TBP Balochi

نبشتانک: دل ءِ شوانگ

نبشتہ کار: حیر جان قدیر

دی بلوچستان پوسٹ

آئی ءَ سُھب سک دوست بیت اے وھد ءِ مُرگانی چِری چِریانی آواز ، سُھب ءِ سارتیں گوات کہ آئی ءِ دل ءِ تہ ءَ سارت کنت ۔

مچانی پُشت ءِ چِریں روچ ءِ درآھگ ءِ وشیں نِدارہ ، کوش چون وش کَش اِیت ءُ وتی داب ءَ درچکاں ناچ دنت کہ اے وھد ءَ آئی ءِ سریگ گوں گوات ءَ بال بیت ۔

آئی ءِ لُنٹانی سر ءَ مُرتگیں بچکندے مان شان اِیت ، آ انچو اے سُھب ءِ وشیں نِدارگ ءَ چار اِیت کہ آئی ءِ چم سارت بنت ۔

آئی ءَ وتی ھمرائی ءَ وتی پس زُرت ءُ دیم پہ کوہ ءَ شُت ءُ وتی جند ئِے گار کُت، سبزکیں کوھانی تہ ءَ ، آئی ءَ اے کوہ ھم سک دوست بنت کہ آ کوہ ءَ روت ءُ مدام وتی سریگ ءَ ماں گوات ءِ دامن ءَ یلہ کنت ءُ وتی زُلپاں چنڈین اِیت ءُ گوات ءَ مجنون کنت-

کوھانی کِر ءَ کسانُکیں چمگے ھست اَت آ ھمے چمگ ءِ کش ءَ گول ماں گول ءَ چکار اِیت داں چمگ ءِ آپ آئی ءِ باتن ءَ گش ئے وت ایرّچ اِیت، پد ءَ گش ئے ھمے ساھت ءَ آئی ءِ چمانی تہ ءَ ارسانی شیپے تچگ ءَ لگ اِیت ءُ داں ارس چو کورے ءَ آئی ءِ جیگ ءَ یل بوت۔

گوات گش ئے ھیران بوت ءُ کوہ ھم پریشان کہ اے ارس آئی ءِ جیگ ءَ چی ءَ یل اَنت ؟
آئی ءَ وتی ارس چیر دات اَنت ءُ پھک کنگ ءِ گوما تکہ ئِے دات ، گش ئے یک شوانگے دیم ءَ پیداک اِنت-

شوانگ گوں وتی پساں کور ءِ لمب ءَ چیھانٹ جنان ءُ گْوزان اَنت۔ داں شوانگ کور ءِ لمب ءَ آپ ءِ دامن ءَ سر بوت ءُ یک لکیرے ءِ کشگ ءَ لگ اِت آئی ءَ سما بوت کہ بیت کنت شوانگ نامے نبشتہ کنگ ءَ اِنت۔ آئی ءَ جیڑ اِت کہ باریں کئی نام بیت ، ھمے جیڑگانی تہ ءَ داں شوانگ ءَ سر چست کُت ءُ چار اِت ، آئی ءَ چمانی رِتکگیں ارس وتی ساپ کت اَنت، بلے گُمانے بوت کہ ارس گوں ھون ءَ ھوار اَنت منی چمانی تہ ءَ شوانگ ءِ گِندگ ءَ چہ آئی ءِ چم مُرت اَنت ، دل ءَ آسے جمبور بوت ءُ آئی ءِ دل ءَ تُستگیں بودے آؤرت-

آئی ءَ شوانگ ءَ را چار اِت نہ کُت ءُ ھمے ساھت ءَ شوانگ ءِ چم گون ارساں نمب بیت اَنت، شوانگ ءَ را جنڈیں دِرتگیں شالے کوپگ ءَ اَت، مود ئِے شنگ اِت اَنت ءُ جند ئِے چو ملنگ ءَ اَت، شوانگ ءَ آئی ءِ چم پجّاہ آؤرت اَنت ، چار اِت ئِے ءُ گوشت ئِے ،”اے تئی مھر ءِ پکیر اِنت تئی لوٹ ءَ کوھانی تہ ءَ ویل اِنت “، ۔ آئی ءِ دل ءَ ھیسکارگے جت ءُ گُشت ئِے ،”یک بیچارگے کوھانی شماں پہ تئی لوٹ ءَ ھم ویل اِنت،” گوں ھمے گپ ءَ آ شت شوانگ ءِ کش ءَ اوشتات ءُ چار اِت ئِے داں آپ ءِ لمب ءَ شوانگ ءَ نبشتہ کتگ اَت ” بچکند، آئی ءِ چمانی کپگ ءَ گوں آپ ءِ لمب ءَ گش ئے چولے آتک ءُ نامے کروتک ، آئی ھرچی کہ نام چار اِت نہ دیست ئِے۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

