TBP Balochi

بیگواہ بیتگیں ورناہ پیش ءَ ھم بیگواہ کنگ بیتگ ۔

دی بلوچستان پوسٹ

بلوچستان ءِ بنجاھی شھر شال ءَ سبی ءِ جھمنندیں ورناہ ناشناسیں مردماں آوار جتگ ءُ برتگ –

سر بیتگیں ھالانی رد ءَ مھراب جتوئی جھمنند سبی گوستگیں روچ ءَ وتی کارے ءِ واستہ شال ءَ روگ ءَ بیتگ کہ اسپیت پوشیں مردماں سریاب دگ ءَ کسٹم ءِ ھند ءَ وتی گاڑی ءَ زورانسری نادینتگ ءُ گوں وت برتگ –

مھراب جتوئی ءِ بارو ءَ داں انگت ھچ وڑیں ھال ءُ اھوال نہ دیما نیتکگ –

دمگی مردماں ٹی بی پی ءَ گوں گوشتگ کہ ایشی ءَ پیسر ھم پاکستانی چیریں ادارھاں دوھزار ءُ سیزدہ ءَ ھم مھراب جتوئی آوار جتگ ءُ آ شش ماہ ءَ زندانی کنگ ءَ پد یلہ کرتگ –

زانگ بہ بیت زورانسری ءِ بیگواھیانی ھلاپ ءَ وائس فار بلوچ مسنگ پرسنز ءِ نیمگ ءَ شال ءِ پریس کلب ءِ دیم ءَ زھرشانی برجاہ اِنت –

دی بلوچستان پوسٹ

بلوچستان ءِ مزن شھر شال ءَ بلوچ نودربرانی شُد داں مرگ ےِ زھرشانی ءَ مروچی سیمی روچ اِنت، اھوالکارانی رد ءَ بازیں نودربرانی جاور ھال نگیگ اَنت۔

سربیتگیں ھالانی ردءَ نودربرانی شُد داں مرگ ءِ ھرتال ءَ بھر زیروکیں بازیں ورنائیں بے ھوش بیگ ءَ اِنت ءُ آیانی جاور ھال نگیگ بیان اَنت۔

شُد داں مرگ ءِ ھرتال ءَ نشتگیں جانباز مری بلوچ ءَ ٹوئیٹ کنان ءَ گوشتگ کہ مروچی سیمی روچ اِنت کہ ما بی ایم سی ءَ آئی ءِ پیسرگیں دروشم ءَ آرگ ءِ ھاترءَ شد کُشیں ھرتال ءَ نشتگ اِنت ءُ مئے سر یکوئی چکرگ ءَ اِنت، اگاں مئے تھ ءَ کس ءِ مُرت زمہ وار سرجم ءَ بلوچستان ءِ سر وزیر جام کمال خان اِنت۔

زانگ بہ بیت گوستگیں روچاں چہ بی ایم سی ءِ سرسبزینگ ءَ نودربرانی زھرشانی برجاہ اِنت ءُ چریشی ءَ پیسر دوھزار ءُ ھبدہ ءَ بلوچ نودربراں ھم بی ایم سی ءِ سرسبزینگ ءَ گام چِست کرتگ ءُ زھرشانی کنان ءُ پیداک اَنت بلے تنی وھدی نودربرانی لوٹ سرجم کنگ نہ بیتگ اَنت ءُ نوک چِست کرتگیں شد داں مرگی ھرتال ءَ تنی وھدی سرکاری واک نودربرانی گور ءَ نیاتکگ اَنت ءُ آیاں اے سدگی دیگ نہ بیتگ کہ شما وتی شد داں مرگی ھرتال ءَ ھلاس بہ کن اِت ءُ شمئے لوٹ سرجم کنگ بنت –

