TBP Balochi

نبشتانک: وپا بلوچ ھم بیگواہ کنگ بوت

نبشتہ کار : ریاض بلوچ

بلوچ یک گُلامیں گُلزمین ءِ واھُند انت ، آئی ءِ درست چیز ءِ واک ءُ اھتیار چَہ آئی ءَ پُلَگ بوتگ. چوناھا یک راجی ءِ کہ زمین ایردست بیت آ وتی ھچ شے ءِ مالک نہ بیت ءُ آ وتی ھچ شے رکّینت ھم نہ کنت، کبزہ گیر آئی ءَ زند ءِ ھر تَک ءَ نیست و نابود کنگ ءِ مدام جُھد ءَ کنت.
بلوچستان ءَ زند ءِ بنکی آسراتی تو بہ گر نبوگ ءِ کَچ ءَ انت ، نادراہ جاہ، وانگ جاہ ، دَگ ، لین ءُ ورگی آپ تاں ھم نہ گواہ ایت.

بیست یکمی کرن ءَ بلوچستان ءَ مردم چَہ ملیریا ءُ سھرک ءَ ھم مرَگ ءَ انت ، ھزارانی کَچ ءَ شومَک ءِ نادراہ ھست انت ، سدانی کَچ ءَ مرتگ انت چَہ بے الاجی ءُ بے کسی ءَ بلوچستان ءَ نادراھانی دست گرگ ءُ آیانی الاج ، چار ءُ گزار ھاتر ءَ اولی رند ءَ “بلوچ کمکـکار” نام ءَ چاگردی گَلے اڈ دیَگ بوت کہ دیمتر ءَ آئی ءِ نام بدل کنگ ءُ “اوست” ایر کنَگ بوت.
“اوست چاگردی کمکی گَل” یا اوست ویلفیئر سوسائٹی ھما گَل اِنت کہ بلوچستان ءِ نا دست رس ءُ لا چاریں نادراھاں دست گپت ، چَہ وتی راج ءَ چندہ پوڈی گپت ءُ آیانی الاج ءِ ڈُباہ ءَ زور ایت.
اوست ءَ بلکیں انگت سدانی کَچ ءَ نادراہ دست گپتگ ءُ الاج کنائینتگ اِنت ، اشانی توک ءَ بازینے شومَک ءِ نادارہ ھم ھوار انت کہ چَہ اشاں بازینے واجہ ھُدا ءِ کدرتاں دراہ ھم بوتگ.
بلے بلوچ ءِ جوریں دژمناں پَہ بزگیں بلوچ راج ءَ ھمے کار ھم شات نبوت.
10 جولائی ءِ نیم شپی پاس ءَ چَہ کراچی ملیر ءِ ھند شاہ فیصل کالونی ءَ اوست ءِ بُنجاھی کارگشاد (سیکرٹری جنرل) عبدالقيوم پنام وپا بلوچ زورگریں ریاست ءِ لشکر ءَ گوں گشت گاڑی ءَ اتک انگیر کت چست کت گوں وت برت ءُ بیگواہ کت کہ تا ھنو ھچ گواہ ئِے نیست.

وپا بلوچ یک زندہ دل ءُ نیکیں انسانے ، چاگردی پُر ایمنیں جُھدکارے ، آئی کار ھمے بزگ ءُ لاچاریں نادارھانی دست گرگ دوا ءُ درمان دیَگ ءُ ھیال داری بوتگ.
وپا بلوچ ءِ کھول ءُ آئی گَل اوست ءَ چاگردی رسانکدر ءَ شنگ بوتگیں وتی یک درشانی ءَ چہ سرکار ءَ دستبندی کتگ کہ وپا بلوچ ءَ زوت ءَ چہ زوت دیم ءَ بیاریت ، اگاں آئی ءِ سر ءَ دگہ بھتامےِ ھست ادالت ءَ پیش ئِے بکنت، اگاں چیزے سابت بوت حتماً سزا ئِے بدنت بلے چُش بیگواہ ئِے مہ کنت.
من سرپد باں کہ اے ملک ءَ تو سلاہ چست کن ئے، کلم چست کن ئے یا دگرانی سکی ءُ سوریاں چست کن ئے ہلھم چست کنگ بئے، بیگواہ کنگ کنگ بئے، پرچا کہ وپا ءَ دگہ سلاھے بڈ ءَ نبوتگ ءُ ناکہ ھچ وڑیں سیاسی چست ءُ ایرے ءِ بھر بوتگ بلے پد ءَ ھم پَہ آئی ءِ چست کنگ ءَ سرکار ھشت گاڑی تپنگ ءُ کاٹار بیت ءُ کیت شپ نیم ءَ چست کنت ءُ بارت ئِے.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

ھزدار |جائو ءَ پوج ءِ دست ءَ شش مردم بیگواہ

دی بلوچستان پوسٹ

جائو ءِ جتائیں جاھاں گوستگیں بازیں روچاں پوجی آپریشن برجاہ اَنت پوجی آپریشنانی وھداں گیشتر پوج نیٹورکاں بند کنت ءُ میتگانی سر ءَ اُرش کنت –

سربیتگیں ھالانی رد ءَ ھزدار ءِ دمگ گریشہ باھڑی ءَ پوجی آپریشن ءِ وھد ءَ پوج ءَ سنجر ء ھسن، نور بکش ء سلیم ءُ ھیر بکش ء سلیم جھمنند گریشہ آوار جتگ ءُ برتگ اَنت –

دمگی مردمانی رد ءَ پوجی آپریشن ءِ وھد ءَ پوج ءَ باھڑی ءِ لوگ ھم پَٹ ءُ ھنڈ کرتگ اَنت –

ھمے وڑ ءَ گوستگیں روچ ءَ جائو ءِ جتائیں جاھاں باز مردم پوج ءَ آوار جتگ ءُ بیگواہ کرتگ اَنت –

ھالانی تہ ءَ سر بیتگیں ھالانی رد ءَ جائو ءَ بلو ء نور مھمد جھمنند سکڑی دپ، مھمد جُما ء رسول بکش جھمنند ڈومب ءُ تاج مھمد ء اتا مھمد جھمنند سورگر آوار جتگ ءُ بیگواہ کرتگ اَنت –

دمگی مردمانی گوشگ اِنت کہ پوج ءَ دمگ ءَ جھمنندیں مردم دلاپ ءُ بیگار کرتگ اَنت آیاں گوشت کہ پوج ھمک وھد دمگی مردمانی ھر ءُ ھُشتر ءُ گاڑیاں بیگار کنت ءُ وتی واستا وردنی مڈی بارت ءُ سر کنت –

