نبشتانک: بلوچ شیر زالانی جُھد
نبشتہ کار: سرباز وپا
دی بلوچستان پوسٹ
زالبول مات اِنت ، زالبول گْوھار اِنت ، زالبول جنین اِنت ، زالبول جِنک اِنت ، زالبول گِس ءِ گْوھر اِنت ، بلے “ارسطو” گْوش اَیت ” زالبول گِس ءِ گْوھر ناں، بلکیں گِس ءِ ارواہ اِنت ۔ اَلّم اے گپ منّگی اِنت۔۔۔چی ءَ کہ زالبول ءَ را گِس ءِ مزنیں ڈُبّہ ءُ زمہ واری یے گون اِنت ۔ چہ گِس ءَ اَبید زالبول دُگنیا ءِ ھَمُک پڑ ءِ تہ ءَ آئی ءِ یک بلاھیں کردارے ھست ۔ ڈاکٹری بہ بیت ، ماشٹری بہ بیت ، انجینئری بہ بیت ، وکیلی بہ بیت یا مُلک ءِ وزیری بہ بیت ڈیھ ءِ ھر کارے بہ بیت ۔ پہ ڈیھ ءُ راج ءِ دیمروی ءِ ھاتر ءَ زالبول ءِ جُھد کنگ اِلّمی اِنت ۔ بنی آدم ءِ گْوستانک اِے گپّ ءِ گْواھی ءَ دنت کہ راجی آجوئی ءِ جُنزانی تہ ءَ زالبولانی یک بے مٹّ ءُ بلائیں کِردارے ھست ۔
سرجمیں دُگنیا ءِ تہ ءَ شیرزالانی کِسّہ سکّ باز اَنت ، بلے من کمّیں شیرزال ءِ نام ءَ شُمئے دیم ءَ کاراں۔ مرچاں کُردستان ءِ جنگ ءِ آجوئی مئے دیم ءَ اِنت ، آئی جَنگ کنوکیں شیرزالانی کساس چہ ھزاراں گْوستگ اَنت ۔ وتی جَنگ اِش شرّیں وڑے ءَ داشتگ ءُ انگت دیم ءَ جُنزان اَنت ۔ وھدے پلستین ءِ آجوئی ءِ جُنز ءَ وان ئے گُڑّا ترا لیلا ھالؔد ءِ نام گِندگ ءَ کَیت ، الجزائر ءِ راجی جُنز ءَ وان ئے جمیلہ الجزائری ءِ کردار دیم ءَ کَیت ، ھِندوستان ءِ راجی جنُز ءِ تہ ءَ رانی لکشمی بائی ءِ کردار گِندگ ءَ کَیت ۔ وھدے جرمن ءِ راجی جُنز ءَ چارے گُڑا لیوڈمیلا پاولیچینکو ءِ کردار گِندگ ءَ کیت کہ آ نازی پوج ءِ سپاھیگے بیت۔ لیوڈمیلا پاولیچینکو ، ٹِکّ تیری ءَ ناماں بیت ۔ آ یک اسنائپر شوٹرے بیت ۔ بی بی سی ءَ ایشی ءِ سر ءَ وتی یک رپورٹے شنگ کُتگ اَت آئی ءِ ستا ءَ کنت ءُ گْوش اِیت ، لیوڈمیلا پاولیچینکو ءَ گوں جرمن ءَ جَنگ ءَ جرمن ءِ سے سد ءُ نھ پوجی کُشتگ ۔
وھدے ما وتی بلوچ راج ءِ گْوستانک ءَ چار اِیں داں روچ ء مروچ مئے بلوچ شیرزالانی کردار چہ آ دِگہ راجاں کمتِر نہ اِنت ۔ وھدے شیرشاہ سوری مُگُل بادشاہ ھمایو ءِ تھت ءِ دھلی ءِ سر ءَ کوزہ کنت گُڑا مُگُل بادشاہ ھمایو چہ میر چاکر رند ءَ کُمک لوٹ اِیت ، میر چاکر رند دھلی ءِ آجو کنگ ءَ روت ، آئی گْوھار بانک بانڑی ھم گون بیت، شیرزالیں بانڑی گوں لشکر ءَ جنگ کنت ءُ بلوچ لشکر ءِ کمانی ءَ کنت ءُ دھلی ءَ چہ شیرشاہ سوری ءَ رکین اَنت ۔ ھمے بلوچ ءِ شیرزال اِنت کہ دودا ءِ وڑیں بچّے ودی کنت پہ وتی میار ءَ مِرگ ءِ سکین ءَ دنت ءُ گْوش اِیت ،
