TBP Balochi

دی بلوچستان پوسٹ

شال کمبرانی دگ ءِ سر ءَ ناشناسیں سلاہ بندیں مردمانی تیرگواری ءَ سَے مردم ٹپی بوتگ ـ

ٹی بی پی پتر ءَ سربوتگیں ھالانی رِد ءَ بلوچستان ءِ مزن شھر شال ءَ کمبرانی دگ ءِ سر ءَ دربار ھوٹل ءَ ناشُناسیں سلاہ بندیں مردماں تیرگواری کُتگ ـ تیر گواری ءِ آسر ءَ مقبول احمد، بابا شاھوانی ءُ فاروق کمبرانی نامی مردمے ٹپی بوتگ ـ

ٹپی بوتگیں مردم ھما دمان ءَ شال ءِ سیول ھسپتال ءَ برگ بوتگ انت ـ

تیرگواری وئیل زانگ نبوتگ کہ کجام سوب ءَ اشانی سر ءَ تیرگواری کنگ بوتگ ـ

سر بیتگیں ھالانی رد ءَ مند ءِ دمگ گیاب ءَ پاکستانی پوج ءَ بیڑ برتگ لوگانی پَٹ ءُ پول بندات کرتگ –

دی بلوچستان پوسٹ

اھوالکار ءِ رد گیاب ءِ بازار ءَ مروچی سھب ءَ پاکستانی پوج مانریتکگ ءُ لشکر کشی کنان ءَ لوگ لوگ ءَ مانریچان بیتگ ءُ میتگ ءِ سرجمیں لوگ پَٹ ءُ ھنڈ اِش کرتگ اَنت –

اھوالکار ءِ رد ءَ گوستگیں سَے روچاں مند ءِ جتا جتائیں جاھاں پوجی لشکر کشی برجاہ اِنت ءُ گوستگیں روچ ءَ مند گوبرد، گوک، ھوزی ءُ دگہ ھند ءُ دمگ پَٹ ءُ ھنڈ کرتگ اَنت –

اھوالکار ءِ گوشگ اِنت کہ پوج ءَ میتگانی مھلوک ءِ پجار کاڈ پچ گپتگ ءُ نام نبشتگ کرتگ اَنت –

زانگ بہ بیت بلوچستان ءِ جتائیں جاھاں پاکستانی پوج ءِ آپریشن بازیں وھداں چہ برجاہ اَنت ءُ ھمے وڑ ءَ گوستگیں روچ ءَ مشکہ ءِ جتائیں دمگاں ھم پوجی آپریشنانی ھال بیتگ اَنت –

پاکستانی پوج ءِ زوراکیانی پشدر ءَ سیاسی ءُ چاگردی مردمانی گوشگ اِنت کہ پوج ھمک وھد ءَ آپریشن کنت ءُ مھلوک ءِ سر ءَ زوراکی کنت –

نبشتانک: پہ بلوچ نودربراں

نبشتہ کار: سلمان ھمل

دی بلوچستان پوسٹ

بلوچ وانندھانی سر ءَ سرکاری بندش ءِ پُشدر ءَ من
دیریں جیڑگ ءَ بوتگ اَنت کہ چیزے بہ نبشتگ بہ کن آں نودربرانی بابت ءَ پد ءَ نزانتگ کہ چی نبشتگ کنگی انت سر ھال چی بہ بیت چہ کجا بندات بہ بیت چون بندات بیت۔

