TBP Balochi

کراچی ءَ دگہ بلوچ چاگرد کارے بیگواہ

دی بلوچستان پوسٹ

چریشی ءَ پیسر چاگردی گل اوست ویلفیئر ءِ سیکرٹری جنرل کراچی ءَ پاکستانی پوج ءُ چیریں ادارھانی کارمنداں آوار جتگ ءُ برتگ –

ٹی بی پی پترھال ءَ سر بیتگیں ھالانی رد ءَ سندھ ء بنجاھی شھر کراچی ءَ چہ پاکستانی پوج ءُ چیریں ادارھانی کارمنداں بیڑ برتگ ءُ چاگردی گل “اوست ویلفیئر ” سرکماش مھم جان دشتی دزگیر اِش کرتگ ءُ برتگ –

زانگ بہ بیت چریشی ءَ پیسر اوست ویلفیئر ءِ سیکرٹری جنرل وپا بلوچ نُھ جولائی دوھزار ءُ بیست ءَ کراچی ءَ پاکستانی پوج ءُ چیریں ادارھانی کارمنداں دزگیر کرتگ ءُ بیگواہ کرتگ –

بلوچستان ءَ ابید سندھ ءَ ھم بلوچ سیاسی ءُ چاگردی باسکانی بیگواھیاں گیشی اتکگ –

اوست ویلفیئر ءِ سرکماش مھم جان دشتی ءِ پاکستانی پوج ءُ چیریں ادارھانی دست ءَ آوار جنی ءِ سر ءَ بی ایس او پجار ءِ رھشون گورگین بلوچ ءَ گْوشت کہ راجی کمک کنوکیں مردمانی زندمان ھم مھکم نہ اِنت –

دومی نیمگ ءَ وائس فار بلوچ مسنگ پرسنز ءِ سرکماش نسر اللہ بلوچ ءَ گْوشت کہ گل ءَ ھال سر کنگ بیتگ کہ نُھ جولائی ءَ چاگردی گل “اوست ویلفیئر ءِ سیکرٹری ابدلکیوم ءُ گوستگیں روچ ءَ کراچی ءَ چہ اوست ویلفیئر ءِ سرکماش مھم جان دشتی کہ آوار جنگ ءُ بیگواہ کنگ بیتگ اَنت اشانی بیگواھی پدردی ءِ –

نسر اللہ بلوچ ءَ گوشت ابدلکیوم ءُ مھم جان دشتی ءَ اگاں گیرکانودی کارے کرتگ گڑا آیاں آمدگس ءَ پیش بہ کن اَنت ءُ ڈیھی کانودانی رد ءَ جُست ءُ جستگیری بہ کن اَنت اے وڑ ءَ بیگواہ کنگ ءُ کھول ءِ مردمانی پریشاب کنگ انسانی ھکانی لگتمالی اِنت –

چین – ایران ءِ ھمدستی ءُ بلوچستان

ٹی بی پی شونگال

گوستگیں ھپتگ ءَ 18 تاکی ایں یک تاکبندے ءِ ایرانی رسانکدراں گندگ بئیگ ءَ اَت، نیویارک ٹائمز ءَ ھم یک نبشتانکے شنگ کرتگ اَت ءُ شنگ بیتگیں تاکبند ءَ ایران ءُ چین ءِ میان ءَ بیتگیں ھمدستی گوشتگ اَت- تاکبند ءِ رد ءَ آؤکیں بیست ءُ پنچ سالانی تھءَ چین ایران ءَ 400 بلین ڈالر ءِ زرکاری کنت، وھدیکہ چریشی ءِ مَٹ ءَ ایران چین ءَ را کم نھادی ءَ تیل دنت –

شنگ بیتگیں ھمدستی تاکبند ءِ ردءَ چین بینکنگ، ٹیلی کام، پورٹس، ریلوے ءُ ایرانی لشکر ءِ گون ءَ زرکاری کنت – ھمدستی ءِ تہ ءَ ھمسنتی ءِ اسٹریجک کمکی ءَ ھردوکیں ڈیھانی چیرھالانی گِر ءُ دار ءُ ھمسنتی ءَ جنگی ھیلکاری کنگ بنت – وتی وھد ءُ دور ءِ تہ ءَ اے ھمدستی نوک نہ اِنت، چین ءَ ایران ءِ گون ءَ دوستی ءِ لِچوکے ءَ بازیں وھدے ءَ چَہ زانگ بیتگ اَنت – چین ءَ چریشی ءَ پیسر ھم ایران ءِ گون ءَ زرکاری کرتگ بلے آ امریکا ءِ بندشانی سبب ءَ نیزورتران بیتگ –