“آ مرد کہ میاراں جلّاں
نیمروچاں نہ وپس اَنت کُلّاں”
دودا پہ وتی میار سمّی ءِ مالانی ھاتر ءَ جَنگ کنت ءُ پہ میار جَلّی مِر اِیت ، بلے آئی ءِ نام دودا میار جلّ ءِ نام ءَ زانگ ءُ پجّاہ آرگ بیت ۔ آ ھم بلوچ شیرزالے بیت کہ میر کمبر ءَ ودی کنت ءُ پد ءَ پہ زورگیریں مھراب ءِ ھلاپ ءَ جَنگ ءَ دیم دنت ، ھمے کلوہ ءَ دنت ءُ گْوش اِیت اگاں تو جَنَگ بوت ئے ۔
“من پیراں کہ ورنا بَیاں
کبر ءَ پہ ھالو اِت براں
موتک ءِ بدل نازینک جناں
ڈُھل ءُ دمہ دم ساز کناں
چاپ ءُ ھلو ھالو کناں
ھپت روچ ءَ شاتکامی کناں
دستاں وتی ھِنّی کناں
موردانگاں مندریک کناں
لُنٹاں وتی مُزواک جناں
چمّاں دو بر سُرمگ کناں
بیکّاں وتی ساپ کناں
پَنگے گوپاں کانٹ کناں
بو ءُ دُن ءُ دابے کناں
سیری گُداناں پِر کناں
نوکیں نِکاھے پر کناں
تئی پِسّ ءَ دگہ سانگے کناں
تئی مٹّ ءَ پد ءَ پیداک کناں”
دِگہ یک بلوچ شیرزالے کہ مات ارزملک ءِ نام ءَ زانگ بیت ۔ وتی تاسپیں بچّ شھید رزا جھانگیر ءِ شھیدی ءَ چہ ارس ریچگ ءِ بدل ءَ آئی لاش ءَ گوں ھلو ھالو ءَ بارت داں گُڈّی وابجاہ ءَ سر کنت ۔ یک بلوچ شیرزالے کہ لُمہ یاسمین ءِ نام ءَ زانگ بیت ۔ وتی سالونکیں بچّ شھید ریھان جان ءَ پہ بلوچ راجی آجوئی ءِ ھاتر ءَ سالونک کنت ءُ پِدائی ءَ دیم دنت ۔ شیرزالیں مات جمیلہ وتی بچّ شھید پِدائی سلمان ھمل ءِ لاش ءَ چہ دُژمن ءِ کِرّ ءَ پہ شانے پچ گیت ءُ بارت داں گُڈّی وابجاہ ءَ سر کنت ۔ شیرزالیں ملکناز گوں سِلاہ بندیں ڈُنگاں جَنَگ ئِے کُرت داں شھید بوت ۔ ھمے وڑ ءَ بلوچ ءِ شیرزالانی کارِست ءِ تہ ءَ مئے بانُکیں گْوھار کریمہ بلوچ گون اِنت ۔ بی ایس او آزات ( آزاد) ءِ وڑیں بلوچ نودربر گل ءِ رھشونی ءَ کنت ۔ مرچی چہ دُژمن ءِ زُوراکیاں دراں ڈیھ اِنت ، بلے پہ راجی جُنز ءِ دیم ءَ برگ ءَ مُدام ساڑی اِنت ءُ دُگنیا ءَ را بلوچ راج ءِ سر ءَ ناشر کاریں پاکستان ءِ بیوکیں زوراکیاں پیشدارگ ءَ اِنت
