TBP Balochi

بلوچ کلب مند ءَ بُلبُل ھوزئی مند ءِ دیم ءَ پنچ گول ءَ باج برتگ گوازی وتی نام ءَ کرتگ ءُ فائنل ءَ سر بوتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی سیمی فائینل ءِ دومی گوازی کنگ بوتگ –

مروچگیں گوازی بلوچ کلب مند ءُ بُلبُل ھوزئی مند ءِ میان ءَ بوتگ ، دؤئیں ٹیمانی لیبیاں گوں جوانی ءَ لیب داشتگ ءُ دؤئیں ٹیم مکابلہ بوتگ انت – پیلانٹی مکابلہ ءَ بُلبُل ھوزئی مند ءَ سئے گول داتگ، وھدیکے بلوچ کلب مند ءَ پنچ گول داتگ ءُ باج برتگ- بُلبل ھوزئی ٹیم پروش داتگ ءُ وت ءَ فائینل ءَ سرکتگ –

ٹورنمنٹ ءَ اتکگیں مھمان ءُ ٹورنمنٹ سرکماش اختر عمر دوئیں ٹیمانی لیبی دلبڈی داتگ ءُ آھانی ستاشانی کرتگ انت –

فائینل گوازی گومازی ءَ ون اسٹار گومازی ءُ بلوچ کلب مند ءِ میان ءَ اسکول گراؤنڈ ءِ پٹ ءَ بیت انت کجام ٹیم وِنر بیت ءُ کجام رنر –

انسانی ھکانی میان اُستمانی گل ہیومن رائٹس واچ (ایچ ار ڈبلیو) ءَ دو شمبے ءِ روچ ءَ شنگ کرتگیں وتی یک بیانے ءِ تہ ءَ پاکستانی سر وزیر عمران خان ءُ چہ پاکستانی واکداراں زورانسری آوار جنگ بیتگیں مردمانی سرجمی ءَ یلہ کنگ ءُ زورانسری بیگواھی ءِ ھلاس کنگ ءِ لوٹ کرتگ –

ایچ ار دبلیق ایشیاء ءِ ڈائریکٹر پیٹریسیا گوس مین ءَ وتی یک شنگ کرتگیں بیانے ءَ گُشتگ کہ سروزیر پاکستان ءَ بیگواھیں مردمانی کھولانی گون ءَ دوچار کپگ ءَ زورانسری بیگواھی ءِ جیڑہ ءِ بارہ ءَ جوانیں گامگیجے، بلے نِی سروزیر عمران خان ءَ لوٹ ایت کہ آ وتی زبان ءِ سر ءَ بہ اوشتیت ءُ بیگواھیں مردمانی یل کنگ ءَ سرجمی بہ کنت-

آئی ءَ گوشت کہ قانون جوڑ کنوکیں ادارہ ءَ پاکستانی واکدار بازیں وھدے ءَ شھریانی زورانسری بیگواھی ءِ ھلاس کنگ ءَ سیاسی تکاں بے سوب بیتگ اَنت -سروزیر عمران خان ءِ زبان لاچاریں کھولانی اُمیت ءَ کرناں ھلاس کنت بلے داں انگت ءَ باز کنگ ءِ زرور اِت اِنت –

سروزیر پاکستان عمران خان گوستگیں روچ ءَ چہ بلوچستان ءَ بیگواہ بیتگیں مردمانی کھولانی گون ءَ دوچار کپتگ، دوچاری ءَ عمران خان ءَ ابید ارزی گُرزی ءَ آوار جنی جرمی گوشتگ اَنت ءُ بیگواھیں مردمانی یلہ کنگ سدکی کرتگ – ھمے درچ ءَ بیگواھیں مردمانی کھولانی گوشگ اِنت کہ سروزیر ءَ بس مارا سدکی داتگ ءُ زبان ءَ ابید دگہ ھچ نہ داتگ –

گوستگیں ماہ فروری ءَ چہ بلوچستان ءَ سیزدہ بیگواھیں مردمانی کھولاں پانزدہ روچ ءَ پاکستان ءِ بنجاھی شھر اسلام آباد ءَ نندانک جتگ ءُ نشتگ اَنت -زھرشانی کنوکاں سروزیر پاکستان ءَ دوچار کپگ، زورانسری آوارجنیانی ھلاپ ءَ کانون سازیاں ھوار چہ بلوچستان ءَ بیگواھیں مردمانی یل کنگ ءِ سدکی ءِ لوٹ کرتگ –

چریشاں پد پاکستان ءِ وزیر برائے انسانی ھقوق شیرین مزاری ءَ نندانک ءَ نشتگیں زالبولانی گون ءَ گند ءُ نند کرتگ ءُ مارچ ءَ سروزیر پاکستان کھولانی گون ءَ گند ءُ نند ءِ سدکی داتگ -چریشی ءَ پد بیگواھیں مردمانی کھولاں اسلام آباد ءَ زھرشانی نندانک ھلاس کرتگ –

دوشمبے ءَ ایچ آر ڈبلیو ءَ وتی شنگ کرتگین درشان ءِ تہ ءَ پاکستان ءَ را کڈنی کرتگ کہ آ ایوک ءَ انی گپتگیں مردمانی بارہ ءَ اشی ءَ بہ کنت بلکیں آؤکیں وھداں زورانسری آوارجنی ءِ دارگ ءُ بیگواہ کنوکانی ھلاپ ءَ پَٹ ءُ پول ءُ سُبکیں کاروائی بہ کنت –

ایچ ار ڈبلیو ءَ وتی شنگ کرتگیں درشان ءَ گوشتگ کہ انسانی ھکانی میان اُستمانی رھبند اے وڑیں کاراں ترندی ءَ بگیر داریت کجا ھم کجام ادارہ کَسے ءَ بے جرم ءَ قید ءُ بند کرتگ نہ کنت ءُ ھمے درچ ءَ آئی ءِ کھول ءَ ھچ ھال مہ دے ءُ آئی ءِ کھول ءَ ھروھد ءَ درد ءُ رنجی وتی لپیٹ ءَ زیر اَنت –