آیاں گوشت کہ دمگی مھلوک وتی پاریاگر ءُ لاپ والینگ ءَ وتی اولاکاں کامرد کنت بلے ھنچیں روچ بنت کہ چرے بیگاریاں چَہ مردم وتی لاپی ءَ ھم کپتگ ءُ زبھر اَنت –

نبشتانک: ھما کپاتُک |شھید زاھد آسکانی ءِ یاتءَ

نبشتہ کار :ھدایت بلوچ

دی بلوچستان پوسٹ

مئے زانتکار ءُ راھشون ۔۔ وانندہ ءُ شریں سرپدیں مردم چی ءَ چمّاں چو پُلگ بنت ءُ ما چو بے سما ءَ نند اِیں چار اِیں۔
من ءَ شر یاد بیت ھما روچ ءَ من ءُ منی پت شُت اِیں گوادر ءَ پہ منی پت ءِ راھگوز/ گْوزراہ (پاسپوٹ) ءِ کشّگ ءَ کہ گوزراہ ءِ وھد ھلاس بوتگ ات۔ پت دلمانگ اَت بلکیں ھج ءَ بُرواں ، گڑا پت ءَ من ءَ وتی ھمراھی ءَ بُرت گوں۔ ما شُت ایں وھدے گوادر ءَ سر بوت اِیں، گڑا من جست کُت ابا نوں کُجا بُہ رواں ۔۔ دپترے وَ ما نہ زان ایں۔۔ پت ءَ گشت ھچ پریشاں مہ بو اِد ءَ من ءَ براتے ھست، آ مسیت ءَ گِند ئے بیا رو اِیں دزنمازے گِریں نمازے وان اِیں۔ پونے کناں زاھر ساھب وت مارا درگیج اِیت۔
ما پیشیم ءِ نماز ونت، شھید واجہ ءِ جاگہ اللہ جنت بہ کنات، گڑا ما واجہ ءَ را ھال کُت، پد ءَ دیم پہ پَدی زِر ءَ روان بوت اِیں ، بزاں واجہ ءَ( یاسر ) وتی کستریں برات روان دات برو ناکو ھاجی اتکگ ، پَدی زِر ءِ نیمگ ءَ بہ چار ئِے ۔ آئی ءَ گُشتگ ما پدی زر ءِ نیمگ ءَ چہ پیداک اِیں، بزاں یاسر دیمی زر ءِ نیمگ ءَ شُت۔، مارا نہ دیست ئِے۔ واتر اتک واجہ ءَ گشت ئِے من ناکو ھاجی نہ دیستگ۔ گڑا واجہ ءَ پدی زِر گشت پد ءَ مئے نیمگ ءَ دیم دات ئِے۔ یاسر اتک مارا دیست ئِے۔ گوں ما دست ءُ دروت بوت ۔ یاسر ءَ گشت من ءَ زاھر ساھب شمئے دست گرگ پہ راہ داتگ ۔ گُشتگ ئِے برو ناکو ھاجی پیداک انت بیار ئِے ۔ ما جِمّی ءَ (بزاں گاڑی)سوار بوت اِیں
،شُت اِیں لوگ ءَ سر بوت اِیں داں واجہ مئے ودار ءَ ات۔منی زِند ءِ اولی رند ات کہ من واجہ زاھر آسکانی ساھب دیست۔واجہ سکیں وش تبیں مردے ات۔۔ وھدے مارا دیست ئِے بلاھیں کندگے جت ئِے ءُ گُشت ئِے بیا ناکو جان بیا ترا اللہ بیار اِیت۔ منی پت ءَ واجہ ءَ را بَگل ءَ کُت ، پد ءَ من ءُ واجہ ھم سلام ءُ دروت بوت اِیں، من زانت اے واجہ سکیں لائکین ءُ جوانیں مردے ، وتی مردمانی دوستی ایشی ءَ را سک باز ھست، سکیں وش گپ ءُ مزاک کنوکیں مردُمے اَت، مئے واست ءَ واجہ ءَ وَرگ ءِ جوانیں وڑے ءَ تیاری کُرتگ ات۔۔۔
ورگ ءَ رند واجہ ءَ مارا شریں وڑے ءَ ھال پُرسی کُت۔ وتی ھنکیں بزاں پروم ءِ ءُ پروم مردمانی باز جُست ءُ پَد کُت، ھمد ءَ مزاک ئِے کُرت ءُ گشت ئِے من اے واجہ ءَ را (بزاں یاسر ءَ را) گُشتگ برو پَدی زِر ءَ ناکو ءَ بہ چار بیار ۔ یاسر شُتگ دیمی زِر ءَ شمارا شوھاز کنت، ھمد ءَ کند اِت ءُ گشت ئِے انچو وھد ترا بیت تو انگت نزان ئے پدی زر کجامی ءَ را گُش انت، من سک گل بوتاں مارا اد ءَ چُشیں جوانیں براتے ھست۔۔
اے روچ پہ ھال پُرسی ءُ کندک ءُ مزاک شپ بوت،
سھب بوت واجہ ءَ وتی وانگجاہ (اسکول ) ءِ باریگ( پیرڈ) ھلاس کُرت انت، مئیگ ءَ اتک ءُ منی پت ءَ گشت ئِے ناکو گوزراہ ءِ کاراں بِل مرچی ما شما گرد اِیں۔ ما سوار بوت اِیں گاڑی ءَ ، مارا زُرت ئِے گوادر ءَ گردینت ئِے ۔
ما چہ پَدی زِر ءَ گردان ات اِیں کہ جاھے بلاھیں زمینے مارا پیش ئِے داشت گُشت ئِے من دگہ بلاھیں وانگ جاھے پچ کَنگ ءَ آں۔
پد ءَ دیمی زِر ءِ نیمگ ءَ شُت اِیں، بازار ءَ چہ گوست اِیں داں (جیٹی) ءَ سر بوت اِیں، گشت ءُ سیل کُرت، بلاہ بلاھیں لانچ دیست انت۔ واجہ ءَ گُشت شما چے گش اِت ، مرچی ورگ ءَ پہ چے بہ بیت ؟
منی پت ءَ گُشت ما گوادر ءَ اَتگ اِیں مرچی ماھیگ بہ بیت ، ھمد ءَ جیٹی ءِ سر ءَ شھید واجہ ءَ وشتِریں ماھیگ زُرت، اے روچ ءَ ماھیگ بوت، مارا واجہ ءَ سک گَور کت۔
وھدے گوادر ءِ بازار ءَ ما جِمیّ ءَ سوار اِت اِیں۔۔ واجہ ءَ وتی یک نودربرے دیست آئی ءَ وتی کتاب گوں اَت، ھمد ءَ بازار ءِ تہ ءَ چہ واجہ ءَ وتی سبک ءِ بارو ءَ گالے جُست ئِے کُرت۔
من ءَ گوادر ءِ مردمانی وش تبی ءُ نرم ھبری سک دوست بوت، واجہ سکیں مھروانے اَت، واجہ ءَ مارا سک مھر دات، یک گونڈیں کپاتُکے گاڑی ءِ تہ ءَ ات، ھمے کپاتُک گاڑی ءِ گیر ءَ اڈینتگ اَت، منی پت ءَ جست کت، اے چونین کپاتُکے واجہ ءَ گشت اے یکے ءَ من ءَ دادے داتگ۔ اے روچ پہ تر ءُ تاب شپ بوت، اے دگہ روچ ءَ واجہ ءَ دگہ مھمانے ھست اَت نام ئِے ابدلکدیر اَت ۔۔۔
واجہ ءِ سنگتے اَت ، اے مھمان مشکت ءَ روگ ءَ اَت، ما سوار بوت اِیں جمیّ ءَ دیم پہ گوادر ءِ بالی پٹ ءَ شُت اِیں ، بالی پٹ ءَ سر بوت اِیں کمے وھد ءَ رند جھاز اھت، ابدلکدیر مارا رُکست کُت شت پہ مشکت ءَ ، ما واتر کُت بازار ءَ پاسپوٹ ءِ دپتر ءَ شُت اِیں، وتی کار سرجم کرت اَنت۔ واتر دیم پہ پروم اھت ایں۔
لھتیں وھد گوست یک روچے نہ وشیں ھالے من ءَ سر بوت۔ یکے ءَ گشت واجہ شھید کنگ بوتگ، من سک پدرد بوتاں، دل ءَ گُشت دپ ءَ پچ لگوش بور بور ءَ بِہ گِریو۔ چُشیں جوانیں واجھے اَت ایشی ءَ چہ پدی کُرتگ اَت، کئی بدواہ بوتگ اَت، اے وَ زانتکار ءُ راھشونے بوتگ۔۔۔۔۔۔!
پد ءَ زبان ءَ ھمے گال اھت۔۔

