TBP Balochi

دی بلوچستان پوسٹ

مکران ءِ زر ءَ پاکستانی زر پوج ءَ روکپتی بلوچستان ءِ ھشت مردم دزگیر کرتگ اَنت –

سر بیتگیں ھالانی رد ءَ پانزدہ ستمبر ءَ پاکستانی زر پوج ءَ روکپتی بلوچستان ءِ دمگ دمپگ دشتیاری ءِ جھمنندیں ھشت مردم مکران ءِ زر ءَ گپتگ ءُ برتگ اَنت –

اھوالکار ءِ رد ءَ ھشتیں مردم ھما وھد ءَ دزگیر کنگ بیتگ اَنت کہ آیاں روکپتی بلوچستان ءَ بار جتگ ءُ دیم پہ رودراتکی بلوچستان ءَ آیگ ءَ بیتگ اَنت کہ پاکستانی زر پوج نیوی ءَ گپتگ ءُ برتگ اَنت –

اھوالکار ءِ رد ءَ گپتگیں مردماں پہ لاپ والینگ ءَ سیمسری ءَ گوزی کرتگ ءُ چریشی ءَ چہ آ دزگیر کنگ بیتگ اَنت کہ ورنایاں دگہ روزگاری ءِ آسراتی ءِ نہ بوگ ءِ سوب ءَ مردم لاچار اَنت کہ ھنچیں کاراں دزمانجن بنت –

دی بلوچستان پوسٹ

بلوچستان ءِ مزن شھر شال ءُ مکران ءِ مزن شھدگ ءِ وئیلاں کسان سالیں زھگے ءَ ھوار سَے مردم بیران ءُ چار زدگ بوتگ-

ٹی بی پی پتر ءَ سر بوتگیں ھالانی رِد ءَ شال ءِ دمگ نواں کلی ءَ مدرسہ دگ ءِ سر ءَ پرپٹ ءِ ٹکر جنگ ءَ کسان سالیں زھگے بیران بوتگ –

بیران بوتگیں زھگ ءِ پجّار زیب رحمان ءِ نام ءَ بوتگ –
دمگی پھازداراں ھما دمان ءَ جون دست گپتگ ءُ نادراہ جاہ ءَ سر کُتگ – اود ءَ اژدری چار ءُ ٹپاس پد زھگ ءِ جون کھول ءِ گور ءَ سر کنگ بیتگ –

دومی وئیل مکران مزن شھدگ ءَ بزی ءِ کنڈگ ءِ نزیک ءَ دیم ءَ اتکگ کہ ٹریلر ءُ گاڑی ءِ ڈیک ورگ ءِ سوب ءَ دو مردم بیران ءُ چار زدگ بوتگ اَنت –

وئیل ءَ آصف ء محمد نادر ءُ رضوان ء عبدالرزاق بیران بوتگ انت وھدیکہ موسیٰ، صادق، سجاد ءُ عزیز ٹپی بوتگ انت –
بیران ءُ ٹپی بوتگیں مردم اورماڑہ ءِ نادراہ جاہ ءَ برگ بوتگ انت –

بیران ءُ ٹپی بوتگیں مردم کراچی ءِ دمگ لیاری ءِ جاھمنند انت –

سر بیتگیں ھالانی رد ءَ روکپتی بلوچستان ءِ تیابدپی شھر چھبار ءَ ایرانی لشکر ءِ زنداناں چہ سَے مردم یلہ کنگ بیتگ اَنت-

دی بلوچستان پوسٹ

یلہ بیتگیں مردمانی پجار مھمدی ھملی ء عبداللہ، ارسلان ھملی ء چراگ ھان ءُ ھسام ھملی ء عبدالغفور ءِ نام ءَ زانگ بیتگ اَنت –

اھوالکار ءِ رد ء اے ھرسئیں مردم کیشکور سرباز ءِ نندوک اَنت ءُ پنچ ماہ ءَ پیسر ایرانشھر ءَ وتی گاڑی ءِ شر کنگ ءَ روگ ءَ بیتگ اَنت کہ ایرانی چیریں ادارھاں دزگیر کرتگ اَنت –