جتائیں ھالانی تہ ءَ، چین ءَ کرتگیں ھمدستی پیسر ءَ ھم 2016 ءَ ایران ءَ پیش گپی کرتگ، بلے اوبامہ ءِ وھد ءِ سرکار ءَ ایران ءِ اُمیتانی سر ءَ یک کَرنے ءِ دیمپانی گندگ ءَ آیگ ءَ اَت کہ آئی ءِ گپ ءُ ترانی امریکہ ءِ گون ءَ بیت اَنت، وھدیکہ امریکہ ءَ ایران ءِ سر ءَ لھتے بندش ھلاس کرتگ اِت اَنت ءُ ھردوکیں ڈیھانی میان ءَ یک جوھری دزنویسی ءِ بیتگ اَت – ھمے سوب ءَ ایران چین ءِ گون ءَ ھمدستی کنگ ءَ لرزگ ءَ اَت، ءُ ھما سال ءَ ایران ءَ ھندوستان ءِ گون ءَ جتائیں ھمدستکاریانی سر ءَ دزنویس کرتگ اَت – بلے ایران ءِ بارو ءَ ٹرمپ ءَ پالیسی ترند کرتگ ءُ ایران ءَ چین ءِ گون ءَ بازیں وھدانی ھمدست بیگ ءِ سر ءَ دزنویس ءِ واھشت کرتگ اَت –

اود ءَ کہ ھندوستان ءَ چھبار – زاھدان ءَ ریل ءِ پروجیکٹ ءِ کشگ ءِ ھالانی شنگ بیگ ءِ سیادی، آ درست دروگ ءُ ھاک ءُ پُر – ایران ءَ اے گپ رد کرتگ ءُ گوشتگ کہ ریل ءِ پروجیکٹ ءِ سر ءَ آئی ءَ ھچبر ھندوستان ءِ گون ءَ سرجمی ءِ ھمدستکاری نہ کرتگ، ھاں ھنچش “ایم او یو ” ءِ یک ھشکیں تاکے ءِ سر ءَ یاتگیری ءِ واستا دزنویس کنگ بیتگ –

آ نِی ھندوستان ءَ پوڑی ءِ دیری ءِ سوب ءَ ریل لائن ءَ وت بندات کنت – ایران اے ریل لائن ءِ سر ءَ دوھزار ءُ یانزدہ ءَ چَہ کار کنگ ءَ اِنت، ھنچُش ھال ھم بیتگ کہ روس ءِ نیمگ ءَ ایران ءَ پنچ بیلین ڈالر وامانی رسگ ءَ پد نِی ایران ءِ سرکار پُرامیت اِت اِنت کی اے پروجیکٹ 2022 ءَ داں سرجم بیت اِنت پرچاکہ ایران وتی راجمانی دیمروی پوڑیاں چَہ اے پروجیکٹ ءِ سر ءَ 300 ملین ڈالر ھرچ کنگ ءَ اِنت –

