نبشتانک: بلوچی ءُ براھوئی
نبشتہ کار: بکتیار رھیم بلوچ
دی بلوچستان پوسٹ
من کسان اِت آں من ءَ پت ءَ پرائمری اسکول ءَ ھوار کرت،
اُستاد ءَ من ءَ یک کتابے دات من کتاب زرت ءُ لوگ ءَ اتک آں منی پیرک ءَ من ءَ گُشت وتی درونت ءَ بوان من ونت “الف سے انار۔ خ سے خرگوش” ف سے فٹ بال پیرک ءَ ھچ نہ ونتگ اَت، من ءَ گشت ئِے “ انار ناں ھنارفٹبال ناں پٹبال خرگوش ناں کرگوش” من گشت پیریں ابا مارا استاد ءَ ھنچو گشتگ ۔
پیرک ءَ اے نہ پھم اِت کہ مارا استاد ءَ اردو درونت داتگ ما اردو ءَ ھیل کنگ ءَ اِیں،
من ھم اے نہ پھم اِت کہ من اردو ءِ دربرگ بندات کتگ۔
وھد گْوزان اَت دو سے تبک ونت نوں پوہ بوت آں کہ من بلوچی یل داتگ اردو ءَ وانگ ءَ آ،
بلوچی ھچ نہ زان آں بلے
اردو ءِ زانگ ءُ وانگ مئے سر ءَ الّم اِنت اسکول ءِ درائیں کتاب اردو اِت اَنت، ھیران اِت آں کہ چِہ پیم در بہ بر ایں اے زبان ءَ ایشی ءِ دربرگ ءَ من ءَ چے رس اِیت ۔
چارمی تبک ءَ سر بوت آں کہ من ءَ پیرک ءَ وتی بھا گپتگیں ڈگار ءِ کبز کش اِت ءُ دات من ءَ گْوشت ئِے بوان ئِے من چار اِت کہ اے نہ بلوچی ءَ نبشتہ اِنت ناں کہ اردو ءَ من گوشت پیریں ابّا من ایشی ءِ وانگ ءَ نہ زان آں پیرک ءَ گوشت بچ من سرپد بیگ ءَ آں تئی وانگ ءَ ھچ پائدگ نیست ۔
من گْوشت ابّا من اردو کمو زان آں بلے اے اردو ءَ نبشتہ نہ اِنت بلوچی ءَ ھم نبشتہ نہ اِنت پیرک ءَ گْوشت اے پارسی ءَ نبشتگ اَنت، تو پارسی ءَ نہ زان ئے من گوشت ناں من پارسی در نہ برتگ من پارسی ءَ نہ زان آں مئے کتاب اردو اَنت ۔
اسکول ءِ ھر تبک ءِ کتاب اردو ءَ نبشتگ اِت اَنت۔
من اردو ءَ ھیل کنگ ءَ اِت آں ھچ پھم ءَ نہ اِت آں کہ اے زبان مئے سر ءَ چیوا چو سلاڑ اِنت۔
اے ھم پھم ءَ نہ اَتک کہ پارسی ءَ پیشی زمانگ ءِ کبز چی ءَ نبشتگ اَنت پیشی زمانگ ءَ مئے راج ءِ سر ءَ زاناں پارسی سلاڑ بوتگ نون اردو سلاڑ اِنت مئے وتی شھدیں دوئیں زبان بلوچی ءُ براھوئی چیوا گار ءُ بیگواہ اَنت ۔
اولی تبک ءَ بگر تاں دھمی ءَ ما اردو ءَ وانگ ءُ نبشتگ کنگ ءَ اِت اِیں اردو ءَ مارا ھنچو ازاب کتگ نہ زاناں چُتور اے ھلاس بیت دہ دوازدہ سال سرجم بوت دھمی تبک ءَ بوت آں من اردو انگت سرجم ءَ نہ زانت۔
بازیں وانگ چہ پد دری ڈیھاں سر کپت پہ وانگ ءِ سرجم کنگ ءَ دری ڈیھاں اتک آں کمّے پوہ بوت آں، کہ مئے راج ءِ دوئیں زبان چوں گار ءُ بیگواہ کنگ بوتگ اَنت ۔
دَور کمیں بدل بوت اردو ءَ گوں ھور انگریزی سلاڑ بوت کتاب بدل بوت اَنت ءُ انگریزی ءِ تہ ءَ بوت اَنت ما گوں اردو ءَ سر پینڈال اِت اِیں۔
انگریزی اتک ءُ مئے سر ءَ سلاڑ بوت ھچ پوہ نہ بوت آں کہ کجام زبان ءَ در بہ بر اِیں کجام زبان ءِ زانگ سوب مندی یے۔
وتی دوئیں شیر ءُ شھدیں زبان انچو پشت کپت انت ھچ وانگ نہ بیگ ءَ اَنت۔
کسانی ءَ چش نہ زانت وتی زبان ءِ ھم در برگ الم اِنت یک راجے ءِ زبان گار بیگواہ بوت اَنت بزاں کہ آ راج ھم گار ءُ بیگواہ بیت۔
چش ھم ما نہ زانت کہ دری ڈیھانی زبان ءِ مئے سرا سلاڑ کنگ مئے وتی شھدیں بلوچی ءُ براھوئی ءِ گار ءُ بیگواہ کنگ ءِ پندل اِنت ۔
من ءَ یاد اِنت من سیمی تبک ءَ وانگ اِت آں یک روچے من لوگ ءَ اتک آں من بلک ءَ سوج کت بلُّک! ابّا کجا شتگ؟ بلک ءَ گْوشت تئی پت ھاران ءَ شتگ من بلک ءِ گپ ءِ سر ءَ کند اِت کہ بلک خاران ءَ ھاران گوش اِیت۔
من وت وَ ونتگ در برتگیں مردم پھم اِت بلک ءَ نہ ونتگیں مردمے پھم اِت من ھمے پھم اِت بلک ھچ نہ زانت من اسکول ءَ وانگ ءَ آں من زان آں۔
من اسکول ءَ ونتگ من ھچ در نہ برتگ وتی زبان بدل ءُ بھر کتگ اسکول ءَ ونتگ ھمنکہ نہ زانت کہ بلوچی زبان ءِ آب چی اَنت۔ چنچُک اَنت من چتور نبشتگ کنگ ءَ آں۔
پت ءُ پیرک اَگاں شھر ءَ شت اَنت من ھم ھور ءَ شت آں ھوٹل ءَ نشت اِیں۔ پت ءِ دوست ءُ سنگت اَتک اَنت برے بلوچی برے براھوئی گپ کُت اش من نشت ءُ چار اِت کہ پت براھوئی چون زانت پت ءِ سنگت بلوچی ھم زان اَنت دوئیں زبان چون زیبدار ءُ وش اَنت شیر ءُ شکر اَنت شھد ءُ شیر اَنت مسک ءُ زاپِران ءِ بوہ ءَ کن اَنت ۔
مزن بوت آں دھمی تبک در برت من پوہ بوت آں کہ دنیا ءِ تہ ءَ اگاں وش کسمتیں کوم ھست چہ آ کوماں یکے بلوچ کوم اِنت اللہ پاک ءَ اے کوم ءِ دود ءُ ربیدگ ،رسم ءُ رواج ،ملک ءُ کوم ،رنگ ءُ آدت یکے کتگ یک نامداریں ءُ سیریں ملکے ءِ واجہ کتگ اے کوم ءَ اللہ ءَ دو زبان بکشاتگ ۔دوئیں زبان یکے دومی ءَ یک وڑ وشّ ءُ زیبدار اَنت ،چہ دپ ءِ در آھگ ءَ مسک ءُ زاپران ءِ بوہ ءَ کن اَنت۔
نوں بلوچی ءُ براھوئی یکیں بدن ءِ دو چم ءِ وڑ ءَ َانت بلوچی بید ء چہ براھوئی ءَ نیم سرجم ءُ کم شرپ اِنت براھوئی ھم بید ء بلوچی ءَ نیم سرجم ءُ کم زیب ءُ کم شرپ اِنت۔
اللہ مئے دوئیں شھدیں زبان ءَ ھر وھد ءَ سلامت ءُ پر نور بہ کنت ۔اے دوئیں زبان ءِ واھُنداں اللہ سلامت ءُ وت واجھیں ڈیھ ءِ واھُند بہ کنت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت
