TBP Balochi

مئے چاگرد ءُ بدنیّتیں استادانی کِرد

نبشتہ کار: پوزیہ بلوچ

اگاں ما بچاریں داں مئےچاگرد ءِ تہ ءَ گیشاں چہ گیش مردماناں ڈگری ھست یا کم ءُ باز ونتگ اِش اگاں ما گوں ھورتی ءَ بچار ایں تاں اے ڈگریاں مئے ھمے مھلوک ءِ تہ ءَ زانت ءُ سما ودی نہ کرتگ ءُ اے ڈگری والا پہ وت زندگ اَنت، من چوش ھم نہ گْوش آں کہ سرجمیں چاگرد ءِ وانندگیں مردم بے زانت ءُ بے سما اَنت بلے بے زانت ءُ بدنیّتیں مردم سک باز اِنت ۔ پما باز بژن ءِ گپے، برےبرے مردم سک پدرد بیت۔وھدے ما وتی وانندہ ءُ استاداں دگہ جاگھاں گندیں تاں مھروان اَنت، وھدے کہ گپ کیت پہ وانگجاہ ءُ سنٹرانی توک ءَ گُڑا مردم بژنیگ بیت پہ وتی بےکس ءُ نیزگاریں زھگاں کہ وانگ ءُ زانگ لوٹ اَنت بلے مئے وانندہ ءُ زانتکار ایشانی وانگ ءُ زانگ ءِ دیم ءَ اڑاند اَنت۔وانگ ءِ وھد ءَ وھدے نودربر جُستے بہ کنت داں آئی ءَ ھمے پسو دیگ بیت کہ تئی پت ءُ براتاں یا پُشپد ءَ نہ وانتگ تو پرچا وانگ لوٹ ئے؟؟

چہ اے گپ ءَ ھمے پدر بیت کہ اے نہ زانتکارانی چے لوٹ اِنت ءُ نوں ترا چے کنگ لوٹ اِیت۔ باز ھنچیں زھگ ھست اَنت کہ چہ اے گپاں سک دل ءَ کار اَنت ءُ باز ایشاں بے ھیال کنت، بلے ھمے استاد کدی اے نہ جیڑ اَنت کہ مئے پَشت پداں ونتگ یا ناں؟.مئے پِت ءُ براتاں ونتگ یا ناں؟ وتی بارو ءَ نہ جیڑ اَنت ءُ وت ءَ نہ چار اَنت بس دومی ءِ زھگاں دیم ءَ روگ ءَ نیل اَنت ءُ وتی زھگ اِش ماں مزن شھراں شر شریں وانگجاھاں وانگ ءَ اَنت ۔

من ءَ یات اِنت ھمے گپ وھدے کہ من وانگجاہ ءَ وتی( سرٹیفیکٹ) ءِ رند ءَ شُت آں گُڑا منی اُستاد ءَ من ءَ چار ات ءُ سک کند اِت ءُ پد ءَ من ءَ گُشت ئِے تو ءُ وانگ ؟؟ گُڑا من ھیران بوت آں ءُ اُستاد چار اِت بلے دگہ ھچ نہ گُشت، منی چمانی اَرس کیل بوت اَنت، من ھمے دل ءَ جیڑ ات من چے ءَ ونت نہ کن آں ، زاناں منی تہ ءَ کُجام کمی ھست کہ من ھمے کمی ءِ سرجم کنگ ءِ جُھد ءَ بہ کن آں۔۔۔؟ ھمد ءَ من ءَ یک بلوچی بتلے یات اتک کہ بلوچ گُش اَنت کہ “وتی کُش اِیت روچ ءِ سر ءَ دور نہ دنت ” پرچا کہ اُستاد منی وتی سیاد ءُ وارسے اَت بلے ھمے بتل ءِ سر ءَ من ءَ ھچ یکین نہ بوت پرچا کہ اگاں آ تئی وتی بہ بیت ترا نہ کُش اِیت اگاں کُشت ئِے گُڑا روچ ءِ سر ءَ دور دنت یا ساھگ ءَ ھچ پرک نیست۔۔.

من کمو وت ءَ توانمند کُت ءُ گُشت ھو من وانگ لوٹ آں چے ءَ زاناں من ءَ وانگ ءِ ھک نیست ؟؟ اُستاد ءَ کمو بچکند اِت ءُ گُشت ھو ھست ، من دگہ گپ نہ کرت ءُ وتی سرٹیفکیٹ زُرت ءُ چہ وانگجاہ ءَ در کپت آں ۔۔
وھد گْوزان بوت ءُ گْوستگیں سال ءَ مزن شھدربرجاہ ءِ موکل بوت اَنت من وتی موکلانی گوازینگ ءَ میتگ ءَ شُت آں ھمے وڑ ءَ دگہ یک ءُ دو ویل منی دیم ءَ اتک۔ یک روچے مگرب ءِ وھد ءَ من چار ات کہ منی ھمساھگے ءَ برانز گیپتگ ءُ بُرز گپ ءَ اِنت من شُت آن ءُ جُست کُت ھاں ھال کن ترا چے بوتگ ؟؟ من ءَ پسو دات ئِے مروچی من وتی کستریں گُھار ءُ تروزتک سنٹر ءَ وانگ ءَ راہ داتگ گڑا اُستاد ءَ وانگ ءَ نہ اِشتگ اَنت ءُ ھمے گُشتگ ئِے کہ شُما منی گور ءَ وانگ ءَ میا اِت ۔ ھما اِنت کہ گْونڈو اتکگ اَنت گریوگ ءَ اَنت ءُ ھمے گوشگ ءَ اَنت مئے درستیں دزگُھار وانگ ءَ اَنت ما چوں مہ وان اِیں ؟پیسر ءَ مئے میتگ ءَ وانگ نہ بوتگ نوں ھمے یکیں سنٹر اِنت بلے اِشی ءِ اُستاد یک زھگے وانین اِیت ءُ یکے نہ وانین اِیت ۔۔
من ھچ نہ گُشت بس ھمے گپانی گُشدارگ ءَ اَت آں،پد ءَ گُھار ءِ چم ارسیگ بوت اَنت ءُ گُشت ئِے من زان آں کہ اُستاد ءَ مئے درتہ پُچی دیستگ پمیشکا مئے گُونڈواں وانگ ءَ نیل ایت بلے اللہ ءِ شُکر اِنت مارا اِنیچو زر ھست کہ ما سنٹر ءِ زراں دات کرت بہ کنیں۔۔ من ھم ھمے مار ات ءُ من ءَ باز درد بوت پرچا کہ منی وتی گوما باز رند ءَ ھمے وڑ بوتگ گُھار ءَ وتی دیم منی نیمگ ءَ ترینت ءُ گُشت تو دانکہ ھمد ءَ ئے منی گُھار ءُ تروزتک ءَ بہ وانیں دانکہ اے ھم گوں وتی دزگُھاراں وانگ ءُ زانگ ءِ گپے کُت بہ کن اَنت ۔ من پسو دات جی شر کربان آں دانکہ من ھمد ءَ آں الم گونڈواں وانین آں ۔۔ پہ منی ھمے گپ ءَ گونڈو سک گل بوت اَنت من ءَ ھمے دمان ءَ جُست اِش کُت کہ ما کُجام وھد ءَ پہ وانگ ءَ بیا ایں؟؟ من گُشت شپ ءِ وھد ءَ بیا اِت۔۔

من وتی لوگ ءَ واتر بوتاں۔ بلے اے گپ ءَ من ءَ سک باز جیڑگ پرمات پرچا مئے وانندہ چوش کن اَنت؟ اے زھگانی توک ءَ چے پرک ھست کہ یکے وانین ِاِیت ءُ یکے نہ وانین اِیت ؟؟ بلے جُست ءِ پسو منی کِر ءَ نیستگ اَت ۔ شپ ءَ ھمے گُونڈوانی ھمراھی ءَ ھمے گُھار ھم اتک، من ءَ آرام نہ بوت ءُ من ءَ ھمے جیڑہ اَلّم زانگی اَت گُڑا من چَہ ھمے گھار ءَ جُست کُت تو من ءَ گْوشت کن ئے کہ اُستاد ءَ اے گُونڈو چے ءَ نہ وانینتگ اَنت ءُ تئی دومی تروزتک ھم ھمد ءَ وانگ ءَ اِنت آئی ءَ را استاد وانینگ ءَ اِنت بلے ایشاں پرچا نہ وانین اِیت؟
گُھار ءَ پسو دات ھاں من زان آں پرچا کہ آ تروزتک ءِ پِس درمُلک ءَ اِنت آ زَر والا اَنت پمیشکا آئی ءَ را وانینگ ءَ اِنت،منی پِس ھمد ءَ اِنت بلے من انچو زان آں منی پِس ءِ کِر ءَ اے سَد ءُ دو سد در کیت کہ سنٹر ءِ زراں دات کرت بہ کنت بلے ھیر ۔۔۔

من ءَ اے گپانی اِشکنگ ءَ سک درد بوت، پد ءَ من ھچ نہ گْوشت وتی ھیال ھمے گونڈوانی گور ءَ کُت، لھتیں وھد ءَ من گْونڈو وانینت اَنت بلے جلدی موکل ھلاس بوت اَنت ءُ من واتر شھر ءَ اتک آں.