آزمانک: ھِچّی نہ آں

آزمانکار: حسن ناصر

رجانکار: ھلیل بلوچ

(چہ براھوئی لبزانک ءَ)

دی بلوچستان پوسٹ

مردُم کسان بیت مزن بُوّگ ءِ ھاتر ءَ ؟ یا مزن بیت کسان بُوّگ ءِ ھاتر ءَ ؟ ھما وھد ءَ من ھِچ نہ اِت آں منی تہ ءَ ھر چی ھست اَت۔ منی تہ ءَ سگّ ءُ اوپار ھست اَت، ھر مردُم ءِ گَپّ ءِ گوشدارگ ءِ اوپار ھست اَت۔

منی تہ ءَ اے کمال ھست اَت کہ ھر گَپّے منی تَب ءَ مہ لگّ اتیں گُڑا من چہ اے گوش ءَ اِشکُت ءُ دومی گوش ءَ کشّ اِت۔

ھما وھد ءَ منی دوئیں گوشانی نْیام ءَ گَپّے ءَ جاگہ کُت گُڑا منی گوشاں کسان بُوّگ بندات کُت، پرچا کہ منی سَرَگ مزن بُوّگ ءَ اَت، مزنیں سَرَگ ءِ ھاتر ءَ مزنیں پاگے پَکار اَت، مزنیں پاگ ءِ ھاتر ءَ من دومی مردُمانی پاگ ڈُرینت اَنت، ھمے پاگ یکجا گْرنچ دات اَنت ءُ پہ وَت یک مزنیں پاگے جوڑ کُرت۔

ھَیر منی پاگ مزن بوت بلے۔۔۔! پاگ ءِ چیر ءَ منی کامپول ءِ تہ ءَ منی مازگ ءَ را ھوشام ءَ جَت، گُڑا منی سگّ ءُ اوپار ھلاس بوت۔

انّی دِگرانی مارشتانی گوما لیب کنگ، دِگرانی کم شرپ کنگ ءَ من ءَ تاھیر رس ایت، وھدے من دِگرانی ارواہ ءَ گوں وتی لبزاں زَدگ ءُ ھون کن آں گُڑا منی ارواہ ءِ تُنّ ھلاس بیت۔

ھر یکے ءِ گوم ءَ دَپ دڑی کنگ، ھر یکے ءَ کُنّت کنگ، منی ھَستمان ءِ تہ ءَ اَنچو پُترتگ اَنت کہ من بہ لوٹ آں ھم چہ ایشاں آجو بوت نہ کن آں۔ اے دْرستیں آزمودگاں چہ ، من ھمے راستی ءَ سر بوت آں کہ :
“من ھِچّے نہ اِت آں بلے باز چیز اِت آں، من انّی چیزے ھست آں۔۔۔ بَلے ھِچّے نہ آں۔”

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

دی بلوچستان پوسٹ

ایڈوکیٹ مھب آزاد ءَ ھوار سرجمیں سند ءِ زورانسری آوار جنگ بوتگیں باسکانی یلھی ءِ ھاتر ءَ حیدرآباد ءَ بیگواھیں مردمانی ھاتر ءَ پند ءَ روانک کشگ بندات کنگ بوتگ-

میان اُستمانی جھان ءُ زندگیں انسان سند ءُ بلوچستان ءَ بؤکیں زورانسری آوارجنی ءُ انسانی ھکانی لگتمالی ءِ بگیری ءَ وتی بے تواری ءَ ھلاس بہ کن انت- سورٹھ لوھار

وائس فار مسنگ پرسنز آف سندھ، سندھ سجاگی فورم، عوامی ورکرز پارٹی، ورکرز رززٹنس، نوجوان اتحاد، سول سوسائٹی ءُ بیگواھیں مردمانی کھولانی نیمگ ءَ چہ مروچی شھباز بلڈنگ، ٹھنڈی سڑک ءَ بگر تاں حیدرآباد ءِ پریس کلب ءَ زورانسری ءَ آوار جنگ بوتگیں سندھ سجاگی فورم ءِ رھشون ایڈوکیٹ مھب آزاد ءَ ھوار سرجمیں سندھ ءَ بیگواہ بوتگیں مردمانی یلہ کنگ ءِ ھاتر ءَ مسنگ پرسنز ءَ پند برگ بندات کرتگ-

زھرشانی ءَ رھشونی سندھ سجاگی فورم ءِ جوائنٹ سیکریٹری سارنگ جویو، وائس فار مسنگ پرسنز آف سندھ ءِ رھشون سھنی جویو عوامی ورکرز پارٹی ءِ رھشون بخشل تھلھو، ورکرز رززٹنس ءِ رھشون مسرور شاہ، نوجوان اتھاد ءِ رھشون امجد رند، نامی ئیں سندھی ادب ءِ تاج جویو ءُ سول سوسائٹی ءِ رھشون امداد چانڈیو ءَ کرتگ –