تنی وھدی ھندوستان سرجمی ءَ چھبار ءِ پورٹ ءَ کارمرد کنت، چھبار- زاھدان ءَ ریل ءِ پَٹری ءِ نپ مپت ءَ ھندوستان ءَ رس اَنت – چین ءَ ایران ءِ جاڑیگ بیگ المی ءَ ھندوستان ءِ لوٹانی دیم ءَ دیمداری بیت کنت پرچاکہ چین پیسر ءَ چَہ ھندوستان ءِ سر ءُ پیچاں اے وڑیں پورٹسے ءِ دام چیر کرتگ – اے ھمدستی ءَ الم چین ءِ واستا رودراتکی در گیش پچ بنت ءُ آ دمگ ءَ ھستیں گوازی ءِ تہ ءَ یک مھکمیں سوبمندیں گوازی کارے جوڑ بیت – راجدپتر ءَ اولی رند ءَ چین ءَ دنیا ءِ گون ءَ جوانیں ”چوک پوائینٹس” ءَ چہ یک (آبنائے ھرمز) ءِ سر ءَ سرجمی ءَ نشت کنت –
یک نیمگے ءَ دلگوش کرزیں گپے ایش اِنت کہ اے دراھیں ھمدستیاں چَہ بلوچ ءُ بلوچستان ءِ سر ءَ کنگ پَرک چی بیت؟ چین ءَ بلوچستان یا کش ءُ گوراں جاڑیگ بیگ کجام ھم وڑ ءَ بلوچانی واستا شری ءِ نہ بیتگ – اے ھمدستی ءَ چَہ چین ءَ ایران ءِ سر ءَ اسر گیشتر بنت ءُ اے مال ءِ مپت نہ اِنت کہ رودراتکی بلوچستان ءِ رنگ ءَ آ روکپتی بلوچستان ءِ مڈیاں دست مان کنت –

یک نیمگے ءَ گوادر پورٹ پیسر ءَ چَہ چین ءِ کنٹرول ءَ اِنت اے گمان رد کنگ نہ بیت کہ چین چھبار ءِ پورٹ ءَ ھم وتی کنٹرول کنگ ءِ جھد ءَ کنت – اے ھردوکیں پورٹ بلوچ سرڈگار ءِ سر ءَ اَنت – چین ءِ بیلٹ اینڈ روڈ ءِ شوربندی ءَ یک مزنیں شوربندی ءِ نہ اِنت۔

بلکیں چین جنوبی ایشاء، رودراتک ءَ پد، افریقہ ءُ رودراتکی ڈیھانی مزنیں بندرگاھانی سر ءَ وتی دست ءَ رسین اِیت، یک ”تیابی راھے گشین اِیت ” جوڑ کنگ لوٹ ایت –

روکپتی بلوچستان یا رودراتکی بلوچستان، اود ءَ ھرچی کہ چین ءِ لوٹانی پد ءَ ساچگ بیت، اشانی پھزداری ءِ واستا اود ءَ چین ءِ جاڑیگ بیگ ھنچش گیش بیت، ءُ اے دمگ ءَ اگاں کسے سرجمی ءَ چین ءِ ھلاپ ءَ جنگ کنگ ءَ اِنت، گڑا آ بلوچ بیت اِنت پرچاکہ آ چین ءِ جاڑیگ بیگ ءَ وتی راجمانی ءِ لوٹانی ھلاپ سرپد بیت اِنت –

رودراتکی بلوچستان ءَ بلوچ سلاہ بندیں گلانی وڑیں ھنچش کہ بی ایل اے ءَ بازیں براں چین ءِ لوٹ نشانگ کرتگ اَنت، روکپتی بلوچستان ءَ ھم بلوچ راجی بنکی لوٹ ءُ آجوئی ءِ ھمسواریں جزبگ ءَ داریت – چین ءِ دمگ ءَ نوکیں جاڑیگ بیگ، چین ءُ بلوچ ءِ میان ءَ یک نوکیں جنگے ءِ بندات بیت کنت –

ایران ءَ گیرکانودی ءَ رؤکیں 170 پاکستانی دزگیر

دی بلوچستان پوسٹ

سر بیتگیں ھالانی رد ءَ ایران ءَ رؤکیں 170 پاکستانی ایرانی لشکر ءَ دزگیر کرتگ ءُ واتر پاکستان ءِ لشکر ءِ دست ءَ داتگ اَنت –

لیویز بنشون ءِ رد ءَ ایرانی لشکر ءَ بلوچستان ءِ سیمسری دمگ مند ردیگ ءَ 170 پاکستانی ایرانی لشکر ءَ واترینتگ اَنت ءُ مئے دست ءَ داتگ اَنت –

لیویز بنشون ءِ رد ءَ دزگیر بیتگیں مردم چریشی ءَ پد تمپ ءَ برگ بیتگ اَنت –

لیویز بنشون ءِ رد ءَ درانڈیھاں رؤکیں پاکستانیانی سیادی پاکستان ءِ اُستان پنجاپ ءُ کے پی کے ءَ اِنت کہ گیرکانودی ءَ ایرانی سیمسراں پُتریتگ اَنت –