مئے چاگِرد ءِ اُستاد ءُ زانتکار ھمیش اَنت پمیشکا ما چو بزگ ایں ءُ ھچ بر دیمروی کرت کنگ ءَ نہ ایں، یکے ما وت ما وت تپاک نہ ایں ءُ دومی اگاں ما دو گال زان ایں یا ڈگری یے گپت گُڑا کس ءَ پجاہ نیار ایں اے وڑ ءَ ما کُجا دیمروی کُت کن ایں ۔۔۔؟

باید اِنت کہ مئے وانندہ ءُ زانتکار نودربرانی کمک ءَ بہ کن اَنت، نودربراں پہ وانگ ءِ واستا کمک ءُ دلبڈی بہ دے اَنت پرچا کہ مئے راج ءِ باندات ھمے نودربر اَنت، مئے چاگرد ءِ دیمروی دیوک ھمیش اَنت، استاد ءُ میتگ ءِ وانندگ باید اِنت وتی پرز ءَ بہ زان اَنت.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: شھید ھمید شھزیب تو نمیران ئے

نبشتہ کار: ھمّل بلوچ

2 جولائی 2020 ءَ سھب ءِ سر ءَ من چہ واب ءَ پاد اَت آں جانے ششت ءُ چاھے وارت دیم پہ بیٹک ءَ کمو نشت آں سنگتے ءَ من ءَ پون کُرت ءُ گْوشت ئِے من مرچی تئی نیمگ ءَ پیداک آں.
من گْوشت شر اِنت بیا اللہ ترا بیاری اِیت کترے شریں گْوست سنگت ءَ پد ءَ من ءَ پون کُرت ءُ گْوشت من نوں تئی گِسانی نزیک ءَ آں، من گڑا گِس ءَ چہ ڈن در اَتک آں چار اِت داں سنگت اتکگ ، سلام ءُ دورت بوت من سنگت ءَ را گِس ءَ نندار اینت ءُ آپ دات ءُ سنگت ءَ آپ وارت ءُ من ءَ جُست ئِےکُرت بدے باریں نوکیں ھال ءُ اھوال بہ دے ، نوکیں اپڈیٹ چے ھست؟

من سنگت ءَ را گْوشت ھیر ءُ وشی بوتگ ءُ بَدّیں نہ بوتگ، سنگت ءَ من ءَ گْوشت بدیں ھالے چَرّگ ءَ انت باریں تو سَھی کہ ناں سوج ءَ لھتیں سنگت شھید بوتگ.

من گْوشت اے ویل چون ، کَدی ءُ کُجا بوتگ زاناں؟ سنگت ءَ گْوشت چو من سرپد نہ آں بلے لھتیں اکس آشوب ءَ آھتگ انچو سوج انت کہ گریشگ ءَ جَنگے بوتگ، گُڑا من سنگت ءِھمے گپانی ھشک کنگ ءَ ھوار منی ھیال ءَ یکے ءَ من ءَ ھشک چوپ کُرت ءُ یل دات من دل ءَ ھمے جیڑ اِت کہ گریشگ ءِ سنگت وَ شاہ زیب( ھمید بلوچ) انت من سنگت ءَ را گوشت بوت کنت دُروگے. سنگت ءَ گْوشت دروگے نہ انت بزو موبائل ءَ اکساں بچار گڑا من چہ سنگت ءِ دست ءِ موبائل زرت ءُ اکس چار ات اَنت واکی سَے سنگت ءِ شھیدی ئیں اکس انت بلے اکسانی چِیری دیم ءَ نبستگ اَت کہ بی ایل اے سنگت اَنت، من گوں ھورتی ءَ چار ات اَنت بلے من پجاہ نیاؤرت انت پرچا کہ زالمیں دُشمن ءَ شھید بوتگیں سنگتانی جون گِران کُرتگ اِت انت زانگ نہ بنت گڑا من دگہ یک سنگتے ءَ را پون کُرت باریں ھالاں بدے گریشگ ءِ نیمگ ءَ جَڑپّے بوتگ ءُ سوج ءَ لھتیں سنگتے شھادت ءِ سوج انت باریں اے گپ پکا اِنت؟
سنگت ءَ من ءَ گْوشت ھو اے بدیں ھال ھست شھید ھمید اُرپ ءِ شھزیب گوں دگہ دو سنگت ءَ شھید سابر اُرپ ءِ مھیم ءُ شھید انور اُرپ ءِ جاوید دُشمن ءَ گوں جَنگ داتگ ءُ شھید بوتگ انت، من دگہ ھچ جُست نہ کرت ءُ پون کَٹ ۔