اے درگت ءَ رھشوناں زھرشانی پند روانک ءَ تران کنان ءَ گوشتگ کہ پاکستانی چیریں ادارھانی دست ءَ سرجمیں سندھ ءَ زورانسری آوار جنی گیش بوگ ھمے پدر کنگ ءَ اِنت اے ریاست سیاسی بُن پداں سَگگ نہ لوٹ ایت -پرے ھاتر ءَ مروچی آ سندھ ءُ بلوچستان ءِ تھا ھما وڑ کنگ ءَ اَنت کہ مروچی چار دیھک پیسر بنگلہ دیش ءَ کنگ بوتگ اَنت –

آیاں گْوشت کہ سندھی یک پُرایمنیں راجے بلے ریاستی کارمند سندھ ءِ تھا نیکراھی ءُ ٹکی ٹولیانی سرپرستی ءَ کنگ اَنت ءُ سندھ ءِ وڑیں پُرایمنیں سرزمین ءَ نسلی ءُ ٹکی ٹولیانی یک ھلاس نہ بوکیں وت ماں وتی جنگے ئے نیمگ ءَ تیلانک دیگ ءَ اَنت- اشی ءِ درور ءَ گوستگیں روچ ءَ کراچی ءِ پریس کلب ءِ دیم ءَ سندھی ءُ بلوچانی بیگواہ بوتگیں مردمانی ھاتر ءَ برجاہ داشتگیں بنجل ءِ سر ءَ آھانی داشتگیں ناشرکاریں گل سپاہ صحابہ ءِ اُرش ـ ما تھنا اے اُرش ءَ ایر نہ جنیں بلکیں سندھی راج ءَ را دیمتر ءَ بؤکیں درسیں ریاستی داشتگیں ٹکی ءُ وت ماں وتی میڑینگی جنگی ءَ ھم شیوار کنگ لوٹ ایں –

آھانی گُوشگ انت کہ ما دنیا ءِ میان اُستمانی ادارہ ءُ انسانی ھکانی گلاں گوں لوٹ کن ایں کہ سندھ ءِ تہ ءَ ریاست ءِ ساھگ ءَ ودی بؤکیں اے وڑیں سبزینتگیں زوردستانی سر ءَ گامگیج بزور ایت- کہ آ سندھ ءِ راجدپتری پُرایمنی ، زانت ءُ پلگار اِتگیں چاگرد ءِ سر ءَ اُرش کنگ ءَ چی سندھ ءِراجدپتری پجار ءُ راجی ھستی ءَ گھینگ لوٹ اَنت –

اے درگت ءَ رھشونانی گوشگ انت کہ سرجمیں سندھ ءِ تہ ءَ سد ءَ گیش سندھی راج دوست پاکستانی چیریں ادارھاں آوار جتگ ءُ بیگواہ کرتگ انت- کہ اھانی تھا ھژدہ سالی ئیں بشیر شر ءُ عاقب چانڈیو وڑیں کسان سال ھم ھوار انت- ھشتاد سالی ئیں سید بچل شاہ ھوار سندھ مزن آمیدگیس ءِ وکیل ایڈوکیٹ مھب آزاد لغاری چل سالی ئیں استاد شادی خان سومرو، پنجاہ ءُ نُہ سالی ئیں سندھ پبلک ورکس ڈپارٹمنٹ ءں کاردار ایوب کاندھڑو، پھٹان خان زھرانی، امتیاز خاصخیلی، ریاض خاصخیلی ، امداد شاہ، انصاف دایو، مرتضیٰ جونیجو، شاھد جونیجو، ستار ھکڑو، مسعود شاہ مرتضیٰ سولنگی، نسیم بلوچ ءُ مھران میرانی ءَ ھوار دگہ سدانی کچ ءَ سندھی باسک ھوار اَنت-

آھاں گْوشت کہ اے درسانی یلہ کنگ ءِ ھاتر ءَ ما میان اُستمان، ایمنسٹی انٹرنیشنل، سپریم کورٹ ءُ انسانی ھکانی درسیں گلاں چہ لوٹ کن ایں کہ آ بیگواھیں مردمانی یلہ کنگ ءِ ھاتر ءَ وتی جوانیں گاماں پیلو بہ کن انت-

دومی نیمگ ءَ وائس فار مسنگ پرسنز آف سندھ ءِ سرکماش سورٹھ لوھار ءَ رسانکدراں وتی شنگ کرتگیں درشان ءِ تہ ءَ گوشتگ کہ دنیا ءُ زندگیں انسان سندھ ءُ بلوچستان ءَ زورانسری ءَ آوار جنی ءُ انسانی ھکانی لگتمالی ءَ وتی بے تواری ءَ ھلاس بہ کن انت پرچاکہ مئے گور ءَ زھرشانی کنگ ءُ توار چست کنگ ءَ ابید دگہ ھچی راہ نیست کہ ھما وڑ ءَ ما وتی بیگواھیں مردماں واتر بیاریں –

