TBP Balochi

دستونک

شائر: سلیم ناز

دی بلوچستان پوسٹ

توکَلاں زیر ءُ سَلاهاں سر بگر
پہ وتی ڈیھ ءِ تَلاهاں سر بگر

تو بلوچے ئے پہ تو شپ سنگر اِنت
گوں همے جن ءُ بلاهاں سر بگر

چُش مہ بیت دنیا پد ءَ تژنے بہ جنت
آجویی ءُ جُنز ءِ راهاں سر بگر

گوْنڈلیں تیراں کہ پیوند سینگ ءَ
دژمنانی بِل گلاهاں سر بگر

ماتکوهاں پهر ءُ شان اِنت همبلاں
سوچ چُشیں ماڑی ءُ جاهاں سربگر

بیا کنیں جنگ ءِ پڑ ءَ من تو کساس
جون تلام اَنت بِل کُلاهاں سربگر

مارا مات ءَ گوانزگ ءَ گُشتگ سلیم
یل بدے اِستال ءُ ماهاں سربگر

پنجگور ءِ دمگ وشبود ءِ جھمنندیں مردماں مروچی پریس کانفرنس کنان ءَ گوشت کہ مئے زمینانی سر ءَ زورانسری پچگرگ ءُ برگ ءَ اَنت –

پنجگور وشبود ءِ جھمنندیں ھاجی عبدالرازق، عرض مھمد، مھمد عظیم، ھاجی لال بکش، ھاجی رھمت اللہ ءُ دگہ مردماں پریس کانفرنس کنان ءَ وشبود مئے بن پیروکی ھنکین اِنت ءُ اد ءَ بُن پیروک کاریزکاری کنگ ءَ بیتگ اَنت بلے نِی نوکیں زوراکاں جَھ جتگ ءُ مئے زمینانی سر ءَ زورگری کنگ ءَ اَنت –

آیاں گوشت کہ اے زمین نوزدہ سد ءُ ھشتاد ءُ پنچ ءَ مارا گون اَنت ءُ ھما روچ ءَ بہ گر داں انیگ ءَ کس ءَ چوشیں زمینانی وارسی ءِ گپ نہ جتگ ءُ ناکہ کسے ءَ زمینانی زورگری ءِ گپ جتگ –

آیاں گوشت کہ لھتے سال اِنت ناسر نامیں مردمے مئے زمینانی سر ءَ زوردستی کنگ ءَ اِنت ءُ ھمے مرد ءَ دوزھزار ءُ ھژدہ ءَ مئے کھنانی سر ءَ زوردستی کنگ ءِ جھد کرتگ کہ ھما وھد ءَ پنجگور ءِ جاور ناوش بیتگ اَنت –

آیاں گوشت کہ اے زمینانی دراھیں کاگذ ایر اَنت ءُ دراھیں منّانک ھست کہ ھما زمینانی کبز ءُ دگہ چیز مئے گور ءَ ھست اَنت دگہ کسے ءِ گور ءَ نیست اَنت بلے اے مرد زمینانی سر ءَ زوردستی کنگ لوٹ ایت –

آیاں گوشت: ناسر ءَ اے زمیناں گوں ھچ ھک نیست بلے زوردستے آیاں گوشت کہ ھما زمین ما کبرستان ءِ واستا آئی ءَ مارا ھچ دست جنی نیست اِنت آیاں گوشت کہ اے جیڑہ ءَ میر اسد اللہ ءُ پنجگور ءِ مزنیں عالم دین گشین اَنت –

آیاں گوشت کہ ما وتی ھکانی واستا پھریزگی ءِ ھک ءَ داریں ءُ ھرچ ھساب ءَ ما وتی زمیناں کس ءَ دات نہ کن ایں ءُ گڈی ساہ ءَ داں وتی زمینانی زوردستی ءَ کس ءَ نیل ایں –

آیاں گوشت کہ بگیر داروکیں ٹولی ءِ گور ءَ اے زمین ءِ ھچ منّانک نیست اِنت اگاں آیانی گور ءَ منّانک ھست گڑا باید پیش اِش بہ کنت ئِے ءُ ما شریعت ءِ واستا تیار اِنت ءُ ما پر ایمنیں شھری اِنت ءُ کانون ءِ دراھیں رھبندانی پاسداری ما پیسر ءَ کرتگ اَنت ءأ کانون ءِ دراھیں چیزے مئے گور ءَ جاڑیگ اَنت –

