TBP Balochi

دی بلوچستان پوسٹ

بلوچستان لبریشن فرنٹ ءِ جارکش میجر گوھرام بلوچ ءَ ناشناسیں جاھے ءَ شنگ کرتگیں درشان ءِ تہ ءَ شھید عرفان ءُ شھید نور خان ءَ را سھر چکیں دروت ندر کرتگ –

آئی ءَ گْوشت کہ کیچ ءِ دمگ ءَ پاکستانی پوج ءِ گون ءَ دشت مزبند ءِ کوھی دمگ ءَ دشمنیں پوج ءِ دیم ءَ بامردی ءَ جنگ کنان ءَ کیپٹن عرفان پنام ءِ امداد ء شھید گلام مستپا جھمنند کُنشکلات، سیکند لیفٹینٹ نور خان پنام ءِ برمش ء نور بکش جھمنند ھیر آباد شھید بیتگ اَنت –

میجر گوھرام بلوچ ءَ گْوشت کہ مزنبند ءِ کوھی دمگاں پاکستانی پوج ءِ ھمراھی کمک ءَ بمبگواریں بالگرداں لشکر کشی کرتگ ءُ ایس ایس جی کمانڈوز جھل ءَ ایر کنگ بیتگ اَنت، شھیدیں سرمچاراں سیدان پیر ءُ گندھادر ءِ دمگاں دشمن ءِ گون ءَ بامردی ءَ جنگ کنان ءَ پاکستانی پوج ءِ پانزدہ سپاھیگ ءَ گیش کُشتگ ءُ بازینے زدگ کرتگ ءُ پہ وت ءَ شھیدی زرتگ –

شھید کیپٹن عرفان ءُ شھید نور خان ءَ جنگ ءِ پڑ ءَ دشمنیں پوج بازیں رنداں پروشی ءِ آماچ کرتگ، آیانی شھیدی ءَ پھر درشان ءُ شھیدانی گون ءَ اھد کنگ بیت کہ ساھے بدل آجو بلوچستان بیت –

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ 4083 روچ سرجم بیتگ – چہ تربت ءَ مھمد ادریس بلوچ، نور اھمد بلوچ ءُ دگہ مردماں بنجل ءِ تر ءُ تاب کرتگ –

انسانی ھکانی بیگواھیں باسک راشد ھسین بلوچ ءِ مات، ڈاکٹر دین مھمد بلوچ ءِ جنک سمی دین بلوچ، بیگواھیں شبیر بلوچ ءِ گوھار سیما بلوچ بنجل ءَ اتکگ ءُ وتی زھرشانی اش نبشتگ کنائینتگ اِت –

وی بی ایم پی ءِ رھشون ماما قدیر بلوچ ءَ ھمے میان ءَ گپ کنان ءَ گْوشت کہ راجداریں باسک ءُ دگہ رژناہ پگریں رھشونانی زورانسری چِست کنگ ءُ گار کنگ ءِ وئیل گوست ءَ پیداک اَنت ھنچش کہ زیردستیں بلوچستان ءَ میر اسد اللہ مینگل، میر اھمد شاہ بلوچ، دلیپ داس پنام ءِ شیر الی مری ءُ راستیں باسکانی بیگواھی ءُ ریاستی زنداناں آیانی شھیدی گوست ءِ وئیلانی تہ ءَ ھوار اَنت ءُ پیداک اَنت –

آئی ءَ گوشت کہ جنرل مشرف ءِ زوراکی ءِ دور ءَ پاکستانی چیریں ادارہ، فرنٹیئر کور ءُ دگہ ادارھاں انسانیت ءِ ھلاپ ءَ زنجیر بندیں آؤکیں زُلمانی زنجیراں بلوچانی پُرایمنیں جد ءُ جھد ءِ ھلاپ ءَ بازیں کچے ءَ کارمردی بندات کرتگ –

آئی ءَ گوشت کہ دوھزار ءُ چار ءَ ھما وھد ءَ وزیر داکلہ آفتاب اھمد شیرپاو ءَ بلوچستان ءِ تر ءُ تاب ءَ کیچ ءِ مھلوک ءَ گوں گپ کنان ءَ راستی پدرا کرتگ کہ چار ھزار ءَ گیش بلوچ لشکری زندانانی تہ ءَ بندیگ اَنت –

ماما قدیر بلوچ ءَ گْوشت کہ مروچی ءَ داں ریاست ءَ اے نہ گوشتگ کہ گپتگیں بلوچ کجا اَنت، وھدیکہ دوھزار ءُ چار ءَ پد بیگواھیانی لڑا گیشی اتکگ ءُ دوھزار ءُ ھشت ءَ نام گپتگیں جمھوری سرکار ءَ ایوک ءَ بیگواھیانی پالیسی برجاہ داشتگ اَنت بلکیں ریاستی زنداناں زنجیرانی سر ءَ بندوکیں بلوچانی لَٹ ءُ کُٹ کرتگیں جونانی دور دیگ بندات کرتگ –