گوستگیں بیگاہ ءَ من ءَ کسے ءَ ھال دات کہ بیا مزن شھدربرجاہ ءَ وانندھانی راجکاری نند ءُ نیادانی سر ءَ استانی گورنر ءِ نیمگ ءَ بندش جَنگ بوتگ۔
پہ من اے ھبر نوک نہ انت پرچا کہ من سرپد اتاں کہ گوستگیں نیم کرن ءَ چی ما ھمے جاورانی دیمپان اِنت ۔ بلے اے بندش ءُ نگیگیں جاورانی دروشم وھد وھد ءِ سر ءَ بدل ھم بوتگ اَنت ۔ چوش کہ ما ایردستیں ءُ ایر دستاں پہ ھبر کنگ بند انت۔ ھبر کُرت بزاں واجہ ءِ سلاہ بنداں ترا رُپت ءُ سیاھیں کوٹیاں چگل دات۔
کَے انت کہ سیاھیں کوٹیاں بند بوگ لوٹ اِیت۔ ابید چہ لھتے دیوانگاں دگہ کس ءَ تھاریں کوٹی دوست نہ بنت۔

دوست نہ بنت نہ بلکیں سیاھیں کوٹی یے نام بئیت جان ءِ پُٹ پاد کاینت۔ لَٹ ھما لٹ کہ اوپار کنگ مہ بنت۔ دژماں ھما کہ گْوش آں گوشدارگ ءِ سِکت مہ بیت بلے بلوچ چاگرد ءِ بھر جوڑ بوتگ اَنت۔ گڑا چوں بہ بیت ھاموش بہ بیت وت ءَ وھد ءِ مُجاں گار بہ کنت ھرچی بیت چو کپوت ءِ وڑ ءَ چماں بند بکن کہ من گندگ ءَ نیاں یا کہ منی نوبت نئیت۔
نہ بلکیں جیڑگ لوٹ اِیت وتی راج ءِ گوست شوھازگ لوٹ اںیت ھما گوست کہ اود ءَ فدا کیچ ءِ چار راھاں روانک کَشگ انت۔

ھمید مچ ءِ زندان ءَ پاھو ءَ چُکگ انت۔
زاکر زندان ءَ ھم زوراک ءِ دیم ءَ چو بلاہ ءَ مِک انت بِلے لاگر کم تاکت انت بلے مھکمیں مردمے۔
ھما نودربر کہ ھمے راجکاری ءَ پہ آوار جَنگ ءُ کُشگ بوتگ اَنت بلے چُپ نہ بوتگ اَنت ھما گیر آرگ لوٹ انت۔ گڑا دیمروئی بیت راجکاری بیت۔ نودربر زانت ءُ زانشت ءَ چہ چکار بنت ءُ راج ءَ پھریز اَنت۔

پرچا کہ راجکاری ءَ چی پُشت کنزگ ءِ متلب ھمے بیت کہ وت ءَ چہ کمتریں مردماں واجہ بوگ ءِ موہ دیگ ءَ ئےاے موہ پہ تو تباھی یے بیت۔ ھما مردم کہ راجکاری ءَ بلد نہ اَنت ھما مردم تئی سر ءَ میلانک بنت۔ ءُ مروچی من کہ جیڑاں مزن شھدربرجاہ ءِ بابت ءَ یا کہ نودربرانی جیڑہ ءُ جنجالانی بابت ءَ من ءَ ھمے گندگ ءَ کیت کہ اے دُراھیں کار نودربراں وت کُرتگ انت۔