آیاں گوشت کہ اگاں کانون ءَ زمین ءَ زبھر کُت گڑا مارا ھچ اتراز نیست اِنت اے کھنانی زمینانی درستیں بھردار چِل ءُ چار اَنت ءُ ابید ءِ شریعت ءَ ما اے زمیناں کسے ءَ دات نہ کن ایں –

آیاں گوشت: اے زمین ما کازی ءِ کورٹ ءَ کَٹ اِتگ اَنت ءُ سال دوھزار ءُ نُھ ءَ مھمد امین نامیں مردمے ءَ کازی ءِ کورٹ ءَ کیس بیتگ ءُ اے زمین ما کَٹ اِتگ اَنت ءُ مھمد امین اے زمینانی بارہ ءَ کازی ءِ کوٹ ءَ پارگ کرتگ اَنت –

آیاں گوشت کہ ما بلوچی دیوان ءُ مجلساں وتی زمینانی وتیگ کنگ ءِ ھک ءَ داریں ما پُر ایمنیں شھری اِنت ءُ دگرانی زمینانی سر ءَ زوردستی کنگ ءِ دلگوش ءَ ھم گور نہ کن ایں ءُ ما وتی بن پیروکی زمینانی زبھر بیت نہ کن ایں ءُ ما کانون ءِ دراھیں راہ ءُ دراں گیش اِتگ ءُ کازی کورٹ ءَ مئے ھک ءَ پیسلہ کرتگ ءُ اے زمین مئے بیتگ اَنت ءَ نِی دگہ نوکیں ٹولی ءِ دراتکگ ءَ مئے زمینانی زورگری ءَ لوٹ اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دو سد ءُ شست ءُ سَے روچ سرجم بوتگ –
بلوچستان نیشنل پاٹی ءُ بی ایس او ءِ رھشون ءُ باسکاں بنجل ءِ تر ءُ تاب کتگ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچ چاگرد ءِ تہ ءَ زالبولانی سک باز شرپ بکشگ بیت – بلوچ چاگرد ءِ تہ ءَ آھاں شیرزال ءِ پنام دیگ بیت، مارا وتی راجی راجدپترے تہ ءَ چشیں بازیں درورے دست کپیت کہ آھاں وتی راجی کرد پیلو کرتگ –

آئی ءَ گوشتگ کہ وھدیکہ یک راجے دگہ راجے ءِ یا ملک ءِ ایردست بیت گڑا زوراکیں راج ءِ ھمے جھد بیت کہ آ ایردست کتگیں راج ءَ ھمے اھساس ءَ ھلاس کنت کہ آ گلام انت – زورگیر ھمے مول مرادانی ھاتر ءَ بازیں پندلے سازیت آ سرجمیں راج ءِ سر ءَ زلم زوراکی کُشت کوش ءِ ترس ءِ ودی کنت –

ماما قدیر بلوچ ءَ گوشتگ کہ زورگریں پاکستان کجام وڑ ءَ وتی زلم ءُ زوراکی ءُ کتکاریاں چیر دنت کہ آئی ءَ بلوچ ءِ سر ءَ کتگ انت – اے راستی ءِ کہ بلوچ وتی سرڈگارے سر ءَ ایردستی ءِ بگیری ءَ جھد کنگ ءَ انت بلے اے جھد انسانی آجوئی ھاتر ءَ کانود ءُ رھبندانی متابک ءَ کنگ بوگ ءَ اِنت-

سر بیتگیں ھالانی رد ءَ اوتھل ءِ زیروپوائنٹ ءَ کیچ ءِ جھمنندیں نودربرے پاکستانی پوج ءَ چیریں ادارھاں آوار جتگ ءُ برتگ –

گیشیں ھالانی رد ءَ اوتھل زیروپوائنٹ ءَ گوستگیں روچ ءَ پاکستانی پوج ءُ چیریں ادارھاں سید ء حاصل جھممنند کلاتُک تربت آوار جتگ ءُ برتگ –

سید گوستگیں روچ ءَ شال ءَ دیم پہ کراچی ءَ روگ ءَ کہ اوتھل ءِ زیروپوائنٹ ءَ چیریں ادارھانی کارمنداں آوار جتگ ءُ برتگ –

زانگ بہ بیت بلوچستان ءَ نودربراں ھوار لس مردمانی آوار جنیانی ھال ھمک روچ پیداک اَنت-

زانگ بہ بیت گوستگیں ماہ ءَ بیگواھیں بلوچانی کھولاں اسلام آباد ءَ پہ وتی بیگواھیں مردمانی یلہ کنگ ءِ واستا بازیں روچاں نندانک ءُ زھرشانی کرتگ، چریشی ءَ پد کھول پاکستان ءِ انسانی ھکانی وزیر شیرین مزاری ءِ گوشگ ءَ سر وزیر عمران خان ءِ سدکی ءَ آیاں زھرشانی نندانک ھلاس کرتگ –

ھمے درچ ءَ ھمے ماہ ءَ بیگواھیں مردمانی کھولاں سروزیر پاکستان عمران خان ءَ گوں گند ءُ نند کرتگ ءُ عمران خان ءِ نیمگ ءَ کھولاں سدکی دیگ بیتگ –

کھولانی گوشگ اِنت ھمک سرکار مارا بس سدکی ءَ ابید دگہ ھچ دات نہ کن اَنت، دومی نیمگ ءَ چاگردی رسانکجاھاں لس مردمانی گوشگ اِنت سرکار ابید ءِ بیگواھیں مردمانی یل کنگ ءَ گیشتر مردم آوار جنگ ءُ بیگواہ کنگ ءَ اِنت –

سر بیتگیں ھالانی رد ءَ بلیدہ ءِ دمگ بٹ ھائی اسکول ءِ آگاھی مھم ءِ روانک ءِ کشگ بیتگ، روانک ءِ “سرشون وانگ درستانی واستا” ءَ بیتگ –

روانک ءَ اسکول ءِ نودر، استاداں بھر زرتگ ءُ وانگ ءِ سر ءَ گپ ءُ تران کرتگ،بھر زرتگیں مردمانی تہ ءَ ڈپٹی ڈی ای او بلیدہ زامران ممتاز ملنگ، ھائی اسکول ءِ ھیڈماسٹر شیر مھمد بلوچ، الطاف بلوچ، عبدالباسط بلوچ، بلیدہ سوشل ویلفیئر ءِ سروک یونس قادر، گوھرام فراز ءَ ھوار دمگ ءِ چاگردی مردماں بھر زرتگ –

روانک بازار ءِ دمکاں تران بیتگ ءُ مُچی ءِ دروشم ءَ مَچ بیتگ ءُ روانک ءَ بھر زیروکیں سروکاں تران کنان ءَ گوشت وانگ درستیں زھگانی واستا المی اِنت –

آیاں گوشت کہ بھر زیرگ ءَ مئے مھم برجاہ بنت ءُ ھما زھگ کہ اسکولاں دور اَنت ما لوگ لوگ ءَ تران بہ بہ ایں ءُ زھگاں پہ وانگ ءَ کاریں –

آیاں گوشت کہ ھما زھگاں پہ وانگ ءَ کتاب، گُد ءُ دگہ آسراتی نیست اَنت یا آیانی زورگ ءِ وس نیست ما دراھیں آسراتیاں وتی کوپگاں زوریں-

آیاں گوشت کہ چُکانی زھگ ءُ چاگردی مردماں اسکولانی گون ءَ کمک کنگ المی اِنت ءُ چریشی ءَ دمگ ءِ زھگانی چَم پچ بنت ءُ آیانی واستا شریں زندے گوست کنت –

آیاں گوشت کہ وانگ ھمک انسان ءِ بُنکی ھک اِنت کہ ابید ءِ وانگ ءَ چاگرد سرجم ءَ تھاری ءَ اِنت کہ اے تھاری بلوچستان ءِ ھمک میتگ ءُ کُچگاں گران اِنت کہ بے اِلمی ءَ ھچ راج ءَ دیمروئی نہ کرتگ –

پروم ءَ پاکستانی پوج ءِ گاڑی ءِ تراک ناکیں شوروانی نشانگ جوڑ کتگ چار پوجی کارمند کُشتگ اَنت – میجر گْوھرام

سربوتگیں ھالانی رِد ءَ گوستگیں شپ ءَ ناشناسیں مردماں پنجگور ءِ دمگ پروم ءَ پاکستانی پوج ءِ راھے سر ءَ تراک ناکیں شورہ کل کُتگ ءُ پاکستانی پوج ءِ گاڑی تراک ناکیں شوروانی نشانگ جوڑ کتگ – چریشی ءَ پاکستانی پوج ءَ جانی ءُ مالی تاوان رس اتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوَستگیں شپ ءِ ادار دوازدہ ءَ پنجگور ءِ دمگ پروم ءَ یاکوب میتگ ءَ آرمی بنجل ءِ نزیک ءَ پوج ءِ یک گاڑی تراک ناکیں شوروانی نشانگ جوڑ کرتگ-

جارکش ءَ گوَشتگ کہ تراک ءِ آسر ءَ گاڑی سرجم ءَ تباہ بوتگ ءُ گاڑی ءَ سواریں چاریں کارمند مرتگ اَنت-

گڈسر ءَ میجر گْوھرام بلوچ ءَ وتی درشان ءِ تہ ءَ گوشتگ کہ ایردستیں بلوچستان ءِ آجوئی ءَ تاں زورگیریں پوج ءِ سر ءَ مئے اُرش برجاہ مان انت –

بولان ءَ پاکستانی پوج ءِ سر ءَ اُرش کُت، اُرش پاکستانی پوج ءِ سَے کارمند کُشتگ ءُ تاوان بار کُتگ – جئیند بلوچ

سربوتگیں ھالانی رِد ءَ گوستگیں روچ ءَ ناشناسیں مردماں بولان ءِ دمگ پیر اسمائیل ءَ پاکستانی پوج تراک ناکیں شوروانی نشانگ جوڑ کُتگ، چریشی ءَ پاکستانی پوج ءَ جانی تاوان رس اتگ وھدیکہ کہ چار شمبے ءِ شپ ءَ شاھرگ ءَ پاکستانی پوج ءُ ناشناسیں سلاہ بندیں مردمانی میان ءَ جنگ ءُ چوپ بوتگ اُرش ءَ چہ پاکستانی پوج ءَ جانی ءُ مالی تاوان رس اتگ – سلاہ بندیں مردم جنگجاہ ءَ چہ درآیگ ءُ رؤگ ءَ سوبین بوتگ انت –

دومی نیمگ ءَ بلوچ لبریشن آرمی ءِ جاکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرشانی زمّہ واری منّ اِتگ ءُ گوشگ کہ مئے سرمچاراں پنچ شمبے ءِ روچ ءَ بولان ءِ دمگ پیراسمائیل ءَ زورگیریں پاکستانی پوج تراک ناکیں شوروانی نشانگ جوڑ کتگ –

جارکش ءَ گوشتگ کہ اولی اُرش دژمنیں پوج ءِ کاروان ءَ ھواریں کارمندانی سر ءَ کتگ کہ تراک ءِ آسرا یک کارمندے ھما جاہ ءَ مرتگ ءُ دگہ یکے ٹپی بوتگ –

آئی ءَ گوشتگ کہ اوّلی اُرش ءِ جاگہ ءَ کُمک ءَ آؤکیں پوج ءِ کارمند ھم بمب اُرشے ءِ نشانگ کتگ اَنت کہ چریشی ءَ چہ پاکستانی پوج ءِ بمب ڈسپوزل اسکواڈ ءِ دو کارمند مرتگ ءُ یکے ٹپی بوتگ-

جارکش ءَ گوشتگ کہ اے اُرشاں دژمنیں پوج ءِ نائیک امان اللہ، سپاھیگ مھمد طفیل ءُ سپاھیگ ابراھیم مرتگ اَنت-

جارکش جیئند بلوچ ءَ دیمتر ءَ گوَشتگ کہ چار شمبے ءِ شپ ءَ شاھرگ ءَ مئے سرمچار ءُ زورگیریں پاکستانی پوج ءِ میان ءَ میڑے بوتگ کہ چریشی ءَ چہ پاکستانی پوج ءَ جانی ءُ مالی تاوان رس اِتگ –

نبشتانک: شاھو ءِ بازار

نبشتہ کار: نعمان بلوچ

دی بلوچستان پوسٹ

بازارے است اَت کہ نام ءِ شاھو ءِ بازار ات شاھو ھمے میتگ ئے مستِر ءُ کماش ات۔ وھدے کہ روچ ءِ سُھریں برْانز میتگ ءِ سر ءَ کپت اَنت، گڑا ھر کس پاد اتک ءُ دیم پہ وتی لاپءِ گم ءُ روزگارُک ءَ تچان ات وھدے روچ وتی زردوکیں برانز اں گوں گار بوْان ات، گڈا پد ءَ درْست میتگءَ واتر بوْان انت اَنت لھتیں تچان ات، ءُ لھتیں گام جنان ات درست وتی لوگا واتر بواگا ات اں۔

ھمے میتگ ئے کِبلئی نیمگ ءَ کندیلے است ات مدام روک ات داں سباھ ھرکس وتا گوں مُشکول ات اناگہ یک شپءِ ھمے میتگءِ رودرتکی نیمگءَ آواز اتک۔ کسّے کوکار کناگا ات کہ شُما واب اِت؟ ماں شمارا نیلیت کہ شُما بوْپس ئے۔ درْستیں بازار گوں کوکاراں پاد اتک درست دلوارگ ءُ دلپٹ بوت انت۔

ھر شپ ھمے توار توانا ءُ توانگر بوہان بوت انت بلے پد ءَ مدام کہ روزِرد بوتگ ات ھرکس واتر اتک اں گڈاں کندیل ئے کِر ءُ کشءَ نِشت اں شپ روچ کُت وتی۔

اِشاں پہمیتگ ات کہ دیمے میتگ جاتوانی میتگ اِنت۔ ءُ اشاں چہ کندیل ءِ روژنائیءَ چہ تُرسیت داں کہ میتگ ئے کندیل ئے روژنائی است اِنت، شُمارا کس نہ کُش اِت ئِے ۔

پد ءَ کہ شپ بُوت گڑا چہ دُور ءَ جاتوانی آواز اتک ءُ پد ءَ درْست کندیل ئے کش ءَ نشت اں یک ءُ دومی یے چارگ لگْ ایت اَنت پد ءَ وھدے کہ سہب بُوت، درْست بیھیال بُوت اں چہ جاتوانی تُرس ءَ، کس ءَ ناکو شاھو ءَ گپ گوش نداشت۔

یک شپءِ جاتو آنی سردار ءَ کوکار دات کہ من شمارا دست نہ جنیں درْست چہ کندیل ئے بُن ءَ پادا ات ءُ بیائے وتی لوگاں بلے کس پاد نَیتک ءُ نہ شُت زانت اِش کہ جاتو آنی سردار مارا کُشگ لوٹیت مردم گیشتَر تُرس ئے آماچ بوت اں۔

پد ءَ درْست یک یک ءَ روزِرد وھدا واتر بوھگ ءَ اَت اَنت دِست اِت کہ کندیل ئے نزیکءَ یک بَلاھیں دُوت ءِ چِست بُوت مردم نزیکءَ اتک اں ءُ دِست ءِ کہ کندیل ءِ وٹ ھلاس بوھان اِنت وٹ وتی گُڈی سَپر ءِ نیمگ ءَ روان اَت مردُمانی تھا ھاموشی یے کپت۔ درْست چُرت ءُ وس وسءَ کپت اں کہ نو راہ درگیجگی انت۔ اے کندیل ناکو شاھو ءِ زمانگ ءَ پیسر روک کتگ بُوتگ نو وتی گڈی سپر ءِ نیمگ ءَ روگ ءَ ات ناکو شاھو ھم ملور ات۔

ابیدءِ کندیلءَ دِگہ مارا آکِبت نیست” یَکّےءَ گُشت درْست جیڑگءَ ات اَں کہ کندیل ئے وٹ ھلاس بوت ءُ تھاری گیش بوان بُوت جاتو کَندان ءُ کوکار کنان نزیک پیداک اِت اَنت۔

درستانی آکبت مَرگ انت نُو ما مِریں مئے جون ہمدا سڑیت مارا کل کنوک ھم نہ بیت یکّے ءَ چِڑکہّ کُت درْست ھمے گپ ءَ رند میتگ، کندیل ءُ ناکو شاھو یل کُت ءُ تتکاں دگہ میتگ ءُ کندیل ئے شوھازءَ کپت اں تھنا ناکو شاھو پَشت کَپت کہ نِزُور اَت ءُ جاتواں گِپت ءُ کُشت شاھو۔

