TBP Balochi

نبشتانک: جنرل اسلم ءِ کاروان

نبشتہ کار: اکیل مراد

ششمی بھر

دی بلوچستان پوسٹ

باج بروکیں راج ھما وھد ءَ باج ءَ برت کنت کہ آئی ءِ تہ ءَ یک ھمسنتیں زورے مان بہ بیت گڑا ھما وھد ءَ زیردستیں راج ءِ دست سر بُرزی ءِ نیمگ ءَ روان کنت ءُ دشمن ءِ چماں آ یک تاکتے جوڑ بیت-

جنرل ءَ کسانیں تاکت ءَ را یک مزنیں نامے ءِ دیگ ءِ بارو ءَ جیڑ اِتگ اَت اے نزوریں تاکت ھنچیں رنگے بہ زور ایت کہ آئی ءِ تہ ءَ دشمن ءِ واب ءُ دراھیں چیز بے سوب بہ بنت-

کوھلو ءِ کوھانی تہ ءَ جنرل ءَ ھواریں سنگتے ءَ گپ کرت کہ ھما وھد ءَ اے جنگ نوک بیتگ گڑا جنرل ءَ مدام وتی سرکلانی تہ ءَ اے گپ ایر کرتگ مارا ھمے جیڑگ لوٹ ایت ما چون ءُ چے پیم یک تاکتے جوڑ بیت کن ایں-

اے تاکت ءِ واستا مارا چنکس گام ءَ دیم ءَ روگ لوٹ ایت ءُ چنکس پند بُرگ لوٹ ایت اے چارگ نہ لوٹ اَنت بس ھما کار ءِ واستا تو درگپتگ ئے گڑا ھمائی ءِ ھاتر ءَ جنزان کن ، نوں تئی تاکت ترا شموشکار بیت نہ کنت آ وت تئی نیمگ ءَ جنزان کنت ءُ تئی تہ ءَ یک زورے ئے زرمبشت جَھ جنان کنت-

جنرل ءِ جَھ جتگیں زرمبشت ءَ کوھلو، بولان بارکھان نہ گپت اَنت بلکیں بلوچستان ءِ بازیں ھند وتی ھم پتار ءَ زرت ءُ ھار ءَ ملان بیت ءُ سال دوھزار ءُ چار ءَ انگت ءَ جنرل ءِ جند کوھانی تہ ءَ چیر جنگے ءِ دروشم ءَ اَت بلے آئی ءِ جھد ءَ گوشگ ئیگ ءَ نِی آئی ءِ جنگ ءَ بلوچستان ءِ میتگ میتگ شھر شھر مان روپان کرتگ اِت اَنت –

بلوچستان ءِ جنگ ءَ ھرچ ناں ھرچ مردمے ءَ یک ناں یک نیمگے ءَ سکین زرتگ اَت ءُ آجوئی ءِ سَر ٹُلان اَت دیمے ءَ اکبر ھان ءِ بامرد کوہ سریگ اِت اَنت ءُ دیمے ءَ جنرل گوں وتی بامرداں زمین ءِ آجوئی ءَ جنگ ءَ اَت-

ھَنچش ھمے سما بیگ ءَ اَت وھد ءَ گیش جنرل ءِ کاروان دیم ءَ روان اَت ءُ اے وھد ءُ زمانگ ءَ ھم مئے نودربری ءِ شوک ءُ شان اَت ما ھم ھمے داب ءَ تھنا بی ایل اے نامیں گلے ایش کرتگ اَت نانکہ آئی ءِ جنگ کنوک دیستگ اِت اَنت نانکہ آئی ءِ جنگانی وھد ءَ آئی ءِ اُرشانی تامر بلے اے مئے گوشاں الکاپ ءَ پُج اِتگ اَت کہ بلوچستان ءَ جنگے بیگ ءَ اِنت-

جنرل ءِ سنگتے گپ جنت ءُ گوش ایت کہ جنرل ءِ تہ ءَ یک مزنیں شیواری ءِ اے بیتگ کہ آئی ءِ جنگانی وھد ءَ پیسر وتی ھمراھانی کَچ ءُ کیلو الکاپ ءَ چکاس اِتگ اَنت ءُ آیانی ھرچ چیز ءِ سر ءَ یک مزنیں نگاھے آئی ءِ بیتگ آ نگاہ جنگانی رپکاری، جنگ ءِ تہ ءَ دم نہ برگ، جنگ ءِ کنگ ءَ رند وتی درایگ ءُ بنجل ءِ روگ اے چیزانی ھیال جنرل ءَ بے کساس گور بیتگ اَنت-