من آ دوئیں شھید بوتیں سنگت نہ دیستگ انت بلے من شھید ھمید بلوچ ءَ را دیستگ ، منی ھیال ءَ دو ھزار پازدہ یا شازدہ ءَ من جاھو ءِ اوتاک ءَ اولی رند سنگت ءَ گوں ڈیک وارتگ ، من ھما روچ ءَ مار ات کہ اے سنگت ءِ تہ چیزے ناں چیزے ھست ،ھمید جان ءِ ھاموشی ، ایمانداری ،مُکلسی ءُ پند بُری تو بیدستیں تو وت مار اِتگ ات ، تو وت زانتگ اَت کہ سنگت ءَ را پہ وتی ماتیں سر زمیںن ءِ سر ءَ چینچو مھر ھست بوتگ، سنگت ھمید جان مدام ھمے گْوشت کہ سنگتاں آزادی ءِ جَنگ بید ء واری ءُ جپاکشی ءَ نہ بیت کَسے ءَ را اگاں گوں وتی سر زمین ءَ مھر ھست گڑا اے پند ءُ گژن اے دُرست مارا ءُ شمارا برداشت کنگی انت بلے اے گپ اون منگی انت کہ گلامیں کوم تنا وھدی کہ آزاد نہ بیت مسلہ ءُ جیڑ ھست انت گوں سبر ءُ اُپار دیم ءَ جنزگی انت ۔

شھید ھمید جان سکیں مھروانیں سنگتے اَت مسکرا ئِے کرت بلے گیش بے توار ءُ کم گپیں سنگتے اَت، مدام کندگ ءُ دیم روشینیں سنگتے اَت، شھید ھمید جان چوناھی ءَ نہ وانتگ بلے چہ وانیندگ ءَ دیم ءَ ترِ اَت ۔

شھید ھمید جان گوں وتی سنگتانی ھمراھی ءَ گَشتے ءَ بیت کہ دُشمن ءِ داشتگیں دلّار سنگتانی راھاں گریشگ ءِ ھَند لوپ ءَ مگرب ءِ وھد ءَ بند اَنت ءُ وھدے سنگتے ھمد ءَ کاینت گڑا جنگ بندات بیت سنگت تاں گُڈی تیر ءَ جنگ دے اَنت ءُ شھید بنت.

شھید ھمید جان تو گوان وتی سنگتاں ابدمان ئے شمے بھادری ءَ را سلام انت ۔ شمے ھمت ءَ را سلام انت، دُشمن ءَ ھمے مار اِتگ اَت کہ من ھمید جان ءَ گوں سنگتاں شھید کن آں، من ایمن بہ آں بلے شھید ھمیدجان ءِ پگری سنگت اَنت زندگ اَنت، اے کاروان شھیدانی کاروان اِنت، اے کاروان آجوئی ءِ کاروان اِنت تو اے پگر ءَ داشت کرت نہ کن ئے.
شھید ھمیدجان ءَ ھوار بلوچستان ءِ کُلیں شھیداں سُھریں سلام

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

پنجگور ءَ پوج ءِ کاروان ءِ سر ءَ اُرش

دی بلوچستان پوسٹ

پنجگور ءَ پوجی کاروان ءِ سر ءَ سلاہ بندیں مردماں اُرش کرتگ ءُ یک پوجی آپسرے ءَ ھوار بیست کارندہ مرتگ –

سر بیتگیں ھالانی رد ءَ پنجگور ءِ دمگ گچک ءَ پاکستانی پوج ءِ کاروان ءِ سر ءَ سلاہ بندیں مردماں اُرش کرتگ –

دمگی مردمانی رد ءَ مروچی سھب ءَ گچک ءَ موک ء کنڈگ ءِ ھند ءَ سر بستگیں سلاہ بندیں مردماں پوجی کاروان ءِ سر بستگ ءُ اُرش کرتگ –

آیانی رد ءَ اُرش ءَ مزنیں سلاہ کارمرد بیتگ کہ اُرش ءَ بمب ءُ تیرانی تواراں دمگ جکسینتگ –

دومی نیمگ ءَ بلوچستان لبریشن پرنٹ ءِ جارکش میجر گوھرام بلوچ ءَ گچک موک ء کنڈک ءَ بیتگیں اُرش ءِزمہ واری منّ اِتگ ءُ گوشتگ کہ پوجی کاروان ءِ سر ءَ سرمچاراں راکٹ ءُ سلاھانی سر ءَ اُرش کرتگ ءُ پوجی کارمندانی یک آپسرے ءَ ھوار بیست کارمند کُشتگ اَنت –

میجر گوھرام بلوچ ءَ گوشت کہ اُرش ءَ لشکری کاروان ءِ پنچ گاڑیاں تاوان بیتگ ءُ سواریں آپسر گوں بیست نپر ءَ مرتگ اَنت –

آئی ءَ گوشت کہ ترندیں اُرش ءِ سوب ءَ لھتے دمانانی تہ ءَ پاکستانی پوج پرشتگ ءُ ھاک ءُ سر بیتگ –