( کندیل تمامیں شھر ءِ مراناں یک یک ءَ)
زاناں کجام زانتکار ءُ راھشوں چمّاں نہ پُل اِتگ زالماں، بس ھما کپاتُک تنی وھدی منی چمّانی دیم ءَ اِنت۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

شال ءَ بیگواھیں بلوچانی درگت ءَ زھرشانی برجاہ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ےِ زھرشانی ءَ 4016 روچ سرجم بیتگ – نیشنل پاٹی ءِ سی سی ممبر نیاز مھمد، ملک نسیر اھمد شاھوانی ءَ دگہ مردماں بنجل ءِ تر ءُ تاب کرتگ ءُ کھولانی گون ءَ پدردی درشان کرتگ –

مزن ھور ءُ پاکستان ءَ چَہ بیگواہ بوتگیں انسانی ھکانی باسک راشد ھُسین بلوچ ءِ مات، شال ءَ چَہ بیگواہ بیتگیں ھسان کمبرانی ءُ ھزب اُلا کمبرانی ءُ دگہ بیگواھیں مردمانی کھول بنجل ءَ اتکگ ءُ وتی زھرشانی اِش نبشتگ کنائینتگ –

ھمے وھد ءَ وی بی ایم پی ءِ رھشون ماما قدیر بلوچ ءَ وتی لیکہ درشان کنان ءَ گْوشت کہ 2019 ءِ سال ءَ بلوچ پُسگانج شھیدی، آوار جنی، گاریں گورانی دزکپگ، لَٹ ءُ کُٹ کرتگیں کُنٹ، آبادیانی سر ءَ بمبگواری کنگ، زالبول ءُ چکانی آوار جنگ ءُ گار کنگ ءَ راجدپتری تاکے پُر کرتگ وھدیکہ ھمے روانی یے سال ھم بلوچ راج ءِ ھون چُسیں سال نامینگ بیتگ –

آئی ءَ گْوشت کہ ھمک وھد ءَ زورگر ءَ زیردستیں مھلوک ءِ لَگت دیگ ءَ زوراکیانی تاک پُر کرتگ اَنت -ھمے وڑ ءَ ھمے دمگ ءَ بلوچ راج وتی زندگی ءِ زندمان ءِ شر کنگ ءَ جد ءُ جھد ءِ تہ ءَ الگاری اَنت –

ماما قدیر بلوچ ءَ گوشت کہ بلوچ راج تھی درشم ءَ نیزرو کنگ ءُ پُرایمنیں جد ءُ جھد کنوکانی پروش دیگ ءَ دمگی ھنداں وتی گچینی یے مردم اش گچین اِش کرتگ اَنت ئِے ءُ ڈیتھ اسکواڈ ءِ جوڑ کرتگ ءُ چریشی ءِ زور ءَ ھزاراں مردم مروچی بیگواہ اِنت –

آئی ءَ گْوشت کہ گلامی، زیردستی مازگی منگ ءَ زانشتی، ادبی ءُ دودمانیاں ھوار جتائیں پندلانی سوب ءَ گیشیں رنگے ءَ آرگ بیتگ اَنت –

بلوچستان ءِ دمگ ھاران ءَ چہ زور بیگواہ کُتگیں نودربر ثناء بلوچ دو ماہ گوزگ ءَ پد ھم دیما آرگ نہ بیتگ، کھول ءِ مردماں چہ واکداریں گلاں گوں ثناء ءَ دیما آرگ ءِ لوٹ کُتگ ۔

بیگوائیں نودربر ثناء بلوچ ءِ برات ءَ گوشتگ کہ وتی بیگوائیں برات ءِ یل کنائنگ ءِ ھاترءَ بلوچستان ءُ بنجائی سرکار ءُ سرکاری گلاں گوں دزبندی کنیں کہ ثناء بلوچ ءَ یل بہ کن اَنت، اگں آئی سرا کجام ھم بھتام است اَنت گُڑا آئی ءَ پاکستانی رھبندءِ ردءَ آمید گِس ءَ آرگ ءُ وتی بے میاری ءِ پیش دارگ موہ دیگ بہ بیت۔

آئی ءَ گوشتگ کہ ثناء بلوچ علامہ اقبال اوپن مزن شھدربرجاہ اسلام آباد ءَ ایم فل ءِ نودربر اِنت کہ مروچی آئی بیگوائی ءَ دو ماہ سرجم اِنت کہ دنیگت آئی درگت ءَ ھچ ھال نیست ل، ثناء ءِ بیگوائی ءَ پد ما درست یک دردناک ءِ زند ءِ گوازینگ ءَ اِنت۔

یات بہ بیت ثناء بلوچ یازدہ مئی دوھزار بیست ءَ ھاران چہ فورسزانی دست ءَ دزگیری ءَ پد داں انگت بیگواہ اِنت۔

دومی نیمگ چہ چاردہ فروری دو ھزار بیست ءَ بیگواہ بیتگیں حسان قمبرانی ءِ گھار ھسیبہ قمبرانی ءَ وتی یک ٹوئیٹ ءِ تھءَ گوشتگ کہ منی مستریں برات ءِ چُک سالار پدا چورا بیگ نہ لوٹیت آئی ءِ پِت چہ آئی ءَ باز پیسرا پُلگ بیتگ۔

مروچی آ حسان ءَ وتی بابا گوشیت ءُ توار پِر کنت۔ حسان ءَ یل کنگ اے گونڈوانی باندات رکینگ بہ بیت۔

بلوچستان ءَ سیاسی، انسانی ھقانی کارکنوکیں مردماں ھوار چاگردی جھدکار ھم چیریں گلانی دستءَ نہ رکیتگ اَنت۔ گوستگیں روچاں چہ کراچی ءِ دمگ ملیر ءَ بیگواہ بیتگیں وپا بلوچ ءِ بیگوائی ءِ درگت ءَ نودربر رھشون ڈاکٹر مھرنگ بلوچ ءَ ٹوئیٹر ءَ وتی یک ٹوئیٹ ءِ تھءَ گوشتگ کہ وپا بلوچ زوریں بیگوائی ءِ نوکتریں آماچانی کنگ بیتگ۔

آ اوست ویلفیر آرگنائیزیشن ءِ جنرل سیکریٹری اِنت، آ پہ چاگرد ءِ دیمروی ءَ جھد کنگ ءَ بیتگ۔ آ وتی پجار ءِ سوب ءَ استانی تھاریں زندانانی تھءَ دور دیگ بیتگ۔

ھمے وڑ ءَ بیگوائیں بلوچانی کھولانی گل وائس فار بلوچ مسنگ پرسنز ءِ یکشلیں زھرشانی پہ بیگوائیں مردمانی یل کنگ ءِ ھاترءَ برجاہ اِنت۔ وی بی ایم پی ءِ ردءَ بلوچستان عوامی پارٹی ءِ سرکار ءَ ھم ھزارانی کچ ءَ مردم بیگواہ کنگ بیتگ ءُ بازیں زانگولیں جون ءِ دست کپتگ۔ گل ءِ رھشونانی ردءَ ھزارانی کساس ءَ مردم بیگواہ کنگ ءُ ھمے بیگوائیں مردمانی تھءَ لھتیں مردمانی یل کنگ ءَ چہ بلوچستان ءُ بنجائی سرکار پوج ءُ چیریں گلانی بلوچستان ءِ تھءَ بیوکیں ھمک روچی زوراکی ءَ چیر دیگ ءِ یک بے سوب ءِ جھد ءِ کنگ ءَ اَنت۔

نبشتانک: تو اجبیں انسانے ئے

نبشتہ کار:وسیم وپا

دی بلوچستان پوسٹ

لھتیں انچیں گپ اَنت کہ من باز رند ءَ اِشکُتگ اَنت گڑا ھمے مار اِتگ گش ئے مدام ھمے گپ چو سُچن ءَ بوتگ اَنت،

یک بیگاھے ءَ ایوک ءُ تھنا من وتی لوگ ءِ کنج نشتگ اِت آں، اردو گدار کتابے دیم ءَ اَت کہ من تاک تاک ءَ لیٹینان ءُ وانگ ءَ اِت آں،من اے گدار ءِ بزاں گیشتری نیم ھلاس کُتگ اَت بس چندے تاک پشت کپتگ اَت، اے گدار ءِ وانگ ءَ گُش ئے من ھمے گدار ءِ توک ءِ یک کارستے آں، منی اے گدار ءِ دل ءَ انچو ایر کپتگ اِت آں کہ وتی جند ءِ سما ءَ نہ اِت آں کہ ھمے وھد ءَ پورا چیزے سکّ ءَ منی گوشاں کپان اِنت تْرھک تْرھک چو سک توار کنگ ءَ اِنت بزاں لوگ ءِ دروازگ اِنت گڑا من ھیران ءُ ھبکہ بوت آن ءُ چہ گدار ءِ تاکاں در آتک ءُ دمان ءَ پاد آتک آں دیم پہ دروزگ ءَ شُت آں، دروزگ پچ کُت چار آں داں منی ٹِلّیں سنگت شمیم اِنت دروت ءُ دراھبات من کُت، سنگت شمیم بید چہ دراھباتی ءَ من ءَ گوں جبزھی ءَ گُشت ئِے”منی اینچو دروزگ ءِ جَنَگ ءَ دست ءَ دمبُرگ تو ھچ پچ ئِے نہ کن ئے ترا چون اِنت، تو بلکیں زانتگ من کایاں پمیشکا منی آیگ ءَ وش نہ بوتگ ئے؟“

من پسّہ دات تو بیا لوگ ءَ رند ءَ من تو گپ کنیں. گڑا شمیم ءَ گْوست لوگ ءَ نشت من شُت آں چہ بُورچی ءَ آپے آؤرت ءُ دات آپ ئِے وارت گڑا کتاب ئِے دیست اَنت گُشت ئِے من مدام کایاں تو گوں ھمے چاریں کتاباں دسگٹ ئے یکروچے اے کتاب ترا گنوک کن اَنت تو وتی وشیں سر ءَ را وت درد داتگ نوں ھمیشاں گوں وت ءَ گنتر کن ئے !!

