TBP Balochi

بلوچستان ءِ تیابدپی دمگ گوادر ءَ بلوچستان ھک دو زرمبشت ءَ مروچی بیست ءُ چار روچ سرجم بوتگ کراچی ءَ چہ راجدوستیں رھشون یوسف خان مستی ءَ زرمبشت ءَ بھر زرتگ-

بلوچ ءِ زِر ءَ گیرکانودی ٹرالینگ، سیمسراں کار ءُ بار ءِ بندش، زورانسری آوار جنگ بوتگیں مردمانی یل کنائینگ ءُ دگہ بنکی لوٹانی ھاتر ءَ مزنیں کچے ءَ مھلوک یکجاہ بوتگ انت –

زرمبشت ءَ تران کنان ءَ یوسف خان مستی ءَ زرمبشت ءِ سروک ہدایت الرحمن ھُسین وڈیلہ ءُ زرمبشت ءَ ھواریں درسیں مردمانی منت گپتگ گوشتگ کہ شما دراہ اے زرمبشت ءِ باسک ات شمار ءَ شاباش انت شما وتی جزبگ ءَ ھمے وڑ بہ دار اِت من ءَ ستک اِنت کہ پاکستان ءِ سرکار، ادارہ ءُ لشکر وت کائینت شمئے پاداں کپ انت – بلوچستان ءِ گوستانک باز دردناکیں گوستانک ءِ اے سرڈگار ءِ سر ءَ شما کہ اد ءَ نشتگ ئے اے میر ھمل ءُ میر کمبر سرڈگار انت ءُ شما ھماھانی زھگ اِت –

آئی ءَ گوشتگ ھر ھما وھد ءَ کہ بلوچستان ءِ سر ءَ مسیبتے اتکگ ڈنی تاکت پرتگیز انگریز بہ بنت یا پاکستان ءِ لشکر بہ بیت کہ کبزہ کتگ نشتگ آئی ءِ دیم مدامی شمئے وڑیں گریب ءُ بزگراں داشتگ – اے سردار میر وڈیرہ ھمک وھد ءَ پہ کرسی ءِ ھاتر ءَ کمپرومائیز کن انت ھکان پہ کرسی ءِ ھاتر ءَ یل کن انت- آئی ءَ گوشتگ کہ ھما مرد ءِ گور ءَ کہ من راجکاری دربرتگ آ میر غوث بخش بزنجو بوتگ –

آئی ءَ تران کنان ءَ دیمتر ءَ گوشتگ کہ بلوچستان ءَ نوزدہ سدو چِل ءُ شش ءَ چہ بلوچ ءِ کشت ءُ کوش، گار ءُ بیگواہ کنگے درچ ءِ بندات انت نوزدہ سد ءُ چِل ھپت ءَ جبری الحاق گون ءَ بلوچستان ءَ کتگ – بلوچستان ءِ پارلمنٹ ءَ میر غوث بخش بزنجو ءِ سروکی ءَ پاکستان ءِ گوم ءَ ھوار بوگ ءَ انکار کُت – بلے پاکستانی سرکار ءَ وتی لشکر دیم دات ءُ آ پہ جبری الحاق ءَ لاچار کُت ءُ پد ءَ مئے سرڈگار کہ آزاتیں سرڈگارے ات ھلاس کُت ون یونٹ کُت – نوزدہ سد ءُ پنجاہ ءُ ھپت ءَ خان قلات ءَ جرگہ لوٹارینت گُشت کہ شما مئے گون ءَ ھما معاھدہ کُتگ آ معاھدہ شما پروشتگ نوں مار ءَ نوں ھک ھست وت وتی راہ گچین بکنیں – گڑا خان قلات ءِ سر ءَ اُرش بیت آئی ءَ دزگیر کن انت ءُ بازینے جنگ بیت ءُ نواب نوروز خان کوہ ءَ شُت – نواب ءِ کوہ ءِ رؤگ ءَ پد اشاں منت کُت کُران سوگند وارت آئی ءَ لوٹارینت ءُ پد ءَ زندانی ءِ کُت آئی ءِ شش چُک برازتک گوھارزتک پاھو دیگ بیت اَنت ءُ نود سال ءِ اُمر ءَ آئی ءِ جند ھیدرآباد جیل ءَ بیران بوت- آئی ءَ پیش نوزدہ سد ءُ چِل ءُ ھپت ءَ آغا عبدالکریم ءَ جنگ کُت کوہ ءَ در کپت کہ ما اے جبری الحاق ءَ نہ منّ ایں آئی ءِ گوم ءَ ھم کول کرار کُت آئی ھم گپت دہ سال ءَ زنداناں کُت – سند ءِ جی ایم سید ءِ گوم ءَ ھم ھمے وڑ کنگ بوت –

آئی ءَ دیمتر ءَ گُشت کہ پاکستانی ریاست زالم ءُ زوراکیں ریاستے آ ھمے پھمیت کہ بلوچ ءَ گلام داریت گڑا بلوچ ءَ اے ھک ھست اِنت کہ پہ وتی آزاتی ءَ بہ روت – مروچی مئے زھگ کہ کوہ انت، جنگ بوگ ءَ انت چِل ھزار مردم گار ءُ بیگواہ انت اے ملک ءِ تہ ءَ مئے مات ءُ گوھارانی کم شرپی بوگ ءِ انت انگت گُشاں کہ گوں پاکستان ءَ وپا بہ کنت کم چہ کم من چشیں ریاست ءَ گوں وپا کُرت نہ کناں –

آئی ءَ گُشت کہ مار ءَ گشاں شما گدارے ما اشاں گُوشگ لوٹاں ھو ما اے ریاست ءِ گداراں پرچا کہ اے ریاست منی راج ءِ گدار انت منی وتن ءِ گدار انت – آ اے سرپد نہ بنت کہ وتن ءُ ریاست ءِ تہ ءَ دیگری ءِ ھست-

آئی ءِ گوشگ ات کہ ریاست ءِ پاکستان اگاں بلوچ ءَ گلام ءِ پھمیت گڑا مار ءَ گلامی کبول نہ انت بلوچ راج ءَ را ءِ ایجنٹ پھمیت گڑا شما ھم امریکہ ءِ ایجنٹ اِت – بلوچ گوں شما آقا انگریز ءَ ھم جنگ کتگ، ما سر جھل کنوک نہ ایں جنگ کنوکیں مار ءَ لاچار کن ئے ما چد ءُ گیشتر جنگ کنیں –

آئی ءِ گوشگ ات کہ بلوچستان منی سرڈگار انت شما مارا جست کنے کجا پیداکے کجا رؤگ ءَ ئے اگاں منی زمین ءَ زبان پر بوتگیں شمارا چہ جست گپتگ ات کہ شما بہ گوش ات کجیگ اِت ؟

آئی ءَ گوشت کہ میر سردار پروش دیگی انت اے سرڈگار ءِ ھکیں وارس راج انت – ریاست ءِ پاکستان ءَ مئے درورد ءُ دھکان کاراں گوں ھچ واستا نیست سندھ ءِ دریا ورد بلوچستان ءِ ھک دو زرمبشت ءَ گوں ھمکوپگ انت – اے زرمبشت یک آشوبے ما درساں گوشگ لوٹاں اے زرمبشت ھچ گل ءِ نہ انت اے بس مزلومانی زرمبشت انت – بلوچستان ءِ ھک دو زرمبشت سرجمیں بلوچستان ءِ تہ ءَ برگی اے زرمبشت مزلومانی توار انت –
آئی ءِ گوشگ ات کہ اے زرمبشت ءَ گل ءِ دروشمے دیگ بہ بیت سرجمیں بلوچستان ءِ تہ ءَ مھکم کنگ بہ بیت –

ننداک ءَ تران کنان ءَ مولانا ھدایت الرحمان ءِ گوشگ ات کہ جھد ءَ برجاہ داریں وتی لوٹانی ھاتر ءَ مردماں گیش ءَ چہ گیش بھر زورگی انت –

آئی ءِ گوشگ ات کہ بلوچستان ءَ چہ ایف سی ءِ رکینگ ءِ جھد ءَ باڈر ءَ کار ءُ بار کنوکیں مردم اد ءَ مئے گور ءَ بیا انت ایف سی ءِ دربار ءَ مہ رو انت –

مُلا ھدایت الرحمان ءِ گوشگ ات کہ دہ دسمبر ءَ روانک ءِ دارگ ءَ واکداراں اگاں چیزے کُرت آیگ ءَ نہ اشت گڑا ھما جاہ ءَ بہ بہ نند ات ءُ دگ ءَ بند بہ کن ات –

بلوچ اسٹوڈنٹس آرگنائزیشن آزاد ءِ بُنجاھی جارکش ءَ مند ءَ پیسر ءَ چہ زورانسری آوار جنگ بوتگیں مردمانی راہ راھبندی کُشگ ءُ لاش مند ءِ کوھی دمگ ءَ دور دیگ ءِ پُشدری ءَ گوشتگ کہ راجی جھد ءِ مکابلہ ءَ ریاست ءَ مدام تاکت ، کُشت ءُ کوش ءُ زوراکی ءَ چہ پسّہ دیگ جنگ اِنت – مند ءَ پیسر ءَ چہ بیگواھیں مردم کُشتگ ءُ ویرانیں جاگہ چگل داتگ اَنت ” بہ جن ءُ دو دے ” پالیسی ءِ دْرچ اِنت کہ گوستگیں بازیں مدتے ءَ برجاہ ءَ اِنت بلے راجی سوچ ءُ ھیال لیکہ اے وڑیں بے سلّکیں گردگاراں چہ تُرس آماچ کت نہ کن ئے- راجی جُھد آجوئی ءَ چہ تُرس آماچیں ریاست زوراوری ءُ زوراکی ءَ ایر کپتگ بلے اے راستیں گپے کہ راجی جُھد ءُ سوچ ءَ گوں تاکت ءَ ایرموش کُت نہ کن ئے-