پد ءَ آواز مردمانی پُشتءَ تچان اَت۔ لھتے مردم تچگءَ ات وتی رَکینگءِ ھاترا دِگہ بازار ئے شُوھاز ءَ بس جِند جاگہ اِنت آ سرکنگی اَت تھاری گیش بُوان تاں مردم گیشتر دمبران اِت اَنت اناگہ دمبُرتگیں لہتے مردم جاتواں گِپت کشت ءُ وارت انت پد ءَ اناگہ آواز گار بوھان تاں دگہ میتگ ءں کندیل ءِ روژنائی چماں کَپان اَت کندیل نزیک بوھگ ءَ اَت جِندے رکینگ ءِ سپر ھلاس بُوان اَت مردم کندیل ءِ نزیک اَتک اں گِنداں پیریں زال ءِ کندیل ءِ کش ءَ نِشتگ دگہ میتگ ءَ مردم نیست انت مردم ھمے کندیل ءِ کِر ءُ کش نِشت اَنت درْست لرزگءَ اَنت پیریں زال جُست گِپت کہ “شما چہ کجا پیداک اِت ءُ پرچہ لرزگا ات؟”

“ما شاھو بازارے مردماں مارا جاتو آن تاچینتگ۔ مئے میتگءِ مستِر جاتو آں کشتگ ءُ وارتگ اگاں تو مارا جاگہ مدے ئے ما ھم کُشگ ءُ ورگ باں” مردماں پسّہ دات۔

گڑا پیریں زالءَ بلاھیں ٹہکے دات ئے ءُ گُشت ئِے شُما لگور اِت بلے من داں زندگاں کندیل داں زندگیں شُما زندگ اِت پرچہ کہ من شاھو ءِ زھگاں آ پیریں زال کندیل ءَ پانگ اَت ھر وھد-

جاتوانی آواز نہ اَتک پد ءَ ھم کندیل ءِ بُن ءَ پیریں زال ءَ کِسہ جت۔ شاھو ئے دلیری یے کِسہ وتی میتگ ءِ مردمانی جنگ ءِ کسہ جاتوانی کِسہ اوں لگورانی کسہ پد ءَ کندیل ءِ وٹ ھلاس نہ بوت بلکیں کندیل گیشتر روژناہ بوت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

لَچّہ : بیا آجوئیں نودانی ھلک ءَ ما رو ایں

شائر : امجد بیکس

دی بلوچستان پوسٹ

گوں وتی رھشونیں دیدوکاں بیا
ما آجوئیں نودانی ھلک ءَ رو ایں
ھال ءُ اھوالے گِر ایں
باریں چے چے بوتگ اَنت؟
نوداں !
کرنانی تاک رِتکگ اَنت
سالانی دَرچک گیمُرتگ اَنت
ساھتانی ڈوڈ ھُشک بوتگ اَنت
مَکھیں ماتانی دل الکاپی ءَ سُتکگ اَنت
رنجانی شھرگ ءَ ناچ اِش کُتگ
زیدانی دلبند ءَ نہ کاہ ءُ بوٹگے
ھر نیمگ ءَ ویرانی اِنت
کھچرانی جت ءُ مُگیم دران ڈیھ بوتگ اَنت
آپ بند ءِ سر ءَ ھون ءِ کلاتے ژَمبتگ
دریا مُلور ءُ مونجان اِنت گوادر ءِ
واھگانی مولم نیل اَنت آرام ءَ دمے
اے چونیں نوبتے اَتکگ اڑے ڈیھ ءَ منی
آجوئی ءِ نوداں نہ گْوار اِت پرچی ءَ ؟
انگت ودار ءَ اِنت بلوچے پہ شُما
پرچا نہ گْوار اِت ، چمّروکیں بلوچستان ءَ مئے ؟
انگت کہ ما گْوں مُلوریں جامگ ءَ
دستے سر ءَ ءُ نشتگ ایں
پکرانی چات ءَ کپتگ ایں
سنچ ءِ کپوت کُوکُو کناں
رنجانی شانتُل پہ ھلاھوشی
بال اَنت زمستانیں شپاں
وسواس ءِ ھنکین ءَ گوٹ ءَ کن اَنت
جُستاں وت ءَ جُست ءَ کن اَنت
پرچا ھُدائی آجوئیں رھمت نہ گْوار اَنت ؟
مئے دیار ءَ انگت ءَ !
آجوئی ءِ نوداں
بیا اِت سھتُکے
شنز اِت مئے ڈیھ ءَ گُلیں
الکاپی ءَ ڈیھ ءِ ڈیل ءُ بالاد ءَ شود اِت سرجم ءَ
وھدیکہ گوار اِت مئے کوہ ءُ تلارانی شم ءَ
زید ءُ کھچراں آشوب ءِ ھون تچ ایت
آجوئی ءِ ما بیرک ءَ مِک کن اَیں
ھما
روچ ءَ گُلامی ءِ سانکل آجو بہ اَنت
سیاہ ءُ تھاریں شپے بیگواہ بیت
ڈیھ ءَ تمردیں چراگے روک بیت
سوبمندی ءِ استال شھم اَنت
ھر نیمگ ءَ
راج مئے تپاک ءُ یک بیت
راہ یک بیت
مُلک یک بیت
زبان یک بیت
بس بگوز ءِ ھنکین لنگار بیت
بیا آجوئیں نودانی ھلک ءَ ما رو ایں
ھال ءُ اھوالے گِر ایں

