TBP Balochi

دی بلوچستان پوسٹ

شال ءَ ڈُنگانی تیرگواری یک مردمے ٹپی بوتگ، گوستگیں روچ ءَ بند مٹھا چوک کبرستان ءَ زالبولے ءِ لاش دزکپتگ ـ

ٹی بی پی ءَ سربوتگیں ھالانی رِد ءَ بلوچستان ءِ مزن شھر شال ءَ پشتون آباد بند مٹھا چوک ءِ نزیکیں کبرستان ءَ زالبولے ءِ لاش دز کپتگ ـ
ایدھی کارمنداں لاش دست گپتگ ءُ اژدری چار ءُ ٹپاس ءِ ھاتر ءَ ھسپتال ءَ بُرتگ ـ

ھمے وڑ ءَ شال ءِ دمگ شھباز ٹاؤن ءَ دزانی تیرگواری ءَ مردمے زدگ بوتگ ـ

پولیس ءِ رِد ءَ دُزاں پرپٹ ءِ پچگرگ ءِ میان ءَ عامر نامی ئیں مردمے ءِ سر ءَ تیرگوری کُتگ ، چریشی ءِ آسر ءَ آ ٹپی بوتگ ـ

ٹپی بوتگیں مردم ھما دمان ءَ ھسپتال ءَ برگ بوتگ ـ گیشیں پٹ ءُ پول برجاہ انت ـ

دی بلوچستان پوسٹ

دی بلوچستان پوسٹ پتر ھال ءَ سر بیتگیں ھالانی رد ءَ بلوچستان ےِ دمگ دالبندین ءَ بیگواہ بیتگیں حفیظ اللہ ء رحیم مھمد ھسنی ءِژانگولیں جون پل چوٹو ءِ ھند ءَ دزکپتگ ۔

لیویز ءِ رد ءَ دزکپگ راست کرتگ ءُ گْوشتگ کہ ژانگولیں جون پرنس پھد ھسپتال دالبندین ءَ سر کرتگ ۔

دمگی مردمانی رد ءَ جون دمگ ءَ کَل کنگ بیتگ ءُ گوستگیں ھوراں کَل کرتگیں جون پدر کرتگ چریشی ءَ پد دمگ ءِ پھازدار ھال داتگ اَنت۔

حفیظ اللہ مھمد ھسنی کلی قاسم ءِ جھمنند بیتگ ءُ دھکانکار ءِ بیتگ ءُ سِی اگست دوھزار ءُ شانزدہ ءَ بیگواہ کنگ بیتگ ۔

حفیظ اللہ ءِ کستریں برات نعمت اللہ ءَ شال ءَ یک پریس کانپرنسے ءَ گپ کنان ءَ گْوشتگ کہ آئی ءِ برات پوج ءِ یک میجرے ءَ سِیاگست دوھزار ءُ شانزدہ ءَ آئی ءِ لوگ ءَ کلی قاسم ھان ءَ چہ دزگیر کُتگ ءُ برتگ ۔

آئی ءَ گْوشت کہ ٹک ءِ مردمانی گمان بیتگ کہ مئے مردم پَٹ ءُ پولے ءِ واستا برگ بیتگ ءُ پَٹ ءُ پول ءِ سرجم بیگ ءَ پد بلکیں آئی ءَ یلہکن اَنت بلے بازیں وھدے ءِ گوزگ ءَ پد آئی ءِ ھچ وڑیں ھال ء اھوال نہ بیتگ ۔

آئی ءَ گْوشت کہ برات بازیں مدتاں لوگ ءَ نیاتکگ ءُ نانکہ آیاں گوشگ بیتگ کہ کجا اِنت کھول ءِ جیڑہ گیش بیان بیتگ اَنت گڑا آیاںمیجر ءَ را ھال کرتگ ۔

حفیظ اللہ مھمد ھسنی ءِ مات ءَ گوستگیں سال ءَ شال ءِ پریس کلب ءِ دیم ءَ وی بی ایم پی ءِ بنجل ءَ اے پدر کرتگ کہ منی چُک ءِ یلہکنگ ءِ واستا میجر نوید ءَ شست ءُ ھشت لَک لوٹ اِتگ چریشی ءَ پد کھول ءَ زر سرجم کرتگ ءُ داتگ اَنت بلے حفیظ اللہ یلہ کنگ نہبیتگ۔ حفیظ اللہ ءِ کھول ءِ پدر کنگ ءَ پد زرواریں میجر ءَ فیلڈ جنرل کورٹ مارشل بیتگ ۔ فیلڈ جنرل کورٹ ءِ راستانکی ءِ منّانکاںآئی ءَ را اُمر ءِ بندیگی ءِ سزا رس اِتگ ۔