جارکش ءَ گْوشتگ کہ مند ءَ پیسر ءَ چہ بیگواہ کنگ بوتگیں مردمانی کُشگ اے گپ ءِ نشانی اِنت کہ پاکستان ازیت جاھاں بندیگیں سرجمیں مردمانی زندگی ھترہ ءِ توک ءَ اَنت- یک نیمگے ءَ چہ بیگواھیں مردمانی دروگیں میڑ ءَ سی ٹی ڈی ءِ دست ءَ کُشارینگ ءَ اَنت دومی نیمگ ءَ اشانی لاشاں دور دیگ ءَ اَنت وھدے کہ بازیں مردماں چست کنگ ءَ پد یک دروگیں ایف آئی آر جوڑ کتگ ءُ سی ٹی ڈی دست ءَ دیگ ءَ اَنت – اے سرجمیں کردگاراں چہ زانگ بہ بیت کہ ریاست وتی بے راھبند ءُ بے انسانی کرد ءَ شنگ کنگ ءِ ارادہ کنت-

جارکش ءَ گْوشتگ کہ پاکستان ءَ انسانی ھکّانی باسکانی نیمگ چہ بلوچستان ءَ بؤکیں انسانی ھکانی پادمالی ءِ سر ءَ اشانی بے تواری پدر کنگ کہ آ بلوچستان ءَ برجاھیں ریاستی زوراکی ءِ بے تواری ءِ منوگر اَنت- اے نگیگیں جاوراں جھان ءَ بلوچستان ءَ انسانی زندگی ءِ پھازگ ءِ ھاتر ءَ دیھان دیگ لوٹ اِیت گُڑا ناں ریاستی زوراکی دیمتر ءَ گیش تُرند بیت-

لسبیلہ یونیورسٹی آف ایگریکلچر واٹر اینڈ میرین سائنسز لوامز اوتھل فیکلٹی ءِ جیالوجی ڈپارنمنٹ ءِ نودربراں بنکی آسراتیانء بوگ ءِ سبب ءَ کلاس دومی روچ ءَ ھم بند کتگ ءُ زھرشانی کرتگ –

نودربرانی گوشگ اِنت کہ آسراتی ءِ نہ بوگ ءَ ما وتی کلاس یلو کرتگ اَنت بلے یونیورسٹی انتزامیہ ءَ ھچ سما پر نیست اِنت –

نودربرانی گوشگ اِنت کہ آسراتی ھمک نودربر ءِ بنکی ھک اَنت ءُ ما ھم نودربر اِنت باید مارا مئے آسراتی دیگ بہ بنت –

زانگ بہ بیت گوستگیں روچ ءَ ھم نودربراں کلاساں بائیکاٹ کرتگ ءُ وتی بنکی آسراتیانی واستا زھرشانی کتگ –

نودربرانی گوشگ اِنت نودربر اد ءَ کلاسانی بھر زورگ ءَ کاینت بلے اد ءَ ھچ نیست نانکہ ڈپارنمنٹ لیبارٹری ءُ مائیکرو اسکوپ نا دگہ آسراتی کہ چراھی ءَ نودربر چیزے در برت بہ کن اَنت –

زانگ بہ بیت گوستگیں روچاں بلوچ اسٹوڈنٹس ایکشن کمیٹی ءَ ھم وتی یک درشانی ءَ گشتگ اَت کہ بلوچستان ءَ وانگی ادارہ یکدم نیزور اَنت ءُ اود ءَ آسراتیاں ھوار بازیں چیزانی کمی اَنت ءُ باید اُستان ءِ سرکار اے چیزانی سر ءَ گامگیج بہ زور ایت –

دی بلوچستان پتر ھال ءَ سربوتگیں ھالانی رِد ءَ بلوچستان ءِ دمگ جھل مگسی ءَ ناشناسیں سلاہ بندیں مردماں لیویز ءِ پانگس ءِ سر ءَ وتکاریں سلاھاں گوم ءَ اُرش کُتگ –

اُرش جھل مگسی ءِ دمگ گنداواہ گھاروں ءِ لیویز پانگس ءِ سر ءَ کنگ بوتگ، اُرش ءَ پد لیویز ءُ سلاہ بندانی میان ءَ جنگ بوتگ –

