TBP Balochi

بلوچستان ءَ جتائیں تیرگواری وھیلاں سے مردم بیران ءُ یک کُنٹے دزکپتگ

دی بلوچستان پوسٹ

دی بلوچستان پتر ھال ءَ سر بیتگیں ھالانی رد ءَ پسنی ءَ سیائیں کوہ وارڈ ءِ نمبر یک ءَ سلاہ بندیں مردمانی تیرگواری ءَ زاکر ء تارک بیران بیتگ –

زاکر پاکستانی آرمی ءِ جاڑیگیں ملازمے بیتگ ءُ دمگی دمگدارانی رد ءَ کوھنیں دشمنی ءِ سوب ءَ زاکر کُشگ بیتگ ءُ زاکر کیچ ءِ دمگ پیدارک ءِ جھمنند اِنت –

دومی نیمگ ءَ زاکر ءِ کھول ءَ دمگدارانی گور ءَ زاکر ءِ کوش ءَ دزمانجنیں لھتے مردمانی نام داتگ اَنت –

ھمے وڑ ءَ واشک ءَ سلاہ بندیں مردمانی تیرگواری ءَ چَہ بلوچستان یونیورسٹی ءِ گوستگیں پروپیسر ءَ ھوار دو مردم بیران بیتگ اَنت –

دمگدارانی رد ءَ بلوچستان شھدربرجاہ ءِ گوستگیں پروپیسر ابدلھالک واشک ءِ ھند ناگ ءَ وتی زمینانی سر ءَ کُشگ بیتگ – کوش ءِ سوب تنی وھدی زانگ نہ بیتگ –

ھزدار ءِ مزن شھدگ ءِ سر ءَ درچکانی تہ ءَ یک کُنٹے گِندگ بیتگ ءُ کُنٹ پھزداراں چِست کرتگ ءُ سیول نادراہ جاہ ءَ برتگ ءُ اود ءَ آئی ءِ پجار مھمد رپیک ء درھواست ءِ رند جھمنند کھنڈ ھزادار ءِ نام ءَ زانگ بیتگ –

نادراہ جاہ ءِ ڈاکٹرانی رد ءَ رپیک ءِ گُٹ دارگ بیتگ ءُ کُشگ بیتگ –

نبشتانک: کَلشن ءِ ابیتکی ءُ دوست جان ءِ بیگواھی

نبشتہ کار: ھدایت بلوچ

دی بلوچستان پوسٹ

کلشن وشکوشیں پروم ءِ یک جاھے کہ جائین ءِ روچ درآھتی گور ءَ کپ اِیت۔ کلشن دوست مھمد ءِ بُنکی میتگ اِنت ۔۔ کلشن ءَ دوست مھمد ءِ پت ءُ پیرکی ڈگار ءُ ھنکین ھست اَنت۔۔ دوست مھمد پروم ءِ زانتکار ءُ سرپدیں مردمانی تہ ءَ زانگ بیت۔ دوست مھمد پہ پرومءِ مردمانی ھروڈیں اڑ ءُ جنجالانی گیش ءُ گیوار کنگ ءَ اولی سرپ ءَ بوتگ۔ دوست مھمد سکّین وش تب ءُ لائکیں مردُمے ، دوست مھمد مشکت ءَ بوتگ وھدے وتی موکلاں وتی ھنکین پروم ءَ آھتگ گڑا کَلشن ءُ دُرسیں پروم ءِ مردم دوست مھمد ءِ چارگ آھتگ انت۔ دوست مھمد کماشانی گوما کماش، جوانانی گوما جوان ھمک تب ءِ مردمانی تب ءَ گوں آھاں ھمنیاد بوتگ گونڈواں پہ سک مھروان بوتگ ھرکس ءَ گوں نشتگ گڑا دیم ءِ مردم ءَ چہ دوست جان ءِ دیوان ءَ سیر نہ کُتگ۔۔
دوست مھمد ءَ پروم ءِ کم دست ءُ گریبیں مردمانی گم دائمءَ پر بوتگ ھر وھد ءَ آھانی مدت ءُ کُمک ءَ پہ ساڑی بوتگ بازیں ورناھانی واستا چہ مشکت ءَ ویزا ئِے شوھاز کتگ راہ داتگ کہ پہ سر ءُ روزگار بہ بنت وتی کھول ءِ ھدمت ءَ کت بہ کن اَنت پمیشکا مرچی ھرکس آئی ءِ گستائی ءَ چے ملور ءُ بے تاھیر اِنت ۔ دوست جان ءِ لوگ ءِ مردم ھر وھد ءَ وش ءُ شاتکام اتاں ۔۔
من وت دوست مھمد ءِ لوگ ءِ چُکے آں پرچا کہ دوست مھمد ءِ لوگ بانُک منی ترو اِنت ۔ دوست جان ءِ چک منی ترو زھک اَنت ۔ پمشکا من ھر وھد ءَ آیانی لوگ ءَ شُتگ آں ۔۔من ءَ یات بیت یک روچے من چہ جاھین ءِ وانگجاہ ءَ چُٹی کُت وتی امّی ءِ لوگ ءَ شُتاں نان وارت پیشیم ءِ نماز ونت۔۔ سینکل ءَ سوار بوت آں دیم دات پہ وتی میتگ ءَ بزان( دز ءَ) من چہ جاھین ءَ در آھتاں وھدے کلشن ءَ سر بوت آں۔ دل ءَ گُشت تنی وھدی بیگاہ دور اِنت دوست مھمد ءِ لوگ ءَ سرے بہ جن دوست مھمد آ وھد ءَ وتی لوگ ءَ ساڑی ات کہ چہ مشکت ءَ وتی موکلاں آھتگ اَت من شت آں لوگ ءِ دپ ءَ سینکل داشت ءُ ایر آھت آں لوگ ءَ شُت آں داں دوست مھمد نشتگ من سلامے دات والیک ئِے کت من ءَ گُشت ئے بیا ھدایت جان بہ نند من کش ءَ ئِے نشت آں چہ آپ ءُ تام ءَ رند من ءَ جست ئے کت تو چہ کجانگو پیداک ئے ؟
من گُشت جاھین ءَ بوتگان دِز ءَ روگ ءَ آں دل ءَ گشت شمے نیمگا سرے بہ جن پمشکا آھتاں کہ شمارا گِندُکے بہ کن آں ! گُشت ئِے اللہ ترا بیار اِیت تئی لوگ اِنت ھر وھد ءَ بیایات ئے
بے وھد اَت من دوست جان رُکست کُت دیم پہ دِز ءَ در کپتاں ۔ دوست جان ءُ آئی لوگ بانک ءُ چُک سک مھروان اتاں وھدے من دوست جان ءُ وتی ترو زھکاناں دیست آیانی مھروانی ءَ چے مدام دل ءَ گُشت آیاں بہ گنداں۔ دگنیا ءِ تہ ءَ لھتیں انچیں جاہ ھست۔ اَنچیں لوگ ھست ۔ دل گُشی من اود ءَ بہ روان ۔ھما لوگ ءِ مردمانی مھر مردُم ءَ پہ وت کَشّ اِیت ھمایانی شری مردُم ءَ را دوست بنت مردم ءِ دل گش اِیت بایدیں من ھمے لوگ ءِ چُکّاں چہ یکے بوتیناں۔۔۔ دوست مھمد ءِ لوگ منی واستا اَنچیں ساھگے بوتگ۔۔۔
۔۔ نزاناں چونیں بدیں چمے ءَ لگ اِت۔۔
ھمے دوست جان کہ دُرستین پروم ءِ مردمانی واستا چو شر اَت۔ ھمے پروم ءِ لھتیں بدواہ ءَ دوست مھمد پہ راج دوستی ءُ نامداریءَ پہ شات نہ بوت۔ 12 جنوری 2012 ءَ وھدے دوست مھمد ءَ وتی موکل ھلاس کُت انت۔ دیم پہ مَشکت ءَ روگ ءَ اَت ۔ھمے بدواھاں چامپ اِت داں روزگار ءِ مرچی گار ءُ بیگواہ اِنت۔۔
بیگواھی ءِ وھد ءَ دوست مھمد ءِ چک کسان اتاں۔ دوست جان ءِ بے چارگین مات ءُ آئی ءِ کسانیں چکاں ھمک در ءُ دروازگ ٹُک اِتگ اَنت ۔ شال ءُ کراچی ءُ ھر ھمک جاہ ءَ آھاں وتی آواز رسینتگ کہ دوست جان ءِ گناہ چی اِنت ؟ شما چو مُپت ءُ برناھک ءَ گار ءُ بیگواہ کتگ ۔۔ بلے چے کن ئے بدواھانی چم کور انت بے چارگیں دوست جان ءِ گونڈلیں چکانی بزگی ، مات ءِ ارس ، گھارانی پریاتاں ، براتانی در پہ دری ءَ چے ھچ ایشانی گوشاں بوٹے اوں نہ وارت
۔۔ دوست مھمد ءِ پت بچ ءِ گماں گنوک کُت داں کبر ءَ سر کُت۔۔ دوست جان ءِ مات وتی چُک ءِ واستا ھمک روچ ارس گوار اِیت ۔۔ ھمے وش ءُ شاتکامیں لوگ پُرسیگ کُت بدواھاں۔۔
کلشن ابیتک بوت۔۔
اللہ وت دوست جان ءَ چہ زالمانی دست ءَ بہ رکّینات ءُ زوت آجو بہ کنات۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: شھید ناسر ڈگارزئی