اھوالکار ءِ رد ءَ دزگیر کرتگیں مردم ھما وھد ءَ دزگیر کنگ بیتگ اَنت آ دہ روچ ءَ چیریں زنداناں برگ بیتگ اَنت ءُ آیانی کھول ھچ رنگ ءَ سرپد کنگ نہ بیتگ اَنت چِد ءُ پد آ زاھدان ءَ زندانی کنگ بیتگ اَنت –

اھوالکار ءِ رد ءَ یلہ بیتگیں مردم سَے روچ پیسر چھبار ءَ یلہ کنگ بیتگ اَنت ءُ اشانی سر ءَ بھتام بیتگ کہ اے ڈیھ دشمنیں کاراں دزمانجن بیتگ اَنت –

اھوالکار ءِ رد ءَ بازیں مردم ھمے رنگ ءَ زندانی کنگ بیگ ءَ اَنت بلے اشانی تہ ءَ بازیں مردم پد ءَ یلہ کنگ ءُ آیانی سر ءَ بے سریں بھتام جنگ ءُ پد ءَ آیانی پشتی ھچ زاھری پیداک نہ اِنت –

دی بلوچستان پوسٹ

بلوچستان ءِ دمگ کیچ ءِ بنجاھی شھر تربت ءَ جسٹس فار شاھینہ شاھین کمیٹی ءِ نیمگ ءَ انساپ ءِ نہ رسگ ءِ ھلاپ ءَ پبلک لائبریری ءَ چہ شھید فدا چار راہ ءَ مروچی یک روانکے کشگ بیتگ –

روانک ءِ بھر زیروکیں مردمانی دست ءَ نبشتگیں کاگد ءُ بینر بیتگ اَنت کہ آیانی سر ءَ اھوالکار شاھینہ ءِ انساپ ءِ رسگ ءِ اوگام نبشتگ بیتگ اَنت –

شاھینہ ءِ کھول ءَ ھوار ال پاٹی کیچ، ایچ ار سی پی، بی ایس او ءُ جتائیں چاگردی ادارھاں بندوکیں باسکاں روانک ءَ بھر زرتگ –

روانک ءِ مھلوک شھدربرجاہ ءِ دگ ءَ تھرما میٹر چار راہ ءَ گوزان ءُ شھید فدا چار راہ ءَ زھرشانی اش کرتگ –

زھرشانی ءَ ایچ ار دی پی ءِ ریجنل کوارڈی نیٹر پروفیسر غنی پرواز ءَ ھوار دگہ سروکاں کُشتگیں اھوالکار شاھینہ ءِ کوش ءَ دو ھپتگ گوستگ بلے تنی وھدی دزگیری ءَ دمگدار ءُ پولیس ءِ کرد ءِ سر ءَ ایراد گپتگ –
سروکانی گوشگ انت کہ پولیس تلبگاری ءِ کنگ ءَ اِنت جرمکار ءَ رکینگ ءَ اِنت –

روانک ءَ بھرزیروکیں مردماں کیچ ءِ دمگدار ایراد گپتگ ءُ گوشتگ کہ کشندہ ءِ سر ءَ مزنیں دستانی ھواری ءَ پولیس دزگیر کنگ ءَ ترسگ ءَ اِنت –

زانگ بہ بیت شاھینہ شاھین ءِ کوش ءِ بگیری ءَ بلوچستان ءِ جتائیں جاھاں زھرشانی برجاہ اَنت –

ھمے وڑ ءَ بلوچ کمیونٹی نیدر لینڈ ءَ ھم زھرشانی ءِ جار پرینتگ –
ھمے وڑ ءَ نیشنل پاٹی ءَ ھم مروچی بیتگیں زھرشانی ءِ پلامرزی کرتگ ءُ شاھینہ شاھین ءِ کشندہ ءِ دزگیری ءِ لوٹ کرتگ ءُ کھول ءِ انساپ رسینگ ءِ لوٹ کرتگ –

زانگ بہ بیت شاھینہ شاھین دو ھپتگ ءَ پیسر آئی ءِ لوگ واجہ ءَ کُشتگ ءُ تتکگ –

شاھینہ شاھین بلوچ بتکار، ٹی وی اینکر ءُ بلوچ زالبولانی اولی تاک دزگوھار ءِ شونکار بیتگ –

دی بلوچستان پوسٹ

پنجگور ءِ دمگ گچک ءُ کش ءُ گوری دمگاں پاکستانی پوج ءَ مروچی سھب ءَ لشکر کشی بندات کرتگ –

دمگی مردماں ٹی بی پی ءَ گوں گوشتگ کہ گچک ءَ پینکلاچ ءِ ھند ءَ پوج ءَ نوکیں بنجلے جوڑ کرتگ کہ اود ءَ جتائیں جاھاں لشکر کشی ءِ واستا پوج پیش گامی کنگ ءَ اِنت –

دمگی مردماں گْوشت کہ چہ پینکلاچ ءَ واشک ءِ نیمگ ءَ پوج روگ ءَ گندگ بیتگ بلے تنی وھدی دمگاں جانی ءُ مالی تاوانانی بارو ءَ سرپدی نہ بیتگ –

زانگ بہ بیت گوستگیں ماہ ءَ گچگ ءِ جتائیں دمگ لوھڑی، ھوڑ، کلانچ، لوھڑی ڈاٹ، جوانتاک، گونی، اوٹل ءُ دگہ کش ءُ گوری دمگاں بازیں کَچے ءَ پوج ءَ آپریشن بندات کرتگ اَت کہ داں دَہ روچ ءَ برجاہ بیتگ اَت -اے وھداں جنین ءُ چُکاں ھوار بازیں مردم دزگیری ءَ پد بیگواہ کنگ ءِ ھال اتکگ اَنت ھمے وڑ ءَ جھمنندیں مردمانی لوگ ءُ کِشت ءُ کشار ماندارگ ءِ راستی ھم بیتگ اَنت –

ھمے وڑ ءَ آواران ءِ دمگ منگلی،وادی، زیارت ڈن، قندھار ءِ کوھی دمگاں ھم پاکستانی پوج مانریتکگ –

دمگی مردمانی رد ءَ لشکر کشی آماچیں دمگاں پوج ءِ نیمگ ءَ جتائیں جاھاں مارٹر آس دیگ بیتگ بلے دگہ جانی ءُ مالی تاوانانی ھالانی بارو ءَ سرپدی نہ بیتگ –

لشکر کشی آماچیں دمگانی سر ءَ پوجی لشکر کشی ءِ باور ءَ سرکاری واکدارانی نیمگ ءَ تنی وھدی ھچ گوشگ نہ بیتگ –

بلوچستان ءِ مزن شھر شال، قلعہ عبداللہ، ھب ءُ دکی ءَ تیرگواری ءِ وئیلاں سَے مردم بیران بوتگ ءُ سَے مردم زدگ اَنت –

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ بلوچستان ءِ مزن شھر شال ءَ تیرگواری ءِ وئیل ءَ یک مردمے بیران بوتگ-
اے وئیل شال ءِ دمگ چمن ھاؤس ءَ بوتگ کہ سِی ءُ دو سالی ئیں موسیٰ تاجک نامے مردمے تیرانی آماچ بوتگ ءُ بیران بوتگ-

ھمے وڑ قلعہ عبداللہ ءَ شال ءُ چمن ءِ دگ ءِ سر ءَ مالدارانی میان ءَ جیڑہ ءِ سر ءَ دو ٹولیانی میان ءَ تیرگواری بوتگ –
تیرگواری ءِ آسر ءَ دو مردم بیران بوتگ –

اھوالکار ءِ رِد ءَ بیران بوتگیں مردم تیرگواری دارگ ءِ ھاتر ءَ اتکگ بوتگ انت کہ ھمے میان ءَ دوئیں مردم تیرانی آماچ بوتگ ءُ بیران بوتگ انت-

دومی نیمگ ءَ بلوچستان ءِ باپاری شھر ھب ءَ ڈُنگی ءَ اتکگیں دُزانی تیرگواری ءَ چہ دو مردم محمد اقبال ءُ عبدالحفیظ ٹپی بوتگ انت ـ

ھمے وڑ بلوچستان ءِ دمگ دکی ءَ سلاہ بندیں مردماں گوستگیں روچ ءَ لیویز کارگس ءِ دیم ءِ دکان ءَ تیرگواری کتگ-
تیرگواری ءِ آسر ءَ ورناہ سید کلیم شاہ ء سید انور شاہ جاھمنند عمرآباد دکی ٹپی بوتگ –
دنیگت ءَ زانگ نہ بوتگ کہ کجام سوب ءَ تیرگواری کنگ بوتگ-