انوگیں وھد ءِ تہ ءَ بلوچ شیرزال شریں وڑے ءَ وتی جُھد ءَ دیم ءَ برگ ءَ اَنت ۔ انچوش کہ مئے بانُکیں گْوھار بی بی گل بلوچ اِنت ، ھوران بلوچ اِنت ، ڈاکٹر دین جان ءِ جَنِکّ سمّی بلوچ چہ وتی پت ءِ بیگواھی ءَ پد ھما اِنت وتی جُھد ئِے برجاہ داشتگ ۔ مھلب بلوچ اِنت گوں وتی کسانیں اُمر ءَ وتی جُھد ئِے شرّیں وڑے ءَ داشتگ کہ ماما کدیر بلوچ ءُ پرزانہ مجید ءِ سروکی ءَ لانگ مارچ چہ شال ءَ درکیت داں اسلام آباد ءَ روت ، آ گوں آئی لانگ مارچ ءَ ھمراھداری کنت ۔ بانک ڈاکٹر مھرنگ بلوچ اِنت کہ یک نودربرے بلے شال ءَ ماما کدیر ءِ بُنجل ءَ نشتگ گار ءُ بیگواھیں مردمانی توار جوڑ بوتگ ءُ جُھد کنگ ءَ اِنت ۔ یکے بانک ھسیبہ کمبرانی اِنت، بانک سیما بلوچ ءُ زرینہ بلوچ اَنت وتی جُھد اِش شریں وڑے ءَ برجم داشتگ اِش ، مئے بلوچ راج ءِ تہ ءَ اے وڑیں لائِک ءُ بھادُریں شیرزال انگت دگہ ھست ۔
انچش کہ گْوستگیں وھد ءَ کسان سالیں انسہ بلوچ اَت ، کسان سالیں مھرنگ بلوچ ءُ آئی ماس زبیدہ بلوچ اِت اَنت ۔ اگاں ما دری راجانی راجدپتراں وان ایں ءُ شیرزالانی کِسّھاں گند اِیں ، گڑا مئے بلوچ راج ءِ تہ ءَ بلوچ شیرزالانی شریں کردارے گندگ ءَ کیت ۔ ناشرکاریں پاکستان ءِ پوج ءُ آئی داشتگیں ڈُنگ ءُ منشیات پروشانی ھلاپ ءَ بلوچستان ءِ کجام ھند ءَ زھرشانی یے بہ بیت ، مئے بلوچ ءِ شیرزالیں مات ءُ گْوھار گوں وتی براساں ھوار اَنت ءُ گون اَنت ۔ ھمے ھاتر ءَ کہ بلوچ جُھد ءِ کاروان ءَ بلوچ ءِ ھمُک زھگ ءَ را یک زانتے بکشاتگ ، وتی گلُامی ءِ اھساسے بوتگ ، تپاک ءُ یکمشت بوگ ءِ جُھد ءَ کنت ، وتی راجی جیڑھانی سر ءَ توار چست کنگ ءُ جُھد کنگ ءِ کُوشِست ءَ کنت ۔
بلوچ راج ءِ سر ءَ اے مُدامی بیوکیں زُوراکیاں مئے بلوچ ءِ چُک ءُ مات ءُ گْوھاراں ھمے مار اِتگ ، مارا چہ بے تواری ءُ ھاموشی ءَ درایگ لوٹ اِیت ۔ راجی ءُ چاگردی جیڑھانی ھاتر ءَ گوں وتی مردیناں ھوار جُھد کنگ لوٹ اِیت ۔ اے یک راستی یے کہ کُجام راج ءِ ھمُک زھگ ءِ تہ ءَ وتی راجی مارشت بوت گُڑا آ راج ءَ ھچ وڑیں تاکت گُلام داشت نہ کنت ۔ چہ دُگنیا ءِ راجی جُنزاں نابلد ءُ برتانیہ ءِ جوڑ کُرتگیں مُلک پاکستان ءَ اے گپ سرپد بُوَگی اِنت کہ منی پوج ءِ زُوراکی ءَ ھوار منی ھمُک جوڑ کرتگیں پندل ءِ ھلاپ ءَ بلوچ ءِ پیر ءُ ورنا ءَ ھوار داں بلوچ ءِ زھگ ، مات ءُ گْوھار منی ھلاپ ءَ توار چِست کنگ ءَ اِنت۔ اے گپ ءَ پہ جزم بِہ زانت نُوں منی زُوراکی ءِ بادشاھی ھلاس اِنت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