نبشتہ کار: آجو کینگی بلوچ

دی بلوچستان پوسٹ

من شُتاں پنجگور ءَ پہ وانگ ءِ ھاتر ءَ گڑا منی سنگتی گوں شھید ناسر ءَ بوت ھمے واستا کہ شھید ناسر ءَ پنجگور ءِ چتکان بازار ءَ دکانے ھست اَت ئِے بلوچستان ءِ شھیدانی اکس وتی دکان ءِ تہ ءَ سمبئینتگ اَت ئِے ءُ ھمے اکس ءِ بھا کتاں من ھر وھد ءَ شُتاں بازار ءَ شھید ناسر ءِ دکان ءَ الم مان تراِت پہ اکسانی چارگ ءَ کجام اکس من ءَ دوست بوت ءُ منی دل ءَ نوک اَت ھما اکس منی کر ءَ نیست اَت گڑا من الم زُرت ھاسٹل ءَ وتی کمرہ ءَ دیوال ءِ دیم ءَ ءُ بازیں اکسے من وتی لوگ ءِ دیم ءَ جتگ اَت ۔
منی ءُ شھید ناسر ءِ سنگتی جوانیں رنگے ءَ ما یکے دومی ءَ ساہ بھر کت من ءَ مدام چو وتی کستریں برات ءِ ڈول ءَ دوست ئِے داشتگ اَت من مدام وتی الاکہ ءُ الاکہ مردمانی مھروانی جوانی شھید ناسر ءِ دیم ءَ ساڈھتگ اَنت گڑا من ءَ شھید ناسر ءَ گُشت من الم کاھاں تئی الاکہ تئی الکہ ءُ تئی الاکہ ءِ مردماں چاراں تو سک الاکہ گلائے۔
چیزے وھد گوست منی اسکول ءِ چٹھی بندات بوتاں گڑا من شھید ناسر ءَ گُشت برواں الاکہ ترا پیشداراں پد ءَ منی وانگ بیت من دست گٹ باں من ءُ شھید ناسر درتکاں دیم پہ وشکوشیں پروم ءَ۔شھید ناسر ءِ بھت ءَ پروم ءَ ھامین اَت پروم ءِ ناہ ءُ ھُرماگ نامان اَنت شریں وڑے ءَ ما گرد ءُ تر کت ءُ سنگت زرت اَنت دیم پہ کوہ ءَ شتاں پکنک کت ءُ شھید ناسر ءَ پروم ءُ پروم ءِ سنگت سک دوست بوت اَنت گڑا مدام شھید ناسر ءِ دکان پروم ءِ سنگتانی دیوان جاہ ءِ جوڑ بوتگ اَت شھید ناسر ءِ جند سکیں مھروان ءُ ساپ دلیں سنگتے اَت آئی ءِ دل ءِ تہ ءَ ھچ وڑیں بدی ءُ ھرابی نیست اَت مدام بہ دیستیں دپ ئِے پُر کندگ اَت ۔شھید ناسر ءَ من ءَ گُشت تو منی وام دارے گڑا من تو کدی برواں منی بُنکی ھنکین ءَ بزاں ھاران ءَ من گُشت ھر وھد ءَ من ءَ موہ رس ایت من کاھاں گُشتے چش نہ بیت تو وتار ءَ گیگ بکن من تو رواں ھاران ءَ من دیریں نشتگاں سنگت من ءَ گشگ اَنت بیا کہ ھاران ءِ موسم وش اِنت پد ءَ سک گرم بیت گڑا ھاران چارگی نہ بیت من گُشت منی وانگ اِنت من اتک نکناں انوں۔ من ءَ سک مجبور ءِ کت ئِے گشت ئِے من ءَ ھمراہ نیست منی ھمراہ بو چار روچ ءَ گیش نہ ننداں جلدی واتر باں کاھاں من ءَ المی ئیں کارے ھست۔ من شھید ناسر ءِ دل نہ پُرشت من گُشت برواں مسلہ نہ اِنت بلے منی وانگ اِنت تئی ھاتر ءَ من ءُ شھید ناسر درتکاں دیم پہ پُلیں ھاران ءَ وھدے ما بیسیمگ ءَ سر بوت ایں گڑا شھید ناسر ءَ گُشت سنگتاں ھال کناں ما پیداکاں ورگ ءِ بند ءُ بست ءَ بکناں ءُ سنگت مئے دیم ءَ بیاھاں وھدئے ھاران ءِ نزیک ءَ سربوتاں شھید ناسر ءِ سنگت مئے ودار ءَ سڑک ءِ کش ءَ اوشتاتگ اِت اَنت ما گوں سنگتاں دروت درھبات بوتاں سنگت پہ ساری ما پُشت ءَ شت ءُ ھاران ءَ سر بوتاں سنگتاں جوانیں رنگے ءَ دیوان دات ءُ مارا ھاران ءِ دراھیں جوانیں جاھاں ترینت ءُ من ءَ ھاران سک دوست بوت پرچاکہ شھید ناسر ءِ ھنکین اَت۔
من شھید ناسر ءَ گُشت ھاران چہ گشندہ ءَ پُر اِنت تو گڑا دیوان ءِ ٹاھین گشندھانی شھید ناسر سنگتے ءَ گُشت منی سنگت ءِ دلی ھُوائیش ءِ کہ من ءَ گشندھانی دیوان ءِ بدیاں شمئے گشندھان اِش کناں سنگت ءَ گُشت اَنوں بے وھد اِنت باندا شوکیں دیوانے کناں ھاران ءَ ریک ءِ سر ریک ءِ سر سک مشھور اِنت ھما ریک ءِ سر ءَ رواں دیوان کناں سیل ءُ ندارہ کناں۔
من ءُ شھید ناسر پادتکاں وتار ءَ وڑ ءُ گیگ کت گڑا سنگت ءَ گُشت کہ شُما زی گپ ءِ جتگ شمئے گپ ما گپ کتگ مرچی بیگاہ ءَ دیوان اِنت دراھیں گشندہ تیار اَنت بیگاہ ءِ ساھت چار ءَ شما وتار ءَ گیگ بکن ءِ گڑا ھما نیمگ ءَ رواں ۔
سنگتے اتک ءُ مئے رند ءَ گاڑی ءِ سر ءَ گڑا ما گاڑی ءَ سوار بوتاں دیم پہ بازار ءِ نیمگ ءَ گاڑی ءِ پُر اِنت چہ مردم ءَ گڑا سنگتے ءَ مار ءَ گُشت شُما اے سنگت درکپ ءِ بروئے ھما جاہ ءَ من آ دگہ سنگتاں زوراں کاھاں ما شُت ءُ آ جاہ ءَ سر بوتاں دیر نگوست گاڑی اتک ءُ گوں مردماں دست ءُ دروت بوتاں ڈھل ءُ باج ءَ ایر کتاں گوں ژانگ ءَ گشندھانی بلاھیں کتارئے۔ دیوان بندات بوت من چیزے نام اشکتگ اَت ءُ چیزئے اِناں۔ ھشت گُشندہ اتکگ اَت ھمے دیوان ءَ شریں وڑے ءَ مار ءَ شھید ناسر ءِ سنگتاں ءَ ازت ءُ شرپ دات واتر پد ءَ وتی سنگتے لوگ ءَ ۔
سھب ءِ سر ءَ ما چاہ ءِ وارت ءُ شھید ناسر من ءَ گُشت من بے تئی جُست ءَ سنگتے ءَ گُشتگ مئے ٹکٹاں بکن کوئیٹہ ءِ واست ءَ ٹکٹ کتگ اَنت گڑا تیار بو دو بج ءَ من ءُ تو اے سنگت رواں من گُشت پُل منی وانگ اِنت تو چو مکن۔ گڑا من ءَ باز واوا لیلائے کت ءُ من رازی بوتاں دیم پہ کوئیٹہ ءَ وھدے ما نوشکی ءَ سر بوتاں آرمی ءِ کیمپ ءِ دپ ءَ بس ءَ داشت پٹگ بندات کت ءُ یک سیول ڈریسی ءُ گوں دو پوجیانی ھمراھی ءَ بس ءِ تھا پُترت ءُ شناھتی کاڈانی جست کنان ءُ اتکاں منی ءُ شھید ناسر ءِ نزیک ءَ شھید ناسر ءَ وتی کارڈ پیشداشت ءُ من ءَ گون نیست اَت۔ ءُ من گُشت من اسٹوڈنٹے آں گوں ھمے ھبرے اِشکُنگ ءَ منی سرے پُٹے گپتاں من ءَ کشان کت ءِ بس ءَ ایر گِپت ءِ چاراں شھید ناسر منی دمب ءَ گون اِنت من ءَ بازیں جستے کت ءِ کجا روگائے ،چی ءَ روگائے،چے کنے،کئی ءَ روگائے ،پرچا روگائے،من گوں ھمے ترس ءُ بیم ءَ پسواں دیاناں گڑا شھید ناسر ءَ گُشت اے منی ناکو زتک اِنت اشی اُمر کسان اِنت شناھتی کارڈ نیستے من اشی ءِ زمہ واراں۔