جتائیں دمگاں چہ زدگ ءُ بیران بوتگیں مردم ھندی ھسپتالاں برگ بوتگ انت – اژدری چار ٹپاس ءَ پد جون کھولانی گور ءَ سر کنگ بوتگ انت-

دی بلوچستان پوسٹ

بلوچستان ءِ دمگ آواران ءَ اینٹی ڈرک کمیٹی ءِ نیمگ ءَ نشہ ءِ بگیری ءَ زھرشانی روانک ءِ کشگ بیتگ –

روانک ءَ بھر زیروکیں مردمانی دست ءَ پلے کارڈز ءُ بینر بیتگ اَنت آیانی سر ءَ نِشہ ءِ بگیری ءَ اوگام نبشتگ بیتگ اَنت –

روانک آواران ءِ پریس کلب ءَ چہ بندات بیتگ ءُ ڈی سی کمپلکس ءَ تران بیتگ ءُ یو بی ایل بینک ءِ دیم ءَ مُچی ءِ دروشم ءَ سرجم بیتگ –

ھمے وھد ءَ سروکاں بھرزیروکیں مردمانی دیم ءَ تران کنان ءَ گْوشتگ کہ نِشہ ءَ چہ پلگاریں چاگردے مارا درکار اِنت – دانکہ مئے چاگرد نشہ ءِ بگیری ءَ توار چِست نہ کنت ما ھمے وڑ ءَ مانگشان بہ ایں -ءُ گیش روانک کشگ بنت –

ھمے وڑ ءَ کیچ ءِ دمگ دشت ءَ ھم دشگ سیول سوسائٹی ءِ نیمگ ءَ نشہ ءِ گر ءُ دار ءُ نشھیانی جاندراھی ءِ واستا دیوان بیتگ –

اے درگت ءَ نشہ ءِ گر ءُ دار ءِ بارو ءَ سروکانی گُشتگیں گپاں آؤکیں وھد ءِ چار ءُ ٹپاسی بیتگ –

چریشی ءَ پد بنجاھی کمیٹی ءِ اڈ دیگ کہ (انسداد منشیات کمیٹی دشت) ءِ نام ءَ وتی زمہ واریاں پیلو کنان ءَ نشہ ءَ چہ پلگاریں دشت ءَ وتی جھداں ترندی ءَ برجاہ دار اِیت ءُ سبزینگ ءِ سینٹر ءِ زوت سرجم کنگ ءَ زوت دمگی کمیٹیانی کمک ءَ وتی کرد ءَ پیلو کنت –

کیچ ءِ دمگ بلیدہ ءَ سر بیتگیں ھالانی رد ءَ لیویز لشکر ءَ نشھیانی بنجلاں بیڑ برتگ ءُ بازیں نشہ بھاکنوک دزگیر کرتگ اَنت –

بلے بلیدہ ءِ ھم ورنایاں کہ نشہ ءِ بگیری ءَ جوانیں رنگے ءَ زرمبشتے بندات کرتگ آیاں واکدارانی کارپدانی سر ءَ نااُمیتی درشان کرتگ –

میجر نورا ءُ ایندگے سنگتانی شھیدی ءَ ھواریں ریاستی دلارانی کوش ءِ زمّہ واری ءَ منّ ایں – بی ایل ایف

دی بلوچستان پوسٹ

ٹی بی پی ھال پتر ءَ سربوتگیں ھالانی رِد ءَ گوستگیں روچ ءَ پنجگور ءِ دمگ چتکان بازار ءَ گرلز ھائی سکول گریب آباد دگ ءِ نزیک ءَ گیراج ءِ دیم ناشناسیں سلاہ بندیں مردماں ریاستی ڈیتھ اسکواڈ کارمند احمد اللہ ء بشیر احمد ءُ امر ء محمد حنیف سرا تیرگواری کُتگ-

تیرگواری ءِ آسر ءَ ریاستی ڈیتھ اسکواڈ ءِ یک کارمند ھما دمان ءَ مُرتگ وھدیکے آئی ھمراہ زدگ بوتگ-