من گپ ءِ تَرینگ ءِ کوشست کُت ءُ گُشت یار تو آ گپ ءَ بِل باریں ھال کن کجا بوتگ ئے ؟کے ءَ را دیستگ ؟
پٹبالی ءِ پٹّ ءَ شُتگ ئے؟
سنگت ءَ گُشت تو سک زبر ئے منی پسہ ءَ بہ دے رند ءَ من وتی کسھاں کار آں گڑا من گوں پُرشتگیں بچکندے ءَ پسہ دات ھو یار چے بہ کن آں دگہ ھمے چاریں کتاب بس پمن پشت کپتگ اَنت ءُ گوں ھمیشاں وت ءَ دلگوش کن آن ءُ وان آں چیزے نا چیزے دربر آں ۔

سنگت ءَ گُشت کہ من وَ زاناں ترا گم پِر من زاناں تو درد دیستگ من زاناں ترا کئی ھیال گون اَنت بلے تو برے برے چہ لوگ ءَ در بہ کپ بیا من ءُ تو ترّ ءُ تابے کنیں یاکہ آدگہ سنگتانی کِر ءَ رو اِیں تو ھچ در نیا ئے چہ اے پُرشتگیں بان ءَ گڑا پہ مسکرا گُشت ئِے زاناں یکروچے اے بان تئی سر ءَ کپ اِیت.

ھاھاھاھا من گُشت یار چے بہ کن آں زندگی مدام ماھو ءِ درداں دوچار اِنت ھمائی ھیالاں گوں دسگٹ آں من پہ دروگ گُشت کہ تئی دل ءَ من ءَ گردگ ءُ تر ءُ تاب دوست نہ بیت؟ من ءَ گوں سنگتاں ھوری دوست نہ بیت یاکہ ھما دیوان ءُ مجلس کہ بیگاھے وھد ءَ ماں ملا شھداد ءِ ڈگار ءَ ھما کھیر ءِ بُن ءَ نشتگ ءُ مدام کندگ ءُ مسکراہ بوتگ مدام برے یکے ءِ پُچکاں بوتگیں، بلے مرچاں من ءَ اے گپ تُور اَنت انچو گُش ئے ایوکی من ءَ دوست بیت باریں چی ء؟َ برے گوں وت ءَ ءُ برے گوں کتابے ءَ گپ کن آن ءُ ھمے وڑ ءَ منی وھد گوزان اِنت.

سنگت ءَ گُشت کہ تو اجبیں انسانے ئے
وھد وَ ھرکسی گوز اِیت بلے نیکہ گوں اے کتاب ءُ ھیالاں برو پہ وت نوکیں زندگی یے شوھاز کن داں کدیں ماھو ءِ ھیالانی گوں ھمگرنچی ءَ زندگی ءَ وتی تیلانک دے ئے؟ مئے ءُ شمئے سنگتانی توک ءَ درساں سُور کتگ بس تو ءُ ھالد پشکپتگ اِت کہ ھالد چار روچ ءَ ساری آئی سُور کُرت ءُ پہ وتی گل ءُ شادنیں زندگی ءَ شُت،گڑا سُور ءِ سر ءَ ھالد ءَ من ءَ گُشت کہ وسیم چی ءَ منی سُور ءَ نیتکگ؟ باز گلّہ ءُ گپ ئِے کُت بلے مردم چو تئی وڑ ءَ نہ کنت.
من گُشت تو وَ سرپد ئے من ءَ مُچی ءُ مجلس دوست نہ بیت انچو سر درد کنت کہ چے بہ گوش آں ؟
گُشت ئِے تو بس وت ءَ انچو پیش بہ داشتیں سُور ءِ سر ءَ کہ ھالد ءِ دل کمو وش بہ بوتیں ھیر نوں وَ ترا ھرچی بہ گوش آں تو وتی گپ ءَ کارے سر ءَ کن ئے تو باریں بہ گوش گڑا کدیں منی پنت ءُ نسیتاں زور ئے؟

من گوشت شَر اِنت یار انچو کن آں تو باریں بہ گوش نوں اے موسم ءَ سلیمانی چاھے مہ بیت ؟
سنگت ءَ گُشت ھو باریں چاھے بہ کن
گڑا من پاد آتک ءُ دیم پہ بورچی ءَ شُت آں .

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

شال ءَ نشپا وھیل ءِ ھلاپ ءَ زھرشانی

دی بلوچستان پوسٹ

بنجاھی شھر شال ءِ پریس کلب ءِ دیم ءَ برمش یکجھتی کمیٹی ءِ نیمگ ءَ ھرنائی، نشپا وھیل ءِ ھلاپ ءَ زھرشانی کنگ بیتگ چریشی ءَ راجداری، چاگردی ءُ نودربریں گلانی باسکاں بھر زرتگ –

زھرشانی کنوکاں گوستگیں روچاں ھرنائی ءِ دمگ ءَ پاکستانی پوج ءِ نیمگ ءَ لوگانی انگیر کنگ ءُ زالبول ءُ جنینانی کوش ءِ ھلاپ ءَ اوگام جنگ بیتگ –

زھرشانی ءِ سروکی وائس فار بلوچ مسنگ پرسنز ءِ کسان کمک سرکماش ماما قدیر بلوچ ءَ کرتگ –

زھرشانی ءَ بھر زورکیں تران کنوکاں گْوشت کہ بلوچستان ءَ پوج ءِ نیمگ ءَ ھمک روچی ئیں پوجی آپریشناں ھمک روچ مھلوک چِست کنگ ءُ گار کنگ ءُ چُک ءُ زالبولانی لَٹ ءُ کُٹ کنگ ھوار اَنت – ھرنائی ءِ وھیل ءَ ناز بی بی ءُ آئی کھول ءِ کوش بلوچ راج ءِ ھلاپ ءَ ریاست ءِ نیمگ ءَ دورچاریں زوراکیانی برجاھی یے – اے وڑیں بازیں وھیلاں پدراھی بیتگ کہ چریشاں راجداری باسکانی کھول مازگی جیڑگ ءُ لَٹ ءُ کُٹانی نشانگ کنگ بیتگ اَنت –

آیاں گْوشت کہ ھپتاد ءُ سَے سالاں چَہ بلوچستان ءَ کہ ھرچ زُلم ءُ زوراکی برجاہ اَنت ایشاں ریاست ءِ چارومی جنیوا کنونشن ءِ آرٹیکل ءِ سِی ءُ سَے یے پادمالی اِنت بلے انسانی ھکانی ادارہ پاکستانی رسانکدراں سرجم ءَ چَم کُنٹی ءِ روچگ داشتگ کہ بلوچ نسل کُشی ءَ گیش دیم ءَ برگ ءِ بروبری اِنت –

