں ھم پاکستانی پوج ءِ زوراکی یکشل ءَ برجاہ اَنت –

آزمانک: تُرس

نِبشتہ کَار :سَیپ بلوچ

دی بلوچستان پوسٹ

من اَبیتکی ءَ گْوں نشتگ اَت آں ساهت شپ ءِ دو اَت،سگریٹے کشگ ءَ ات آں ،جَمبراں آسمان مان پوش اِتگ اَت ءُ ترمپ ترمپ رِچگ ءَ اَت ، کرپان ءِ دیمی نیمگ ءِ کَهوراناں گْوات سک چنڈینگ ءَ اَت، اَنچوش گمان بیت کہ جمبر ءُ توپانے پیداک اِنت.

گْوں مرچی ئِیں موسم ءَ دل گْوش ایت کہ چیزے دیم ءَ پدر بوْگ ءَ اِنت بلے اے هم زانگ ءَ آں کہ وتی جبیبن ءِ مارشتاں چہ چیر دیگ لوٹ ءَ آں کہ اندر ءِ دشمنیں شیتان هچ موه مہ بیت کہ مرچی کجام هالتاں گوْں تئی زند گْوزگ ءَ اِنت؟

وهدے جمبر ءَ گْرند اِت من بچکندگ ءَ لگ اِت آں کہ من کسان اَت آں، من ءَ جمبر ءِ گرندگ ءَ چہ سَک ترس اِت وهدے کہ تراپی ءِ وهد ات گڑا من سک ترس ات آں.

همے کہ تراپی ءِ جمبرانی مولم ءِ کْوش ءَ ساچان کُت جَمبراں آسمان مان پوش اِتگ اَت گڑا من چہ لوگ ءَ هِچ در نیاتک آں، گهار ءِ گُشان ءِ چیرگ ءَ وت ءَ را جاه دات برے مات ءِ کٹ ءَ چیر بوت آں.
مرچی جمبر هم گْرندگ ءَ اِنت، گْوات هم کمو زور ءَ کشگ ءَ اِنت، پمیشکا بچکندگ ءَ اَت آں کہ زند ءَ هنچیں کِشکے ءَ راهی کتگ ناں مرچی مات همد ءَ اِنت کہ بگل ءَ ئِے برواں ناں بانکیں گوهار هَمد ءَ اِنت کہ سریگ ءِ چیر ءَ وت ءَ چیر بہ کن آں،بس من گْوں ایوکی ءَ ءُ درمُلکی ءِ گلامیں زند ءِ زنجیر ءُ تهاریں شپ ءِ گوں مولم ءَ بس منی ترس ءِ یکیں الاج اَت کہ وهدے جمبر ءَ گرند اِت گڑا من بچکندگ ءَ لگ اَت آں.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ھنگاؤ انسانی ھکانی ادارہ ءَ ھال شنگ کرتگ ءُ گْوشتگ کہ اُستان کردستان ءِ شھر سکز ءَ زندانی ءِ لٹ شاپیانی وھد ءَ بیران بیتگ –

رپورٹ ءِ رد ءَ سِی ءُ چار سالی ئیں کمال ھسینی دوازدہ جون ءَ وتی لوگ ءَ دزگیر کنگ ءُ برگ بیتگ –

ھنگاؤ ھیومین رائٹس آرگنائزیشن ءِ رد ءَ آدینگ ءِ روچ ءَ چیریں ادارھانی ترندیں لَٹ ءُ کُٹانی سوب ءَ پد نادراہ بیتگ چریشی ءَ پد آ درمانی ءَ درمان جاہ ءَ برگ بیتگ ءُ اود ءَ آئی ءَ وتی ساہ داتگ اَنت –

شنگ بیتگیں ھالانی رد ءَ کمال ھسین زئی ءِ پِت زورانسری پرماھگ بیتگ کہ تو وتی چُک ءِ بیرانی ءِ سر ءَ دزنویس کن ءُ بہ گوش کہ منی چُک ءَ کورونا ویروس بیتگ ءُ دلپٹی ءِ بیران بیتگ –