پوج ءِ ادارہ آئی ایس پی آر ءِ نیمگ ءَ اگست دوھزار ءُ نوزدہ ءَ اے بارو ءَ ھما درشان شنگ کرتگ کہ ایشی ءَ گوشگ بیتگ پوج ءِسروک جنرل قمر جاوید باجوہ ءَ فیلڈ جنرل کورٹ ءِ سزا دیگ ءِ ھک ءَ منّ اِتگ ۔

درشان ءَ گوشگ بیتگ ک سلاہ بندیں پوج ءَ وتی گل ءِ رھبندی ھیال گور اِنت ءُ وت زانت ۔ چریشی ءَ چہ اے آفسر ءِ ملازمی ءَھلاس کنت ءُ ایشی ءَ جیل ءَ روان دنت ۔

سیکورٹی پوج ءِ آفسر ءِ سزا بیگ ءَ ابید حفیظ اللہ ءِ دیمدری سرجم نہ بیتگ –

حفیظ اللہ ءِ کستریں برات نعمت اللہ ءَ گوشت کہ وھدیکہ اے گپ راست بیتگ کہ گپتگیں افسر ءِ واک پچ گرگ بیتگ گڑا یکرندے پد ءَ مئے کھول ھمے اُمیتانی ودار ءَ نشتگ کہ حفیظ اللہ دیمدراھی بیت کنت بلے مروچی حفیظ اللہ ءِ لَٹ ءُ کُٹ کرتگیں جوندزکپتگ ۔

دی بلوچستان پوسٹ

شال ءَ گوستگیں روچ ءَ سروزیر بلوچستان جام کمال خان ءِ سروکی ءَ بلوچستان ءِ بنجاھی پتر ءَ بی ایم سی ءِ بارو ءَ بیتگیں نیاد بی ایم سی ءِ سر سبزینگ ءِ زْرمبشت ءَ رد کرتگ اَنت –

نودربرانی شد داں مرگ ءِ ھرتال ءَ ھپت سرجم بیتگ ، بی ایم سی ءِ نودربرانی گوشگ اِنت کہ بنجاھی پتر ءَ بیتگیں نیاد ءَ مئے ھک ءَ ھچ گمانی مان نہ بیتگ چریشی ءَ چہ ما اے پیسلات ءَ رد کن ایں –

نودربرانی گوشگ اِنت کہ اے دروگیں کول ءُ کرارانی ودار ءَ ما دمبرتگ چریشی ءَ چہ ما چوشیں گپانی سر ءَ اُوست نہ داریں ءُ آیوکیں وھد ءَ بی ایم سی ءِ سر سبزینگ ءِ زْرمبشت ءِ گام ترندتر بنت –

آیاں گوشت کہ اے پنچ سال اِنت مارا ھمے وڑیں دروگیں گپ ءُ سدکی دیگ ءَ اَنت بلے مئے گپاں بس یک گوشے ءَ اِش کُنگ ءُ دومی گوش ءَ گوات اش برگ ءَ اِنت ھروھد ءَ بی ایم سی ءِ نودربر ءُ ملازمانی گپ دلگوش کنگ نہ بیتگ اَنت –

زانگ بہ بیت مروچی ھپت روچ اِنت کہ بلوچستان ءِ بنجاھی شھر شال ءَ بلوچ نودربرانی زھرشانی ءُ شد داں مرگ ءِ ھرتال برجاہ اِنت بلے تنی وھدی سرکار ءُ آئی ءِ واکدار نودربرانی مھکمیں سَدکی ءَ بے سوب بیتگ اَنت –

ھمے وڑ ءَ بلوچ چاگردی رسانک کامرد کنوکیں نمرا بلوچ ءَ چاگردی رسانکجاہ ٹویٹر ءَ ٹویٹے ءَ گوشتگ کہ دَہ ماہ اِنت کہ اے رھبند ءِ بگیری ءَ نودربر گل ءُ ملازم زھرشانی کنگ ءَ اَنت ءُ اے زھرشانی ءَ دروگیں اُوستانی سر ءَ یلہ کُت نہ کن ایں-

آئی ءَ گوشت کہ سرکار وتی پیسلات ءَ ھُرت بہ چار اِت ءُ وتی راہ ءَ تچک بہ کنت ما انگت ءَ دم نہ برتگ ءُ مئے آؤکیں گام ترندتر بنت –