چہ کراچی ءَ سرمچارانی دزگیر کنگ دروگ ءُ پندلے ۔ براس

دی بلوچستان پوسٹ

آجوئی ءِ چار جنگی گلانی ھمسنتی ءِ گل ، بلوچ راجی آجوئی سنگر ( براس ) ءِ جارکش ، بلوچ ھان ءَ ناشناسیں جاھے ءَ جار پِرینتگ ءُ گْوشتگ کہ گوستگیں روچ ءَ کراچی ءِ پولیس ءِ نیمگ ءَ ” براس ” شش سرمچارانی دزگیری دروگ ءُ پندلے ۔ براس اے وڑیں دروگاں ایر جنت ۔

بلوچ ھان ءَ دیمتر ءَ گْوشت کہ 18 جولائی ءَ کراچی ءِ گربی ایس ایس پی فدا حسین ءَ یک پریس کانفرسے ءَ تران کنان ءَ گْوشتگ ” براس ” ءِ شش سرمچار دزگیر کُتگ ءُ آیانی نام شنگ کُتگ اَنت ۔ بلوچ راجی آجوئی سنگر ءِ ھچ وڑیں سرمچارے گرگ نہ بوتگ ۔
دزگیر بوتگیں مردم گوں براس ءَ ھمگرنچ نہ اَنت بلکیں لَس مردم اَنت ۔

ما پمیشکا راستی ءِ پدر کنگ ءَ پہ وت زلوری سرپد بیں کہ گرگ ءُ پدر کنگ ءِ درچ پاکستان ءِ پندلانی بھرے ، گوں سرمچاراں مُدتے ءِ جنگ ءَ پاکستانی فوج ءُ چیریں اداراہ وتی بے سوبی ءِ چیر دیگ ءِ واستا لَس بلوچ مھلونک ءَ ھواری ءِ شزا ءِ نشانگ جوڑ کنگ ءَ اَنت ۔ سرجمیں بلوچستان ءَ سرمچارانی اُرشاں رند پاکستانی فوج لس بلوچ میتگانی سر ءَ بمباری کنت ءُ آیاں بلوچ سرمچارانی بُنجل پدر کنت ءُ بے میاریں مردماں بیگواہ ءُ چیریں جاھاں چیر دنت ءُ آیاں گوں سرمچاراں ھمگرنچ کنت ۔ بازیں جاھاں پاکستانی فوج ءُ چیریں ادارہ بے بُنیادیں دو دیمی جنگ ءَ لس مردماں کُش اِیت ءُ آیاں سرمچار پدر کنت یا ھمے پولیس پریس کانفرس ءِ وڑ ءَ آیانی دزگیری ءِ جار ءَ جنت ءُ لس مردماں دروگیں میار لڑ اِیت ءُ گُبار اِیت ۔ اے پاکستان ءِ بلوچانی کُشگ ءُ ھواری شزا ءِ پندل اِنت ۔

یات بہ بیت بلوچ راجی آجوئی سنگر ، ( براس ) چار بلاھیں آشوبی سلاہ بندیں گَلانی ، بلوچ لبریشن آرمی ، بلوچستان لبریشن پرنٹ ، بلوچ ریپبلکن آرمی ، بلوچ ریپبلکن گارڈ ءِ یکُمشتیں گَلے ۔

