TBP Balochi

سربوتگیں ھالانی رِد ءَ بلوچستان ءِ دمگ شال ءُ مستونگ ءَ دگ ءِ وئیل ءَ دو ورنا بیران بوتگ ءُ شال ءَ دستی بمب ترکگ ءَ سَے زھگ بیران بوتگ اَنت، دکی ءَ اشکرانی کاریز وئیل ءَ یک مردمے بیران بوتگ وھدیکہ ڈھاڈر ءَ تیرگواری ءِ وئیلے ءَ یک مردمے بیران ءُ یکے ٹپی بوتگ –

گیشیں ھالانی رِد ءَ بلوچستان ءِ دمگ مستونگ ءَ دگ ءِ وئیلے ءَ دوازدہ سالی ئیں گونڈل ءِ بیران بوتگ – وئیل گردگاپ ءَ ریلوے پاٹک فیلڑر ءَ کار گاڑی ءِ ڈیکر کنگ ءَ دیم ءَ اتکگ چریشی ءَ صابر ندیم ء سپاھی مرحوم شھباز خان بیران بوتگ – دمگی لیویز پورس ءَ ھما دمان ءَ وت ءَ وئیل جاہ ءَ سرکتگ گاڑی ڈرائیور دزگیر کتگ ءُ گاڑی دستیگ کتگ –

ھمے وڑ بلوچستان ءِ بنجاھی شھر شال ءَ پرپٹ ءِ ڈیکر کنگ ءَ کسانسالیں چاردہ سالی ورنایے بیران بوتگ – پولیس ءِ رِد ءَ وئیل کیچی بیگ ءَ کمبرانی دگ ءِ سر ءَ دیم ءَ اتکگ کہ پرپٹ ءِ ڈیکر کنگ ءَ چاردہ سالی ئیں ورناہ جواد ء رضا محمد بیران بوتگ –
پولیس ءَ گونڈل ءِ جون دست گپتگ ءُ نادراھجاہ ءَ سر کتگ اود ءَ اژدری چار ٹپاس ءَ پد جون کھول ءِ ھوالگ ءَ داتگ –

دگہ وئیلے بلوچستان ءِ بنجاھی شھر شال ءَ دستی بمب تراکے ءَ سَے زھگ بیران بوتگ اَنت –

وئیل شال ءِ دمگ خروٹ آباد ءَ دیم ءَ اتکگ، اھوالکارانی رِد ءَ زھگاں بمب لیبوک ءِ پھمتگ ءُ گوں آئی ءَ لیب ءَ بوتگ انت کہ بمب ترکیتگ چریشی ءَ ھر سئیں زھگ بیران بوتگ انت –

ایدھی ایمبولینس ءِ کمک ءَ گونڈلانی جون بی ایم سی نادراھجاہ ءَ سرکنگ بوتگ اَنت – اود ءَ اژدری چار ءُ ٹپاس ءَ پد لاش کھول ءِ ھوالگ ءَ کنگ بیتگ اَنت –

ڈھاڈر ءَ ناشناسیں مردمانی تیرگواری ءَ یک مردمے بیران یک ٹپی بوتگ –

ھالانی رِد ءَ تیرگواری ءِ وئیل ڈھاڈر ءَ علی بازار ءَ دیم ءَ اتکگ کہ اود ءَ ناشناسیں سلاہ بندیں مردماں ھوٹل ءِ تہ ءَ پُترتگ ءُ تیرگواری کتگ، تیرگواری ءَ محمد عمر عبداللہ بیران بوتگ ءُ آئی ءِ پت عبداللہ ءِ محمد عمر ٹپی بوتگ –

پولیس ءِ رِد ءَ تیرگواری ءَ محمد عمر سک باز ٹپی بوتگ کہ پولیس ءَ آ ڈھاڈر سول ھسپتال ءَ سرکتگ ٹپانی درمان کنگ ءَ پد شال ءَ برگ ءَ بوتگ انت کہ نیم راھ ءَ ٹپانی درد نہ سگتگ ءُ بیران بوتگ –

ھمے گوشگ بوگ ءَ انت وئیل پیشی زاتی جیڑہ ئِے سر ءَ ودی بوتگ پولیس اے درگت ءَ گیشیں پٹ ءُ پول بنا کتگ انت –

دومی نیمگ ءَ بلوچستان ءِ دمگ دکی ءَ اشکرانی کاریز ءَ ھاک ءِ کپگے سوب ءَ کاریز کارے بیران بوتگ-

کاریز کار ءِ پجار قدرت اللہ ء نعمت جھمنند افغانستان ءِ نام ءَ چہ بوتگ – ھسپتال ءِ ھالکار ءِ گوشگ انت کہ مرد ءِ جون چہ کاریز ءَ درکنگ بوتگ ءُ اژدری چار ءُ ٹپاس ءَ پد وتی بنکی ھنکین ءَ دیم دیگ بوتگ –

دگہ وئیل ءِ بلوچستان ءِ دمگ بارکھان ءَ دیم ءَ اتکگ کہ ٹپو ءَ اناگتی آس ءِ لگگ ءِ سوب ءَ ھپتاد دلوت مرتگ اَنت –
وئیل گوستگیں شپ ءَ بارکھان ءِ دمگ بغاؤ ءَ دیم ءَ اتکگ کہ کُڈو ءَ اناگتی آس ءِ لگگ ءِ سوب ءَ مالدار ءَ ھپتاد دلوت ستکگ ءُ مرتگ چریشی ءَ مالدار ءَ لکھانی ھساب ءَ مالی تاوان رس اتگ –