میجر گوھرام بلوچ ءَ گوشت کہ ھمے دمگ ءَ لھتے سال ءَ پیسر بی ایل ایف ءِ یک اُرشے ءَ وھید نامے پاکستانی کرنلے گوں بازیں کارندھاں مرتگ ءُ ایشی ءِ تامر بند ءِ شنگ بیگ ءَ پاکستان ءَ دراھیں بلوچ ویب سائیٹ ” تندجاہ “، سوشل میڈیا پیج ءُ تامربندانی شنگ جاہ بلاک کرتگ اَنت ءُ مروچی یے ھم اُرش ءِ تامر زُوت شنگ کنگ بیت اِنت –

زانگ بہ بیت بلوچستان ءِ آجوئی لوٹوکیں گلانی گوشگ اِنت داں بلوچ سرڈگار ءَ پاکستانی پوج ءُ آئی ءِ ھمکارانی تہ ءَ یک مردمے جاڑیگ اِنت اشانی بگیری ءَ بلوچ سلاہ بندیں گلانی اُرش برجاہ مان اَنت –

بیگواھیں مردم یا جنگول؟

ٹی بی پی شونگال

بیگواھیں بلوچانی جیڑھے ترندی گیشتر پاکستانی واکدار ءُ رسانک گِس کم کنگ ءُ چیر دیگے جھد ءَ مدام کن اَنت ۔ پاکستانی چاگرد ءِ تہ ءَ لھتیں تک اے جیڑہ ءِ نیمگ ءَ چہ کمے جوانتریں لیکہ ءُ رویش ءِ گندگ بیت، بلے اے بیگواھیں مردمانی سر ءَ پاکستانی سلاھبندیں پوج ءِ نیمگ ءَ چہ پیش کُتگیں گمانی کسہ ھم چہ واھشتی ءَ ھالیک نہ اَنت۔

بلوچستان ءِ پیسرگیں فرنٹئیر کور (ایف سی) ءِ انسپیکٹر جنرل ( آئی جی) میجر جنرل نادر زیب ءَ 2012 ءَ پارلیمانی کمیٹی پہ راجی پھازگ ءُ بیگواھیں مردماں، بلوچستان ءِ درگت ءَ رسانک درشان ءِ دیان ءَ گوشتگ اَت “ بلوچستان ءَ یک مردمے ھم بیگواہ نہ اِنت، اے درست اوگانستان ءَ شُتگ اَنت ( جنگولاں گوں ھوار بیگ ءَ)۔

وھدیکہ میجر جنرل نادر زیب ءَ چہ پیش بلوچستان ءِ آئی جی فرنٹئیر کور میجر جنرل عبیداللہ نیازی ءَ میان اُستمانی روتاک گارڈین ءَ یک گلگدارئے یے تہ ءَ گوشتگ اَت کہ “بلوچستان ءَ کس بیگواہ نہ اِنت، اے تھنا ھما مردم اَنت، کہ ایشاں ایف سی پوشاکانی تہ ءَ ناشر کار بیگواہ کن اَنت۔” اے درشاناں چہ ھمے گپ دیما کیت کہ بیگواھیں مردم وت ایف سی ءِ پوشاکاں گور ءَ کن اَنت ءُ وت وتار ءَ بیگواہ کنگ ءَ اَنت۔

اے “وتگڑیں کسھانی” ءُ سلاہ بندیں پوج ءِ بلوچ سیاسی جھدکاراں وتی زندانانی تہ ءَ دارگ ءِ مکن کنگ ءَ ابید، لس رھشوناں مدام اے گپ ءَ رسانکدرانی دیما منّیتگ کہ بیگواھیں بلوچ پوج ءِ دزگیری ءَ اَنت۔

2009 ءَ پاکستان پیپلز پارٹی ءِ سرکار ءِ وھد ءَ بلوچستان ءِ درگت ءَ یک جوان جاوری پیکج “آغاز حقوق بلوچستان” ءِ جار جنگ بیتگ اَت، اے پیکج ءِ رد ءَ، آ وھدی پاکستان ءِ مزن وزیر یوسف رضا گیلانی ءَ میڈیا ءَ ھبر کنان ءَ گوشتگ اَت کہ درستیں بیگواجیں مردم داں دیم ءِ ائید ءَ یل بنت ءُ وتی لوگاں سر کنگ بنت۔ اگاں یک ڈیھے ءِ مزن وزیر اے جار ءَ بہ جنت گُڑا زائری ءَ اے گپ پدر بیت کہ آئی ءَ سرپدی ھست کہ بیگواھیں بلوچ کجا اَنت۔ ھمے وڑ ءَ 8 دسمبر 2005 ءَ ھما وھد ءِ پاکستانی تھی کارانی وزیر آفتاب شیرپاؤ ءَ یک درشانے ءِ تہ ءَ اے گپ من اِتگ اَت کہ چہ بلوچستان ءَ کم چہ کم 4000 مردم بیگواہ بیتگیں مردم گلانی کِر ءَ اَنت۔ اے بیگواھیں مردم 2002 ءَ بگر داں 2005 ءِ نیام ءَ بلوچستان ءِ جتائیں ھنداں چہ چِست کنگ بیتگ اِت اَنت۔