نبشتانک: من کجا زندگ آں

نبشتہ کار: شکیل اعظم

دی بلوچستان پوسٹ

من مرتگ آں ، منی مات اتکگ سرون ءَ ارس گوارگ ءَ اِنت ۔ پت ءِ دست سُھر اَنت در ءِ دپ ءَ اوشتاتگ ءُ بے ترک ءُ توار اِنت۔سیگریٹے بن ءِ داتگ ۔مات ءُ گھاراں گر ءُ نِھر اَنت کہ موت بنی آدم ءِ سر ءَ برھک اِنت ۔اگاں پہ ارس گورگ ءَ بنی آدم واتر بوتیں گڑا ھانل ءِ بیران بوھگ ءَ بالاچ دانکہ سئے روچ ءَ گریتگ اَت واتر بلے
۔۔ من پت ءِ دْرستیں گپاں اشکنگ ءَ اِت آں ۔سازیں وتی دست منی پیشنی ءِ سر ءَ ایر کتگ اَت ۔سر ءَ ھارینگ ءَ اَت ۔مات ءَ درائینت منی چک پاد ءَ ڈن ءَ بچار کہ میتگ ءِ مردم اتکگ اَنت تئی جوان ءِ برگ ءَ ۔من چمشانک دات ٹیبل ءِ سر ءَ دوشگیں چراگ روک اِنت ۔لھتیں کاگز ٹیبل ءِ اے کر ءُ آکر ءَ کپتگ اَت ۔منی دیدگ گس ءِ تہ دیوال ءِ دیم ءَ ھانل ءِ پاھو داتگیں اکس ءَ دوچار بوت اَنت ۔ آئی ءِ پُرشتگیں چمانی تہ ءَ جستانی یک لھڑے سَھرا اَت۔
آئی دل ءِ اندر ءَ گدان ءِ پیشگاہ ءَ گمرتگیں دْرچکے ءِ بنڈ ءَ یک مردمے نشتگ ءُ مازگ بندگ ءَ اَت۔
آئی مازگ ءِ بزانت کہ زند ءِ جند یک دروگے یا وھد زولی ءِ۔۔
ھمے وھد ءَ ماھل اتک ءُ درائینت لالا تئی چاہ اِنت ۔من بست کت کہ منی سیگریٹ ءُ کتاب منی کش ءَ ایر اِت اَنت ۔پُرچنڈ اِت اَنت پُر کمبل ءِ سر ءَ رِتک اَنت ۔کسہ نہ سرجم اَت من جیڑگانی بازار ءَ کسہ ءِ کارست ءِ شوھاز ءَ اِت آں۔ماھل پدا درائینت لالا تئی چاہ سرد بوت دگہ چاھے بیار آں؟؟
من آئی ءِ سر ءَ براز گپت آں کہ من ءَ بل وت ءَ چہ وت باں ۔کہ گوں زندمان ءِ ابیتکی ءَ تران کن آں۔ انچو کہ گوتم بد چہ گس ءَ در کیت وتئی زندمان ءِ ابیتکی ءَ شوھاز ءَ سر ءُ پاد جنت۔
من لوٹ آں زندگ بہ مان آں ۔بلے۔۔۔۔۔۔ رسول حمزہ توف گش اِیت من اگاں زندگ آں یا مرتگ آں بلے منی ھستی ءِ بستار منی ھمے کتاب اِنت شمے دست ءَ اِنت ۔
ساتر دینا ءِ مستریں شاھزانتکار اِنت ۔آ گش اِیت ھمک بنی آدم ءَ را وجود ھست گڑا آ وتئی وجود ءَ چون دار اِیت آ ھمائی کار اِنت۔۔۔
بلے من انگہ چوشیں کارے نہ کتگ کہ منی وجود بہ مان اِیت۔۔۔
بالاچ اے کسہ ءِ ھما کارست اَت کہ چہ گس ءَ در پہ در اَت ۔ من چو نزاناں کہ کے در پہ در کتگ اَت بلے اِنچو زاناں کہ وتئی کس ءُ اَزیزاں ۔۔۔
ءُ بالاچ ءَ کسہ بنا کت کہ نوک سکی داد مئے میتگ ءِ اولی مردم اَت کہ دو آروسے کتگ اَت ۔چہ اولی آروس ءَ آئی ءَ را یک جنکے ءُ دو بچکیں چک ھست اَت ۔ دومی سور ءَ چار بچک ھست اَت کہ بازار ءِ یلہ چر اِت اَنت۔ آئی یکیں گراں ءُ سنگیں جنک مھناز اَت چہ میتگ ءِ درستیں کاڑاں شوک ءُ شرّنگ اَت۔آئی ءَ را مھرُک ءِ مستریں بچک ءَ گون مھر اَت۔ کہ مھرُک ءِ مرد ءَ را دوسال سرجم اَت بیگواہ اَت۔۔۔ بلے اے او گوْاچیں ھبرے کہ پت ءُ مات گواچینی ءِ وھد ءَ چک ءِ داشتگیں واباں پروش اَنت۔ مئے کر ءَ ملا گُش اَنت کہ چک اللہ ءِ نیمَت ءُ آدم ءِ اولاد ۔۔۔۔
پت ءِ پیری ءِ ھسا بنت۔ بلے سکی داد ءِ چک بازار ءِ مستریں چرسی، بنگی ءُ کنوک ۔ مھرُک ءِ مرد گار ءُ بیگواہ اَت باریں چونیں مردمے اَت ، ترا ءُ من ءَ وتئی بْرات ءِ چک ءَ سانگ کنگ ءِ زبان داتگ ئے انوں منی اِزت ءُ گیرت ءِ مسلہ اِنت۔ آئی ءَ مھناز ءِ واھگ ءُ ارمان ۔۔۔۔۔۔
بالاچ کسہ ءِ کارست ، مدام من ءَ جیڑگانی سپر ءَ رھادگ کنت ءُ وت گار بیت۔ من سیگریٹ بن دات ءُ جیڑگانی سپر ءَ اڑاں کپاں پد ءَ ساتر گیر اتک کہ بنی آدم ءِ وجود ءَ را آئی ءِ اولاد پکار بیت ۔۔۔؟؟
من چہ کسہ ءِ کارست ءَ پُرست ؟
آئی ءَ اگاں اولاد ءَ زندگ بہ کُتیں گڑا واجہ سباہ ءَ را اولاد نیست اَت بلے راجدپتر ءِ مستریں نام اِنت ۔۔۔ ءُ واجہ سیدھاشمی ءُ واجہ عطاشاد ءَ را اولاد ھست ۔اے اولاد مان اَنت یا نہ مان اَنت مانا یک۔۔۔من بلوچستان ءِ مزن شاھدربر جاہ ءَ وانگ ءَ اِت آں۔ ڈاکٹر ایوب ءِ جنک منی ھم تبک اَت۔ ءُ وانگ جاہ ءِ دومی روچ اَت کہ گشتانک ءِ ھاتر ءَ من نودربرانی دیم ءَ اتک آں کہ آئی وتئی چم منی چمانی کَل ءَ دور دات اَنت من ھبکہ بوت آں ءُ آئی ءِ چم زرت اَنت شیشگ ءِ سسرے ءِ تہ ءَ کت اَنت ءُ اندر ءِ ماڈی ءِ کَڑی ءِ دیم ءَ ایر کت اَنت ۔آئی ءَ من ءَ وتئی چمانی سر ءَ نمدی نبشت کہ شر اِنت منی پت بیران بوت منی پت ءِ درور ھما مات گدار ءِ پت ءِ کارست ءِ درور اِنت۔ آئی ءَ مارا چہ دْرستیں ھکاں زبھر کتگ۔انسانے ھم نہ مَنّ اِتگ ءُ سیاست ، وانگ ، نبشتہ کاری ءُ دگہ بازیں ! مھر ءِ گپ نہ بیت۔۔۔۔۔من ءَ گوں وتئی ھم تبک k.D مھر اَت بلے پت ءَ مھر ولگوج کت۔
من آئی پسو نہ دات کسہ نہ سرجم اَت۔ من چہ واب ءَ بست کت کہ آئی ٹکر ٹکریں چمانی تہ ءَ ھمے جست سَھرا بوت کہ منی گناہ ءُ میار ھمیش اِنت کہ من وتئی زندمان ءِ پیسلہ وت کتگ۔پمیشکہ مرچی منی دیوال ءِ دیم ءَ پاھو داتگ اِش ۔۔۔
من سما کت تھاریں بان ءِ تہ ءَ سیگریٹ، چراگ ءُ دیوال ءِ دیم ءِ پُرشتگیں اکس ءُ ابیتکی۔وھدے کہ من ابیتکی ءِ ھمراہ باں ،ابیتکی من ءَ گوں تھنائی ءَ دوچار کنت ۔وت ءَ را تھاری ءَ اندیم دنت ءُ گار بیت ءُ تھنائی من ءَ جیڑگانی بازار ءَ سر کنت ءُ من ءَ جیڑگ ءَ لاچار کنت کہ پرچا ابیتکی من ءَ وتی سنگت نہ کنت۔۔۔۔۔۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

شال ءَ سلاہ بندانی تیرگواری ءَ یک مردمے بیران

دی بلوچستان پوسٹ

دی بلوچستان پتر ھال ءَ سر بیتگیں ھالانی رد ءَ شال ءَ سریاب مل ءِ نزیک ءَ رکشہ ءِ سر ءَ ناشناساں تیرگواری کرتگ ءُ یک مردمے کُشتگ –

بیران بیتگیں مردم ءِ پجار بکتیار ء گزی مری ءِ نام ءَ زانگ بیتگ –

دمگی مردمانی رد ءَ بکتیار مری ءِ سیادی پیسر ءَ یک سلاہ بندیں گلے ءَ بیتگ کہ آئی ءَ پاکستان ءِ دیم ءَ سلاہ چگل داتگ اَنت –

زانگ بہ بیت سلاہ چگل دیوکاں گیشتر بلوچستان ءِ آجوئی لوٹوکیں گل نشانگ کنگ ءَ اَنت بلے تنی وھدی شال ءَ کُشتگیں بکتیار ءِ کوش ءِ زمہ واری ھچ گل ءَ نہ من اِتگ –

کراچی ءَ براس ءِ شش باسک دزگیر کرتگ پاکستانی پولیس ءِ ٹاہ

دی بلوچستان پوسٹ

پاکستانی پولیس ءِ ٹاھانی رد ءَ کراچی ءَ اُرشے ءِ مزنیں شوربندی ءِ بے سوب کرتگ –

پاکستانی رسانکدرانی رد ءَ سینیئر سپرنٹنڈنٹ آف پولیس (ایس ایس پی) گربی پدا ھسین جانوری ءَ کراچی ءَ پریس کانپرنس کنان ءَ ٹاہ داتگ ءُ گْوشتگ کہ بلوچستان ءِ چار سلاہ بندیں گلانی ھمسنت “براس ” ءِ شش باسک دزگیر کرتگ ءُ آیاں چَہ سلاہ دزگپتگ –

ایس ایس پی پدا ھسین ءِ رد ءَ دزگیر کرتگیں مردمانی نام شیر ھان، کریم بکش پنام ءِ بگل، دلشاد، موراب ھان پنام ءِ مولو، درھان ءُ ناری ءُ امیر بکش پنام ءِ نری ھوار اَنت –

ایس ایس پی ءَ گْوشتگ کہ دزگیر کرتگیں مردمانی گور ءَ آوان لانچر، پنچ دزبمب، شش آوان بمب، سَے کلاشنکوپ، ھزار تیر دزکپتگ اَنت -وھدیکہ بیڑی ءِ وھد ءَ سَے نائم ایم ایم وتاس گوں تیراں ءُ تراکناکیں شورواں گوں دزکپتگ اَنت –

ایس ایس پی ءِ رد ءَ دزگیر کرتگیں مردماں کراچی ءَ مزنیں اُرشے ءِ شور بندی منّ اِتگ وھدیکہ آ بلوچستان ءِ دمگاں پاکستانی آرمی، فرنٹیئر کانسٹیبلری ءُ لیویز کاروانانی سر ءَ اُرشانی دزمانجنی بیتگ اَنت –

تنی وھدی دومی نیمگ ءَ بلوچ سلاہ بندیں گل ھمسنتی براس ءِ نیمگ ءَ پاکستانی پولیس ءِ ٹاھانی بارو ءَ ھچ وڑیں گپ دیم ءَ نیاتکگ –

شائر: آرپ وپا بلوچ

دی بلوچستان پوسٹ

زروکیں وتن پہ وتن پہ وتن
مروکیں وتن پہ وتن پہ وتن

مئے دردانی آچش چگردی گشئے
ما روکیں وتن پہ وتن پہ وتن

سر ءَ تنگھیناں هزارانی بر
گنوکیں وتن پہ وتن پہ وتن

نہ زان ئے دنیگہ مئے بالاچی ءَ
پَڑوکیں وتن پہ وتن پہ وتن

وتی ما مرادانی سالونکی ءَ
هدوکیں وتن پہ وتن پہ وتن

ما دمبالیں شوره پتو بیتگیں
رچوکیں وتن پہ وتن پہ وتن

نهینگانی هاریں منی جمبگ انت
بروکیں وتن پہ وتن پہ وتن

منی کندگانی شهیدی گلیں
شروکیں وتن پہ وتن پہ وتن

اے استال سهیل ءُ ترپیں کلکش ءَ
بلوکیں وتن پہ وتن پہ وتن

من ایمان ءِ گپ ءَ کناں آرپ آں
گشوکیں وتن پہ وتن پہ وتن

زور بیگواہ کتگیں ابدلھئی کرد ءِ گوھار نسرین بلوچ ءَ شال پریس کلب ءِ دیم ءَ وائس فار بلوچ مسنگ پرسنز ءِ بنجل ءَ گپ کنان ءَ گْوشتگ کہ اگاں منی برات ءَ گناھے کرتگ گڑا آئی ءَ آمدگس ءَ پیش بہ کن اَنت، برات ءِ بیگواھی ءَ سرجمیں کھول دردمانی زندمان ءَ گوزگ ءَ اِنت –

آئی ءَ گوشت کہ منی برات ابدلھئی کرد بیست ءُ یک مئی دوھزار ءُ ھژدہ ءَ پاکستانی چیریں ادارھاں کوہ باش ھوٹل بولان ءَ آوار جتگ کہ آئی ءَ یک سالے ءَ گیش گوستگ بلے داں روچ ء مروچی ءَ نا یلہ کنگ بیتگ ءُ نانکہ آمدگساں پیش کنگ بیتگ ءُ نانکہ ارزی ءَ نبشتگ کنگ ءَ اَنت – اگاں آمدگس مُزگیری ءِ واستا جوڑینگ بیتگ اَنت گڑا منی کھول ءَ پرچا مُز رسگ ءَ نہ اِنت؟ –

آئی ءَ گْوشت کہ ما ریاست ءِ شرپداریں شھری نہ اِنت اگاں ما اے ریاست ءِ شھری بوتین ئِے گڑا مئے درد ءُ دردماناں ءُ تواراں پرچا اِشکُنگ ءَ نہ اَنت –

آمدگساں مھلوک مُزگیری ءِ اُمیت ءَ دار اَنت بلے مارا مزگیری ءِ رسینگ ءَ آمدگس پھک ءَ پھک بے سوب بیتگ اَنت –

نسرین بلوچ ءَ گْوشت کہ مئے لوگ ءِ یکیں والینوک منی برات ابدلھئی بیتگ کہ گوستگیں یک سالے ءَ چَہ بیگواہ اِنت اگاں منی برات ءَ کجام ھم گناھے کرتگ یا دزمانجن اِنت گڑا آئی ءَ پاکستانی کانود ءُ رھبندانی رد ءَ پیش بہ کنت یا بازیں بلوچاں ابید آمدگسانی پیش کنگ ءَ یلہ کنت گڑا منی برات ءَ ھم یلہ بہ کنت –

نسرین بلوچ ءَ گْوشت کہ اگاں وھدیکہ کجام لوگے ءَ یکے بیگواہ بہ بیت بس تھنا بیگواہ بیتگیں مردم دردمانانی تہ ءَ ایوک ءَ نہ بیت بلکیں اے دردمان سرجمیں کھول ءَ پَلپٹین اِیت -ابدلھئی کرد ءِ زندمان ءِ سر ءَ ما اولی روچ ءَ چَہ ترسمانی ءَ سما کنگ ءَ اِنت ءُ انگت ءَ مارا آئی ءِ زندمان ءِ سر ءَ تُرس اِنت –

آئی ءَ گوشت کہ اے پریس کانفرنس ءِ زور ءَ چَہ انسانی ھکانی ادارہ، بلوچستان ءِ سرکار، چیف جِسٹس آف پاکستان، سروزیر، آمدگس ءُ سرجمیں مزگیرانی واکانی ادارھانی گون ءَ دزبندی اِنت کہ منی توار ءَ بہ ایش کُن اَنت ءُ بے گناھیں برات ءَ یلہ بہ کن اَنت – ما گیش بیگواھیں برات ءِ درداں اوپار کُرت نہ کن ایں اگاں برات ءَ کجام ھم جرم ءُ گناھے کرتگ گڑا آئی ءَ آمدگس ءَ پیش بہ کن اَنت اے وڑی ءَ مئے کھول ءَ دردمانانی زندمان ءِ گون ءَ بندوک کنگ زُلم اِنت –