سربوتگیں ھالانی رِد ءَ بلوچستان ءِ دمگ تربت، پنجگور، خاران، مشکے ءَ پاکستانی پوج ءِ سرا اُرش کنگ بوتگ، دومی نیمگ ءَ سند خیبر پور ءَ ھم پاکستانی پوج ءِ سرا اُرش کنگ بوتگ – اُرشانی آسر ءَ پاکستانی پوج ءَ جانی ءُ مالی تاوان رستگ –

دی بلوچستان پوسٹ

پاکستانی پوج ءِ سرا بوتگیں اُرشانی زمہ واری آجوئی لوٹوکیں سلاہ بندیں گلاں منّ اِتگ انت –

کیچ ءِ دمگ تربت ءَ پاکستانی پوج ءِ سرا بوتگیں اُرش ءِ زمہ واری بی ایل اے ءَ منّ اِتگ –

جارکش جئیند بلوچ ءَگوشتگ کہ مئے سرمچاراں گوَستگیں روچ ءَ کیچ ءِ بنجاھی شھر تربت ءِ دمگ آپسر پُھل ءِ سرا برجاھیں زورگیریں پاکستانی پوج ءِ پانگس ءِ سرا دستی بمب اُرش ءِ کتگ –

آئی ءَ گوَشتگ کہ اُرش ءِ آسرءَ پاکستانی پوج ءِ یک کارمندے مرتگ ءُ بازین ئے زدگ بوتگ-

مشکے ءُ بالگتر ءَ پاکستانی پوج ءِ بنجل ءِ سرا بوتگیں اُرشانی ءِ زمّہ واری بی ایل ایف ءَ منّ اِتگ –

بلوچستان لبریشن فرنٹ ءِ جارکش میجر گھرام بلوچ ءَ گوشتگ کہ مئے سرمچاراں دو شمبے ءِ شپ ءِ ادار نُہ ءَ مشکے ءِ دمگ گجر ءَ پاکستانی پوج ءِ بنجل ءِ سرا راکٹ ءُ دگہ مزنیں سلاھانی گوما اُرش کتگ –

آئی گوشتگ کہ گجر کالج ءَ برجاھیں آرمی ءِ بنجل ءِ دو بنجاھی سنگر اُرش ءَ چہ تباہ بوتگ اَنت وھدیکہ بنجل ءِ توک ءَ ھم راکٹ آس داتگ، اے اُرش ءَ زورگیریں پاکستانی پوج ءَ جانی ءُ مالی تاوان داتگ –

جارکش میجر گھرام بلوچ ءَ گوشتگ کہ مئے سرمچاراں گوَستگیں شپ ءِ ادار دہ ءَ بالگتر ءِ دمگ سری گڈگی ءِ نادراجاہ ءَ برجاھیں زورگیریں پاکستانی پوج ءِ بنجل ءِ سرا راکٹ ءُ مزنیں سلاھانی گوما ھم اُرش ءِ کُتگ – اے اُرش ھما وھد ءَ کتگ کہ پوجی کارمند بیست ءُ سئے مارچ یومِ پاکستان مراگش ءِ چن ءُ لانچ ءَ دست گٹ بوتگ اَنت –

آئی ءَ گوشتگ کہ اے اُرش ءِ آسرءَ زورگیریں پاکستانی پوج ءَ جانی ءُ مالی تاوان رستگ –

ھاران ءَ پولیس تھانہ ءُ ایپ سی پانگس ءِ سر ءَ بوتگیں اُرشانی زمہ واری یو بی اے ءَ منّ اِتگ –

جارکش مزار بلوچ ءَ گوَشتگ کہ ھاران شھر ءَ پولیس اسٹیشن ءَ بیست ءُ سئے مارچ ءِ روچ ءِ درگت ءَ چِن ءُ لانچ کنوکیں پولیس کارمندانی سر ءَ دستی بمب اُرش ءِ کتگ ءُ دومی اُرش خاران ءِ دمگ تاگزی ءَ فرنٹئیر کور ءِ پانگس ءِ سر ءَ کتگ –

آئی ءَ گوَشتگ مئے سرمچاراں زورگیریں پوج ءِ سر ءَ راکٹ لانچر ءُ دگہ ٹوھیں سِلاھانی گوما اُرش کتگ کہ اِشی ءَ چہ زوراکیں لشکر ءَ جانی ءُ مالی تاوان رستگ –

جارکش ءَ گوَشتگ کہ پولیس ءُ لیویز ءِ کارمند زورگیریں پوج ءِ گوم ءَ ھم کوپگ انت – بلوچ مھلوک ءِ گِسانی پٹ ءُ پول کنگ، بلوچ ورناھانی زورانسری آوار جنگ ءُ لُٹ ءُ پُل ءِ وڑیں کُتکاریانی سر ءَ باز رند ءَ مکن کنگ ءَ ابید ھم آھاں وتی کار یلہ نہ داتگ – دیمتر ءَ اِشانی بگیری ءَ ٹوھیں گامگیج زورگ بیت –

ھمے وڑ پنجگور ءَ پاکستانی پوج ءِ سرا بوتگیں اُرش ءِ زمّہ واری بی آر اے ءَ منّ اِتگ –

بلوچ ریپبلکن آرمی ءِ جارکش بیبگر بلوچ ءَ گوشتگ کہ مروچی سُھب ءَ کیلکور، گڈگی ءِ دمگ سیدآباد ءَ بیست ءُ سئے مارچ ءِ درگت ءَ زورگریں پاکستانی پوج ءِ نیمگ ءَ نادراھجاہ ءَ برجاھیں مراگش ءِ وھد ءَ مئے سرمچاراں نزیکیں چوکی ءِ سر ءَ دور جنگیں ءُ وتکاریں سلاھانی گوما ءَ اُرش کُتگ – اُرش ءَ پاکستانی پوج ءَ جانی ءُ مالی تاوان رستگ –

