کیچ ءَ دازن ویل ءِ ھلاپ ءَ زھرشانی

تمپ ءَ دازن ویل ءِ ھلاپ ءَ زھرشانی، آل پاٹی ءُ سیول سوسائٹی ءِ نیمگ ءَ روانک کشگ بیتگ –

دی بلوچستان پوسٹ

تمپ دازن ءِ ناوشیں ویل ءِ ھلاپ ءَ نیشنل پاٹی، بی این پی مینگل، بی این پی عوامی، سیول سوسائٹی ءُ انجمن تاجرانی نیمگ ءَ زھرشانی کنگ بیتگ ءُ چریشی ءَ بازیں کَچے ءَ مھلوک ءَ بھر زرتگ –

روانک تمپ ءِ جتائیں دمک ءُ دگانی سر ءَ گوزان ءُ روانک ءَ بھر زورکیں مردمانی دستاں بینر ءُ پلے کارڈ بیتگ ءُ اوگام جنان بیتگ اَنت –

زھرشانی کنوک شھر ءِ بنجاھی چار راھے سر ءَ مُچ بیتگ ءُ اود ءَ بھر زورکاں تران کنان ءَ بی این پی ءِ رھشون نسیر گچکی، تمپ ءِ سروک مھمد ھان گچکی، نیشنل پاٹی تمپ ءِ سروک مھمد بکش بلوچ، بی این پی عوامی ءِ امین قریش، نامی ئیں شائر بشیر بیدار، سیو سوسائٹی ءِ اباس ھسن ءُ واھد لال ءَ گْوشت کہ دازن ءِ ناوشیں ویل بلوچ دودمان ءِ سر ءَ تچکی ءَ اُرش اِنت ایشی ءِ لوٹ ایش اِنت کہ کلوہ دیگ اِنت بلوچ نِی وتی لوگانی تہ ءَ ھم مھکم نہ اِنت ناکہ اشانی دود ءُ دودمان مھکم اَنت –

آئی ءَ گْوشت کہ ھما وھد ءَ داں ما یکجا نہ بہ ایں ءُ وتی سلکارانی ھلاپ ءَ ھمدست نہ بہ ایں مئے گون ءَ زُلم ءُ زوراکی روچ پہ روچ گیش بیان بنت –

زانگ بہ بیت دازن ءِ ویل دو روچ ءَ پیسر پیش اتکگ کہ اود ءَ شپ ءَ ناشناسیں سلاہ بندیں مردماں یک لوگے ءَ دور کرتگ ءُ اود ءَ دُزی دازی بندات کرتگ ءُ ھمے وھد ءَ لوگ ءَ جاڑیگیں زالبول گُلسوم چار چُکانی دیم ءَ کارچ جنگ ءُ کُشگ بیتگ ءُ آئی ءِ سھر دزگ بیتگ ءُ جرمکار تتکگ اَنت –

ویل ءِ ھلاپ ءَ گوستگیں روچ ءَ تمپ ءِ دمگ دازن، ملانٹ، نزر آباد ءُ کلاھو ءَ مھلوک ءِ نیمگ ءَ زھرشانی روانک کشگ بیتگ –

روانک نمیران ءِ لوگ دازن ءَ چَہ بندات بیتگ ءُ تمپ ءِ جتائیں دمکاں گوزان بیتگ ءُ پولیس ءِ کارگس ءِ دیم ءَ شتگ –

روانک ءَ نامی ئیں ادیب بانک اندلیپ گچکی ءُ شیر جان گچکی ءَ تران کرتگ ءُ ھمے وڑ ءَ نندانک ءَ ھواریں مردماں اسسٹنٹ کمشنر رھمت مراد ءَ گپ ءُ تران کرتگ ءُ کُشندھانی دزگیری ءِ سدکی کتگ چریشی ءَ پد زھرشانی نندانک آسر بیتگ –

ایچ آر سی پی اسپیشل ٹاسک پورس تربت مکران ءِ جارکش ءَ ویل باز پدردناک ءُ گیر انسانی، بے ھودی ءُ انسانی ھکانی ٹوھیں لگتمالے ءِ گْوشتگ کہ ایشی ءَ پیسر ڈنک ءَ بیست ءُ شش مئی ءِ شپ ءَ یک ھنچین پدردیں ویلے پیش اتکگ کہ دُزی ءِ وھد ءَ جنگ ءِ وھد ءَ ملناز نامے زالبولے شھید کنگ بیتگ کہ آئی ءِ کشندہ پولیس ءَ دزگیر کرتگ اَنت –

جارکش ءَ گْوشت کہ اے سرجمیں ویلاں دُز ءُ ڈنگاں وتی سیادء سیکیورٹی ادارھاں گوں بندوک کرتگ اَنت اے بژنی ءِ پیم بیگ اِنت ایشی ءَ پیسر گلشن آباد ءَ دُزی ءِ ویل پیش اتکگ ءُ چریشی ءَ پد آبسر، گوکدان، نوک آباد ھَ اے وڑیں دردناکیں ویل پیش اتکگ اَنت بلے بژنیگ ایش اِنت کہ سرکار سرجمیں باوشیں ویلانی گر ءُ دار ءَ بے سوب اِنت –

زانگ بہ بیت گوستگیں روچاں ڈنک ءَ پیش اتکگیں ویل ءَ پد بلوچستان ءُ دری ڈیھاں زھرشانیانی درچ برجاہ اَنت –

ڈنک ویل ءِ ھلاپ ءَ ندر لینڈز ءِ شھر امسٹرڈم ءَ “برمش یکجھتی کمیٹی ” ءِ نیمگ ءَ دو شمبے ءِ روچ ءَ یک زھرشانی ءِ کنگ بیتگ چریشی ءَ زھرشانی کنوکاں لوٹ کرتگ اَت کہ میان اُستمانی مردمی اگبالانی ادارہ بلوچستان ءَ پاکستان ءِ ریاستی ناشرکاری ءِ ھلاپ ءَ گامگیج بہ زور اِیت –

زھرشانی کنوکاں گوشت ریاست ءِ سروکی ءَ ردوکیں ڈیتھ اسکواڈ ءَ گوستگیں روچاں ڈنک ءَ ملکناز شھید کرتگ ءُ آئی ءِ چار سالی ئیں زھگ برمش زدگ کرتگ ھمے وڑ ءَ تمپ ءِ دمگ دازن ءَ گلسوم شھید کنگ بیتگ –

زھرشانی کنوکاں گْوشت کہ ما زانیں اے درست ریاستی سروکی ءَ کنگ بیگ ءَ اَنت – انسانی ھکانی دودمانیں ادارھاں اشی ءِ گامگیج زورگی اِنت –