ھیومین رائٹس ءِ رد ءَ کمال ھسین زئی ءَ کورونا نہ بیتگ ءُ آ زورانسری لٹ شاپ کنگ ءُ کُشگ بیتگ –

سر بیتگین ھالانی رد ءَ تمپ ءِ دمگ گومازی ءُ ملانٹ ءِ میان ءَ مروچی سھب ءِ ساھت یازدہ ءَ پاکستانی پوج ءَ دو مردم دزگیر کُتگ ءُ بیگواہ کرتگ اَنت –

آوار جنگ بیتگیں مردمانی پجار اھمد ء ابدلکریم ءُ شے ھک ء گنی جھمنند گومازی ءِ ناماں زانگ بیتگ اَنت –

دمگی مردمانی رد ءَ اے ھردوک درملک ءَ بیتگ اَنت کہ چٹیانی گوازینگ ءَ اتکگ اَنت وتی بنکی ھنکین ءَ اود ءَ پوج ءَ دزگیر کُتگ ءُ برتگ اَنت –

دمگی مردمانی رد ءَ اھمد دو سال ءَ پیسر ھم پاکستانی پوج ءَ آوار جتگ ءُ ھشت ماہ ءَ بیگواہ کرتگ –

دومی نیمگ ءَ شال ءَ بیگواھیں مردمانی درگیجگ ءَ وائس فار بلوچ مسنگ پرسنز ءِ زھرشانی بنجل برجاہ اِنت – بیگواھیں بلوچانی جیڑھانی تھءَ کمی نہ آیگ ءِ سوب ءَ مروچی بلوچستان نیشنل پارٹی ءَ چہ پی ٹی آئی ھکومت ءَ وتءَ جدا کُتگ ءُ بی این پی ءِ سروک سردار اختر جان مینگل ءَ پاکستان ءِ بنجاھی پارلیمنٹ ءَ تران کنان ءَ گوشت کہ پاکستان ءِ تھءَ چماٹھانی جیڑہ پارلیمنٹ ءَ چِست کنگ بیت بلے بیگواھیں بلوچانی جیڑہ ءُ بلوچانی ریتکگیں ھونانی جیڑہ چِست نہ بیت۔

سردار اختر مینگل ءَ جار جنان ءَ گوشت کہ من ھکومت ءِ ھم کاری ءَ یل کنگءِ جار ءَ جناں پرچہ کہ مئے بیگواھیں مردمانی کھول ءِ مردم آیانی ھاترءَ سالانی سال جھد کنگءَ پد نوں وت کُشی کنگ ءَ اَنت، من چہ اے پارلیمنٹ ءَ نیشتگیں مردماں جُست کناں کہ آ گھار ءِ وتکشی ءِ رپورٹ ءَ کئی نام ءَ نبشتہ بہ کناں، وتی اگں وتی پارٹی ءِ باسکانی یا ھمایانی کہ مارا سوگند داتگ اِش کہ بیگواھیں مردمانی جیڑہ ھلاس کنگ بیت۔

سردار اختر مینگل ءَ پارلیمنٹ ءَ گُڈ سرءَ یک لڑ ءِ داتگ کہ آئی تھءَ چار سد مردمانی آجوہ بیگ ءِ لڑ ھوار اَت ءُ دومی لڑ ھما مردمانی اَت کہ انوگیں سرکار ءِ وھدءَ گار کنگ بیتگ اَنت۔

سردار اختر ءَ گوشت کہ مئے کِرا پنچ سد مردمانی بیگواھی ءِ سرجمیں لڑ است ءُ انگت ھم دگہ ھزار مردمانی لڑ ءِ سرا کار بیگ ءَ اِنت کہ آیوکیں روچ ءَ پارلیمان ءَ پیش کنگ بیت۔