دی بلوچستان پوسٹ

بلوچ آجوئی دوستیں رھشون ءُ بلوچ لبریشن آرمی ءِ سروک بشیر زیب بلوچ ءَ گوستگیں روچ ءَ پشتون تحفظ موومنٹ ءِ رھشون مھسن داوڑ ءِ شال ءِ بالی پَٹ ءَ دارگ ءُ بلوچستان ءَ پترگ ءَ ابید واتر روان دیگ ءِ سر ءَ چاگردی رسانکجاہ ٹویٹر ءَ وتی زھرشانی درشان کنان ءَ گُشتگ کہ زورگیریں پنجابی پوج، کدی پشتوناں بلوچ سرڈگار ءَ پُترگ ءَ نیل اِیت ءُ کدی بلوچاں پشتونانی سرڈگار ءِ سر ءَ پہ آجوئی ءُ ایمنی نندگ ءَ نیل ایت۔

بشیر زیب بلوچ ءَ دیمترا گوشت کہ ایشی ءِ سوب مئے سرڈگارانی پنجاب ءِ چیر دست بیگ اِنت، بلے بدبھتی ءِ گپ ایش اِنت کہ اے گلامی ءُ کم شرپی ءَ پد ھم بلوچ ءُ پشتون زورگیریں پنجابی پوجءِ ھلاپ ءَ ترندیں جھد کنگ ءَ نہ اَنت۔

یات بہ بیت بشیر زیب ءِ ٹوئیٹ پشتون تحفظ موومنٹ ءِ رھشون ءُ پاکستانی بنجاھی پتر ءِ باسک مھسن داوڑ شال ءِ بالی پَٹ ءَ دزگیر کنگ ءُ بلوچستان ءَ پُترگ ءَ نیلگ ءِ پد دیم ءَ اتکگ۔

دی بلوچستان پوسٹ

بولان مچ ءَ پاکستانی پوج ءِ پیش گامی، بالگتر ءَ پوجی زنداناں یلہ کنگ بیتگیں مردم بیران –

سر بیتگیں ھالانی رد ءَ بلوچستان ءِ دمگ بولان ءَ پاکستانی پوج ءِ مزنیں الگارے گندگ بیتگ ءُ لشکر کشی ءِ گمان کنگ بیتگ –

دمگی مردماں ٹی بی پی ءَ گوں گوشتگ کہ بولان مچ ءِ ھنکین جعفری، سیخوئی ءُ کش ءُ گوری دمگاں پاکستانی پوج ءِ زمینی لشکر روگ ءَ گندگ بیتگ – انگیر کرتگیں دمگ ءَ دزگیریانی ھال نہ بیتگ اَنت –

ھمے وڑ ءَ بالگتر آھوری ءِ جھمنند حمید بلوچ سَے روچ ءَ پیسر پوجی زنداناں یلہ بیتگ ءُ گوستگیں روچ ءَ کراچی ءَ بیران بیتگ –

ھمے درگت ءَ بلوچ نیشنل مومنٹ ءِ انفارمیشن سیکریٹری دلمراد بلوچ ءَ چاگردی رسانکجاہ ٹویٹر ءَ گوشتگ کہ سَے روچ ءَ پیسر پاکستانی پوج ءِ زنداناں نگیگیں جاوراں گوں یلہ کنگ بیتگیں حمید ء ملا انور کراچی ءِ جاندراھی ءِ وھد ءَ بیران بیتگ –

دلمراد بلوچ ءِ گوشگ اِنت کہ حمید یک رندے پیسر ءَ آوار جنگ بیتگ ءُ اے آئی ءِ دومہ رند بیتگ ءُ دومی رند ءَ سک لَٹ ءُ کُٹ کنگ بیتگ چریشی ءَ چہ آئی ءَ وتی زندانی درد نہ سگ اِتگ ءُ بیران بیتگ –

زانگ بہ بیت حمید بیست ءُ پنچ اگست ءَ پاکستانی پوج ءَ آوار جتگ ءُ سَے روچ ءَ رند یلہ کرتگ ءُ دمگی مردمانی گوشگ اِنت کہ حمید پاکستانی پوج ءَ وت کراچی ءَ برتگ ءُ اود ءَ آئی ءِ کھول ھال داتگ ءُ گوشتگ کہ شمئے مردم کراچی ءِ نادراہ جاہ ءَ اِنت بیا اِت دست ءِ بہ گر اِت –

