TBP Balochi

بلوچستان ءِ دمگ کیچ ءَ پاکستانی پوج ءَ زوراکی کنان ءَ پنچ مردم زورانسری آوار جتگ ءُ بیگواہ کتگ –

گیشیں ھالانی رِد ءَ گوستگیں سَے روچ انت کہ کیچ ءِ دمگ زامران دشتک ءُ پاکستانی پوج ءِ لشکر کشی برجاہ انت کہ اودا پوج ءَ پنچ مردم زورانسری آوار جنی ءَ پد بیگواہ کتگ –

زورانسری آوار جنگ بوتگیں مردمانی پجار ریاض ء فتح محمد، نثار ء فتح محمد، مدی ء کہدہ سہراب ءُ بشام ءِ ناماں چہ بوتگ انت وھدیکہ پنچُمی مردم ءِ پجار تنی وھدی نہ بوتگ –

گڈی ھالانی رِد ءَ پوج ءِ مزنیں کچ ءِ دمگ ءِ تہ ءَ ساڈی انت ءُ دمگ ءَ لشکر کشی ھنگت برجاہ انت –

نبشتانک: احمد داد، تو پمن ءَ پچے ءِ پیم ءَ بوتگ ئے

نبشتہ کار: اے آر داد

دی بلوچستان پوسٹ

من دیر انت وت ءَ شمشتگ اوں ترا چون یات بہ کن آں اد ءَ کس کس ءَ یات نہ کنت ھر کس کہ شت ، شت، شماچی گوشتگ ات شمے روگ ءَ پد اے راج شمارا یات کنت۔ ناں ،ناں تو ھمد ءَ بوتین ئے من ترا گوشتگ ات کہ نوکیں دلانی شیشگ تشے ھم رپتگیں موسمے ءِ گم ءَ گوں وت ءَ پولنگ کنگ نہ لوٹ انت-

من کہ ترا رودینتگ ءُ درآرتگ، تو پمن ءَ بچے ءِ پیم ءَ بوتگ ئے من کہ ترا شمشتگ اوں درآمدانی چی گِلگ؟
“نہ پہ دوستاں نہ پہ دژمناں تاوان”
“اچ تلائیں برچانکءَ پرشتگیں سگاراں من”

من ءَ رفیق ( منی برات ، احمد ءَ چہ مستر انت ) ءَ دمانُکے ساری ترانگ ءَ پرینت ھو من گوادر ءَ یاں من کہ سھب ءِ تر ءُ تاب وتی کُٹینت ءُ لوگ ءَ اتکاں کہ استاد ءِ سر ءَ وتی نبشتانک ءِ دومی بھر ءَ نبشتگ کناں کہ زی محسن امام ھمد ءَ بوتگ ،من ءَ موہ نہ رس اتگ چیزے بہ کن آں ھمیش انت انی کہ من کاگد ءُ کتاب کش اتگ اَنت ، رفیق ءَ من ءَ جست کت مرچی چے روچے من سر چست کت ءُ گوشت ۔” دوشمبے ءِ ھژدہ تاریخ انت” آئی ءَ نہ وشیں بچکندگے ءَ گوں درائینت” ھژدہ انت کہ ھبدہ ” ؟ من انگت ھم آئی ءِ گپ ءَ سما کنگ ءَ نہ ات اَنت” مرچی ھبدہ انت شما دراہ زاناں بے ھیال ات؟ من پاد اتک ءُ آئی ءِ نزیک ءَ شتاں” زاناں چونیں روچے ” ؟ رژنا ءِ مات ھم اوشتاتگ ات ءُ من ءَ ھمے رنگ ءَ چارگ ءَ ات کہ من چی بہ گوش آں دوئینان چہ یکے ءِ دپ ءَ دراتک احمد اڑے ، اڑے ، اڑے۔

بچار ماترا چو شمشتگ احمد شیھک ءِ نماسگ 17 جنوری (2011) ءَ کہ ما ترا باتیل ءِ ساھگ ءَ دوَر دات،پد ءَ یات نہ کنت کہ تئی چارگ ءَ اتکگاں زمانگ ءِ پیش دارگ ءَ دگرانی کبرانی سر ءَ باز رند ءَ شتگ آں بلے تئی نیمگ ءَ چک نہ جتگ ءُ نہ چار اتگ مبارک ءِ پیمیں دل منءَ گون نہ انت ھر روچ شہید کمبر ءَ یات کنت ءُ برے وت ءَ برے دگرانی موسم ءَ لوڑ ءُ بلوڑ کنت من ءَ وَ یات نہ کنت من کدی دیوانے ءَ تئی نام گپتگ چی ءَ ترا یات بہ کن آں ؟ تو وتی ارمان ءُ واھگ ءِ پد ءَ گرند ءُ گروکی موسمے ءَ اد ءَ چہ رھادگ بوتگ ئے تو کہ وت وتی کار ءَ پشومان نہ بوتگ ئے من چی ءَ پشومان بہ باں؟

دگراں من نزاناں اے شھر ءَ نہ شھید عارف نور یات کنگ بیت نہ شھید عبدالرحمن عارف، لالہ حمید ءَ برے برے علیم ھیاتان الم یات کنت، نوں اڑے شھید باز بوتگ انت ھمنچک انت کہ ھساب کنگ نہ بنت کس نہ زانت آیانی جنوزام ءُ چورہ چون ءُ چے رنگ ءَ انت؟ کجا پنڈگ ءَ انت، کئی در ءِ سوالیگ انت کس اش نہ زانت شر بوت کہ مات ترا چہ پیش ءَ درکپت ءُ شت نوں تو آئی ءِ دیم ءَ ئے نی شپ ءَ پاد نئیت ءُ من ءَ چہ پُّریں واب ءَ پاد نہ کنت ” ابا احمد ءِ ھال ءَ بگر بے وھد انت دنیگا نہ اتکگ پت ءَ بگوش من دادمحمدے آورتگ انی ھم منی کش ءَ نشتگ ءُ موبائل ءَ لوٹگ ءَ انت کہ من کارٹون چاراں حبیبہ ءِ ( منی گوھار ) ءِ چارگ ءَ برے برے برو گوں منی درھباتاں درائیں شھیدیں ورنا ءُ کماشاں سر کن، دگہ ھیر انت، ھیر نہ انت ھم مردم کُشیں شھر ءِ امیت کشّ ءُ ھیال پسندیں – تئی اے آر داد

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ نیشنل مومنٹ ءِ جارکش ءَ شھید نصیر کمالان ءُ شھید احمد داد ءِ یازدھمی سالروچ ءِ درگت ءَ آیاناں سھر چکیں دروت ندر کرتگ ءُ گوشتگ شھیدانی کرتگیں اھد داں منزل ءَ برجاہ بیت اِنت –

آئی ءَ گشتگ پاکستان ءِ رستری ءِ سر ءَ شری ءَ زانگ بیت اِنت شھید نصیر کمالان وتگڑیں آمیدگسانی پیشی ءَ پسنی ءَ چہ گوادر ءَ برگ ءِ وھد ءَ پولیس ءِ دست ءَ پچگرگ بیتگ ءُ بیگواہ کنگ بیتگ پد ءَ آئی ءِ لاش دور دیگ بیتگ –

آئی ءَ گشتگ نصیر کمالان یک زانتکاریں رھشون، یک آشوبی شائع ءُ بلوچ راجی آجوئی ءُ زر ءِ آشکے بیتگ، آئی ءَ وتی زندگی بلوچ راجی آجوئی ءِ ھاتر ءَ ندر کرتگ، آئی ءِ زانت ءُ شاھزانتی ءَ بازیں ورنا آجوئی ءِ جنز ءَ ھوار بیتگ اَنت، آئی ءِ ورنائیں بچ شھید سمیر کمالان ھم ھوار بیتگ، شھید سمیر کمالان وتی پت ءِ رندپداں روان بیتگ ءُ شھید بیتگ-

شھیدانی یازدھمی سال روچ ءِ درگت ءَ اے اھد ءَ کن ایں پاٹی شھیدانی مشن ءَ جھد ءِ ھواری ءَ آجوئی ءِ جنز ءَ نوکیں رنگے ءَ برز ءَ سر کن ایں ھچ رنگیں دگابازی کنگ نہ بیت اِنت –

سندھی راجدوستیں سلاہ بندیں گل ایس آر اے ءِ سندھی رھشون غلام مرتضیٰ سید پنام ءِ جی ایم سید ءِ سالروچ ءِ درگت ءَ وتی شنگ کرتگیں درشانی ءَ گشتگ رھبرِ سندھ سائیں جی ایم سید ءِ یک سد ءُ ھژدمی سالروچ ءِ درگت ءَ آئی ءَ را راجی دروت ندر کن ایں-

سندھودیش ءِ رژنا پگریں سائیں جی ایم سید ءِ یک سد ءُ ھژدھمی سالروچ ءِ درگت ءَ سندھودیش روولیوشنری آرمی ءِ جارکش سوڈھو سندھی ءَ وتی شنگ کرتگیں درشانی ءَ گشتگ سندھی راج وتی راجی بنزہ ءُ وتی راجدپتری ڈیھ ءَ بد سائیں جی ایم سید ءِ راجی آجوئی ءِ پکر ءِ رنپداں روان کن اَنت رکینت کن اَنت-

آئی ءَ گشتگ “ناشرکار ءُ نیکراھی ایٹمی ریاست پاکستان “نی سندھ ءَ ھوار دراھیں انسانیت ءِ واستا ترس جوڑ بیتگ – اے ترس ءِ ھلاس کنگ ءَ سندھ ءُ بلوچستان ءِ نوکیں راجی سرشاہ کشوکیں سیکیولر راجانی آجوئی اژدری اِنت –

جارکش ءَ گشتگ ایس آر اے سندھ ءِ ورنایاں دزبندی کنت کہ آ سندھ ڈیھ ءِ اے پیسلگ کتگیں جنگ ءَ مئے ھمراھداری ءَ بہ کن اَنت وتی راجدپتری ڈیھ سندھ ءَ بہ رکین اَنت ءُ سائین جی ایم سید ءِ پکر ءِ سر ءَ بہ رو اَنت سندھودیش ءِ آجوئی ءَ منزل ءَ سر بہ کن اَنت –

بلوچستان ءِ دمگ پنجگور ءَ سلاہ بندیں مردمانی میڑ ءَ دو مردم بیران بیتگ اَنت-

بیران بیتگینانی تہ ءَ مھیم سورانی ءُ اسد پرومی ھوار اَنت-

جنگ پنجگور ءُ پروم ءِ میانی دمگ درگِ دپ ءَ بیتگ –

مھیم سورانی ءِ سر ءَ اے بھتام بیتگ کہ آئی ءں سیادی سرکاری پلامرزی ءِ برجمیں ٹولی بزانکہ ڈیتھ اسکواڈ ءَ بیتگ کہ آ بلوچانی آوار جنگ ءُ کُشت ءُ کوشاں ھوار دگہ سلکاریاں دزمانجن اِنت-

ھشت دسمبر ءَ بلوچ ریپبلکن آرمی ءَ پنجگور ءِ کُچگی دمگاں پنچ مردم کشتگ اِت اَنت اے مردمانی بارو ءَ گل ءَ بھتام جتگ اَت اے مردم مھیم سورانی ءِ کارندہ بیتگ اَنت-

جارکش ءِ بی آر اے ءَ گوشتگ اَت کُشگ بیتگیں دراھیں کارندہ سال دوھزار ءُ بیست ءَ پروم ءَ بیوکیں یک جنگے ءَ ھوار بیتگ اَنت اود ءَ بی ایل ایف ءِ کمانڈر میجر نورا پیرک وتی ھمراھانی ھمراھی ءُ شھید بیتگ اَت-اے ٹولی ءِ کارندہ ریاست ءِ چیردستی ءَ دُزی، ڈنگی ءُ گریبیں مھلوک ءِ ننگ ءُ ناموس ءِ لپاشگاں ھوار بیتگ اَنت –

چرے وئیل ءَ پد بازیں وٹس ایپ گروپاں مھیم سوروانی ءِ یک توار بندے شنگ بیتگ اَت کہ مھیم سورانی وت منگ ءَ اِنت آ پروم ءِ وئیل ءَ ھوار بیتگ –

مھیم سورانی ءِ سر ءَ چریشی ءَ پیسر اے بھتام بیتگ کہ آ مردمانی آوار جنگ ءُ کُشت ءُ کوش ءُ چاگردی سلکاریاں ھوار بیتگ ءُ پاکستانی چیریں ادارھاں آئی ءَ را سرجمی ءَ مھار گٹ ءَ داتگ –

”بلوچ نیشنلسٹ آرمی “کے اِنت؟

ٹی بی پی گچینی

یاران دیار

یازدہ جنوری ءَ دو بلوچ آجوئی دوستیں پاٹی بلوچ ریپبلکن آرمی ءُ یونائیٹڈ بلوچ آرمی ءَ دو سلاہ بندیں گل یکجاہ کتگ اَت ءُ یک نوکیں سلاہ بندیں پاٹی یے بلوچ نیشنلسٹ آرمی ءِ نام ءَ بنھشت ءِ ایر کنان ءَ “بی آر اے ءُ یو بی اے ءِ کمانڈ کونسلز ءَ یک ھمسنتیں نیادے زیردستیں بلوچستان ءَ برجاہ داشتگ اَت، ھمود ءَ راجی جنگولانی جنگ ءَ دیم ءَ برگ ءُ پوجی زوراکیانی دیمپانی ءَ بلوچ سلاہ بندیں زوراں یکجاہ کنگ ءِ واستا ھردوکیں پاٹیاں شور بندی کتگ اَت، یک پاٹی یے، بی این اے ءِ نام ءَ جنگ ءِ جھد ءِ برجاہ دارگ ءِ پیسلہ کتگ”-

اے جار ءَ گیش گوشگ بیتگ اَت “مرید بلوچ، رسانکدراں بلوچ نیشنلسٹ آرمی ءِ جارکش بیت اِنت ءُ گل ءِ رسانکدری بنجاہ ءِ نام باسک ایر کنگ بیت اِنت- “

جار ءِ یک جوانیں پھناتے ایش اِنت کہ ھردوکیں پاٹیانی یکجاہ بیگ ءَ پد نوکیں گل بی این اے، بلوچ سلاہ بندیں پاٹی ءِ زورامندیں ھواریں گل بلوچ راجی آجوئی سنگر یا براس ءِ بھرے بیت اِنت-

زانگ بہ بیت براس بلوچستان ءِ آجوئی ءِ لوٹوکیں دو مزنیں پاٹیانی بھر بلوچ لبریشن آرمی، بلوچستان لبریشن فرنٹ ءَ ھوار بلوچ ریپبلکن آرمی ءُ بلوچ ریپبلکن گارڈز ءِ یک ھمسنتی یے، چُشکہ پاکستانی پوج ءَ ھوار مزنیں کارجاھانی سر ءَ ترندیں رنگانی اُرشانی نام ءَ زانگ بیت اِنت – ھنچش اے ھمسنتی ءَ سندھی سلاہ بندیں گل سندھو دیش ریورلشنری آرمی ھم ھوار بیتگ –

بلوچ ریپلکن آرمی

بی آر اے ءِ بنھشت سال 2006 ءَ نامی ئیں بلوچ راجدوستیں رھشون نواب اکبر خان بگٹی ءِ سر ءَ یک پوجی بیڑے ءَ شھیدی ءَ پد دیم ءَ اتکگ اَت – بنداتی سالاں بی آر اے گیشتر بگٹی ٹک ءِ سلاہ بندیں مردماں گوں ھوار اَت بلے پد ءَ زوت آ بلوچستان ءِ شھر ءُ دمگاں گیشتر وانندگیں مردماں گوں نزیک بیت، چریشی ءَ پد سرجمیں بلوچستان ءَ جنگول “پاکستانی زورگری “ءِ ھلاپ ءَ جد ءُ جھد ءِ واستا اشی ءَ ھوار بیتگ اَنت-

بی آر اے ءَ نام پدری رنگ ءَ وتی سروک ءِ نام نہ گپتگ ، بلے پاکستان ءِ سرکار ءَ یکشل ءَ اے بھتام جتگ کہ بی آر اے ءِ سروک نواب اکبر خان بگٹی ءِ نماسگ ءُ بلوچ ریپبلکن پاٹی ءِ سروک براھمدگ بگٹی اِنت – براھمدگ بگٹی اے وھد ءَ سوئیٹزر لینڈ ءَ درانڈیھی زندگی ءَ گوازینگ ءَ اِنت ءُ پاکستانی سرکار ءِ اے بھتام ءَ یکشل ءَ رد کنگ اِنت-

اکتوبر 2018 ءَ بلوچ ریپبلکن آرمی دو جاہ ءَ بھر بیتگ ات، ھنچش بی آر اے ءِ یک جارکشے سرباز بلوچ ءَ رسانکدراں درشانے شنگ کنان ءَ “گل ءِ ریجنل کمانڈر گلزار امام پنام ءِ شمبے ءِ باسکی ھلاس کتگ اَت –

بلوچ گھگیری راجدکاری ءِ سر ءَ نگاہ ایر کنوکیں کواسانی رد ءَ، اے تھ ئِے ایرادگریاں پد گل ءِ جنگولاں گیشتر گلزار امام ءِ سروکی ءَ جتا اُرشانی بندات کتگ اَت-

گلزار امام بلوچستان ءِ دمگ پنجگور ءَ سیادی دار ایت، آ یک وانندگیں ورنایے ءُ بلوچ اسٹوڈنٹس آرگنائزیشن آزاد ءِ ھنکینی سروک ھم بیتگ – نودربر راجکاری ءَ پد آ بی آر اے ءِ پتر ءَ ھوار بیتگ زوت ءَ زوت گل ءِ مزنیں کمانداری جاھاں ھوار بیتگ – اھوالانی تہ ءَ گلزار امام ءِ بی آر اے ءَ بلوچستان ءِ شھر ءُ مکران ءِ دمگاں بازیں رنگے ءَ وتی دست ھوارینتگ اَنت ءُ دومی بھر ءِ براھمدگ بگٹی ءِ بی آر اے ءَ ڈیرہ بگٹی ءُ کچھی ءِ دمگاں گیشتر دزرس بیتگ –

بی آر اے ءِ اے بھر ءُ بانگی ءَ پد گلزار امام ءَ ھستیں بلوچ زرمبشت ءَ سردارانی سر ءَ ایراد گران ءَ گوشتگ “بلوچ زُرمبشت ءِ ھما سروکی کہ سردارانی لوگاں ھوار اِنت، آیاں باسکے ءِ ھواری ءَ ٹکی رویش ھم یل کنگی اِنت ءُ گل ءِ تہ ءَ ھستیں جیڑھانی گیش ءُ گیوار ٹکی نہ اِنت بلکیں راجکاری ءِ رنگ ءُ پیماں شوھاز کنگ لوٹ اَنت “ھمے رنگ ءَ بی آر اے ءِ نوکیں جوڑ بیتگیں بھر ءِ جارکش بیبگر بلوچ ءَ نومبر 2018 ءَ یک درشانے شنگ کنان ءَ گوشتگ “گل ءِ دراھیں مزنیں کمانداراں سرباز بلوچ ءِ نیمگ ءَ شنگ کرتگیں درشان ءَ ھمگرنچی ءَ رد کنت “گلزار امام ءَ اے بھتام ھم جتگ اَت “نا ایوک ءَ پاکستان بلکیں آجوئی دوستیں ٹکی سردار ھم یکشل ءَ مارا پروشگ لوٹ اَنت “بی آر اے ءِ اے بھر ءُ بانگی ءَ گلزار امام ءِ سروکی ءَ برجم بیوکیں بی آر اے، بلوچ راجی آجوئی سنگر (براس) ءِ وڑیں زواوریں ھمسنتی ءِ بھرے جوڑ بیتگ اَت –

یونائیٹڈ بلوچ آرمی:

یو بی اے سال 2010 ءَ بلوچ لبریشن آرمی ءَ چہ سستگ ءُ آ وھد ءَ یک جتائیں گلے جوڑ بیتگ، چُشکہ ھما وھد ءَ نامگپتی بی ایل اے ءِ سروک حیربیار مری ءَ وتی کستریں برات مھران مری ءِ سر ءَ اے بھتام جتگ اَت آئی ءِ ناجاڑیگ بوگ ءِ سبب ءَ ھداروکی ءِ واستا دارگ بیتگیں سروکی ءِ وھد ءَ مھران مری (انی کہ نامگپتی ءِ رنگ ءَ یو بی اے ءِ سروک اِنت) دگابازی ءُ چالبازیانی پوست ءَ پتریتگ – کرپشن ءِ اے بھتام ھچبر راست نہ بیتگ – بلے یو بی اے ءِ نامگپتی سروک مھران مری ءَ اے بھتام رد کنان ءَ اے گشتگ ایرادگری ءِ سبب ءَ واجہ حیربیار مری ءِ وتمانی رویش ءُ گل ءِ مزنیں کمانداراں دورچاری کنگ اِنت – اے لس گپ ھم گوشگ بیتگ مھران مری ءَ آئی ءِ کماش نامی ئیں آجوئی دوستیں رھشون نمیرانیں سردار خیربکش مری ءِ پلامرزی ھم گون بیتگ –

بلے دیم ءَ روان بیتگ گوستگیں سال ءِ اکتوبر ءِ ماہ ءَ یو بی اے گیش دو بھراں بھر ءُ بانگ بیتگ اَت ھمے وڑ یو بی اے ءِ جارکش سرفراز بنگلزئی پنام ءِ مرید بلوچ ءُ گل ءِ سروکاں ھوار بنجاھی پتر ءِ کماندارانی میان ءَ ایرادگری ودی بیتگ اَت -اکتوبر 2021 ءَ یو بی اے ءِ دومی جارکش مزار بلوچ ءَ یک درشانے شنگ کتگ اَت ءُ گوشتگ اَت گل ءِ رھبندانی لگتمالی ءِ سبب ءَ سرفراز بنگلزئی چہ گل ءَ درکنگ بیتگ ءُ یو بی اے ءِ یکیں جارکش مزار بلوچ بیت اِنت-

ھمے رنگ ءَ اشی ءِ پژدر ءَ گل ءِ دومی جارکش مرید بلوچ ءَ رسانکدراں یک جارے شنگ کرتگ اَت آئی ءَ اے گپ ءِ سر ءَ سزا دیگ ءَ اَنت کہ آئی ءَ یو بی اے ءَ اے زور داتگ کہ آ توانمندیں گل بلوچ راجی آجوئی سنگر ءَ ھوار بہ بیت اِنت بلے مھران مری اے ھمسنتی ءِ سر ءَ ستک نہ دار ایت “

دیم ءَ روان بیت اَنت مرید بلوچ ءِ یو بی اے ءُ گلزار امام ءِ بی ار اے یکجاھیں گل بلوچ نیشنلیسٹ آرمی ءِ دیم ءَ آیگ ءُ براس ءِ ھمسنتی ءَ ھوار بیگ –

بلوچ راجی آجوئی سنگر (براس)

سال 2017 ءَ بلوچ لبریشن آرمی یک رندے پد ءَ تھ ئِے انتزامیی بگیر داریاں گوزگ کپتگ، چریشی ءِ سبب ءَ گل ءِ سروکی اولی رند ءَ سردارانی لوگ ءَ چہ در اتکگ یک لس بلوچیں جنگول اسلم بلوچ پنام ءِ جنرل ءِ دست ءَ اتکگ – گوستگیں سروک ءِ نام ءَ ابید بلوچ لبریشن آرمی ءِ جارکش جیئند بلوچ ءَ اگست2018 ءَ یک درشانے شنگ کنان ءَ گوشتگ مروچی ءَ پد بی ایل اے یک وتمان ءُ انا پرسیں مردم ءُ آئی ءِ کسانیں ٹولی ءَ گوں ھچ سیادی نہ دار ایت ءُ مروچی ءَ پد گل ءَ لندن، یورپ یا امریکہ ءَ ھچ نمائندگ نیست اِنت- “

اسلم بلوچ بی ایل اے ءِ درستاں گچینتریں کماندار اَت ءُ پد ءَ آ وھد ءَ بی ایل اے ءِ مزن سروک ھم بیتگ اَت داں وھدیکہ دسمبر 2018 ءَ یک وتکش اُرشے ءَ پنچ ھمراھانی ھمراھی ءَ نشانگ بیتگ اَت ءُ نمیران بیت-

اسلم بلوچ، بلوچ جنگولیں زرمبشت ءِ نامی ئیں گل مجید بریگیڈ ءِ ایر کنوک ءُ سروک بیتگ – مجید بریگیڈ وتی وتکش ارشانی سبب ءَ گچینی ءِ رنگ ءَ چارگ بیت اِنت کہ اشی ءَ گل ءِ فدائی اُرش گوش اَنت – مجید بریگیڈ ءِ یک فدائی اُرشکارے اسلم بلوچ ءِ پُسگ ریحان بلوچ بیتگ کہ آئی ءَ یازدہ اگست 2018 ءَ چینی انجنیئرانی یک کاروانے ءِ سر ءَ بلوچستان ءِ دمگ دالبندین ءِ ھند ءَ فدائی اُرشے کتگ اَت-

اسلم بلوچ ھواریں گل ءِ ھوارینگی ءُ بلوچ سلاہ بندیں گلانی زورامندیں ھمسنتیں گل بلوچ راجی آجوئی سنگر ءِ بنھشت ایر کنوک گوشگ بیتگ کہ 10 دسمبر 2018 ءَ بلوچستان ءِ دو مزنیں سلاہ بندیں گل بلوچ لبریشن آرمی ءُ بلوچستان لبریشن فرنٹ ءِ یکجاھی بیتگ، پد ءَ اشی ءَ بلوچ ریپبلکن آرمی، بلوچ ریپبلکن گارڈ ءُ سندھی سلاہ بندیں گل سندھو دیش لبریشن آرمی ھوار اَنت-

براس پاکستانی آرمی ءُ دومی پاکستانی پیراملٹری پوجی زورانی سر ءَ بازیں کچے ءَ اُرشانی نام ءَ زانگ بیت اِنت – اے ھمسنتی ءَ پد پاکستانی پوج ءِ سر ءَ اُرش ترندی ءُ بازیں کچے ءَ گیشی ءَ گندگ ءَ آیگ ءَ اَنت –

بلوچستان ءِ گیشتریں جاھاں بلوچ مھلوک داں انگت ءَ ٹکی سانانی چیر ءَ گوزگ ءَ اَنت، ھمے سبب اِنت گیشتر سردارانی لوگاں بلوچ راجکاری ءِ چھرگ گندگ ءَ کیت اِنت – اے ٹکی اسر ءِ سان ءَ بلوچ گھگیری ءِ چھرگ ءِ سر ءَ ھم تچکی ءَ گندگ ءَ کیت اِنت – اگاں بلوچ گھگیری ءِ زرمبشت ءِ اے دراھیں ایرادگریاں بہ چارے گڑا درستاں یک ھمسنتی ءِ گندگ ءَ کیت اِنت کہ سردار اے گھگیری پاٹیاں وتی سان ءَ ایر کنگ لوٹ ایت وھدیکہ وانندگیں لس باسک اے ٹکی سان ءَ درکپتگ ءُ ھمسنتی ءِ نیمگ ءَ جنزگ ءِ پد ءَ جنگ ءَ بیتگ اَنت گڑا کواس اشی ءَ بلوچ گھگیری زرمبشت ءِ دیم ءَ جنزگ ءُ نوکیں وھدے ءَ سر بیگ ءَ چارگ ءَ اَنت-

نبشتانک: سما

ندکار: شاھد اھمد

دی بلوچستان پوسٹ

سھیگ بوگ، وت ءَ چہ ءُ وتی چاگرد ءِ بارو ءَ سرپدی بوگ ءِ نام ءَ سما گُوْش اَنت۔ انگریزی ءِ تھا سما ءَ را (consciousness) گُوْش اَنت۔ایشی ءَ چہ ابید تَب زانتی ءِ تھا سما اسل ءَ اَگْل ءِ یک انچیں تَبے ءَ گُوْش اَنت کہ آئی ءِ جِند ے ، وت زانتی، ہر چیزانی مارگ، بود ءُ بودناکی یے شَرّی اَست اَنت وتی ءُ چاگردی یے سما بوگ ءِ نام سما اِنت۔

اے دگنیا ءِ تھا بازیں راج ھست اَنت ءُ ہر راج ءِ وتیگ ءُ وتی چاگردی جاورال ھست اَنت ءُ ھر یک راج ءِ چاگردی جاورال یک دومی ءَ چے جِتا جِتا اَنت۔ ما اِد ءَ بلوچ راجے چاگردی جاورالانی سر ءَ کمے گپ جن ایں ۔

بلوچ ءِ تب ءُ بود آ دگہ راجاں چے پَھک جِتا اِنت پرچا کہ آ دگہ راج ءِ سما مئے راج ءِ سما ءَ چے باز دیمروی کتگ آ چہ بلوچاں ھر چیز ءَ چے دیما تِر اَنت آیانی زانتکار ءُ کَوْاساں سک باز پہ وتی راجے واست ءَ کار کُتگ ءُ اَنگت ءَ کار کنگ ءَ اَنت بلے مئے راجے زانت کار پہ وتی راجے سما ءِ دیمروی ءِ بابت ءَ ھِچ کار کنگ ءَ نہ اَنت آ چہ زانت بہ بیت چہ وت زانت بہ بیت ۔

بلے یک دومی ءِ شیگان ءُ وت گلایاں سک باز دیم ءَ اَنت ھمیں درگَتْ ءَ واجہ سید ھاشمی گْوش اِیت ” کس پہ دپ بٹاک ءُ برز لیکَگْ ءَ دُردانگ نہ بیت” سما، پیسر ءَ وتی راجے زیردستی ءِ رَکْینگ ءِ ھاتر ءَ سما ئِے دیگ اَلَمّی اِنت کہ ما آ دگہ راجے وڑا مارا ھم یک زبانے ھست ، دود ءُ ربیدگ ءِ ھست ، مارا ھم یک راج دپترے ھست ءُ یک زوراورے ءِ دست ءَ تاراج اِنت۔

مارا اے اَلّم زانگی اِنت کہ ما چہ کُجا سر ایں ءُ مئے ھستی چی اِنت۔ ما پہ وتی راجے واست ءَ چے کار کُتگ ما بَس وتی راجے دیم ءَ وت ءَ مَزن لیکْ اَنت ءُ وت مہ وت کُشْت ءُ ھون کن ایں اگاں مارا راج دپترے ھست بَس وت مہ وتی جنگانی بابِت ءَ اَنت ءُ ھِزّت ءُ شَرپْ ءَ بلوچاں وتی ھون ریتکگ اَنت بلے مرچی ما گِند ایں مئے مات ءُ گُھار پہ وتی چُکْ ءُ بِراتانی واست ءَ دَگّ ءِ سر ءَ اُوشتاتگ ءُ اِنساپ لوٹگ ءَ اَنت کُج اِنت مئے ھِزّت ءُ شَرپْ کُج اِنت مئے بلوچیت بس پہ دپ ءُ بَٹاک ءَ بلوچ اَنت۔

ما اسل ءَ زیردستیں راج ایں ءُ یک زیردستیں راجے بِستار ھِچ نیست۔ بلوچ زیردستاں یکجا بُوگ المی اِنت اگاں ناں پہ وتی گاری ءَ شوھاز کُت نہ کن ایں ۔ ہر یک بلوچ راجے زمہ واری اِنت کہ آ پہ وتی راجے زیردستی ءَ رکینگ ءِ ھاتر ءَ وتی وسّ ءَ چہ کار کُت کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: شہید جنرل اسلم

نبشتہ کار: مجید بلوچ

دی بلوچستان پوسٹ

منی رہبر استاد اسلم جان تئی روگ ءَ پد بلوچ قوم ءَ یک مزنیں دردے بوت کہ آ یک رھشونے ءَ چہ زبھر بوت بلئے تئی کاروان ءِ ھمبلاں اے سابت کت کہ تئی داتگیں درس ھمک مھاز ءَ آوانی رھشونی ءَ کنگ ءَ اَنت بلوچ ءِ لگوریں دژمن تئی شھادت ءَ گل ءُ شات بوت کہ آھاں وتی دیم ءَ اوشتاتگیں مزنیں سِنگ ءِ لیٹینت بلئے اے آوانی رد پھمی اَت، تئی دژمن ءَ ھم تئی شھادت گران ءَ کپت۔ نوں دژمن ءَ ھم دیست کہ استاد اسلم ءِ شہید کنگ ءَ پد استاد ءِ کاراون گیشتر مھکمیں رنگے ءَ جنزان بوت۔ دژمن ءَ تئی لاڈکیں قوم ءَ را درد ءِ دات بلئے پروش ندات-

وھدءِ من تئی اَکس ءَ گنداں تئی اَکس پہ من راھ ءِ شون دنت، منءَ سوج دنت پہ بلوچ ءِ جنگ ءِ بابت ءَ من سک دوست بیت بلئے من یک اَنچیں بد بھتیں جہدکارے آں کہ من ءَ تئی دیدار نسیب ءَ نبوت بلئے من اے چیز ءَ وت ءَ را وشبھتی گشاں کہ من تئی پگر ءِ اَر وھد ءُ اَر ساھت دیدار ءَ کناں۔

بلوچستان ءِ ھمک دمگ ءُ اَر بلوچ ورنا ءِ دل ءُ دپ ءَ بس تئی نام اِنت “استاد اسلم بس استاد اسلم” تو پہ وتی راج ءَ مزنیں کربانی ءِ دات، یک مہرے وتی قوم ءَ را دات ءُ شُتے، آ مھر یک اَنچیں مہر ءِ کہ اَر بلوچ ورنا گوں تئی داتگیں مہر ءَ دست ءَ کنت ءُ دل ءِ سر ءَ داریت کہ ما استاد اسلم ءِ راھی اِنت ما فدائی اِنت ما فدائی اِنت ۔

وھد ءِ کہ تو پہ وتی راج ءِ ھاتر ءَ ہزاراں ریحان ءِ وڑیں بچ جوڑ کتگ کہ آ مدام پاکستانی لشکر ءِ بنجلانی سر ءَ قبضہ کن اَنت، لگوریں دژمن ءَ دزگیر کن اَنت، آواں پروش دے اَنت ءُ اے پیام ءَ دے اَنت کہ اے مئے سرزمین اِنت ایشی سر ءَ شمئے ھچ ھک نیست ءُ ایشی پھازگ ءَ پہ ما وتی سرانی ندر کنگ ءَ ھم ھچ چک ءُ پد نبیں، آوانی دپ ءَ بس ھمے نام اِنت کہ “ندر پہ وتئی راجی رھشون جنرل استاد اسلم ءِ نام ءَ” وھدے تئی یاد بولان ءِ کوہ ءُ دمگاں گیر کیت آ کوہ ھم تئی نام ءَ گِر اَنت ءُ زہیروک جن اَنت کہ استاد تو دوبر بیا منی ساھگ ءَ بہ وپس۔

تئی روگ ءَ چے پد منی چمانی اَرساں من تسلّہ دات ءُ من بس ھمینچو زاناں کہ تئی کاروان دیم ءَ برگی اِنت ءُ اُمیت انت کہ اے کاراون ھمے رنگ ءَ ءُ گیشیں مھکمیں رنگے ءَ دیم ءَ جنزان کنت داں کہ وتی منزل ءَ سَر بیت ءُ کُل شھیدانی اَرمان سرجم بنت۔

دل ءَ باز گشتگ کہ تئی باروا تئی نزدیکیں سنگتے ءَ را جست بکناں بلئے جست ءِ لبز منی زبان اَتک کُت نکن اَنت، من نزاناں تر ءَ کجام گپ دوست بیت من ھما گپ ءَ بکناں پرچہ کہ من تئی سنگتاں گنداں منی زبان ءَ لبز نیت اِنت پرچہ کہ آ اے جنز ءِ بابت ءَ آ دگہ کلاں چے گیشتر سرپد اَنت من سک باز بہ جیڑاں ھما گپ ءَ بکناں من زاناں کہ تئی دوستیں گپ تئی راج ءِ ءُ تئی گلزمین ءِ جنگ ءِ بابت ءَ بیت، تر ءَ ھمے گپ دوست بیت کہ تئی یک آجوئی زند ءِ بگوازینیت استاد جان تئی راج ءِ بزرگ، ورنا ءُ زالبول شپ ءُ روچ پاکستان ءِ زندانانی تھ ءَ بند اَنت ءُ اذیت سگگ ءَ اَنت، مکھیں ماتانی چم چہ اَرساں پُرّ اَنت، لھتیں ورنا پاکستان ءُ پاکستان ءِ داشتگیں دلاراں وتئی اَرجان جتگ ءُ نشہ ئے آماچ کتگ اَنت۔

استاد تئی روگ ءَ چہ پد بلوچ راجءَ ھمے گمان بیت کہ بلوچ ءِ دژمن ءَ اے جنگ ءَ پروش وارتگ، دیم ءِ نشانی ءِ ایر کتگ تئی داتگیں کربانی ءُ کلیں بلوچانی داتگیں کربانیءَ بلوچ ءِ دژمن ءَ سرین پروش کتگ استاد تئی شھادت ءَ چے پد ھم بلوچ دژمن تئی نام ءِ سر ءَ ترس ءُ بیم ءِ آماچ اِنت۔ استاد تو گوں کُلیں شہیداں گوں نمیرانے، شما کل بلوچستان ءِ ھلک ءُ دمگانی تھ ءَ زندگے، اَر کماش، ورنا، ماس ءُ گہارانی دلانی تھ ءَ زندگے ءُ تو گوں کلیں شہیداں نمیران اِت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گوستگیں شپ ءَ سعودی ءَ کنگ فہد انٹرنیشنل فٹبال گوازی پٹ ءَ بوتگیں اسپین کپ ءِ فائینل گوازی رئیل میڈریڈ ءَ کٹ اِتگ –

اسپین کپ ءِ پائینل گوازی دوشی شپ رئیل میڈریڈ ءُ ایٹیلیٹک ءِ میان ءَ بوتگ کہ رئیل میدریڈ ءَ دو گول ءَ گوازی کٹ اِتگ اسپین کپ ءِ فائینل گوازی وتی نام ءَ کُتگ –

رئیل میڈریڈ ءُ ایٹیلیٹک ءِ میان ءَ بوتگیں گوازی ءَ ایٹیلٹیکٹ ءِ نیمگ ءَ چہ ھچ گول اسکور کنگ نہ بوتگ وھدیکہ رئیل میڈریڈ ءِ لیبی لوکا مُدریک سِی ءُ ھشتمی ملٹ ءِ تہ ءَ یک گول ءِ اسکور کتگ ءُ دومی گول کے.بینزیما ءَ پنجاہ ءُ دومی ملٹ اسکور کتگ انت –

دومی نیمگ ءَ یورپئین پریمئیر لیگ فٹبال گوازی برجاہ انت گوستگیں روچ ءَ چار ٹیم ویسٹ ہام ءُ لیڈز یونائیٹڈ، لیور پول ءُ برینٹفورڈ ءِ میان ءَ گوازی کنگ بوتگ کہ آھانی تہ ءَ لیور پول ءَ سَے ءُ لیڈز یونائیٹڈ سَے پہ دو گول ءَ گوازی کٹ اِتگ انت –

پریمئیرلیگ اولی گوازی لیڈز یونائیٹڈ ءُ ویسٹ ہام ءِ میان ءَ کنگ بوتگ کہ ویسٹ ہام ءِ نیمگ ءَ دو گول اسکور کنگ بوتگ کہ ویسٹ ہام ءِ لیبی جے. بوون ءُ فی.فورنلرز ءَ داتگ انت وھدیکہ لیڈز یونائیٹڈ ءِ نیمگ ءَ چہ سَے گول اسکور کنگ بوتگ کہ ھر سَئیں گول جے.ہئیریسن ءَ داتگ انت –

دومی گوازی لیورپول ءُ برینٹفورڈ ءِ میان ءَ کنگ بوتگ کہ لیور پول ءَ سَے گول ءَ گوازی کٹ اِتگ وھدیکہ برینٹفورڈ لیبی ھچ وڈ ءَ گول اسکور کنگ ءَ سوبین نہ بوتگ انت –

لیورپول ءِ نیمگ ءَ چہ لیبی فابینہو ءَ چِل ءُ چارمی ملٹ ءِ تہ ءَ اولی گول اسکور کتگ دومی گول ایلکس ءُ سیمی گول ایم. تکومی ءَ اسکور کتگ ءُ گوازی وتی ٹیم ءِ نام ءَ کتگ –