گڑا من ءَ یلہ کت ءُ پد ءَ من ءُ شھید ناسر بس ءَ جماز بوتاں دیم پہ وتی منزل ءَ وھدے مستونگ ءَ سربوتاں پد ءَ ھما آرمی ءِ کیمپ ءُ بس ءِ تھے مردمانی جست ءُ پُرس منی دل ءِ پد ءَ درکگ ءُ لرزگ ھمے ترس ءُ بیم ءِ آماچاں اتک ءُ منی کش ءَ شھید ناسر ءَ جست ءِ کت ءُ من ءَ ھچ ءِ نگُشت ءُ پد ءَ چمن گوست پٹ ءُ ھنڈے ھلاس کت ءُ چہ بس ءَ ایرکپتاں گڑا شھید ناسر ءَ من ءَ گُشت اے ھما کیمپ اِنت کہ چئیرمین زاکر جان ءَ ھمے کیمپ ءِ دپ ءَ چست کتگے روچ ءِ مرچی گار ءُ بیگواہ اِنت منی دپ ءَ ھمے ھبر درتک ما گُلاماں گلام ءِ ھال ھمے بیت پد ءَ بس رواں بوت دیم پہ وتی منزل ءَ من شھید ناسر ءَ گُشت دیم ءَ دگہ کیمپ ھست گُشت ءِ ھو من گُشت بلوچستان ءَ اینکس اسکول نیست اینکس اشانی کیمپ اَنت پد ءَ منی دل ءِ دریکگ گیش بیان بوتاں شھید ناسر ءَ من ءَ گُشت پریشان مبو ما نی سر بیتگاں وتی منزل ءَ من بلاھیں گینسارتے کشیت ءُ گُشت گڑا دگہ کیمپ نیست دیم ءَ گُشتے پوجی کیمپ بازاں بلے ما نوں کوئیٹہ ھاکاھاں گوں منی ھمے جست ءُ پُرسانی تھا بس پد ءَ اُشتات ءُ پوجی بس ءَ جماز بوتاں پٹ ءُ ھنڈ پد ءَ بندات بس ءِ چھت ءَ ڈِک ءُ ڈاک بزاں پوجی ساماناں چارگ اَنت بلاھیں پھلوان اِیں پوجی ءِ گوں دو دپونک ءَ اِیں پوجی ءِ ھمراھی ءَ پُترتاں بس ءَ منی دل ءِ درکگ گیش بُوان بوتاں جست ءُ پُرس کنان ءُ اتکاں منی نزیک ءَ من ءَ لرزگے ءَ گپت گُشتے وتی شناھتی کارڈ من گُشت نیست من اسٹوڈنٹے آں گوں ھمے ھبرے اشکنگ ءَ من ءَ تُرندیں شھماتے جتے منی گوشاں ٹلنگگ بندات کت من نہ زمینی بوتاں نہ آزمانی۔ پد ءَ من ءَ گُشتے اسٹوڈنٹ کارڑ ءَ بہ دے من گُشت نیست پد ءَ شھماتے من ھمے پوجی ءِ پادانی دیم ءَ کپتاں پیریں زال ءِ پاداتک ءُ ھمے پوجی ءَ گُشتے اے گونڈیں چک ءِ اشی ءَ ھچ گون نیست اشی اُمر کسان اِنت اشر ءَ کُشے۔گڑا پوجی ءَ ھمے گُشت ءُ پادا من پاداتک نکت ھمے پیریں زال ءَ منی دست گپت ءُ من ءَ نندارینت من وتی چم پہ شھید ناسر دور داتاں چاراں شھید ناسر ءِ چماں ارس رچگ اِنت من گُشت پل ترا چے بوت گُشتے ھچ مگُش۔
کوئیٹہ سر بوتاں شپ ءَ شت ءُ ھوٹلے ءَ داشت ءُ اے دراھیں شپ ءَ من ءَ واب نیتک منی گوش ٹلنگگائیتاں اے دراھیں شپ بس من ھمے جیڑگ ءَ اِیتاں کہ ما پرچہ چو بدھالاں وتی جندے زمین ءِ سر ءَ گردگ ءَ میل لوگ ءَ روے جست بکن اسکول ءُ وانگ جاھاں روے ھنچو اسپیتال ءُ بیمارستاناں روے ھمے وڑ –
من شھید ناسر ءَ گُشت منی یک کسانیں ارز ءِ منی بلاھیں واھگ ءِ اگاں تو منی واھگ ءَ پورا کن ئے منی ھمراھے ءَ کائے گوں گڑا ترا گُشانے گُشتے ھو بُگش من گُشت اُدہ جیل ءَ استاد واھد کمبر ءَ ءُ کمبر چاکر ءَ چاراں من کمبر چاکر دیستگ بلے استاد واھد کمبر ندیستگ منی بلاھیں واھگ ءِ ما درتکاں دیم پہ اُدہ جیل ءَ ما لھتیں ٹیکی ءُ فروٹ زرت ءُ شتاں اُدہ جیل ءَ سر بوتاں۔ گڑا مار ءَ دات ءِ وھدے استاد واھد کمبر گوم ءَ ملت بلے شھید کمبر چاکر گُشتے شُتگ پیشی ءَ اد ءَ نہ اِنت من گوں استاد ءَ ھال ءُ اھوال کت بازیں سر ءُ سوج ءِ کت منی ارس دارگ نبوتاں من گریت ءُ شھید ناسر گریت آ روچ ءَ گڑا استاد ءَ مارا باز دل بڈی دات ءُ گُشت ئِے اگاں کوم ءِ نوجوان شُما اِت کہ گریوئے گُڑا مئے ھال چے بیت من ءُ شھید ناسر ھمے گریوگانی تھا گوں استاد ءَ مئے وھد ھلاس بوت گوں استاد ءَ۔
مار ءَ گُشتے شمے وھد ھلاس اِنت من گُشت دگہ نیم ساھت مار ءَ بدے مئے جاگہ دور اِنت گُشتے بروئے مرچی دگہ روچے بیائے من ءُ شھید ناسر پہ گریوگیں چمے چہ اُدہ جیل ءِ گیٹ ءَ درتکاں دیم پہ بازار ءَ ۔
شھید ناسر سنگتے ءَ ھال کت من ءُ سنگتے اتکگاں ھمدا کوئیٹہ شپی تئی نیمگ ءَ پیداکاں سنگت ءَ گُشت شُما انوں کجائے من وت کاھاں شُمے رند ءَ سنگت اتک ءُ وتی گاڑی ءِ سر ءَ مارا سوارے کت ءُ کوئیٹہ ءَ شھید ناسر ءَ گُشت گڑا مارا ترین جوانیں جاھاں۔
شپ ءَ شتاں سنگتے لوگ ءَ ما گند ءُ نندے کت ءُ سھب ءِ سر ءَ درتکاں دیم پہ ھاران ءَ پد ءَ ھما راہ ءُ پریشانی پد ءَ پوجی کیمپ ءُ جست بلے اے رندی من لٹ ءُ شھمات نوارت اتک ءُ ھاران ءَ سر بوتاں یک روچ ءِ نشتاں گڑا من شھید ناسر ءَ گُشت من چار روچ ءِ گُشتگ اَت مرچی چاردہ روچ اِنت کہ منی وانگ شُت من ءُ شھید ناسر درتکاں دیم پہ پنجگور ءَ ۔
منی ءُ شھید ناسر ءِ سنگتی ءِ تھا دگہ بازیں سنگت ءِ مئے سنگت جوڑ بوتاں ھمے سنگتانی تھا مھروانیں آبد سلیم منی شوکیں سنگتے جوڑ بوت مئے سنگتی روچ پہ روچ ءَ مزبوت بوان بوت۔
من شھید ناسر ءَ گُشت من تو رواں الاکہ گندک ءِ کناں پد ءَ کاھاں گُشتے منی آھگ نبیت کمو وتی کاراں گیشیناں گڑا ترا ھال کناں من درتکاں دیم پہ وتی الاکہ مئے الاکہ موبائیل ءُ پون نیست اَت یک (پی سی او) ءِ ھمے نمبر من شھید ناسر ءَ داتگ اَت من گُشت ترا ھر وھد ءَ پمن کارے بوت گڑا ھمے (پی سی او)ھال بکن من ءَ وت تئی پیگاماں دنت گڑا من کاھاں ترا ھال کناں شھید ناسر ءِ پیگام اتک ءُ من ءَ سر بوت من اتک ءُ شھید ناسر ھال کُت من ءَ گُشتے تو وتار ءَ باندا بیا الم رسیں سپرے ءَ ھست من گُشت من باندا الم کوشش کناں درکپاں۔ آ دگہ من ءَ سواری نہ رس اِت دیم پہ پنجگور ءَ من مگرب ءِ وھد ءَ من ءُ سنگت ءِ شُتاں ھمے (پی سی او)ءَ کہ شھید ناسر ءَ ھال کناں کہ من ءَ سواری نہ رس اِتگ من باندا کاھاں من شھید ناسر ءِ نمبر جت نلگ اِت شھید آبد سلیم ءِ نمبر جت بند اَت دگہ سنگتے ءِ نمبر جت ھما سنگتے نمبر لگ ایت گُشتے آ سنگت پوج ءَ چست کتگ اَنت تنی وھدی زانگ نبیت کجام کجام سنگت اَنت بلے شھید ناسر ءُ شھید آبد سلیم ءِ چست کنگ پک اِنت من گم ءُ سیاھے ءَ کپتاں من ءَ پد ءَ آرام نہ شُت من شھید ناسر ءِ برات شھید ماجد ءِ نمبر جت آئی گوں گریوگیں توارے ءَ گُشتے مار ءَ تباہ کت پوج ءَ شھید ناسر ءَ گوں سَے سنگت ءَ پوج ءَ چست کُتگ من گُشت آ دگہ سنگت کے ءُ کے آں گُشتے یکے تئی ھما سنگت اِنت کہ تو آ مدام منی دکان ءَ اتکگے من گُشت آبد سلیم گُشتے ھو منی پادانی چیر ءَ زمین تو گُشے ایر شُت۔ آ دگہ سنگت کے آں۔ گُشتے دوئیں پرومی اَنت شُمے الاکہ ئے۔ من زانت گڑا شھید مھراب اُمر ءُ شھید آبد رسول اَنت من پون چہ گُوش ءَ ایر کت ءُ سنگت ءَ گُشت برواں ھچ پشت نکپتگ اے دراھیں شپ ءَ من نزانت کجا برواں چے بکناں گوں کَے ءَ وتی گپاں بجناں گوں کَے ءَ بہ گریواں منی واست ءَ 23جنوری 2011 ءِ روچ ءُ شپ پمن کیامتے اَت بس ھمے ودار ءَ کہ سنگتاں ھچ مبات سنگت پہ وشی سلامتی دربیاھاں من وڑ وڑیں ھیال وتی دل ءَ بستگ اَت 27جنوری 2011 ءِ بیگاہ ءَ ھال ءِ اتک گُشتے بیا کہ دوشی پوج ءَ دو مردم جتگ ءُ کُشتگ گوارگو ءَ جاہ ءِ ھست کُنری ءِ گُشنت اشانی لاش ھمود ءَ دور داتگ اَنت بلے یکے سک ٹپی اِنت دومی شھید بوتگ پد ءَ دیر نگوست ھمے ھال اتک گُشتے آبد رسول شھید بوتگ ءُ شھید ناسر ٹپی اِنت بلے سک نگیگ اِنت ھون باز رتکگ یک تیرے دپ ءَ لگیتگ ءُ دو تیر ءَ لاپ ءَ ءُ دگہ لھتیں تیر ءَ پادان ءَ گپتگ بلکیں بچّگ ءِ اُمیت بہ بیت منی دپ ءَ ھمے درتک اشی ءَ ھُدا تو وت بچّاریں کہ منی اوست ءُ امیت اِنت۔
شھید ناسر ءَ گوں ھمے نگیگیں ھالاتاں بُرت ءُ پنجگورے اسپیتال ءَ پوج سھی بوت کہ اے نمُرتگ ٹپی اِنت گڑا پوج ءَ دراھیں بیمارستان گیرا کت ءُ کہ شھید ناسر ءَ پد ءَ براں کُشان ءُ گار ءُ بیگواہ ءِ کناں لاش ءِ دور دیاں۔ پنجگور ءِ مھلوک ءُ مردماں ھمت کت ءُ شھید ناسر نیشت پوج ءِ دست ءَ دیگ ءَ۔ شھید ناسر ءَ بُرت ءِ پہ دارو ءُ درمان ءِ واست ءَ کوئیٹہ ءَ چیزے وھد ءَ رند شھید ناسر وشتر بوت ءُ منی ھال گوں شھید ناسر ءَ بوت من گریت ءُ شھید ناسر ءَ من ءَ دلبڈی دات گُشت ئِے وتی دل ءَ مزن کن تانکہ بلوچستان گلام اِنت پاکستان ءِ دست ءَ اے جَنَگ ءُ کُشگ ھست اَنت۔ من گُشت من کاھاں تئی گندگ ءَ ۔ گُشت ءِ میا من وت گیگ باں وت کاھاں تئی چارگ ءَ من باز گُشت۔
شھید ناسر ءَ من ءَ گُشت تو جاھلی مکن من کاھاں شریں جاھے گڑا ترا گُشاں تو بیا من گُشت شریں منی پون ءِ سر ءَ ھال ءُ اھوال چلگ ءَ اَت گوں شھید ناسر ءَ مدام من ءُ شھید ناسر ءَ پہ شھید آبد سلیم ءُ شھید مھراب اُمر ءَ جیڑیتگ کہ باریں آیانی چے ھال بیت ۔
من ھر وھد ءَ شھید ناسر ءَ ھال کت من گُشت ناسر جان تو وتار ءَ ھچ نہ پھریزے تو درا بیا مئے نیمگ ءَ اگاں تو گیگ نہ اِئے گڑا برو ایران ءَ تئی واست ءَ بھتر اِنت تئی الاج ءِ چیزے بیت کمو آرامتر بے گُشتے من نرواں ھچ نہ بیت۔ شھید ناسر گوں وتی برات ءِ ھمراھی ءَ دیم پہ کوئیٹہ ءَ الاج ءِ واست ءَ گڑا مَستونگ ءَ 23 مئی 2011 ءَ پاکستانی پوج ءُ آئی ءِ داشتگیں ایجنسی ایرے گیجاں گوں برات ءَ ھوار ۔ وھدے من ءَ ھال ءَ گپت شھید ناسر پد ءَ پوج ءَ چِست کتگ منی نُکّ ھُشک بوت۔
منی دپ ءَ بس ھمے ھبر دراتک ما دژمن ءَ دژمن ءِ نلیکاں ءُ وتار ءَ نزاناں مئے زندگ بوگ پہ دژمن ءَ چنکسیں تاوانے ما بلوچ مِرَگ زاناں بلے زندگ بُوگ نزاناں۔
من اتکاں کوہ ءِ ٹُل ءَ کہ پکّائیں ھال ءِ گراں ھال ءُ گپت ءُ راستے شھید ناسر ءِ چست کنگ من گوں دمبُرتگیں چماں کوہ ءَ جھلاد بوتاں اتکاں سنگتانی جاہ ءَ سر بوتاں سنگتاں جُست کت من گوں ارسی اِیں چماں جواب ترینت ءُ گُشت ھو راستے شھید ناسر پد ءَ چست کتگ پوج ءَ گوں برات ءَ ھوار ۔
دگہ بدیں ھالے تربت مُرگاپ ءَ لاش ءِ دوردیگ ءِ ھال ھست اَت بلے پک ءَ نہ اَت نام زانگ نبوتگ اِتاں تنی وھدی من ءَ تُنّا جَت من ایر کپتاں چہ کوہ ءِ سر ءَ ۔
سنگتاں گوانک جت کہ سنگتاں بیائے (بی،بی،سی) ءِ وھد اِنت من گوں دمبُرتگیں چماں اتک ءُ دیوان جاہ ءَ نشتاں ھالاں گوشداران ءُ ریڈیو گُشت مرچی 24مئی 2011 اِنت کہ تربت ءَ مرگاپ ءَ لاش دور دیگ بیتگ آھانی پجار یکے آبد سلیم ءُ دومی مھراب اُمر اِنت کہ آیانی سیادی چہ پنجگور ءَ اَنت گوں ھمے نامانی اِشکنگ ءَ منی دل ءِ ھِڑسکگ نُکّ ءِ بُنا شُت من سُد ءُ ساری ءَ نبوتاں۔
گوں ھمے جیڑگانی تھا ناسر جان تو پد ءَ واتر کدی کائے سنگت شُتاں منی چہ رب ءِ درا ھمے دوا اِنت ھُدا ناسر جان ءَ ھچ مکن پد ءَ یک رندئے منی دست ءِ بہ دے من ناسر جان ءِ کدر ءَ نوں زاناں ناسر جان ءَ من ھچ نیلاں گوں ھمے جیڑگانی تھا چشیں روچ نیست کہ بلوچستان ءَ چُشیں ھند ءُ دمگ نیست کہ بلوچانی لاش ءِ پاکستان ءُ آئی ءِ آرمی دور مدی اَنت۔
پاکستان ءِ آرمی ءِ داشتگیں دلاراں ھمے لوٹ کتگ اَت کہ مار ءَ چِل لَک کلدار بہ دے ئے ناسر جان ءَ یلہ کناں آھر ءَ ھمے پاکستان ءِ داشتگیں دلار پہ بیست لک ءَ رازی بوت اَنت کہ ناسر جان ءَ یلہ کناں گوں زرانی دیگ ءَ ھمے پاکستان ءِ داشتگیں دلاراں گُشت شمئے مردم باندا یلہ کنگ بیت ھمے دلّار ھال کناں کہ بروئے ناسر کوئیٹہ ءَ پِلاں جاہ ءَ ھمودا شُمئے ودار ءَ اِنت۔ مردم رواں ھما ودار جاہ ءَ مردم رونت شھید ناسر جان ءِ لاش گونی ءِ تھا بند اِنت کوٹی ءِ کش ءَ کپتگ ءُ گونی ءَ پچ کناں چاراں ناسر جان ءِ لاش اِنت جامگ ءِ کیسگ ءَ پرچی ءِ سر ءَ نبشتہ اِنت ناسر ڈگارزھی ءُ دگہ بازیں نارہ نبشتہ اَنت ءُ شھید ناسر جان پانسی داتگ ءُ شھید کُتگ اے رندی 16جولائی 2011 ءَ شھید ناسر جان ءِ لاش ءَ کار اَنت ءُ پُلیں ھاران ءِ زمین ءِ میار کن اَنت

