TBP Balochi

روکپتی بلوچستان ءِ دمگ چھبار ءَ گاڑی ءُ پرپٹے ءِ میان ءَ ٹکر وری ءَ سَے کس بیران بیتگ اَنت –

وئیل نوبندیان ءُ چھبار ءِ میان ءَ بیتگ کہ اود ءَ کسانیں بسے ءَ پرپٹے ءَ را ٹکر جتگ ءُ چریشی ءَ چہ پرپٹ ءَ سواریں سَے کس بیران بیتگ اَنت –

بیران بیتگیں مردمانی تہ ءَ یکے ءِ پجار کسان سالیں مھرزاد کلمتی ء فضل ءِ نام ءَ زانگ بیتگ ءُ ھر سئیں پرپٹ سوار ھما جاہ ءَ بیران بیتگ اَنت –

دمگی مردمانی گوشگ اِنت وین ءَ پرپٹ ءَ را پُشت ءَ ٹکر جتگ ءُ چریشی ءَ پرپٹ کپتگ ءُ ھما جاہ ءَ سئیں کس بیران بیتگ اَنت –

وئیل ءَ پد بیران بیتگیں مردمانی جون چِست کنگ ءُ نادراہ جاہ ءَ برگ بیتگ اَنت اود ءَ چار ءُ ٹپاس ءَ پد کھولانی ھوالگ ءَ کنگ بیتگ اَنت –

بلوچستان ءَ بندوکیں مردمانی گوشگ اِنت ھمک سال سدانی کَچ ءَ مھلوک ءِ دگ ءِ وئیلاں بیران ءُ زدگ بیگ ءَ اَنت –

پروش وارتگیں دشمنیں پوج ءَ دو دست ءُ گوشیں پُسگ بے دردی ءَ شھید کرتگ اَنت – بیبگر بلوچ

بلوچ ریپبلکن آرمی ءِ جارکش بیبگر بلوچ ءَ شنگ کرتگجں درشانی ءَ گوشتگ کہ زورگریں پوج ءَ بیست ءُ ھپت مئی ءَ پنجگور ءِ دمگ کیلکور ءَ جکی کور ءِ ھند ءَ گل ءِ یک چیریں اوتاکے ءِ سر ءَ پند ءَ بیڑ برتگ ءُ اشی ءِ ھواری بزی بالیگ ھم گون بیتگ اَنت ءُ آیاں اُرش کرتگ ءُ دشمنیں پوج ءِ اُرش جوانیِ رپکاں گوں بے سوب کرتگ ءُ پوج ءِ بازیں کارمندے کُشتگ ءُ زدگ کرتگ اَنت، اُرش ءَ پد دشمنیں پوج انگیر کرتگیں جاہ ءَ پشت کنز اِتگ –

جارکش ءَ گوشت: پروش وارتگیں پوج ءَ سرمچارانی دست ءَ لَٹ ورگ ءَ پد مادگ کور کیل ءَ وتی زوراکی برجاہ کرتگ اَنت ءُ سول آبادی ءَ ھستیں یک لوگے ءِ سر ءَ بیڑ برتگ ءُ جنگی بالیگاں تیرگواری کرتگ ءُ دو نیزگاریں شوانگ بولا ء مولا بکش ءُ عصاء مارو شھید کرتگ اَنت ءُ اود ءَ پندی پوج ءَ انگیر کرتگیں بازار ءِ سر ءَ وتی رستری برجاہ کرتگ اَنت ءُ زالبول ءُ چکانی سر ءَ بے کساس ءَ لَٹ ءُ کُٹ، ءُ چریشی ءَ پد بازیں زھگ ءُ زالبولے ٹپ ءُ ٹور بیتگ اَنت – جنگ آماچیں دمگ سی پیک ءَ ھواریں دمگ کہ اود ءَ ریاستی پوج بلوچ کُش منسوبھانی سوبمند کنگ ءِ واستا راجدپتر ءِ گرانتریں نسل کُشی ء دزبند اِنت کہ اود ءَ لھتے پارلیمنٹ پرستیں پاٹیانی مردم ھم اے زُلم ءَ ھوار اَنت کہ اشانی ھلاپ ءَ گل ترندتریں گامگیج ءِ زورگ ءَ ھچ رنگ ءَ چَک ءُ پد نہ بیت اِنت –