آئی ءَ گُشت کہ ایڈوکیٹ مھب آزاد لغاری ءَ ھوار سرجمیں سندھ ءَ زورانسری آوار جنی بیگواہ بوتگیں درسیں مردمانی یلہ کنگ ءِ ھاتر ءَ مروچی حیدر آباد ءَ کنگ بوتگیں مسنگ پرسنز پند ءَ کش اِتگیں روانک ءَ پد لاڑکانہ، سکھر ، میرپور خاص ءُ کراچی ءَ ھم مسنگ پرسنز پند ءَ روانک کش اِیت –

دی بلوچستان پوسٹ

ایرانی لشکر ءَ تیرگواری کرتگ ءُ بلوچے کُشتگ –

سر بیتگیں ھالانی رد ءَ روکپتی بلوچستان ءِ دمگ میناب ءِ دگ ءَ ھاش ءَ سیادی داروکیں اسحاق شاھنوازی ءِ سر ءَ ایرانی لشکر ءَ تیرگواری کرتگ ءُ کشتگ –

اھوالکار ءِ رد ءَ اسحاق ءِ کھول ءِ گوشگ اِنت کہ اسحاق وتی گاڑی ءِ سر ءَ چہ ھاش ءَ بندر اباس ءَ روگ ءَ بیتگ کہ ایرانی لشکر ءَ میناب ءَ دست داتگ بلے اسحاق نہ اوشتاتگ –

اھوالکار ءِ گوشگ اِنت کہ اسحاق ءَ گاڑی ءِ راھگوزی گون نہ بیتگ چریشی ءَ چہ اسحاق ءَ ترس بیتگ ءُ اسحاق نہ اوشتاتگ ءُ لشکر ءَ آئی ءِ سر ءَ تیرگواری کرتگ –

اھوالکار ءِ گوشگ اِنت اسحاق ءِ جون ءَ مروچی دو روچ گوستگ کہ نادراہ جاہ ءَ ایر اِنت ءُ آئی ءِ مردماں دزبندی کنگ ءَ ابید ھم لشکر جون ءَ دیگ ءَ نہ اِنت –

دی بلوچستان پوسٹ

علامہ اقبال اوپن یونیورسٹی اسلام آباد ءِ ایم فل ءِ نودربر ثناء بلوچ یازدہ مئی دوھزار ءُ بیست پاکستانی پوج ءُ چیریں ادارھانی کارمنداں ھاران ءَ دزگیر کرتگ ءُ بیگواہ کتگ –

ثناء بلوچ ءِ بیگواھی ءِ بارو ءَ گوستگیں روچ ءَ آئی ءِ کھول ےَ شال ءِ پریس کلب ءِ دیم ءَ برجاھیں وائس فار بلوچ مسنگ پرسنز ھِ بنجل ءَ وتی زھرشانی نبشتگ کنائینتگ ءُ آئی ءِ بیگواھی ءِ بارو ءَ گل ءَ را سرپدی داتگ اش –

کھول ءَ راستی پدر کرتگ کہ پاکستانی پوج ءِ کرنل عمر فاروق ءَ اے منّ اِتگ کہ ثناء بلوچ منی گور ءَ اِنت کہ ایشی ءِ پَٹ ءُ پول ءَ یلہ کنان ئے بلے چار ماھے گوزگ ءَ پد ھم ثناء بلوچ یلہ کنگ نہ بیتگ –

بیگواھیں نودربر ءِ کھول ءِ رد ءَ تھانہ روز ھاران ءِ جھمنندیں ثناء بلوچ ء مھمد اسحاق یازدہ مئی دوھزار ءُ بیست ءِ سھب ءِ ساھت ھشت ءَ جوژان ءِ ھند ءَ ھما وھد ءَ بیگواہ کنگ بیتگ کہ بناپ ءِ میتگ ءِ نیمگ ءَ روگ ءَ بیتگ –

آیاں گوشت کہ ثناء بلوچ پاکستانی چیریں ادارھانی ملٹری انٹلجنس (ایم آئی) ءِ کارمنداں پرپٹ ءَ چہ ایر گپتگ ءُ پرپٹ ءَ ھوار آ بیگواہ کرتگ –

کھول ءِ گوشگ اِنت ما پد ءَ دمگ ءِ سیاسی ءُ مزنیں مردمانی گور ءَ شتگ اِنت کہ آ ثناء بلوچ ءِ یلہ کنگ ءَ کرد ءَ پیلو بہ کن اَنت چریشی ءِ سوب ءَ کھول سیزدہ مئی ءَ پاکستانی پوج ءِ کرنل عمر فاروق ءِ گور ءَ شتگ اِنت اود ءَ آئی ءَ منّ اِتگ کہ ثناء بلوچ منی گور ءَ اِنت ءُ آئی ءَ پَٹ ءُ پول کنگ ءَ پد یلہ کن آں –