بلوچستان لبریشن فرنٹ ءِ جارکش میجر گھرام بلوچ ءَ آواران ءِ پاکستانی پوج ءِ یک گاڑی ءَ نشانگ کنگ ءِ زمہ واری منان ءَ گُوشتگ کہ سئے شمبے ءِ روچ ءَ آواران ءِ دمگ پیراندر، کیچ ءَ پاکستانی پوجی ٹولی ءِ سرا کل کُتگیں شورواں گوں نشانگ کُتگ، چہ ایشی ءَ گاڑی سرجمی ءَ تباہ بیتگ ءُ گاڑی ءَ سواریں درستیں کارمند مرتگ ءُ ٹپی بیتگ اَنت۔

میجر گھرام بلوچ ءَ دیمترا گوشت کہ اے شورو ھما وھد ءَ کل کُتگ اَنت، وھدے پاکستانی پوج پیراندر ءَ بیڑ برگ ءَ پد واتر وتی بنجل ءَ روگ ءَ بیتگ اَنت ۔

آئی ءَ گوشت کہ قوضہ گیر استانی لشکرانی سرا داں بلوچستان ءِ آجوئی ءَ اُرش برجاہ مان اَنت ۔

تمپ ءَ دازن ویل ءِ ھلاپ ءَ زھرشانی، آل پاٹی ءُ سیول سوسائٹی ءِ نیمگ ءَ روانک کشگ بیتگ –

دی بلوچستان پوسٹ

تمپ دازن ءِ ناوشیں ویل ءِ ھلاپ ءَ نیشنل پاٹی، بی این پی مینگل، بی این پی عوامی، سیول سوسائٹی ءُ انجمن تاجرانی نیمگ ءَ زھرشانی کنگ بیتگ ءُ چریشی ءَ بازیں کَچے ءَ مھلوک ءَ بھر زرتگ –

روانک تمپ ءِ جتائیں دمک ءُ دگانی سر ءَ گوزان ءُ روانک ءَ بھر زورکیں مردمانی دستاں بینر ءُ پلے کارڈ بیتگ ءُ اوگام جنان بیتگ اَنت –

زھرشانی کنوک شھر ءِ بنجاھی چار راھے سر ءَ مُچ بیتگ ءُ اود ءَ بھر زورکاں تران کنان ءَ بی این پی ءِ رھشون نسیر گچکی، تمپ ءِ سروک مھمد ھان گچکی، نیشنل پاٹی تمپ ءِ سروک مھمد بکش بلوچ، بی این پی عوامی ءِ امین قریش، نامی ئیں شائر بشیر بیدار، سیو سوسائٹی ءِ اباس ھسن ءُ واھد لال ءَ گْوشت کہ دازن ءِ ناوشیں ویل بلوچ دودمان ءِ سر ءَ تچکی ءَ اُرش اِنت ایشی ءِ لوٹ ایش اِنت کہ کلوہ دیگ اِنت بلوچ نِی وتی لوگانی تہ ءَ ھم مھکم نہ اِنت ناکہ اشانی دود ءُ دودمان مھکم اَنت –

آئی ءَ گْوشت کہ ھما وھد ءَ داں ما یکجا نہ بہ ایں ءُ وتی سلکارانی ھلاپ ءَ ھمدست نہ بہ ایں مئے گون ءَ زُلم ءُ زوراکی روچ پہ روچ گیش بیان بنت –

زانگ بہ بیت دازن ءِ ویل دو روچ ءَ پیسر پیش اتکگ کہ اود ءَ شپ ءَ ناشناسیں سلاہ بندیں مردماں یک لوگے ءَ دور کرتگ ءُ اود ءَ دُزی دازی بندات کرتگ ءُ ھمے وھد ءَ لوگ ءَ جاڑیگیں زالبول گُلسوم چار چُکانی دیم ءَ کارچ جنگ ءُ کُشگ بیتگ ءُ آئی ءِ سھر دزگ بیتگ ءُ جرمکار تتکگ اَنت –