دومی نیمگ ءَ سند ءِ دمگ خیبر پور ء پاکستانی رینجرز ءِ سرا بوتگیں اُرش ءِ زمہ واری سند ءِ آجوئی لوٹوکیں گل ایس آر اے ءَ منّ اِتگ –

سندھودیش ریوولیشنری آرمی ءِ جارکش سوڈھو سندھی ءَ وتی شنگ کرتگیں درشان ءِ تھا گوشتگ کہ مئے سرمچاراں مروچی ھیر پور میرس ءَ پاکستانی رینجرز ءِ گاڑی ءِ سرا دستی بمب اُرش ءِ کتگ – اُرش ءِ آسر ءَ رینجرز ءِ لانس نائیکے ءَ ھوار پنچ کارمند زدگ بوتگ –

جارکش ءَ گوشتگ کہ سندی راج وتی سرڈگار ءِ سرا پاکستان ءِ ایردستی ءُ پنجاب ءِ گلامی ءَ نہ منّ اِیت ءُ ایس آر اے آجوئی ءِ تاں وتی جھد ءَ برجاہ داریت –

سر بیتگیں ھالانی رد ءَ روکپتی بلوچستان ءِ بنجاھی شھر دزاپ ءَ دگ ءِ وئیل ءَ چاردہ مردم بیران ءُ یازدہ زدگ بیتگ اَنت –

گیشیں ھالانی رد ءَ وئیل ھاش ءُ دزاپ ءِ میانی جاہ کورن دھک ءَ بیتگ کہ اود ءَ چاردہ کس بیران ءُ یازدہ کس زدگ بیتگ اَنت –

اھوالکار ءِ رد ءَ وئیل نیمروچ ءِ وھد ءَ پیش اتکگ کہ اود ءَ گاڑیاں ٹکر وارتگ چریشی ءَ چہ چاردہ کس بیران بیتگ اَنت ءُ یازدہ زدگ بیتگ اَنت –

اھوالکار ءِ رد ءَ بیران بیتگیں مردمانی تہ ءَ ھشت کسانوکیں چُک ھوار اَنت ءُ وئیل ءَ پد سَے ایمبولنس وئیل جاہ ءَ سر بیتگ اَنت ءُ لاش ءُ زدگ بیتگیں مردم چِست کنگ ءُ ھاتم الانبیا نادراہ جاہ دزاپ ءَ برگ بیتگ اَنت –

زانگ بہ بیت روکپتی بلوچستان ءَ ھمک روچ دگ ءِ وئیلانی ھال آیگ ءَ اَنت ءُ لس مردمانی گوشگ اِنت وئیلاں ڈرائیورانی لاپرواھی ءِ سبب بیگ ءَ اِنت –

سندھ ءِ بنجاھی شھر کراچی ءَ دو شمبے ءِ روچ ءَ پریس کلب ءِ نزیک ءَ زورانسری بیگواھیانی ھلاپ ءَ یک کنونشن ءِ برجم دارگ بیتگ –

اے کنوشن ءَ بلوچستان، سندھ ءُ ھیربرپتکونواہ ءَ بیگواہ بیتگین مردمانی کھولاں بھر زرتگ –

اے کنونشن ءَ بھر زیروکیں سروکاں تران کنان ءَ لوٹ کرتگ کہ میان اُستمان ءِ چارٹر ءِ رد ءَ ریاست پاکستان ءِ بنکی آزادیاں، انسانی ھکانی شرپ کنوک ءُ آیانی سر ءَ دلجمی ءِ گامگیج ءُ یونیورسل ڈکلیریشن فار ہیومن رائٹس ءِ شرپ کنگ ءَ لگتمالی کنگ اِنت –

زورانسری بیگواھی یک پدرد ءُ دردناکیں جیڑھے، اے یک سنگینیں جرمے ءُ بنی آدم زات ءِ ھلاپ ءَ جرمے ءِ لَڑ ءَ داریت -ما زورانسری بیگواھیانی دارگ ءُ زورانسری بیگواہ کنوکانی گرپت ءَ سر بیگ ءِ سرپدی ءِ سِنچ ءَ چیلنج کنگ ءَ ساجو اِنت –

آیاں گوشت کہ ما سرپد بہ ایں ھمک مردم ءَ زورانسری بیگواھی ءِ ھک نیست اِنت ءُ ما اے گپ ءَ گشین اِنت ھمک بیگواہ بیتگیں مردم ءِ کھول ءَ آئی ءِ بیگواھی ءِ درگت ءَ سرپدی دیگ بہ بیت –

ما زان ایں کہ زورانسری بیگواھی تچک ءَ آجوئی ءِ گپانی لپاشگ ءِ سوب اِبت – اے پابندیانی مول ءُ مراد پاکستان ءَ برجاھیں گلوبل سرمایہ داری ءِ پروجیکٹ ءَ دمگی پھناتاں مڈیانی پُلپھانچی ءُ دمگی مردمانی دپار ءِ پَچگرگ ءُ گار کنگ اِنت –

ما زان ایں اے پابندی سندھی، بلوچ، پشتون، سرائیکی، گلگتی، کشمیری مھلوک ءِ چیرترگی ءَ جتائی ءِ دوستانکی ءَ مَٹ کنگ اِنت ءُ پنجاپ ءُ اھل تشیعاں وت ماں وت ءَ دور دارگ ءُ چیرترگی ءِ آماچ کنگ ءَ اَنت –