بلوچستان ءَ بیگواھیں مردمانی درچ روچ پہ روچ گیش بیان اِنت ءُ دومی نیمگ ءَ بیگواھیں مردمانی یلہ کنگ ءِ واستا شال ءِ پریس کلب ءِ دیم ءَ کھولانی زھرشانی ماما قدیر بلوچ ءُ نصر اللہ بلوچ ءِ سروکی ءَ یک دیھکے ءَ چہ برجاہ اَنت –

زانگ بہ بیت ثناء بلوچ علامہ قبال اوپن یونیورسٹی اسلام آباد ءِ ایم فل ءِ اسکالر ءُ نصیر کبدانی لبزانکی دیواب ھاران ءِ سروک اِنت – آ کورونا ویروس ءِ سوب ءَ یونیورسٹی ءِ بند بیگ ءِ سوب ءَ ھاران ءَ اتکگ –

نبشتانک: نِشہ ءُ سیاسی مردمانی چیردستی کُمک

نبشتہ کار: گنی ھیات

دی بلوچستان پوسٹ

چُش ما نہ زان ایں کہ چُنت نوک سوریں بانور ایشاں جنوزامی زند بکشاتگ چنت ھُردکیں چُک ایشاں چہ زند ءِ وشیاں زِبھر کتگ چُنت مات ءِ تاسُکیں بچ چہ مرگ ءَ پیش مرگ ءِ آماچ کتگ اَنت۔

ھما مردماں کہ ما آیاں واجہ ءُ ھاجی ساھب گوش اِیں مئے چاگرد ءِ مستریں چم جھل ءُ بھیا ھمیش اَنت بلکیں بلوچ راج ءِ مستریں دژمن ھم ھمیش اَنت کہ ما واجہ ءُ ھاجی ساھب اِش گوش اِیںءُ ھمیشانی رندگیری ءَ کن اِیں گڑا مئے چاگرد بِھ بود نہ کنت۔

ھنّی مکران ءِ تہ ءَ مستریں اَڈہ کہ نِشہ (منشیات) سپلائی بوْگ ءَ اِنت آ رودبن اِنت، پیسر ءَ چوناھا مستریں اڈّہ مند بلو ءُ جتجو بوتگ اَنت بلے مروچان آ کَمے پشت ءَ اَنت ھمے ھاتر ءَ کہ اے شَپُکّی ھاجی ءُ سیٹ گیشتر روکپتی بلوچستان ءِ مردم اِت اَنت آیاں چیزے وھد بیت کہ پَد ءَ روکپتی بلوچستان ءَ شُتگ اَنت، لھتے تربت ءَ ءُ لھتے کراچی ءَ شُتگ اَنت –

ھمے ھاتر ءَ مروچاں مکران ءَ رودبن نِشھیانی ءُ شَپُکّیانی بزاں منشیات ءِ مستریں اڈّہ جوڑ بوتگ ۔

20 کلدار ءَ بگر داں ٹنّ ءُ بارانی ھساب ءَ بھا بوْگ ءَ اِنت گردی جنگل ءَ ءُ دالبندین ءَ چہ نِشہ شَپُکّی درمان ءُ (منشیات) ھمے راہ ءَ رَد بنت دیم پہ پنجگور ءِ روڈ ءَ انچوش دیم پہ بلیدہ الندور نوانو ھمے یکّیں راہ ءُ دَگ اِنت کہ سیٹ ءُ شَپُکّی ھاجی کار مرز ءِ کنگ ءَ اَنت ، (کلبر ءَ) کاینت رودبن ءَ ھمے سامان نِشہ ءُ دَرمان ءُ شیشہ ءُ تریاک ءُ چرس ءُ ھیروین ءُ اپوین ءُ کریسٹاراں ھالیگ کن اَنت شَپُکّی ھاجی ءُ سیٹانی کِرّ ءَ چمداں چہ پَد مال ءُ سامان ءُ نِشھی دَرمان بھر ءُ تھر ءُ شنگ ءُشانگ بنت۔

پَد ءَ گوادر ءِ تیاب ءَ چمدان ایران ءُ خلیج ءُ یورپ ءُ ءُ یمن ءَ بازیں مُلکاں بھر ءُ تھر شِنگ ءُ شانگ بنت۔

اے شَپُکّی ھاجی گیشتر شھدگ بزاں (مین روڈ ءَ ) دیم پہ دیم کارمرز کنگ ءَ اَنت، دومی راہ تیاب اِنت واجہ ءِ دیم پہ دیم ءَ رَد بنت۔

نی پشکپتگیں نِشہ بزان(منشیات) ھرچی کہ پشکپتگیں ءُ ھما کہ دیم ءَ ریجکٹ بیتگ ءُ دیم ءَ نہ شُتگ اَنت، بزاں دیم ءِ مردمان اے نِشہ دوست نہ بوتگ ءَ اَنت ھرابین اِش لیک اِتگ اَنت۔