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

شال: پہ بیگواھیں بلوچانی درگیجگ ءَ زھرشانی گدان ءَ4021روچ سرجم

دی بلوچستان پوسٹ

شال پریس کلب ءِ دیم ءَ وائس فار بلوچ مسنگ پرسنز ءِ زھرشانی گدان ءَ4021روچ سرجم بیتگ، سیاسی ءُ چاگردی جھدکار درمھمد،نور مھمد ءُ جنینانی بازیں کچے ءَ گدان ءَ گندُک کُرتگ ءُ گوں بیگواھیں مردمانی کھولاں ھمدردی درشان کُرتگ۔

اےدرگت ءَ وی بی ایم پی ءِ کمک سرکماش ماما قدیر ءَ تران کنان ءَ گْوشتگ کہ وی بی ایم پی ءِ سروکی کنان ءَ مرچی ما انچیں جاھے ءَ سربیتگیں کہ چہ ایشی ءَ دلجمی ءَ تران کُرت کنیں ءُ من سرپد باں کہ مرچی ما سرجمیں جھان ءَ وتی توار ءِ سر کنگ ءَ سوبین بیتگ اِنت۔ زی اے چیزاں بن نیست اَت۔سرجمیں بلوچستان ءَ پاکستان ءَ وتی ھستی شمشتگ، مئےورنا، جنین وتی زانت ءَ گوں راجی لوٹاں ھمگرنچ بہ کن اَنت ءُ گل ءِ راھبند ءِ رد ءَ وتی کرد ءَ پیلو بہ کن اَنت۔

راج ءِ گیشتریں بھر ایمنیں جُھد ءَ گل ءِ راھبندی رد ءَ بندوک اَنت، چہ زی ءَ مرچی گل ءَ بلوچ جنینانی ھوار بیگ جوانیں کردے۔ میان اُستمانی پِڑ ءَ بیگواھیں بلوچانی توار ھمک مراگشاں جوانیں ارزشتے داریت۔ بلے ما ایمنی ءِ جُھد ءِ پِڑ ءَ نوکیں دور ءِ لوٹاں شمشکار نہ ایں۔ دژمن بلوچ چکچینی ءَ ھمے وڑ ءَ تیزی آرگ ءَ اِنت۔جنگی پِڑ ءِ وتی بیراں ءَ چہ بےگناھیں بلوچاں گِرگ ءَ اِنت۔ جنگی راھبند ءُ مردمی ارزشتاں لپاشان اِنت۔

ایشی گِر ءُ دار کنگ ءِ ھاترءَ مارا ءَ یکجاہ بیگی اِنت،بلکیں مردمانی زور ھم ھوار کنگے ءَ اَنت۔ گل اے درگت ءَ وتی کار ءَ کنگ ءَ اِنت۔ بیگواھیں مردم ءُ شھیدانی کھول درسیں چیز کار آمید کنگی اَنت,اے دردناکیں وھد ءَ راجی سوھو ءُ زانتکاریں مردماں دیم ءَ آیگی اِنت۔ چوشیں مردم کہ چیردستی ءُ نوک آبادی ءِ پگر ءِ دراھگ ءَ پُشت ءَ کپتگ اَنت ایشاں بایدیں کہ گْوستانک ءِ توار ءَ گوشاں مہ دار اَنت، پرچہ کہ گْوستانک کوکار کنگ ءُ توار پر جنگ ءَ اِنت کہ اے وپسگ ءِ وھد نہ اِنت بلکیں گیشاں چہ گیش زانت کاربندگ ءُ وتی بود ھرچ کنگی اِنت۔

بلوچ اھوالکار ساجد ھسین ءِ بیگواھی ءَ پد بیرانی ءِ کیس منانک نہ بیگ ءِ سوب ءَ ھلاس۔

دی بلوچستان پوسٹ

سویڈن واکدارانی رد ءَ کوش ءُ زوریں بیگواھی ءِ دلجمیں منانک نہ بیگ ءِ سوب ءَ بلوچ اھوالکار ساجد ھسین ءِ زوریں بیگواھی ءُ کُشگ بیگ ءِ گپ چہ کیس ءَ ھلاس کنگ بیتگ –

2 مارچ 2020 ءَ چہ سویڈن ءِ شھر اپسالہ ءَ چہ بیگواہ بیتگیں ساجد ھسین بلوچ کہ آئی ءِ کُنٹ 23 اپریل 2020 ءَ اپسالہ ءِ یک کور فائرس ءَ چہ دزکپتگ اَت۔ ساجد ھسین ءِ کُنٹ 01 مئی 2020 ءَ پجارگ بیتگ اَت ءُ گمان ھمیش اَت کہ ساجد ھسین بیگواہ کنگ بیتگ ءُ پد ءَ کُشگ بیتگ ۔

جھانی انسانی ھکانی گل ءُ اھوالکارانی پھازوکیں گلاں ھم ساجد ھسین ءِ بیگواھی ءُ کوش ءِ تہ ءَ پاکستانی چیریں ادارھانی ھوار بیگ ءِ نیمگ ءَ لنکوک شان داتگ اَت۔

مروچی ساجد ھسین ءِ کیس ءِ درگت ءَ نوکیں اھوال دیما اتکگ اَنت ءُ آیانی رد ءَ ساجد ھسین ءِ کیس ءِ پٹ ءُ پول کنوکیں واکداراں چہ کیس ءَ زوریں بیگواھی اگاں کُشگ ءِ گپ چہ کیس ءَ کش اِتگ ءُ گوشتگ کہ ساجد ھسین ءِ بیگواھی ءُ بیرانی ءِ درگت ءَ چُشیں مھکمیں منانک دز نہ کپتگ کہ مردم بہ گْوش اِیت کہ ساجد ھسین ءِ کوش ءَ کسے ءِ دست ھوار اِنت اگاں ساجد ھسین کُشگ بیتگ۔

اے درگت ءَ دگہ یک نامی ئیں بلوچ اھوالکار کئیا بلوچ ءَ ٹوئیٹر ءَ وتی یک ٹوئیٹے ءِ تہ ءَ نبشتگ کہ “ساجد ھسین ءِ کوش ءِ درگت ءَ جنزوکیں پَٹ ءُ پول نی ھلاس کنگ بیتگ۔”

آئی ءَ دیمتر ءَ نبشتگ کہ ساجد ھسین ءِ کیس ءِ درگتءَ پَٹ ءُ پول کنوکیں واکداراں گوشتگ کہ “فارنسک آٹوپسیز” ءُ ھما مردماں کہ ساجد بیگواھی ءَ چہ پیسر دستگ آیانی درشان ءَ چہ پد اے گمان گیشتر نزور بیت کہ ساجد ھسین کجام ھم ناشرکاری ءِ آماچ بیتگ! اے گپ باوری نہ اِنت! دعا اِنت اللہ (ساجد) ءَ آسودگ بہ کنت۔”

کولواہ گیشگور ءُ سنڈم ءِ دمگاں پوج ءَ بیڑ بُرتگ

دی بلوچستان پوسٹ

دی بلوچستان پوسٹ اھوال پتر ءَ سربیتگیں ھالانی رد ءَ بلوچستان ءِ دمگ کولواہ ءِ ھنکین گیشگور ءُ سنڈم ءَ پاکستانی پوج ءَ بیڑ بُرتگ ءُ بازیں مردم لٹ ءُ کٹ کُتگ۔

ھندی ھالانی رد ءَ مروچی پاکستانی پوج ءَ گیشگور ءُ سنڈم ءِ ھنکیناں بیڑ بُرتگ ءُ لوگ پہ لوگ پٹگ ءَ پد بازیں مردم لَٹ ءُ کُٹ کُتگ اَنت۔