مئے اے وڑیں اُرش آجوئیں ڈیھ ءِ گڈی منزل ءَ برجاہ مان اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ بیست ءُ نُھ روچ سرجم بوتگ – مروچی سول سوسائیٹی مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھشت سال ءَ پیش زورانسری آوار جنگ ءُ بیگواہ بوتگیں سیف اللہ رودینی ءِ گھار فرزانہ رودینی ءَ بنجل ءَ اتکگ ءُ وتی زھرشانی نبشتہ کنائینتگ –

ھمے وھد ءَ وی بی ایم پی ءِ کمک سرکماش ماما قدیر بلوچ ءَ وتی ھیال درشان کُتگ ءُ گوشتگ کہ گوستگیں بیست سالاں پاکستانی پوج ءُ چیریں ادارھانی کارمند بلوچ پرزنداں آوار جنگ ءُ بیگواہ کنگ ءَ انت وتی چیریں زنداناں بندیگ کنگ ءُ درد ناکیں ازیتانی نشانگ جوڑ اش کنگ ءُ آھاں کشگ ءُ زانگولیں جوناں ویرانگاں دور دیگ ءَ انت یا سالاں سال آ بیگواہ کنگ بنت –

ماما قدیر ءِ گوشگ ات کہ پاکستانی پوج ءَ بلوچستان ءِ تہ ءَ زورکیانی سیمسر سرگوز کرتگ انت زانگولیں جون، یکجاھیں کبر، توتک ءَ شوھاز بوتگیں یکجاھیں کبرانی درآیگ ءَ پاکستان ءِ چَپیں دیم دنیا ءِ دیم ءَ پدر بوتگ، بلے اے وڑیں بازیں یکجاھیں کبر بلوچستان ءِ دگہ دمگاں ھم دراتکگ انت پنجگور، ڈیرہ بگٹی، ھزدار ءُ دگہ دماں یکجاھیں کبراں جون دست کپتگ اَنت –

ھمے وھد ءَ بیگواھیں سیف رودینی ءِ گوھار فرزانہ رودینی ءِ گوشگ ات کہ ھشت سال ءَ پد مروچی کمیشن ءِ گُشگ ءِ پد ءَ منی برات ءِ ارزی نبشتہ کنگ بوتگ، آئی ءِ گوشگ ات کہ منی برات لیویز کارمندے بوتگ ھشت سال ءَ پیش پوج ءَ ھما وھد ءَ آوار جتگ ءُ بیگواہ کتگ وھدیکہ وتی کار ءِ سر ءَ رؤگ ءَ بوتگ –

فرزانہ ءَ دیمتر ءَ گوشتگ کہ ما دردناکیں زند ءِ گوازینگ ءَ ایں، مئے والینوک بس ھما بوتگ ءُ منی پت وتی چُک ءِ راہ ءَ چاران چاران ھمے درد دل ءَ زرتگ ءُ بیران بوتگ –

آئی ءِ گوشگ ات کہ اگاں منی برات ءَ جُرمے کتگ گڑا آمیدگس ءَ آرگ بہ بیت بلے اے وڑ ءَ آئی ءَ بیگواہ کنگ ءُ مارا ازیت مہ دے اَنت ءُ ما زانیں کہ کجام دردانی گوم ءَ زند ءَ گوازینگ ءَ ایں –

ھرنائی ءَ زورگیریں پاکستانی پوج ءِ کینٹ ءِ سر ءَ اُرش کتگ ءُ جانی ءُ مالی تاوان داتگ – مزار بلوچ