نو جُست اے بیت کہ چوں نودربراں وت کرتگ ءَ نودربر چوں وتی راہ ءِ اڑاند جوڑ بوتگ اَنت۔ گڑا من تچک ءَ ھمے گْوش آں کہ مئے نودربر چہ راجکاری ءَ دور بوتگ اَنت آیاں چو کپوت ءِ وڑ ءَ چم بند کرتگ اَنت کسانیں جیڑہ مانیاورتگ انت ءُ گشتگ اے مئے جیڑہ نہ اَنت ءُ کمتریں مردماں سوب کتگ ءُ اتکگ اَنت راستیں ءُ پھتو ءُ زانتکاریں ورنایانی جاہ گِپتگ۔ مروچی ھر چی کہ دل لوٹ اِیت کن انت۔ مروچی بلوچ نودربرانی عکس بندی ءَ کن انت شر یا مزن شھدربرجاہ ءَ راجکاری ءِ سر ءَ بندش جن اَنت۔
بلے انگت یک جُستے مجگ ءَ سُریت کہ اینچو بوگ ءَ پد ھم نودربر تپاک نہ بنت۔ دنیا ءِ دگہ راجاں ھم جھد کرتگ پگری لیکہ اش یک ءِ دومی ءَ چہ جتا بوتگ اَنت بلے راجی ءُ چاگردی جیڑھانی سر ءَ تپاک بوتگ انت، ورناہ دور مہ رو اَنت ھمے چاگرد ءَ کہ زند گوازینگ ءَ انت ھمے پاکستان ءَ وھدے انڈیا ءِ گون ءَ جاور جنگی نوبت ءَ سر بنت گڑا نواز شریپ، عمران، زرداری ءُ فضل الرحمن دُرست یک بنت بلے گندگ ءَ اے وت ماں وتاں ھروچ جنگ ءَ اَنت۔

مروچی ھم وھد انت بلوچ نودربر بہ جیڑ انت اے جاوراں وت ماں وت بہ نند انت یک راھے تچک بکن اَنت کہ مارا اے درگت ءَ چی کنگی انت ؟ من ءَ مولانا عبدالحق ءِ ھبر یاد پیداگ اَنت بی ایس او ءِ مراگشی ءَ گشتگ انت ئِے کہ یکبرے ما ھمے جاگہ ءِ جند ءَ پہ نندگ ءِ وڑ ءَ بہ کنیں آ رندی جیڑھے کہ کَے نماز وان ایت کَے نہ وان اِیت ھیر اے ھبر واجہ ءَ پہ بلوچ آجوئی ءِ جنز ءِ بابت ءَ کرتگ ات اَنت بلے مروچی پہ نودربراں یک دوری یے آ اے ھبر ءَ بہ جیڑ انت اگاں اے وانگی بُنجل ءُ شھدربرجاھاں ما در کَنگ بہ بہ ایں گڑا ما نہ نیشنلسٹ جھد ءَ دیم ءَ بُرت کن ایں نہ سوشلست لیکہ ءَ نہ فیمنسٹ لیکہ ءَ گڑا دُرس یک لانچی ءَ سوار کنگ بہ ایں انچیں دریایے ءَ چگل دیگ بہ ایں کہ پد ءَ درکپگ دروگے بیت۔

راج ءِ نودربر کہ چہ راجکاری ءَ دور بوتگ اَنت آ ھچ کرت نہ کن اَنت بس بُت جوڑ باں باید بلوچ نودربر گَل بہ جیڑ انت کہ مارا راجکاری رکھینگی انت پد ءَ ھر کس کجام لیکہ ءَ منّ ایت یا نہ منّ ایت ھمائی ءِ کار انت۔ شمارا مروچی راجکاری رکھینگی انت دیم ءَ جنزگی انت۔ اگاں نہ چِد ءُ گیش پدمانے۔ شمئے جاگہ ءَ شمارا چی کمتریں مردم گِر اَنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: بے نامیں نبشتانک

نبشتہ کار: شوھاز بلوچ

دی بلوچستان پوسٹ

سر عبدالوحید یک اِلم دوستیں مردمے ، آ وتی الم ءُ زانتی وجہ ءَ زانگ بیت۔ منی ءُ آئی ءِ رشتہ یک طالب علم ءُ استادے ءِ رشتہ اِنت۔
ھمے رشتہ ءِ بدولت ءَ من ءَ آئی ءِ نزیک ءَ گندگ ءُ پھمگ ءِ موہ رس اِت –
آئی ءِ الم دوستی چہ اے گپ ءَ پدر بیت کہ آئی ءَ یک ماھے ءِ سرجیں پگار گوں موٹر سائیکل
ءِ پٹرول ءَ ھلاس بیت۔
آ انگت اسکول ءَ کیت ءُ زھگاں وانین اِیت ، وھدے آئی ءَ مئے ڈیھ ءِ تہ ءَ الم ءِ ڈکالی مار اِت ھمے وجہ ءَ آئی ءَ نال ءِ تہ ءَ یک کوچنگ سینٹرے پچ کت ۔

من ءَ یات اِنت کہ 2012 ءِ گُڈی ماہ ات ءُ مئے مڈل ءِ چکاس ھلاس بوت اَنت ، چُشکہ اسکول ءِ ھمے گُڈی سال اَت مارا جونیئر اسٹوڈنٹسانی
نیمگ ءَ چہ یگ فیئر وِل پارٹی ءِ بندوبست کنگ کپت ، ھمے روچاں کہ پارٹی اَت ما درائیں ھم تبک ساڑی اَت اِیں پارٹی ھلاس بوگ ءَ گوں سر وحید مئے سرجمیں سنگتاناں یکجاہ کرت ءُ
گشت ”من نال ءَ یک لینگوئیج سینٹرے پچ کنگ ءَ آں ”
اے گپ ءِ اِشکنگ ءَ گش ئے مئے تھاریں دل رژن ءَ بوت اَنت ۔ پرچا کہ ھشت جمائت ءَ پد مئے
بازیں سنگتے دگہ ھَند ءُ دمگاں پہ وانگ ءِ واستا روگ ءِ تیاری کرت اَت نوں کہ آیاں سر وحید ءِ گپ اِشکت گڑا آیاں گلے چِت ۔
آیاں وتی روگ کینسل کرت ءُ گشت کہ ما ھمدا وانیں۔

چشکہ ھمے وھد ءَ منی سند ءَ روگ بوت ، ھمے سوب ءَ منی اود ءَ ” داخلہ ” گرگ نہ بوت ۔
بلے دو ماہ ءَ رند وھدے من واتر نال ءَ آھتاں من اِلم ءِ میدان ءَ
سر وحید ءِ وانینتگیں سنگت دیست اَنت من ءَ سِتک نہ بوت کہ اے نزور زھنیں سنگت اے وڑ دیمروی کن اَنت ۔

یک رندے من سنگتے ءَ جُست کُت کجام سینٹر ءَ وانگ ءَ ئے ؟
” آئی ءَ گشت کہ من سر وحید ءِ سینٹر ءَ وانگ ءَ آں ءُ آئی ءِ کر ءَ وانگ باز جوان اِنت ءُ آئی ءِ دگہ گپے ھم ھوار دات کہ اود ءَ تھنا اسکولاں چہ آوکیں طالب اِلم وانگ ءَ نہ اَنت بلکیں مدرسہ ءِ طالب اِلم ھم وانگ ءَ اَنت۔
ھمئے دمان ءَ دل ءَ ھُب کرت ءُ گشت ! کہ ” داخلہ ” بزور وانگ ءِ وھد ھمیش اِنت۔

لھتیں روچ نہ گوست کہ اے ترسناکیں ھبر گوشاں
کپت کہ سر وحید ءَ لینگوئج سینٹر بند کرتگ ءُ ھمے
ھبر ءِ اِشکنگ ءَ پد بازیں اسٹوڈنٹسانی واب پرشت
اَنت ھما اِلم ءِ باگ کہ اود ءَ نوک ردوم زرتگیں نھال رُدگ ءَ اَت پد ءَ ھُشک بوت اَنت ۔