ھمے وڑ ءَ بلوچ ایکشن کمیٹی ءِ کسان کُمک سرکماش سبیہ بلوچ ءَ وتی ٹویٹے ءِ تہ ءَ گْوشتگ کہ شد داں مرگ ءَ نشتگیں نودبرانی جاور نگیگ اِنت ءُ آیانی بلڈ پریشر ءُ بلڈ شوگر جھل بیان اِنت –

آئی ءَ گوشت کہ سرکار انگت ءَ ھم مئے سدکی دیگ ءَ بے سوب بیتگ ءُ آئی ءَ گوشت کہ وت پرستانی دست ءَ بلوچستان ءِ آؤکیں پولینگ لِچ اِتگ –

بلوچستان ءِ دمگ ھاران ءَ تیرگواری ءِ وئیل ءَ دو برات بیران بیتگ اَنت –

دی بلوچستان پوسٹ

تیرگواری ءِ وئیل شال ءِ دگ ءَ ھاران ءَ گرڈ اسٹیشن ءِ نزیک ءَ پیش اتکگ کہ اود ءَ ناشناسیں سلاہ بندیں مردماں تیرگواری کرتگ ءُ دو برات نشانگ کرتگ اَنت –

لیویز بنشون ءِ رد ءَ ھردوکیں برات چہ لوگ ءَ کارگس ءَ روگ ءَ بیتگ اَنت کہ ناشناسیں سلاہ بندیں مردماں تیرگواری کرتگ ءُ زدگ کرتگ اَنت ناگیگیں جاوراں ڈی ایچ کیو ھاران شیخ زید نادراہ جاہ ءَ برتگ انت اِش اود ءَ ھردوکیں براتاں وتی ٹپ نہ سگ اِتگ ءُ بیران بیتگ اَنت –

لیویز بنشون ءِ گوشگ اِنت وئیل ءِ پٹ ءُ پول برجاہ اِنت –

زانگ بہ بیت بلوچستان ءَ چوشیں وئیل ھمک وھد پیش آیگ ءَ اَنت بلے سرکاری گامگیج ھچ رنگ ءَ گندگ ءَ بیگ ءَ نہ اَنت –

نبشتانک: کنّو یار واتر کن

نبشتہ کار : چوکّین بلوچ

وھدیکہ تو سرپد بہ ئے زان ئے مار ئے گِند ئے گُڑا تو کُربانی دیگ ءَ چَک ءُ پد نہ بئے وتی بزگّیں راج ءَ گِند ئے بدانی لَگتانی چیر ءَ اِنت تو الم جُھد کن ئے کہ آیاں چہ بَداں بِہ رکّین آں وتی زمین ءِ واھُند وت بِہ باں جُھد کن ئے الم سوبین بہ ئے –

اڑے کنّو تو گپے زان ئے من ترا مُدام یاتانی تہ ءَ یات کن آں بلے تو اِشتاپ کُت اڑے نِند شپ وتی اِنت ھو شپ وتی اِنت بلے مروچگیں شپ شپر ءِ گین من رواں کہ کار ھست بلے زوت واتر بہ من ترا رکست کُت اگاں من بہ زانتیں کہ من ترا دو بر مہ گِند آں من ترا دل ءِ سیر ءَ رکست کُتگ اَت بلے کنّو تو ھم نام نہ گِپت کہ من اِے رند ءَ واتر نباں تو پون کُت یار من پیداک آں تو بُرو جاگہ ءِ سر ءَ نند من رس اِتگاں من گل ءَ بال بوت آں کنّو پیداک اِنت بلے کنّو تو سر نہ بوت ئے من جیڑ اِت کنّو ءَ من ءَ پون کہ من پیداک آں جلدی کایا دیر ئِے کُت بلے کیت من ءَ گُشتگ ئِے من پیداک آں لازم کیت من نِشتگ تاں تیراں توار کُت نزّیک ءَ بازیں تُپنگے ءِ تیر ءَ توار کُت یا ھُدا اِے چی یے بوت؟ من ھُدا گور ءَ گُشت ھُدا زمین ءِ بچ تئی میار اِنت ساتے ءَ رند سنگت اتک اَنت بلے کنّو تو گون نہ اِت ئے سنگت سک پریشان اَنت کنّو تئی جُدائی ءَ من زانت ھیر نہ اِنت بلے من ھچ نہ گُشت رند ءَ من ءَ سنگتاں ھال دات کنّو جنگ بیتگ منی ارس رِتک اَنت من دل ءَ گُشت کنّو نیآتک گوں چی ءَ من کنّو ءِ دوار ءَ تو زان ئے مارا چی کنّو زمین ءَ گیشتر دوست اَت زمین ءَ اِشتاپ اَت پہ کنّو ءَ کنّو زوت کن منی سالونک من سمبھیتگ بانور ءَ بلے کنّو تو منی گْور ءَ چے ءَ نیآتک ئے ؟ تو شت ئے من ءَ یَکیم ھم نہ کُت من انگت ءَ ودار کنگ ءَ آں تو کا ئے-