سربوتگیں ھالانی رِد ءَ مروچی ناشناسیں سلاہ بندیں مردماں ھرنائی ءَ پاکستانی پوج ءِ پانگس ءِ سر ءَ اُرش کتگ، اُرش ءَ پاکستانی پوج ءَ جانی ءُ مالی تاوان رس اتگ- سلاہ بندیں مردم درایگ ءُ رؤگ ءَ سوبمند بوتگ انت –

دومی نیمگ ءَ بلوچ سلاہ بندیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں مروچی بیگاہ ءِ ادار شش ءَ ھرنائی ءَ زورگیریں پاکستانی آرمی ءِ کینٹ ءِ سر ءَ مزنیں سلاھاں گوں اُرش کتگ ، راکٹ لانچر ءِ دو گولہ زورگیریں آرمی ءِ کینٹ ءِ تہ ءَ کپتگ ءُ گوں تُرندیں توارے ءَ ترکِّتگ اَنت ءُ چریشی ءَ پد آرمی کینٹ ءِ تہ ءَ کُکار ءُ سلوات مَچ اِتگ اَنت – اُرش ءِ آسر ءَ زورگریں پوج ءَ جانی ءُ مالی تاوان رس اتگ –

جارکش ءَ وتی درشان ءِ گڈی ءَ گوشتگ کہ مئے اُرش بلوچستان ءِ آجوئی ءَ تاں برجاہ مان انت –

بلوچستان ءِ تیابدپی شھر گوادر ءَ بجلی ءِ ٹرانسفرمر ءِ ھرابی ءِ سبب ءَ مھلوک ءَ دگ بند کرتگ ءُ زھرشانی کرتگ –

گوادر ءَ سر بیتگیں ھالانی رد ءَ زھورشاہ وارڈ گوادر ءِ جھمننداں بجلیانی بندش ءِ سبب ءَ دگ بند کرتگ ءُ روگ ءُ آیگی مھلوک مھتل کرتگ اَنت –

زھرشانی کنوکانی گوشگ اِنت کہ گوستگیں پنچ روچاں زھورشاہ وارڈ گوادر ءَ ٹرانسفرمر ھراب اِنت ءُ بجلی ءِ واکدار ءُ سرکار ءِ گوشاں مورے ھم نہ وارت –

زھرشانی کنوکاں پورٹ ٹو سٹی ءِ مین روڈ میرین ڈرائیو بند کرتگ ءُ مھلوک ءِ رو ءُ آ بند کرتگ اَنت –

زھرشانی کنوکانی دُچار کپگ ءَ ایم پی اے گوادر میر ھمل کلمتی شتگ ءُ آئی ءَ زھرشانی کنوک سدکی داتگ اَنت ءُ گوشتگ کہ شپ ء ساھت یازدہ ءَ ٹرانسفرمر شر کنگ بیت ءُ بجلی دوبر پچ کنگ بنت –

زھرشانی کنوکاں ھمل کلمتی ءِ سدکی ءِ پژدر ءَ دگ بچ کرتگ ءُ وتی زھرشانی ھلاس کرتگ-

زانگ بہ بیت گوادر ءَ ھوار بجلی، آپ ءُ دگہ آسراتیانی سبب ءَ یکشل ءَ مھلوک زھرشانی کنگ ءَ گندگ بیگ ءَ اَنت –

گوستگیں روچاں گوادر ءَ ھواریں دمگ جیونی ءُ اورماڑہ ءَ ھم آپ ءِ نہ بوگ ءَ مھلوک ءَ زھرشانی کرتگ ءُ تن ءِ ھلاھوشی ءِ پروشگ ءَ سرکار ءِ گور ءَ آپ ءِ پُجارینگ ءِ لوٹ کرتگ اَت –

بلوچستان ءِ تیابدپی دمگاں ھوار بازیں ھند زند ءِ اژدری آسراتیاں زبھر اَنت ءُ مھلوک وتی زند ءِ ھمک روچی ءِ آسراتیانی واستا تلوسگ ءَ اَنت –

پنجگور ءَ یکیں ھپتگ ءِ تہ ءَ ھپت مردم کُشگ بیتگ اَنت ءُ اشانی ھواری ءَ پنجگور ءَ دُزی ءُ ڈنگی بازیں کساسے ءَ گندگ ءَ آیگ ءَ اَنت –

بلوچستان ءِ دمگ پنجگور ءَ سر بیتگیں ھالانی رد ءَ گوستگیں روچاں نیکراھی پاٹی جمیعت علما ء اسلام پنجگور ءِ رھشون مولانا عبدالحئی ءِ کوش ءِ پژدر ءَ مروچی شھری ایکشن کمیٹی ءِ دزبندی ءَ ھرتال کنگ بیتگ –

ھرتال ءَ شھر ءِ دکان ءُ باپاری بنجلانی ھواری ءَ دگہ ادارہ بند ءُ دگانی سر ءَ رو آ کساس کمے ءَ گندگ ءَ اَتکگ اَنت –

زانگ بہ بیت لھتے روچ ءَ پیسر ءَ پنجگور ءِ دمگ سوردو ءَ ناشناسیں سلاہ بندیں مردماں تیرگواری کرتگ ءُ جمعت علما ء اسلام پنجگور ءِ نائب امیر مولانا عبدالحئی کُشتگ-

عبدالحئی ءِ کوش ءِ پژدر ءَ گوستگیں روچ ءَ پسنی ءَ ھم نیکراھی مردمانی نیمگ ءَ زھر ءِ درشان بیتگ ءُ آیاں گوشتگ کہ سرکار بہ گوش ایت کہ مولانا عبدالحئی ءِ کُشندہ کَے اَنت ءُ چریشی ءَ پیسر ھم بازیں نیکراھی مردم کُشگ بیتگ اَنت –

پنجگور ءَ بیتگیں ھرتال ءِ پلامرزی تاجر برادری ءَ ھم کُرتگ ءُ وتی دکان بند کرتگ اَنت ءُ تاجر برادری ءِ گوشگ اِنت کہ اے ھرتال مئے مھلوک ءِ پھریزگ ءَ اِنت –

ھمے وڑ ءَ دومی نیمگ ءَ پنجگور ءَ پوجی لشکر کشی ءِ میان ءَ ھم دو مردم کُشگ بیتگ اَنت –

دمگی ھالانی تہ ءَ گوشگ بیتگ کہ گوستگیں سَے روچاں پوجی لشکت کشی برجاہ اِنت ءُ چار مردم پوجی لشکر کشی ءِ میان ءَ بیگواہ کنگ ءُ دو مردم کُشگ بیتگ اَنت –

ھالانی رد ءَ میر شاھو بازار، بکشی بازار ءُ شیخ ھارون بازار پوج ءَ انگیر کرتگ ءُ اود ءَ زالبول ءُ چُک ھم لَٹ ءُ کُٹانی نشانگ کنگ بیتگ اَنت ءُ پوج ءَ یک نوکیں چوکی ءِ ھم جوڑ کرتگ –

لشکر کشی ءِ میان ءَ آوار جنگ بیتگیں مردمانی پجار رھمت ء اھمد، موسیٰ ء مھمد، ھاسل ھان ء اھمد، عیسٰی ءُ بکشی ء دیدار ءِ نام ءَ زانگ بیتگ اَنت –

گوستگیں روچ ءَ ھمے دمگ ءَ پوج ءِ لشکر کشی ءِ میان ءَ پوج ءَ دو مردم بولا ء مولا بکش ےأ عصاء مارو تیر باران کرتگ ءُ کُشتگ اَنت –

پوج ءِ نیمگ ءَ تنی وھدی اے ھالانی بارہ ءَ دگہ ھچ گپ دیم ءَ نیتکگ اَنت ءُ دمگی مردمانی نیمگ ءَ گیشیں مردمانی بیگواھی ءِ گمان ءَ کنگ ءَ اَنت –

سر بیتگیں ھالانی رد ءَ روکپتی بلوچستان ءِ دمگ پشین ءَ سلاہ بندیں مردمانی تیرگواری ءَ یک شھری ءِ بیران بیتگ –

بیران بیتگیں شھری ءِ پجار ھمود رند بلوچ ءِ نام ءَ زانگ بیتگ ءُ ھمود ءِ سر ءَ سلاہ بندیں مردماں تیرگواری کرتگ ءُ کُشتگ –

ھالانی تہ ءَ گوشگ بیگ اِنت کہ ھمود گوست ءَ روکپتی بلوچستان ءِ دمگ راسک ءِ نندوک بیتگ کہ اود ءَ وت ما وتی جیڑھانی سر ءَ لڈ اِتگ ءُ پشین ءَ اتکگ بیتگ –

روکپتی بلوچستان ءَ لس مھلوک ءِ گوشگ اِنت کہ ایران ءِ چیریں ادارھانی نیمگ ءَ لس مھلوک ءِ سلاہ بند کنگ ءَ دمگانی سر ءَ کُشت ءُ کوش گیش بیتگ اَنت –

گوستگیں دو ماھانی تہ ءَ تنی وھدی چِل ءُ نُھ کس روکپتی بلوچستان ءَ تیرانی آماچ کنگ ءُ کُشگ بیتگ اَنت –

چاگی بلوچستان ءِ دلبند ءِ نام ءَ زانگ بیت اے نام بلوچانی تہ ءَ ھواریں گلاں نامینتگ، اے نام گیشتر ھما وھد ءَ زانگی ءَ دیم ءَ اتکگ کہ نوزدہ سد ءُ نود ءُ ھشت ءَ پاکستان ءِ سرکار ءَ وتی زھرناکیں بمب بزاں “ایٹمی بمب ” ءِ چکاس کرتگ –

اے چکاس ھما وھد ءَ کنگ بیتگ کہ پاکستان ءِ جمھوری سرکار میاں مھمد نواز شریف بیتگ چرے سرکارانی سوڑگ ءَ پد پاکستان ءِ سائنسدان ڈاکٹر عبدالقدیر ءِ جوڑ کرتگیں زھرناکیں تراک چکاس کنگ ءِ واستا بلوچستان ءِ دمگ چاگی ءَ راسکوہ گچین کنگ بیتگ –

یک ھالے ءَ اے گوشگ بیتگ کہ بلوچستان ءَ بازیں سیاسی گل اے کار ءَ جُست کنگ نہ بیتگ اَنت ءُ بلوچستان ءِ سر ءَ بمب تراکینگ بیتگ، اے ھال ءِ تہ ءَ چِنکس راستی ھست چنکس پدراھی ھست بلے بلوچستان ءِ جتائی ءِ واستا جوڑ بیتگیں سیاسی گلانی بھتام اِنت بلوچستان ءِ سر ءَ زھرناکیں بمب تراک ءَ سرکار ءَ ھواریں پارلیمنٹ ءِ واکداری ءَ ھوار بیتگ اَنت –

بلوچستان ءِ سر ءَ چکاس بیتگیں بمب تراک ءَ چی اسر کپتگ کجام ھساب ءَ اے اسراں دمگ ءَ تاوان بیتگ، اود ءَ نندوکیں مردمانی ھواری ءَ بازیں ساھدار ءُ دگہ نوک رُستگیاں بازیں کساسے ءَ تاوان باری بیتگ اَنت –

اے روچ ءَ بلوچستان ءَ ھما روچ ءَ بہ گر داں روچ ءِ مروچی ءَ بلوچ سیاسی گلانی نیمگ ءَ سیاھیں روچے ءِ بستار ءَ دارگ بیتگ ءُ انگت ءَ اے روچ پہ بلوچ سیاسی گلانی نیمگ ءَ گرانیں روچ ءِ دارگ بیت اِنت –

