TBP Balochi

شیر: دشت ءِ جنگل ءِ ماندارگ ءِ پشدر ءَ

شائر: آرپ وپا بلوچ

دی بلوچستان پوسٹ

او ستکگیں جنگل منی
سوتکگ من ءَ تو سرجم ءَ
دیستگ ترا من رستگاں
تئی مهلبیں اے پلکگاں
هون چہ رگاں پیداک کتگ
دشت ءِ نپس رنگیں چشاں
گورونڈ کهیری ناهڈاں
مرگانی چوگان ءُ رماں
ساز ءُ سروزی زیمراں
بانور دابیں کهچراں
او ستکگیں جنگل منی
تئی ابرم ءِ زیبائی ءَ
دیستگ هدا من هرگورا
تئی کوکوهاں سهڑینتگ انت
ارس ءِ لڑی آ بتُکگیں
تاهیر ءِ چیپی روک کتگ
کاه ءُ کڈباں رستگیں
درچکاں تئی گوں لُڈگاں
لڈینتگ انت واهگ منی
چنڈینتگ انت ترانگ منی
تئی پلو ءَ سنج بیتگ اَنت
شاری ءِ مهنائیں گشان
گشتہ ترا جنّت وتی
سول ءُ تئی ایرلمب کنر
ساه کشّ اتگ چیرا تئی
ما مولمے ،موجان کتگ
ٹپ ءِ کدینتگ تراولیں
ٹپ ءِ وتی درمان کتگ
شوانگ تئی گوں چاگلاں
میش ءُ رمگ ماں ساهگاں
شیر ءُ پنیر باد ءُ کٹاں
تئی هالکو گوں گرنچیناں
او ستکگیں جنگل منی
سوتکگ من ءَ تو سرجم ءَ
گلہ کناں من گوں کئےءَ
انسان چتو هیوان بنت
آرپ چتو تاوان بنت
کهت انت منی بس سینگ ءَ
ماری دجیں درداں رُداں
او ستکگیں جنگل منی
سوتکگ من ءَ تو سرجم ءَ

دی بلوچستان پوسٹ

کیچ کور پُھل ءِ سر ءَ دو گاڑیانی ڈیک ورگ ءَ یک مردمے زدگ ءُ سوراب ءَ مساپر بریں بس ءُ گاڑی ءَ ٹکر وارتگ ءُ یک مردمے بیران ءُ بازینے زدگ بوتگ اَنت –

ٹی بی پی پتر ءَ سربوتگیں ھالانی رِد ءَ بلوچستان ءِ دمگ کیچ ءَ کیچ کور پُھل ءِ سر ءَ دو گاڑیانی ڈیک ورگ ءِ سوب ءَ عامر ء حامد سنگھور جاھمنند سری کھن سک باز زدگ بوتگ –

ٹپی بوتگیں مردم ھما دمان ءَ نادراہ جاہ ءَ سرکنگ بوتگ –

دومی نیمگ ءَ شال داں کراچی ءِ شھدگ ءِ سر ءَ مساپر کشیں بس ءُ گاڑی ءَ ڈیک وارتگ – ڈیک ورگ ءِ سوب ءَ یک مردمے بیران ءُ بازیں مردمے زدگ بوتگ اَنت –

گیشیں ھالانی رِد ءَ حاجیکہ ءِ دمگ ءَ شال داں بسیمہ ءَ رؤکیں مساپر بریں وین ءَ گوں وٹس کار ءَ ڈیک وارتگ، ڈیک ورگ ءِ سوب ءَ یک مردمے بیران ءُ بازینے زدگ بوتگ، زدگ بوتگیں مردمانی تہ ءَ زالبول ھم ھوار انت –
زدگ بوتگیں مردم سوراب ءُ بسیمہ جاھمننند انت وھدیکہ بیران بوتگیں مردم بسیمہ جاھمنند بوتگ –
بیران ءُ زدگ بوتگیں مردم ھما دمان ءَ دمگی نادراھجاہ ءَ سر کنگ بوتگ انت ٹپانی درمان کنگ ءَ پد پہ گیشیں درمانی ءِ ھاتر ءَ ڈی ایچ کیو ھسپتال سوراب ءَ دیم دیگ بوتگ اَنت ءُ لاش ءِ ھژدری چار ءُ ٹپاس پد کھول ءِ گور ءَ سر کنگ بوتگ –

دی بلوچستان پوسٹ

مروچی دبئی ءِ انٹرنیشنل کرکٹ اسٹیڈیم ءَ کنگس الیون پنجاب ءِ دیم گوں رائل چیلنجرس بنگلور ءِ دیم ءَ بیت انت –

گوستگیں بیگاہ ءَ شارجہ شیخ زائد کرکٹ پَٹ ءَ برجاھیں آئی پی ایل ءِ دو ھزار ءُ بیست ءِ گوازی ءَ ممبئی انڈینس ءِ ٹیم ءَ شاہ رخ خان ءِ ٹیم کُلکَتا نائٹ رائیڈس چِل ءُ نُھ رن ءَ پروش داتگ ءُ باج بُرتگ –

ممبئی انڈینس ءَ پیسر ءَ بیٹنگ کُرتگ ءُ پنچ وکٹ ءِ تاوان ءَ یک سد ءُ نود ءُ پنچ رن جوڑ کُرتگ، بلے آئی ءِ پسو ءَ کُلکَتا ءِ ٹیم ءَ نُھ وکٹ ءِ تاوان واری ءِ یک سد ءُ چل ءُ شش رن جوڑ کُرتگ –

ممبئی انڈینس ءِ نیمگ ءَ چہ کیپٹن روھِت شرما ءَ جوانیں وڑے ءَ بیٹنگ کرتگ ءُ ھشتاد رن آورتگ، وھدیکہ سوریہ کمار یادو ءَ چل ءُ ھپت رن ءِ جوانیں اننگ گوازی کرتگ ـ کُلکَتا نائٹ رائیڈرس ءِ نیمگ ءَ شیوم ماوی ءَ دو وکٹ گپتگ وھدیکہ یک وکٹے سنیل نارائن ءُ یکے آندرے رسیل ءَ گپتگ –
کُلکَتا ءِ نیمگ ءَ چہ پیٹ کمنس ءَ 33 ءُ دنیش کارتک ءَ 30 رنانی اننگ گوازی کرتگ – وھدیکہ نتیش رانا بیست ءُ چار رن جوڑ کرتگ – اشی ءَ ابید کے کے آر ءِ ایندگے بیٹس مین جوانیں اسکور کنگ ءَ سوبین نہ بوتگ انت –

ممبئی انڈینس نیمگ ءَ ٹی بولٹ، پیٹنشن، جسپریت بمراہ ءُ راھِل چھر ءَ دو دو وکٹ گپتگ ءُ وھدیکہ یک وکٹے کیرون پولارڈ ءَ گپتگ ـ ھمے وڑ ممبئی ءِ بالراں جوانیں وڑے ءَ بالنگ کنان ءَ کُلکَتا ءِ ٹیم وار ندات کہ وتی ٹارگٹ ءَ سرجم کُرت بہ کن اَنت ءُ بازی وتی ٹیم ءِ نام ءَ کُرتگ –

زانگ بہ بیت آئی پی ایل دوھزار ءُ بیست ءِ سینزدھمی سیزن نوزدہ ستمبر ءَ بندات بوتگ ءُ داں دہ نومبر ءَ برجاہ بیت –

دی بلوچستان پوسٹ

کلات ءَ سیادی داروکیں بی سی ایس ءِ نودربر ثناء اللہ شاھوانی بیست ءُ چار ستمبر دوھزار ءُ سیزدہ سیکیورٹی کارمنداں دزگیر کرتگ ءُ ناشناسیں جاھاں برتگ کہ ھما وھد ءَ آ ڈگری کالج کلات ءَ چکاس ءِ دیگ ءَ پد واتر وتی لوگ ءَ اسکلکو ءَ روگ ءَ بیتگ –

بیست ءُ چار ستمبر ءَ ثناء اللہ شاھوانی ءِ بیگواھی ءَ ھپت سال سرجم بیتگ، آئی ءِ کھول ءَ چہ انسانی ھکانی ادارھاں لوٹ کرتگ ءُ گوشتگ کہ ثنا ء اللہ شاھوانی ءِ یلہ کنائینگ ءَ وتی کرد ءِ پیلو کنگ ءِ دزبندی کرتگ –

زانگ بہ بیت اے وھد ءَ بلوچستان ءِ جتائیں جاھاں پاکستانی پوج ءُ چیریں ادارھانی دست ءَ ھزارانی کَچ ءَ بلوچ بیگواہ اَنت کہ چریشانی تہ ءَ بازینے ءِ ٹپ ءُ ٹوریں جون جتائیں ھند ءُ دمگاں وھد وھد ءِ سر ءَ دزکپتگ اَنت –

بیگواھیں مردمانی یلہ کنگ ءِ واستا شال ءِ پریس کلب ءِ دیم ءَ یک دیھکے ءَ پرایمنیں جد ءُ جھد برجاہ اِنت –

دی بلوچستان پوسٹ

یلہ کنگ بیتگیں ورناہ ءِ برات ھمے سال ءَ نیم زندیں جاوراں گوں یلہ کنگ بیتگ ءُ پد ءَ دردانی نہ سگگ ءَ بیران بیتگ اَت –

بلوچستان ءِ دمگ چہ مند ءَ بیگواہ بیتگیں ورناہ گوستگیں روچ ءَ تربت ءَ یلہ کنگ بیتگ ءُ وتی لوگ ءَ سر بیتگ –

انیس ء گوھرام ھمے سال ءَ ھپت مئی ءَ پاکستانی پوج ءَ آوار جتگ ءُ ناشناسیں زنداناں برتگ ءُ اود ءَ پنچ ماہ ءِ گوزگ ءَ پد گوستگیں روچ ءَ تربت ءَ یلہ کنگ بیتگ –

زانگ بہ بیت انیس ءِ مستریں برات جاوید گوھرام کہ دگہ مردمانی ھمراھی ءَ آوار جنگ بیتگ اَت، چریشی ءَ پد جاوید گوھرام ھبدہ مئی ءَ مند سورو ءَ نیم زندیں جاوراں یلہ کنگ بیتگ اَت –

جاوید جاندراھی ءِ واستا کراچی ءَ برگ بیتگ کہ اود ءَ آئی ءَ ٹپانی درد نہ سگگ اِتگ ءُ بیست ءُ پنچ مئی ءَ بیران بیتگ اَت –

وائس فار بلوچ مسنگ پرسنز ءِ وائس چیئرمین ماما قدیر بلوچ ءَ اے ھال راست کنان ءَ گْوشتگ کہ جاوید ء گوھرام ءَ درد نہ سگگ اِتگ ءُ نادراہ جاہ ءَ شھید بیتگ – جاوید پاکستانی پوج ءَ ھپت مئی ءَ کستریں برات انیس ءِ ھمراھی ءَ آوار جتگ –

ماما قدیر ءَ گْوشتگ کہ جاوید ھبدہ مئی ءَ نیم زندیں ءُ ٹپ ءُ ٹوریں جاوراں پوج ءَ مند سورو ءَ چگل داتگ –

ہیومین رائٹس کونسل آف بلوچستان ءِ عبد اللہ عباس بلوچ ءَ اے درگت ءَ گْوشتگ کہ جاوید ءَ ٹپانی درد نہ سگگ اِتگ ءُ بیران بیتگ، آ وتی زندگی ءِ واستا جد ءُ جھد کنگ ءَ بیتگ کہ آ فرنٹیئر کور ءَ نگیگیں جاوراں یلہ داتگ –

زانگ بہ بیت دو روچ پیسر پنجگور ءَ بیگواھیں ورناہ نعیم بلوچ ھم یلہ کنگ بیتگ –

وی بی ایم پی ءَ نعیم بلوچ ءِ یلہ بیگ راست کرتگ ءُ گوشتگ کہ آ دو سال ءَ پیسر آوار جنگ ءُ گار کنگ بیتگ –

بلوچستان ءَ یک نیمگے ءَ بیگواھیں مردم یلہ کنگ بیگ ءَ اَنت دومی نیمگ ءَ بیگواھیانی درچ برجاہ اِنت ھمے وڑ کہ بازیں سالاں بیگواھیں مردمانی باور ءَ ھچ سرپدی بیگ ءَ نہ اِنت ءُ اے درگت ءَ وی بی ایم پی ءِ نیمگ ءَ شال ءِ پریس کلب ءِ دیم ءَ زھرشانی برجاہ اِنت –

دی بلوچستان پوسٹ

گوستگیں بیگاہ ءَ شارجہ شیخ زائد کرکٹ پِڑ ءَ برجاھیں آئی پی ایل گوازی ءَ راجھستان رائلز ءَ چنئی سپر کنگ شانزدہ رن ءَ چہ گوازی کُٹ اِتگ۔

دوسد ءُ شانزدہ ءِ نشانگ سرجم کنگے ھاتر ءَ چنئی سپر کنگ ءَ شش وکٹانی تاوان کنگ ءَ دوسد رن جوڈ کرتگ۔ راجستان رائلز ھاتر ءَ سنجیو سیمن ءَ 32 بالانی تہ ءَ ھپتاد ءُ چار رن گپتگ – وھدیکے کیپٹن اسٹیوھ اسمتھ ءَ چل ءُ ھپت بالاں شست ءُ نُہ رن جوڈ کرتگ۔

چنئی سپرکنگس ءِ ھاتر ءَ سیم کَرن ءَ چار اورانی تہ ءَ سی ءُ سئے رن داتگ ءُ سئے وکٹ گپتگ۔

وھدیکے فاف دیو پلیسسز ءَ سئی ءُ ھپت بالانی تہ ءَ ھپتاد ءُ دو رن گپتگ۔

چنئی سپر کنگس ءَ ٹاس کَٹ اِتگ ءُ بالنگ کنگے پیسلہ کُتگ۔

روکپتی بلوچستان ءِ دمگ کسر کند ءِ ھنکین ساربوک ءَ مَچاں آس کپتگ ءُ مَچ سُتگ اَنت

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ کسر کند ءِ ھنکین ساربوک ءَ مَچاں آس کپتگ ءُ مَچ سُتگ اَنت –

ساربوک ءِ دمگدار انور رئیسی ءِ گوشگ اِنت کہ مروچی ساربوک ءَ مَچکدگ ءَ اناگہ ءَ آس کپتگ ءُ چریشی ءَ چہ سَے سد شریں مَچ سُتکگ ءُ پُر بیتگ اَنت –

دمگدار انور رئیسی ءِ گوشگ اِنت کہ آس ءِ کپگ ءَ ھال ءِ سر بیگ ءَ پد آس کُش توار پِر جنگ بیتگ اَنت بلے آس ھَنچش بے کساس ءَ برز بیتگ کہ آس کُشاں داں چار اداراں پد آس اش کُشتگ ءُ ھلاس کتگ اِت –

انور رئیسی ءِ گوشگ اِنت کہ آس ءِ کپگ ءِ گیشیں سوب زانگ نہ بیتگ اَنت کہ چتور ءُ چی پیم آپ کپتگ –

زانگ بہ بیت چِد ءُ پیسر رودراتکی بلوچستان ءِ دمگ دشت ءُ مند ءَ ھم جنگل بُنگپتگ اَنت ءُ بازیں جاہ آس ءَ وتی برانزاں سوچان کرتگ ءُ سبزاوگیں جنگل ھلاس کرتگ –

دمگی مردمانی رد ءَ دشت ءُ مند ءِ جنگل پاکستانی پوج ءَ مانداشتگ بلے پوج ءِ نیمگ ءَ تنی وھدی چوشیں درشان دیم ءَ نیاتکگ اَنت –

ھمے وڑ چاگردی رسانکجاھاں بلوچستان ءَ گوں بندوکیں چاگردی باسک ءُ سیاسی مردماں زھر درشان کنان ءَ گوشتگ کہ دشت ءِ سبزاوگیں جنگل ءَ دھکانکارانی سالے ءِ کچ ءَ دلوتانی وردن ءُ وراک بیتگ اَنت کہ چِد ءُ پیسر بازیں سالاں ھورانی نہ گوارگ ءِ سوب ءَ ڈکال بیتگ ءُ اے دو گوستگیں دو سالاں گورتگیں ھوراں دمگ آباد ءُ بلے اَنی آس ءَ پد دمگ ڈُکالے ءِ دروشم ءَ کرتگ –

دی بلوچستان پوسٹ

سر بیتگیں ھالانی رد ءَ گوستگیں روچ ءَ روکپتی بلوچستان ءُ رودراتکی بلوچستان ءِ سیمسری زمگ ھک آباد شمسر ءَ زالبول ءُ چکاں روانک کش اِتگ-

اھوالکار ءِ رد ءَ روانک ءَ بازیں کچے ءَ زالبول ءُ چکاں بھر زرتگ ءُ نشہ ءِ ھلاپ ءَ اوگام جنان ءَ گْوشتگ کہ مئے کسان کسانیں زھگ نشہ ءِ آماچ بیان اَنت –

روانک ءَ بھر زیروکیں زالبول ءُ چُکاں دمگداراں چہ دزبندی کرتگ ءُ گْوشتگ کہ نِشہ ءِ ھلاپ ءَ ترندیں گامگیج بہ زور اَنت ءُ مئے زھگاں اے شُمیں نادراھی ءَ بہ رکین اَنت –

زانگ بہ بیت ھک آباد شمسر روکپتی ءُ رودراتکی بلوچستان ءِ سیمسر اِنت کہ نندوکیں مردمانی گیشتریں سیادی رودراتکی بلوچستان ءِ دمگ پنجگور ءُ بلیدہ ءَ اِنت ءُ سیمسر ءِ نگاھپانی ایرانی سیمسری لشکر پاسدارانہ انکلاب سپاہ ءِ دست ءَ اِنت –

گوشگ بیگ ءَ اِنت کہ دمگ ءِ ھپتاد درسد ورناہ نشہ ءِ آماچ اَنت ءُ دمگی دمگدار، ایرانی لشکر ءُ دمگی میر نشہ بھاکنوکانی دیم ءَ بے وس اَنت –

دی بلوچستان پوسٹ

بلوچستان ءِ دمگ سبی ڈھاڈر ءَ دگ ءِ وئیل ءَ ھشت سالی ئیں جنکوے ءَ ھوار یکیں کھول ءِ سَے مردم ٹپی ءُ لورلائی ءَ دومردم بیران ءُ یکے ٹپی بوتگ اَنت-

ٹی بی پی پتر ءَ سربوتگیں ھالانی رِد ءَ کچھی ءِ دمگ ڈھاڈر ءِ نزیک ءَ سبی داں شال ءِ شھدگ ءِ سر ءَ گاڑی ءَ گوں مَزدا ٹرکے ءَ ڈیک وارتگ –

گیشیں ھالانی رد ءَ ڈیک ورگ ءِ آسر ءَ گاڑی ءَ سواریں یکیں کھول ءِ چار مردم مات پتاں ھوار دو چک سک باز ٹپی بوتگ اَنت – ھشت سالی ئیں جنکوئیں چُکے ءَ ٹپانی درد نہ سگ اِتگ ءُ بیران بوتگ –

وئیل ءَ پد زدگ بوتگیں مردم ھما دمان ءَ سبی ءِ ھسپتال ءَ برگ بوتگ اَنت اژدری چار ءُ ٹپاس ءَ پد پہ گیشیں ءِ درمان ءِ ھاتر ءَ شال ءَ دیم دیگ بوتگ انت –
وئیل سبی داں شال ءَ رؤکیں شھدگ درخان ءِ دمگ ءَ تیز رؤگے سوب ءَ دیم ءَ اتکگ ـ

ھمے وڑ لورالائی ڈیرہ ءَ دگ ءِ سر ءَ پرپٹ ءُ گاڑی ءِ ڈیک ورگ ءِ سوب ءَ پرپٹ ءَ سواریں دو مردم بیران ءُ گاڑی ءِ ڈرائیور ٹپی بوتگ –

بیران ءُ زدگ بوتگیں مردم ھما دمان ءَ ھسپتال ءَ برگ بوتگ اَنت ءُ اژدری چار ءُ ٹپاس ءَ پد جون کھول ءِ گور ءَ کنگ بوتگ انت –
بیران بوتگیں مردمانی پجار باران ء محمد دین کبزھی جھمنند مُرگہ کبزھی ءُ ھپتہ خان ء محمد خان یونس حیل جھمنند کلی شابان چمازہ ءِ نام ءَ چہ بوتگ اَنت وھدیکہ گاڑی ڈرائیور سپرخان ء محمد یوسف اچکزھی جھمنند چمن زدگ بیتگ۔

زانگ بہ بیت بلوچستان ءِ جتاجتائیں دمگاں ھمک روچ دگ ءں وئیل دیم ءَ آیگ ءَ اَنت –

دی بلوچستان پوسٹ

بلوچ آجوئی لوٹوکیں گل بلوچستان لبریشن ءِ فرنٹ ءِ جارکش میجر گْوھرام بلوچ ءَ دگ ءِ وئیل ءَ بیران بوتگیں بلوچ سرمچار شھید جاوید بلوچ ءَ را دروت ندرکرتگ ءُ گُوشتگ کہ
شھید جاوید جان پنام ءِ زبیر بلوچ ء محمد حاصل جھمنند دشت کلیرو جولائی ءِ ماہ ءَ دگ ءِ وئیلے ءَ ٹپی بوتگ، بلے پد ءَ آئی ءَ رند ءَ یازدہ جولائی ءَ ٹپانی درد نہ سگ اِتگ ءُ شھید بوتگ –

جارکش ءَ دیمتر ءَ گوشتگ کہ شھید جاوید سال دوھزار ءُ شانزدہ ءَ چہ بلوچستان ءِ آجوئی ءِ ھاتر ءَ سلاہ بندیں جد ءُ جھد ءَ گون بوتگ – وھدیکہ سال دوھزار ءُ ھژدہ ءَ آ بی ایل ایف ءِ پتر ءِ سر ءَ وتی زمّہ واریاں پیلو کنگ ءَ بوتگ –
شھید جاوید بلوچ ھدائی داد گنجیں پرکاریانی واھند بوتگ ـ آئی ءَ یک سلاہ بندیں جھدکارے ءَ ھوار شائری ھم شوک بوتگ – اے کار ءِ سر ءَ وتی زانت ءِ کارمرزی بوتگ – بلے ھمے سال ءِ جولائی ءِ ماہ ءَ وئیلے ءَ شھید بوتگ – آئی ءِ گران بھائیں دیمونی مدامی ءَ یات کنگ بنت –