انساپ ءِ جون – ٹی بی پی شونگال

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

انساپ ءِ جون

ٹی بی پی شونگال

دہ ستمبر 2020 ءَ بلوچستان ءِ دمگ چاغی ءِ ھنکین دالبندین ءَ پُل چوٹو ءِ ھند ءَ یک ژانگولیں جونے در اتکگ اَت۔ تھنائی ءَ کَنڈ کُتگیں اے جون انیگیں ھار ملیں ھورانی سوب ءَ دیم ءَ اتکگ اَت۔ جون پجار ءِ ھاتر ءَ پرنس فھد نادراہ جاہ ءَ برگ بیتگ اَت، کہ اود ءَ ڈاکٹراں گوشتگ کہ اے جون کم چہ کم سَے سال کوھن اِنت ءُ ایشی ءِ سینگ ءُ پاداں سَے تیر جنگ بیتگ ۔

اے جون داں اے ھد ءَ ژانگول بیتگ اَت کہ ھڈانی تہ ءَ مٹ بیتگ اَت، جون ءِ پجار کھول ءِ مردماں گور کُتگیں جاہ ءَ چہ رس اتگیں کوش، پُچانی سر ءَ گود دوچوک ءِ چیدگ ءُ دنتانانی ھاسیں چیدگاں چہ کتگ۔ کُشگ بیتگیں مردم ءِ پجار حفیظ اللہ ء رحیم مھمد بلوچ ءِ نام ءَ چہ بیتگ۔ 2018 ءَ آئی ءِ برات نعمت اللہ ءَ یک رسانک دیوانے ءِ رد ءَ آئی ءِ برات حفیظ اللہ 30 اگست 2016 ءَ پاکستانی پوج ءَ دزگیر کنگ ءَ پد بیگواہ کُتگ اَت ۔

شال ءِ پریس کلب ءِ دیم ء یک زھرشانی ءِ نیام ءَ کُشگ بیتگیں حفیظ اللہ ءِ مات ءَ اے راستی ھم پدر کتُگ اَت کہ آئی ءِ چُکے یل کنگ ءَ پہ یک پوجی میجرے ءَ چہ آیاں ھپتاد لکھ ءِ لوٹ کُتگ، آئی ءَ ھما میجر ءِ پجار میجر نوید ءِ نام ءَ چہ کُتگ اَت۔ آئی ءَ گیشتر گوشتگ اَت کہ چہ اِد ءَ اود ءَ زر جم کُتگ ءُ لوٹ کُتگیں زر پوجی میجر ءَ دیگ ءَ پد ھم آئی ءِ بچ یل کنگ نہ بیتگ۔

وھدے اے وئیل ءِ گپ رسانکدر ءَ چِست بوت گُڑا پاکستانی پوج ءَ اے جیڑہ ءِ سر ءَ تھی پَٹ ءُ پول کُت کہ داں میجر نوید ءِ کورٹ مارشل ءَ آسر بیت۔ فیلڈ کورٹ مارشل ءِ نیام ءَ وتی واکانی رد کارمرز کنگ ءِ گناہ ءَ پدر بیگ ءِ سوب ءَ میجر نوید ءَ اُمر ءِ زندانی ءِ سزا دیگ بوت۔ اگست 2019 ءَ پاکستانی پوجی رسانک باسک آئی ایس پی آر ءَ یک درشان ءِ شنگ کنان ءَ گوشتگ اَت کہ پوج ءِ مستر (آرمی چیف) جنرل قمر جاوید باجوہ ءَ فیلڈ جنرل مارشل کورٹ ءِ دیگ بیتگیں سزا ءِ گپ من اِتگ۔ اے درستاں ابید ھم بیگواھیں حفیظ اللہ پد ءَ ھم کُشگ بیت ءُ آئی ءِ کھول ءَ چہ ھپتادیں لَک ھم زیرگ بیتگ اَنت۔

پاکستان ءِ راجی رسانکدراں اے سرجمیں دل سوچیں وئیل ءِ سر ءَ بے تواری ءِ روچگ داشتگ، ءُ کجام ھم رسانکی کارست چہ پاکستانی پوج ءَ اے جُست ءَ کنگ ءِ گوہ ءَ وارت نہ کنت کہ آ اے وئیل ءِ سرجمیں اھوالاں بہ دے ءُ چِست بیوکیں جُستانی پسواں بہ دے اَنت۔ اگاں میجر نوید ءِ سزا بیتگ اَنت گُڑا آئی ءِ سر ءَ سلکاری کجام منانک بیتگ؟ زاناں آئی ءَ تھنا پہ لب بیگواہ کنگ ءِ سلکاری ءِ سزا بیتگ، یا اگاں کوش ءِ سلکاری ءَ سزا بیتگ؟ اگاں پوج ءَ کوش ءِ بارو ءَ سرپدی بیتگ گُڑا پرچہ حفیظ اللہ کھول ءِ مردم داں اینچو سال ءَ سرپد کنگ نہ بیتگ اَنت؟

پاکستانی پوج ءِ سر ءَ وھد پہ وھد انسانی اگبالانی جھانی گلانی نیمگ ءَ چہ بلوچستان ءَ جنگی سلکاریانی تہ ءَ ھوار بیگ ءِ بھتام جنگ بیتگ، بلے پاکستان ءَ کجام ھم لس گل زوریں بیگواھیانی اے جیڑہ ءِ گیش ءُ گیوار کنگ ءَ بے سوب اِنت، ءُ تچکیں پئیم ءَ پوج ءَ زمہ وار گوشگ ءَ چہ ترس اَنت۔ پاکستان ءِ لس سرکار ءَ 2011 ءَ یک کمیشنے “ کمیشن آن انکوائری آف انفورسڈ ڈس اپیئرنسس” اڈ داتگ اَت دانکہ زورانسری بیگواہ بیتگیں مردمانی ءُ آیانی بیگواہ کنوکیں زمہ وار درگیجگ بہ بنت۔

ابکہ ناکیں گپ ایش اِنت کہ ھمے کمیشن ءَ چہ 2011 ءَ داں انگت زورانسری بیگواھیانی نبشتگیں 6752 کیسانی تہ ءَ چہ 4642 رد کنگ بیتگ اَنت ءُ ایندگہ 2110 کیس داں انگت پہ گوش دارگ بیگ ءِ ودرایگ اَنت۔ اِشی ءَ ھوار ھوار ھمے کمیشن داں انگت زمہ وارانی پدراھی ءَ بے سوب بیتگ۔

یک میان اُستمانی گل “ انٹرنیشنل کمیشن آف جیورسٹس “ کہ جھان ءِ 60 نامداریں جج ءُ وکیلانی سر ءَ بندوکیں یکیں کمیشن اِنت وتی نوکتریں یک ارزنامگے ءِ تہ ءَ اے ارز پیش کُتگ کہ “ سی او آئی ای ڈی” ءَ 14 ستمبر ءَ وتی وھد ءِ سرجم بیگ ءِ روچ ءَ ھلاس کنگ بہ بیت پرچہ کہ اے وتی لوٹانی سرجم کنگ ءَ ھرابیں پئیم ءَ بے سوب بیتگ۔

حفیظ اللہ ءِ کھول اے گپ ءَ شر سرپد اَنت کہ پاکستانی پوج کجام ھم لس سرکار اگاں گل ءِ دیم ءَ پسہ نہ دنت ءُ آ وت ءَ سلکاراں میان اُستمانی انساپ ءِ آمید گِس ءَ بُرت نہ کن اَنت، پمیشکہ آیاں اے کیس ءِ گیشتر پد جنگ یل داتگ، ءُ چار سالانی تہ ءَ اولی رند اِنت کہ آ حفیظ اللہ ءِ ودار کنگ ءَ نہ اَنت، نی آیانی ودار آسر بیتگ۔

نوکتریں

کیچ الندور ءَ ناشناسیں مردماں ھائی اسکول سوتکگ

دی بلوچستان پوسٹ کیچ ءِ دمگ بلیدہ الندور ءَ ناشناسیں مردماں گورنمنٹ ھائی اسکول بُن داتگ، چریشی...

گچک: دو زالبول ءُ چُکاں ھوار نُھ مردم بیگواہ

دی بلوچستان پوسٹ چہ گچگ ءَ پاکستانی پوج ءِ دست ءَ دو زالبول ءُ چکاں ھوار نُھ...

مند ءَ پاکستانی پوج ءِ پانگس ءِ سر ءَ اُرش، اُرش ءِ زمّہ واری بی ایل ایف ءَ منّ اِتگ –

گوک رودان ءَ پاکستانی پوج ءِ پانگس ءِ سر ءَ اُرش کتگ دو کارمند کُشتگ یکے زدگ کُرتگ - میجر گْوھرام...