آ گوش ایت جنرل ءِ گور ءَ بلکیں مرگ وَ کسانیں چیزے ءِ ھساب ءَ بیتگ بلے آئی ءَ اے زانت وتی تہ ءَ ودینتگ ءُ وتی دیوانانی تہ ءَ ھم برے برے گوشتگ جنگانی دیم ءَ برگ ءِ واستا ھژدری ایش اِنت زندگ بیگ بلکیں ھنچش وت ءَ زندگ دارگ تنا وھدی تانکہ تئی جنگ یک راھے ءِ سِنچ ءَ روان بہ کنت-

جنگ ءِ تہ ءَ کس ایشی ءَ نہ گند ایت کہ کَے پیسر ءَ کُشگ بیت کَے رند ءَ بلے الم جنگول جنگ ءِ پڑ ءَ مرگ ءَ دیم پہ دیمی ءَ گند اِیت ءُ سما کنت-

جنرل ءَ وتی تہ ءَ اے ساچست ھم ایر کرتگ اَت جنگ ءِ میان ءَ ھچ بر آئی ءِ بَھ ءُ بگڑی نہ بیتگ ھروھد ءَ دشمن ءِ نشانگ ءَ پیسر آئی ءِ تیرکمان ءَ پیسر ءَ دشمن ءِ دلبند ءَ پیوست کرتگ-

تیر کمانیں جنرل ءِ سوھوئیں پگر ءَ تھنا واب بے سرجم نہ کرتگ اِت اَنت بلکیں ھرچ جنگ ءِ میان ءَ دشمن ءَ را وتی جون چِست کنگ کپتگ، سال دوھزار ءُ پنچ ءَ جنگ ءَ پد ءَ وتی دپتر نوک کنان کُرت جنز ءَ مزنیں گامے جَت اے گامانی ھواری ءَ جنرل ءِ سھرائیں گام تچک ءَ مھکم اِت اَنت آئی ءَ وتی سوبمندی ءِ گام سنگتانی دیوان ءَ یک نیادے ءَ کُرتگ اَت ءُ ھمے پُرشانیں رنگے ءَ درشان کرتگ اَت کہ ما داں ھدے ءَ سوبمندی ءِ نیمگ ءَ روان اِیں ءُ اے پگر بلوچستان ءِ کوہ کوہ ءِ پَسہ ءَ کنگ ءَ اِنت-

روان اِنت سپر ماں جنرل اسلم ءِ کاروان ءَ دسمبر –

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بان پیر ڈک ءَ پاکستانی پوج ءِ کارمندے دور جنگیں توپک ءِ گون ءَ نشانگ کُتگ ءُ کُشتگ – میجر گْوھرام بلوچ

دی بلوچستان پوسٹ

سربیتگیں ھالانی رِد ءَ بلوچستان ءِ دمگ تمپ ءَ مروچی ناشناسیں سلاہ بندیں مردماں پاکستانی پوج ءِ پانگس ءِ سر ءَ اُرش کُتگ – اُرش اپسی کھن ءِ دمگ بان پیر ءَ کنگ بوتگ – اُرش ءَ پاکستانی پوج ءَ جانی تاوان رس اِتگ، سلاہ بندیں مردم درآیگ ءُ روگ ءَ سوبمند بوتگ انت –

دومی نیمگ ءَ بلوچ سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مروچی آدینگ ءِ روچ ءَ اِدار سَے ءُ بیست ءَ مئے سرمچاراں اپسی کھن ءِ دمگ بان پیر ڈک ءَ برجاھیں پاکستانی پوج ءِ پانگس سر ءَ دورجنگیں توپک ءِ گون ءَ اُرش کُتگ – اُرش ءَ یک پوجی کارمندے مُرتگ –

آئی ءَ گوشتگ کہ پاکستانی پوج سر ءَ مئے اُرش ایردستیں بلوچستان ءِ آجوئی ءَ داں برجاہ مان انت –

مسلم ٹاؤن عیسی نگری ءَ پاکستانی پوج ءُ فرنٹیرکور ءِ کاروان تراکناکیں شورانی نشانگ کُرتگ – جئیند بلوچ

دی بلوچستان پوسٹ

سربیتگیں ھالانی رِد ءَ مروچی بلوچستان ءِ بنجاھی شھر شال ءَ ناشناسیں سلاہ بندیں مردماں پاکستانی پوج ءِ کاروان ءِ سر ءَ اُرش کُتگ –

اُرش شال ءَ بروری ءِ دمگ مسلم ٹاؤن عیسی نگری ءَ کنگ بوتگ، اُرش ءِ آسر ءَ پاکستانی پوج ءَ جانی ءُ مالی تاوان رس اِتگ –

اُرش ءَ پد پولیس ءُ فرنٹیر کور ءَ دمگ وتی انگر کُتگ، بلے دنیگت ءَ ھچ وڑیں دزگیریانی ھال نیست –

دومی نیمگ ءَ بلوچ سلاہ بندیں بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں شال ءَ بروری ءِ دمگ مسلم ٹاؤن عیسی نگری ءَ زورگریں پاکستانی پوج ءُ فرنٹیر کور ءِ یک کاروانے ءِ سر ءَ آئی ای ڈی اُرش ءِ نشانگ کُتگ –

جارکش ءَ گوشتگ اے اُرش ءَ زورگریں ءِ پوج ءِ بازیں کارمندے مُرتگ ءُ ٹپی بوتگ اَنت وھدیکہ اُرش ءَ پاکستانی پوج ءِ گاڑی ءَ سک باز تاوان رس اِتگ –

گڈسر ءَ جارکش ءَ گوشتگ کہ مئے جد ءُ جھد آجوئیں ڈیھے ءِ بستار ءَ تاں برجاہ مان اِت –

نبشتانک: سوبین بات ئے منی چُک

نبشتہ کار : مھم جان گُل

دی بلوچستان پوسٹ

سک دیر روگ ءَ اَت من ءَ اَنچو گُمان بیت کہ بلکیں پد ءَ مئیت واتر وتی گِس ءَ مہ کنت بلے من نزانتگ اَت کہ آئی ءَ وتی مات سَک دوست بیتگ ، آئی ءَ بلے زھر پرچا کتگ اَت؟  پرچی ءَ گنجی یلا دات ئِے وت شت؟ گڑا گنجی ءَ اِد ءَ کے سمبال اِیت ؟ من یک بری گوشت کہ من آئی ءِ دُمب ءَ کپاں گران ئِے گوشانی کہ ترا چہ پد گنجی ءِ چی ھال بیت تو اِنچو زان ئے ترا اے سما ھست اِنت کہ تو وتی مات ءِ یکیں چُک ئے ءُ تی پِت ءَ شمارا یلا داتگ باریں کجا اِنت؟ پد ءَ من چیڑ اِت یک برے رواں گنجی ءِ ھال ءَ گراں کہ چون اِنت ، من لوگ ءِ دپ ءَ اوشتات آں دروازگ ٹُک اِت گڑا مزنیں مردے ءَ دروازگ پَچ کت من ھیران بیتاں ، گڑا آئی ءِ دُمب ءَ تتکاں بازار یک یک کت جنگل کوچگ دُرست چار اِت اَنت داں کہ یک یک ءَ دُرستیں مردم ھم جست کوت اَنت بلے کس ءَ نہ دیتگ اَت، من وت ءَ را جست کت کہ آ مرد کے اَت کہ دروازگ پچ کت ئِے بچکندگ ءَ اَت ؟ پد ءَ جیڑ اِت کہ باریں گنجی چون اِنت ھمے مرد ءَ چیزے نہ کتگ؟ دیرک زورت پد ءَ لوگ ءِ نیمگ ءَ شتاں من لوگ ءِ دپ ءَ رستاں چاراں ھمے مرد دراتکگ روگءَ اِنت من اِشتاپی دروازگ ٹُک اِت سَک ءَ ٹُک اِت توارے منی گوشاں کپت کہ پیداگاں کمو سبر کن گنجی ءِ آواز اَت گڑا من مزنیں ساھے کَش اِت ءُ گنجی ءَ دروازگ پَچ کت گشت ئِے کے ءَ لوٹ ئے؟ گنجی سَک گَل اَت پورو ھچ نہ بیتگ من گُشت من تئی ھمساھگ آں بی بی شدری ءِ چُکاں ترا چیز ءِ پکار ھست بگوش تو اِد ءَ اِیوک ئے گشت ئِے اِناں من ءَ ھچ چیز ءِ پکار نہ اِنت ءُ من ایوک ھم نیاں۔

من ءَ میتگ ءَ دو روچ بیت اَتکگاں ءُ میتگ ءِ مردماں کس ءَ پجاہ نیاراں  من ءَ ھم کس نہ زانت گڑا من دمَک ءِ تہ ءَ بلُکے دیست جُست کت کہ بی بی چون ئے؟ اوشتات من ءَ روک ءَ روک چار اِت ئِے چَم ئِے سُور تَریت اَنت ئے منی جان ءِ پُٹ چِست بیت اَنت پاداں لرزگے زرت دل دْریک دْریک کنگ ءَ لگ اِت نوکی من تچگ ءَ لگ اِتاں یک پادے چست کت بلُک ءَ من ءَ گلائش کت اَنچو مُھر پِْرچ اِت ئِے  کہ من سُر اِت نہ کت وتی سر منی سینگ ءِ سر ءَ اِیر کت ئِے گریوگ ءَ لگ اِت سَک ءَ گریوگ ءَ لگ اِت گڑا منی مات ھمد ءَ گوزگ ءَ اَت من ءَ دیست ئِے چہ بلُک ءِ بگل ءَ کش اِت ئِے  ءُ دست ءَ گپت ئِے دیم پہ لوگ ءِ نیمگ ءَ رھادگ بیت من پُشت ءَ چَک جنان ءُ مات منی دست ءَ چِکان اَت من بلُکءَ چاراں اَنگت ھمود ءَ اوشتاتگ گریوگ ءَ اِنت من ءَ چارگ ءَ اِنت،  مات ءَ لوگ پَچ کت مئے لوگ ءَ ھم کس نیست اَت آبا ھم اود ءَ نہ اَت برات ھم اود ءَ نہ اِت اَنت مات شت تھت ءِ سر ءَ نشت دست ئِے سر ءَ کت اَنت ءُ گریت ئِے من ھیرانیں نگاھاں گوں مات ءَ چارگ ءَ اتاں کہ ڈن ءَ کوکارے بیت من ڈن ءَ دراتکاں چاراں سَک رَش ءُ کَش اِنت من شتاں چاراں دو جون اَنت اِیر اَنت ءُ گنجی ھمے جونانی سر ءَ نشتگ گریوگ ءَ اِنت دستاں بُرز ءَ بارت ءُ جنت زمین ءَ، منی مات ھم اَتک گنجی گلائیش کت ئِے گشت ئِے مہ گِرے تئی چک ءُ تئی مرد زندگ اَنت نہ مُرتگ اَنت اے میّت تئی چک ءُ مرد ءِ سوبین بیگ ءِ نیشانی اِنت ترا ھچ بژنیگ بیگی نہ اِنت۔

من ھچ نزاناں من ءَ ھم مات ھچ نہ گوش ایت گوں نہ زاناں مات ءَ ترس ایت من ءَ ھچ نہ گِش ایت اگاں من آ کد ءَ نیاں کہ من ءَ بہ گش اِیت، بلے مات ءَ مُدام گشت تئی پت ءُ برات کا اَنت آ ترا وت گوش اَنت، من سک ودار کت کہ آ بیا اَنت کہ من ءَ بگش اَنت گوں کہ مئے میتگ ءَ چی بیگ ءَ اِنت، شما  کجا اِت ، گنجی ءِ چُک ءَ گنجی یلہ پرچا دات ایوک کت پد ءَ گنجی ءِ مرد چے ءَ گنجی ءِ چارگ ءَ اتک جلدی شت، پد ءَ پت ءُ چُک کے ءَ کُشت اَنت، پیریں بلک ءَ پرچا من ءَ زرت بگل ءَ کت گریت ئِے؟-

شپ ءَ کہ من نان وارت ءُ وپتاں من ءَ واب نیاتک منی چمانی دیم ءَ پیریں بلُک پیداگ اَت گریوگ ءَ اَت گڑا داں دیراں پد منی چم بند بیت اَنت، یکے اَتک منی سر ءِ میداں سمارگ ءَ لگ اِت من بُست کت چاراں اَبا اِنت ءُ لالا ءُ مات دروازگ ءِ دپ ءَ اوشتاتگ اَنت دست ماں دست اَنت کندگ ءَ اَنت دروازگ بندیں من آبا بگل ءَ کت سک گریت اَنچوش کہ پیریں بلُک ءَ گریت من ءَ بگل ءَ کت ئِے من آبا بگل ءَ کت ھمے پیم ءَ گریت منی چَم ھم سُور تَر اِت اَنت بلُک ءِ پیم ءَ منی سر آبا ءِ سینگ ءِ سر ءَ اَت دل ءَ پورو یک آرامے رسگ ءَ اَت یک اُمیتے ءِ درے پَچ بیتگ اَت، من آبا جست کت دُرستیں جست کت اَنت من یک یک ءَ جست کنان ءُ آبا پَسواں دیان اَت من میتگ ءِ جست کت گڑا گشت ئِے انی وھد نیست من روگ ءَ آن من گوشت من ھم تئی گوما کایاں گون من چہ شومارا شتر نہ آن منی پِت سَک گَل بیت گشت ئِے بریں اما ءَ من ءَ بگل ءَ کت گشت ئِے سوبین بات ئے منی چُک۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ دلگان ءَ ناشناسیں مردماں تیرگواری کرتگ ءُ یک مردمے کُشتگ ءُ یکے زدگ کرتگ –

اھوالکار ءِ رد ءَ گوستگیں شپ ءَ دلگان ءَ ناشناسیں مردماں یک گاڑی ءِ سر ءَ تیرگواری کرتگ ءُ چریشی ءِ آسر ءَ یک مردمے بیران بیتگ ءُ یکے زدگ بیتگ –

تیرگواری کنوک تیرگواری ءَ پد تچگ ءُ روگ ءَ سوبمند بیتگ اَنت ءُ جون ءُ زدگ بیتگیں مردم چِست کنگ ءُ نادراہ جاہ ءَ برگ بیتگ اَنت –

دمگی مردمانی گوشگ اِنت سلاہ بندیں مردم روچ ء رھمان ترگ ءُ مردماں جنگ ءَ اَنت چریشی ءَ چہ مئے گمان سرکار ءِ پُشت ءُ پناھی ءَ شت کنت –

آیاں گْوشت کہ اے وڑیں وئیل بلوچستان ءِ بازیں ھند ءُ دمگاں بیگ ءَ اَنت بلے اُرشکاراں جست ءُ پرس بیگ ءَ نہ اِنت –

دی بلوچستان پوسٹ

سربیتگیں ھالانی رِد ءَ بلوچستان ءِ دمگ خضدار وڈھ ءَ چہ ناشناسیں مردماں محمد جان گرکناڑی آوار جتگ –

ھمے گوشگ بوھگ انت کہ آوار جنگ بوتگیں مردمے سیادی گوں بلوچستان نیشنل پارٹی ءَ اِنت –

محمد جان ءِ آوار جنی ءِ بگیری ءَ وڈھ ءَ بی این پی ءِ مردماں کراچی تاں شال ءَ رؤکیں شاھدگ ءِ سرا ٹائیر روک کُتگ دگ بند کُرتگ-

ھر وڑیں رؤگ آوکیں اولاک دارگ بوتگ انت، زھر شانی ءِ سوب ءَ مساپر بازیں جنجالانی آماچ اَنت –

اے درگت ءَ زھرشانی کنوکانی گوشگ انت کہ داں ھما وھد ءَ محمد جان یل کنگ نبیتگ، مئے زھرشانی ھلاس نبیت-

آھانی گوشگ انت کہ مھمد جان ریاست ءِ چیردستی ءَ کار کنوکیں دمگی ڈیتھ اسکواڈ ءِ کارمنداں آوار جتگ –

سربیتگیں ھالانی رِد ءَ بلوچستان ءِ بنجاھی شھر شال ءُ چاگی ءَ دومردمے جون دست کپتگ –

دی بلوچستان پوسٹ

دمگی پولیس ءِ رِد ءَ مروچی پنچ شمبے ءَ شال ءِ دمگ سیٹلائٹ نیو اڈہ ءِ کبرستان ءِ نزیک ءَ یک مردمے ءِ جون دست کپتگ، پجار ءِ ھاتر ءَ ھسپتال ءَ برگ بوتگ ءُ اے درگت ءَ گیشیں پٹ پول برجاہ انت –

ھمے وڑ بلوچستان ءِ دمگ چاگی ءَ ھم لیوز کارمنداں ءَ تیر سپتگیں جون ءِ دست کپتگ –

جون چاگی ءِ کوھی دمگ درمن ءَ دست کپتگ، آئی ھم دنیگت ءَ پجار نبوتگ، جون دمگی نادراھجاہ ءَ برگ بوتگ –

نبشتانک: جنرل اسلم ءِ کاروان

نبشتہ کار: اکیل مراد

پنچمی بھر

دی بلوچستان پوسٹ

اے ھشتیں ھمراھانی زمین زادگیں جنرل ءَ کوھلو، کاھان، بولان ءَ ھوار ھوار بلوچستان ءِ کوھاں پجار شناسیں گھگیر ءَ شپ ءُ روچ بندیں تلارانی بُرگ ءُ گچین کرتگیں راہ ءِ شوھاز ءَ درکپوکیں جنرل ءَ مَل مزاریں سنگتانی پتر ءِ دراج کنگ ءَ شھری ءُ میتگانی تہ ءَ ایرگیجوکیں زرمبشت ءِ مھکمی ءَ الم جیڑ اِتگ اَت کہ اے زرمبشت تھنا ھشت سنگتانی ھمراھی ءَ سرجم نہ اِنت تانکہ ایشی ءِ پُشت ءَ یک مھکمیں آشوبے گون مہ بیت –

گڑا جنرل ءَ وتی شھری گام ھم تیز تر کنان ءَ ءُ شھرانی تہ ءَ نشتگیں مردمانی دل ءَ ھمے اُوست ءِ ودینگ ءَ کہ شمئے گڈی جنگ بنا بیتگ اے جنگ ءَ ھرچ رنگ ءَ یک منزلے ءِ نیمگ ءَ جنزینان کن ئے تانکہ جھان ءِ مردمانی چم شمئے نِزوریں کوپگاں سک بہ بنت ءُ شمارا دلگوش کرت بہ کنت-

جنرل ءِ نزیکیں مردمے ءَ اے گپ پدر کرتگ اَت کہ جنرل ھما روچ ءَ نوکیں جنگ ءِ بنپد ءَ ایر کنگ ءَ بیتگ گڑا اے جنگ ءَ جنرل ءَ تھنا ھمے جیڑ اِتگ کہ مئے منزل انگت دور اِنت بلے جنزگ کنگ کپ ایت ءُ مردمانی تہ ءَ اُمیت ایرکنگی اِنت کہ شمئے گڈی جنگ بیگ ءَ اِنت ھرکس وتی کَچ ءُ کساس ءَ اے جنگ ءَ وت ءَ ھوار بہ کنت ءُ وتی پجار ءُ زمین ءِ رکینگ ءَ ھرچ رنگیں کربانیاں چَک ءُ پد مہ بیت –

ما ھنچش سما کن ایں کہ بلوچستان ءِ سر ءَ کپتگیں زوراک ھم گلامیں ڈیھے ءِ بستار ءَ زانگ بیت کہ آئی ءَ ھر تک ءَ مردم ھمے شگان ءَ جن اَنت مزن مزنیں ڈیھانی گلام ءُ پِٹو اِنت بلے گلام کہ یک زندگیں راجے ءَ گلام دارگ ءِ جھد ءَ کنت گڑا آ راج ءِ چِست بیتگیں بامرد الم اے گپ ءَ سما کن اَنت کہ گلام ءَ کجام بستار ھست اِنت زندگیں راجے ءَ گلام داشت کُرت بہ کنت –

اگاں تاکت ءُ زور گلامیگ اِنت گڑا گلام ھم وت واکیں راجاں زیردست ءُ لگتمال ءُ آئی ءِ نِزوری ءَ ھرچ ھما شَے ءَ پُل اَنت –

لینن “سامراج اور سامراجی ” ءِ تہ ءَ تاک دیم بیست ءُ دو ءَ نبشتگ کنت “زیرست ءِ دارگ ءُ مھکم کنگ ءَ مزن مزنیں گلامانی واجھانی میان ءَ جنگ بیت ۔”

“زورامندانی پریچگ ءَ ما ھما لبز ءِ مانا ءَ ھما زورانی میان ءَ گوش ایں(آیاں شکساتگیں) گوش اَنت(چُشکہ ھما لُٹ ءُ پُل ءَ سوبمند اَنت) دنیا ءِ بھر بھر کنگ ءَ ھنچیں سرپدی ءِ شوھاز ءَ کنگ ءَ اَنت۔”

چریشی ءَ زانگ بیت کہ 1871 — 1789 آجوئی ءِ جد ءُ جھد ءَ گیشتر دومیگانی سروکان بیتگ اَنت نِی 1876ء پد مزنیں دیمروی ءَ گیش پکاہ بیت اَنت –

سرمایہ دارانی نزام ءِ دراھیں زور ءُ بار جھمنندیں راجانی سر ءَ زوراکی ءُ ایندگہ رپکانی تہ ءَ گلام داشتگیں راج مَٹ بیتگ اَنت –

1876 ءَ داں 1914 ءَ شش مزن نامیں تاکتاں دو کروڑ ءُ نیم ءِ میل یورپ ءِ وتی پنجگانی ءَ آؤرت ءُ نوک آبادیاں نیم ارب ءَ گیش(پنجاہ ءُ دو کروڑ ءُ سِی لَک) نشتگیں مردم وتی گلام کرتگ اَنت –

اشی ءَ درست زان اَنت نوک آبادکار ھر وھد ءَ وتی زُلم ءُ زوراکی ءِ سر ءَ آ دمگ ءَ بربادی ءُ کُشت ءُ ھون ءِ تہ ءَ کنت ءُ نشتگیں مردمانی کُشت ءُ ھون ءَ کن اَنت –

نِی اے ھونانی گندگ ءَ گڑا گھگیر مدام ھمے اوست ءَ راج ءِ دل ءَ ودین اِت ءُ نوک آبادکار ءِ تہ ءَ آؤکیں مردم شمئے کُشت ءُ کوش ءَ اتکگ اَنت ءُ شمئے زمین ءِ اندر ءَ ھما چیر ءُ زیریں مڈیانی ھلاس کنگ ءُ وتی مھکم کنگ ءِ گامان اَنت –

جنرل ءَ ھمے کرد ھم گون بیتگ ءُ راج ءِ تہ ءَ کجام ناں کجام دروشم ءَ اے دل سدکی پِرینتگ ءُ گوشتگ کہ شمئے واستا اگاں یک راھے پُشکپتگ آ یکجاھی ءُ جنزگ اِنت –

ھَنچُش جنرل ءُ آئی ءِ راج ءِ دشمن ھنچیں زورامند ءُ تاکتوریں دشمنے کہ آئی ءِ کارستانی تہ ءَ کُشت ءُ کوش ءُ لُٹ ءُ پُل ءُ دُزی دازی درست گون اَنت ئِے-

اے گپ گش اِتگین ئِے کہ زورامند ھما کساس زورامند بہ بیت بلے زیردست الم روچے ناں روچے وتی باج ءَ بُرت کنت –

سپر روان اِنت ماں جنرل اسلم ءِ کاروان ءَ دسمبر –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: شَے ترا یات انت؟

نبشتہ کار: بالاچ ھمل

دی بلوچستان پوسٹ

شَے هما اِنت کہ ترا گوں من نند ءُ نیاد بوتگاں من چہ وت ءَ گار ءُ بیگواه آں. تئی پِکر ءُ هیالاں جیڑگ ءَ آں-

چی ءَ کہ شَے تو هما مردمانی تہ ءَ هوار بوت ئے کہ آ وتی زبان ءُ کول ءِ پابند انت من وتی سجّویں زندمان ءِ تہ ءَ اے سیاهیں روچ ءَ هچبر پراموش کُت نہ کناں کہ آ روچ ءَ تئی وڑیں تنگوئیں بچ ءِ جسمانی دروشُم ءَ چہ راج ءَ بدواه ءَ دور ءُ جُتا کُت-

برے برے من گوں رب ءَ همے جُست ءَ کناں کہ تو چی ءَ چو کن ئے هما ورنا کہ پہ وتی راج ءُ سرڑگار ءِ هاتر ءَ زندمان ءَ گْوازین انت تو چی ءَ آیاں چو زوت بر ئے ءُ چہ راج ءَ گِستا کن ئے-

آ شهید بالاچ مری ءِ وڑیں بچ بہ بنت یا چو شهید اسلم ءُ اے دگہ زمین زادگیں بچ بہ بنت کہ همک روچ پہ وتی راج ءُ گلزمین ءِ هاتر ءَ وت ءَ ندر کن انت اے وڑیں رهشون چہ کرناں پد ودی بنت-