ھمود ءَ بلوچ اے روچ ءَ سیاھیں روچ سرپد ھمود ءَ اے روچ ءَ پاکستان وتی واستا پھر ءُ شان سرپد بیت اِنت ءُ پاکستان ءَ اے روچ ءَ بزانکہ “یوک ء تکبیر ” ءِ نام ءَ زانگ بیت اِنت –

ھمے درگت ءَ بلوچ امریکی کانگریس ءِ سروک تارا چند ءَ وتی یک بیانے ءَ گوشتگ کہ اے تراک ھما زمینانی سر ءَ ھنچش تاوان اِنت کہ اود ءَ تباھی کنت –

آئی ءَ گوشتگ کہ اے تراک بلوچانی زمین ءِ سر ءَ کنگ بیتگ ءُ ھمے تراک ءَ بلوچانی زندگی ءِ ھواری ءَ گواچن ھم پُل اِتگ اَنت –

بلوچستان ءَ ھواریں سیاسی گل ھم اے روچ ءَ وتی زھر ءِ درشان ءَ چاگردی رسانکجاھاں کنگ ءَ اَنت بلوچستان ءِ آجوئی ءِ واستا جد ءُ جھد کنوکیں سیاسی گل بلوچ نیشنل مومنٹ ءِ سروک چئیرمین ھلیل بلوچ ءَ چاگردی رسانکجاہ ٹوئٹر ءَ گوشتگ کہ اے روچ بلوچانی واستا سیاھیں روچے ءِ بستار ءَ زانگ بیت اِنت –

آئی ءَ گوشتگ کہ دنیا باید پاکستان ءَ اے جست ءَ بہ کنت پرچا آئی ءَ بلوچانی زمین ءِ سر ءَ چوشیں بمبانی چکاس کرتگ ءُ اود ءَ ھرچ شَئے بلوچاں پچگرگ بیتگ اَنت –

ھمے وڑ ءَ بی ایس او آزاد ءِ سیکٹری جنرل مھرزاد ءَ ٹوئٹر ءَ ٹوئٹے ءَ گوشتگ کہ ھما روچ ءَ چاگی ءِ سر ءَ تراک بیتگ ھما روچ ءَ بہ گر روچ ءِ مروچی ءَ بلوچانی سر ءَ کینسر، پوسٹ ءِ نادراھیانی ھواری ءَ بازیں نادرھیانی دیمپان اَنت –

ھمے درگت ءَ بلوچ نیشنل مومنٹ ءِ ڈپٹی سیکریٹری جنرل بابل لتیپ ءَ ھم ٹوئٹر ءَ راسکو ءِ چیھانٹ ءِ اکس شنگ کرتگ ءُ گوشتگ کہ بیست ءُ ھشت مئی پہ بلوچ راج ءُ سرڈگار ءَ سیاھیں روچے ءِ بستار ءَ زانگ بیت اِنت ءُ اے روچ ءِ سان روچ ءِ مروچی ءَ بلوچ زمین ءَ ھست اَنت –

ھمک بیست ءُ ھشت مئی ءِ وڑ ءَ اے بیست ءُ ھشت مئی ءَ ھم چاگردی رسانکجاھاں بلوچانی نیمگ ءَ ھیش ٹیک #NukeAfterMathlnBalochistan کامرد بیتگ –

اے روچ ءَ بلوچانی ھک ءُ ھساب کجام وڑ ءَ کنگ بیتگ اَنت چون اے دمگانی نادراھیانی سر ءَ گامگیج زورگ بیتگ کجام ھساب ءَ بلوچانی سر ءَ کپتگیں ڈُکالاں جیڑگ بیتگ اے آسراتانی واستا مزنیں گامگیج تنی وھدی گندگ نہ بیتگ اَنت –

عبدؤئی ءَ پاکستانی پوج ءِ پانگس ءِ سر ءَ دورجنگیں توپک ءِ سر ءَ اُرش کتگ یک کارمندے کُشتگ – جئیند بلوچ