پشکپتگیں نِشھی درمان (منشیات) ءَ وتی میتگ ءُ بازار ءُ شھرانی تہ ءَ بھر ءُ تھر ءُ شِنگ ءُ شانگ بنت سرجمیں بلوچستان ءَ رودراتکی بلوچستان بگر داں روکپتی بلوچستان ءَ سراوان ءُ جلاوان ءُ آواران مکران ءَ بھر ءُ تھر بنت۔

پَد ءَ ھمے نِشھی دَرمان ءُ (منشیات)کسانُکیں شَپُکّی بزاں تولہ ءُ گرام ءِ سَر ءَ بھا کن اَنت کسانیں میتگ ءُ بازاراں –

تربت، گوادر، پسنی، اورماڑہ، جیونی، دشت، مند، بلیدہ ءُ زامران، پنجگور، گیشکور، مشکے، جب، ویندر، شال داں برو کوہ سلیمان ءَ سرجمیں بلوچستان ءَ اے نِشھی زَھر شِنگ ءُ شانگ اِنت-

بلے ھنّیگیں وھد ءَ مستریں شَپُکّی بزاں (ڈیلر) رودبن ءَ اَنت
رودبن ءِ سیٹ ءُ شَپُکّی ھاجیاں دراھیں اِلاکہ ءِ مردم زان اَنت بلے کَس ساہ نہ کَش اِیت کَسی گوش ءَ مُورے ھم نہ وارت، کَس اے شَپُکّی ھاجیانی نام ءَ نہ گیپت کہ ھمے ھاجیاں سرپد بہ کنت کہ شما اے کار ءَ بند کن اِت –

چُش بلیدہ ءُ زامران ءِ نام ءَ بلاھیں روانکے دَر کنگ بوْت تربت کیچ ءَ زھرشانی کنگ بوت اگاں انچیں بلاھیں روانکے رودبن ءَ دَر بہ کن اَنت ءُ ھمے سیت ءُ شپکّی ھاجیانی لوگ ءَ برو اَنت ءُ سرپد اِش بہ کن اَنت،
انسان ءِ گرانکدریں جان بے نِھر اِنت یک انسانے ءِ جان ءِ رکّینگ سرجمیں انسانیت ءِ رکّینگ برابر اِنت ۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

دی بلوچستان پوسٹ

ڈیرہ مراد جمالی ءَ یکیں لوگے سَے جنکوئیں چُک کانال ءَ کپتگ ءُ بیران بوتگ انت

ٹی بی پی پتر ءَ سربوتگیں ھالانی رِد ءَ ڈیرہ مراد جمالی ءَ یکیں لوگے سَے جنکوئیں زھگ جان شودگے میان ءَ پٹ پیڑر کانال ءَ کپتگ ءَ بیران بوتگ انت ـ دو گونڈو تُستگیں جاوراں در کنگ بوتگ اَنت ءُ دیم پہ ھسپتال ءَ برگے میان ءَ نیم راہ ءَ بیران بوتگ انت ءُ یک گونڈو شوھاز برجاہ انت ـ

ھندی پولیس رِد ءَ سئیں جنکو ھشت سالی ئیں ریشما بی بی شش سالی ئیں فلک خاتون ءُ نُھ سالی ئیں فریدہ بی بی کہ پٹ فیڈر کانال ءَ جان شودگ ءَ بوتگ انت کہ اناگہ ءَ سئیں گونڈو آپ ءَ بُک اِتگ انت ـ ھما دمان ءَ دمگی مردمے اتگ ءُ فریدہ بی بی فلک حاتون تُستگیں جاوراں چہ آپ در کُرتگ انت ءُ دیم پہ ھسپتال ءَ برگے میان ءَ راھ ءِ نیم ءَ بیران بوتگ انت وھدیکہ گڈی ھالاں تاں ریشما بی بی ءِ شوھاز برجاہ بوتگ ـ آئی ءِ لاش آپ ءِ تھا چہ دست نہ کپتگ ـ
دوئیں جنکوانی لاش کھول ءِ گور ءَ سر کنگ بوتگ انت ـ

سئیں بُک اِتگیں جنکو ڈیرہ مراد جمالی ءَ آبڑو میتگ ءَ وارڈ نمبر دوازدہ ءِ نندوک انت ـ

زانگ بہ بیت چد ءُ پیش ھم پٹ فیڈر کانال ءَ بازیں مردمے جانشودگے میان ءَ بُک اِتگ ءُ بیران بوتگ اَنت ـ

ھمے وڑ مائی پیر بیلہ ءَ کور ءَ جان شودگ ءِ میان ءَ دو مردم بُک اِتگ ـ یک مردمے در کنگ بوتگ وھدیکہ یک مردمے بیران بوتگ ـ

بیران بوتگیں مردمے پجار محمد جان پنام مٹھو ءِ نام ءَ چہ بوتگ ـ
محمد جان ءِ لاش چہ کور درکنگ بوتگ ءُ ھسپتال ءَ برگ بوتگ ـ