بلوچ نودر گل آزاد ءِ بیگواھیں رھشون زاکر مجید بلوچ ءِ بیگواھی ءَ دوازدہ سال سرجم بیگ ءَ بلوچستان ءَ انسانی ھکانی واستا کار کنوکیں گل ہومین رائٹس کونسل آف بلوچستان ءَ ھشت جون ءَ شال ءَ بیوکیں زھرشانی روانک ءِ پلامرزی ءُ کرتگ ءُ آئی ءِ بھر زورگ ءِ جار جتگ –

بلوچ ہیومین رائٹس کونسل آف بلوچستان ءِ انفارمیشن سیکریٹری عبداللہ اباس ءَ شنگ کرتگیں تامر بندے ءَ گوشتگ کہ ھشت جون ءَ زاکر مجید ءِ مات ءُ وی بی ایم پی ءِ نیمگ ءَ بیوکیں زھرشانی ءِ پلامرزی ءَ کنت ءُ روانک ءَ بھر زور ایت –

آئی ءَ تامر بند ءَ گوشتگ کہ شال ءَ بیوکیں زھرشانی دراھیں مھلوک بھر زور ایت ءُ بیگواھیں زاکر مجید ءِ مات ءِ توار ءَ ھمتوار بہ بنت –

زانک بہ بیت زاکر مجید بلوچ اسٹوڈنٹس آرگنائزیشن آزاد ءِ وائس چیئرمین بیتگ ءُ سال دوھزار ءُ نُھ ءَ مستونگ پڑینگ آباد ءَ چیریں ادارھانی کارمنداں آوار جتگ ءُ بیگواہ کرتگ –

ھشت جون ءَ آئی ءِ بیگواھی ءَ دوازدہ سال سرجم بیت اِنت اے درگت ءَ آئی ءِ مات ءَ ھشت جون ءَ شال ءِ پریس کلب ءِ دیم ءَ زھرشانی ءُ روانک کش ءِ جار جتگ –

آئی ءِ مات ءَ گوشتگ کہ اے دوازدھیں سال چون گوستگ اَنت اے ھما مات ءَ سرپدی بیت کہ آئی ءِ لاڈیں بچ گار ءُ بیگواہ اِنت –

آئی ءَ گوشتگ کہ ما وتی زھگانی لوٹ ءَ سرکار ءَ کنگ ءَ ایں دگہ ھچ چوشیں چیز مارا درکار نہ اِنت بس وتی سالونکیِ بچ درکار اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ سی ءُ چار روچ سرجم بوتگ – چی سبی ءَ راجداری ءُ چاگردی باسک عبدالکریم بلوچ، ممتاز احمد آبڑو ءُ دگہ مردماں بنجل ءِ ترءُ تاب کتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ ھر روچ ءُ ھر ماہ پہ ایردستیں راج ءَ یک وڑ انت، مدامی جونانی دست کپگ، لوگ ءِ چراگ ءِ مِرگ ءُ زورانسری آوار جنگ نوں ھمک روچی کارے جوڑ بوتگ – ریاستی ڈیتھ اسکواڈ ءِ جنگ ءُ کُشگ برجاہ انت کہ آئی ءِ تہ ءَ استمان ءِ سامراجیت ءِ ساھگ ءِ چیرا زوراکی ءُ لٹ ءُ کٹ کنگ ءَ پد بازیں وھدے لٹ ءُ پُلی ءُ ھونین ئیں لیب ءِ پٹ جوڑ بوتگیں بلوچستان ءُ آئی ءِ زوراک آماچیں نندوک زورگیریں پاکستان ءُ آئی ءِ داشتگیں زوراکیں تاکتانی رھم ءُ کرم بازیں گیر انسانی رویشءُ نوکیں سازشانی شکار انت –

ماما قدیر بلوچ ءِ گوشگ ات کہ زوراکیانی آماچ بوتگینانی دیمونی سامراجیت ءَ نیست ءُ نابود کن انت – اے جاورھاں کہ اود ءَ بلوچ جان ءُ مال ءُ ننگ ءُ ناموس پھازگ نبیت، ھمک روچ شوھاز بیتگیں زانگولیں جون ءُ بلوچ مات ءُ گھارانی ننگ ءُ ناموس ءِ پھازگ ءِ ھچ سر ءُ کار پشت نہ کپتگ آھاں بس لٹ ءُ پُل ءُ راج دژمنی بدل ءَ وش آرامیں زندے پکار انت –

آئی ءَ دیمتر ءَ گوشتگ کہ مروچیں ایردستیں بلوچستان ءِ تہ ءَ انسانی ھکانی لگتمالی یکشل ءَ برجاہ انت آئی ءِ دارگ ءِ ھاتر ءَ راجانی ھک ءُ استمانی ایمنی زامن اقوام متھدہ ءَ ھوار میان استمانی چاگرد گامگیج زورگ ءَ بے تھمبل انت پرچاکہ اقوام متحدہ زورگیریں ریاستاں زوراماچ ءُ ایردستیں راجانی سر ءَ بؤکیں زوراکیانی دارگ ءَ مدامی بے سوب بوتگ ءُ ھمے سوب ءَ اقوام متھدہ ءِ رھبند ءُ انسانی ھکانی دنیاوی رھبند ءُ انسانی ھکانی درگت ءَ ایندگے اعلامیہ بس کاگدی جوڑ بوتگ انت-

بلوچستان ءِ دمگ بولان ءَ ناشناسیں سلاہ بندیں مردماں پاکستانی پوج ءِ بنجل ءِ سر ءَ ٹوھیں اُرشے کُتگ اُرش ءَ پاکستانی پوج ءَ جانی ءُ مالی تاوان رس اتگ – پاکستانی پوج ءِ سیکورٹی افیسر ءِ رد ءَ اے پانگس ءَ ھما وھد ءَ اُرش کنگ بوتگ اود ءَ بیست ءُ پنج پوجی کارمند ساڑی بوتگ اَنت کہ آھاں بازیں اداراں گوں سلاہ بنداں جنگ کتگ ءُ پانگس ءِ کماندار نائب صوبیدار اعجاز علی ءَ ھوار دہ پوجی کارمند تیرانی زد ءَ اتکگ ءُ کُشگ بیتگ انت ءُ ھپت ٹپی بوتگ اَنت وھدیکہ شش ءَ وت ءَ پھاز اتگ –

واکدار ءِ رِد ءَ بلوچستان ءِ بنجاھی شھر شال ءِ دمگ بولان ءَ دو شمبے ءِ شپ ءَ فرنٹیر کور ءِ سر ءَ بوتگیں اُرش ءَ دہ پوجی کارمند بیران، بلوچستان ءِ وزیر داخلہ ضیا لانگو ءَ دہ کارمندانی مرگ ءِ ھال راست کُتگ ءُ گوشتگ کہ اے اُرش ءَ ھپت دگہ کارمند ٹپی بوتگ اَنت کہ ھسپتال ءَ سر کنگ بوتگ انت –

اے اُرش دو شمبے ءِ شپ ءَ شال ءِ رودراتک ءَ ھپتاد کلومیٹر ءَ دور مارواڑ ءِ نزیک ءَ پیر اسمائیل زیارت ءَ فرنٹیر کور ءِ غازہ بند سکاؤٹس 129 ونگ ءِ اویس پانگس ءِ سر ءَ کنگ بوتگ –

اے اُرش ءِ درگت ءَ پوج ءِ افیسر ءَ رسانکدر ءَ تران کنان ءَ گوشتگ بیست ءَ گیش سلاہ بندیں مردماں پانگس چاریں نیمگاں وتی انگیر ءَ کتگ – آھاں سی تیری ءُ دور جنگیں ءُ دگہ کسانیں سلاھانی گون ءَ پانگس ءِ سر ءَ بے کساس ءَ تیرگواری کتگ – تیر گواری ءِ تہ ءَ پانگس ءِ کماندار نائب سوبیدار اعجاز علی ھوار دہ کارمند جنگ بیتگ اَنت ءُ ھپت ٹپی بوتگ اَنت –

آئی ایس پی آر ءِ رِد ءَ دوشمبے شپ ءَ بوتگیں اُرش ءَ چار کارمند مُرتگ ءُ آئی ءَ گمان کتگ ءُ گوشتگ کہ اے میڑ ءَ چار یا پنچ اُرشکار ھم جنگ بوتگ ءُ وھدیکہ ھپت یا ھشت ٹپی بوتگ اَنت –

لس ھالکار ءِ رِد ءَ مارواڑ ارش ءَ سلاہ بندیں مردماں پوجی پانگس گپتگ ءُ پوسٹ ءَ ساڑی ئیں بیست ءُ پنچیں کارمند تیرانی آماچ کتگ ءُ کشتگ انت – سلاہ بندیں مردمانی سے ھمراہ بیران بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی جارکش جئیند بلوچ ءَ وتی شنگ کرتگیں درشان ءِ تہ ءَ بیست ءُ پنچ کارمندانی کوش ءُ پانگس ءِ گرگ ءِ زمّہ واری منّ اِتگ –

بلوچ لبریشن آرمیءِ جارکش جئیند بلوچ ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں سی ءُ یک مئی ءَ دو شمبے ءِ روچ ءَ بولان ءِ دمگ مارواڑ ءَ زورگیریں پاکستانی پوج ءِ غازہ بند سکاؤٹس 129 ءِ اویس پانگس ءِ سر ءَ اُرش کتگ سَے ادار ءِ میڑ ءَ پد سرجمیں پانگس گپتگ بلوچ سرمچاراں اے اُرش ءَ دژمن پوج ءِ بنجاھی پانگس ءَ ساڑی ئیں بیست ءُ چار کارمند ھما ٹیم ءَ کُشتگ انت وھدیکہ یک کارمندے لانس نائک بلال جھمنند ڈیرہ اسمائیل خان دزگیر کتگ، پد ءَ رند ءَ بلوچ راجی آمیدگس ءَ مرگ ءِ سزا داتگ ءُ کشتگ –

جارکش ءِ رِد ءَ بلوچ سرمچاراں جوانیں شوربندی ءِ رِد ءَ دژمن ءِ اے ارزشت داریں بنجل جتائیں نیمگاں انگر کنگ ءَ پد دشمن ءِ نیمگ ءَ جتگیں ٹَٹ بُرّ اتگ اَنت ءُ ترندین میڑ ءَ پد سرمچار پانگس ءِ تہ ءَ پُترتگ اَنت- سَے ادارانی ٹوھیں میڑ ءَ پد بی ایل اے ءِ سرمچاراں گوں سوبمندی ءَ دژمنیں پوج ءِ پانگس اش دستیگ کتگ ءُ مزنیں کساسے ءَ دژمن ءِ سلاہ، گولہ ءُ مواداں ھوار دژمن ءِ مڈیانی دستیگ کنگ ءَ سوبمند بوتگ اَنت- اُرش ءَ پانگس ءَ ساڑی ئیں کارندھاں چہ بیست ءُ چار ھمود ءَ کُشتگ ءُ یک کارندھے زندگی ءَ دزگیر کتگ کہ پد ءَ رند ءَ بلوچ سرڈگار ءِ سر ءَ اُرش ءِ میارباریانی پُژدر ءَ مرگ ءِ سزا داتگ – سربَتگیں دژمن مدامی ئیں وڑ ءَ پہ دروگ وتی مرتگیں کارندھانی کچ ءُ وتی ٹوھیں پروش ورگ ءَ چیر دیگ ءِ جھد ءَ کنت-