زھرشانی بنجل ءَ ساڑی یے راشد ھسین بلوچ ءِ مات ءَ گوشت کہ منی زھگ ءِ آوار جنی ءَ دو سال سرجم بیگ ءَ اِنت بلے تنی وھدی ارب امارات ءُ پاکستان ءِ واکدارانی نیمگ ءَ آئی ءِ بیگواھی ءِ بارو ءَ ھچ وڑیں اھوالی دیگ نہ بیتگ –

آئی ءَ گوشت کہ من وتی زھگ ءِ شوھازگ ءَ پریس کلبانی دیم ءَ زھرشانی ءُ پریات ءَ لاچار اوں – چک ءِ یلہ کنائینگ ءَ دری ڈیھاں ھم زھرشانی بیگ ءَ اَنت وھدیکہ دنیا ءَ وتی توار ءِ سر کنگ ءَ ما چاگردی رسانکجاھاں ھم وتی توار ءَ سرکنان اِنت –

راشد ھسین ءِ مات ءِ گوشگ اِنت کہ زھگ ءِ یلہ کنائینگ ءَ ما زھرشانی ءَ برجاہ داریں – ھمے درگت ءَ دو اکتوبر ءَ ریلیز راشد ھسین کمیٹی ءِ نیمگ ءَ آن لائن کمئین ئِے کارمرد کنگ ءِ جار جتگ، یک ماتے ءِ بستار ءَ من دراھیں انسان دوستیں مھلوک ءَ گوں دزبندی کن آں کہ کمپئین ءَ بھر بہ زور اَنت ءُ منی زھگ ءِ یلہ کنائینگ ءَ توار چِست بہ کن اَنت –

دی بلوچستان پوسٹ

سر بیتگیں ھالانی رد ءَ میان اُستمانی رھگوز گروکیں جاپان ءِ نامی ئیں ازمکار یوکو ٹیکوچی جون بے ساھی ءَ گندگ بیتگ –

داد گروکیں جاپانی ازمکار یوکوٹیکوچی چِل سال ءِ اُمر ءَ وتی لوگ ءَ بے ساھی ءَ گندگ بیتگ –

پولیس ءِ رد ءَ ازمکار ءِ مرگ ءِ پَٹ ءُ پول بندات بیتگ ءُ آ دو چُکانی مات اِنت ءُ میان اُستمانی رھگوزی گروکیں ازمکارے بیتگ، پولیس ءِ گوشگ اِنت کہ شکی ھمے سماہ بیگ ءَ اِنت کہ ٹیکوچی ءَ وتکُشی کرتگ –

یوکو ٹیکوچی جاپان ءِ مامی ئیں یک ازمکارے بیتگ ءُ، اناگہ ءَ آئی ءِ مرگ ءَ ازمکار ءُ مھلوک دردیگ کرتگ اَنت،

یوکو ٹیکوچی جاپان ءِ مزن نام ءُ داد گروکیں ازمکارے ءِ لڑاں ھوار بیتگ ءُ آئی ءَ یک ترسناکیں تامرے ءَ وتی وش لزتیں تامر ءِ برزی ءُ ھالی ووڈ ءَ آئی ءِ تامر دوبر جوڑ کرتگ –

یوکو ٹیکوچی ءَ دوھزار ءُ چار ءَ چہ دوھزار ءُ ھپت ءَ سَے رند ءَ جاپان ءِ اکیڈمی ءَ داد گرگ ءَ جوانیں ازمکاری ءِ سوگات رس اِتگ –

آ دوھزار ءُ ھژدہ ءَ ایچ بی او سریز ”مس شر لاک “ ءَ ازمکاری ءَ گندگ بیتگیں چریشی ءَ پد امریکا ءَ ھوار بازیں ڈیھاں شنگ ءُ تالان بیتگ –

گوستگیں سال ءَ پنجگور ءِ دمگ سبز آپ ءَ تیر گواری ءِ وئیل ءَ بیران بوتگیں کار ءُ باری مردم حاجی عمر عیسیٰ زئی ءُ محمد مراد شاھوانی ءِ کوش ءَ گل ءِ ھچ دست مانیست – بیبگر بلوچ

دی بلوچستان پوسٹ

بلوچ ریپبلکن آرمی ءِ جارکش بیبگر بلوچ ءَ ریاستی چاریگ الھی بکش ءِ کوش ءِ زمّہ واری منّ اِتگ ءُ گوشتگ کہ مئے سرمچاراں گوستگیں بیگاہ ءَ ھوشاپ دمب ءِ میتگ ءَ ریاستی ڈیت اسکواڈ ءِ کارمند الھی بکش تیر باران کُرتگ ءُ کُشتگ- الھی بکش دمگی ڈیتھ اسکواڈ ءِ کارندہ سعید لاٹھو چیردستی ءَ کار ءَ بوتگ – کہ دزی ءُ ڈنگی ءُ بزگریں راج ءَ چہ ملام گرگ ءَ ھوار بلوچ سرمچارانی شھیدی ءَ تچکی ءَ گوں ھوار بوتگ –

جارکش ءَ گوشتگ کہ سالے ءَ پیش الھی بکش گل ءَ چاریگی بھتام ءَ دزگیر کُرتگ کہ آئی ءِ دپ ءِ وت منّ اِتگ کہ پوج ءِ سربراھی ءَ بازیں مردمانی آوار جنی ءَ آئی ءِ دست مان انت – دمگی کماش ناموریں مردم ءُ سیادانی گُشگ ءِ پد ءَ یک رندے آ یلہ کنگ ءُ پھل کنگ بوتگ بلے انگت آئی ءَ وتی کتکاری یل نہ داتگ انت ءُ بلکیں سلاہ بند بوتگ ءُ ڈیتھ اسکواڈ ءِ بھر ءِ جوڑ بوتگ – پمے ھاتر ءَ گوستگیں روچ ءَ سھب ءَ ھوشاپ ءِ دمگ تل ءَ آ تیرانی آماچ کُتگ ءُ کشتگ –

جارکش بیبگر بلوچ ءَ دیمتر ءَ گوشتگ کہ گوستگیں سال ءَ پنجگور ءِ دمگ سبز آپ ءَ تیر گواری ءِ وئیل ءَ بیران بوتگیں کار ءُ باری مرد حاجی عمر عیسیٰ زئی ءُ محمد مراد شاھوانی ءِ کوش ءَ گل ءِ ھچ دست مانیست – پرچاکہ کہ مئے نز ءَ آ بس کار ءُ باری مردم بوتگ انت – گل اے وڑیں بے گناھیں مردمانی کوش ءَ جُرم ءِ لیکیت، اے وڑیں وئیلاں ریاستی ڈیتھ اسکواڈ ھوار انت کہ آھانی کار کار ءُ باری مردمانی لٹ ءُ پُل ءُ ملام گرگ انت –
گڈسر ءَ جارکش ءَ گوشتگ کہ آجوئیں ڈیھے ءَ تاں مئے جھد ھمے وڑ برجاہ مان انت –

دی بلوچستان پوسٹ

بلوچستان لبریشن فرنٹ ءِ جارکش میجر گوھرام بلوچ ءَ ریاستی کارندھے سر ءَ بیتگیں اُرش ءِ زمہ واری منّ اِتگ ءُ گوشتگ کہ بیست ءُ شش ستمبر ءِ بیگاہ ءَ سرمچاراں تربت آپسر ءَ ریاستی کارندہ حکیم ء چاچا ءِ سر ءَ تیرگواری کرتگ، چریشی ءَ چہ آ زدگ بیتگ –

جارکش ءَ گْوشت کہ حکیم جھمنند تربت آپسر نامی ئیں ریاستی کمکار سمیر سبزل ءِ ٹولی ءِ کارمندے بیتگ ءُ ڈنک وئیل ءَ دزمانجن بیتگ –

میجر گوھرام بلوچ ءَ گْوشت کہ شمبے ءِ بیگاہ ءَ سرمچاراں آپسر بُنڈ بازار ءَ حکیم ء چاچا ءِ رندگیری کرتگ ءُ تیرگواری کرتگ چریشی ءَ چہ آ زدگ بیتگ –

میجر گوھرام بلوچ ءَ گوشت کہ اے وڑیں درستیں سرکاری کارمند مئے نشانگ ءِ تہ ءَ اَنت –

نبشتانک: آزمانک: دبئی ءُ پاکستان

نبشتہ کار: بکتیار رھیم بلوچ

دی بلوچستان پوسٹ

مئے میتگ ءَ چہ ھرکس دبی ءَ چہ اتک گڑا ھلک ءِ مردم دراہ شت انت دبی والا ءِ لوگ ءَ گوں آئی ءَ نند ءُ نیاد کت اش دبی والا ءَ گڑا دبی ءِ کسہ کت انت۔

دبی باز ساپیں ملکے اود ءَ دروگ ،دزی ،پَراڈّی ءِ ھچ موکل نیست اود ءَ ارباب ءُ آئی ءِ چکانی سواری ءِ لاری جتا جتا انت ءُ پت ھنچو سیر ءُ مالدار انت چک ءِ گاڑی ءَ کار نہ دار ایت زھگ ھم ھنچو سیر انت چہ پت ءَ یک کلدارے ھم نہ لوٹ ایت-

اود ءِ زبان ءَ پولیس ءَ شرتا گُش انت ، شرتا ءِ کانود پیلو کنگی انت ھر کس ءَ شرتا ءِ کانود پیلو نہ کت بزاں آ را جلم کنگ ءُ کید کنگ بیت –

دگہ ھم بازیں گپ اشکت کہ دل ءَ جیڑ ات اگل ھم ھیران ات کہ دبی چتوریں ملکے باریں-؟

منی اُمر بیست ءُ شش سال بوت من وتی ناکو ءَ گوشت منی واستا ویزایے روان بہ دے من دبی ءَ کایاں ناکو ءَ من ءَ گوشت وتی واستا پاسپورٹے بہ کَش من ویزایے چار آں تئی واستا روان دیاں من پاسپورٹ کش ات روان دات ماہ پورو بوت منی ویزا ناکو ءَ گپت من ءَ گشت ئِے بیا –

من ءَ بس ءَ زرت ءُ کراچی ءَ آؤرت ائرپورٹ ءَ جھاز ءَ سوار کت من شت آں دبی ءَ سر بوت آں۔

ناکو اِیرپورٹ ءَ نشتگ اَت منی واستا ودار ءَ اَت من بہ گیٹ ءِ دپ ءَ سر بوت آں من چار اِت کہ مردمے ءَ منی دست گپت ءُ من ءَ امباز کت من لپرزگ بوتاں کہ دزے باریں چے یے۔

ناکو ءَ کندگے جت گوشت ئِے بچہ ترا چے بوت گڑگ ءَ ئے من گوشت او ناکو تو ئے من پھم اتگ دزے، ناکو ءَ من ءَ گوشت اد ءَ دز نیست اے پاکستان نہ انت اے دبی انت اد ءَ کس کسی نام ءَ نہ گیت ۔

من ھبر چرینت گوشت من ترا پچا نیاؤرت ناکو ءَ گوشت تو چے ءَ چو ھبکہ ئے من گوشت من ھبکہ نہ آں تو چہ پیسر ءَ زنڈ ءُ پزور ءُ اسپیت بوتگ ئے پمیشکا من پچا نہ آؤرت ناکو ءَ من ءَ گوشت تو ھم ھنچو پزور ءُ اسپیت بئے ۔

کمو دیمتر ءَ شت ایں چار ات ٹکسی یے اوشتوک انت ما سوار بوت ایں دیم بہ ناکو ءِ اوتاگ ءِ جاگہ ءَ شت ایں۔

ناکو ءَ من ءَ گشت من جان شود آں تو سلاج ءَ پچ کن ھرچی دل کیت بور من گوشت ناکو سلاج چے ءَ گوش انت ناکو ءَ گشت پریج ءَ گوش انت۔

ناکو شت جان ءِ شودگ ءَ من پریج پچ کت یک پریج ءِ توک ءَ درمان مان انت بزان کریم، ملھم شربت ءُ دگہ بازیں درمان ءِ مان ات من ایشی ءِ دپ بست ایدگہ پریج ءِ دپ پچ کت پسی گوشت ، برنچ اور پروٹ مان ات من کمو پروٹ ءُ کمو برنج زرت ءُ وارت –

ناکو ءَ جان ششت اتک من گوشت ناکو اے پریج چہ درمان ءَ پُر انت شما اد ءَ زاناں درمان بھا کن ات ناکو ءَ گشت اے ارباب ءِ پسانی دوائی انت اے پسانی جان شودگ ءَ چہ رند پسان ءَ چرپ کنگی انت پسانی گودان ، سر مود ،کریم جنگی انت ، پسان ءَ درمان دیگی انت من کندگے جت ارررر !
اد ءَ پسانی جان ءَ شود ات کریم ءُ تیل ءَ چرپ کن ات درمان دیت اش؟ ناکو ءَ پسو دات اے دبی انت پاکستان نہ انت اود ءَ ساہ داران ءَ ھچ ازت نیست ۔

مئے کار ھمیش ات سھب ءِ وھد ءَ پسان ءَ کاہ ءُ آپ دات ششت انت چرپ کت انت درمان دات انت یک بجا تان چار بج ءَ وپت انت واب ءَ چہ پاد اتک انت گڑا جان ششت ورگ وارت پسانی ھیالداری ءَ شت ایں –

ارباب مدام بیگاہ ءِ وھد ءَ گاڑی ءَ سوار ات اتک بازین وردنے آؤرت ئِے مئے واستا ءُ وتی پسانی واستا۔

یک روچے ارباب اتک مئے اوتاگ جاگہ ءَ من ءَ گوانک ئِے کت بیا من اتک آں گوْشت ئِے بازار ءَ روان۔

من ءَ کار ءِ گد گور ءَ ات انت من گوْشت من ءَ کار ءِ گُد گور ءَ انت گد ھاکی ات انت ۔ ارباب ءَ گوشت تئی گد ھاکی انت بنی آدم چہ ھاک ءَ ودی بوتگ مرگ ءَ چہ رند ھاک ءَ روت من ھیران بوت آں کہ ارباب من ءَ گون ھید ءُ ھاکی ئیں گدان گاڑی ءَ سوار کنت من پہ ھبکھے گون ءَ پشت ءِ سیٹ ءَ نندگ ءَ ات انت من ءَ گوْشت ئِے دیم ءِ سیٹ ھالی انت دیم ءَ بیا منی کر ءَ بہ نند من ھیران ات آں ارباب من ءَ وتی کر ءَ نندارینگ ءَ انت من یک مزورے آں آ یک سیٹے باریں چنچو مال روزگار گور ءَ ھست ئِے۔

ارباب ءَ من ءَ زرت بازار ءَ برت منی گون ءَ ھور ورگ وارت من ھیران بوت آں کہ ارباب سیریں مردمے من یک مزورے آں ارباب منی گون ءَ ھور ورگ ءِ ورگ ءَ ھچ ایب نہ کنت ۔

سامان ءِ گرگ ءَ رند من ءَ سوار کت ئِے اوتاک جاگہ ءَ آؤرت ئِے وت گاڑی ءَ سوار بوت شت۔

چہ ارباب ءِ روگ ءَ رند من ناکو ءَ ھال دات ناکو ارباب منی گون ءَ ھور نگن برنچ وارتگ ھچ ایب ئِے نہ کتگ من کار والا یے آں آ سیرینے پد ءَ بلاھیں اربابے بلے منی گون ءَ ھچ ایب نہ کتگ ئِے ۔

ناکو ءَ گوشت بچہ اے پاکستان نہ انت کمو زر بیت مردم ءَ راہ ءِ روگ ءَ مہ ھیم نہ کنت اے ملک ءَ مگروری نیست اد ءَ سیٹ تاں گریب وت ءَ یک پیم پھم انت اد ءَ انسان بنی آدم چارگ بیت ناکہ امیری ءُ گریبی اد ءِ کانود یکے اد ءِ کانود پہ کلدار ءَ بھا کنگ نہ بیت من چہ اے گپ آ پھم ات واکی مئے ملک ءَ کسے ءَ کمو زر ھست آ گڑا ھرچی بہ کنت کت کنت ھرکس ءَ بہ کش ایت ھم کشت کنت آرا کس جست کت نہ کنت-

یک روچے ارباب ءِ ایدگہ باگ ءِ اشتر ءِ جڑے نادراہ بوتگ ات روچ چار بج ءِ وھد ات من ءُ ناکو واب ات ایں من چار ات کہ ارباب اتک من ءَ ءُ ناکو ءَ را پاد کت ئِے ما چم ششت انت دراہ دراہ بات ئِے کت ارباب پھلی لوٹ آں شمے واب ھراب بوتگ من ءَ پھل بہ کن ات من اتکگ آں منی دومی باگ ءَ یک ھشتر ءِ جڑے نادراہ انت باز الاج کتگ دراہ بیگ ءَ نہ انت بیا اِت رو ایں پہ جڑے واستا دوا لوٹ انت اللہ جڑ ءِ سر ءَ چہ سکی ءُ تکلیپے ءَ دور بہ کنت گاڑی ءَ سوار بوت ایں ھشترانی کر ءَ شت انت جڑ کپتگ ات ما دراہ اوشتات ایں ارباب ءَ دوا ءِ وانگ بندات کت کمو رند ءَ اللہ آمین گوشت دست پہ دیم ءَ مشت اَنت ئِے ما ھم ھنچو کت مارا گاڑی ءَ سوار کت ئِے پد ءَ اوتاگ جاگہ ءَ آؤرت ئِے وت اللہ ھاپز گوشت ئِے شت۔

چہ ارباب ءِ روگ ءَ رند من سک کند ات کہ مئے ملک ءَ بنی آدمے نادراہ بیت کس پہ آئی ءِ جان دراھی ءِ واستا انچو دوا نہ لوٹ ایت ھال پرسی ءَ نہ روت ارباب پہ جڑ ءِ واستا انچو دوا وانی کنت ۔

ناکو ءَ من ءَ پسّو دات دبی انت پاکستان نہ انت اود ءَ ساہ دار ءَ ازت نیست اد ءَ ساہ دار ءَ سک ازت دے انت اد ءَ کسے ءَ ساہ دار ءِ سر ءَ زلم کت گڑا بزاں آ را کید کنگ بیت جلم دیگ لوٹ ایت
من گوشت واہ اڑے ملک پہ تئی کانود ءَ۔

دست ھورک بیگ ءَ چہ پد من وتگند چالو کت پاکستان ءِ چینل چار ات کہ ھالاں دیگ ءَ ات کراچی پریس کلب ءِ دیم ءَ بیگواھیں مردمانی کول ءِ زھرشانی برجم انت-

بلوچستان ءَ روڈ ءِ ویل ءَ ھشت مردم بیران بوتگ،بیست ءُ شش ٹپی بوتگ انت-

پاکستان ءَ تیل ءِ نھاد ودینگ بوتگ –

سندھ ءِ ضلع سکھر دو قبائل پہ کچک ءِ کشگ ءِ زھر ءَ وت پہ وت جنگ ءَ رس اِتگ اَنت چارداہ مردم بیران بیست ءُ شش زدگ بوتگ اَنت۔

بلوچستان ءِ دمگ گوادر ءَ ایپ سی ءِ تیر گواری ءَ یک راہ ءَ رؤکیں پرپٹ سوارے کشگ بوتگ۔ پرپٹ سوار یک گریبیں ماھیگ گیرے زانگ بوتگ-

پنجاب ءِ شھر پیسل آباد ءَ مرد ءَ گیرت نام ءِ سر ءَ وتی جن چانکو جتگ ءُ کشتگ تچگ ءَ سوب مند بوتگ –

بلوچستان ءِ دمگ کوھلو ءَ ھلک ءِ کماش ءَ یک دوازہ سالی ئیں جنکیں چکے آوار جتگ بیگواہ کتگ چک ءِ کھول کوئٹہ ءِ پریس کلب ءَ زھرشانی کنگ ءَ انت۔

سندھ ءِ دمگ ءَ یک پیر ءِ سر ءَ یک تراکے بوتگ چہ تراک ءِ سوب ءَ ھشت مردم بیران بوتگ چار سد ءُ چل ءَ گیش زدگ بوتگ اَنت ءُ نادراہ جاہ ءَ رسینگ بوتگ انت بلے نادراہ جاہ ءَ درمان ءِ نہ بیگ ءِ ھال انت-

بلوچستان ءَ نودربرانی شدکش ایں ھڑتال برجاہ انت ۔
ھزدار ءَ بجلی ءِ کرنٹ ءِ لگگ ءِ سوب ءَ یک پتے گوں سے چک ءَ ھوار بیران بوتگ اَنت۔

ھب چوکی ءَ دو گاڑی ٹوک وارتگ آس لگ اتگ بیست ءُ سے مردم ءِ بیرانی ءِ ھال انت۔

گوادر ءَ آپ ءِ واستا جنینانی زھر شانی برجاہ انت –
چہ وتگند ءَ وتی ڈیھ ءِ ھال اشکنگ ءَ چہ پد دل ءَ ترس پیداک بوت سرجمیں روچ ءَ ھمے جیڑ ایت باریں مئے ملک ءَ چے بوگ ءَ انت ملک ءِ مردم سیاد کوم راج چون انت۔

آ ملک ءِ تہ ءَ چار ات کہ ھرکس برابر انت کس کسی نام ءَ نہ گیت، اے ملک ءَ ھما گندگ ءَ ایں کار کہ مہ ٹھ ایت اے ملک ءَ بیگاہ انت چہ چشین دل رنجیں ھالان ھما وش سکونیں ملک ءِ تہ ءَ مارا بے سکون بےچاڑ کت –

یک روچے بیگاہ ءِ وھد ءَ من ءُ ناکو بازار ءَ شت ایں چار ات کہ یک مئے وڑیں جٹیں مردمے جوس ئِے وارت جوس ءِ ڈبہ روڈ ءِ سر ءَ چگل دات پنچ منٹ ءَ چہ پد پولیس اتک سر بوت مردار ءَ گپت ءُ برت من چہ ناکو ءَ جست کت ناکو مرد ءَ پرچا بے گناہ ءَ پولیس ءَ گپت ناکو ءَ گوشت مرد چو تئی وڑ ءَ دبی ءَ ھم پاکستان پھم ءَ ایت چش نزانت کہ دبی ءَ کچرا چو دور دیگ ءِ موکل نیست کچرا پہ کچرا دان ءِ توک ءَ مان کنگی انت پد ءَ سپائی والا کاینت بر انت ءُ جنگلاں کَنڈ کن انت اش۔

من ھیران ات آں کہ اے چون اے ملک ءِ ایشی ءِ کانود سک جوان انت پد ءَ چہ ناکو ءَ جست کت اے پولیس ءَ ھال کے ءَ دات کہ اے دکان ءِ دپ ءَ جوس ءِ ڈبھے کپتگ ناکو ءَ دست پہ کیمرہ ءَ ٹال کت گوشت ئے ھمے کیمرا ءَ پیش داشتگ۔

دوسال سرجم بیگ ءَ چہ پد من ءُ ناکو ءَ چھٹی گپت کہ پاکستان ءَ کا ایں چھٹی مل ات ما وتی واستا سامان گپت شپے چار بجا مئے جاز ات ما شت ایں بہ ائر پورٹ ءَ جھاز ءَ سوار بوت ایں جھاز ءَ مارا پاکستان ءِ ائر پورٹ ءَ ایر کت شد ءَ گپتگ بسکوٹے جوسے گپت وارت ھالی ئیں کاگد دست ءَ کت انت کہ کچرا ءِ ڈبہ ءَ دور دے این اش ناکو ءَ گوشت ھالی ئیں کاگد ءَ ملک ءَ زور ئے من گوشت ناکو کچرا ءِ ڈبہ ءِ تہ ءَ دور دے آں ئِے ۔ناکو کندگے جت گوْشت ئِے اے پاکستان انت دبی نہ انت ھمد ءَ دور بہ دے ئِے کس جست پرس نہ کنت اد ءَ کچرا ءِ ڈبی نیست اے ملک وت کچرایے-

ائرپورٹ ءِ گیٹ ءَ چہ در اتک ایں ٹکسی والا ءَ باڑہ ءِ جست کت پیسر ءَ سک باز گوشت ئِے پد ءَ کمو منت کت کم کت ئِے۔ٹکسی ءَ سوار ات انت کہ نوں رو ایں لیمارکیٹ ءِ بسانی اسٹاپ ءَ راہ ءِ نیم ءَ پولیس ءَ گپت جست کت چہ کجا آیگ ءَ ات ما گوشت چہ دبی ءَ گاڑی ءَ چہ ایر کت ئِے سے ھزار کلدار لوٹ اِت ئِے من گوشت نیست ناکو ءَ پنچ سد کلدار کش ات دات گوْشت ئِے برو ات ۔

ما شت ایں من گوشت ناکو پولیس ءَ کلدار چے ءَ دات ناکو ءَ گوشت اے دبی نہ انت پاکستان انت اد ءَ پولیس ءَ دیگ ایں نہ دات سر ءَ دگہ چھٹی مان کنت ۔

ٹکسی والا ءَ آورت مارا مئے سیاد ءِ گس ءَ رسینت کراچی ءَ روچ گوْست شپ بوت سک گرم ات ما نشتگ ات ایں بجلی شت گار بوت من گوشت اد ءَ بجلی چش کنگ ءَ انت گس ءِ واھند ءَ گوشت کہ اے شکر ءَ بگر نیم گھنٹہ اتک ءَ ھمروچ نہ اتک ءَ ناکو ءَ گوشت پاکستان انت دبی نہ انت کہ بجلی نہ روت ۔

شپ ءَ مچران پہ واب ءَ نشت سھب بوت بس ءَ سوار بوت ایں ملک ءَ اتک ایں ھرکس منی کر ءَ اتک من بس دبی ءِ کانود سپائی ،روزگار ،الاج، ورگ آیانی تاریپ کت مردمان من ءَ سوج کت آ ملک ءَ مڈی چے در کیت من گوشت تیل در کیت دگہ ھچ درنہ ایت۔اود ءَ ھرچیز چہ دری ڈیھاں آرگ بیت بلے اود ءِ مردم انچو سیر انت اود ءِ جھمنندیں مردماں چہ گیش دری ڈیھانی مردم انت اود ءَ مزدور انت ۔
یک دو مڈی ءِ مالکیں ملک چو دست ءِ دل ءَ ساپ انت چو ماہ ءَ رژن ءَ انت –

مئے ملک ءَ ھزاراں کسم اِنت مڈی درکیت ما انگت شدیگ ایں دری ڈیھانی نودربر اسکول وان انت مئے نودر برانی زند ءَ پہ پریس کلب ءَ انساپ ءِ واستا زھرشانی ءَ گواْزگ ءَ انت۔

دروگ بند ،دز، ڈنگ مئے ملک ءِ مالک انت گریب اگل مند اھمک ءُ گدار گوشگ بنت -انساپ لوٹگ جرم انت کسے ءَ انساب ءُ کانود ءِ بارو ءَگپے کت بزان وتی زمہ وار وت انت۔

اے ملک ءِ وزیر گزیر اے ملک ءَ چار پنچ سال ھکومتی کن انت گریبانی مڈیاں دز انت چہ ھکومتی ءَ در بیگ ءَ پد وتی ڈیھ ءَ یل کن انت دری ڈیھاں رو انت نند انت ھمے کسہ تان شش ماہ ءَ گوں سیاد ءُ سنگتاں کت انت تانکہ چھٹی پورو بوت انت پد ءَ دبی ءَ شت ایں۔

دوئیں ملکانی سپر ءَ چہ پھم ات کہ پاکستان ءَ پولیس ءُ ایدگہ ادارہ ھکومت کرپٹ انت اَوام بے وکوپ انت۔

---

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ گوستگیں روچ ءَ روکپتی بلوچستان ءِ تیابدپی شھر چھبار ءَ سُھر ءِ دکان ءِ سر ءَ دُزاں بیڑ برتگ –

اھوالکار ءِ رد ءَ چھبار ءِ بنجاھی بازار ءَ بَلُک نھادی جاہ ءَ دُزاں یک سھر ءِ دکانے ءِ سر ءَ بیڑ برتگ ءُ دُزی ءِ جھد کرتگ-

اھوالکار ءِ رد ءَ دُزاں دکان ءِ سر ءَ تیرگواری ھم کرتگ ءُ تیر دکان ءِ شِشگاں لَگ اِتگ اَنت بلے دُز بے سوب بیتگ ءُ تتکگ اَنت –

چریشی ءَ پد پولیس ءَ ھال سر بیتگ ءُ پولیس ءَ دُزانی پَٹ ءُ پول بندات کرتگ –

اھوالکار ءِ رد ءَ روکپتی بلوچستان ءِ بازیں جاھاں دُزانی ناشری برجاہ اَنت ءُ گوستگیں ماہ ءَ دُزاں روکپتی بلوچستان ءَ گاڑی ءِ سر ءَ تیرگواری کرتگ ءُ رھگوزی کُشتگ اَنت –

دی بلوچستان پوسٹ

بولان ءَ آروسیانی ءِ گاڑی چپ بوتگ، کسانیں جنکوے بیران ءُ چُک ءُ زالبولاں ھوار نُھ مردم ٹپی بوتگ ءُ تفتان ءَ ھندو برادریانی گاڑی چپ بوتگ ءُ کسانیں جنکوے ءَ ھور یک مردمے بیران چار ٹپی بوتگ اَنت –

ٹی بی پی پتر ءَ سربوتگیں ھالانی رِد ءَ بلوچستان ءِ دمگ بولان ءَ آروسیانی گاڑی چپ بوھگ ءِ سوب ءَ کسانیں جنکو ءِ بیران بوتگ ءُ چُک ءُ زالبولاں ھوار نُھ مردم ٹپی بوتگ اَنت –

دمگی پھازداراں ٹپی ءُ بیران بوتگیں جنکو ھما دمان ءَ ھسپتال ءَ سر کُرتگ انت ـ اژدری چار ءُ ٹپاس ءَ پد جنکو ءِ جون کھول ءِ گور ءَ سر کنگ بوتگ –

دومی نیمگ ءَ نوکنڈی ءَ شال داں تفتان ءِ مزن شھدگ ءِ سر ءَ تیز رؤگ ءِ سوب ءَ ھندو برادریانی ءِ گاڑی چپ بوتگ کسان سالیں جنکوے ءَ ھوار یک مردمے بیران بوتگ ءُ دو مردیناں ھوار یک زالبول ءُ دوازدہ سالی ئیں جنکوے ٹپی بوتگ –

دمگی پھازداراں ٹپی ءُ بیران بوتگیں مردم ڈی ایچ سی ھستپال ءَ سر کُرتگ انت –

اے وئیل ءَ وکی نامیں مردمے ءَ ھوار کسانیں جنکوے بیران بوتگ ءُ وشال، راوی، ریا کماری، منیشا ٹپی بوتگ انت –

ھژدری چار ءُ تپاس ءَ پد جون کھول ءِ گورءَ سر کنگ بوتگ انت، ٹپی بوتگین مردم گیشیں درمانی ءِ ھاتر ءَ دالبندین ءَ دیم دیگ بوتگ انت –

نبشتانک: آزمانک: گُلزمین اِنت

نبشتہ کار: مھم جان گُل

دی بلوچستان پوسٹ

ترا گپے بہ گُش آں ؟
ھو بہ گُش ! بلے چونیں گپے ؟
“ترا یات بیت من ترا گُشتگ اَت کہ من ءَ چہ تو گیشتر دگہ کسے ْدوستر اِنت ! ؟
ھو بلے منی دل ءَ چی ءَ سُرین ئے ؟ ، اگاں ترا دگہ کسے چہ من گیشتر دوست اِنت گڑا ھمائی ءِ کر ءَ پرچا نہ رو ئے ؟
زھر مہ گِر گپ ءَ گوش دار !
چوناھا تو من ءَ سک دوست بئے ، تو منی زند ءِ درد ءُ رنجانی ھمسپر ءِ ، اگاں من گوں ترا ساھتے دوچار مہ کپاں من بے تاھیر باں !
ننداں گوں وت ءَ جیڑاں ،
بلے !
وھدے من آ دوست ءِ کر ءَ رواں گڑا من تئیگی نہ باں ، ما ھردو یک ءُ دومی ءَ امبازاں گر اِیں مھر کنیں مِڑین زھر کنیں ، زان ئے ؟
اگاں ما زار کُت گڑا من ھچبر نہ رواں وشاں نہ باں !
پرچا کہ آ من ءَ وت موہ نہ دنت کہ من بہ رواں وشاں بہ باں ، آ وت کیت من ءَ وتی سارتیں امبازاں زیر اِیت ءُ چہ اے جھان ءَ دیر بارت ۔ ھمے وشی من ءَ بے کساس تاھیر بکش اِیت ! اَنچو سما بیت من وت ءَ ھمائی ءِ امانت کناں ، آ منی درد ءُ دور ، گَم ءُ رنج ، سکی سوریاں دْرستاں وتی کُپگاں لڈ اِیت ءُ بس من ءَ ھمے گُش اِیت ۔ ” من ءَ بیھال مہ کن تو وت ءَ منی امانت کتگ ءُ من تی باھوٹ آں ! ۔”
” تو گریوگ ءَ ئے ؟ “
” اناں تئی گپاں گوش دارگ ءَ آں ! “
” گڑا اے اَرس چہ کجا ؟ “
” شمئے مھروانی ءِ کمال اِنت ۔ “
” ھھھھھ گنوک !”
” پد ءَ ؟”
” پد ءَ تئی یات ءُ ترانگ ءُ آئی بزگی ءُ گنجیں مھر ، اَنچو سما بیت شما دوئیں منی واستا جوڑ کنگ بوتگ اِت !
ءُ برے برے اَنچو سما بیت شمئے داتگیں مھر من ءَ چہ مرگ ءَ پیسر کُش اَنت ! “
ھاں ھچ گُشگ ءَ نہ ئے بلکیں واب کپت ئے؟
اناں تئی گپاں گوش دارگ ءَ آں ۔
زان ئے زی چے بوت ؟
” باریں بہ گُش ! “
” من آئی زان ءِ سر ءَ واب اِت آں آ منی سر ءَ سمارگ ءَ اَت گُش ئے من بھشت ءَ اِت آں ۔”
ھو آ شر رنگ ءُ بھشتی ھورے بیت من وَ سیاھیں بے براھے آں ، منی زانانی سر ءَ کجا ترا بھشت ءِ شُبین بیت !
” تو دل ءَ کُت ؟ “
” اِناں من پرچا دل ءَ بہ کناں ؟
ترا آ دوست بیت تئی مرزی منی دل ءَ کنگ ءَ تو آرا یل کن ئے ؟”
” اناں ! “
گڑا ؟
شما دوئیں منی زندگی ءِ بے شمئیگ ءَ من نہ باں !
اینکا دروگ مہ بند ! زندگی یکے ءُ یک گَشتاں رس اِیت ، پہ دروگ ءُ توسیپ من ءَ رد مہ دے ، آ تئی راہ اِنت شُت کن ئے وتی زندگی ءِ کر ءَ !
من یک برے اگاں شتاں پد ءَ واتر نہ باں تو پشومان بئے ۔
برو چہ روگ ءَ پیسر وتی دوست ءِ نام ءَ بُہ گُش نوں برو ۔
گُلزمین !

---

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