دی بلوچستان پوسٹ

جسٹس فار شاھینہ شاھین بلوچ کمیٹی ءِ نیمگ ءَ کیچ ءِ بنجاھی شھر تربت ءَ مروچی دومی روچ ءَ شد کشیں ھرتال برجاہ اِنت –

تربت ءَ شھید فدا چار راہ ءِ سر ءَ زھرشانی ءَ شاھینہ شاھین ءِ کھول ءُ چاگردی باسک ھوار اَنت –

جرمکارانی دزگیری ءِ واستا شدکشیں ھرتال ءَ چُک ءُ جنیناں بھر زرتگ –

ھمے وھد ءَ شاھینہ شاھین ءِ گوھار ءَ تران کنان ءَ گْوشتگ کہ کوش ءَ مروچی نُھ روچ گوستگ بلے تنی وھدی ھچ رنگیں دزگیری گندگ ءَ آیگ ءَ نہ اِنت –

زانگ بہ بیت بلوچ بُتکار ءُ اھوالکار شاھینہ شاھین نُھ روچ ءَ پیسر آئی ءِ لوگ واجہ ءَ کُشتگ ءُ اے وھد ءَ بلوچستان ءَ کوش ءِ بگیری ءَ مھلوک زھر ءِ درشان ءَ کنگ ءَ اِنت ءُ جتائیں شھراں زھرشانی برجاہ اَنت بلے تنی وھدی کُشندہ انگت ءَ دزگیر کنگ نہ بیتگ –

دی بلوچستان پوسٹ

سر بیتگیں ھالانی رد ءَ فیروز آباد ءُ راسک ءِ میانی دگ ءَ گاڑی ءِ چَپی بیگ ءِ سوب ءَ بیست ءُ یک سالی ئیں ورنایے سوتکگ ءُ زدگ بیتگ –

وئیل ءَ پد سوتکگیں مردم راسک ءِ نادراہ جاہ ءَ برگ بیتگ ءُ اود ءَ بنداتی ءَ سوچکانی درمان ءَ پد زاھدان ءَ برگ بیتگ –

ھمے وڑ ءَ کاش ءَ دیم پہ زاھدان ءَ روکیں سَے گاڑی دگ ءِ وئیل ءِ آماچ بیتگ اَنت –

اھوالکار ءِ گوشگ اِنت کاش ءَ دیم پہ زاھدان ءَ رؤکیں گاڑیانی وئیل ءَ شش مردم بیران بیتگ اَنت ءُ پنچ زدگ بیتگ اَنت –

اھوالکار ءِ گوشگ اِنت روکپتی بلوچستان ءَ زورگار ءِ نہ بوگ ءِ سوب ءَ ورنا ساہ بریں کارانی تہ ءَ وتی لاپ ءِ والینگ ءَ در کپ اَنت چریشی ءَ چہ گیشتریں وئیل بیگ ءَ اَنت –

بیران ءُ زدگ بیتگیں مردمانی پجار نہ بیتگ اَنت –

نبشتانک: مئے لبزانک ، مرچیگیں اهد ءَ

نبشتہ کار: آرپ وپا بلوچ

جهان ءِ نامداریں لبزانک نویس اومر یونان اومر اِنت، همک اهد ءِ نمائندگیں شائر زانگ بیت آئی ءِ نکان ءُ ساچشت کم ءُ گیش درائیں زباناں رجانک کنگ بیتگ اَنت، آئی ءِ آلمی نامداری ءِ سوب دو جوک (نظم ) زانگ بنت۔

همے جوکانی توک ءَ آ یونان ءِ جنگول ءُ بهادریں سپاهیگانی نازینگ ءَ ابید یونانی کوم ءِ دود، رسم ءُ رواج، گیرت مندی، تب ءُ مزاج کلیں تَک ءُ پهناتاں پدر کنت هما درشانداب ءَ کارمرد کنت چد ءُ پیسر کس ءَ نہ کتگ۔

گُش اَنت ارستو ءِ شاگرد سکندر ءَ مدام اومر ءِ جوکانی کاپی یے گون بیتگ آئی ءَ همک جنگ ءَ وتی پوجی همے جوک ءِ دیدانک ءَ پد رد ءُ بند داتگ اَنت۔

نی بیا اِت نگاهے وتی مرچیگیں لبزانک ءُ وتی زمینی جاور هالانی سر ءَ جنیں –

مرچی بلوچ راج ءِ کومی پجّار بلاهانی دپ ءَ اِنت، گس گس بُن اِنت، همک روچ ورناهانی زاگلیں جون کپگ ءَ اَنت، یک پُر آشوبیں اهدے ءَ ما زندگیں، مئے لبزانک نویس شائر ادیب چی کنگ ءَ اَنت؟

“پر کن چلیم ءَ اشکرے سرا دئے
کمو بہ کشّ جان تو کمو من ءَ دئے”