جئیند بلوچ ءَ گوشتگ کہ زانگ بہ بیت کہ یک جون ءَ گل ءِ نیمگ ءَ چہ ھمے اُرش ءِ کسانیں درشانے ءَ زمہ واری زورگ بوتگ اَت کہ آئی ءِ تہ ءَ دژمنیں پوج ءِ کارندھانی کچ دوازدہ گوشگ بوتگ اَت کہ آ اُرش ءِ بنداتی سرپدی بوتگ اَنت وھدیکہ مرتگیں کارندھانی درسی کچ بیست ءُ پنچ اِنت- اے اُرش ءَ دژمن ءِ گون ءَ میڑ ءَ بلوچ لبریشن آرمی ءِ سَے تمردیں سرمچار گوں جوانی ءَ جنگ دیان ءَ شھید بوتگ اَنت- شھید بوتگیں دلیریں سنگتاں ھنگل مری پنام ء لیلا، آفتاب جتک پنام ء وشین ءُ شاویز زھری پنام ء سارنگ ھوار اَنت- شھید بوتگیں سنگت گوں فوجی داد ءُ ستاہ ءَ بولان ءِ ھاک ءَ سرڈگار ءِ میار کنگ بوتگ اَنت-

جارکش ءَ دیمتر ءَ گوشتگ کہ ھر سئیں سنگت بلوچ لبریشن آرمی ءِ دیمی سنگرانی باسک بوتگ اَنت کہ بلوچ لبریشن آرمی ءَ دوھزار ءُ ھژدہ ءَ وتی دیمی سنگر شھید سرمچار فتح کمبرانی ءِ جنگولی ءُ دلیری ءِ بودناکیانی دِرچ ءَ ھمائی ءِ نام ءَ چہ “فتح اسکواڈ” ایر کتگ – شھید فتح کمبرانی پنام ء چیئرمین ءَ ستمبر دوھزار ءُ ھژدہ ءَ شاھرگ ءِ دمگ میشداری ءِ ھند ءَ زورگیریں پاکستانی پوج ءِ پانگس ءِ تک ءَ پُترتگ ءُ پانگس ءِ دستیگ کنگ سوبمند کنائینتگ – ایشی ءَ ابید فتح کمبرانی ءَ بازیں ٹوھیں جنگاں جوانیں کرد پیلو کتگ – فتح اسکواڈ ءَ گل ءِ ھما گچینتگیں ءُ دلیریں سنگت ھوار کنگ بنت کہ آھاں ھاوند ءَ جنگی بودناکی داتگ ءُ آ ھاسیں ھیلکاری ھم دیگ بوتگ اَنت کہ آ دیم پہ دیمی جنگ ءَ سرمچارانی سروکی کت کن اَنت ءُ دژمن پوج ءِ توک ءَ لکیریں پروشت ءُ توک ءَ پُترت بہ کن اَنت- مارواڑ اُرش ءَ سئیں جنگولیں سرمچار ھنگل مری، آپتاب جتک ءُ شاویز زھری ءَ وتی جانانی پرواہ نہ داشتگ ءُ بدواہ ءِ پھازداریں دیوال گوں دلیری ءَ پروشتگ ءُ سرمچارانی ٹولی پانگس ءِ توک ءَ پُترینگ ءِ ھاتر ءَ راھے پچ کتگ چریشی ءَ چہ بدواہ ءِ اے ارزشت داریں بنجل سرمچاراں دستیگ کتگ ءُ دراھیں کارندھانی کشگ ءَ سوبمند بوتگ اَنت-

جارکش ءِ رد ءَ کاھان ءِ جھمنندیں شھید ھنگل مری پنام ء لیلا دوھزار ءُشش ءَ چہ گل ءَ بندوک بوتگ – شھید ھنگل مری گوستگیں پانزدہ سالاں چہ دلیری ءُ زمہ واری ءِ گون ءَ کاھان ءُ بولان ءِ دمگاں وتی پرز ءَ پیلو کنگ ءَ بوتگ- ھنگل مری ءَ وتی دلیری ءُ جنگی بودناکیانی دِرچ ءَ پانزدھیں سالاں بازیں رنداں بدواہ پروش داتگ ءُ گل ءِ بازیں جنگی سوبمندیاں آئی ءَ جوانیں کردے پیلو کتگ-

بی ایل اے ءِ فتح اسکواڈ ءِ جنگولیں سنگت شھید آفتاب یوسپ جتگ پنام ء وشین ءِ سیادی چہ زھری ءَ اِنت- شھید آفتاب جتک دوھزار ءُ نوزدہ ءَ گل ءَ ھوار بوتگ آ زرداری ءِ تک ءَ ٹوھیں وانندیے بوتگ بلے آئی ءَ راجی پرز ءِ سنچ داشتگ ءُ جنگی پڑ ءَ گوں ھوار بوگ جوانتر پھم اِتگ ءُ گل ءِ پتر ءَ زمہ واریاں پیلو کنگ ءَ بوتگ- آئی ءِ جنگی بودناکی ءُ زانتکاری ءِ سوب ءَ آ بی ایل اے ءِ ایلیٹ یونٹ فتح اسکواڈ ءَ ھوار کنگ بوتگ کہ اود ءَ آ بازیں اُرشاں دیم ءَ بوتگ ءُ سرمچارانی سوبمندی ءُ پھریزگ ءِ مانزمان بوتگ-

شھید شاویز مری پنام ء سارنگ جھمنند زھری دوھزار ھبدہ ءَ بی ایل اے ءَ ھوار بوتگ- آئی ءَ سَے سالاں جتائیں شھری جنگاں وتی پرز پیلو کتگ ءُ گل ءِ بازیں جوانیں شوربندی گوں سوبمندی ءَ سرجم کتگ اَنت- شھید شاویز زھری یک مکلس، ایماندار ءُ دلیریں سنگتے بوتگ – آئی ءَ گل ءِ سوڑگ ءِ دِرچ ءَ بولان ءِ دمگاں وتی پرز پیلو کتگ اَنت کہ اود ءَ وتی واھگ ءِ پد ءَ فتح اسکواڈ ءَ ھوار بوتگ ءُ بازیں جنگاں دژمن ءَ پروش دیگ ءِ واستا وتی جوانیں کرد پیلو کتگ اَنت-

جارکش ءَ گوشتگ کہ شھیداں گلامی نہ منّ اِتگ ءُ یک آجوئیں انسانی ءِ زندمان ءِ پہ وت درچِتگ، دلیری ءِ گون ءَ آھاں آجوئیں انسانے ءِ دروشم ءَ زند گوازینتگ ءُ آجوئیں انسانے ءِ دروشم ءَ جتا بوتگ اَنت آھاں بی ایل اے راجی زُرمبشت ءُ سرجمیں راج ءِ واستا منزل ءِ کِشک گون وتی رِتکگیں ھوناں گیش رُژناہ کتگ ءُ گیشینتگ – بی ایل اے شھید ھنگل مری، شھید آفتاب جتک ءُ شھید شاویز زھری ءَ سھریں دروت ندر کنت ءُ اے گپ ءَ گیشین اِیت کہ ما شھیداں کدی بے ھیال بوگ ءَ نیل اِیں ءُ آھانی بیر ءَ بلوچستان ءِ آجوئی ءِ دروشم ءَ گِریں –
جیئند بلوچ ءَ گوشتگ کہ بی ایل اے زورگیریں پاکستانی پوج ءُ آئی ءِ میارباریاں ھواریں دژمناں پہ اے گپ ءَ تچک کنت کہ آ بلوچ سرڈگار ءِ سر ءَ وتی زورگیری ءُ لُٹ ءُ پُل ءَ داشت نہ کن اَنت بلوچ سرمچارانی اُرشاں اے گپ گیشینتگ کہ آ کجام ھم جاگہ ءَ اُرش کنگ ءِ ھاٹیگ ءُ بودناکی دار اَنت ءُ آھاں ٹوھیں دابے ءَ پروش دات کن اَنت-

بلوچستان ءِ تیابدپی شھر گوادر ءَ بے آپی ءِ سبب ءَ مھلوک ءَ دگ بند کرتگ ءُ زھرشانی بندات کرتگ –

گیشیں ھالانی رد ءَ گوادر ءَ ملا کریم بکش میتگ ءَ آپ ءِ نہ بوگ ءَ مھلوک دگانی سر ءَ سر کپتگ ءُ دگ اش بند کرتگ ءُ رؤ آ کنوکیں گاڑی اش مھتل کرتگ اَنت –

زھرشانی کنوکاں دگ ءِ سر ءَ ٹائر مانداشتگ ءُ ھردوکیں نیمگاں گوادر پورٹ ءِ دگ بند کرتگ ءُ چریشی ءَ پورٹ ءَ رؤکیں گاڑی اوشت ءِ آماچ بیتگ اَنت –

زھرشانی ءَ زالبولاں گوشتگ کہ مئے گور ءَ ترمپ ءِ آپ پہ ورگ ءَ نیست بلے ھاکماں اے گرم ءُ لیوار ءَ مئے سر ءَ ھم بزگ نہ کنت کہ آیاں مارا اے تھ آپی ءَ لوگانی تہ ءَ بند کرتگ –

آیاں گوشتگ کہ ما لاچار بیتگ ءُ دگانی سر ءَ سر کپتگ اِنت ءُ مئے آپ ءِ جیڑہ ھلاس کنگ بہ بیت –

زانگ بہ بیت گوستگیں روچاں گوادر ءَ بجلیانی بندش ءِ سبب ءَ دگ بند کنگ بیتگ ءُ چریشی ءِ پشدر ءَ جماعت اسلامی ءِ رھشون سعید اھمد دزگیر کنگ بیتگ –

سعید اھمد ءِ دزگیری ءَ مھلوک ءَ زھرشانی کرتگ ءُ لھتے اداراں پد سعید اھمد یل کنگ بیتگ اَت –

گوادر ءَ ھوار گوادر ءِ دگہ دمگ جیونی، اورماڑہ ءَ ھم تَھ آپی ءِ سبب ءَ مھلوک ءَ زھرشانی کرتگ اَنت –

اے وھد ءَ بلوچستان ءِ تَھ آپی ءِ جاھاں گوادر گیشتر آپ ءِ تنگی ءِ دیمپان اِنت ءُ سرکاری واکدار ھچ رنگ ءَ گوادر ءَ ھوار آئی ءِ ھواریں دمگانی آپ ءِ جیڑہ ءِ سر ءَ ھچ گامگیج زورگ ءَ گندگ بیگ ءَ نہ اَنت-

زھرشانی ءَ ھواریں زھرشانی کنوکے ءَ ٹی بی پی ءَ گوں گوشتگ کہ گوادر ءِ نام ءَ ھزارانی گپ بیگ ءَ اِنت کہ گوادر دیمروی ءِ گامان اِنت بلے تنی وھدی گوادر ءِ جھمنندیں مھلوک ترمپ ءِ آپ ءَ تنیگ اَنت –

آئی ءَ گوشتگ کہ گوادر ءَ نا آپ ھست نانکہ بجلی اد ءَ دَہ دَہ ادار ءَ گیش بجلیانی بندش اِنت ءُ مھلوک اے لھڑ ءَ آزاب کشگ ءَ اِنت ءُ دومی نیمگ ءَ آپ ھم نیست اِنت –

آئی ءِ گوشگ اِنت سرکار ھما رنگ گوں گوادر ءِ مھلوک ءَ کنگ ءَ اِنت کہ اد ءِ مھلوک تنیگیں لُنٹاں بہ لڈ ایت ءُ بروت –

آئی ءِ گوشگ اِنت اگاں ھاکماں وتی اے ترندی داشت گڑا گوادر ءَ دگہ کس “دیمروی ءَ اتک نہ کنت گوادر ءِ ھاکمانی اے بدیں جور زوت ھلاس کنگ بنت” –

بلوچستان ءِ بنجاھی شھر شال ءَ سِی ءُ یک مئی ءَ ناشناسیں مردمانی دست ءَ دزگیر کنگ ءَ پد بیگواہ بیتگیں ٹکری بھادری علی کھیازئی ءِ کھول ءِ نیمگ ءَ گوستگیں سَے روچاں شال ءِ دمگ بروری دگ ءَ روکپتی شھدگ ءَ نندانک برجاہ اِنت –

گوستگیں سَے روچاں نندانکاں ابید ھم ٹکری بھادر علی کھیازئی دیم ءَ آرگ نہ بیتگ ءُ نندانک ءَ ھواریں کھول ءِ گوشگ اِنت سرکاری واکداراں نندانک ءِ ھلاس کنگ ءِ واستا بیھار داتگ –

بھادر علی کھیازئی ءِ لوگ بانک ءِ گوشگ اِنت کہ چم دیتگیں مردماں مارا ھال داتگ ءُ گوشتگ کہ بھادر علی کھیازئی سیکورٹی ادارھاں آوار جتگ ءُ برتگ –

آیانی گوشگ اِنت سرکاری واکداراں گوشتگ کہ شما نندانک ءَ ھلاس بہ کن اِت اگاں ناں شم لَٹ ءُ کُٹانی زور ءَ پاد کنگ بئے –

زھرشانی نندانک ءَ بازیں سیاسی پاٹی ءُ چاگردی مھلوک ءَ ھمدردی ءِ واستا تر ءُ تاب کرتگ ءُ سرکار ءَ بھادر علیزئی ءِ یل کنگ ءِ لوٹ کرتگ –

بلوچ نودربر رھشون ڈاکٹر مھرنگ بلوچ ھم زھرشانی نندانک ءَ اتکگ ءُ آئی ءَ گوشتگ کہ بلوچ مھلوک ءِ واستا ھچ کس نیست کہ چوشیں ھزارانی کھول ھست اَنت کہ آیانی لاڈُکیں زھگ چمانی دیم ءَ گرگ ءُ گار کنگ بنت بلے آ ترس ءَ وتی ھچ گپ کش ایت نہ اَنت –

آئی ءَ چاگردی رسانکجاھاں کار کنوکیں انسانی ھکانی گل ءُ دگہ ادارھانی سر ءَ ایراد گپتگ ءُ گوشتگ کہ اے آیاں سما اِنت کہ سَے روچاں اد ءَ لس زالبول ءُ زھگ دگ ءِ سر ءَ نشتگ ءُ زھرشانی کنگ ءَ اَنت –

ھمے وڑ ءَ زھرشانی نندانک ءَ بیگواھیں ڈاکٹر دین مھمد ءِ جنک سمی دین ءَ ھم اتکگ ءُ بیگواھیں ٹکری علیزئی ءِ کھول ءَ گوں پدردی درشان کرتگ –

سمی دین ءَ گوشتگ کہ رسانکدراں اے شرمی ءِ بیت آ روچ ء مروچی بلوچانی توار بیگ ءَ وت ءَ پشت ءَ دارگ ءَ اَنت –

سمی دین ءَ گوشتگ کہ پاکستان ءِ سر وزیر عمران خان ءَ گوں مئے دُچاری بیتگ کہ آئی ءَ مسام کرتگ کہ بلوچستان ءَ زورانسری آوار جنی دارگ بنت ءُ گپتگیں مردم درست یل کنگ بنت –

سمی دین ءِ گوشگ اَت کہ بلوچستان ءَ زورانسری آوار جنی روچ پہ روچ گیش بیان اَنت بلے عمران ءِ مسام وتی جاہ ءَ بلے ھچ بیگ ءَ نہ اِنت بس اد ءَ بلوچ گرگ ءُ گار کنگ بیگ ءَ اَنت –

آئی ءَ گوشتگ کہ اد ءَ نشتگیں زھگاں مردم ءِ چم کپ ایت دل ترک ایت اِنت کہ اے زھگ کجام گرم ءَ اوپار کنگ ءَ اَنت –

آئی ءِ گوشگ اَت کہ سرکار ءَ انگت ءَ وھد ھست کہ آ بلوچانی توار ءَ سرپد بہ بیت چوش مہ بیت اے توار یک بیمانکیں توارے ءَ چِست بہ بیت سرکار ءَ پد ءَ تاوان بہ بیت-

