TBP Balochi

چاریں ورناہ جان شودگ ءِ میان ءَ آپ ءَ بُڈ اِتگ ءُ بیران بوتگ انت۔

دی بلوچستان پوسٹ

بلوچستان ءِ کارباری شھر ھب ءَ ھب کور ءُ لسبیلہ ءِ جو ءَ چار ورناہ جان شودگ ءِ میان ءَ آپ ءَ بُڈ اِتگ ءُ بیران بوتگ انت –

ٹی بی پی پتر ءَ سربوتگیں ھالانی رِد ءَ ھب چوکی ءِ نزیکیں ھب کور ءَ سیل ءُ سواد ءَ شُتگیں سَے ورناہ جان شودگ ءِ میان ءَ آپ بُد اِتگ ءُ بیران بوتگ انت –
دمگی ھالکار ءِ رِد ءَ ھب چوکی ءُ موچکو کراچی پولیس ءِ واکدارانی جیڑھانی سوب ءَ جون کراچی ءُ پد ءَ ھب سیول ھسپتال ءَ برگ بوتگ انت –

دومی نیمگ ءَ ھب ءِ دمگ ساکران ءَ لسبیلہ جو ءَ جان شودگ ءِ میان ءَ یک ورنایے بُڈ اِتگ ءُ بیران بوتگ ـ

بیران بوتگیں ورنایے جون ھندی پولیس ءَ دست گپتگ ءَ ھسپتال ءَ سرکُتگ –

گڈی ھالاں تاں چاریں ورنایانی پجار دنیگت ءَ نہ بوتگ –

ندر پہ مشکے شھیدانی نام ءَ

شائر: آرپ وپا بلوچ

دی بلوچستان پوسٹ

جی جی پہ شهیداناں
آجوئی ءِ ائیداناں
چمروکیں منی مسلم
سالونکیں سئیداناں

زردانی منی آدینک
ماتانی پدا نازینک
مشکے تئی پرزنداں
اهدانی جگر سندا
هاک ءِ آ مریداناں
جی جی پہ شهیداناں

سیاھیں شپ ءِ کندیلاں
جنگانی سلام بیلاں
هونانی تڑاں جنزاں
آشوب ءِ منی دنزاں
چکپروش یزیداناں
جی جی پہ شهیداناں

نازے پہ سراں روداں
پهریزاں وتی دوداں
کولانی پدا جلاں
سدو ءِ وڈا ملاں
کولیگ همیداناں
جی جی پہ شهیداناں

لیاکت تئی مڑاهانی
آرپ تئی وپاهانی
کربان سکندر تئی
مهرانی کلندر تئی
جنز ءِ منی دیداناں
جی جی پہ شهیداناں

انساپ ءِ تہ ءَ دیری انساپ ءِ نہ منّگ

ٹی بی پی شونگال

تربت بلوچستان ءِ دومی مستریں شھر اِنت، تُربت وتی نام ءِ پیم ءَ یک تُربت مانشے ءِ تہ ءَ مٹ کنگ بیگ ءَ اِنت۔ چو وَ اے اھد ءِ بندات ءَ چہ اے شھر ءِ تہ ءَ ھونریچی ءِ بازار گرم کنگ بیتگ اَت، بلے بلوچ زالبولانی کوشانی لھتیں وئیلاں یک بیمناکیں نوکیں بندات ءِ پیش درائی ءَ کنگ ءَ اِنت۔