ھالانی رِد ءَ اُرش ءِ آسر ءَ لیویز ءِ کارمند فتح نامیں مردمے بیران بوتگ ءُ دگہ یکے زدگ بوتگ –

دمگی واکداراں اُرش ءِ ھبر راست کُتگ ءُ گوشتگ کہ اُرش ءَ یک اُرشکارے ھم بیران بوتگ بلے اُرشکار ءِ پجار تنی وھدی زاھر کنگ نہ بوتگ –

بلوچ ریپبلکن آرمی ءِ جارکش بیبگر بلوچ ءَ رسانکدراں شنگ کرتگیں وتی درشان ءِ تہ ءَ گُشتگ کہ مئے سرمچار گوستگیں روچ ءِ سھب ءَ پنجگور ءِ ھند پیرے جھلگ ءَ تر ءُ تاب ءَ بیتگ اَنت پاکستانی پوج ءِ ملٹری انٹیلجنس (ایم آئی) ءِ سروکی ءَ جوڑ بیتگیں ریاستی ڈیتھ اسکواڈ ءِ دو گاڑیانی کاروان ءَ مئے سرمچارانی انگیر کنگ ءِ جھد کتگ اود ءَ سرمچاراں مزنیں رپکاں ریاستی کارندھانی یک گاڑی وتی انگیر ءَ کرتگ ءُ آ نوکیں سلاھانی گون ءَ ارش کرتگ ءُ پنچ کارندہ کُشتگ اَنت ءُ اود ءَ دومی نیمگ ءَ مئے دومی ھمراہ یک ترندیں جنگے ءَ کپتگ اَنت ءُ پوج ءِ کمک آیاں گون بیتگ ءُ ترندیں جنگ ءَ پد پوج ءَ پشتکنزی بیتگ –

آئی ءَ گُشتگ کہ ارش ءِ زد ءَ اتکگیں ریاستی کارندھانی گاڑی مئے سرمچاراں مانداشتگ ءُ آیانی سلاہ گون وت برتگ اَنت – گوستگیں روچ ءَ ریاستی کارندھانی پجار خلیل ء ھاجی بلال جھمنند تسپ پنچی، داود ء یاسین جھمنند دزناپ، حمزہ ء غلام جان جھمنند دزناپ، امان اللہ ء غلام جان جھمنند دزناپ، شعیب ء واحد جھمنند دزناپ ءِ ناماں زانگ بیتگ اَنت کہ ایم آئی ءِ کارندہ مھیم سوروانی ءُ ھاجی عاقل سوروانی ءِ سروکی ءَ گوستگیں بازیں سالاں راجی جنز ءِ ھلاپ ءَ پرکار بیتگ اَنت ءُ بلوچ پسگانی شھید کنگ ءَ دزمانجن بیتگ اَنت –

جارکش ءَ گشتگ کہ ھمے اُرش ءَ مرتگیں دراھیں کارندہ مئی سال دوھزار ءُ بیست ءَ پروم ءَ بیتگیں جنگ ءَ ھوار بیتگ اَنت کہ اود ءَ بی ایل ایف ءِ کماندار میجر نورا پیرک گون ھمراھاں شھید بیتگ اَت – اے ٹولی ءِ کارندہ ریاستی سروکی ءَ دزی، گریبں مردمانی نسپ ءُ ننگ ءَ لگتمال کنگ ءَ ھوار بیتگ اَنت – ما اشی ءَ پدر کن ایں کہ اے ریاستی دلاراں چاگرد ءِ تہ ءَ بیمناکیں سزا دے کہ یک کسانوکیں دپارے ءَ راجی جنز ءِ ھلاپ ءَ پرکار اَنت –

آئی ءَ گُشتگ کہ مئے اے وڑیں کاروائی بلوچستان ءِ آجوئی ءَ داً برجاہ بنت –

ھندوستان لشکر ءِ اولی چیف آف ڈیفنس جنرل بپن راوت ءِ ھیلی کاپٹت کپتگ ءُ تباہ بیتگ –

ھندوستانی رسانکدر ءِ رد ءَ چیف آف ڈیفنس اسٹاف جنرل بپن راوت ملٹری ھیلی کاپٹر اُستان تانل ناڈو ءَ کونور ءِ نزیک ءَ کپتگ ءُ تباہ بیتگ، وئیل ءَ پد سرچ اینڈ ریسکیو آپریشن بندات کنگ بیتگ –

ھندوستانی رسانکدر ءِ رد ءَ ھیلی کاپٹر ءَ چیف آف ڈیفنس اسٹاف جنرل بپن راوت، آئی ءِ کھول، ٹک ءُ پھزدار سوار بیتگ اَنت –

ھندوستانی فضائیہ ءِ نیمگ ءَ اے وھد ءَ چاگردی رسانکجاھاں راست کنگ بیتگ کہ چیف آف ڈیفنس اسٹاف جنرل بپن راوت ءِ ایم آئی ھبدھمی فائیو ہیلی کاپٹر کپتگ ءُ تباہ بیتگ –

انڈین ائیر فورس ءِ نیمگ ءَ شنگ بیتگیں درشانی ءَ ھیلی کاپٹر کپگ ءِ بارو ءَ پَٹ ءُ پول بندات اَنت –

دومی نیمگ ءَ ھندوستانی رسانکدر اھوالکار ءَ ھیلی کاپٹر ءِ وئیل ءَ دو مردمانی بیرانی راست کرتگ بلے اے نہ گشتگ کہ اے بیران بیتگیں مردم کَے کَے اَنت –

ھندوستانی ھبر رسان ادارہ اے این آئی ءِ رد ءَ ھیلی کاپٹر وئیل ءِ جاہ دزکپتگیں لاش ملٹری ھسپتال ءَ برگ بیگ ءَ اَنت –

زانگ بہ بیت ھندوستانی لشکر ءِ سروک جنرل بپن راوت وتی اگدو ءِ وھد ءِ سرجم بیگ ءَ سِی ءُ یک دسمبر دوھزار ءُ نوزدہ ءَ ریٹائر بیتگ بلے مودی سرکار ءَ آ ھندوستان ءِ چیف آف ڈیفنس اسٹاف نامینتگ اَت-

نبشتانک: نمدی یے ھدایت الرحمن بلوچ ءِ نام ءَ

نبشتہ کار: اسد بلوچ

دی بلوچستان پوسٹ

مڑاھداریں ھدایت الرحمن بلوچ دروت ءُ دراہبات۔ ھما جنز کہ تو لس مھلوک ءِ ھاترا بندات کتگ بے اڑاند وتی مکسد ءَ سوبیں بات شالا۔

واجھیں ھدایت الرحمن! ھمائیں کہ تو لس مھلوک ءِ بنکی ھکانی واستا اے جنز بندات کتگ ءُ برجم داشتگ پہ تو ءُ تئی پاٹی ءَ مردمانی وڑ وڑیں گپ ءُ ھبر بندات بوتگ اَنت بلے ھما مردم کہ گوں تو دل پھکی ہمراہ اَنت آھان ھچ گپ کِمار نہ کتگ ءُ گوں تو ھمرائی برجاہ داشتگ منی جند تئی پلہ مرزاں چہ یکے، چہ اول روچ ءَ بہ گر داں روچ ءِ مرچی ھم تئی پلہ مرزاں –

مڑاھداریں ھدایت بلوچ ! تئی ھلاپ ءَ آ مردمان ھبر کتگ یا بھتان جتگ بوت کنت آھاں لھتیں چیز مرتگ ءُ چش گشتگ، اے ھم بوت کنت کہ آھانی گمان تیوگ ءَ ناراست نبوتگ انت۔ بلے ھما مردماں کہ ترا ملائےِ گشتگ ءُ تئی ھلاپ کتگ آھانی وتی ستکے، پہ اے گپ ءَ کہ ھدایت الرحمن پرچا ملایے ھلاپ کنگ گوں اگل ءَ مئیل نہ کنت منی جندا چوناھا ھچ ملا دوست نہ بیت، دوستی دگے چیزے مردنی اں من ءَ ملاھانی سر ءَ بِھ بیسا نہ بوتگ ءُ نہ کنت ھم پمشکہ من ترا ملایے نہ چارتگ مدام بلوچے سرپد بوتگاں منی ستک پہ تو انگت ھمیش انت۔

گراں مھذبیں ھدایت الرحمن بلوچ تئی جنز ھردیں کہ پند بُرٌاں دیم ءَ رواں اِنت، نوک نوکیں چیز دیم ءَ آیان انت۔ لھتیں انچیں گپ ءُ واکیہ ات اَنت کہ برے برے مردم ءَ جیڑگ پرما انت کازی مبارک ءَ ھم مردم سنجیدہ بزور ایت بلے چش نہ اِنت، بائدیں چش مہ بیت ھم، مند ءَ لس مردماں روانکے کش اِت آھانی نعرہ آں گوں تپاک کنگ نہ بیت، اے رنگیں نعرہ آں چہ تئی ءَ توانا تریں جنز تاوان بار کتگ انت، اے نعرہ بلوچستان ءِ سیاست ءَ مردم کوشیں نعرہ اَنت، تو کہ مند روانک ءِ بہ گیر کت منی وڑیں تئی پلہ مرزے ءِ دل ءَ ھچ نہ جت، تو شر کت وت ءَ یک کِر کت، چوناھا ھم تئی جنز چہ بندات ءَ تچک ءُ زاھر اِنت اے لس مردم ءِ ھکانی جنز اِنت، بنیادی آسراتیانی رسینگ ءِ جنز اِنت دگہ ھچے نہ اِنت۔

مڑاھداریں ھدایت الرحمن بلوچ
بلے سرکار سک ھژیار اِنت، سرکار تئی نزور کنگ، ترا مردمانی تھ ءَ بے باور کنگ ءُ تئی دامن ءَ داگدار کنگ ءَ وڑ وڑیں ھنر سازیت تئی جنز ءَ لھتیں انچیں مردم ھوار کپت کہ آ چہ بنیات ءَ پھکیں مردم نہ اَنت، ھمے مردم اسٹیج ءَ اتک اَنت، تئی کش ءَ نشت اَنت، آھاں تئی پلہ مرزی ءِ جار جت ءُ اسٹیج ءَ اتکاں تکریر ھم کت۔ ما گمان کُت سرکار ترا لس مردمانی چماں جھل جنگ لوٹ ایت پمشکا وتی مردماں چہ اے وڑیں کار پرمائیت تو دل پھک ءُ سادئیں مردم بوت کنت اے ھنراں سرپد نہ اِت ھیر اے گپ ءَ مارا سوکی نہ کت ناں چہ تو دلپروش بوت اَنت بلے بیا کہ گوش اشکنگا ملا خادم رضوی ءِ بچک سعد رضوی ءَ ھم ترا پون کتگ ءُ تئی پلہ مرزی ءِ جار پرینتگ، سعد رضوی ءَ کئے نزانت کہ آ کہ اِنت، آئی ءِ ھنڈال ءُ روتگ چہ کجا اَنت، آ کئی مردم اِنت ھیر، ھرکس زانت کہ پلہ مرزی ءَ کس دارگ نہ بیت، یکے پون کنت، یکے کِرّا کیت، یکے وتی مردماں راہ دنت بلے ترا چارگ لوٹ ایت کہ پلہ مرزی کئی زورگی اِنت مردم اِنچو سادہ ءُ دل پھک ھم مہ بیت کہ سعد رضوی ءَ مہ زانت بائد ھمیش ءَ اَنچو کہ تو مند ءِ روانک ءَ چہ وتا یک کِرّ کت چہ سعد رضوی ءَ ھم وتا یک کِرّ کت اِنت-

مڑاھداریں ھدایت الرحمن! اے جنز کہ تو بنا کتگ لس مھلوک ءِ توار اِنت، گوں اشی ءَ لس مھلوک ھوار ءُ ھمراہ اِنت واجھیں ھدایت الرحمن اے راستے کہ تو جماعت اسلامی ءِ بھرے ئے، اے گپ ءَ تئی پلہ مرزیں لس مردماں ھچ پئیمیں ایراد ھم نیست کہ تو پرچا جماعت اسلامی ءَ ئے بلے واجھیں ھدایت الرحمن بلوچ
اے جنز جماعت اسلامی ءِ نہ اِنت ءُ ناں لس مھلوک پہ جماعت اسلامی ءَ اے جنز ءَ ھوار اَنت من نزاناں یک اچانگ ءَ جماعت اسلامی کجاں گمان ءَ وتا اے جنز ءِ پاسبان سرپد بوتگ اگاں اے جنز جماعت اسلامی ءِ جنز بوتگ ءُ تو چیر داتگ اے سک ھرابیں ھبرے، اے ھبر گوں لس مھلوک ءَ دگا ءُ دوکھے اگان اناں تئی نیت ءُ گمان ءَ جماعت اسلامی نہ بوتگ ءُ لس مھلوک ءِ بنکی آسراتیانی رسینگ ءَ گوں لس مھلوک ءَ ھمگرنچ ءُ یکجائی بوتگ گراں اے جنز ءَ جماعت اسلامی ءِ سیاست ءَ پولنگ کنگ میل جماعت اسلامی تئی ءُ لس مھلوک ءِ بس پلہ مرزی کنت وَ گپے اگاں آ لوٹ ایت کہ جنز ءَ وتی سیاسی پزوری بکنت ءُ وتی سیاست ءَ دیما بیاریت چش نہ بیت، اد ءَ سیاسی پاٹی وت ھست اَنت، اگاں ملا سراج الحق اے گمان داریت کہ بلوچستان ءِ راج دوستیں پارٹیاں گوں مھلوک ءَ دروگ بستگ، آھانی اڑ ءُ جنجال نہ زرتگ انت اے ھم تیوگیں راستے نہ اِنت توئِے واجھیں ھدایت الرحمن یا جماعت اسلامی شر سرپد بہ بہ اِت کہ بلوچستان ءِ لس مھلوک اگاں چہ راج دوستیں سیاسی پارٹیاں دلپروش بوتگ بلے اِنچو ھم زانگ لوٹ ایت کہ جماعت اسلامی یا دگہ دو تل ءُ دو پوستیں وفاقی پارٹی ءَ ھم وتی نہ کنت توئے واجھیں ھدایت الرحمن بلوچ ءَ اگاں راج ءَ شرپ ءُ ازت داتگ پہ جماعت اسلامی نہ داتگ اچ تو اے گمان کنگ بیت کہ اے جنزا گوں سعد رضوی ءُ جماعت اسلامی ءَ پولنگ نہ کن ئے -ھرجاہ ءَ بہ ئے بلوچے بات ئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ اسٹوڈنٹس ایکشن کمیٹی نال ھنکین ءِ نیاد ھنکین ءِ سروک کریم عالم بلوچ ءِ سروکی ءَ برجم دارگ بیتگ، نیاد ءَ بنجاھی پتر ءِ باسک رفیق بلوچ گچینی مھمان بیتگ ءُ نیاد ءَ پجاری بھر، بنجاھی گشتانک، ھنکین ءِ گوستگیں ھال، ایراد گری، میان اُستمان ءُ دمگی سیاسی جاورھال، گل ءِ رھبندانی رد ءَ آؤکیں گامگیجانی واستا ھنکین ءِ کابینہ گچین کنگ بیتگ کہ چریشی ءَ صلاح الدین ھنکین ءِ سروک ءُ اسلم بلوچ ھنکین ءِ جنرل سیکرٹری گچین کنگ بیتگ اَنت –