حمید بلوچ چریشی ءَ چہ پیسر چاردہ مارچ دوھزار ءُ نوزدہ ءَ پاکستانی پوج ءِ آپریشن ءِ وھد ءَ بالگتر لوپ ءَ آوار جنگ بیتگ ءُ پد ءَ یلہ داتگ بلے دومی رند ءِ آوار جنگ ءُ پد ءَ یلہ کنگ ءَ حمید بلوچ ءَ زندگی ءَ ھمراھداری کُرت نہ کتگ ءُ آئی ءَ لشکری ترندیں لٹ ءُ کُٹ سگ اِت کُتگ اَنت ءُ بیران بیتگ –

ندر پہ راجی شهید
مهم جان پنّام بابا درویش ءَ

شائر: عارف وپا بلوچ

دی بلوچستان پوسٹ

زندگ اَنت دانکہ کوڈو ءَ است اَنت
تنگهیں درویش دیدگاں دوست اَنت

من ترا نازیناں چتو سالونک
پہ ترا هور انت جنّت ءَ بانور
بژن همایاں کہ گندلاں مرت اَنت
تنگّهیں درویش دیدگاں دوست اَنت

پگرءِ تئی انجیر کهن ءُ کُمبانی
ساهگاں سارتیں ماں تلمبانی
کندگاں گوں تئی هرگور ءَ رست اَنت
تنگّهیں درویش دیدگاں دوست اَنت

سر کت اَنت برزتر پهریں مندیلاں
ماں سرا گوات ءِ روکیں کندیلاں
بچ مڑاهانی مَلگ ءَ دیست اَنت
تنگّهیں درویش دیدگاں دوست اَنت

گیر وتی کاراں آ یلاں آرپ
سد سلام سهریں همبلاں آرپ
سیاهجی ءِ ژمبیں سنگراں وپت اَنت

دی بلوچستان پوسٹ

کوش ءِ سوب زانگ نہ بیتگ –

بلوچستان ءِ دمگ کیچ ءِ بنجاھی شھر تربت ءَ سربیتگیں ھالانی رد ءَ زالبول بلوچ اھوالکار ءُ اینکر پرسن شاھینہ شاھین کُشگ بیتگ –

گیشیں ھالانی رد ءَ مروچی ناشناسیں مردماں شاھینہ شاھین ٹپی ئیں جاوراں تربت ءِ ھسپتال ءَ سر کرتگ، اود ءَ آئی ءَ ٹپانی درد نہ سگ اِتگ ءُ بیران بیتگ – گاڑی ءِ واھند ءَ گاڑی ھسپتال ءَ ویل کرتگ ءُ تتکگ –

پولیس ءَ گاڑی گپتگ، کُشتگیں اھوالکار شاھینہ شاھین ءَ دو تیر جنگ بیتگ، بلے تنی وھدی کوش ءِ سوب زانگ نہ بیتگ –

شاھینہ شاھین پی ٹی وی بولان ءِ اینکر پرسن بیگ ءِ ھواری ءَ نامی ئیں چاگردی باسکے، اکسکار ءُ دزگھار تاک ءِ سروک بیتگ –

دمگی مردمانی رد ءَ لاش سرکاری ھسپتال تربت ءَ اژدری چار ءَ ٹپاس ءَ پد لوگ ءَ رسینگ بیتگ –

دی بلوچستان پوسٹ

بلوچستان ءِ دمگ کوھلو ءَ ٹوھیں زھرشانی ءِ درچ برجاہ اَنت سدانی کچ ءَ مھلوک بھر زورگ ءَ اِنت ھمے میان ءَ دگانی سر ءَ ٹائر ماندارگ بیتگ اَنت ءَ روگ ءُ آیگی مھتل بیتگ اَنت –

زھرشانی گوستگیں روچ ءَ دگ ءِ وئیل ءِ پُشدر ءَ بیگ ءَ اِنت –

سر بیتگیں ھالانی رد ءَ گوستگیں روچ ءَ گیس ءِ شوھاز کنوکیں کمپنی ءِ گاڑی ءَ کوھلو ءِ شھر ءِ نزیک ءَ پرپٹ ءَ سواریں دو ورناہ لگت داتگ کہ چریشی ءِ آسر ءَ مالک ء اسماعیل ھان مری ھما دمان ءَ بیران بیتگ ءُ آئی ءِ ھمراہ زدگ بیتگ، زدگ بیتگیں جاوراں ڈسٹرکٹ ھیڈکوارٹر ھسپتال ءَ سر کنگ بیتگ بلے اود ءَ آئی ءَ وتی ساہ داتگ اَنت –