ھمے سال ءِ 26 مئی ءَ یک بلوچ جنیں آدمے کہ آئی ءِ نام ملکناز اِنت تُربت ءِ شھر ءِ کر ءَ ڈنک ءِ ھند ءَ دُزی یے یک وئیلے ءِ نیام ءَ کُشگ بیتگ اَت۔ کوشکار ھمسائیگاں دزگیر کُتگ اَت۔ کہ آئی ءِ پجار سمیر سبزل ءِ ڈیتھ اسکواڈ ءِ یک کارمندئِے دروشم ءَ پدر بیت۔ ڈیتھ اسکواڈ بلوچستان ءِ تہ ءَ مھکمی ءَ گوں کار کنوکیں ھما سلاہ بندیں ٹولی اَنت، کہ ایشانی گمانی پیم ءَ پاکستانی پوج ءَ سلاہ بند کُتگ اَنت، کہ بلوچ سلاہ بندانی ھلاپ ءَ گامگیج زور اَنت، اشی ءِ مٹ ءَ ایشاں سرجمی ءَ آجوئی دیگ بیتگ۔ اے کوش ءِ بگیری ءَ سرجمیں بلوچستان ءَ زھرشانی بیتگ۔ اِشی ءَ پد دُزانی دروشم ءَ کوشکارانی گون ءَ چی بیت؟ آیانی ھلاپ ءَ زرتگیں گامگیج داں کُجا سر بیت اَنت؟ کس ءَ ھچ ھم سرپدی نیست، مردم تھنا ھمینچو زان اَنت کہ کوشکاراں داں انگت ءَ سزا دیگ نہ بیتگ اَنت۔

ھمے وئیل ءَ چہ تھنا یک ماھے ءَ پد تربت ءَ گوں نزیکیں ھنکین دازن ءَ ھم انچیں یک دزی دروشمیں کوشکارانی ٹولی ءَ دُزی ءِ ھمے پیمیں وئیلے ءِ تہ ءَ، یک بلوچ جنین آدمے کہ آئی ءِ کلثوم اِنت کہ آئی ءِ چکانی دیم ءَ گُٹ بُر اِتگ اش ءُ کُشتگ اِت۔ اے رند ءَ کوشکار تچگ ءَ سوبمند بیتگ اَنت بلے درستاں کوشکار پجا آرتگ اَنت ءُ لنکوک یکیں نیمگ بُرت ءُ پد ءَ جوڑکتگیں ڈیتھ اسکواڈانی سر ءَ چِست بیت اَنت۔ بازیں بلوچ سیاسی جھدکاراں اے پیمیں وئیل پہ بلوچ سلاہ بندیں جنگولاں چہ ریاست ءِ نیمگ ءَ یک بیھار ءِ نامینتگ اَت کہ آیانی کھول ءِ مردم نہ رک اِتگ اَنت۔

14 اگست ءَ پاکستانی پوج ءَ تُربت ءِ ھنکین آپسر ءَ یک 25 سالی ئیں ورنائیں حیات بلوچ آئی ءِ مات ءُ پت ءِ دیم ءَ تیر جت ءُ کُشت۔ بازیں زھرشانی ءُ کوکاراں پد یک پوجی کارمندے ءَ دزگیر کنگ ءُ بند کنگ ءِ ھال دیگ بیت۔ ملکناز ءِ کیس ءِ پیم، اے کیس ھم جتائیں دروگ ءُ نیموناں گوں دراج کش کنگ ءُ دیری ءِ شکار کنگ بیگ ءَ اَنت۔ ڈان نیوز ءِ اھوالکار مبشر زیدی ءِ رد ءَ ھمے پوجی کارمند کرونا وبا ءِ آماچ بیتگ، پمیشکہ آ تھنائی ءَ بند کنگ بیتگ، ءُ آئی ءِ ھلاپ ءَ نی گامگیج ھما وھد ءَ بندات بیت کنت، وھدے آ سرجمی ءَ وش بیت ءُ آئی ءِ کرونا ٹیسٹ نیگیٹیو کیت۔

زوراکیں مردمانی مھروانیں دستانی چیر ءَ کارکنوکانی نوکتریں نشانگ بلوچ زالبول شاھینہ شاھین اِنت۔ شاھینہ تُربت ءَ سیادی داروکیں یک اھوالکار، اینکر پرسن، ازمکار ءُ چاگردی جھدکارے بیتگ۔ آ 5 ستمبر ءَ آئی ءِ مرد مھراب گچگی ءَ کُشتگ اَت، بلے کوشکار داں انگت ءَ گار اِنت۔ کُشگ بیتگیں اھوالکار شاھینہ ءِ گھار زارا شاھین ءَ چاگردی رسانکدر ءِ تندجاہ ٹوئیٹر ءَ بھتام جنان ءَ گوشتگ کہ “مھراب گچگی، پاکستانی پوج ءِ ھاتر ءَ کار کنوکیں ڈیتھ اسکواڈ ءِ بھر اِنت۔ پمیشکا مھکمیں گمانی ھمیش اِنت کہ آ ڈیتھ اسکواڈ ءِ یک بنجلے ءَ باھوٹی دیگ بیتگ۔“ آئی ءَ گیشتر گُشت کہ پولیس ءَ وتی بزگی ءِ درگت ءَ پیسرا درشان کُتگ کہ آ “زوراکیں” مردمانی لوگ ءَ دزگیری ءِ ھاتر ءَ بیڑ بُرت نہ کنت۔