“چنچو جنک ءَ دل وتی داتگ من ءَ یات نہ اِنت
چنچو شراب گوں سنگتاں وارتگ من ءَ یات نہ اِنت”
شائر زبیر مکتار

“هرکس کہ بے وپا اِنت وتی زمّہ دار وت اِنت”
شائر زبیر مکتار، گشنده سلیم امین

“من نزان آں زبیر من چی بہ کناں
کئی من بہ زیراں داتگیں سوجاں یک جنکے شراب دنت من ءَ
یک جنکے گش ایت مہ ور سوچ ئِے”
شائر زبیر مکتار گشنده سلیم امین
منی نزّ ءَ دیمتر ءَ زبیر ءِ شائری همد ءَ کیت آسر بیت۔

کہ “چنچو جنک ءَ گوں وپت واب کتگ من ءَ یات نہ اِنت، چنچو بچک ءَ من ءَ منی گون ءَ وپت ءُ واب کتگ من ءَ یات نہ اِنت”

پهل کن اِت، لبزانک آدینک اِنت تو چی پیشدارگ ءَ ئے چی وتی آیوکیں پدریچ ءَ سوگات کنگ ءَ ئے؟ مارا مئے لبزانک بالاچ ءِ جنگی شیرانی دروشم ءَ رس اِتگ۔

یا کہ رومان اے رنگ ءَ نہ بیتگ شے مرید ءُ هانی هم آشک بیتگ اَنت، مست توکلی هم بیتگ، آیاں چُش لبزانک ءُ کوندر نہ کتگ۔

اِے جنکانی تام شما برتگ اِے جنکانی سنگینی اِے جنکانی بلوچی همیش اِنت کہ شما آئی ءَ پیش دارگ ءَ اِت زاناں مُلا پازل ءَ درشان نہ کتگ، اتا شات ءَ نہ کتگ ساهر ءَ نہ کتگ۔

“هردیں داب کنت نودی شل
گندیم گونگ ءُ گرکی تل
آسیگوں مہ کن دردانگ
دُرّیں اشرپی ءِ چانگ”
مُلاّ پازل

“آ سورت ماهکان رنگیں
گوں بُرواناں کمان رنگیں”
ناکو مراد ساهر

“بیاکہ استالاں جَتَگ پل ماں شپ ءِ گیوار ءَ
ماهکان ءَ اِے وتی آب ءِ روان شنگینتگ شات”

شمارا اے سُد ھست اِنت کہ شما یک کومے ءِ شائر اِت، راستی ءُ جنگ ءِ نمائندگی ءَ بِلّ اِت، بلے بلوچی لبزانک ءَ چش زوال مہ کن اِت کم چہ کم یک آشکی بازاری شیرے بِہ بیت آ چہ بلوچی تب ءُ میلاں در مہ بیت-

“آ یک سلیم سابتے ھست اِنت
شپ ءُ روچ کپتگ همے گهار ءِ سر ءَ آئی ءَ چار چک ھست اِنت
تو کجام بالی گراب ءَ گون ئے”

ارشاد پرواز هم پشت نہ کپتگ۔

“چارده اِنت ماه ءَ شپی
کَے شراب مرچی نہ وارت
مئیگ ءُ ارشاد ءِ نہ بیت
مئے دل ءَ پچ گپت ءُ بارت”

تئی هما شائری کجا شت؟

“تئی دردی ءَ کہ بانک من ءَ شائری نہ ساچ اِیت
من لبز لبز ءَ بنداں منی پکر ءَ آس آچ اِیت”

یکے کیت گش ایت من سعادت ھسن منٹو آں من رنڈیانی سر ءَ آزمانک نویس آں، سعادت ھسن منٹو رنڈیانی توک ءَ بیتگ آئی ءَ هما درد مار اِتگ اَنت آئی ءَ هما جاور ءُ راستی پیش داشتگ اَنت۔ سعادت ھسن منٹو اگاں جون ءُ لاشانی بهارگاه ءَ بہ بیتیں آئی ءَ هجبر رنڈیانی سر ءَ نبشتگ نہ کتگ اَت۔

گولو ءَ گوشت “من کبگ ءِ رواجاں کناں وتی رواج ئِے بے هال کت اَنت” شما هما بسات کتگ۔

دومی گشندهاں لوٹ ایت آ سنگین بہ بنت چی ءَ کہ ازم کار ، لچّہ کار، ادیب وتی راج ءِ آدینک اَنت۔ اگاں کسے گش اِیت من ءَ ترس اِیت گُڑا آ مهربانی بہ کنت بروت ریڈی یے بہ جنت چماٹا بها بہ کنت ، مئے زبان ءُ لبزانک ءَ چو استان ءِ وڑ ءَ مسک مہ کنت راجدپتر کس ءَ ماپ نہ کنت۔

بلوچستان ءُ بلوچی زبان گوں مڑاه داراں ھست بات۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