بیران بیتگیں مالک مری ءِ نماز جنازہ گوستگیں روچ ءَ آئی ءِ بنکی ھنکین کنل ءَ وانگ بیتگ –

ایشی ءَ ھم بہ وان اِت: گوادر ءَ پوج ءِ گاڑی ءَ پرپٹ سوارے لگت داتگ ءُ کُشتگ

دومی نیمگ ءَ واکداراں ٹاہ داتگ کہ کمپنی ءِ ڈرائیور ھالد ھسین ء اُسمان جھمنند ھیر پور ھنکین دادو دزگیر کرتگ ءُ کمپنی ءِ گاڑی ھم گپتگ –

وئیل ءِ پشدر ءَ مھلوک ءِ نیمگ ءَ زھرشانی درچ برجاہ اَنت – واکدارانی ٹاھانی پشتی ءَ زھرشانی کنوک بیران بیتگیں مردمانی واستا مُزگری ءِ دزبندی ءَ کنگ ءَ اَنت –

گیس کمپنی ءِ نیمگ ءَ تنی وھدی ھچ گپ دیم ءَ نیاتکگ –

زانگ بہ بیت گوستگیں ماہ ءِ ھژدہ رمس ءَ یک دگہ وئیلے ءَ ڈیرہ بگٹی ءِ دمگ پیرکوہ ءَ پیش اتکگ کہ اود ءَ او جی ڈی سی کمپنی ءِ گیٹ نمبر یک ءِ دیم ءَ کرنٹ ءِ لگگ ءَ ورناہ فضل بگٹی بیران بیتگ اَت –

دمگی مردمانی رد ءَ چہ ھور ءِ آپاں کمپنی ءِ کل کرتگیں بھرنگیں ویراں کرنٹ لگ اِتگ، چریشی ءَ ورناہ ءَ کرنٹ لگ اِتگ-

بیران بیتگین ءِ کھول ءِ رد ءَ باز براں مھلوک ءِ گوزوکیں راھانی سر ءَ زمین ءِ سر ءَ ایریں ویراں کمپنی ءِ واکدار ھال دیگ بیتگ اَنت بلے کمپنی ءِ نیمگ ءَ ھچ گامگیج زورگ نہ بیتگ اَنت –

پولیس ءِ گوشگ اِنت کہ بیران بیتگیں فضل بگٹی ءِ لاش اژدری چار ءُ ٹپاس ءَ پد کھول ءِ گور ءَ سر کرتگ -بلے واکداراں تنی وھدی کمپنی ءِ سر ءَ جتگیں بھتام ءُ چِست کرتگیں گامگیجانی باور ءَ ھچ نہ گوشتگ –

دی بلوچستان پوسٹ

زھرشانی کنوکانی جاور نگیگ بیان بیتگ اَنت نادراہ جاہ ءَ سر کنگ بیتگ اَنت –

سر بیتگیں ھالانی رد ءَ دو روچاں برجاھیں شد داں مرگ ءَ نندوکیں ڈاکٹر طارق بلوچ، بی ایس او ءِ بالاچ قادر بلوچ ءَ ھوار آ دگرانی جاور نگیگ بیان بیتگ اَنت ءُ شال ءِ سرکاری نادراہ جاہ ءَ برگ بیتگ اَنت اود ءَ آیاں جانسلامتی ءِ واستا کمکی دیگ بیتگ اَنت –

بلوچ اسٹوڈنٹس آرگنائزیشن ءِ نمرہ بلوچ ءَ رسانکدراں گوں گپ کنان ءَ گْوشتگ کہ زھرشانی کنوکانی جاور نگیگ بیگ ءَ اِنت ءُ سرکار مارا ایمبولنس ھم دیگ ءَ نہ اِنت –

آئی ءَ گْوشت کہ دو روچانی گوزگ ءَ پد ھم سرکاری نمائندگ تنی وھدی زھرشانی کنوکانی گور ءَ نیاتکگ اَنت –