کُنّو تئی مھروانی ءِ کِسّہ منی کِر ءَ گوں ھچ گال ءَ نہ بیت من نزان آں تئی مِھروانی ءِ کسّہ ءَ کُجام گالاں گوں نبشتہ بکن آں کنّو تو سک مھروان اِت تئی مِھر کسان ءُ مزن گور ءَ یک وڑ اَت کنّو مروچی تئی جُدائی ءَ چار سال سرجم اِنت تئی جتائی ءِ انگریں یات روچ پہ روچ ودّان اَنت-

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ کرمان ءَ بندشی مالانی بھتام ءَ ایرانی نارکرٹکس ءَ تیر جتگ ءُ کُشتگ –

بیران بیتگیں مردم ءِ پجار میسم نوتی زئی ءِ نام ءَ زانگ بیتگ –

اھوالکار ءِ گوشگ اِنت کہ میسم نوتی زئی کرمان ءُ بم ءِ میان ءَ وتی گاڑی ءِ سر ءَ راہ ءَ روگ ءَ بیتگ کہ ایرانی بندشی مال گروکیں پولیس ءَ آئی ءِ سر ءَ تیرگواری کرتگ ءُ چریشی ءَ چہ گاڑی کلٹی بیتگ ءُ میسم بیران بیتگ –

اھوالکار ءِ گوشگ اِنت کہ میسم ءِ سر ءَ شکی ءَ ایرانی پولیس ءَ تیرگواری کرتگ ءُ میسم کُشتگ ءُ میسم ءِ گاڑی ءِ تہ ءَ بندشی مال ھچ در نیاتکگ –

چاگردی مردمانی گوشگ اِنت کہ ایرانی پولیس دست ءُ گوشیں مردمانی سر ءَ شَپُکی ءِ شکی ءَ تیرگواری کنت ءُ مردماں کُش اِت –

آیاں گوشت کہ گوست ءَ ھم ھمے وڑئیں وئیل بیتگ اَنت کہ چریشی ءَ بازیں رھگوزی ءِ ھمے تیرانی آماچ بیتگ ءُ بیران بیتگ اَنت –

دوئیں وئیل مستونگ ءِ دمگ کڈکوچہ ءَ دوشی شپ دیم ءَ اتکگ انت۔

دی بلوچستان پوسٹ

سربوتگیں ھالانی رِد ءَ مستونگ ءَ دو جتا جتائیں دگ ءِ وئیلاں چُکاں ھوار دوازدہ مردم ٹپی بوتگ ءُ چار مردم بیران بوتگ۔

اولی وئیل الحسن ھوٹل ءِ دیم ءَ بوتگ کہ شال ءَ داں کراچی رؤکیں سدا بھار کوچ چپی بوتگ ـ چریشی آسر ءَ دوازدہ مردم زدگ بوتگ۔

ھمے وڈ کڈکوچہ ءِ دمگ گرو ءَ دیم ءَ اتکگ کہ الحکمت کوچ ءَ گوں کسانیں گاڈی ءَ ڈیک وارتگ۔

ڈیک ورگے آسر ءَ چار ورنا بیران بوتگ۔

ھندی مردمانی رِد ءَ بیران بوتگیں مردم کڈکوچہ ءِ جاھمنند اَنت۔

زدگ ءُ ٹپی بوتگیں مردم ھما دمان شھید نواب غوث بخش رئیسانی ھسپتال ءَ برگ بوتگ اَنت۔

جاؤ ءَ ریاستی دلار ءِ کوش ءِ زمّہ واری ءَ منّ ایں ـ بی ایل ایف۔

دی بلوچستان پوسٹ

سربوتگیں ھالانی رِد ءَ گوستگیں روچ ءَ بزاں ھپت ستمبر ءَ آواران ءِ دمگ جاؤ ءَ ناشناسیں سلاہ بندیں مردماں یک مردمے تیرانی آماچ کُتگ کُشتگ ـ آئی پجار پسند میروانی نام ءَ چہ بوتگ۔