ھرنائی ءِ وھیل ءَ بلوچستان ءَ زالبولانی نشانگ کنگ ءِ درچ ءَ انسانیت ءِ ھلاپ ءَ جرمے -زالبول ءُ چُکانی کُشگ ءِ اجازت یو این او، پاکستان ءِ رھبند ءُ دنیا ءِ کجام ھم کانود دات نہ کنت – بلے بلوچستان ءَ زالبول ءُ چُکانی کوش چو ھیوانی پیم ءَ برجاہ اِنت – بلے رسانکدرانی پابندی ءِ سوب ءَ چَہ زالبول نشانگ ءِ وھیلاں ڈیھے مردمانی چماں چہ دور اَنت -چریشی ءِ سوب ءَ اے وھیلانی دارگ ءِ واستا ھچ وڑیں گام چِست بیگ ءَ نہ اِنت –

آیاں گْوشت کہ ھرنائی ءِ وھیل ءَ پیسر مکران ءِ دمگ ڈنک ءَ ملکناز ءِ کوش ءُ برمش ءِ زدگ کنگ ءُ تمپ دازن ءَ کلسوم ءِ کشندہ انگت ءَ مئے چمانی دیم ءَ ترگ ءَ اَنت، اشاں نشانگ کنوکیں ھواریں مردم کہ ھما ٹولی ءَ گوں سیادی کن اَنت آئی ءَ گیرکانودی ءِ رنگ ءَ سرکاری ادارھانی چیردستی کمک گون اِنت – بلوچستان ءَجرمکاریں مردم ڈیتھ اسکواڈ ءِ دروشم ءَ وتی وھدی تیلانک ءَ دارگ بیتگ اَنت چریشی ءِ سوب ءَ اے جرمکاریں مردم وتی روپ ءُ بیم ءَ کارمرد کن اَنت ءُ روچ ء رھمانی زالبول ءُ چکاں نشانگ کنگ ءُ دُزی ءُ ڈنگیاں ھوار جتائیں سلکاریاں ھوار اَنت ءُ آیانی جُست کنوک نیست اِنت – ڈیتھ اسکواڈ ھمک دمگ ءَ جتائیں رنگاں دارگ بیتگ اَنت، ڈنک ءِ ناوشیں وھیل ءَ جرم ءَ ھواریں مردمانی دزگیری ءَ ابید ھم اے وھیلانی تہ ءَ کمی نیاتکگ ءُ ھما ماہ ءَ تمپ دازن ءَ یک دگہ وھیلے ءَ بی بی کلسوم آئی ءِ چُکانی دیم ءَ کُشگ بیتگ –

تران کنوکاں گْوشت کہ مروچی اے زھرشانی ءِ مول ءُ مراد پاکستان ءِ مھلوک ءِ سرپد کنگ اِنت بلوچستان ءَ کجام رنگ ءَ بزگیں مردم بے گناھیں زالبول ءُ چک نشانگ کنگ بیگ ءَ اَنت بلے جرمکارانی سزا دیگ ءَ ابید ھم اشانی پُشتگیری بیگ ءَ اِنت چریشی ءِ سوب ءَ اے وھیل روچ پہ روچ گیش بیان اَنت –

آیاں گوشت کہ ما اے زھرشانی ءِ پد ءَ مزن واکدار ءِ دلگوش ءَ ھمے نیمگ ءَ ترینگ لوٹ ایں کہ داں کدی بلوچستان ءَ بلوچ زالبول ءُ چُکانی نشانگ کنگ برجاہ مان اِیت؟ بلوچستان ءِ مھلوک کدی پُر ایمنیں وابے ءِ مارشتاں گِندیت پرچاکہ ھما پھزدارانی کار بلوچستان ءِ جتائیں جرمکارانی ھلاپ ءَ کاروائی کنگ اِنت ھمایاں ھمے جرمکار ءُ ھونواریں مردم داشتگ ءُ آ سرجم ءَ بے مھار کرتگ اَنت گڑا آ وت تچکی ءَ زالبول ءُ چُکانی نشانگ کنگ ءَ ھوار اَنت، چریشی ءِ زرشان گوستگیں روچاں ھرنائی ءَ گندگ بیت اِنت – جرمکاریں مردمانی ھلاپ ءَ کاروائی کنگ وتی جاہ ءَ ریاستی ادارہ لس مھلوک ءَ نشانگ کنگ ءَ اَنت وھدیکہ سرکاری ادارہ اے ڈیتھ اسکواڈانی پشتگیری ءَ ھم کنگ ءَ اَنت چریشی ءَ بلوچستان ءِ انیگیں جاورھالاں چَہ زانگ بیت اِنت –

تران کنوکاں اھوالکاراں گوں دزبندی کُرت ءُ گْوشت کہ آ بلوچستان ءَ زالبول ءُ چکانی نشانگ کنگ ءِ وڑیں ناوشیں وھیلاں سرجمیں ڈیھ ءَ شنگ ءُ شانگ کنگ ءِ واستا اھوالکاری ءِ دودمان ءِ رھبنداں بہ چار اَنت وتی کرد ءَ پیلو بہ کن اَنت –

زھرشانی ءَ نیشنل پاٹی، بی این پی مینگل، بی ایس او، نیشنل ڈیموکریٹک پاٹی ءِ رھشوناں بھر زُرت ءُ تران کرتگ ءُ ھرنائی ءِ وھیل بلوچ نسل کُشی ءُ انسانی ھکانی بدتریں پادمالی گوشتگ ءُ ریاست ءِ نیمگ ءَ بلوچ نسل کُشی ءِ بند کنگ ءِ لوٹ کنگ بیتگ –

کراچی ءُ ھب ءَ بلوچستان ءِ جھمنندیں دو مردم بیگواہ

دی بلوچستان پوسٹ

گوستگیں بازیں روچاں کراچی ءِ جتائیں جاھاں پاکستانی رینجرز ءُ چیریں ادارھانی آپریشن برجاہ اَنت ھمے میان ءَ رینجرز ءُ دگہ ادارھاں بازیں مردمے آوار جتگ ءُ برتگ –