سر بیتگیں ھالانی رد ءَ روکپتی بلوچستان ءِ دمگ سرباز ءَ ناشناسیں مردماں یک گونڈوے آوار جتگ ءُ برتگ –

برگ بیتگیں زھگ ءِ نام ملک دینار بلیدھی ء منصور جھمنند کوھمیتگ سرباز ءِ نام ءَ زان بیتگ –

اھولکار ءِ رد ءَ ملک دینار ھما وھد ءَ برگ بیتگ کہ آ وتی لوگ ءِ گور ءَ دگہ گونڈوانی ھمراھی ءَ “لیب ” ءَ بیتگ کہ ناشناسیں سلاہ بندیں مردماں بیست ءُ سَے مارچ ءِ روچ ءَ چِست کرتگ ءُ برتگ –

چریشی ءَ پد دمگ ءَ آئی ءِ کھول ءَ ڈاہ ءُ وازری کرتگ ءُ پدی ءَ برتگیں مردماں پون کرتگ ءُ گوشتگ کہ شمئے گونڈو مئے گور ءَ اِنت –

کھول ءِ گوشگ اِنت سلاہ بندیں مردماں مارا پون کرتگ ءُ اے ھال داتگ کہ شمئے زھگ مئے گور ءَ اِنت مارا چار ملیار تُمن بہ دے ءِ وتی زھگ ءَ بہ بر اِت –

کھول ءِ گوشگ اِنت مارا ھچ کسے ءِ گون ءَ دگہ دشمنی نیست اِنت ءُ اے گرانیں ڈک مئے وس ءَ ڈن اِنت ءُ چار ملیار درنھاد ءِ مارا یک جنجالیں مُشکلے ءُ چریشی ءِ سوب ءَ باید زوراکیں دست مئے زھگ ءَ ھنچش مارا واتر بہ کن اَنت –

کھول ءِ گوشگ اِنت دمگ ءَ سروکیں مردم ءُ واکدار باید اے وئیل ءِ سر ءَ گامگیج بہ زور اَنت ءُ مئے زھگ ءَ مارا واتر بہ کنائین اَنت ءُ سلاہ بندیں مردمانی نھر ءُ بیھار ترند اَنت ءُ آ مئے زھگ ءَ دگہ تاوانے مہ دے اَنت –

دمگ ءِ ھالانی رد ءَ اے زھگ روکپتی بلوچستان ءَ دیم پہ رودراتکی بلوچستان ءِ سیمسراں گوازینگ بیتگ ءُ برگ بیتگ –

دمگ ءَ لس مردمانی گوشگ اِنت کہ اے ھلکاں بازیں کَچے ءَ سیکورٹی ءُ دگہ ادارھانی جاڑیگ بیگ ءَ ابید ھم روچ ء رھمانی چوشیں وئیل پیش آیگ ءَ اَنت ءُ اود ءَ نندوکیں مردم ھچ رنگ ءَ وتی زندگی ءِ وشیاں دیست کنگ ءَ نہ آں آیانی دل لاپ ءَ نہ اِنت کہ اے ساھت ناں آ ساھت کسے مئے ساھاں گپت –

دمگ ءَ لس مردمانی گوشگ اِنت کہ چوشیں جاھاں سرکاری مزن مزنیں ادارھانی ھستی مارا شُبینگ کنت کہ چوشیں وئیلاں مزنیں دست کُمک اَنت –