ھمے رنگ ءَ وائس فار بلوچ مسنگ پرسنز ءِ چیئرمین بسر اللہ بلوچ ءَ گوشتگ کہ شال ءِ دمگ بروردی دگ ءَ ٹکری بھادر علی کھیازئی ءِ کھول ءُ دگہ سیاد یک جون ءَ نشتگ اَنت ءُ سرکار ءَ لوٹ ایت کہ آ اے زالبولانی گپ ءَ گوش بہ داریت ءُ ڈیھی کانودانی رد ءَ انساب بہ دنت –

اے کجام سز ءَ اِنت اے دراجیں وھدے ءَ پد ھم منی برات انگت ءَ یل کنگ نہ بیتگ؟ اے کجام سز ءَ مارا دیگ بیگ ءَ اِنت کجام کانود اِنت یک نودربرے ءَ دراجیں مدتے ءَ بیگواہ کنگ؟ اے بیگواھیں شبیر بلوچ ءِ گوھار سیما بلوچ ءِ گپ اِت اَنت –

چار اکتوبر دو ھزار ءُ شانزدہ ءَ بلوچستان ءِ دمگ کیچ ءِ ھند گورکوپ ءَ پاکستانی پوج ءِ دست ءَ آوار جنگ بیتگیں شبیر بلوچ ءِ گوھار سیما بلوچ ءَ چاگردی رسانکجاہ ٹوئٹر ءَ شنگ کرتگیں یک تامر بندے ءَ گوشتگ کہ اے کجام سز ءَ اِنت من ءُ منی کھول ءَ دیگ ء بیگ ءَ اِنت اے پنچ سال ءِ گوزگ ءَ پد ھم منی برات گار ءُ بیگواہ اِنت –

آئی ءَ گوشتگ کہ شال، کراچی، اسلام آباد دراھیں منسٹر، کورٹ، جج، وکیل ءُ دگہ پھناتاں بندوکیں انسان دوستانی گور ءَ وتی برات ءِ یل کنگ ءَ در ٹُک اِتگ اَنت بلے ھرکس بس ودار دیگ ءَ ابید دگہ ھچ –

بہ وان اِت شبیر بلوچ ءِ یل کنگ ءِ واستا اسلام آباد ءَ زھرشانی ءَ

https://www.tbpbalochi.com/2021/02/64603/

آئی ءَ گوشت کہ سمی، مھلب، زاکر مجید ءِ مات ءُ دگہ بیگواھیں مردمانی کھول بازیں وھداں وتی مردمانی راہ ءَ چارگ ءَ اَنت بلے تنی وھدی آیانی مردم یل کنگ نہ بیتگ اَنت –

آئی ءَ وتی تامر بند ءَ ھشت جون ءَ شال ءَ بی ایس او ءِ رھشون زاکر مجید ءِ بیگواھی ءَ دوازدہ سال سرجم بیگ ءَ بیوکیں زھرشانی روانک ءَ بھر زورگ ءِ دزبندی کرتگ؛ –

آئی ءَ گوشتگ کہ دراھیں انسانی ھکانی گل، انسان دوست، سیاسی گل اے زھرشانی روانک ءَ بھر بہ زور اَنت ءُ بیگواھیں مردمانی کھولانی ھمتوار بہ بنت ءُ بیگواھیں مردماں شوھاز بہ کن اَنت –

زانگ بہ بیت زاکر مجید ءِ مات ءِ دزبندی ءَ زاکر مجید ءِ بیگواھی ءَ دوازدہ سال سرجم بیگ ءَ شال ءِ پریس کلب ءَ زھرشانی روانک کشگ بیگ ءَ اِنت –

سربوتگیں ھالانی رِد ءَ بلوچستان ءِ دمگ مستونگ ءَ دگ ءِ وئیل ءَ ھشت مردم ٹپی بوتگ اَنت ، وھدیکہ اوستہ محمد ءَ تیرگواری ءِ وئیلے ءَ زالبول ءِ بیران بیتگ –

گیشیں ھالانی رِد ءَ مستونگ ءَ مساپر کشیں وین ءُ پیک اپ گاڑی ءَ ڈیک وارتگ، ڈیک ورگ ءِ سبب ءَ چکاں ھوار ھشت مردم ٹپی بوتگ اَنت –

وئیل مستونگ ءَ النور ہوٹل ءِ نزیک ءَ دیم ءَ اتکگ، ڈیک ورگ ءِ سبب ءَ معراج خان، جنید احمد، طارق، اختر محمد، پسند خان، مدثر ءُ مھران ٹپی بوتگ انت –

ٹپی بوتگیں مردم ھما دمان ءَ غوث بخش نادراھجاہ ءَ سر کنگ بوتگ انت –

دومی نیمگ ءَ بلوچستان ءِ دمگ اوستہ محمد ءَ یک مردم ءَ وتی نشار تیرباران کتگ ءُ کُشتگ –
ھالانی رِد ءَ کیٹل فارم تانہ ءِ نزیک ءَ گوت جلال خان کپرانی ءَ صاحب نامیں مردمے ءَ وتی نشار آمنہ بی بی وتاس ءِ گون ءَ تیرباران کتگ ءُ کُشتگ ءُ تتکگ –
وئیل ءِ ھال سر بوگ ءَ دمگی پولیس ءَ وت ءَ وئیل جاہ ءَ سر کتگ اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ ھمے گوشگ بوگ انت وئیل زاتی جیڑہ ءِ سر ءَ ودی بوتگ – اے درگت ءَ پولیس گیش پٹ ءُ پول کنگ ءَاننت –