بی ایس او ءِ نذیر بلوچ ءِ گوشگ اِنت اگاں زھرشانی کنوکاں چیزے بہ بیت آئی ءِ زمہ وار سرکار بیت ءُ ما سروزیر جام کمال ءِ نام ءَ ارزی نبشتگ کن ایں –

زانگ بہ بیت بی ایم سی ءِ سر سبزینگ ءِ زْرمبشت ءِ نیمگ ءَ دو روچ پیسر شال ءَ زھرشانی کرتگ کہ ریڈزون ءِ نیمگ ءَ روگ ءَ دارگ بیتگ اَنت کہ چریشی ءَ پد آیاں گورنر ھاوس ءِ دیم ءَ چار راہ ءِ سر ءَ نندانک جتگ ءُ نشتگ اَنت –

پشمبے ءِ روچ ءَ اُستانی وزیر میر اسد بلوچ، میر عبدالرؤف رند ءُ سردار نور اھمد بنگلزئی ءَ ھوار سرکاری واکداراں سر سبزینگ ءِ بی ایم سی ءِ رھشونانی گون ءَ گند ءُ نند کرتگ ءُ گپ ءُ تران ءَ زھرشانی ءِ ھلاس کنگ ءِ دزبندی کتگ کہ چریشی ءَ اے بے سوب بیتگ اَنت ءُ چریشی ءَ پد نندانک ءَ نندوکیں مردماں شد داں مرگ ءِ جار پِرینتگ –

بلوچ یکجھتی کمیٹی (کراچی) ءَ ھوراں چہ اسرمند بوتگیں بلوچانی ھاتر ءَ چہ بلوچ راج ءَ کمک کنگ ءِ دزبندی کرتگ –

دی بلوچستان پوسٹ

بلوچ یکجھتی کمیٹی (کراچی) ءَ رسانکدراں وتی شنگ کرتگیں درشان ءِ تھا گُوشتگ کہ گوستگیں روچاں ھوراں چہ کراچی ءِ ھنکین کچی آباد ءُ ملیر ءِ لھتے دمگ “سمو گوٹ، ڈیھ تھانو، صالح محمد گوٹ کہ سک باز اسرمند بوتگ انت ـ سرجمیں دمگ توپانی آپ ءَ بُرتگ انت کہ اود ءَ نندگ ھم نہ بیت ـ گریبی ءُ بزگی ءِ سوب ءَ ھور ءِ آپ برتگیں اے دمگ کَنڈور ءِ دروشم ءَ انت ـ اود ءَ جاھمنند باندات ءِ ھاتر ءَ بازیں مشکلانی دیمپانی ءَ کنگ ءَ انت ـ اے ھال ءِ تھا چاگردی گلانی پرز بیت کہ آھانی دوبر وشنودی ءِ ھاتر ءَ گامگیجی کار گامے چِست بہ کن اَنت –

بلوچ یکجھتی کمیٹی ءَ وتی درشان ءِ تھا گوشتگ کہ ھار ءَ برتگیں مردماں ورد ءُ وراکی راشن ءُ میڈیکل کیمپ ءِ جنگے ھواری ءَ آھانی گسانی شر کنگے گامگیج زورگی اِنت ـ اے درگت ءَ بلوچ یکجھتی کمیٹی ملیر ءُ کراچی ءَ ھور ءِ آپاں چہ اسرمند بوتگیں مھلوکے کمک کنگے ھاتر ءَ یک توارے بندات کنگ ءَ انت چریشی ءَ سرجمیں دنیائے نندوکیں بلوچ مھلوک ءُ دگہ مردماں پوڑی ءِ مُچ کنگ ءِ دزبندی ءَ کنت ـ ءُ سرجمیں پوڑی گری ءَ برجاہ داریت تانکہ ملیر ءُ دگہ دمگانی اسرمند بوتگیں مھلوک کمک کنگ بہ بنت ـ گیرسرکاری گل ھم اسرمند بوتگیں مردمانی ھاتر ءَ گامگیج بزور انت اگاں ناں اے اسرمند بوتگیں دمگاں ابرمہ ڈکالی ءُ نادراھی تالان بوھگ ءِ گمان کنگ بیت اِنت ـ