سر بیتگیں ھالانی رد ءَ کراچی ءِ دمگ ملیر ءَ گوستگیں شپ ءَ پجا نیاھورتگیں مردماں بیڑ برتگ ءُ اود ءَ کیچ ءِ ھنکین آسیا باد ءِ جھمنندیں ورنایے آوار جتگ ءُ برتگ –

آوار جنگ بیتگیں مردم ءِ پجار کیوم پنام ءِ وپا ء ابراھیم ءِ نام ءَ زانگ بیتگ-

دمگی مردمانی رد ءَ دوشیگیں شپ ءِ ساھت دو ءَ دبوکا جتگیں مردماں ملیر پیسل کالونی ءَ ھشت گاڑیانی ھمراھی ءَ بیڑ برتگ ءُ اود ءَ کیوم ءِ چم بستگ ءُ گوں وت برتگ –

دمگی مردمانی رد ءَ دبوکا جتگیں مردمانی گپ ءُ چالاں ھمے سما بیتگ کہ سرکاری ادارھاں گوں بندوک اَنت –

ھمے وڑ ءَ ھب چوکی ءَ گوستگیں شپ ءَ چیریں ادارھانی کارمنداں یک لوگے ءَ بیڑ برتگ ءُ اود ءَ چَہ چاکر ء ابدلسلام آوار جتگ ءُ برتگ –

زانگ بہ بیت گوستگیں بیست ءُ نُھ جون ءَ کراچی ءَ پاکستان ءِ زرکاری بنجل اسٹاک ایکسچینج ءِ سر ءَ بیتگیں اُرش ءَ پد کراچی ءَ آئی ءِ نزیکیں ھنداں چیریں ادارھانی پَٹ ءُ پول برجاہ ءَ اَنت –

ھمے وڑ ءَ گوستگیں روچاں سندھ ءِ جھمنند ءُ وائس فار مسنگ پرسنز آف سندھ ءُ انسانی ھکانی پرکاریں رھشون شازیہ چانڈیو ءِ برات آکب چانڈیو پاکستانی چیریں ادارھاں گلستان ء جوھر کراچی ءَ دزگیر کرتگ ءُ برتگ –

آکب چانڈیو ءِ دزگیری ءِ وھد ءَ پاکستانی پوجی چیریں ادارھانی کارمنداں آئی ءِ لوگبانک ءُ گوھار لَٹ ءُ کُٹ کرتگ اَنت ءُ چریشی ءَ چہ آ ٹپ ءُ ٹور ھم بیتگ اَنت –

چاگردی رسانکجاھاں دیستگیں اکسانی تہ ءَ آکب چانڈیو ءِ گوھار ھون ریچیں جاوراں گوں گندگ بیت اِنت اکساں چَہ ھمے پدراھی بیگ اِنت سک جنگ بیتگ ءُ ژند ءُ پند کنگ بیتگ اَنت –

کراچی اسٹاک ایکسچینج ءَ بیتگیں اُرش ءَ پد پاکستانی پولیس ءُ چیریں ادارھاں کراچی ءِ جتائیں جاھاں بازیں شکی یے مردم دزگیر کرتگ ءُ برتگ اَنت –

زانگ بہ بیت آکب چانڈیو سال دوھزار ءُ ھژدہ ءَ ھم لاڑکانہ ءَ آوار جنگ بیتگ ءُ پد ءَ دوھزار نوزدہ ءَ یلہ کنگ بیتگ –

اے دومی رند اِنت کہ آکب چانڈیو بیگواہ کنگ بیگ ءَ اِنت –

آزمانک: سور کسانی ءَ گناھے

آزمانکار: دیدگ گُل

دی بلوچستان پوسٹ

میتگ کوراس اِت اَنت دراھیں مردماں وتی وتی چراگ کُشتگ اِت اَنت ءُ بیمناکیں مُرگانی ءُ ساھدارانی توار اَت۔میتگ ءَ مردمی کسانوکیں چڑکّهے نہ گواہ اِت۔شپ ءِ اَدار دو اَت اناگت ءَ یک گِسّے ءَ زالبولی کوکارے توار آتک ءُ میتگ ءِ مردماں یک ءُ دو چراگ روک کُت ءُ دیم پہ ھمے گِس ءَ آتک اَنت ! ما دْرُس هم شُت ایں۔….
یوسپ ءِ لوگ بانُک ءِ لاپ پُرّ اَت ءُ نُهـ ماه ئِے سرجم اَت ءُ درد ئِے پِر اِت اَنت داں زالبول هم آتک اَنت، سُهب ءِ اَدار چار بوت یوسپ ءِ لوگ بانُک (شازیہ) چُکّ مات بوت ءُ ما واجہ یوسپ ءَ مراد بات گُشت ءُ داں سھب ءَ نشت ایں، وهدے کہ اَدار ھپت بوت ما لوٹ اِت کہ بہ رو ایں مارا یوسپ ءَ روگ ءَ نہ اِشت ءُ گُشت ئِے باندا سھب ءِ سر ءَ هیرات دَیگ بیت ، شُما مہ رو اِت ءُ پساں بہ کُش اِت۔روچ در آتک ءُ ھیرات دَیگ بُوت ءُ واجہ یوسپ ءِ نوکیں زھگ جَنّکے اَت ءُ نام ئِے شاری ایر کُت۔
واجہ یوسپ ءَ اَنچوش مئے چُکّانی وڑءَ چُکّ رودینت ءُ مزن کُت، داں ھپت سال ءِ اُمر ءَ کہ رس اِت وانگجاہ ءَ شُت وهدے کہ چارمی کلاسی دربُرت. پت ءُ ماتانی دِل ءَ اَت کہ چُکّ ءَ سور بہ د ے ایں یکے ءَ گْواجارے آؤرتگ اَت بلے شاری ءَ ھچ وڑ ءَ دِل ءَ نہ اَت بلے چے بہ کنت پرچاکہ چُکّ مات ءُ پت ءِ چمّ دار اِنت، اَنچوش لاچار ئِے کُت کہ سـور بہ کنت۔شاری ءِ سور ءِ تیاری بوت ءُ سور هم بیت ءُ کُٹ اِت ءُ شاری وتی گِس ءَ شُت۔سالے ءَ رَند پت سکّ گمیگ بوت ءُ پہ چُکّ ءَ زھیر ئِے بوت۔آ دیم ءَ شاری ھم سکّ بَزّگ اَت چی ءَ کہ سانگ بند سولانی ءَ نشتگ اِت اَنت ءُ ھرچ کار پہ شاری ءَ گران بوت ءُ شاری ھم کسان اَت بزاں دوازدہ سالی اَت ءُ داں یک سالے کہ سرجم بوت بانک شاری ءِ لاپ پُرّ بوت ءُ لاپ پُرّی پہ پَٹک ءُ کسان بالادیں مردم ءَ سک گران اِنت ،پمیشکا چار ماه ئِے کہ بوت سک نگیگ بوت ءُ داکٹر ءَ شُت،ڈاکٹر زھر گپت ءُ گُشت اے کسانیں زھگے ایشی ءِ سور دیگ بوتگ؟ ایشی ءِ لاپ پُرّی ایشی ءِ جند ءَ تاوان دَنت یاکہ لاپ ءِ تهـ ءِ زھگ ءَ تاوان دنت یکے چہ ایشاں اَلّم تاوان دنت پرچا کہ ️شاری ءِ دِل ءِ بیپی سک بُرز اِنت۔ شاری ءَ وھدے ڈاکٹر ءَ موکل دنت گڑا لوگ ءَ روت، بیگاه ءِ اَدار ءِ چار ءَ وت ءَ را لوگ ءِ کُنٹ ءَ گوں درنج ایت ءُ شاری ءِ زندگی ھمد ءَ کُٹ اِیت ءُ هلاس بیت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: پَہ برمشاں برمش کنگی اِنت