بلوچستان ءِ بنجاھی شھر شال ءَ بیگواھیں مردمانی ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ سَے سد ءُ سِی ءُ سَے روچ سرجم بیتگ – ھزارہ ایکشن کمیٹی ءِ چیئرمین لیاقت ھزارہ، شیعہ عالم دین اکبر حسین زاھری ءُ چہ کلات ءَ چاگردی باسک بشیر اھمد ءَ اتکگ ءُ بنجل ءِ تر ءُ تاب کرتگ ءُ بیگواھیں مردمانی کھولانی گون ءَ پدردی درشان اِتگ –

وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ گپ کنان ءَ گوشت کہ بلوچ راج دنیا ءِ دومی راجانی وڑ ءَ انسانی نسل ءَ گوں بندوک اِنت ءُ ھما رھبند کہ دنیا ءِ دراھیں تکاں ھست اَنت آ رھبند منگ بیتگ اَنت – آیاں انسانیت گوش اَنت بلوچ راج ءَ ھروھد ءَ انسانیت ءِ پھزداری کرتگ ءُ انگت ءَ کنگ ءَ اِنت بلے دنیا ءِ لھتے زوراک ھیالی وتپرستیں مھلوک ءَ ھروھد ءَ بلوچ، سندھی، پشتون ءُ ھزارہ راج انسانیت ءُ وتی راجی ھکانی واستا چیر ترینگ ءِ جھد ءَ کنگ ءَ اَنت -چُشکہ زوراک ءَ اد ءَ وتی مکسد ءِ واستا دراھیں انسانیت ءِ ھک ءُ رھبند پامال کرتگ اَنت –

آئی ءَ گوشت کہ اے پامالیاں ھما راجانی انسانیت ءِ تک ءَ رسم ءُ رواج ءِ پامالی، دین ءُ دودانی پامالی، مال ءُ دولت ءِ لُٹ ءُ پُل، ننگ ءُ ناموس ءِ پامالی ءُ ھما دراھیں ھک کہ انساناں بنکی ءَ زلورت اَنت درست پامالیاں ھوار اَنت –

ماما قدیر بلوچ ءَ گوشت کہ اگاں کسے ءِ لس چیزے گار بہ بیت آ چبکس پریشان بیت، مروچی مئے بلوچ، سندھی، پشتون، ھزارہ راج ءِ پت ءُ برات، مات ءُ گوھار بازیں سالاں بیگواہ اَنت – ھچ زانگ نہ بیت کجا اَنت ءُ چتور اَنت، وھدیکہ ناگتی ءَ شوانگے جنگل ءَ یا رھگوزی ءِ دگ ءِ کش ءَ گند ایت کہ آ ھڈانی دروشم ءَ گندگ ءَ کیت اِنت -آ وت گپ نہ کنت بلے مارا وتی زبان ءَ دومی بیگواھیں بلوچانی بارو ءَ ھچ گوشت نہ کنت البت آئی ءِ بدن ءِ ٹپ وت گوشگ ءَ اَنت کہ آئی ءَ اود ءَ چونیں زند گوازینتگ – مروچی مئے بیگواھیں ءُ زانگول کرتگیں جون گیش بیگ ءَ اَنت مروچی مارا ھم سدکی اِنت کہ دنیا ءِ کجام نا کجام جاہ ءَ انسانیت ءِ ھدمت گزار نندوک اَنت ءُ آ درد ھم دار اَنت –

انسانانانی واستا ما دنیا ءِ انساناں گوں دزبندی کنیں کہ آ مئے انسانی ھکانی سرجمی ءَ توار ءَ ھمتوار بہ کن اَنت ءُ مئے توار ءَ برز بہ کن اَنت انسانیت ءِ نام ءَ جوڑ بیتگیں گلاں گوں مارا دلرنجی اِنت پرچاکہ آ مئے سر ءَ بیتگیں جاورانی نیمگ ءَ چارگ ءَ نہ اَنت –

سر بیتگیں ھالانی رد ءَ بلوچستان ءِ دمگ پنجگور کیلکور ءَ مروچی ھپتمی روچ ءَ پوجی لشکر کشی برجاہ ءُ دمگ ءَ دامگی ھالانی گرگ مزنیں جنجالانی دیمپان اَنت –

دمگی مردماں ٹی بی پی ءَ گوں گپ کنان ءَ گوشتگ کہ مروچی ھپت روچ اِنت دمگ ءَ پاکستانی پوج مانرتکگ ءُ لشکر کشی کنگ ءَ اِنت –

آیانی گوشگ اِنت کہ دمگ ءِ مھلوک پوج ءَ لوگانی تہ ءَ بند کرتگ ءُ ھچ جاہ ءَ روگ ءَ نیلگ ءَ اِنت ءُ چریشی ءِ سبب ءَ دمگ ءَ کسان کسانیں زھگاں ھوار مھلوک پہ وردنی ءَ مزنیں جنجالانی دیمپان اَنت –

لشکر کشی کیلکور ءِ دمگ مادگ بیگ ءَ اِنت کہ اود ءَ پوج ءَ جکی ءَ بھار ءُ دو شمبے ءِ لوگ ھپت روچ اِنت پوج ءِ انگیر ءَ اَنت اود ءَ لس زھگ شُد ءِ دیمپانی آماچ بیان اَنت –

دمگی مردمانی گوشگ اِنت اگاں پوجی لشکر کشی گیش برجاہ بیت گڑا اود ءَ بازیں زھگے پہ شُد زورال بیت کُت کنت –

زانگ بہ بیت گوستگیں روچاں ھمے دمگ ءَ پوجی لشکر کشی ءِ میان ءَ پوج ءِ تیرگواری ءَ دو مردم بیران بیتگ اَنت ءُ ھردوکیں مردمانی جون پنجگور ءَ برگ بیتگ اَنت –