نیاد ءَ تران کنان ءَ بنجاھی پتر ءِ باسک رفیق بلوچ ءَ گوشت کہ لٹریچر چاگرد ءِ چَم اَنت پہ بستار ءِ نودربر گل بلوچ اسٹوڈنٹس ایکشن کمیٹی ءَ ھروھد ءَ اے جھد کتگ بلوچ نودربراں دیمروئی دوست ءُ راجدوستی ءِ لٹریچر ءِ راہ ءَ بہ پرین ایت – سَے ماھی نوشت اے درگت ءَ یک کڑی یے –

آئی ءَ گوشت کہ نوشت تھنا گل ءِ باسکانی واستا نہ اِنت بلکیں چاگرد ءِ ھر ھما مردم ءِ واستا شنگ ءُ تالان کنگ بیتگ گل ءِ باسک نوشت ءِ شنگ ءُ تالان کنگ ءَ ھمک بلوچ ءَ سر بہ کن اَنت پرچا وانگی ھر ھما چاگرد ءِ چراگ اِنت –

آئی ءَ گوشت کہ کتاب دودمان ءِ شنگ کنگ ءُ لائبریرانی بنپد ءِ بندات کنگ گل ءِ بنداتی ریشگ اِنت دانکہ چاگرد ءِ تہ ءَ مھلوک ءَ کتاب دوستی ءِ ریشگ بہ تُرک اَنت- مروچیگیں نوکیں دور ءَ ھما چاگرد دیم ءَ شت کنت آئی ءِ ورنایاں راجی سنچ ءُ سما وتی دلانی تہ ءَ داشتگ مئے جھد ھمیش اِنت ءُ ھمے بیتگ کہ ما ھنچیں چاگردے بہ سمبھین اِنت کہ اود ءَ ھر ھما جست ءُ پسھی ءَ اوپار کرت بہ کنت – دانکہ ھمک پھناتاں زانوگرانی سنچ ءِ سر ءَ ٹپاسگری ءُ گپ ءِ تران ءِ تک پراہ ءُ شاھیگان بیت بہ کن اَنت –

آئی ءَ تران کنان ءَ گوشتگ کہ نال بلوچ سیاست ءِ گڑھ بیتگ ءُ بلوچ سیاست ءِ تہ ءَ مزنیں نامے ءَ چارگ بیت اِنت – لھتے زوراکیں تاکتاں سیاست ءِ سر ءَ گٹگیری کرتگ ءُ چاگرد ءِ تہ ءَ ترس ءِ جاور ودینتگ اَنت مروچی نال ءِ سنگتاں گوں ھمے دزبندی اِنت کہ پد ءَ دوبر سیاست ءِ چراگ ءَ برز بہ کن اَنت ءُ وتی جد ءُ جھد ءَ تیز بہ کن اَنت سرجمیں اُستان ءِ رنگ ءَ نال ءَ ھم وانگ جاہ زبھر اُنت – ڈگری کالج ءُ ایپمنٹری کالجاں ٹیچر ءُ اسٹاف نیست اِنت اے جاور اد ءِ وانگجاھان ئیگ اِنت اے اژدری اِنت کہ وانگ ءِ تکاں چاگرد ءِ تہ ءُ وتی کرد ءَ پیلو بہ کن ایں –