نبشتہ کار: ریاض بلوچ

دی بلوچستان پوسٹ

کسان سالیں برمْش ءِ مات بی بی ملک ناز ءَ پاکستانی ڈیتھ سکواڈ ، دز ءُ ڈُنگانی دستا درد ناکیں شھادت ءَ چِل روچ ءَ گیش سرجم بوت ، چلھم ءِ روچ ءَ تھنا آئی ھلک ڈنُک ءِ مردم ڈن ءَ در کپت انت ءُ انساپ ءِ ھاتر ءَ زھرشانی اش کت ، کُشوکانی سز ءِ دیَگ ءِ اپیل اش کت بلے ایدگہ بلوچستان گندگ ءَ ھاموش اَت.
باور بیت کہ برمش ءِ مات ءِ شھادت ءِ بلکیں اولی ھپتگ ءَ چد ءُ زالمتریں ویلے تمپ ءَ بوت کہ یک کلسوم نامیں زالے سَر برّگ ءُ کشَگ بوت ، اے ویل ھمے وھداں بوت کہ تیوگیں بلوچستان ءُ دری دگنیا ءِ نندوکیں بلوچ پَہ برمش ءَ برمش کنگ ءَ ات اَنت. یک بلوچ زالبولے ءِ اے رنگیں دردناکیں کوْش ءَ پَہ مردماں ھمے گُمان زاھر کت کہ نوں ریاست مارا ھمے ڈاہ دیَگ ءَ انت کہ شمئے جاک ءُ کوکاراں ھچ ارزشت نیست ناکہ گوش دارَگ بنت ، ریاستی چیردستی ءَ داشتگیں ڈیتھ سکواڈ ،دز ءُ ڈنگ یک شل ءَ گوں شیکری ءَ سر زاھر ءَ وتی ھمے کاراں کنگ ءَ انت ، گر ءُ دار کنوک یا جست ءُ پد کنوک کے بوت کنت وھدے یک ریاستے ءِ جند براہ راست ھمے کشت ءُ کوش ءَ شریک جرم انت ءُ ڈیتھ سکواڈانی پشت پناہ انت.

ھمے دوئیں ویلاں بلکیں ماھے سرجم نبوتگ اَت کہ پاکستانی پوج ءَ ھرنائی ءَ میتگے ءَ یک مری بلوچ کیسر نامیں زمیندارے ءِ لوگ ءِ سر ءِ ارش کت آئی ءِ جند ءَ ھوار چار سالیگی‍ں تپلیں ناز بی بی ءُ لوگ ءِ دگہ دو زالبول گوں بیدردی تیر ءُ ٹوپانی دیم ءَ درشت ءُ شھید کت انت ، شھیدیں کیسر ءِ دو مردیں زَھگ گوں وت برت اش ءُ بیگواہ کت انت کہ تاں روچ ء مروچی گار انت ، یک میتگے ءِ اھوالکارے ءِ رد ءَ اے لوگ ءَ دگہ مردم زات کس پشت نکپتگ.
برمش ءِ واست ءَ برمش یک انچیں برمشے اتَ کہ پہ ھرچ برمشے ءِ رکینگ ءَ برجم دارگی اَت، پَہ وتی ایدگہ برمشانی ھاتر ءَ برمش کنگی اِنت ،کجام رنگ ءُ دروشم ءَ کجام کچ ءُ کساس ءَ بلے توار چست کنگی انت. ھاموش بوگی نہ انت، تو اگاں مرچی توار چست نکن ئے گڑا باندا بے توار کنگ بئے.

پاکستانی لشکر بلوچستان ءَ collective punishment ءِ سر ءَ سر مرتکب بوتگ ، اے لشکر مدام کہ بلوچ سرمچارانی دست ءَ میدان جنگ ءَ لٹ وارت یا بے سوب بیت گڑا میتگ ءُ بازاراں دور کنت بیگناھیں بلوچانی گساں بُن دنت، مال ءُ مڈیاں ‍ پلیت، کسان ءُ پیریں درستاں لٹ ءُ کٹ کنت ، گرّان کنت ءُ بارت ءُ بند اِش کنت ، سزا اِ دنت، شھید اِش کنت ءُ پد ءَ لاشان اِش چگل دنت یا نیم زندگیں ھالتاں یلہ اش دنت ، بلے گناہ ءُ بیگناہ نچار ایت، اُمبر ءُ جنس نچاریت اے لس بلوچ مھلوک ءَ یک ھساب ءَ ٹریٹ کنت ، یا ھما سیاسی ءُ جنگی جھدکارانی سیاد ءَ وارس، ھمبراہ ءُ ھمساھگ، دوست ءُ دوزواھاں تنگ کنت، چاگردی ءُ زَری ءُ مالی جیڑہ پہ آیاں ودی کنت ، وتی داشتگیں ڈیتھ سکواڈانی دست ءَ پَہ آیاں زمین ءَ تنگ کنت.

بلوچ ءِ بد بھتی گشت کن ئے کہ گوں انچیں گیر مھذبیں دژمنے ءَ واستا کپتگ کہ نا جنگی رھبنداں سرپد بیت نا انسانی کانوداں مان کار ایت.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت