TBP Balochi

ڈاکٹر لیاقت سنی ءِ زورانسری بیگواھی

ٹی بی پی شونگال

شمبے 28 نومبر ءَ بلوچستان مزن شھدربرجاہ ءِ سَے اُستاد بلوچستان ءِ دمگ چہ مستونگ ءَ ناشناسیں سلاہ بندیں مردماں زور داشتگ ءُ بیگواہ کرتگ اَنت۔ بلوچستان یونیورسٹی ءِ اے استادانی تہ ءَ ایسوسی ایٹ پروفیسر ڈاکٹر لیاقت سنی، ڈاکٹر شبیر احمد شاھوانی ءُ نظام شاھوانی ھوار بیتگ اَنت۔ کہ چکاسی بنجاھانی چارگ ءُ ٹپاسگ ءِ ھاتر ءَ ھُزدار ءِ نیمگ ءَ روگ ءَ بیتگ اَنت۔

سَے گاڑیاں سواریں سلاہ بندیں مردماں بندات ءَ سئیں اُستاد بیگواہ کُتگ ءُ گوں وت بُرتگ اِت اَنت، بلے پد ءَ آیاں ڈاکٹر شبیر احمد شاھوانی ءُ نظام شاھوانی مستونگ ءِ کسانیں میتگے ءَ یل کُتگ اَنت، وھدیکہ ڈاکٹر لیاقت سنی داں انگت ءَ بیگواہ اِنت۔

ڈاکٹر لیاقت سنی نامی ئیں زانتکاریں زبانزانت، کواس ءُ بازیں کتاب ءُ تاکبندانی تہ ءَ شنگ بیتگیں پَٹ ءُ پولی نکانانی نبشتہ کار اِنت۔ آ یک پَٹ ءُ پولی جرنل البرز ءِ شونکار ءُ بلوچستان مزن شھدربرجاہ ءَ براھوئی ڈیپارٹمنٹ ءِ چیئرمین اِنت۔ براھوئی زبان ءِ سر ءَ کُتگیں آئی ءِ پَٹ ءُ پول ءُ زبان ءِ سر ءَ آئی ءِ زانتکاری ءِ سوب ءَ آ بلوچستان ءِ لبزانکی تکانی تہ ءَ باز نامدار اِنت۔

بلے بلوچستان ءَ ڈاکٹر لیاقت سنی ءِ نامداری یے یک مستریں سوب ءِ آئی ءِ گھگیریں شائری اِنت۔ یک انچیں وھدی ءَ کہ بلوچستان ءِ بازیں کواس ءُ نبشتہ کاراں ریاستی تُرس ءُ زوراکیانی سوب ءَ بے توار بیتگ اَنت، ڈاکٹر لیاقت سنی ءَ وتی توار گوں گھگیریں شَیراں چِست کُتگ۔ آئی ءِ شَیر “فرق و تقسیم اٹی گم نشان اے ننا” ءُ “سہو درد داستان طاغت ارے” براھوئی ادب ءِ تہ ءَ مزنیں ارزشت ءِ دارنت۔

انچو باور کنگ بیت کہ ڈاکٹر لیاقت سنی ءِ زوریں بیگواھی ءِ سوب آئی ءِ آشوبی شائری اَنت۔ بلوچستان ءِ یک نامداریں سیاسی گل بلوچ نیشنل موومنٹ ءَ ڈاکٹر لیاقت سنی ءِ زوریں بیگواھی ءِ بھتام پاکستانی پوج ءِ سر ءَ لڈ اِتگ۔ وتی شنگ کُتگیں یک درشانی ءِ تہ ءَ گوشتگ اِش کہ اے زوریں بیگواھی بلوچ استادانی ھلاپ ءَ برجاھیں پاکستانی زوراکیانی یکشلی اِنت۔

ڈاکٹر سنی اولی اُستاد نہ اِنت، کہ آئی ءَ بلوچستان ءَ زوریں بیگوائیانی دیمپانی کنگ کپگ ءَ اِنت۔ چہ آئی ءَ پیسر بلوچستان مزن شھدربرجاہ ءِ دگہ یک پروفیسر، کہ یک جکسوکیں آشوبی توارے اَت، پروفیسر سباہ دشتیاری ھم سلاہ بندیں مردماں جون 2011 ءَ تیر گواری کُتگ ءُ کُشتگ اَت۔2012 ءَ دگہ یک استادے نذیر مری ءُ 2014 ءَ گوادر ءِ زاھد آسکانی، ھُزدار ءَ پروفیسر رزاق بلوچ ءَ ھوار دگہ بازیں اُستادانی کُشگ ءُ یا زورانسری بیگواہ کنگ بیتگ اَنت۔

بلوچستان ءِ وانگی جاور چوناھا اے دمگ ءِ تہ ءَ درستاں سل تِر اَنت، کہ اود ءَ وانوکیں مردمانی کَچ ھرابیں کساسے ءَ جھل اِنت۔ بلوچستان ءَ ھسابی مزن شھدربرجاہ اَنت، اود ءَ ھم پھازگی ءِ نام ءَ سلاہ بندیں پوجی ٹولیانی مزنیں کساسے اوشتوک اَنت، کہ ایشی ءِ سوب ءَ ھر وھد ءَ تُرس ءُ بیم ءِ جاور اِنت۔ چُشیں جاورانی تہ ءَ استاداں نشانگ کنگ بلوچستان ءِ پدمنتگیں وانگی جاوراں گنتر پدمنتگی ءِ آماچ کنگ ءَ اِنت۔ اگاں بلوچستان ءَ وانگ، وانگی ادارگانی ءُ استادانی نشانگ کنگ ءِ یکشلی دارگ نہ بیت اَنت گُڑا اِشی ءِ سک ترسناکیں آسر دیم ءَ اتک کن اَنت۔

دی بلوچستان پوسٹ

بلوچستان ءِ جتا جتائیں ھنداں گوستگیں بیست ءُ چار ادارانی تہ ءَ دو جتائیں وئیلاں سَے پروفیسراں ھوار چار مردم بیگواہ کنگ بیتگ اَنت کہ چریشانی تہ ءَ دو پد ءَ یلہ کنگ بیتگ اَنت –

سر بیتگیں ھالانی رد ءَ بلوچستان ءِ دمگ کچھی ءِ ھند ڈھاڈر ءَ پاکستانی پوج ءُ چیریں ترامگیجاں ورناہ یوسف ء بنگل خان مری دزگیر کنگ ءَ پد ناشناسیں زنداناں برتگ –

دمگی مردمانی رد ءَ ورناہ پاکستانی پوج ءُ چیریں ترامگیجیں کارندھاں دزگیر کنگ ءَ پد وتی ھمراھی ءَ برتگ ءُ چریشی ءَ پد آئی ءِ بارہ ءَ ھچ ھال نیست اِنت –

زانگ بہ بیت گوستگیں روچاں ورنا ءِ نزیکیں سیاد نادر خان ء ھاجی سید خان پوج ءَ دزگیر کنگ ءَ پد بیگواہ کرتگ اَت، نادر خان شش ماہ ءِ بیگواھی ءَ پد دیم ءَ آرگ بیتگ ءُ پولیس ءِ جیل ءَ بند کنگ ءَ پد یلہ کنگ بیتگ اَت –

کھول ءِ رد ءَ نادر پولیس ءِ زنداناں یلہ بیگ ءَ یک روچے ءَ رند دوبر پوج ءِ کارندھاں دزگیر کرتگ ءُ بیگواہ کتگ –

زانگ بہ بیت بیست ءُ چار ادارانی تہ ءَ بلوچستان ءِ بیگواھیانی دو وئیلان چار مردم گرگ بیتگ اَنت ءُ پد دو یلہ کنگ بیتگ اَنت –

گوستگیں روچ ءَ مستونگ ءَ بیگواہ بیتگیں پروپیسر لیاقت سنی انگت ءَ بیگواہ اِنت کہ آئی ءِ بیگواھی ءِ سر ءَ جتا جتائیں ھنداں سیاسی پاٹی ءُ نودربر گلانی نیمگ ءَ زھرشانی درچ برجاہ اَنت ھمے وڑ چاگردی رسانکجاھاں ھم سرکار ءِ بگیری ءَ ایراد گرگ ءَ اَنت –

تمپ ءَ پوج ءَ یک لوگے ءَ بیڑ برتگ ءُ زامران ءِ بازیں جاھاں پوج بازیں کچے ءَ مُچ بوتگ زمینی پوج ءِ ھمراھی ءَ برزی بالگرد ھم گون اَنت

دی بلوچستان پوسٹ

سر بیتگیں ھالانی رد ءَ بلوچستان ءِ دمگ کیچ تمپ ءَ پاکستانی پوج ءَ یک لوگے ءِ سر ءَ بیڑ برتگ ءُ لوگ ءَ جاڑیگیں جنین ءُ چُک کمشرپ کرتگ اَنت –

دمگی مردمانی رد ءَ گوستگیں شپ ءِ ساھت یک ءَ پوج ءَ تمپ دازن ءَ نصیر ء عبدالصمد ءِ لوگ انگیر ءَ کرتگ اَنت ءُ لوگ ءَ جاڑیگیں جنین ءُ چُک کمشرپ کرتگ اَنت ءُ لوگ پَٹ ءُ ھنڈ کرتگ اَنت –

بیڑی ءِ وھد ءَ دگہ دزگیریانی ھال نہ بیتگ اَنت –

زانگ بہ بیت بلوچستان ءِ جتا جتائیں جاھاں پاکستانی پوج ءِ بیڑیانی ھال رسانکدراں پیداک اَنت بلے دوشیگیں بیڑی ءِ ھال تنی وھدی پوج ءِ نیمگ ءَ شِنگ نہ بیتگ اَنت –

بلوچستان ءَ بندوکیں سیاسی ءُ چاگردی مردمانی گوشگ اِنت پاکستانی پوج ھروھد ءَ لس مردمانی لوگاں بیڑ بارت ءُ اود ءَ مردین نہ بوگ ءِ سوب ءَ جنین ءُ چُکانی سر ءَ زوراکی کَنت –

اھوالکار ءِ رد ءَ زامران ءِ ھند دشتُک ءَ ھم پاکستانی پوج ءَ بازیں جاہ ءُ راہ ءُ دربستگ اَنت –

اھوالکار ءِ گوشگ اِنت پوج ءِ بازیں مُچی ءَ ھمے گمان کنگ بیگ ءَ اِنت دمگ ءَ یک پوجی لشکر کشی ءِ گمان پدر بیگ ءَ اِنت –

اھوالکار ءِ گوشگ اِنت زمینی ءِ پوج ءِ ھمراھی ءَ برزی جنگی بالگرد ھم گون اَنت ءُ دمگ ءَ بال اَنت –

گوست ءَ بلوچستان ءِ دمگ مشکہ ءُ آواران ءَ ھوار بلوچستان ءِ دگہ جاھاں ھم زالبولانی آوارجنیانی ھال رسانکدراں شنگ بیتگ اَنت –

دومی نیمگ ءَ شال ءَ گار ءُ بیگواھیں مردمانی واستا جھد کنوکیں گل وائس فار بلوچ مسنگ پرسنز ءِ گوشگ اِنت کہ بلوچستان ءَ پوج ءِ دست ءَ بیگواہ بیتگیں مردمانی تہ ءَ زالبول چُک ھم ھوار اَنت –

دی بلوچستان پوسٹ

بلوچستان ءِ دمگ ھزدار ءُ کوھلو ءَ پیش اتکگیں تیرگواری ءِ دو جتائیں وئیلاں یک مردمے بیران ءُ یکے زدگ بیتگ –

سر بیتگیں ھالانی رد ءَ ھزدار ءِ دمگ زھری نورگامہ بازار ءَ سلاہ بندیں مردمانی تیرگواری ءَ یک مردمے بیران بیتگ – جون پجار ءِ ھاتر ءَ زھری ءِ نادراہ جاہ ءَ برگ بیتگ –

وئیل ءَ پد دمگ ءِ راہ ءُ در بند کنگ بیتگ اَنت گڈی ھالانی تہ ءَ تاں ھچ دزگیری ءِ ھال نہ بیتگ اَنت –

ھمے وڑ ءَ تیرگواری ءِ دومی وئیل کوھلو مال منڈی ءِ پیش اتکگ کہ اود ءَ ناشناسیں مردمانی تیرگواری وڈیرہ میاں خان لوھارانی مری ءِ زھگ گھنور خان زدگ بیتگ –

وئیل ءَ پد تیرگواری کنوک تتکگ اَنت ءُ زدگ بیتگیں پنجاپ ءِ شھر ملتان ءَ برگ بیتگ –

واکدارانی گوشگ اِنت زدگ بیتگیں مردم ءِ جاور نگیگ اَنت ءُ وئیل ءِ بارہ ءَ پٹ ءُ پول بیگ اِنت –

دی بلوچستان پوسٹ

سر بیتگیں ھالانی رد ءَ مروچی روکپتی بلوچستان ءَ یک گاڑی ءَ پرپٹے ءَ ٹکر جتگ ءُ چریشی ءَ یک مردمے بیران ءُ یکے زدگ بیتگ –

اھوالکار ءِ رد ءَ وئیل مگرب ءَ پیسر پیش اتکگ ءُ روکپتی بلوچستان ءِ دمگ درگس ءَ یک گاڑی ءَ پرپٹے ءَ ٹکر جتگ ءُ پرپٹ ءَ سواریں یک مردمے بیران بیتگ ءُ یکے زدگ بیتگ –

بیران بیتگیں مردم ءِ پجار عبید ء اللہ بکش جھمنند درگس ءُ نئیم ءِ ناماں زانگ بیتگ اَنت –

زانگ بہ بیت روکپتی بلوچستان ءِ بازیں وھداں دگانی وئیل بوگ ءَ اَنت دمگ ءِ چاگرد کارانی گوشگ اِنت وئیلانی سوب دگ ءِ سر ءَ روکیں گاڑیانی سوب ءَ بیگ ءَ اِنت –

دی بلوچستان پوسٹ

وائس فار بلوچ مسنگ پرسنز ءِ رھشون ماما قدیر بلوچ ءَ وتی درشان ءِ تہ ءَ گوشتگ کہ بلوچستان شھدربرجاہ ءِ پروفیسر ءُ براھوئی ڈیمپارٹمنٹ ءِ سرکماش ڈاکٹر لیاقت سنی ءِ بیگواھی پاکستانی ریاست ءِ زوراکیانی پالیسی ءِ بھر اِنت- آئی ءَ گوشتگ کہ اشی ءَ پیش ھم سر رجمیں بلوچستان ءَ نودربر ءُ استاد زورانسری آوار جنی ءَ ھوار کُشگ بوتگ انت –

ماما قدیر بلوچ ءَ گوشتگ کہ گوست ءَ بلوچ نودربراں ھوار سباء دشتیاری وڑیں اُستاد تیرانی نشانگ جوڑ کنگ بوتگ انت وھدیکہ ھزارانی کچ ءَ مردمانی آوارجنی ءُ ازیت دیگ ءَ پد آھانی زانگولیں جون دور دیگ بوتگ انت کہ آھانی تہ ءَ گیشتریں کچ نودربر ءُ اُستادانی بوتگ اَنت-

آئی ءَ گوشتگ کہ لیاقت سنی ءِ وڑیں زبان دوست ءُ پی ایچ ڈی ھولڈر بلوچستان ءِ تہ مھپوز نہ انت گڑا ایندگر مردمانی پھازی گمان کنگ نہ بیت –

گڈسر ء ماما قدیر بلوچ ءَ گوشتگ کہ لیاقت سنی ءِ زورانسری بیگواھی ءَ دنیاوی ادارہ گامگیج بہ زور انت ءُ چہ پاکستانی ادارھاں جُست بہ گر اَنت –

زانگ بہ بیت بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھر شانی برجاہ انت – شال پریس کلب ءِ دیم ءَ زورانسری آوار جنی ءِ بگیری ءَ برجاہ داشتگیں زھرشانی ءَ مروچی چار ھزار یک سد ءُ چل ءُ پنچ روچ سرجم بوتگ – جتائیں پگرے منوگراں زھرشانی بنجل ءَ اتکگ بیگواھیں مردمانی کھولانی گوم ءَ دلپدردی درشان اِتگ –

دی بلوچستان پوسٹ

سر بیتگیں ھالانی رد ءَ بلوچستان شھدربرجاہ ءِ سَے پروفیسر ڈاکٹر لیاقت سنی، شبیر شاھوانی ءَ پروفیسر نظام شاھوانی بیگواہ بیتگ اَنت پروفیسرانی گاڑی مستونگ ءِ دمگ غلام پڑینز ءَ دزکپتگ –

پولیس ءِ رد ءَ ھر سئیں پروفیسر بی اے ءِ برجاھیں چکاساں تر ءُ تاب ءَ چہ شال ءَ ھزدار ءَ روگ ءَ بیتگ اَنت پھزدارانی پَٹ ءُ پول برجاہ اِنت –

پولیس ءِ رد ءَ بیگواھیں پروفیسرانی تہ ءَ دو کانک ءِِ دمگ ءَ یلہ دیم ءَ اتکگ – یک پروفیسرت ڈاکٹر لیاقت سنی تنی وھدی بیگواہ اِنت –

یلہ کنگ بیتگءں پروفیسراں تنی وھدی ھچ نہ گوشتگ کہ بلے گوست ءَ نودربر ءُ استادانی بیگواھیانی وئیل بلوچستان ءَ پیش اتکگ اَنت ءُ بازیں وئیل پاکستانی پوج ءُ چیریں ادارھانی سر ءَ بھتام جنگ بیتگ اَنت –

لیاقت سنی بلوچستان شھدربرجاہ ءِ براھوئی ڈیپارٹنمنٹ ءِ سرکماش اِنت ءُ ھمے وڑ ءَ براھوئی ءِ زبان ءِ درگت ءَ پٹ ءُ پول کنوکے ءِ رنگ ءَ زانگ بیت اِنت اشی ءَ ابید آ رھشون ادبی دیوان ءِ بنکی رھشونانی تہ ءَ ھوار اِنت ءُ آئی ءَ براھوئی ءَ پی ایچ ڈی کرتگ –

ایران ءِ مزن نامیں زورامندیں بمب جوڑ کنوکیں زانتکار محسن فخری زادہ ءِ کوش ءِ بیر گرگ ءِ جار جتگ –

دی بلوچستان پوسٹ

ایرانی مزن نامیں رھشون آیت اللہ خامنہ ای ءِ لشکر ءِ شون دیوک حسین دیغان ءَ گْوشتگ کہ محسن فخری ءِ کوشوکاں ھنچیں درس دیگ بیت اِنت کہ وتی کتگیں کارءِ سرءَ پشومان بہ بنت –

ایران ءِ دری کارانی وزیر جواد ظریف ءَ اے اُرش ڈیھ ءِ ناشری گْوشتگ ءُ بھتام جتگ کہ اے اُرش ءِ تہ ءَ اسرائیل دزمانجن اِنت –

میان اُستمان ءَ ایران ءِ سفیر ماجد تخت روانچی ءَ گْوشتگ کہ اے کوش میان اُستمانی رھبندانی لگتمالی اِنت – کہ اشی ءِ مول ءُ مراد دمگ ءَ جنگ پیداگ کنگ اِنت –

زانگ بہ بیت ایران ءِ ایٹمی سائنسدان محسن فخری ءِ سر ءَ پردماوند ءِ دمگ ابسرد ءَ اُرش بیتگ ءُ چریشی ءَ پد آ بیران بیتگ –

محسن فخری زادہ ءَ ایران ءِ ایٹمی مراگشانی دیم ءِ مردم زانگ بیتگ، آ پِت ءُ ایرانی بمب ءِ نام ءَ ھم زانگ بیتگ –

زانگ بہ بیت اے اُرش یک ھنچیں وھدے ءَ بیتگ وھدیکہ نوک گچین کنگ بیتگیں امریکی سروک جو بائیڈن ءَ وتی گُشتانکانی تہ ءَ گْوشتگ جنوری ءِ ماہ ءَ اگدو ءِ سمبالگ ءَ پد ایران ءَ دوبر گپ ءُ تران کن آں وھدیکہ اسرائیل اے جارانی بگیر بیتگ –

دی بلوچستان پوسٹ

بلوچستان ءِ دمگ کچھی ءِ دمگ ڈھاڈر ءَ پاکستانی پوج ءَ یلہ بیتگیں مردم دوبر آوار جتگ –

سر بیتگیں ھالانی رد ءَ نادرخان ء ھاجی سید خان دو روچ ءَ پیسر پاکستانی پوج ءَ چہ ڈھاڈر ءَ دزگیر کنگ ءَ پد ناشناسیں زنداناں برتگ کہ چریشی ءَ پد آئی ءِ بارہ ءَ ھچ رنگیں ھال نیست اِنت نادر خان بنکی ءَ سبی ءِ دمگ جالڑی ءِ جھمنند اِنت –

دمگی مردمانی گوشگ اِنت نادر خان چریشی ءَ پیسر ھشت مئی ءَ دزگیر کنگ ءُ بیگواہ کنگ ءَ پد ھشت نومبر ءَ دیم ءَ آؤرتگ جیل ءَ برتگ، آ سَے روچ ءَ رند دگہ یک ءُ روچ ءَ پد دزگیری کنگ ءُ بیگواہ کنگ بیتگ –

دمگ ءِ واکداراں اے درگت ءَ ھچ نہ گوشتگ، گوست ءَ چوشیں وئیلانی بارہ ءَ ھال شنگ بیتگ اَنت –

دی بلوچستان پوسٹ

بیڑ کلات ءِ رینجرز ءُ ایپ سی ءَ چیریں ھالانی سر بیگ ءَ کرتگ اَنت – بنشون سی ٹی ڈی

سی ٹی ڈی ءَ ٹاہ داتگ کہ بیڑ ءِ وھد ءَ چہ ھُزدار ءَ بلوچ لبریشن ءِ سَے باسک دزگیر کرتگ اَنت -بیٹ ھزدار ءِ دمگ وڈھ ءَ کنگ بیتگ –

بنشون ءِ گوشگ اِنت کہ بیڑ ءِ وھد ءَ دگہ سَے مردم شپ تھاری ءِ سوب ءَ تَچگ ءَ سوبین بیتگ اَنت –

بنشون ءِ گوشگ اِنت گپتگیں مردمانی بنجل ءَ یک سِی تیری، میگزین، سِی تیر، بیست ءُ پنچ سیری ءِ ترسناکیں شورو، یک دیرواگ تراکے، دو دانگ آئی ای ڈی ڈیوائسز، چار دانگ سِی فور تراکناکیں شوروانی پَٹی دزکپتگ اَنت –

بنشونانی گوشگ اِنت کہ گپتگیں مردم وڈھ ءِ دمگ کلی شیرو وڈھ ءَ چیر بیتگ اَنت، ءُ آ کلات، ھُزدار ءُ لسبیلہ ءَ اُرشانی شَوربندی ءَ کنگ ءَ بیتگ اَنت-

بنشون ءَ ٹاہ داتگ کہ دزگیر کرتگیں مردم چریشی ءَ پیسر بازیں براں پوج ءِ سر ءَ اُرش ءُ دگہ وئیلاں دزمانجن بیتگ اَنت -بلے بنشوناں تنی وھدی گپتگیں مردمانی نام ءُ دگہ کرتگیں کار پدر نہ کرتگ اَنت –

زانگ بہ بیت دو روچ ءَ پیسر سی ٹی ڈی ءِ بنشون ءَ ٹاہ داتگ کہ سندھ ءِ بنجاھی شھر کراچی ءَ ناشریں گلاں بندوکیں چار مردم دزگیر کرتگ اَنت کہ اشانی تہ ءَ بلوچ لبریشن آرمی ءِ باسک ھم ھوار اِنت –

ھمے رنگ ءَ بلوچستان ءِ دمگ نسیر آباد ءَ دو جتا جتائیں بیڑاں سی ٹی ڈی ءِ واکداراں ناشریں گلے ءِ کلانی باسکے ءَ ھوار چار مردمانی دزگیری ءُ تراکناکیں شورو ءُ نشھانی دزکپگ ءِ ٹاہ داتگ –

بیتگیں بیڑاں دزگیر بیتگیں مردمانی بارہ ءَ گیشیں ھال شنگ نہ بیتگ اَنت –