اے لینگوئج سینٹر ءِ بند کنگ ءِ سوب ایش اَت کہ سینٹر ءِ پچ کنگ ءَ گوں سر وحید ءَ دھمکی دے اَنت کہ سینٹر ءَ بند بہ کن چیزے ماہ سر وحید ءَ جھد کرت کہ اے کوچنگ سینٹر بند مہ بیت ۔
بلے آئی ءَ داں دیر ءَ تعلیم دشمنانی دیم ءَ جلّ اِت نہ کرت گڈی ءَ لاچار بوت ءُ اکیڈمی ءِ جند ءِ بند کرت۔
بلے من اد ءَ اے گپ ءَ پوہ نہ
بوت آں کہ اینکسیں پندل بوتگ یک المی دروازگے بند کنگ بوتگ کس ءَ سما نیست اَت !
ھمایاں کہ گُٹ ءِ پُرا “تقریر” کرتگ ءُ گشتگ کہ ما الم ءِ چوکیدار اِیں بلے آ روچاں بے توار اِت اَنت ۔
ھما سیاسی تنظیماں کہ اِلم ءِ نعرہ جتگ آ روچ ءَ آ بے توار اِت اَنت ۔

مرچی پد ءَ سر وحید ءَ اے گپ جت آ روچ ءَ بگر داں روچے مروچی من ءَ ھما ٹولہ ءِ نیمگ ءَ چہ تنگ کنگ بوگ ءَ اِنت ۔ من سیاسی تنظمیاں گوں دست بندی کناں کہ سر وحید “مخلصیں ءُ تعلیم ” دوستیں مردمے آ مروچی تھنا اِنت آئی کمک ءَ بہ کن اِت دانکہ آ پد ءَ اِلم ءِ چراگ ءَ رژناہ بہ کنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بلوچستان ءِ شھر پنجگور گچک ءَ گوستگیں ماھے اگست ءَ بندات بوتگیں پوجی آپریشن انگت ءَ تاں برجاہ اِنت ـ تنی وھدی پانزدہ مردم ءَ گیش مردم پاکستانی پوج ءَ آوار جتگ ءُ گوں وت بُرتگ کہ آھانی تھا پانزدہ مردمے پجار بوتگ ـ

پانزدھین مردمانی پجار الھی بکش ء کمال، سردو ء صدیق، فتح محمد صدیق،محمد خان ء شکو، سردو ء نوک آپ، جمال ء مزار، عبدالستار الیاس، لقمان ء مزار، حبیب ءِ موسیٰ، اسداللہ ء ابراھیم، عزیز ءِ مزار، کالو ءِ پیرداد، وشدل ء سردو، علی شیر ءِ خدابکش، خلیل ء مزار، شھباز خان ء خانجان، مزار ء خالق داد ءُ نذیراحمد ء محمد ھوار انت ـ

اھوالکار ءِ رِد ءَ پوجی آپریشن جتا جتائیں دمگاں انگت برجاہ انت ـ بازیں مردمانی آوار جنی ءِ ھال انت بلے انگت تاں راست نہ بوتگ انت ـ

زانگ بہ بیت گچک ءَ ھوار بلوچستان ءِ جتا جتائیں دمگاں پاکستانی پوج ءِ آپریشن برجاہ انت ـ ھمے وڑ کیچ ءِ دمگ مند گوبرد ءَ گوستگیں دو روچ ءَ پاکستانی پوج بازار ءَ مانریتکگ ءُ لوگ لوگ ءَ پٹ ءُ پول کنگ انت ـ گوبرد ءِ دمگ دو روچ ءَ داں چپ چاگرد ءَ پاکستان ءِ پوج ءِ انگیر ءَ بیتگ اَنت سرجمیں راہ ءُ در پوج ءَ بستگ انت ـ گڈی ھالانی رِد ءَ داں گوستگیں روچ ءِ مگرب ءَ پوج بازار ءَ بوتگ ءُ دمگ ءِ رؤگ آھگے درسیں راہ ءُ در بند کُرتگ انت ـ بلے دنیگتا تاں ھچ وڈیں آوار جنی دگہ مالی تاوانانی ھال نیست ـ

دی بلوچستان پوسٹ

عنقا پبلی کیشنز شال ءِ چیردستی ءَ براھوئی ءُ بلوچی زبان ءَ ھواریں لبزانکی اولی تاک ”درین“ ءِ دیمدراھی ءَ شال ءِ پریس کلب ءَ دیوان کنگ بیتگ -دیوان ءِ سروکی تاک دیم ءِ شنگکار غنی بلوچ ءَ کرتگ – دیوان ءَ اتکگیں مھمان نیشنل ڈیموکریٹک پاٹی ءِ سروک ڈاکٹر حئی بلوچ، وائس فار بلوچ مسنگ پرسنز ءِ سروک نسر اللہ بلوچ ءُ کسان کمک سرکماش ماما قدیر بلوچ دیوان ءِ گچینی ءِ مھمان بیتگ اَنت – دیوان ءِ جار چین زکیہ بلوچ ءَ بیتگ –

درستاں پیسر پروفیسر منظور بلوچ، نوشین قمبرانی، اے ار داد بلوچ، بلوچستان یونیورسٹی بلوچی ڈیپارڑمنٹ ءِ سروک رحیم مھر بلوچ ءُ اقبال ناظر ءَ ”درین “ ءِ دیوان ءَ تران کرتگ – دیوان ءِ سیمی بھر بلوچی ءُ براھوئی ءَ شائری بیتگ کہ آئی ءِ سروکی براھوئی زبان ءِ شائر حنیف بلوچ ءَ وش تبیں رنگے ءَ کرتگ –

دیوان ءَ پروفیسر منظور بلوچ، اے ار داد، رحیم مھر، اقبال ناظر، مزنیں شنگکار یاسر جی ایم ءُ کسان شنگکار غنی بلوچ ءَ بلوچی ءُ براھوئی زبانانی بلوچ لبزانک ءِ نبشتاری ءِ دیمروئی ءِ بارو ءَ وتی ھیال درشانک کرتگ اَنت –

درین ءِ مزن شنگکار یاسر جی ایم ءَ ادب ءِ اژدری ءُ درین ءِ تہ ءَ نبشتگین، براھوئی ءُ بلوچی زبان ءَ ھواریں یک لبزانکی تاک دیمے ءِ اژدری پرچا دیم ءَ اتکگ اشی ءِ سر ءَ آئی ءَ گیشیں گپ کرتگ اَنت –

منظور بلوچ ءَ گْوشت کہ براھوئی لبزانک ءِ دیمروئی ءُ ساپکاری ءِ واستا آجوئیں رسانکدرے ءِ درکار اِنت اے وھد ءَ بیست ءُ یکمی کرن ءَ براھوئی زبان گیشتر لبزانک رسانکدراں گندگ ءَ نئیت – جتائیں ادارھانی نام ءِ سر ءَ ازمکاری ءِ شکساھگ بیگ ءَ اَنت – ھپتاد سال ءِ گوزگ ءَ پد ھم براھوئی آزمانک آ کچ ءَ سر نہ بیتگ کہ ھما کچ ءَ اژدری ءُ درکاری اَنت –

اے ار داد ءَ گْوشت کہ دنیا ءِ دگہ زبانانی وڑ ءَ بلوچی ءَ ھم دیمروئی ءِ گامانی جنگ ءَ بُن لبزانکی سراں جوانیں کرد پیلو کرتگ اَنت –

آئی ءَ گْوشت کہ سید ظھور شاہ ھاشمی، صباء دشتیاری، عبد اللہ جان جمالدینی، حسین عنقا، عطا شاد، کریم دشتی، اکبر بارکزئی، بیگ مھمد بیگل، آزات جمالدینی ءَ بلوچی لبزانک ءِ واستا آیانی بے مٹیں جھداں ھچبر کس بے ھیال کرت نہ کنت –

بلوچی ڈیپارٹمنٹ ءِ سرکماش رحیم مھر ءَ بلوچی نبشتاری لبزانک ءِ رجانکاری ءِ راہ ءُ رھبند ءُ راجدپتری ءِ سر ءَ گپ ءُ تران کنان ءَ گْوشت کہ رجانکاری ءِ بارو ءَ درھانی ءَ نیکراھی ءِ رجانکاری ءِ بندات کرتگ – نوکیں فکشن ءِ درچ ءَ گارشیا مارکیز ءَ بہ گر داں نجیب مھپوز ءِ رجانکاری کرتگ – مروچیگیں دور ءَ رجانکاری ءِ سرپ گیش شرپی رنگ ءُ دروشماں چارگ بیگ ءَ اَنت –

اقبال ناظر ءَ وتی تران ءِ تہ ءَ گْوشت کہ براھوئی زبان ءُ لبزانک ءِ دیم ءَ برگ ءِ نبشتاری ءِ گاماں ایوک ءَ نہ منّگ سرجم نہ اِنت – اے نیمگ ءَ جوان ءُ الکاپیں دلگوشانی زلورت اَنت –

آئی ءَ کڈن کنان ءَ گْوشتگ کہ اے وھد ءَ مارا درستاں گیشتر شائری ءِ دیمروئی گندگ ءَ کیت کہ چریشی ءِ سوب ءَ نبشتاری باز کم گندگ ءَ کیت –

”درین “ ءِ شنگکار غنی بلوچ ءَ وتی تران ءَ گوشت کہ بلوچ لبزانک ءِ دیمروئی واستا ” درین “ ءِ تاک اڈ داتگ – سَے سد ءُ پنجاہ تاک دیماں ھواریں اولی تاک کہ آزمانکانی ئیگ اِنت اشی ءِ تہ ءَ بلوچی ءُ براھوئی ءِ ازمانک، رجانک، دود ءُ ربیدگ ءُ پٹ ءُ پولی ھوار اَنت ھمے درچ ءِ برجاہ داران ءَ دومی تاک دیمانی بھر بلوچی نبشتھی لبزانک ءِ شکساھگی ءِ باور ءَ اَنت –

دی بلوچستان پوسٹ

بلوچستان ءِ بنجاھی شھر شال ءُ قلعہ عبداللہ ءَ تیرگواری ءِ وئیلاں زالبولے ءَ ھوار دو برات بیران بوتگ اَنت ـ

سربوتگیں ھالانی رِد ءَ شال رودراتکی شھدگ ءَ ھشت نمبر ءِ دمک ءَ تیرگواری ءِ وئیل ءَ زالبولے بیران بوتگ ، بیران بوتگیں زالبول ھما دمان ءَ ھسپتال ءَ برگ بوتگ ءُ اژدری چار ٹپاس ءَ پد کھول ءِ گور ءَ آئی ءِ لاش رسینگ بیتگ ـ

ھمے وڑ ءَ قلعہ عبداللہ ءِ دمگ کلی منگلزئی ءَ ناشُناسیں سلاہ بندیں مردمانی تیرگواری ءَ دو برات بیران بوتگ ـ

بیران بوتگیں مردمانی پجار احمد جان ءُ آئی ءِ برات ءِ نام ءَ زانگ بوتگ انت ـ اشانی تھا یکے گورنمنٹ ٹیچر ایسوسیشن سدر انت ـ

ھمے گُشگ بوگ ءَ اِنت کہ بندات ءَ احمد جان ءَ تیر جنگ کُشگ بوتگ ءُ آئی برات اِش گوں وت برتگ پد ءَ تیر اش جتگ ءُ دور ءِ داتگ ـ

ھندی پھازداراں وئیلے ھال سربوگ ءَ وت ءَ ھما جاہ ءَ سرکُتگ لاش دست گپتگ ءُ ھسپتال ءَ برتگ انت، اود ءَ ھژدری چار ءُ ٹپاس ءَ پد لاش کھول ءِ کھول ءِ گور ءَ سر کنگ بوتگ انت ـ

ھندی مردمانی گُشگ انت اے مردمانی وئیل پیشی زاتی جیڑ ھے ءِ سر ءَ بوتگ ـ