نبشتانک: آریستو تے لیس ءِ سئے دانک ءُ مئے چاگرد
نبشتہ کار: شلی بلوچ
دی بلوچستان پوسٹ
آریستو تے لیس زوراورانی بارہ ءَ سئے گپ تچک کنت بزاں آ گْوش اِیت زوراورانی سئے لوٹ اَنت یا مول اَنت۔
بنداتی: زوراور وتی گلاماں بے منگہ کنت، آ زانت کہ کم منگھیں مردم کسی پشت ءَ پندل نہ ساز اِیت بزاں گپ نہ کنت۔
دوم : زوراک گلامانی میان ءَ یک بے باوری یے ودی کنت پرچا کہ آ زانت وھدے مردماں یکے دومی ءِ سر ءَ باور مہ بیت آ زوراکاں چہ وتی سر ءَ سست ءُ دور دات نہ کنت ءُ ھمے رد ءَ زوراور شریں مردمانی بگیری ءَ اوشت اِیت ءُ آھانی جنَگ ءُ کشگ بندات کنت پرچا کہ زوراک چہ اے مردماں تْرس اِیت کہ اے منی واجھی ءَ نہ من اَنت ءُ اے وڑ ءَ من وتی زورانسری ءُ ھاکمی ءَ کرت نہ کن آں پرچا کہ آ زانت مردم یک دومی ءِ سر ءَ کہ باور ءُ بیسہ کن اَنت یا کہ یک دست ءُ یک مشت بہ اَنت یکے دومی ءِ چاریگی ءَ نہ کن اَنت۔
سیمی: زورآور لوٹ اِیت کہ آئی ءِ ایردست ءُ گلام پہ ھچ وڑیں گامگیجے ءِ زورگ ءَ ساڑی مہ بہ اَنت کہ گندگ ءَ آ بوت نہ کنت بزاں پد نہ بوتگیں کارے۔ آ زانت ھمے مردمانی تہ ءَ سکین نہ بوت آھانی دل ءَ ھمے گپ نِشت کہ ھچ بوت نہ کنت گڑا آ زوراک ءِ زورانی دیم ءَ نہ اوشت اَنت ءُ زوراک ءِ بادشاھی ءَ آسر نہ کن اَنت۔
اے گپ نزیک دو ھزار ءُ سئے سد سال پیسر آریستو تے لیس ءَ گُشتگ اَنت بلے بیا وتی چاگرد ءَ ھمے گپاں پر ریچ ایں ءُ چار ایں کہ ما چون ایں مئے چاگرد چون اِنت مئے مردم چی جیڑ اَنت لوگ ءَ مات ءُ پت وتی چکاں چی گْوش اَنت ءُ پرچا گْوش اَنت؟ اے بیوانکی مئے چاگرد ءَ چون ءُ چہ پیم اتکگ ایشی ءِ زمہ وار کے اِنت؟-
دور نہ رو ایں لھتے وھد پیسر رو ایں آریستو تے لیس ءِ بنداتی گپ ءَ پر ریچ ایں کہ آ گْوش ایت زوراک مدام وتی گلام ءَ کم منگہ کنت، اے کم منگھی داں کہ من ءَ ھوش اِنت زوراک گوں بلوچاں کنگ ءَ اِنت ئِے۔ پہ درور بلوچ مردینانی شلوارانی چنگ، بلوچی چادر ءِ دور کنگ ءُ دور دیگ۔ بلوچی چپل ءِ پاد ءَ کنگ نہ ھلگ ءُ گردانک ءُ چار راھانی سر ءَ درانگوشو کنگ۔ جنینانی پندولانی پٹگ ءَ بہ گر داں جنین ءُ مردینانی آوار جنی ءَ بیا ءُ پد ءَ جونانی بے منگھی ءَ بہ رس۔ پد ءَ ملک ناز ،کلسوم ءُ ھیات ءِ کوش ءَ بہ سیل۔ یونیورسٹی ءِ کیمرھاں بہ گر داں آواران ءِ ماتانی گرگ ءُ آیاں ناشرکارانی بستار ءَ رسانکدر ءِ دیم ءَ پیش کنگ ءَ بہ چار۔ اے درستیں کارپدانی پشدر ایوک ءَ یکے کہ زوراک بلوچ ءَ کم منگہ بہ کنت داں بلوچ گپ کرت مہ کنت بلے پد ءَ ھم مئے چاگرد ءَ برے برے انچیں وئیلاں پد ما چوش جوشکی گولی ءَ جوش گپتگ ءُ پد ءَ ھش اِتگ ایں بزاں یک ءُ دو روانک زھرشانی ءُ چار سوچاکیں گپ ءَ پد چی کرتگ؟ ھچ۔من چاگرد ءِ گپ ءَ آں ،من درستانی گپ ءَ آں۔ آ لھتے بئے نہ اَنت کہ مڑگ ءَ اَنت ، چون اَنت ، چون نہ اَنت آ دگہ داستانے۔
نو آریستو دومی گپ ءَ کہ پر ریچ ئے گڑا گند ئے کہ زوراکاں مارا چوں دست ءُ گورجیگ کرتگ۔ چوں بھر ءُ بانگ کرتگ، پارٹیانی نام ءَ بھر ءُ بانگ۔میتگانی نام ءَ ونڈ ءُ چنڈ، زات ءُ زریاتانی نام ءَ کپ کپ ءُ دگہ ھزار رنگیں سند ءُ سید ھست اَنت ، کہ گپ بہ کن ئے ، گپ سک دراج روت ۔ نو اے بھر ءُ بانگی ءَ اے جتا جتائی ءَ چی کرتگ؟ اے جتا جتائی ءَ مارا انچوش نزور کرتگ کہ ما نہ زان ایں چی بہ کن ایں۔ یونیورسٹی وئیل ءِ بگیر ءَ گپ بہ کن ایں یا آواران ءِ ماتانی بارہ ءَ ۔پہ گار ءُ بیگواھیں بلوچاں توار ءَ چست بہ کن ایں یاپہ آن لائن کلاساں۔پہ ملک ناز ءُ بْرمش ءَ زھرشانی بہ کن ایں یا پہ کلسوم ءُ ھیات۔ بزاں اے بھر ءُ بانگی ایوک ءَ میتگی، گل ءُ مچی یے، زات ءُ زریاتی نہ بوت اَنت مارا زوراک ءَ جیڑھانی تہ ءَ ھم مان گیشینتگ ءُ ما مان گیشتگ ایں۔ مان گیشگ وت بھر ءُ بانگی یے۔ تُمپ ءَ پہ کلسوم زھرشانی اِنت، گڑا گوادر ءَ پہ لین ءُ آپ ءَ ۔ اگاں گوادر ءَ پہ ملک ناز ءُ بْرمش ءَ زھرشانی اِنت ءُ شال ءَ پہ بیگواھیں بلوچاں، بزاں ما ھر وڑ ءَ بھر اِیں۔ ما یک جاہ یکیں روچ ءَ یکیں وھد ءَ پہ یکیں جیڑہ ءَ ھم توار بوت نہ کن ایں ءُ ایشی ءِ سیت کج ءَ ءُ کے ءَ رسگ ءَ اِنت ۔گپ پد ءَ آریستو ءِ گپ اِنت ،زوراک ءَ رسگ ءَ اِنت۔ دگہ و بہ ھل مروچاں مئے چاگرد انچوش بھر ءُ بانگ اِنت ملک ناز ءُ کلسوم ءِ ھونیگ ھم نام گپتیں بلوچ اَنت ءُ مئے چاگرد ءِ مردم اَنت ما ستر آیاں وتی مہ کن اِیں بلے کُچّلیں راستی ھمیش اِنت کہ مئے جند ءِ چاگرد ءِ مردم اَنت۔
نُوں بیا آریستو ءِ سیمی گپ ءَ پر ریچ ایں بزاں کہ زوراک ترا تئی جند ءِ سرا بیسہ ءُ باور کنگ ءَ نہ ھل ایت۔ تئی جند ءِ سر ءَ تئی باور ءَ آسرین ایت کہ ھچ نہ بیت، نوں بہ چار مئے چاگرد ءَ پیسر ءَ مات ءُ پِتاں لوگاں گْوشتگ کہ منی چک ھچ نہ بیت سر گوں سنگ ءَ میڑینگ نہ بیت۔ تو ناسرپدی مہ کن بزاں زوراک ءِ بیم انچوش مئے چاگرد ءَ پترتگ کہ ما چہ زوراک ءِ دیم ءَ اوشتگ ءَ پیسر گْوشتگ سر گوں سنگ ءَ میڑینگ نہ بیت، ءُ مروچی مئے ڈیجیٹل چاگرد بزاں سوشل میڈیا ءَ بہ چار لھتے مردم گْوش ایت پہ زھرشانی ، نبیسگ ءُ گپ کنگ ءَ ھچی نہ بیت، اے ھما گپ اِنت کہ زوراک گُشگ لوٹ ایت بلے ما وتی زبان ءَ کارمرد کنگ ءَ ایں۔
دْرستیں ھبرانی مول ایش اِنت کہ مارا اگاں وتی چاگرد پھریزگی اِنت مارا ھم سنّت بوگی اِنت۔ تْرس چہ وتی دل ءَ در کنگی اِنت اگاں زھرشانی ءُ روانکاں ھچّی نہ بیت بلے چار ءُ پنچ مردماں تو ھمے مچی ءُ روانک ءِ تہ ءَ ھمے سوج ءَ بہ دئے کہ تو بہ لوٹ ئے چی نہ بیت؟ بزاں تو ئے بلوچ راج بہ لوٹ ئے ، تو ئے بلوچ چاگرد بہ لوٹ ئے درست بیت ۔پہ کنگ ءَ ایوک یک پرُ زوریں ھاٹیگ ءُ توکلے لوٹ ایت ءُ پہ نہ کنگ ءَ پہ ھزار ھنر ھست۔ مئے زانتکار ءُ سرپدیں مردماں ھوار مئے وانندگ ءُ نودربراں ھم چاگرد ءِ مردم سرپدی دیگی اَنت کہ زوراک چوں مردماں بھر ءُ بانگ کن اَنت، چوں مردماں یکے دومی ءِ دیم ءَ اوشتارین اَنت۔ چوں یکے دومی ءِ بگیری ءَ کار گر اَنت ءُ چون مئے دلانی تہ ءَ تْرس رودین اَنت۔ اے تک ءَ زھرشانی ءُ سوشل میڈیا ءِ گلگ ءُ زاریاں ابید مارا انچیں سرپدی ایر کنگی اِنت کہ مئے چاگرد وت وتی پادانی سر ءَ بہ اوشت ایت ھمک روچ چاگرد ءَ ملک ناز ءُ کلسوم ءُ ھیاتے چہ واب ءَ پاد مہ کنت۔
*آریستو تے لیس : یونانی شھزانتے بیتگ کہ چہ واجہ ایسا ءَ 384 سال ءَ پیش ودی بیتگ۔ تازی زبان ءَ واجہ ءِ نام’’ ارسطو‘‘ یا ’’ارسطا طالیس‘‘ نبیسگ بیت۔ اردو ءُ پارسی ءَ ھم ’’ارسطو‘‘ نبیسگ بیت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