ھندی اھوالکارانی رد ءَ پوجی کارمنداں بازیں بلوچ جنین آدمانی گوشی (موبائل) گوں وت بُرتگ اَنت۔

یات بہ بیت بلوچستان ءِ جتائیں ھند ءُ دمگاں پاکستانی پوج ءُ چیریں گلانی بیڑ، مردمانی دزگیری ءَ پد بیگواہ کنگ ءُ لوگانی تہ ءَ جنین آدمانی کم شرپ کنگ ھم یکشل ءَ برجاہ اَنت۔

بلوچ سیاسی گل ءُ بلوچ انسانی اگبالانی ھاتر ءَ کارکنوکیں گل اے زوراکیاں ھواریں سزا ءِ نام دئینت ءُ گوش اَنت کہ لس مھلوک ءُ سیاسی جھدکارانی کھول ءُ بے میاریں مردمانہ سزا دیگ انسانی اگبالانی لگت مالی اِنت۔

نبشتانک: من ءُ زندان

نبشتہ کار : اَمر بلوچ

دی بلوچستان پوسٹ

گاڑیانی ھینژ ءُ ھانژ اَت ھنچیں شورے بنا بیتگ اَت ، وھدیکہ من ڈنّ ءَ سر کَش اِت داں منی لوگ ھرچاریں نیمگاں انگیر ءَ اِنت من ھمے دیست کہ گاڑیانی مُچی اِنت ، تاں دیست گاڑی سِلاھبندیں (مسلح) مردُم (سول ڈریس)لس پوشاک ءِ تہ ءَ اَنت ءُ سیاہ کانچیں گاڑی ءَ اَنت۔ ھمے مردُم چہ گاڑیاں ایر اَتک اَنت ءُ کمپان ءِ گیٹ اِش گوں لگتاں مان بست ءُ لوگ ءِ تہ ءَ پُتِرت اَنت۔ اِیشاں منی دْراھیں لوگ پٹّ ءُ پول کت ءُ دْرستیں مردُم یکجاہ کت اَنت۔ اجب ترسناکیں مردم اِت اَنت من ھنچُش ترسگ ءَ اِتاں ۔ آیاں منی نیمگ ءَ دست شھار (اشارہ) اِت کہ ھمے ورنا اِنت ، آیاں من ءَ گِپت چمّ ءُ دست بست اَنت ءُ گاڑی ءِ تہ ءَ دور اِش دات۔داں چیزّے کلاک ءَ پد من یک کیمپے ءَ بَرگ بوت آں تھاریں کوٹے ءَ دور اِش دات ۔ کسانیں ساھتے ءَ چِہ پد اَتک اَنت منی کر ءَ ،جُست ءُ پُرس ءَ لگّت اِت اَنت،تو کُجام سِلاھبندیں گَل (مسلح تنظیم) ءَ سیادی (تعلق)دار ئے؟ تو کے کے ءَ زان ئے؟ تئی ھند ءِ تہ ءَ گَلّ (تنظیم) ءِ مردم کَے کَے اَنت؟ من گْوشت ۔ من کس ءَ نہ زان آں ، من ءَ گوں ھِچّ وڑیں تنظیماں گوں سْیادی نیست اِنت، گُڑا بِندات بوت اَنت منی لٹّ دیگ ءَ، من ءَ جت ءُ جُست اِش کُت دانکہ شپ بوت، شپ ءَ من ءَ ورگ اِش وارینیت ۔

دو ءَ دست برز ءَ بست اَنت ،پاد ماں پاد ءَ بست اَنت ۔ یک پادے ءِ سر ءَ اُوشتارینت اِش ،دْراھیں شپ ءَ داں کہ سُھب بوت ،ھمے وڑ ءَ پانزدہ روچ گْوست لٹّ ءُ کُٹّاں ۔ لٹ ءُ کُٹّاں من ءَ سک ژند ءُ پند اِش کتگ اَت ، منی کش ءِ کُوٹی ءَ لھتے مردم ھست اَت،گپّ ءُ ھبرانی توار مُدام اتگگ اِت اَنت، یک شپے ءَ پد ءَ من ءَ بُرت اِش جست ءُ پُرس کنگ ءَ ،لٹّ ءُ کٹّ کُت اِش۔ پد ءَ سُھب ءَ من ءَ واتر کوٹی ءِ تہ ءَ آؤرت ءُ چگل اِش دات ،بیستُمی روچ ءَ پد ءَ من ءَ بُرت اِش سک باز ٹارچر کُت اِش، تو بِہ گْوش گوں کُجام تنظیم ءَ سْیادی دارے؟ منی گپّ یکّے اَت کہ من ءَ ھِچّ تنظیم ءَ گوں سْیادی نیست اِنت،من ءَ جَت اِش ءُ توسینت اِش ۔پد ءَ ھوش ءَ اتکاں من ءَ لٹّ ءُ کُٹّ اِش بنا کت،رند ءَ لٹّ ءُ کُٹّ بند کُت اِش ءُ من ءَ آؤرت اِش کوٹی ءِ تہ ءَ ، دِگہ یک مردُمے بُرت اِش کہ لٹّ ءُ کُٹّانی توار ، کوکار ءُ جاکانی توار مئے کرّ ءَ آیگ ءَ اِت اَنت من کس ءَ نہ زاناں پد ءَ توار اَتک من کس ءَ نہ زاناں ۔پد ءَ من ءَ سیُمی روچ ءَ بُرت اِش کوٹی ءِ ءَ چپّی ءَ ٹنگ اِت اِش۔ لَٹّاں گوں مان بست اِش۔ مرچی ترا ما یل نہ دے اِیں۔ اے روچ ءَ مَنّ پنچ رند ءَ جت ءُ توسینت اِش دانکہ شپ ءِ ساھت 12 ءَ لٹّ ءُ کُٹّ برجاہ اِت اَنت ۔من سک نگیگ اِت آں ، نی ھِچّ وڑ ءَ من ءَ لٹّانی برداشت ءِ ھاٹی (قوّت) نیست اَت۔ من گْوشت من بی ایس او ءِ مردُمے بوتگ آں۔ بلے انّوں منی اھوال (رابطہ) گوں کسّ ءَ نیست،من ءَ دیر اِنت من بی ایس او یل داتگ،گڑا گْوشت اِش تو دِگہ کے ءَ زان ئے۔ بی ایس او ءِ مردُماں چِے ؟من گْوشت من کسّ ءَ نہ زان آں پد ءَ لٹّ ءُ کُٹّ بنا کت اِش،تو دْرستاں زان ئے ۔ سِلاھبندیں گَل (مسلح تنظیم) ءِ مردُماں ھم زان ئے مئے کِرّ ءَ تو منّگ ءَ نہ ئے، تو بِہ گْوش۔ ما تئی سِزا ءَ پھل(معاف) کن اِیں ءُ ترا یل دے اِیں،تو وتی ھند ءِ توک ءَ ھرکس ءَ زان ئے مارا بِہ گْوش اِش گوں ، اگاں نا ترا اَنچوش جن اِیں ءُ کُش اِیں گیابانے ءَ دور دے اِیں تو مارا مہ گُْوش ئے گوں۔ من گْوشت من کس ءَ نہ زان آں،من شُمارا گْوشت کہ من پیسر ءَ بی ایس او ءِ مردُمے بوتگاں ،منی انّوں گوں کس ءَ اھوال نیست

، من ءَ بِہ کُش اِت من کس ءَ نہ زان آں ،گْوشی تو ھمجوابی کن ئے ،من ءَ سکّ باز لٹّ ءُ کُٹّ اِش کت ،پادانی دل ءَ چِتر جت اِش،ناکُن ءِ ھمبُرّ (پلاس) اِش سکّ دات اَنت۔ گُڑا منی کِرّ ءَ گلینڈر چالو کُت اِت اِش پہ ترسینگ ءِ واستا ،تو بِہ منّ ۔ پد ءَ منی چم اِش پچ کُت اَنت ءُ 15 دانگ اَکس (فوٹو) کشّ اِت ءُ کُوٹی ءِ تہ ءَ بستگیں سانکل پیش اِش داشت اَنت، پد ءَ منی چم اِش بست اَنت ءُ پد ءَ دیم پہ چیر واپینت اِش لٹّ ءُ کُٹّ اِش بنا کُت ۔ چہ گیشیں جَنَگ ءَ منی ران تْرک اِت اَنت ءُ ھون زمین ءِ سر ءَ رِچان بوت اَنت ۔ ھمیشانی تہ ءَ یکّے ءِ توار در اَتک مہ جن اِت ئِے راست گْوشگ ءَ اِنت ،دِگہ کسّ ءَ نہ زانت کہ ھمیش اِنت،من ءَ بُرت اِش دِگہ کوٹی یے ءِ تہ ءَ ۔دگہ یک سنگتے ھمود ءَ اَت۔ لٹّ ءُ کُٹّاں من ءَ سکّ ژند ءُ ژُول کُتگ اَت ،من گوں سنگت ءَ ھچ وڑیں ھال اھوال نہ کت ءُ ھمے مْیان ءَ واب کپت آں ۔ من سُھب ءَ چمّ پچ کُت اَنت ۔سنگت اِد ءَ نہ اِنت گُڑا اَتک اَنت ءُ من ءَ درمان اِش دات ھمے وڑ ءَ دو ماہ ءَ ھمے کُوٹی ءِ تہ ءَ روچ گْوست اَنت ۔ پد ءَ من ءَ بُرت اِش دومی جیل ءَ ، چمّ ، دست ءُ پاد اِش بست اَنت۔ تھاریں کُوٹی ءِ تہ ءَ من ءَ اِیوک ءَ بند اِش کُت ،ورگاں چہ بدّیں بوہ اتک ءُ آپانی تہ ءَ پٹرول ءُ ڈیزل مان اَت،ھمے وڑ ءَ ھپت ماہ گْوست ،یکروچے مردکارے اَتک ،من ءَ جُستے کُت ۔ تو اَنگہ زندگ ئے نہ مُرتگ ئے ۔ تو گنوک ھم نہ بوتگ ئے،تو داں زندگ ءِ ھمے جیل تہ ءَ سڑ ئے مر ئے رو ئے۔ ترا یل نہ دے اِیں،ھمے وڑ ءَ سالے سرجم بوت۔ ھمے کوٹی ءِ تہ ءَ من سالے ایوک ءَ گْوازینت، پد ءَ دومی روچ ءَ من ءَ کشّ اِت ءُ دومی کوٹی ءَ برت اِش، کُوٹی ءِ تہ ءَ دِگہ یک مردُمے ساری ءَ ھست اَت۔ من ءَ ھمد ءَ یل اِش دات ۔چمّ، دست ءُ پاد اِش پچ کت اَنت ءُ من کوٹی ءِ تہ ءَ شُتاں ءُ سنگت ءَ را سلام دات۔ ھال اھوال کُت من جست کرت تئی نام کَے اِنت؟ من ءَ گْوش منی نام ودار اِنت، من ءَ ھپت سال بیت من ٹارچر سیل ءِ تہ ءَ آں ۔ من ءَ جُستے کرت تئی نام کَے اِنت؟من گْوشت منی نام اَمر بلوچ اِنت، من ءَ چاردہ ماہ بیت من بند آں ،گُڑّا من ءَ گْوشت ئِے ڈنّ ءِ ھالاں بِہ دئے،سنگت چون اَنت؟باریں کُجام سنگت شھید کنگ بوتگ ؟ من گْوشت بازیں سنگت شھید کنگ بوتگ ۔بازیں لگور بوتگ ،بازیں سنگت دُژمن ءَ گوں جَنَگ ءَ اَنت ۔ جُھد جنزان جنزان ءَ منزل ءَ رھادگ اِنت، آئی ءَ بچکند اِت ءُ گْوشت جُھد الّم منزل ءَ سر بیت،۔ ھمے وڑ ءَ مئے دوھینانی روچ گْوزگ ءَ اِت اَنت ۔آئی مُدام گپ ءِ تہ ءَ کند اِت ، من ءَ نہ کُش اِیت ءُ منی لاش ءَ دور نہ دنت، مپت ءَ من ءَ داشتگ ئِے۔ منی اے ھون بلکیں سرزمین ءِ واستا کار بہ دے اَنت،

آئی ءِ سر وشّ (دماگی صورت) نہ ات ، مُدام وت سر ءَ کند اِت ئِے ،گُڑّا ما شپ ءَ وپت اِیں ، یکروچے منی تبیت ھراب بوت ودار ءَ کُبل (تالا) ٹُکّ اِت بیا اِت سنگت ءِ تبیت ھراب اِنت ،گولی ءُ درمانے بِہ دے اِت،یکّے ءَ توار دات۔ بِلّےمِراِیت ۔گولی ءُ درمان مئے کرّ ءَ نیست، ودار ءَ ایشاناں زاہ ءُ بد کُت،گُڑّا اَتک اَنت ودار کَشّ اِت ءُ سکّ باز جت اِش ۔ پد ءَ کوٹی ءِ تہ ءَ دور اِش دات ،من گْوشت تو چے کنگ ءَ ئے ؟ دُژمن کرّ ءَ گولی درمان لوٹ ئے،اِے مئے دُژمن اَنت ۔ھمے وڑ ءَ روچ گْوست ءُ شپ بوت اَتک اَنت من ءَ گولی ءُ درمان اِش دات ۔من ءَ سوچِن اِش جت ۔ منی تبیت کمّو وشّتر بوت۔ منی تبیت ھمے واستا ھراب بوتگ اَت، کہ آپانی تہ ءَ پٹرول ءُ ڈیزل مان اَت۔ ورگانی تہ ءَ بد بویے آیگ اَت۔ ھمے وڑ ءَ من ءَ دو سال سرجم بیگ ءَ دو روچ پش کپتگ اَت کہ یک مردکارے اَتک من ءَ گُشت ئِے ترا یل بِہ دے اِیں تو چی کن ئے؟ من گْوشت من یل بوت آں گربی یے کن آں ۔من ءَ پد ءَ گْوشت ئے ترا ھِچّ وڑیں سیاسی ءُ سِلاھبندیں تنظیماں دو وار(دوبارہ) ءَ دست مہ بیت، اگاں تئی شکایتے اَتک ما ترا کُش اِیں۔ شپ بوت منی کرّ ءَ اَتک اَنت بیا ما ترا کُشگ ءَ بَراِیں،من ودار ءَ را گلائش کُت، منی چمّ اِش بَست اَنت ءُ گاڑی ءَ سوار اِش کُت دگ ءِ (سڑک) ءِ لمب ءَ آؤرت ءُ یل اِش دات، بلے برے برے انگت من ءُ زِندان ءِ ھیالانی اندر ءَ ھم تْران باں ءُ بازیں اکسے وت ءَ بْرھنگ کنت ۔ ھمے بْرھنگیں اکسانی پُژدر ءَ نوکیں کِسّھے سرکشّ اِیت ءُ من ءَ ھمے توکل ءَ دنت تو وَ چہ زُوراک ءِ کھرشانیں زِندان ءَ آجو بوت کُت ، بلے ودار ءِ ھمراھی ءَ دِگہ ھزاراں ودار ، ودار ءِ شپ ءُ روچاں ڈکّ دنت ۔ پمیشکا من گْوش آں چہ آجوئی ءَ ابید اے ودار پہ بلوچ راج ءَ کدی آسر نہ بیت ، گھ ھمیش اِنت ما کُل بلوچ راج ءِ پُسّگ راجی آکبت ءَ جُھد ءِ بھر بِہ بَہ اِیں دانکہ اے ودار پہ ابد ھتم ءُ گُٹگِیر بِہ بیت ، اگاں نا گُلامی مارا پہ مُدامی بیگواہ کنت ۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: بلوچی گوں بے دوازدھیں آباں

ندکار: ابدلستار بُگٹی

دی بلوچستان پوسٹ

بازیں رد ءُ ناسرپدیں مردم ھست انت کہ وت ءَ بلاھیں استاد لیک اَنت۔ ھمے نابود چَہ من ءَ مُدام لھتے اجبیں جُستاں کن اَنت، انچوشکہ
1- بلوچی نبشتہ کاری ءَ اَربی یا تازی آب چی ءَ کارمرز نہ بنت؟
2- اگاں ما اَربی آباں ماں بلوچی نبشتہ کاری ءَ کارمرز مہ کن ایں گُڑا بلوچانی اسلامی نام ماں زگریں بلوچی ءَ بدل بنت چریشی ءَ ما گُناھگار بہ ایں؟
3- سید زھور شاہ ھاشمی ءَ وتی نام چی ءَ گوں اَربی آباں نبشتگ۔
بزاں اے سَےئیں جُستانی پسّواں من مُدام یک یکی ءَ ھمے ناسرپدییں استاداں درشان کن آن ءُ آیاں وتی زانتکاری ءِ کچ ءَ سرپدی دیگ ءِ تچ تاگ کن آں بلے نی من لوٹ آں کہ مرچی یک نبشتانکی ءِ دورشم ءَ اے وڑیں جُستانی پسّواں راج ءِ دیم ءَ بیار آن ءُ پد ءَ گوں من ھم درپ بہ بنت کہ اگاں کسے چَہ من ءَ اے وڑیں چیزاں جُست بہ کنت گُڑا من کاپی اینڈ پسٹ ئِے کن آن ءُ دیم ءَ ایر ئِے کن آں آ وت بہ وان ایت ئِے۔ البت اگاں اَگل ئِے ھست گُڑا سرپد بیت اگاں بے اَگلیں باسکے گُڑا ھجبر پوہ نہ بیت۔
چوناھیگا ما وَ زان ایں کہ لھتیں مردماں ماں بلوچ چاگِرد ءَ بے کساس پورتای کتگ ءُ راج اش بے کساس تُرسینتگ ءُ رد داتگ پمیشکا مارا سرپد اش کنگ ءَ بے کساس جُھد لوٹ ایت داں وھدیکہ ما آیاں پروش مہ دے ایں چی ءَ کہ اے وڑیں مردم مارا راجی زبان ءِ بابت ءَ رَد دیگ ءَ انت۔نی من ھمے جُستانی پسّواں دے آں۔