کجام ھم بیگواھیں مردم یل کنگ وَ نہ بیتگ اَت بلے اے درشان اے راستی ءِ پدراھی اَنت کہ کجام ھم بیگواھیں سیاسی جھدکار نہ کوہ ءَ اَنت ءُ نہ کہ اوگانستان ءَ بلکیں آ سرکاری گلانی کر ءَ بندیگ اَنت۔

سال 2012 ءَ پاکستان ءِ مزن آمید گِس (سپریم کورٹ) ءَ بیگواہ بیتگں سَے بلوچ ورنایانی یک کیسے اِش کنگ ءِ وھد ءَ بلوچستان ءِ پولیس ءِ ڈی آئی جی ھامد شکیل ءَ آمید گِس ءِ دیما یک سی سی ٹی وی تامر ءِ پیش داشت، کہ آئی ءِ تہ ءَ ایف سی ءِ کارمند اے سئیں مردماں بیگواہ کنگ بیتگ اَنت اے بلوچاں بیگواہ کنگ ءَ گندگ بیت کن اَنت۔ اِشی ءَ ابید ھم اے آ بلوچ یل کنگ نہ بنت بلے لھتیں سالاں پد ھمے ھامد شکیل 2017 ءَ یک وت کُشیں تراکے ءِ تہ ءَ کُشگ بیتگ اَت۔ ھما وھد ءَ ھامد شکیل بلوچستان پولیس ءَ اے آئی جی ءِ ھساب ءَ کار کنگ ءَ اَت۔

انسانی اگبالانی ھاتر ءَ کارکنوکیں میان اُستمانی گل ایشین ھیومن رائٹس کمیشن ءَ 14000 بیگواھیں بلوچانی یک لڑے شنگ کُتگ اَت وھدے کہ وائس فار بلوچ مسنگ پرسنز ءَ ھال شنگ کُتگ کہ آیانی گور ءَ 40ھزار ءَ گیش بیگواھیں بلوچانی لڑے ھست کہ بازیں دھکاں چہ بلوچستان ءَ چہ بیگواہ کنگ بیتگ اَنت۔ اے منگ بیتگیں کساس ءُ شمار چم پِر دیگ بیت نہ کن اَنت ءُ ایمنسٹی انٹرنیشنل ءَ بگر داں ھیومن رائٹس واچ ءَ ھوار درستیں جھانی گل اے زوریں بیگواھیانی پشت ءَ پاکستانی چیریں گلانی ھواری ءِ گپ ءَ کنگ ءَ اَنت۔

بلوچ جنگولانی اُرش ءِ تہ ءَ 2018 ءَ چہ یک گیشی ءِ گندگ ءَ پیداک اِنت۔ ھاسیں وڑ ءَ بلوچستان ءِ تہ ءَ دو دھکاں چہ جنزوکیں سلاھبندیں زرمبش ءَ “پدائی اُرشانی” درور گوستانک ءَ نہ رس اِیت۔ بلے پاکستانی سلاھبندیں پوج ءُ پاکستانی آسراتی ءِ سر ءَ اُرشانی تہ ءَ گیشی ءَ ھوار، بلوچ سیاسی جھدکارانی ءُ نودربرانی ھلاپ ءَ کریک ڈاؤن ءَ ھم ترندی ھم تیزی ءَ گوں گیشی اتکگ، چہ ایشی ءَ بیگواھیں مردمانی کساس ءَ ھم گیشی پیداک اِنت۔

گوست ءَ اے گپ گندگ بیتگ کہ بیگواھیں مردمانی درگت ءَ یک نوکیں “کسہ” ءِ درشان کنگ بیگءَ اِنت ءُ بلوچ پدائی اُرشکاراں بیگواھیں مردم نامینگ بیگ ءَ اَنت ۔ اے رند ءَ پدءَ کراچی اسٹاک ایکسچینج ءِ ارشکاراں بیگواھیں مردم نامینگ ءِ بھتام بندات بیتگ اَت، کہ سرجمءَ ردیں اھوالانی سر ءَ بندوک اِنت۔

بی ایل اے گوستگیں چار مزنیں پدائی اُرش: دالبندین ءَ چینی انجینئیرانی سر ءَ اُرش، کراچی ءَ چینی قونصلیٹ ءِ سر ءَ اُرش، گوادر ءَ پی سی ہوٹل سر ءَ اُرش ءُ کے ایس ایکس سر ءَ انیگیں اُرش سرجم ءَ 11 اُرشکارانی سرجمیں پجار بیتگ، ءُ ایشانی تہ ءَ یک نامے ھم بیگواھیں بلوچانی لڑ ءَ ھوار نہ اَت ءُ نہ کہ اے اُرشکاراں چہ کسی کھول کدی ھم بیگواھیں مردمانی ھاترءَ جتگیں کجام ھم زھرشانی بنجل ءَ گندگ بیتگ اَنت۔