شاھینہ شاھین ءِ کھول ءُ سول سوسائٹی ءِ جھدکاراں 17 ستمبر ءَ تُربت ءِ شھر ءَ یک زھرشانی روانکے ءِ کشگ ءِ جھد کُت، بلے، زارا شاھین ءِ نیمگ ءَ ٹوئیٹر ءَ شنگ کُتگیں یک تامر بندے ءِ تہ ءَ گندگ بیت کہ آ پولیس ءِ تامر جوڑ کنگ ءَ اِنت ءُ بھتام جنگ ءَ اِنت کہ چیریں گلانی گوشگ ءِ پد ءَ پولیس آیانی روانک ءَ دارگ ءِ جھد کنگ ءَ اِنت۔

ایشی ءَ ابید ھم کہ شاھینہ ءِ کوش ءِ پَٹ ءُ پول ءُ کو شکارے دزگیری ءِ ھاتر ءَ اقوام متھدہ ءِ انسانی اگبالانی ھائی کمشنر، پاکستان ءِ 58 زالبولیں اھوالکارانی یک دز نشانے جتگ ءُ نمدی ءِ دروشم ءَ ءُ سَے کمکی دَزکاراں ھم لوٹ کُتگ بلے پد ءَ ھم کشوک چیر اِنت ءُ شاھینہ ءِ کھول ءِ رد ءَ پولیس کوشکار ءِ دزگیر کنگ ءَ ھچ ھم ھُبناک نہ اِنت۔

تُربت ءَ کوشانی نوکتریں وئیلانی پُشدر ءَ اگاں وَ سر زائری ءَ پاکستانی پوج ھوار اِنت یا گُڑا ھما ٹولی کہ آیاں گمانی پیم ءَ پوج ءِ مستری گون اِنت۔ کجام ھم مردم کہ آ بلوچستان ءِ راستیں جاورانی درگت ءَ کمو باز سرپدی اش ھست اِنت، آ شر گمان کُت کنت کہ چُشیں کیسانی تہ ءَ انساپ ءِ اوست دیوانگے ءِ وابے ءِ پیم ءَ اِنت۔

دی بلوچستان پوسٹ

بلوچستان ءَ وانگجاہ پچ بیتگ اَنت کورونا نادراھی ءِ نوکیں نادراھانی دیم ءَ آیگ ءَ پد شال، چمن، ژوپ، گوادر ءُ ڈیرہ بگٹی ءَ یازدہ وانگجاہ بند کنگ بیتگ اَنت ھمے وڑ ءَ لورالائی ءَ میڈیکل کالج،جامعہ بلوچستان ءُ شال ءَ وومن یونیورسٹی ءِ وانگی پُرکاری مھتل کنگ بیتگ اَنت –

وانگی گر ءُ دار بلوچستان ءِ واکدارانی رد ءَ شال ءَ یک زَری وانگ جاھے ءَ ھوار چار وانگ جاھاں کورونا ویروس ءِ رپورٹ بیگ ءَ پد اے ادارھاں وانگی پُرکاری مھتل کرتگ اَنت –

چریشاں ھوار گوادر ءَ سَے، ژوپ، چمن ءُ ڈیرہ بگٹی ءَ یک یکے وانگ جاہ بند کنگ بیتگ اَنت ھمے وڑ ءَ جامعہ بلوچستام ءُ سردار بھادر ھان وومن یونیورسٹی شال ءَ بندات بیتگیں کلاس ھم ھلاس کنگ بیتگ اَنت –

دومی نیمگ ءَ لورالائی میڈیکل کالج سَے ڈاکٹر، سَے اسٹاپ ءُ چار اسٹوڈنٹساں کورونا ویروس ءِ گرگ ءَ پد لورالائی میڈیکل کالج پرمان ءَ بند کنگ بیتگ –

جانسلامتی ءِ گر ءُ دار کنوکیں واکدارانی رد ءَ اُستان ءَ وانگی ادارھانی تہ ءَ داں انوگ ءَ نُھ سد ءُ پنچاہ نودربر ءُ استادانی کورونا ویروس ءِ ٹیسٹ کنگ بیتگ اَنت چریشانی تہ ءَ شست ءُ ھپت مردمانی ٹیسٹانی تہ ءَ نادراھی بیتگ ءُ چار سد ءُ ھشتاد مردمانی ٹیسٹانی وداریگ اِنت –

دی بلوچستان پوسٹ

بلوچستان لبریشن فرنٹ ءِ جارکش میجر گْوھرام بلوچ ءَ نمیران بیتگیں سرمچارانی شھیدی ءَ آیاں ستاشانی پیش کنان ءَ گُشتگ کہ زیک آدینگ ءِ روچ ءَ راگے کلان ءَ سرمچار ءُ زور گریں پوج دیم پہ دیم بیتگ اَنت، چریشی ءَ دونیمگی جنگ بندات بیتگ۔ جنگ ءِ تہ ءَ بی ایل ایف ءِ چار سرمچار، کماندار مسلم ء مھمد ھسین، سیکنڈ لیفٹیننٹ سکندر ء مھمد ابراھیم، لیاقت ء ملا عبدالقادر ءُ سعد اللہ ءَ دژمنیں پوج ءَ گوں دلیری ءَ جنگ کنان ءَ شھید بیتگ اَنت۔

ما شھیداں ستاشانی درشان کنیں ھمایاں کہ پہ بلوچستان ءِ آجوئی ءِ جھد ءِ تہ ءَ وتی نگرھیں ساہ ندر کُتگ اَنت۔ ایشانی شھیدی ھما وھد ءَ بیتگ کہ وھدے اے دمگانی تہ ءَ پاکستانی پوج
گوستگیں دو ھپتگاں چہ آپریشن کنگ ءَ اِنت۔ راگے، گچگ ءُ کش ءُ کری دمگانی تہ ءَ یک مزنیں کچے ءَ پوجی آپریشن بیگ ءَ اِنت۔ اے آپریشنانی تہ ءَ جنگی کانود ءِ ھلاپ ورزی کنان ءَ زور گیریں پوج لس آبادیانی سرءَ گوں بمبگواریں بالگرداں نشانگ جوڑ کنگ ءَ اِنت۔ ھمے نیام ءَ لس بلوچانی لوگ ماندارگ بیتگ اَنت ءُ مال ءُ مڈی لُٹگ بیتگ اَنت۔

میجر گْوھرام بلوچ ءَ گوشت کہ شھید مسلم بلوچ بی ایل ایف ءِ شھید کماندار سلیمان شیھک ءِ کستریں برات ءُ بی ایل ایف ءِ رھشون ڈاکٹر اللہ نذر ءِ گھارزتک اِنت۔ شھید سکندر بلوچ ڈاکٹر اللہ نذر ءِ برازتک ءُ شھید لیاقت ڈاکٹر اللہ نذر ءِ گھارزتک اِنت۔ شھید شیھک ءُ ڈاکٹر اللہ نذر ءِ برات سفر خان بلوچ سی جون 2015 ءَ پاکستانی پوج ءَ آئی لوگ ءِ سر ءَ اُرش کُتگ ءُ مھماناں ءُ دگہ پانزدہ ھمراھانی پجیگ ءَ شھید کُتگ اَنت۔

ڈاکٹر اللہ نذر بلوچ ءِ پنجاہ ءَ بُرز نزیکیں سیاد بلوچ راجی آجوئی ءِ جھد ءِ تہ ءَ نمیران بیتگ اَنت، پاکستان ءِ پالیسی مدام ھمے بیتگ کہ آ بلوچ رھشونانی سیاداں نشانگ کنت ءُ آیانی سر ءَ زور پر دیگ ءِ جھد کنگ ءَ اِنت۔ ھمے پالیسی ءِ ردءَ پاکستانی پوج ءَ بازیں رھشون ءُ جھدکارانی سیاد ءُ وارس نشانگ کُتگ ءُ شھید کُتگ اَنت، یا بیگواہ کُتگ ءُ زندانانی تہ ءَ بندیگ کُتگ اَنت۔ بلے اِشی ءِ سوب ءَ بلوچ لس مھلوک ءِ تہ ءَ پاکستان ءِ ھلاپ ءَ زھر گیشتر ودیتگ اَنت۔ ھمے زھر، پاکستانی زلم ءُ وتن دوستی ءِ سوب ءَ بلوچ راجی جُنز دیمروی کنان اِنت ءُ گوستگیں بیست سالاں چہ ابید اوشتگ ءَ یکشل ءَ جُنزگ ءَ اِنت۔ ما اھد کنیں کہ شھیدانی کاروان آزاد بلوچستان ءِ مِنزل ءِ نیمگ ءَ گیشتر توان بیان بیت ءُ جُنزان کنت۔

دی بلوچستان پوسٹ

مستونگ ءَ پوجیانی سر ءَ بوتگیں اُرش ءِ زمّہ واری ءَ منیں – جئیند بلوچ

ٹی بی پی پتر ءَ سربوتگیں ھالانی رِد ءَ گوستگیں روچ ءَ آدینگ ءِ روچ ءَ ناشُناسیں سلاہ بندیں مردماں بلوچستان ءِ دمگ مستونگ ءَ پدہ میتگ ءَ مزنیں دگ ءِ سر ءَ ھستیں فرنٹئیرکور ءِ چوکی سر ءَ دز بمب اُرش ءِ کُتگ ـ اُرش ءَ لشکریاں جانی ءُ مالی تاوان رس اِتگ ـ

دومی نیمگ ءَ بلوچ آجوئی لوٹوکیں گل بی ایل اے ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ مستونگ ءَ بوتگیں اُرش ءِ زمہ واری منّ اِتگ ءُ گوشتگ کہ بلوچ لبریشن آرمی ءِ سرمچاراں گوستگیں روچ ءَ مستونگ شھر ءِ نزیک ءَ پدہ ءَ پاکستانی کوزہ گیریں پوج ءِ بنجاھی بنجل ءِ پھازگ ءِ ھاتر ءَ ھستیں چیک پوسٹ ءِ سر ءَ دز بمب اُرش ءِ کُتگ –

اُرش ءِ آسر ءَ پوج ءَ جانی تاوان بوتگ ءُ وھدیکہ چیک پوسٹ ءَ ھم تاوان رس اِتگ –

دی بلوچستان پوسٹ

سر بیتگیں ھالانی رد ءَ گوستگیں شپ ءَ روکپتی بلوچستان ءِ دمگ سرباز ءَ ناشناسیں مردمانی تیرگواری ءَ ملک مھمد گوں کسان سالیں چُک ءَ ھوار لوگ بانک ءِ ھمراھی ءَ بیران بیتگ اَنت –

اھوالکار ءِ رد ءَ گوستگیں شپ ءَ سرباز ءِ دمگ دپ کور ءَ ناشناسیں مردماں ملک مھمد ءِ سر ءَ تیرگواری کرتگ کہ چریشی ءَ ملک مھمد ءُ آئی ءِ کسان سالیں زھگ ءُ آئی ءِ لوگ بانک بیران بیتگ اَنت –

اھولکار ءِ رد ءَ بیران بیتگیں زھگ ءِ اُمر شش ماہ اِنت ءُ ملک مھمد ءِ سر ءَ ھما وھد ءَ تیرگواری کنگ بیتگ کہ آ دپ کور ءَ وتی گاڑی ءِ سر ءَ گوزگ ءَ بیتگ ءُ آئی ءِ سر ءَ پجاہ نیاؤرتگیں مردماں تیربارانی کرتگ ءُ گاڑی ءَ سواریں ھرسئیں پت، مات، چُک کُشتگ اَنت –

بیتگیں وئیل ءِ بارو ءَ دگہ سرپدی نہ بیتگ ءُ اھوالکار ءِ رد ءَ چوشیں وئیل ھروھد ءَ بیگ ءَ اَنت ءُ جتائیں وئیلاں جتائیں کُتگکار ھوار اَنت –

نبشتانک: لاگر بدن مھکمیں سنگتے اَت

نبشتہ کار: شیردل بلوچ

دی بلوچستان پوسٹ

بلوچ ماتاں پہ لج ءُ ننگ ءِ پھازگ ءَ نرمزاریں بچ ودی کرتگ اَنت، راج دپتر انچیں بچّانی کسھاں سرکیل اِنت اگاں نامان اِش بِہ نبیس ئے ند ءِ سیاھی ھلاس بنت ءُ کاگد پُر بنت، نبیسوک دمبارت ندر بوؤکانی نامانی لڑ انگت ھلاس نہ بنت، بلکیں روچ پہ روچ لڑ انگت دراج بوگ ءَ اَنت –

پہ زمین ءُ کوم ءِ ھاتر ءَ کربان بوتگیں پرزند مدام نمیران اَنت، اگاں مرچی بلوچ راج ءِ نام ماں جھان ءَ ھست اِنت گڑا زمین ءِ دلبند ءَ رِتکگیں ھونانی برود اَنت۔

بَلے!بلوچ کوم ءِ گوست بہ بیت یا انوگیں جاور بہ بنت بلوچ راج ءَ جھان ءِ دیم ءَ وت ءَ را منائینتگ وتی کوم ءُ زمین ءِ دژمن ءِ دیم ءَ سر جھل نہ کرتگ اَنت، بلکیں زوراک ءِ دیم ءَ مِکیں دیوال بوتگ ءُ جنگ داتگ ءُ زگریں ھون رِتکگ اَنت –

انچو گوش اَنت کوم پہ مِرگ ھلاس نہ بنت، بلکیں سر ءِ جھل دارگ ءَ پجار ھلاس بیت، سر ندر کنوکیں راج تاں دیر ءَ گلام دارگ نہ بیت ،گلامی ءِ سیاھیں شپ یکروچے آسر بیت آجوئی ءِ بام دنت ـ

آجوئی ءِ ھاتر ءَ ندر بوتگیں بچّاں چہ یکے “رازک جان اُرپ کھورجان واجہ کادربکش ءِ لوگ ءَ ودی بوتگ اَت، جاھو کوھڑو ءِ جاہ منند اَت، ماں کوھڑو ءِ مزن وانگ جاہ ءَ( ھائی اسکول) پنج تبک دربُرتگ اِت ئِے ءُ گیش وانتگ اِت ئِے، ایدگہ براتانی کسترین اَت، گس ءِ کستریں زھک لاڑلا بنت پہ گُشگ ءَ مات ءُ پِت ءَ را دل نہ بیت انچو ایدگہ برات ءُ گُھار ھم دوست ئِے دار اَنت ، بلوچ روایت گوں کسترین ءَ ھم مھر ءُ دوستی ءِ سکین ءَ دنت ـ

لاگر بدن مھکمیں سنگتے اَت ، جند ءَ را بہ دیستیں انچو مار اِتگ اَت اے لاگر بدن چوں پند جت کنت …؟
گران ءُ دور سریں راھاں سپر کنت …؟
بَلے!سک تمردیں سنگتے اَت، سپر بوتگ اَنت یا جنگ جاہ گونیں ھمراھاں توسیپ کُرتگ اَت، ھرچ وھد ءَ بہ دیستیں بچکندگ ءَ اَت ، وش تب ءُ مھروانے اَت ، پہ آئی ءِ واستا دراھیں سنگتانی مانا یک بوتگ ، گَل ءِ درستیں سنگتاں یک ھساب ءَ مھر ئِے داتگ اَت ـ

بیست ءُ ھشت سارتان ءَ دوھزار ھبدہ ءِ روچ ءَ سپر ءَ دَر کپ اَنت، استان ءِ شوم ءُ شانزدہ ءُ لگوریں پوجیگ پہ چیرُکانی کاینت کوہ ءِ دَمگ ءَ کور ءِ تھ ءَ دازانی توک ءَ نند اَنت ءُ راہ بند بیت، بزان ساری ءِ روچ ءَ بی ایل ایپ ءِ تمردیں سرمچاراں، استان ءِ لشکر ءَ را شَرّیں لٹے داتگ اَت ، لھتیں پوجیگ ، مردار کرتگ اِش، لشکری سک پدرد بوتگ اَنت ـ

ھمے جنگ ءَ پد ءَ کوھڑو بنجل ءِ میجر ءَ میتگ ءِ دراھیں مھلوک زھگ ءُ زالبول گرپتار کتگ اَنت سک ءَ بیم ءُ بیھار اِش دنت،
بَلے! مول ھمے بوتگ سرجمیں ھلک ءِ مردماں گرپتار کنیں سرمچار ھچ ءَ سھی ءُ سرپد مہ بنت راھاں روگ آیگ نہ بیت ما راہ ءَ بند اِیں گندگ مہ بہ ایں ،جنگولیں سنگت ھمے نیمگ ءَ پہ سپر ءَ آیگ ءَ بنت ، راہ بندوک اِنت ، ڈیک وارتگ اِش لشکریاں کوکار داتگ ھمے گوشت اِش سلاھاں دَور بہ دے اِت دست ءُ گوش بہ بہ اِت، گڑا سرمچاراں سنگر گپتگ، جنگ مَچ اِتگ، لشکریاں انگر کنگ ءِ جُھد کتگ اَنت، تاں دیر ءَ جنگ برجاہ بیت “ کماندار اللہ بکش اُرپ بشام بلوچ ءُ رازک جان اُرپ کھورجان بلوچ وتی ایدگہ ھمراھاں دَر کنگ ءَ سوبین بنت، بازیں لشکری یے مردار بیت ءُ دِگہ باز زدگ کن اَنت ءُ وت ھم ھمے جنگجاہ ءَ شھید بنت ـ

سارتان ءِ شھید اللہ بکش اُرپ بشام بلوچ ءُ شھید رازک جان اُرپ کھورجان بلوچ ءَ ھور سرڈگار ءِ شھیداں سھرچکیں دورت پیش کناں ـ

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ نیکشھر ءَ گنداوگ ءِ وزیر تعلیم عبدالناصر ھسین زئی دگ ءِ وئیل ءِ آماچ بیتگ –

اھوالکار ءِ رد ءَ شانزدہ دسمبر ءَ وزیر تعلیم نیکشھر ءَ دگ ءِ وئیل آماچ بیتگ ءُ آئی ءِ جنف رک اِتگ ءُ آئی ءِ گاڑی ءَ تاوان بیتگ –

ھمے وڑ ءَ ھاش ءُ پھرہ ءِ دگ ءِ وئیل ءَ ھشت مردم زدگ بیتگ اَنت –

وئیل ھاش ءَ ھپتاد ءُ پنچ میل دور بیتگ کہ چریشی ءَ ھشت مردم زدگ بیتگ اَنت، زدگ بیتگیں مردم نادراہ جاہ ءَ برگ بیتگ اَنت-

ڈاکٹر فریبرز راشدی ءَ گوشتگ کہ وئیل ھبدہ ستمبر ءِ شپ ءِ ساھت دَہ ءَ بیتگ کہ اود ءَ نادراہ کشیں گاڑی پجارینگ بیتگ اَنت ءُ زدگ بیتگیں مردم اش چِست کرتگ ءُ نادراہ جاہ ءَ برتگ اَنت ئِے –

ڈاکٹر ءِ گوشگ اِنت کہ گیشتریں وئیل پھرہ ءُ دزاپ ءِ میانی دگ ءَ پیش آیگ ءَ اَنت –

آئی ءَ گوشت کہ وئیلانی بارو ءَ سرکار ھچ گامگیج زورگ ءَ نہ اِنت کہ چریشی ءَ راہ ءَ رؤکیں مردم بے دلگوشی ءَ روانت –

نبشتانک: اَزم ءُ نِشہ

نبشتہ کار: آرپ وپا بلوچ

دی بلوچستان پوسٹ

“اتا شاد ءَ یک گلگدارے ءِ ته‍ ءَ یکے جست کنت
اشکنگ ءَ تو بیست ءُ چار اَدار نشہ ئے؟ “

اتا شاد گش ایت “اگاں من بیست ءُ چار اَدار نشہ آں من سِنچ ءُ زانت ءِ گپ ءَ چون جناں ادب چون ساچاں ؟”
اردو لبزانک ءِ هرچ کرن ءِ بادشاهیں شائر میرزا اسد الله گالب بلکیں آئی ءَ آفاقی لچّہ کارے بہ گُش اَنت انگت جوانتر بیت ۔

گُش اَنت میرزا اسد الله گالب ءَ شراب باز وارتگ شراب ءِ واستا آئی ءَ وتی لچّہ هم بها کتگ اَنت پد ءَ اے هم گُش اَنت آئی ءَ وتی گیشتریں لچّہ سد ءُ سما ءِ پاکی ءِ نماز ءِ وهد ءَ ساچتگ اِت اَنت بزاں آ مسلہ ءِ سر ءَ نشتگ ءُ وتی لچّہ گُکّ بستگ انت پد ءَ سهب ءَ هما گُکّ پچ کتگ انت ءُ لچّہ نبشتہ کتگ انت۔

نامداریں دستونک گش جگجیت سنگھ ءَ یکے وتی گلگدار ءِ ته‍ ءَ جست کنت۔

“شراب ءُ زیمل ءَ تو چون چارئے
آ گش ایت شراب یک ایاشی یے زانگ بیت ایشی ءَ گوں زیمل ءَ هچ نزیکی نیست سُر پاکیں چیزے اے گوں ناپاک ءَ گشگ نہ بیت ”
دومی نیمگ ءَ مئے کلاسیکل شهّلچہ کار بہ بنت گشنده ءُ پهلوان بہ بنت ما هجبر اش نہ کتگ ملا پازل ءَ شراب وارتگ ما هجبر اش نہ کتگ پهلوان ملا کمالان ءَ شراب وارتگ ، یا نشہ کتگ اے دوئیں تئی لبزانک ءِ هما نام انت کہ همک کرن ءَ شاهکاریں ازم ءِ چیدگ زانگ بنت ۔

نی وتی اهد ءِ سر ءَ چمشانکے دے ایں مارا همے گندگ ءَ کیت مئے لبزانکی ، آروسی کجام هم شرپ داریں ، دیوان ابید ء سلگتیں شراب ءُ نشہ ءَ آسر نہ بنت مئے ازم کاراں گیشتر اے چیز رواج داتگ کہ شائر گشنده شرابی بنت ۔

اے پہ مئے پدمنتگیں چاگرد ءَ یک تباهی ءُ ورناهانی واستا بربادی ءِ شھدگے آ اد ءَ سر جن انت ءُ هچ نہ بنت گار بنت
شریں ساچشت گوں زانشت ءُ زانت ءَ ودی بیت گوں وانگ ءُ زانگ ءَ ودی بیت گوں جهد ءُ تْراشگ ءَ ودی بیت گوں اکیڈمک کاراں ، گوں پُر مڑاهیں زانت ءُ لبزانکی سرچمگ ءُ ادارهاں ودی بنت ، شراب ءُ نشہ انسان ءِ هوش ءَ گار کنت آئی ءَ بے زانت ءُ بے سِنچ کنت جنگ کنگ ءُ چپورتی پرمائیت، ایدگہ کوم ءُ راجانی لبزانکی دیوان بنت آ گوں زانت ءُ سِنچ ءَ آسر بنت مئے گوں جنگ ءُ چوپ ءَ آسر بنت ۔

گشنده نہ زانت من چی گشگ ءَ آں سازنده نہ زانت من چی جَنَگ ءَ آں گوش داروک نزانت من ءَ چی دیگ ءَ اَنت ۔

شائر تلو ءِ سر ءَ لچّہ ءِ وانگ ءَ پیداک انت هزار گوش داروک نشتگ کہ مارا چی دنت بلے واجہ ءِ پاد گون نہ اَنت۔

راج ءُ کومانی جهگیریں انسان شائر ءُ گشنده ندکار پرے هال ءَ بنت آ راج ءِ هال چی بیت۔