دومی نیمگ ءَ مروچی بلوچ آجوئی لوٹوکیں گل بی ایل ایف ءِ جارکش میجر گھرام بلوچ ءَ رسانکدراں وتی شنگ کرتگیں درشان ءِ تھا پسند میروانی کوش ءِ زمہ واری منّ اِتگ ءُ گوشتگ کہ ھپت ستمبر ءَ آواران ءِ دمگ جاؤ ءَ سیکر مچی میتگ ءَ مئے سرمچاراں پسند میروانی وتی نشانگ جوڈ کُتگ کُشتگ۔ـ

جارکش ءَ گوشتگ کہ اے مرد جاؤ ءِ جتا جتائیں دمگاں بازیں پوجی آپریشن آں ھوار بوتگ ءُ بازیں مردمانی زورانسری آوار جنیاں پاکستانی پوج ءَ گوں ھمکار بوتگ۔

آئی گوشتگ اے وڈیں درسیں مردم کہ پاکستانی پوج ءِ ھمکار ءُ ریاستی آلہ کار ءِ کرد ءَ پیلو کنگ انت آ ھمے وڈ نشانگ جوڈ کنگ بنت۔

دی بلوچستان پوسٹ

شاھینہ شاھین ءِ کشندھانی دزگیری، کھول ءِ مردماں انساپ دیگ ءُ وئیل ءِ بارو ءَ جوانیں رنگے ءَ پَٹ ءُ پول ءِ واستا تربت ءِ لس مھلوک ءِ نیمگ ءَ روانک کشگ بیتگ –

شھید فدا چار راہ ءَ چہ تربت ءِ پریس کلب ءِ دیم ءَ روانک روان بیتگ، ھدامرزی ءِ کھولاں ابید ایچ ار سی پی ءِ باسک ءُ مردین ءُ زالبولانی بازیں کَچے ھوار بیتگ –

زھرشانی ءَ بھر زیروکیں مردماں بینرز چِست کرتگ ءُ آیانی سر ءَ انساپ دیگ ءُ کشندھانی دزگیری ءَ ھواریں اوگام نبشتگ بیتگ اَنت –

تربت ءِ پریس کلب ءِ دیم ءَ زھرشانی ءِ مُچی ءَ ھدامرزی ءِ شاھینہ ءِ کستریں گوھار ماسومہ رفیق ءُ پروپیسر غنی پرواز ءَ ھوار تربت ءِ سول سوسائٹی ءِ کنوینئر سید گلزار دوست ءَ تران کرتگ –

آیاں گوشت کہ شاھینہ شاھین ءِ کشندہ دزگیر کنگ بہ بنت ءُ کھول ءَ را انساپ دیگ بہ بیت ءُ کلچر سینٹر ءُ پی ٹی سی ایل کالونی شاھینہ ءِ نام ءَ کنگ بہ بنت –

چریشی ءَ پد تربت سیول سوسائٹی ءِ باسکاں شاھینہ شاھین ءِ کوش ءِ بارو ءَ ڈپٹی کمشنر کیچ میجر ریٹائرڈ مھمد الیاس کبزئی ءَ گند ءُ نند کرتگ ءُ آئی ءِ کستریں گوھار زھرہ ءَ ڈپٹی کمشنر ءَ را نگاھداشتی پیش کرتگ ءُ کشندھانی دزگیر ءِ دزبندی کرتگ –

ڈپٹی کمشنر ءَ اتکگیں مردم سدکی کرتگ اَنت ءُ کشندھانی دزگیری ءَ پولیس جوانیں رنگے ءَ پٹ ءُ پول کنگ ءَ اِنت کشندہ زوت گرگ بنت –

شائر: آرپ وپا بلوچ

دی بلوچستان پوسٹ

من امرے ُهماراں وت ءَ گوں بہ بنداں
تئی مسکاں زهیر ءِ زر ءَ چو بہ تنگاں

داں کوریں دلانی اے زنگاں مہ شوداں
گوں چماں پچیناں کہ هچی مہ گنداں

تئی شهر ءَ گنجیں تبانی کہ ڈکال
پمن بیت کیامت دمانے چو ننداں

همایاں گوں گوازی کتگ مئے امیتاں
هما زیک ءُ مرچیگ ،هما مئے کہ جنداں

تئی هلک دور انت کبندیں اے گٹاں
من ارواه ءِ دنزاں دمے گوں بہ شنگاں

من وش اتک گشاناں تری هرچی بیتیں
تئی مهر ءِ اے کشک ءَ من ءَ چی بہ گونداں

من زاناں کہ آرپ بلگ زند ءَ زرتگ
گوں دردے بہ گریواں گوں دردے کہ کنداں