پسّو لمبر #1: اگاں اے اَربی آب انت گُڑا اے آبانی ماں راجی زبان بلوچی ءِ نبشتہ کاری ءَ چے کار ءُ درکاری یے ھست۔ مئے راجی زبان ءِ نبشتہ رھبند چَہ اے بے دوازدھیں آباں پیلو ءُ سرجم انت ءُ گوں بے اے دوازدھیں آباں بلوچی نبشتہ کاری ءَ یک انچیں رنگ ءُ دروشمے ودی بیگ ءَ انت کہ چریشی ءَ مئے راجی زبان بلوچی چَہ پارسی، ھندی، پشتو، سرائیکی ءُ ارابی وڑیں بازیں زباناں گیشترّ براھدار ءُ نویکلائیں دروشمے دار ایت۔ بزاں بلوچی ءِ وتی یک جُتائیں پجّارے ءُ ما ھم ایشی ءَ زگر دارگ ءِ جُھد ءَ ایں پمیشکا باید انت ما بلوچ وتی راجی زبان ءَ گوں بے اے دوازدھیں آباں نبشتہ بہ کن ایں ءُ سْیاد ءُ وارساں ھم اے بابت ءَ سرپدی بہ دے ایں کہ راجی زبان ءِ وانگ ءُ نبیسّگ ءَ بے اَربی آباں ھیل گِر انت۔ تچک بِہ بَہ ایں کہ اگاں اَربی اَنت گُڑا گوں بلوچی ءَ ھچ سْیادی نہ دار اَنت انچوش کہ منی ھمُک نبشتانک گوں بے اَربی آبان اِنت ءُ منی نبشتانکاں وانوک جْوان پوہ بیگ ءَ اَنت۔

پسّو لمبر #2: چوناھیگا ما دْراہ راجی زبان ءِ نودربر ایں پمیشکا اگاں ما گپ ءِ سرپد بوگ ءِ جُھد بہ کن ایں کہ اے بنگالی، کشمیر، کُرد، تُرک، ملیشیا، انڈونیشیا، ھیدرآباد دکن ءِ ملائیلم یا توری چَچنیا، تیوگیں یورُپ، کینڈا، گوریچی ءُ زِرباری امریکہ ءُ انگریز ءِ مسلمان چی ءَ وتی مسلمانی ناماں گوں وتی زبان ءِ آباں نبیسّ اَنت۔ آ چی ءَ گُناھکار نہ بنت ءُ ما بلوچ چی ءَ گُناھکار بہ ایں!!؟ گیدی ءِ ھمے راج ماں وتی راجی زباناں اے “اسلم الیکم، زپراَلہ، ابدلکادر، مھمد کاسم، ایسا، موسا، مُستپا، مُرتزا، اَلی اھمد۔۔۔۔۔ ءُ کُران” نبیس اَنت چی ءَ گوں اَربی آباں نبشتہ اش نہ کن اَنت۔ اگاں آ وتی زباناں دوست دار انت ءُ وتی زبان ءِ آباں گوں نبیس انت گُڑا آ بے گناہ اَنت زاناں بلوچ گُناھگار بیت۔۔۔؟
چوناھیگا لھتیں پیگمبرانی اولی ءُ راستیں نام مھتر جیکب، موزس، جیزس۔۔۔۔ ءُ ابراھام انت گُڑا ھمے ارباں چی ءَ مھتر یاکوب، مھتر موسا، مھتر ایسا ءُ مھتر ابراھیم کتگ اَنت۔ اگاں “ھُدا” ءِ جِند نام ءَ ھر راجے وتی زبان ءَ گْوش ایت ءُ نبیس ایت انچوشکہ سندھی ھُدا ءَ را ” مولا سائین” انگریز “لارڈ” امریکی مسلمان “گاڈ” پارسی “ھاوند” ھندی ” خُدا” ءُ نہ زان آں کہ اے بنگالی، کشمیر، کُرد، تُرک، ملیشیا، انڈونیشیا، ھیدرآباد دکن ءِ ملائیلم ءُ چَچنیا ءِ مسلمان ماں وتی زبان ءَ”ھُدا” ءَ چے گْوش اَنت گُڑا ھمے چی ءَ گُناھکار نہ بنت؟؟؟
راستی وَ ایش انت کہ ناں ھمے نام گْوشتگیں راج گُناھکار بنت ءُ نیکہ ما بلوچ بے اَربی آباں گُناھکار بہ ایں بلکیں گُناھکار مردم چَہ وتی رد کُتگیں کاراں بنت۔

پسّو لمبر #3: منی دوزواھیں سنگتاں، منی راج ءِ گْوھار ءُ براتاں سید ءَ وت ھچ جاہ ءَ وتی نام “ظھور” نبشتہ نہ کُت بلکیں گوں اَربی آباں دگراں نبشتگ۔ شُما سید ءِ بلوچی سْیاھگ راست نبیسّگ ءِ چارمی در ءَ بہ وان گُڑا شما زان اِت کہ اے دوازدھیں آبانی بارو ءَ چے گْوشتگ ئِے؟ کہ مارا اے لھم لھم ءَ یلہ کنگی اَنت۔ اگاں ما یکپارگی ایشاں بہ کش ایں گُڑا نیکراھیں مردم گُڑ اَنت۔ اگاں وت ھم نبیس اِت ئِے پد ءَ ھم مارا کشگ بنت۔
پہ ایشی ءَ گیشتر سرپد بیگ ءَ باید انت ما بلوچی سْیاھگ ءِ راست نبیسّگ در لمبر 4 ءُ تاکدیم لمبر 39 ءَ بہ چار ایں کہ اود ءَ نمیرانیں بلوچ راج ءِ ھستی سید ھاشمی ھمے دوازدھیں آبانی بابت ءَ چے گْوشتگ زاناں ما بے ھیال ایں؟
سید ءَ گْوش ایت “۔۔۔ مئے دل سک لوٹ ایت کہ ما اے نام ھم چوکہ آدگہ گالاں، بلوچی گالوار ءُ رھبند ءَ نبشتگ اِت انت۔۔۔۔۔اگاں محمد محمود، جعفر عبدالعزیز۔۔۔۔علی محمد ءُ محمد سعید ءِ رنگیں ناماں بلوچی گالوار ءَ مھمد مھمود، جاپر عبدل ازیز۔۔۔۔اَلی مھمد ءُ مھمد سئیت بہ نبیسّ ایں کمیں بے تام ءُ براہ بنت پمیشکا ایشاں انوں وتی بُندریں رنگ ءَ نبیسّگ ءَ ایں۔۔۔” پد ءَ گْوش ایت
“اے گپ ءَ من شَر زان آں کہ ھر یک چیزے ءَ تو نوکیں رنگے بدے ئے یکبرے ترا اجکّہ کنت بلے کمّ کمّ ءَ کہ مردم ھیل گپت ھمے نوکیں چیز ءِ نوکی کْوھن ترّ ایت ءُ مردم گوں ایشی ءَ شری سیل ایت۔ اے نام ھم کمّ کمّ ءَ تریناں کنگ بنت تاکہ نیکراھی مردماں یکپارگی مہ گڑین اَنت پمیشکا پہ نامانی ترینگ ءَ باوست نہ لوٹ ایت”

بزاں مارا اے نام وتی بلوچی سْیاھگ ءِ ھساب ءَ نبیسّگ بنت انچوشکہ گیدی ءِ دگریں راج وتی مسلمانی ناماں گوں وتی زبان ءِ سْیاھگ ءِ رِد ءَ نبیس اَنت۔ بزاں من وتی Abdul Sattar Bugti ئیں نام ءَ ھمے داب ءَ نبیسّ آں گُڑا من گُناھکارے نہ آں اگاں من “ابدلستار” نبیس آن ئِے گُڑا من گناھے کتگ، بلوچ ھراب ءُ انگریز شَر!! واہ اڑے بلوچ تئی اَگل ءَ!!
گڈسری من گْوش آں کہ کشمیری زبان ءَ “ص” ءِ آب نیست انت گُڑا ھمے کشمیری” ﷺ”، “سادک”، “پیسل”، “سھابی” ءُ “سابر” وڑیں اَربی نام ءُ گالاں چون نبیسّ اَنت۔۔۔؟ گُڑا کشمیری ھم گُناھکار اَنت۔
انچوشکہ کہ سید ھاشمی ءَ گْوشتگ کہ مارا کمّ کمّ ءَ اے نام ترینگی اَنت باید انت نی ما منّ ایں کہ وھد باز گْوستگ پمیشکا ما اے اَربی آباں ماں بلوچی نبشتہ کاری ءَ کارمرز مہ کن ایں۔

بلوچ زندگ بات ءُ بلوچی زبان بے کسّاسیں دیمرویاں سر بات۔ شالا انچوش بات۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت