ڈاکٹر لیاقت سنی ءِ زورانسری بیگواھی
ٹی بی پی شونگال
شمبے 28 نومبر ءَ بلوچستان مزن شھدربرجاہ ءِ سَے اُستاد بلوچستان ءِ دمگ چہ مستونگ ءَ ناشناسیں سلاہ بندیں مردماں زور داشتگ ءُ بیگواہ کرتگ اَنت۔ بلوچستان یونیورسٹی ءِ اے استادانی تہ ءَ ایسوسی ایٹ پروفیسر ڈاکٹر لیاقت سنی، ڈاکٹر شبیر احمد شاھوانی ءُ نظام شاھوانی ھوار بیتگ اَنت۔ کہ چکاسی بنجاھانی چارگ ءُ ٹپاسگ ءِ ھاتر ءَ ھُزدار ءِ نیمگ ءَ روگ ءَ بیتگ اَنت۔
سَے گاڑیاں سواریں سلاہ بندیں مردماں بندات ءَ سئیں اُستاد بیگواہ کُتگ ءُ گوں وت بُرتگ اِت اَنت، بلے پد ءَ آیاں ڈاکٹر شبیر احمد شاھوانی ءُ نظام شاھوانی مستونگ ءِ کسانیں میتگے ءَ یل کُتگ اَنت، وھدیکہ ڈاکٹر لیاقت سنی داں انگت ءَ بیگواہ اِنت۔
ڈاکٹر لیاقت سنی نامی ئیں زانتکاریں زبانزانت، کواس ءُ بازیں کتاب ءُ تاکبندانی تہ ءَ شنگ بیتگیں پَٹ ءُ پولی نکانانی نبشتہ کار اِنت۔ آ یک پَٹ ءُ پولی جرنل البرز ءِ شونکار ءُ بلوچستان مزن شھدربرجاہ ءَ براھوئی ڈیپارٹمنٹ ءِ چیئرمین اِنت۔ براھوئی زبان ءِ سر ءَ کُتگیں آئی ءِ پَٹ ءُ پول ءُ زبان ءِ سر ءَ آئی ءِ زانتکاری ءِ سوب ءَ آ بلوچستان ءِ لبزانکی تکانی تہ ءَ باز نامدار اِنت۔
بلے بلوچستان ءَ ڈاکٹر لیاقت سنی ءِ نامداری یے یک مستریں سوب ءِ آئی ءِ گھگیریں شائری اِنت۔ یک انچیں وھدی ءَ کہ بلوچستان ءِ بازیں کواس ءُ نبشتہ کاراں ریاستی تُرس ءُ زوراکیانی سوب ءَ بے توار بیتگ اَنت، ڈاکٹر لیاقت سنی ءَ وتی توار گوں گھگیریں شَیراں چِست کُتگ۔ آئی ءِ شَیر “فرق و تقسیم اٹی گم نشان اے ننا” ءُ “سہو درد داستان طاغت ارے” براھوئی ادب ءِ تہ ءَ مزنیں ارزشت ءِ دارنت۔
انچو باور کنگ بیت کہ ڈاکٹر لیاقت سنی ءِ زوریں بیگواھی ءِ سوب آئی ءِ آشوبی شائری اَنت۔ بلوچستان ءِ یک نامداریں سیاسی گل بلوچ نیشنل موومنٹ ءَ ڈاکٹر لیاقت سنی ءِ زوریں بیگواھی ءِ بھتام پاکستانی پوج ءِ سر ءَ لڈ اِتگ۔ وتی شنگ کُتگیں یک درشانی ءِ تہ ءَ گوشتگ اِش کہ اے زوریں بیگواھی بلوچ استادانی ھلاپ ءَ برجاھیں پاکستانی زوراکیانی یکشلی اِنت۔
ڈاکٹر سنی اولی اُستاد نہ اِنت، کہ آئی ءَ بلوچستان ءَ زوریں بیگوائیانی دیمپانی کنگ کپگ ءَ اِنت۔ چہ آئی ءَ پیسر بلوچستان مزن شھدربرجاہ ءِ دگہ یک پروفیسر، کہ یک جکسوکیں آشوبی توارے اَت، پروفیسر سباہ دشتیاری ھم سلاہ بندیں مردماں جون 2011 ءَ تیر گواری کُتگ ءُ کُشتگ اَت۔2012 ءَ دگہ یک استادے نذیر مری ءُ 2014 ءَ گوادر ءِ زاھد آسکانی، ھُزدار ءَ پروفیسر رزاق بلوچ ءَ ھوار دگہ بازیں اُستادانی کُشگ ءُ یا زورانسری بیگواہ کنگ بیتگ اَنت۔
بلوچستان ءِ وانگی جاور چوناھا اے دمگ ءِ تہ ءَ درستاں سل تِر اَنت، کہ اود ءَ وانوکیں مردمانی کَچ ھرابیں کساسے ءَ جھل اِنت۔ بلوچستان ءَ ھسابی مزن شھدربرجاہ اَنت، اود ءَ ھم پھازگی ءِ نام ءَ سلاہ بندیں پوجی ٹولیانی مزنیں کساسے اوشتوک اَنت، کہ ایشی ءِ سوب ءَ ھر وھد ءَ تُرس ءُ بیم ءِ جاور اِنت۔ چُشیں جاورانی تہ ءَ استاداں نشانگ کنگ بلوچستان ءِ پدمنتگیں وانگی جاوراں گنتر پدمنتگی ءِ آماچ کنگ ءَ اِنت۔ اگاں بلوچستان ءَ وانگ، وانگی ادارگانی ءُ استادانی نشانگ کنگ ءِ یکشلی دارگ نہ بیت اَنت گُڑا اِشی ءِ سک ترسناکیں آسر دیم ءَ اتک کن اَنت۔