بلوچ یکجھتی کمیٹی وتی توار ءَ یک مھکمیں ساپیں وڑے ءَ بلوچستان ءِ دگہ دمگاں تالان کنت ـ

بلوچ یکجھتی کمیٹی ءِ نیمگ ءَ دزبندی ءِ تہ ءَ گوشگ بیتگ کہ ھر مردمے کہ کمک کنگ لوٹ اِیت یو بی ایل بینک اکاؤنٹ 047110065944 سر ءَ وتی کمکاں دیم دات کنت ـ اگاں کسے کمکاں مباھل ءِ سر ءَ دیم دیگ لوٹ ایت گڑا 03242072929 اے نمبر کارمرز کرت کنت ـ دگہ ھر مردماں کہ ھال اھوال کنگ لوٹ اِیت گڑا بلوچ یکجھتی کمیٹی (کراچی) کلانیں باسک حنیف دلمراد ءَ اے نمبر ءِ سر ءَ 03242072929 ھال بہ کنت ـ

بی ایم سی ءِ سرسبزینگ ءِ زْرمبشت ءِ واستا نودربرانی زھرشانی، بازیں نودربرانی شُد کُشیں ھرتال ءِ جار۔

دی بلوچستان پوسٹ

سر بیتگیں ھالانی رد ءَ شال ءَ بلوچستان ءِ مزن وزیر ءِ لوگ ءِ دیم ءَ گوستگیں روچ ءَ نودربراں بی ایم سی ءِ سر سبزینگ ءِ زرمبشت ءِ واستا زھرشانی ءُ نندانک جتگ، نندانک ءَ نودربر پولیس ءَ لٹ ءُ کُٹ ھم کرتگ اَنت –

چریشی ءَ پد بولان میڈیکل شھدربر جاھے نودربر جانباز مری ءَ ھوار بازیں نودربراں شال ءِ دمگ ڈی چوک ءَ شد کشیں ھرتال “تاں دم مرگ بھول ھڑتال” ءِ جار پِرینتگ –

ٹی بی پی رسانکدر ءِ اھوالکار ءِ رد ءَ چاگردی رسانک جاھاں شنگ بیتگیں تامر بنداں گوشگ بیتگ کہ اے شد کشیں ھرتال ھما وھد ءَ برجاہ مان اِت کہ داں مئے لوٹ سرجم کنگ نہ بنت –

ھمے وڑ ءَ بلوچستان ءِ مزن وزیر ءِ لوگ ءِ دپ ءَ شکور بلوچ، بالاچ قادر، عرفان مینگل ءُ ڈاکٹر حئی بلوچ ءَ ھوار بازیں نودربراں ھم شد تاں مرگ ءِ جار پِرینتگ ءُ گوشتگ کہ اگاں بی ایم سی ءِ سر سبزینگ ءِ زرمبشت دوبر سبزینگ نہ بیت گڑا ما تاں مرگ ءِ گڈی ساہ ءَ مزن وزیر ءِ لوگ ءِ دپ ءَ نشتگ ءُ چارگ ءَ ایں –

بلوچ نودربراں گوشت کہ اگاں مارا اے میان ءَ ھرچ تاوانے بیت آئی ءِ زمہ وار بلوچستان ءِ سرکار ءُ مزن وزیر جام کمال اِنت –

نودربراں گْوشت کہ دوھزار ءُ ھبدہ ءَ چہ بہ گر داں انوگ ءَ یکوی زھرشانی کنگ ءَ ایں اے زھرشانی گرم ءُ سارتانی میان ءَ بیان اَنت ءُ پیداک اَنت –

آیاں گْوشت کہ اے زھرشانی میان ءَ مئے نودربراں ھمک رنگیں لَٹ ءُ کُٹ، زندان ءُ دگہ جتائیں ناوشی سگ اِتگ ءُ اوپار کنان ءَ پیداک اِنت بلے نِی وھد ھما کچ ءَ سر بیتگ کہ ما دگانی سر ءَ شد داں مرگ ءِ دارگ ءَ لاچار بیتگ ءُ وتی لوٹانی سبزینگ ءَ گامگیجے چِست کرتگ –