ویل ءِ ھلاپ ءَ گوستگیں روچ ءَ تمپ ءِ دمگ دازن، ملانٹ، نزر آباد ءُ کلاھو ءَ مھلوک ءِ نیمگ ءَ زھرشانی روانک کشگ بیتگ –

روانک نمیران ءِ لوگ دازن ءَ چَہ بندات بیتگ ءُ تمپ ءِ جتائیں دمکاں گوزان بیتگ ءُ پولیس ءِ کارگس ءِ دیم ءَ شتگ –

روانک ءَ نامی ئیں ادیب بانک اندلیپ گچکی ءُ شیر جان گچکی ءَ تران کرتگ ءُ ھمے وڑ ءَ نندانک ءَ ھواریں مردماں اسسٹنٹ کمشنر رھمت مراد ءَ گپ ءُ تران کرتگ ءُ کُشندھانی دزگیری ءِ سدکی کتگ چریشی ءَ پد زھرشانی نندانک آسر بیتگ –

ایچ آر سی پی اسپیشل ٹاسک پورس تربت مکران ءِ جارکش ءَ ویل باز پدردناک ءُ گیر انسانی، بے ھودی ءُ انسانی ھکانی ٹوھیں لگتمالے ءِ گْوشتگ کہ ایشی ءَ پیسر ڈنک ءَ بیست ءُ شش مئی ءِ شپ ءَ یک ھنچین پدردیں ویلے پیش اتکگ کہ دُزی ءِ وھد ءَ جنگ ءِ وھد ءَ ملناز نامے زالبولے شھید کنگ بیتگ کہ آئی ءِ کشندہ پولیس ءَ دزگیر کرتگ اَنت –

جارکش ءَ گْوشت کہ اے سرجمیں ویلاں دُز ءُ ڈنگاں وتی سیادء سیکیورٹی ادارھاں گوں بندوک کرتگ اَنت اے بژنی ءِ پیم بیگ اِنت ایشی ءَ پیسر گلشن آباد ءَ دُزی ءِ ویل پیش اتکگ ءُ چریشی ءَ پد آبسر، گوکدان، نوک آباد ھَ اے وڑیں دردناکیں ویل پیش اتکگ اَنت بلے بژنیگ ایش اِنت کہ سرکار سرجمیں باوشیں ویلانی گر ءُ دار ءَ بے سوب اِنت –

زانگ بہ بیت گوستگیں روچاں ڈنک ءَ پیش اتکگیں ویل ءَ پد بلوچستان ءُ دری ڈیھاں زھرشانیانی درچ برجاہ اَنت –

ڈنک ویل ءِ ھلاپ ءَ ندر لینڈز ءِ شھر امسٹرڈم ءَ “برمش یکجھتی کمیٹی ” ءِ نیمگ ءَ دو شمبے ءِ روچ ءَ یک زھرشانی ءِ کنگ بیتگ چریشی ءَ زھرشانی کنوکاں لوٹ کرتگ اَت کہ میان اُستمانی مردمی اگبالانی ادارہ بلوچستان ءَ پاکستان ءِ ریاستی ناشرکاری ءِ ھلاپ ءَ گامگیج بہ زور اِیت –

زھرشانی کنوکاں گوشت ریاست ءِ سروکی ءَ ردوکیں ڈیتھ اسکواڈ ءَ گوستگیں روچاں ڈنک ءَ ملکناز شھید کرتگ ءُ آئی ءِ چار سالی ئیں زھگ برمش زدگ کرتگ ھمے وڑ ءَ تمپ ءِ دمگ دازن ءَ گلسوم شھید کنگ بیتگ –

زھرشانی کنوکاں گْوشت کہ ما زانیں اے درست ریاستی سروکی ءَ کنگ بیگ ءَ اَنت – انسانی ھکانی دودمانیں ادارھاں اشی ءِ گامگیج زورگی اِنت –