نیاد ءَ ھنکین ءِ گوستگیں گوستگیں ھال، ایرادگری، میان اُستمانی ءُ دمگی سیاسی جاورھال گل ءِ رھبندانی رد ءَ جتا جتائیں بنگپانی سر ءَ باوست ءَ پد نوکیں کابینہ جوڑ کرتگ کہ اشی ءَ صلاح الدین سروک، سعید فیض کسان کمک سرکماش، اسلم بلوچ جنرپ سیکرٹری، ظریف بلوچ ڈپٹی جنرل سیکرٹری ءُ داؤد بلوچ انفارمیشن سیکرٹری نامینگ بیتگ اَنت –

نوک گچین بیتگیں اگدوداراں سوگند وارتگ ءُ کابینہ ءَ وتی زمہ واریانی پیلو کنگ ءِ مسام کرتگ –

گوادر ءَ برجاھیں “حق دو بلوچستان تحریک” ءِ ھمراھداری ءَ کراچی ءِ مھلوک ھم دگانی سرءَ در اَتکگ اَنت۔

جھانگیر روڈ ءَ حق دو بلوچستان تحریک ءَ گوں یکجاھی درشانگ ءِ ھاتر ءَ روانک کشگ بیتگ، روانک ءَ بھرزیروکیں مردمانی دست ءَ پلے کارڈز بیتگ اَنت کہ اِشانی سر ءَ دریاورداں ھوار بلوچستان ءِ درگت ءَ اوگام نبشتہ بیتگ اَنت۔

روانک ءَ گوں ٹیلیفون ءِ سر ءَ تران کنان ءَ مولانا ھدایت الرحمن بلوچ ءَ گُشتگ کہ ھروھد ءَ بلوچستان ءَ زلم بیتگ کراچی ءِ مھلوک ءَ زلم ءُ زوراکیانی بگیری ءَ توار چِست کُتگ گوستگیں ھپتاد سالاں چہ بلوچستان ءِ سر ءَ زوراکی برجاہ اَنت۔

آئی ءَ گُشتگ کہ گوادر ءَ زھرشانی جُنز ءِ ھلاپ ءَ پندل ءِ جوڑینگ ءُ ماھیگیر مڑینگ بئیگ ءَ اَنت۔ سندھ ءِ ماھیگیراں ھوار درستیں تکاں چہ سیادی داروکیں مردماں لوٹ ایت کہ مئے ھمراہ دار بہ بنت۔

مولانا ھدایت الرحمن بلوچ ءَ جار جتگ کہ آ ھمے زیتاں کراچی ءَ ھم کیت۔

کماشیں رھشون حسین واڈیلہ ءَ وتی تران ءِ تہ ءَ بلوچستان ءِ توار ءَ گوں ھم توار بیگ ءِ سر ءَ کراچی ءِ ورنایاں ستاشانی درشان کُتگ ءُ گُشتگ یک شور یے ءِ پد ءَ جُنز ءِ ھلاپ ءَ پندل سازش بیگ ءَ اِنت بلے پندل سازوک بے سوب بیتگ اَنت ءُ جُنز گیشتر ودگ ءَ اِنت۔

روانک ءَ گوں تران ءَ کنان ءَ نثار موسیٰ، ابوبکر بلوچ، ایڈووکیٹ شکیل بلوچ، ایاز بلوچ ءُ دگراں گُشتگ کہ کراچی ءِ مردم بلوچستان حق دو تحریک ءَ گوں سرجم ءَ یکجاھی ءُ ھواری برجاہ دار اَنت۔

آیاں لوٹ کُتگ کہ بیگواھیں مردم یل کنگ بہ بنت، پھازگی ءِ نام ءَ دریاوردانی کم شرپی ھلاس کنگ بہ بیت ءُ بلوچستان ءَ ھوار کراچی ءِ بلوچ دمگاں چہ ھم منشیات ءِ باپار بند کنگ بہ بیت۔

بلوچستان لبریشن فرنٹ ءِ جارکش میجر گھرام بلوچ ءَ ھوشاب ءَ پاکستانی پوج ءِ سرءَ اُرش ءِ زمہ واری من اِتگ ءُ گُشتگ کہ کیچ دمگ ءِ ھوشاب ھنکین ءَ کاٹک ءِ ھند ءَ سرمچاراں پاکستانی پوجی چوکی ءِ سرءَ اُرش کُتگ چریشی ءَ یک پوجی کارمند ھما وھد ءَ مُرتگ وھدیکہ دگہ یکے ٹپیگیں جاورانی تہءَ تچگ ءَ سوبمند بیتگ۔

میجر گھرام بلوچ ءَ گُشتگ کہ زورگیریں لشکریانی سرءَ اُرش داں زیردستیں بلوچستان ءِ آجوئی ءَ برجاہ مان اَنت۔