دی بلوچستان پوسٹ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں تمپ ءِ دمگ عبدوئی ءِ کوھاں برجاھیں پاکستانی پوج ءِ پانگس ءِ سر ءَ اُرش کتگ، اُرش ءَ پاکستانی پوج ءَ جانی تاوان رس اتگ – سلاہ بندیں مردم درآیگ ءُ رؤگ ءَ سوبمند بوتگ انت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں پنچ شمبے ءِ روچ ءَ تمپ ءِ دمگ عبدوئی ءَ برجاھیں زورگیریں پاکستانی پوج ءِ پانگس ءِ سر ءَ دور جنگیں توپک ءِ گون ءَ اُرش کُتگ – جارکش ءَ گوشتگ کہ دور جنگیں اُرش ءَ پاکستانی پوج ءِ یک کارمندے نشانگ کتگ ءُ کُشتگ –

گڈسر ءَ جارکش جئیند بلوچ ءَ وتی درشان ءِ تہ ءَ گوشتگ کہ بی ایل اے کول ءَ کنت کہ سرڈگارے آجوئی ءَ تاں زورگیریں پوج ءِ سر ءَ مئے اُرش برجاہ مان انت –

مروچی ھزارانی کچ ءَ مات بے بچ انت، گھارانی برات، چکانی پت، زالبولانی لوگی پچ گرگ بوتگ انت ءُ ھر لوگ ءِ تہ ءَ پُرس پتر پچ انت – ماما قدیر بلوچ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ بیست ءُ ھشت روچ سرجم بوتگ – پشین ءَ چہ محمد یوسف عبدالسلام ھوار دگہ پگرانی منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءَ اتکگیں مردمانی میان ءَ باوست کنان ءَ گوشتگ کہ گلامی ءِ ازیت دے آں دردانی مارگ ءَ گلامی ءِ زمزیلاں بندوکیں مردماں ھما تاکتانی بگیری ءَ یک ھنچیں پُرایمنیں جھدے بندات کرتگ کہ مرگ ءُ دیمونی دیگ ءَ رکگ ءُ وتی پجار ءِ وشھالی ءِ مان زمان اَنت-

ماما قدیر بلوچ ءَ دیمتر ءَ گوشتگ کہ شھیدانی دیمونی ءَ بلوچ راجی رکینگ ءِ جھد ءَ ءُ بلوچ راج ءَ ھنچیں پجار ءِ داتگ کہ چریشی ءَ سرجمیں دنیا ءَ بلوچ ءِ باوست بوگ انت – بیگواھیں مردمانی کھولاں وتی دوستیگیں مردمانی یل کنائینگ ءِ ھاتر ءَ وتی وشھالیں زندمان ھوار کھول ءِ تباھی دیستگ ءُ بازیں دیمونی ءِ داتگ، ھزارانی کچ ءَ بلوچ بیگواہ انت کہ پاکستانی زنداناں ازیت سگگ انت، مروچی ھزارانی کچ ءَ مات بے بچ انت، گھارانی برات، چکانی پت، زالبولانی لوگواجہ پچ گرگ بوتگ انت، ءُ ھر لوگ ءِ تہ ءَ پُرس پتر پچ انت – نواب اکبر ھان بگٹی بگر کس بکشگ نہ بوتگ –

ماما قدیر ءِ گوشگ ات کہ ھزارانی کچ ءَ مردماں وتی لوگ جاہ یل کرتگ ءُ در پہ دری زند گوازینگ ءَ لاچار انت، بلوچستان ءِ تہ ءَ ھمک روچ لشکر کشیانی تہ ءَ گیشی آرگ بوگ اِنت اے وھدی بلوچاں یکجاہ بوگ المی انت، وھدے لوٹ ھم ھمیش انت کہ اے وھد ءَ بلوچ راج بیگواھیں مردمانی یل کنائینگ ءِ ھاتر ءَ یک رِد ءَ یکجاہ بہ بنت ءُ بیگواھیں مردمانی یل کنائینگ ءِ ھاتر ءَ برجاھیں زھرشانی ءَ یک زرمبشت ءِ دروشم ءَ دیم ءَ بیار انت –