گوادر ءَ پی سی ھوٹل ءَ اُرش کنوکیں اُرشکاراں چہ یک ءِ ھمل فتح بلوچ ءِ نام اَت کہ پاکستانی رسانکدر ءَ بیگواھیں مردمے ءِ نام ءَ پیش دارگ ءَ بیتگ اَت بلے بی این پی ءِ سروک اکتر مینگل ءُ وی بی ایم ہی ءِ کمک کار مستر ماما کدیر ءَ منانک ءِ پجیگ ءَ اے گپ پدر کُتگ کہ ھمل بلوچانی تہ ءَ یک باز نام کپتگیں نامے۔ بیگواھیں مردمانی لڑ ءَ کہ ھما نام ھوار اَت آ ھمل مری جھمنند کوھلو دمگ اِنت ءُ اُرشکار ءِ نام ھمل فتح جھمنند کیچ ءِ دمگ اِنت۔

ھمے وڑ ءَ پی ایس ایکس اُرش ءَ ھواریں سلمان ھمل ءَ ھم بیگواہ بیتگیں مردماں چہ یکے ءِ نامینگ بیگ ءَ اَت، بلے آئی ءِ گوھار ءَ انڈیپینڈنٹ اردو ءَ داتگیں وتی گلگدار ءَ اے گپ رد کُتگ اَت ءُ گوشتگ کہ آئی ءِ برات ءَ ھشت سال ءَ پیش لوگ یل کُتگ ءُ شُتگ ءُ سلاہ بندیں زرمبش ءِ بھر جوڑ بیتگ، ءُ اے گپ ءِ سرپدی آئی ءِ کھول ءَ بیتگ۔ سلمان ءِ کھول کجام ھم زھرشانی بنجل ءَ کدی ھم گندگ نہ بیتگ اَنت۔

اُستانی گلانی نیمگ ءَ چہ بیگواھیں بلوچانی درگت ءَ ھمے وڑ ءَ بھتامی ھال تالان کنگ بیگ ءَ اِنت، اِشی ءَ چہ بازیں جُست ودی بنت کہ بیگواھیں بلوچانی زندءَ (ھترہ) ءِ دیمپانے اَنت۔ رسانکدر ءَ اے درگت ءَ زمہ واریں کرد پیلو کنگ لوٹ اِیت، نا سرجمیں ھالانی تالان کنگ ءَ ابید، اھوالکارانی گیر جانبداری ءُ آجوئی بالاد ءَ چہ ھمک ھال دلجم کنگ لوٹ ایت۔

ڈیرہ بگٹی، چاگی ءُ کولواہ ءَ سَے کُنٹ دزکپتگ

دی بلوچستان پوسٹ

گوستگیں دو روچانی تہ ءَ بلوچستان ءِ جتائیں جاھاں سَے کُنٹ دزکپتگ ءُ تیرگواری وھیلاں دو مردم بیران ءُ یکے زدگ –

سر بیتگیں ھالانی رد ءَ ڈیرہ بگٹی ءِ دمگ زین کوہ ءِ نزیک ءَ ھاسل ء ابد اللہ نوھکانی بگٹی ءِ لَٹ ءُ کُٹ کرتگیں کُنٹ دزکپتگ –

دمگی مردمانی رد ءَ ھاسل یک شمبے ءِ شپ ءَ پاکستانی پوج ءَ زین کوہ ءَ آوار جتگ ءُ برتگ –

آیاں گْوشت کہ ترندیں لَٹ ءُ کُٹانی سوب ءَ ھاسل پوجی زنداناں بیران بیتگ –

ھمے وڑ ءَ گوستگیں روچ ءَ چاگی ءِ دمگ لاگاپ ءِ کوھی دمگاں ورنایے کُنٹ دزکپتگ –

دزکپتگیں کُنٹ ءِ پجار نور اللہ بکتیار ءِ نام ءَ زانگ بیتگ – دمگی مردمانی رد ءَ نور اللہ یک روچے ءَ پیسر آوار جنگ بیتگ ءُ یک روچے ءَ پد آئی ءِ کُنٹ کوھی دمگاں دزکپتگ –

ھمے وڑ ءَ کولواہ ڈنڈار ءَ ابراھیم ء مھمد جھمنند پسنی ببر شور ءِ کُنٹ دزکپتگ –

وھیل ءِ سوب زانگ نہ بیتگ ءُ لیویز بنشون ءَ دزکپتگیں کُنٹ ءِ مردم ھال داتگ ءُ وتی بیران بیتگیں مردم ءَ بہ بریت –

ھمے وڑ ءَ گوستگیں روچ ءَ ھب ءَ جمالی گوٹ ءَ مامو ھوٹل ءِ نزیک ءَ ناشناسانی تیرگواری ءَ چَہ ابدُل مجید ء ازمائیل بیران بیتگ –

دگہ یک تیرگواری وھیلے ءَ پنجگور ءِ دمگ چتکان بازار ءَ ناشناسیں پَرپٹ سوارانی تیرگواری ءَ نیکراھی وانگ جاہ ءِ مستر ارشاد اللہ ء ملا مھمد ھسن جھمنند چتکان بیران بیتگ ءُ نزیک ءَ نندوکیں ابدلکریم ء ھان مھمد زدگ بیتگ –

دمگداراں ھال شنگ کرتگ ءُ گوشتگ کہ وھیل زمینی جیڑھے ءِ سر ءَ بیتگ ءُ وھیل ءَ پد کوشکار تتکگ ءُ شتگ اَنت –

بلوچستان ءَ بیگواھیانی وھیل روچ پہ روچ گیش بیان اَنت سیاسی ءُ چاگردی مردمانی گوشگ اِنت بیگواھیں مردمانی بیگواہ کنگ ءَ پوجی ءُ چیریں ادارھانی دزمان اِنت –

دی بلوچستان پوسٹ

سر بیتگیں ھالانی رد ءَ بلوچستان ءِ دمگ ھاران ءِ ھند سستگ میتگ ءِ جھمنند اِمران تگاپی ء انام اُللہ گوستگیں شش روچاں چَہ ھاران ءِ شھر ءَ بیگواہ اِنت –

ورنایے کھول ءِ رد ءَ یک ھپتگے ءَ پیسر اِمران تگاپی ھاران ءِ شھر ءَ وتی کارے ءَ شتگ بلے اود ءَ واتر نہ بوتگ ءُ تنی وھدی زانگ ھم بیگ ءَ نہ اِنت کہ کجا اِنت –

اِمران تگاپی ءِ کھول ءَ گْوشت کہ مارا شَک ءُ گمان اِنت کہ مئے زھگ ریاستی پوج ءُ دگہ ادارھاں آوات جتگ –

ھمے وڑ ءَ تمپ کوھاڈ ءَ زامران بازار ءَ پاکستانی پوج ءَ گوستگیں شپ ءَ بیڑ برتگ ءُ دو مردم آوار جتگ ءُ بیگواہ کرتگ –

بیگواہ بیتگیں مردمانی پجار ریاز ء ابراھیم ءُ منیر ء ھدا بکش ناماں زانگ بیتگ اَنت –

دمگی مردمانی رد ءَ ھردوکیں ورناہ نزر آباد ءَ دکانداری ءَ بیتگ اَنت –

زانگ بہ بیت بلوچستان ءِ جتائیں جاھاں ریاستی چیردستی ءَ برجاہ کرتگیں ڈیتھ اسکواڈ ھم پُرکار اِنت سیاسی ءُ چاگردی مردمانی گوشگ اِنت کہ ریاستی چیریں ادارھانی کارمنداں ریاستی ڈیتھ اسکواڈ ءِ کمک ءَ ھزارانی بلوچ گپتگ ءُ وتی زنداناں برتگ اَنت –

ٹی بی پی بلوچی ءِ اھوال پتر ءَ سر بیتگیں ھالانی ردءَ بلوچ زبان زانت ءُ آزمانکار ڈاکٹر ناگمان بلوچ ءَ وتی یوٹیوب چینل ءَ بلوچی گالانی سرپدی دیگ ءُ گالانی کارمرز کنگ ءُ آیانی معنا ءُ بزانت آں سوج دیگ بندات کُتگ ۔

ڈاکٹر ناگمان ءَ وتی یوٹیوب چینل ءَ شنگ کُتگیں گونڈیں تامر بندانی تھءَ داں انگت زبان چون مر اَنت؟ ریپگال چی یے؟ توار گال، گال تھر ءُ ھوار گالاں ھوار دگہ ھم بازیں وانندگی تامر بند شنگ کُتگ اَنت۔

ڈاکٹر ناگمان ءِ تامر بندانی گوش داروک چاگردی رسانکدرانی تھءَ اے گامگیج ءِ ستا ءُ توسیپ ءَ کنگ ءَ اَنت ءُ واھگ دارگءَ اَنت کہ ڈاکٹر ناگمان ءِ اے گام ھمے وڑ ءَ دیما رونت۔

یات بہ بیت دی بلوچستان پوسٹ بلوچی ءَ گوں وتی گلگدار ءِ تھءَ ھم ڈاکٹر ناگمان ءَ جستانی پسہ دیان ءَ گوشتگ اَت کہ تامر بندانی کمک ءَ چہ ھم زبان دیمروی کُت کنت ءُ پہ آیوکیں پدریچ ءَ بلوچی دربرگ گیشتر ارزان بیت کنت پرچہ کہ گونڈیں زھگ تامر بنداں گیشتر چارنت ءُ دوست دارنت۔