پاکستان ءِ ریاستی ادارھانی دستاں کانودانی لگتمالی یک دراجیں وھدے ءَ برجاہ اِنت – بنکی انسانی ھکانی راجی سلامتی ءُ ناشرکاری ءِ درچ ءَ ھال نہ دیوکیں گامگیجے ءَ وانگ، جانسلامتی، رپت ءُ آمد، ھالرسانی ءُ دگہ پیمیں آسراتی زبھری ءِ نیمگ ءَ روان اَنت –

اے دیوان دزبندی کنت کہ ریاست ء پاکستان ۱ سرجمیں ڈیھ ءَ برجاھیں پوجی ءُ نیم پوجی لشکر کشیاں زورانسری بیگواھیانی درچاں تچک ءَ انسانیت ءِ ھلاپ ءَ جرمے ءِ نام ءَ دنت پرچاکہ میان اُستمان ءَ انسانی ھکانی کمیٹی ءِ بیگواھیانی درگت ءَ نبشتگیں تاک (۱) ءِ رد ءَ کجام ھم کس ءَ بیگواھی ءِ آماچی نیست اِنت –

۲: راجی سلامتی، ڈیھی سلامتی، ناشرکاری، آجوئی دوست ءِ نام ءَ پاکستان ءُ آئی ءِ دست گپتگیں ھنداں زورانسری ءَ بیگواھیاں بند بہ کنت پرچاکہ میان اُستمان ءَ زورانسری بیگواھی کمیٹی ءِ نبشتگیں تاک (۱) رد ءَ کجام ھم گیشیں جاورھال چوش کہ جنگ، یا ایمرجنسی ءِ نام ءِ سر ءَ زورانسری بیگواھی ءَ دیم ءَ کُت نہ کنت –

۳: آمیدگسانی کار انساپ ءِ دیگ – ناشرکاری ءِ بگیری دارگ ءِ رھبند، پوجی آپریشن، امن ءُ ایمنی ءِ نام دیگ ءَ زورانسری مردماں بیگواہ کنگ زوریں ارزی نبشتگ کنگ ءَ جوئمٹ انوسٹیگیشن ءِ باسک ءُ پولیس، دمگی انتزامیہ، رینجرز، ایف سی، چیریں ادارھانج رپورٹانی ودار ءُ آیانی نہ منگ دَہ دَہ سالاں زورانسری بیگواھیاں انساپ ءِ واستا وھد وھد ءِ دیگ ءِ سر ءَ کانون سازی کنگ بہ بیت پرچاکہ میان اُستمان ءِ کمیٹی برائے زورانسری بیگواھی آرٹیکل (۲) ءِ رد ءَ دزگیری، دگہ جاہ ءِ روگ ءَ نیلگ، آوار جنگ یا کجام ھم دروشم ءَ ریاستی ادارھانی چاریگ یا ھنچیں پردے ءِ جاڑیگ بیگ ءِ سوب ءَ کجام ھم مردم ءَ آجوئی ءَ زبھر کنگ ءُ آئی ءَ پد اے گپ ءِ نہ منّگ ءَ اے مردم زبھر کرتگ یا زورانسری بیگواھیں پرد ءِ کرتگین یا آئی ءِ دزگیری ءَ زندانانی تہ ءَ چیر دیگ ھم جرمے گوشتگ –

۳: ما سرپد بہ ایں گوستگیں بیست سالاں برجاھیں زورانسری آوار جنی درچ اے گپ ءِ راستی اِنت کہ زورانسری ءِ دراھیں وئیلانی درگت ءَ پَٹ ءُ پول ءِ واستا یا ٹرتھ اینڈ ریکنسیلیشن کمیشنے جوڑ کنگ بہ بیت دانکہ ابید ارزی نامہ ءَ انسانیت ءِ گام ءِ سر ءَ پَٹ ءُ پول بہ بیت پرچاکہ میان اُستمان ءِ کمیٹی برائے زورانسری بیگواھی ءِ آرٹیکل (۲) رد ءَ اے گپ ءِ گر ءُ داری ریاست ءِ زمہ داری بیت اِنت مردم یا ٹولی ءِ نام ءَ کجام ھم اجازت نامہ ءَ ریاست ءِ کمکی یا گوشگ ءَ زورانسری بیگواھی بہ کنت گڑا آیاں انساپ ءِ دیم ءَ بہ اوشتارین اِنت –

۴: زورانسری بیگواھی کانودانی رد ءَ سنگینیں جرمے گوشگ بیتگ ءُ اے انسانیت ءِ سوزمان ءِ جرم ءَ بروبری ءِ منّگ بیتگ –

۵: بنجاھی ءُ استانی سرکار ایکشن ان ایڈ آف سویلین پاور ءِ کانون ءِ چیر ءَ وت ءَ زورانسری بیگواھیاں سرپدی ءَ وت ءَ ناسرپد کنگ ریاستی ادارہ ءُ شھریانی میان ءَ نرمی ءَ ھلاس کنت چریشی ءِ سوب ءَ آجوئی ءِ گپ جنگ ءِ گنجائش لس جاوراں جاڑیگ بیت اِنت – میان اُستمان ءِ کمیٹی برائے زورانسری بیگواھی آرٹیکل (۶) رد ءَ ھر ھما مردم ءَ زورانسری آوار جنگ، یا آئی ءِ ھکم جاری کنگ، یا آئی ءَ شَور ءُ سلاہ دیگ ءُ وتی نیمگ ءَ کشگ یا آئی ءِ جھد ءَ ھوار بیگ ءَ گڑا آ زورانسری بیگواھی ءَ ھوار بیگ ءِ نام دیگ بیتگ – زورانسری بیگواھی ءِ ھالانی چیر دیگ یا آئی ءَ دلگوش نہ کنگ ھم زورانسری بیگواھی جرمے گوشگ بیتگ –

۶ اے دیوان ھرسال ءَ زورانسری بیگواھیانی ھلاپ ءَ ملک ءَ ھوار ڈنی درچاں زھرشانی دارگ ءُ بازیں کچے ءَ موبیلائیزیشن کنگ ءِ جھد ءَ کنت دانکہ زورانسری بیگواھیانی درچ بند بہ بیت ءُ بنکی انسانی ھک دیگ بہ بنت –

نبشتانک: ماہ شان من، ھَور ءُ تھنائی

نبشتہ کار: مھروان کمبر

ماھو!

دی بلوچستان پوسٹ

روچ ءِ برانزاں چہ تپتگیں ریگزار ءِ گرمیں ریکانی سر ءَ ھَوری تْرمپانی کپگ ءَ گوں یاتانی وشبوھے شِنگ ءُ تالان بوت۔ ھَور ءِ تْرمپانی توار ءَ مُدام من ءَ وتی نیمگ ءَ بُرتگ ، اے توار انچیں شیرکِنیں توار اَنت کہ بے کراریں زرد ءَ مُدام تاھیر زُرتگ۔ باز براں من اے توار کوھاں، پٹّ ءُ میداناں، ریگزاراں، جنگلاں، برپ گْواریں شھراں، لوار چکیں بازاراں، تھنائی ءُ مُچّیانی تہ ءَ باز رند ءَ اِش کُتگ اَنت برے برے اے توارانی زِیمر تھانگ ءِ موسم ءَ گوں دُچار کپ اَنت، گُڑا زندگی لھتیں انچیں رازاں چہ آشکار بیت کہ آ بس مارگ بَہ اَنت۔

ھَور ءَ گوں گْوست ءِ ترانگاں چے سْیادی ھست؟ من نہ زان آں ، بلے ھردیں ھَور ءِ توار دریگ ءِ کانچاں، درچکانی تاکاں، لوگ ءِ شار ءِ سر ءَ کپ اَنت گُڑا ھیال ءُ جیڑگانی تہ ءَ گْوست ءِ زباد ءُ ھیر بوئیں ترانگانی رنگاں دْرنز اَنت پد ءَ چوں ھَور ءَ چہ تر بیتگیں ھاک ءِ وشبو جبین ءَ اِیرکپان بیت ، ھچ سما نہ کپ اِیت۔ ھَور کہ گْواریت مردُم ءَ وتی کسانی ءِ میتگ یات کَیت کہ اُود ءَ ھَوراں گْورتگ گُڑا زمین ءِ سارتیں بوہ ءَ تاھیر داتگ پمیشکا ھما کہ اِنسان اَنت، آ وتی زمین ءَ چہ ھچبر پراموش بوت نہ کن انت۔

ماھو!اے ساھت ءَ بیگاہ ءِ شش بج اِنت، ڈنّ ءَ انگت ھَور گْوارگ ءَ اِنت ءُ من وتی کُوٹِی ءَ نشتگ ءُ دریگ ءَ چہ ڈنّ ھور ءِ نِدارگاں چارگ ءَ آں۔ کسانی ءَ چہ ھَوری تْرمپ من ءَ بے کِساس دوست اَنت ھردیں کہ ھَور ءَ اِیر داتگ من وت ءَ ھَور ءِ سر ءَ تر کُتگ ، بلے مرچی نہ زان آں پرچا من ءَ ھَور ءِ تْرمپ کرار دیگ ءَ نہ اِنت ءُ تھانگ ءِ ابیتکیاں گیشتر کنان اَنت۔ اے کورونائیں اھد ءِ تھنائی گْوش ئے مُوتک الھان ءَ اِنت۔

ماھو!ھَور ءِ توار ءَ چہ منی بے توار ءُ ویرانیں دُگنیا ءِ راز آشکار بُوھان اَنت ، ھَو بے توار ءُ ویرانیں دُگنیا ءِ پرچا کہ مُدّتے بیت منی زندگی بے توار ءُ ویران اِنت گپّے زان ئے! اسل ءَ من چہ زندگی ءَ سِستگ آں، چیا کہ منی زندگی بلوچستان اِنت بلوچستان ءِ دمک ءُ در اَنت ، کوہ ءُ کُوچّگ اَنت ، تیاب ءُ مچکدگ اَنت ، بلے دیر اِنت کہ بلوچستان ءِ زیداں چہ سِستگ آں کسے کہ وتی ھند ءُ دیاراں چِہ سِد اِیت، گُڑا آ زندگی ءَ چہ ھم سِد اِیت۔

ماھو!ھما بلوچستان کہ منی مات اِنت، منی زندگی اِنت، منی پجّار اِنت، آ بلوچستان جنگانی بدّیں جاورانی آماچ اِنت بلوچستان ءِ ھر نِدارگ تیر آماچ اِنت ھردیں رولہ وتی رنگ ءَ گلزمین ءِ دِلبند ءَ تالان کنت ، گُڑا گمان بیت پہ وتن ندْر بیتگیں سرانی رِتکگیں ھونانی رنگ اَنت کہ ھوار اَنت بام وتی جلشکاں تالان کنت، گْوش ئے زندان ءَ بندیگیں ھمبلانی لٹّ ءُ کُٹ کُتگیں بالادانی شنز اِتگیں ھون اَنت ھمے کہ بلوچستان ءَ شپ وتی شار ءَ شِنگینیت ، گُڑا اِستال ءُ ماہ بیگواہ بیتگیں بچّانی ودار ءَ نشتگیں ماتانی ھمرائی ءَ ارساں شَل اَنت گوں۔

ماھو! ھما وتن کہ گُلام دارگ بَہ اَنت، گُڑا اُود ءَ اِیمنی ءِ کپوت بال کن اَنت ءُ جنگ آماچ بَہ اَنت منی وتن ءَ ھم جنگ ءِ بِندات بیتگ اے جنگ ایردست کُتگیں راجے ءِ جنگ اِنت۔ اے جنگ دوبر آجو بُوَگ ءِ جنگ اِنت اے جنگ پجّار ءِ جنگ اِنت اے جنگ زندگ بُوَگ ءِ جنگ انت راستے کہ وش نہ اِنت جنگانی بدّیں بولی، بلے پہ وتی آکبت ءِ سینگارگ ءَ جنگ کنگ کپ اِیت۔

گْوش اَنت کہ جنگ پہ بچکند کنگ بیت، بلے اُود ءَ دل گریوگ ءَ بیت۔ چہ جنگاں میتگ ویران ءُ کبرستان آباد بَہ اَنت سُتکگیں گِس ءُ چہ پُرشتگیں دگاں ابید دِگہ ھِچّ نہ مان اِیت۔جنگ آماچیں میتگ لڈّ ءُ بار کن اَنت ءُ دِگہ ھند ءُ دیاراں پناھگیریں زندے گْوازین اَنت من ءَ ھم دیر اِنت کہ درانڈیھ ءَ پناھگیریں زندگی ءِ نہ وشیں روچاں تیلانک دیان آں۔

بلے ماھو! گپّے زان ئے! من ءَ پد ءَ واتر بُوَگی اِنت، پرچا کہ اے دیار منی وابانی دنیا نہ اِنت اے موسمانی مٹّ بیتگیں داب ، اے شھر، گْوات ، ھَور ءُ دل ءِ دریکگ ھِچّ منی نہ اَنت من ءَ ھما دیار ءَ واتر بُوَگی اِنت کہ ھمود ءَ من وتی جند گار کُتگ ءُ اِد ءَ اتکگ آں ھمود ءَ منی ارواہ ءَ وتی بُنجل کُتگ۔ ھردیں وتی گُلزمین ءَ، وتی مردُمانی تہ ءَ گْوازینتگیں آ وھد ءُ پاساں یات کناں، گُڑا پُرشتگیں بچکندے لُنٹانی سر ءَ چِست بیت ءُ پد ءَ یک مُجّے کَیت ءُ ھمے بچکند ءَ انچو اندیم کنت ، گْوش ئے زان ءَ من اِیرگْواتے ءَ کپتگیں کْوھنیں گُدے آں نہ زمین من ءَ وتی کنت ، نیکہ آزمان، بس بیگوائی اِنت کہ منی رند ءَ کپتگ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ڈپٹی کمشنر کوھلو ممتاز کھیتران ءَ لیویز لائن ءَ تران کنام ءَ گوشتگ کہ چیریں ھال ءِ سر بیگ ءَ کوھلو ءِ کُچگی دمگ سینٹڑی ءَ پَٹ ءُ پول کرتگ ءَ چریشی ءَ بازیں کَچے ءَ کَلیں سلاہ ءُ بمب دستیگ کرتگ اَنت –

ڈپٹی کمشنر ءِ گوشگ اِنت کہ اے ناشرکارانی شوربندی ءَ بیست ءُ سَے مارچ یوم پاکستان ءِ روچ ءَ دمگ ءَ اُرش ءَ دلمانگ بیتگ اَنت –

آئی ءَ گوشتگ کہ لیویز فورس ءَ کاروائی کرتگ ءُ اے بے سوب کرتگ اَنت –

ڈپٹی کمشنر ءِ رد ءَ گپتگیں سلاھانی تہ ءَ چاردہ دانگ اینٹی ٹینک، ھپت آر پی جی، یک گنے، ھپت روند ءُ ھبدہ آر پی جی، آر پی جی ھپت فیوز شش دانگ، ایس ایم جی یکے، سکیل روند سیزدہ ءُ سد ءُ بیست، پانزدہ دانگ گرنیڈ، ماٹر فرنٹ فیوز بیست ءُ یک دانگ، اے پی ایم نُھ دانگ، یک سد ءُ بیست مارٹر یکے، بی ایم بارہ دو دانگ دستیگ کرتگ اَنت –

لیویز فورس ءِ ٹاھانی راستی دمگ ءَ لس مھلوک ءِ نیمگ ءَ تنی وھدی نہ بیتگ اَنت ءُ وھد وھد ءِ سر ءَ لیویز فورس ءُ دگہ فورسانی ٹاہ یکشل ءَ باز جاہ ءَ سلاھانی دستیگ کنگ ءِ ٹاہ پیداک اَنت بلے لس مردمانی نیمگ ءَ تنی وھدی چوشیں ھالانی راستی نہ بیتگ اَنت –

ون اسٹار گومازی ءَ گلشن یونائیٹڈ گومازی ءِ دیم ء چار گول ءَ باج برتگ ءُ گوازی وتی نام ءَ کرتگ ءُ فائینل ءَ سربوتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی سیمی فائینل ءِ اولی گوازی کنگ بوتگ –

مروچگیں گوازی ون اسٹار گومازی ءُ گُلشن یونائیٹڈ گومازی ءِ میان ءَ بوتگ ، دؤئیں ٹیمانی لیبیاں گوں جوانی ءَ لیب داشتگ – گلشن یونائیٹڈ ءَ یک گولے داتگ وھدیکہ ون اسٹار گومازی ءَ چار گول داتگ ءُ باج برتگ، گلشن یونائیٹڈ ءِ ٹیم پروش داتگ ءُ وت ءَ فائینل ءَ سر کُتگ –

گچینی مھمان ماسٹر عظیم آزگ ،ملا سگیر ءَ دؤئیں ٹیمانی لیبی دلبڈی داتگ ءُ آھانی ستاشانی کرتگ –

سیمی فائینل ءِ دومی گوازی گومازی ءَ بلوچ کلب مند ءُ بُلبل ھوزئی میان ءَ اسکول گراؤنڈ ءِ پٹ ءَ بیت اِنت –