دومی نیمگ بلوچ آجوئی لوٹوکیں سلاہ بندیں گل بی ایل ایف ءِ جارکش میجر گھرام بلوچ ءَ رسانکدراں وتی شنگ کرتگیں درشان ءِ تھءَ ریاستی دلارانی سرءَ بوتگیں اُرش ءِ زمہ واری منّ اِتگ گوشتگ کہ دو شمبے ءِ روچ ءَ پنجگور ءِ دمگ چتکان غریب آباد میتگ ءَ سرمچاراں ریاستی کارمند احمد ء بشیر احمد ءِ سرءَ اُرش کُتگ ءُ کُشتگ- او آئی ھمراہ امر ء محمد حنیف ٹپی کُتگ-

جارکش ءَ دیمتر ءَ گوشتگ کہ احمد پروم وئیل ھوار دگے بازیں کتکاریاں پاکستانی پوج ءِ گوم ءَ ھوار بوتگ – اے ریاستی چاریگ بلوچانی مکبری، آوار جنی ءُ کوش ءَ تچکی ءَ گوں ریاست ءَ ھمگرنچ بوتگ- او آئی ءِ ھمراہ ٹپی بوتگیں امر ھم بازیں براں مکن کنگ بوتگ کہ چُشیں مردماں گوں نزیکی مہ کنت بلے آ یک رندے پدا احمد وڈیں ریاستی دلار ءِ ھمراہ بوتگ-

بی ایل ایف ءِ جارکش میجر گھرام بلوچ ءَ گوشتگ کہ پروم ءِ وئیل ءَ میجر نورا، لیفٹیننٹ نواز، عبدالمالک ءُ مومن ءِ شھیدی ءَ احمد ء بشیر احمد پاکستانی پوج ءِ ھمراہ بوتگ- او ھمودا ٹپی ھم بوتگ – پروم وئیل ءَ بلوچ سرمچارانی شھیدی ءُ او آھانی لاشانی کم شرپی ءُ جھانی کانودانی لگتمالی ءَ پاکستانی پوج ءِ ھمراہ داری کنگے سوب ءَ احمد دو شمبے روچ ءَ پنجگور ءِ شھر ءَ نشانگ کُتگ کُشتگ-

گڈسر ءَ میجر گھرام بلوچ ءَ گوشتگ کہ اے ٹولی ءِ ایندگہ کارمندانی درگت ءَ ھم مارا سرپدی ھست انت ـ پاکستانی پوج بلوچستان ءِ تھا جنگی جُرم ءُ چکچینی ءِ تھءَ ھوار اِنت ءُ اے کُتکاریاں پاکستانی پوج ءِ ھمراہ داری کنوک سزا ھقدار انت ءُ آ بلوچ سرمچارانی نشانگ ءِ سرءَ انت لس مھلوک ءَ چہ لوٹ کنیں کہ اے وڈیں مردماں چہ دور بہ بنت –

دی بلوچستان پوسٹ

سر بیتگیں ھالانی رد ءَ کیچ ءِ دمگ کلبر ءَ پاکستانی پوج ءَ بیڑ برتگ ءُ لشکر کشی کرتگ –

اھوالکار ءِ رد ءَ گوستگیں روچ ءَ کیچ ءِ دمگ کلبر ءَ پاکستانی پوج ءَ بیڑ برتگ ءُ لشکر کشی کنان ءَ زمین ءِ لشکر ءِ ھمراھی ءَ بالگرد ھم ھوار بیتگ اَنت –

اھوالکار ءِ گوشگ اِنت کوھی دمگاں بمبگواریں بالگرداں تیرگواری ھم کرتگ –

اھوالکار ءِ گوشگ اِنت کہ چِد ءُ پد لشکر بلیدہ ءَ مانرتکگ ءُ پَل پَٹ اِتگ اَنت لشکر ءِ لشکر کشی ءِ میان ءَ دگہ آوار جنیانی ھال نہ بیتگ اَنت –

سیاسی ءُ چاگردی مردمانی گوشگ اِنت پاکستانی پوج اے وھد ءَ بلوچستان ءِ جتائیں جاھاں آپریشن ھمک روچ کنگ ءَ اِنت چِد ءُ پیسر پنجگور، مشکے ءُ دشت ءَ ھن بازیں روچاں پوج ءَ آپریشن کرتگ ءُ پنجگور ءَ بازین مردمانی آوار جنیانی ھال بیتگ اَنت –