شَے تو یک زانشتیں سر ءُ روژنائیں پِکرے ءِ واهُند ات ئے ءُ سرڈگار ءِ رکینگ ءَ وتی تنگھیں سر دات بلے بدواهانی دیم ءَ وتی سر جھل نہ کُت ءُ زند ءِ گڈی ساه ءَ هم لگوریں دُشمن ءَ گوں جنگ دیان ات ئے داں نمیران بوت ئے گوں شهید امداد ءِ همبراھی ءَ-

بلے شَے من نوں تئی داتگیں سوگنداں چتور بُہ پْروشاں یا پراموش بہ باں تو اگاں اے دُگنیا ءَ بوتین ئے من اتک ءُ ترا گُشتگ اَت شَے جان — گوں من بہ گند ئے مہ بیت تئی کولانی پاسداری تو ءُ تئی داتگیں پنت ءُ سوجانی رندگیری ءَ الم کناں. من هم لگوریں لشکر ءِ دیم ءَ وتی سر ءَ جھل نہ کناں چہ مرگ ءِ تُرس ءَ-

شَے ترا یات انت؟-
گند ئے تو گُشت کہ بازیں مردمے گُش ایت کہ شَے مُرید گنوک انت — ءُ تو پد ءَ درائینت ءُ گُشت ھو راست گُش انت من گنوکاں پہ وتی گُلزمین ءِ هاتر ءَ وتی راج ءِ واستا دیوانگاں انچو کہ شَے مُرید پہ هانی ءَ گنوک بوتگ
شَے جان نوں تو تھنا نہ ئے تئی وڑیں هزاراں گنوک مئےشیرزالیں ماتاں ودی کُتگ انت کہ پہ اے گُلزمین ءَ دیوانگ اَنت ءُ همک روچ وتی سالونکیں سراں ندر کنان انت-

ندر پہ شَے مُرید ءَ شَے پہ گُلزمین دیوانگ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ سراوان ءَ ناشناسیِں مردمانی تیرگواری ءَ یک مردمے زدگ بیتگ –

اھوالکار ءِ رد ءَ سراوان ءِ بازار ءَ ناشناسیں مردماں یاسین برھانزئی ءِ بیڑ برتگ ءُ آئی ءِ گاڑی ءِ برگ ءِ جھد کرتگ ھمے میان ءَ ناشناسیں مردماں تیرگواری کرتگ ءُ یاسین زدگ کرتگ –

ھمے وڑ ءَ ایرانی لشکر ءَ یک گاڑی ءِ سر ءَ تیرگواری کرتگ ءُ پنچ مردم زدگ کرتگ اَنت –

اھوالکار ءِ رد ءَ روکپتی بلوچستان ءِ دمگ بزمان ءَ ابولفضل مسیت ءِ گور ءَ یک گاڑی ءِ سر ءَ ایرانی لشکر ءَ تیرگواری کرتگ ءُ پنچ مردم زدگ کرتگ اَنت –

اھوالکار ءَ گوشت کہ ایرانی لشکر ءِ تیرگواری ءَ گاڑی ءَ دگہ گاڑیاں گوں ٹکر وارتگ ءُ چریشی ءَ سَے گاڑی سوتکگ اَنت –

ھالانی تہ ءَ گوشگ بیتگ کہ گاڑی سواریں پنچ مردم زدگ بیتگ اَنت ءُ اشانی تہ ءَ یک زالبولے ءُ چُکے ھم ھوار اَنت –

دگہ یک تیرگواری وئیلے ءَ سراوان ءِ دمگ غفور آباد ءَ ناشناسیں مردمانی تیرگواری ءَ یک مردمے زدگ بیتگ –

اھوالکار ءِ رد ءَ گوستگیں روچ ءَ سراوان غفور آباد ءَ ناشناسیں مردماں یک پرپٹ سواریں مردمے ءِ دارگ ءِ جھد کرتگ ءُ چریشی ءَ پرپٹ سوار نہ اوشتاتگ ءُ آیاں تیرگواری کرتگ ءُ پرپٹ سوار زدگ بیتگ –

زدگ بیتگیں مردم ءِ پجار حفیظ سورزئی ءِ نام ءَ زانگ بیتگ ءُ وئیل ءِ سوب زانگ نہ بیتگ –

دومی نیمگ ءَ چاگردی مردمانی گوشگ اِنت کہ سراوان ءَ پیش اتکگیں وئیلاں دُزانی دزمانجنی ھست اِنت ءُ بازیں وھد بنت کہ سراوان ءِ کَش ءُ گوری دمگاں دُزی ءُ ڈنگیانی وئیل گیش بیان اَنت –