بلوچستان ءِ بنجاھی شھر شال ءَ بازیں کَچے ءَ زالبولیں استاداں نوکریانی پکاہ نہ کنگ ءِ ھلاپ ءَ زھرشانی کرتگ – دوشمبے ءِ روچ ءَ گواروکیں ھور ءِ چیر ءَ زالبولاں شال ءِ پریس کلب ءِ دیم ءَ زھرشانی کرتگ – زالبولانی سر ءَ پولیس ءِ لَٹ ءُ کُٹ ءَ زالبولاں بلوچستان ءِ اسمبلی ءِ نیمگ ءَ دیم ترینتگ –

چاگردی رسانکجاھاں شنگ بیتگیں تامربنداں گِندگ بیت اِنت گلوبل ٹیچرزانی زھرشانی ءُ پولیس ءِ میان ءَ گر ءُ چِلی بیگ ءَ اَنت –

ھمے وھد ءَ زھرشانی کنوکانی گوشگ اِنت ما لَٹ ءُ کُٹانی نشانگ کنگ ءِ ھمراھی ءَ بازیں زھرشانی کنوک دزگیر کنگ بیتگ اَنت – بلے واکدارانی نیمگ ےَ چوشیں گپ دیم ءَ نیتکگ اَنت –

زھرشانی ءَ ھواریں یک زالبولیں ٹیچر فرزانہ ءَ گوشت: ما گوستگیں پنچ روچاں زھرشانی کنگ ءَ اِنت ھمک وھد سدکی دیگ ءَ ابید وانگ ءِ گر ءُ دار کنوکاں نوکریانی پکاھی ءِ ھال شنگ نہ کرتگ –

2015 ءَ بلوچستان ءَ کَچ ءُ کساس 1500 استاد کہ آیانی تہ ءَ گیشترین میانی اُستمانی بھرزیری ءِ وانگ (جی پی ای) ءِ مراگشاں زیرگ بیتگ اَنت – بلوچستان ءِ سرکار ءَ زالبولیں استادانی گچین کنگ ءَ پد اُستان ءَ جنکانی یک ھزار اسکول جوڑ کرتگ –

ھزدار ءِ یک دگہ زالبولیں اُستاد ثمینہ بی بی ءَ وتی ھیال درشان کنان ءَ گوشت کہ مئے مسام ءِ آڈر ھلاس بیتگ ءُ مارا گوستگیں لھتے ماھاں پگار رسگ ءَ نہ اِنت – استاداں زھرشانی وھد ءَ چُک ھم آورتگ اَنت گوں –

سرکار ءَ جی پی ای ءِ تپاکی کرتگ کہ آ بلوچستان ءَ وھدانی آسر بیگ ءَ پد ملازمانی پگاراں سرجمی ءَ دنت بلے تنی وھدی داں اُستان ءِ سرکار ءَ استادانی پگارانی دزبندی رد کرتگ –

وزیر تعلیم بلوچستان، سردار یار مھمد رند ءَ زھرشانی کنوکیں زالبولانی بنجل ءَ تر ءُ تاب کرتگ ءُ یک ماھے ءِ نزیک ءَ آیانی نوکری ءِ پکاہ کنگ ءِ سدکی داتگ اَنت –

ھزدار ءِ یک اُستادے فرعانہ ءَ دلرنجی کرتگ کہ وزیر تعلیم ءِ سدکی ءَ ابید ھم مارا ھچ پکاھی رسگ ءَ نہ اِنت – آئی ءَ گوشت کہ دراھیں استاد پنچ سال ءَ پیسر اُستان ءَ این ٹی ایس ءِ چیردستی ءَ میرٹ ءَ زیرگ بیتگ اَنت –

بلے مھکمہ تعلیم بلوچستان ءِ بنشوناں گوشتگ کہ استادانی پکاھی ءِ جیڑہ اُستانی کابینہ ءَ پیش کرتگ – آئی ءَ گوشت کہ اُمیت اِنت اُستانی کابینہ استادانی گچینی ءِ منگ ءَ منّ اِیت –

نبشتانک: مھر چو نود ءٙ باتن ءٙ شنزایت 

نبشتہ کار : نثاریوسف 

دی بلوچستان پوسٹ

قدیر ساگر ءِ شعرانی کتاب ” مھر چو  نود ءٙ باتن ءٙ شنزیت کہ ہمے زیتّاں چاپ ءُ شنگ بیتگ کتاب ءِ وانگ ءٙ پد من ءٙ دل ءٙ سکین دات کہ من چوشیں ارزشت داریں کتابے ءِ سر ءَ الم ءٙ چیزے نہ چیزے نبشتہ بہ کناں  کہ اے وڑیں کتاب پہ بلوچی زبان ءُ لبزانک ءٙ گنج ءُ گیشی یے ودیگ کت کن اٙنت ، پہ آوکیں پد ریچ ءُ پہ آئندگیں اوبادگاں مادنیں راھے نشان دات کن اٙنت ۔

قدیر ساگر 14، جولائی 1989 ءٙ ماں میتاپیں مند ءِ ہنکین بُلّو ءٙ واجہ محمد رحیم ءِ لوگ ءٙ ودی بیت ، قدیر ساگر ءِ واجہیں کماش پہ کار ءُ روزگار ءِ حساب ءٙ بُلّو ءِ وانگ جاہ ءٙ یک اُستادے ءِ بستار ءٙ وتی ذمہ واری ءٙ پیلو کنگ ءٙ اٙت بلے اسل ءٙ ، آ ہمے وانگ جاہ ءِ  مُھر ءُ محکم کنوک اٙت ءُ وتی ہمے مقصد ءٙ پہ ایمانداری ءُ دل پہکی ءٙ دیم ءٙ بران اٙت ، آئی ءٙ  وتی دور ءُ زمانگ ءٙ بلّو ءِ وڑیں پد منتگیں میتگے ءٙ قابل قدریں وانگ ءُ زانگی چاگردے جوڑ کتگ اٙت ، اے وڑیں ھزمت پہ آئندگ ءُ نوکیں پدریچ ءٙ لائقِ گیر آرگ اٙنت ، آئی ءٙ پہ وانگ ءٙ ، ءُ پہ وانینگ ءٙ یک عجب رنگیں مہر ءُ شئیدائی یے گون اٙت ۔ 

اے قدیر ساگر ءِ وش بھتی اِنت کہ آ ، واجہ محمد رحیم ءِ وڑیں وانندہ ءُ سرپدیں انسانے ءِ نیاد ءُ دلگوش داری ءِ ساھگ رُست ءُ مزن بیت ، ءُ ھمائی ءٙ چہ تمیز ءُ تربیت ئِے ہیل گِپت ءُ وتی شرّ ءُ گندگ ءٙ سرپد ءُ زانتکار بیت آئی ءٙ وتی بنداتی وانگ چہ ہائی سکول بُلّو ءٙ در بُرت ءُ پہ گریجویشن ءٙ تربت کیچ ءٙ شُت ہمود ءٙ چہ عطاشاد ڈگری کالج ءٙ وتی وانگ ءِ توام کت ، سن 2014 ءٙ بلوچستان ءِ جاورانی ناگیگی ءِ سوّب ءٙ در مُلک ءُ دراں ڈیھ بیت ۔ 

قدیر ساگر بلوچی لبزانک ءِ پڑ ءٙ شاعرے ءِ جہت ءٙ زانگ بیت مھر چو نود ءٙ باتن ءٙ شنز ایت آئی ءِ شعرانی اولمی کتاب ءِ نام اِنت کہ گوستگیں ماہ ءٙ بہ زاں جنوری 2021 ءٙ چہ قاسم لبزانکی  مجلس مند بلو ءِ نیمگ ءٙ چاپ ءُ شِنگ بیتگ ، کتاب ءِ سرتاک مزن نامیں  آرٹسٹ بانک سیما سردارزئی ءٙ جوڑ کتگ ، بانک سیما سردار زئی چندے چما وش بھتیں بلوچ آرٹسٹان اِنت  کہ آ ، ہچ وڑیں ستا ءُ ساڑایگ ءِ واز مندگ نہ اِنت آھانی کرد ءُ کمال وت ھبر کن انت  ، پہ گالسنجی ءٙ  واجہ ایم  شکاری ءِ نام نبشتہ اِنت کہ آئی ہوں گوں وتی اِزم ءٙ گوں حق ءُ انصاف کتگ ، نامدات ، قدیر ساگر ءِ قبلہیں کماش ءُ نمیرانیں اُستاد واجہ محمد رحیم ءِ نام ءٙ اِنت کہ پہ وتی آریپ ءٙ آئی ءِ نیکیں واھگاں سھر ءَ ئے کنت  ، کتاب ءِ توامیں حقّ ءُ مُز قاسم لبزانکی مجلس ءِ واک ءُ اکتیار ءٙ اٙنت ، پہ مزنی ءِ حساب ءٙ کتاب درستی 172 تکدیم چاگرد کنت ءُ تکینکی رہبند ءِ رد ءٙ کتاب ءِ  لڑ ءٙ یک پاک ساڑاے  ،68 دستونک ، 26 لچہ، 5, چاربند ،  ءُ 4  سانیٹ ماں گیجگ بیتگ کہ جتا جتائیں وھد ءُ مُوسماں دگہ دگہ ھند ءُ ولائتاں نبشتہ کنگ بیتگ انت ، پیشگال نبشتہ کنوکانی تہا  ہر دل عزیزیں شاعر منظور بسمل ، نامی ایں بلوچ آزمانکار ڈاکٹر ناگمان ، وش گُپتاریں عزّت ابدال ، بلوچی ءِ سنگین ھیالیں  شاعر ءُ ردانک نویس عارف وفا  ءُ ورنا پکریں جبّار آسکانی ءِ نام ہواراٙنت کہ قدیر ساگر ءِ زند ءُ ازم ءِ بابت ءٙ پہ نیک نیّتی وتی ھیال ءُ لیکہ اِش درشان کتگ اٙنت ، کرزاٙنت کہ کسے بوانیت اِش ،  قدیر ساگر ءِ شاعری یک ہنچیں دلے ئے درد اِنت  کہ جتگ ءُ تہہ پروش کنگ بیتگ  ،  ءُ چرآئی ءٙ چہ آئی ءِ زند ءِ  ہر  متاع ءُ مھر پلُگ بیتگ ، آ،  آزردگ ءُ ارمانی اِنت بلئے گریت نہ کنت اندر اندرا وت ءٙ وران اِنت ،   کُہت ءُ بژنیگ انت  ، پہ رفتگیں مُرادانی اوماناں  ھسکیت ءُ آہ سرد کنت- 

دُور ءٙ  چہ ،  واھگانی  چراگے  درا  نہ بیت 

تُرسے رجان اِنت تہنا دلاں ہنچیں سیہ شپے 

ساگر  کُجام  دیم ءَ نی جُنزّئے گوں تراولاں

بے اوستی ءِ  گیابیں  ءُ  دروھاپیں  ساھگے  

یا

آپ پُشت ءٙ اِن  ءُ دیم ءٙ آسے 

نزّ من  سرجمیں  دُنیا  آسے

چو مہ بیت تو منی برانزاں بہ سُچ ئے

سُتکگیں اے دل ءِ کسّہ آسے 

جی پہ  مِسکیں وطن ءِ ھشکیں دار

اوھے پردیس کہ ،  پہ مّا ، آسے 

اللّہ ءِ میارئے 

بلوچستان سبزبات ءُ بلوچی میزراں بات آمین-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