TBP Balochi

چہ روکپتی بلوچستان ءَ سر بیتگیں ھالانی رد ءَ ایرانی آمیدگس ءِ پرمان ءَ مروچی ھشت زاندانی پاھو دیگ بیتگ اَنت کہ ھشتیں مردم سیستان و بلوچستان ءِ جت جتائیں جاھاں سیادی داروک اَنت –

گیشیں ھالانی رد ءَ ایرانی آمیدگس ءِ پرمان ءَ مروچی ماں سیستان ءُ بلوچستان ءِ بنجاھی شھر دزاپ ءَ پنچ بندیگیں بلوچ پاھو دیگ بیتگ اَنت-

پاھو دیگ بیتگیں مردمانی پجار عبدالحمید اسماعیل زئی، خدانظر کاکر، مھر اللہ دھمردہ پنام ءِ مھراب شاھوزئی، عطاء اللہ براھوئی ءُ حسین علی خمر ءِ ناماں زانگ بیتگ اَنت –

ھمے وڑ ءَ روکپتی بلوچستان ءَ ھواریں دمگ زابل ءَ ھم سَے کس پاھو دیگ بیتگ اَنت –

پاھو دیگ بیتگیں مردمانی پجار پرویز اکبر راد، مھمد امین دھمردہ ءُ جمال الدین گورگیج ءِ ناماں زانگ بیتگ اَنت اے مردم زابل ءِ زنداناں پاھو دیگ بیتگ اَنت-

مروچی بزانکہ پشمبے ءِ روچ ءَ ایرانی سرکار ءِ پرمان ءَ ھشت کس پاھو دیگ بیتگ اَنت –

ایرانی سرکار ءَ اے درگت ءَ تنی وھدی اے مردمانی بارو ءَ دگہ درشان شنگ نہ کرتگ ءُ نانکہ اشانی بارو ءَ دگہ گپ دیم ءَ آوارتگ اَنت بلے یکشل ءَ روکپتی بلوچستان ءَ مردمانی پاھو دیگانی درچ برجاہ اَنت کہ آیانی سر ءَ سرکار ءِ نیمگ ءَ گیشتر نشہ باپاری ءِ بھتام ھست اَنت –

روکپتی بلوچستان ءَ مردمانی پاھو دیگ ءَ مھلوک ءِ درشانانی رد ءَ سرکار مردماں وتی سپائی کنگ ءِ موہ نہ دنت ھنچش گرگ ءُ پاھو دیگ اِنت ءُ اشی ءِ زھر ءِ درشان ایران ایمسنٹی ءَ ھم کرتگ ءُ آئی ءَ روکپتی بلوچستان ءَ مردمانی پاھو دیگ ایر جتگ ءُ سرکار ءَ مردمانی سپائی دیگ ءِ لوٹ کرتگ-

بلوچستان ءِ تیابدپی شھر گوادر ءِ ھند اورماڑہ ءِ چار راہ ءِ سر ءَ حق دو تحریک ءِ نندانک برجاہ، روانی مھتل-

گوستگیں ھپتگ ءَ حق دو تحریک ءِ سروک مولانا ھدایت الرحمان بلوچ ءَ گوادر ءَ یک پریس کانفرنسے ءَ تران کنان ےَ گوشتگ اگاں بلوچستان ءِ سرکار مسامانی سرجم کنگ ءَ بے سوب بیت گڑا دوبر زھرشانی ءُ نندانک برجاہ بنت-

حق دو تحریک ءِ جار ءِ پد یک روچی نندانکے مروچی اورماڑہ ءَ بندات بیتگ، ءُ پسنی ءُ گوادر ءَ ھم نندانک بیگی اَنت-

حق دو تحریک ءِ سروک مولانا ھدایت الرحمان بلوچ ءَ گوشتگ ھما مردم اے سرپد بنت ما بے تواری ءَ نندیں اے آیانی ردی اِنت – اے یک جاھے ءِ نندانک، نادلگوشی ءِ تہ ءَ اڑیتگیں مردم مردمانی بھر زیرگ ءَ گند اَنت-

آئی ءِ گوشگ اَت سرکار ءَ گوش آں وتی چماں پچ بہ کنت، الکاپی ءَ دلگوش بہ دنت جیڑھاں بہ گیشین ایت، مارچ ءَ داں گوادر، کیچ، پنجگور ءُ دگہ شھراں یکشلی ءَ اے وڑیں نندانک برجم بنت – لوٹ منّگ نہ بیت اَنت گڑا یکم مارچ ءَ پد ءَ گوادر ءَ نندانک برجم دارگ بیت اِنت-

زانگ بہ بیت بلوچستان ءِ سرکار ءُ حق دو تحریک ءِ میان ءَ مسام کہ بیتگ اَنت آیانی رد ءَ بلوچستان ءِ زر ءِ سیمسراں گیرکانونی ءَ دریا وردانی ھلاپ ءَ ترندیں گامگیج ءُ اشی ءِ دارگ ءِ ھاتر ءَ مھکمہ ءِ ماھی گیر ءُ ماھی گیر ھمگرنچیں پیٹرولنگ کن اَنت-

گیر کانونی ماھی گیری ءِ دارگ ءِ ھاتر ءَ ھما مسامانی رد ءَ اسسٹنٹ ڈائریکٹر فشریز مٹ بیتگ، پسنی، اورماڑہ ءُ لسبیلہ ءِ دمگاں اگاں ٹرالر گندگ بیت گڑا اسسٹنٹ ڈائریکٹر فشریز ءِ ھلاپ ءَ کاروائی کنگ بیت اِنت-

اے مسام ءِ رد ءَ ٹرالرانی زور ءَ گیر کانونی ماھی گیری ءِ دارگ ءِ ھاتر ءَ ھمگرنچیں پیٹرولنگ چریشی ءَ انتزامیہ ءُ ماھی گیر ھوار بنت-ءُ ماھی گیرانی نمائندگاں سرجمی ءَ مھکمہ فشریز ءِ کارگس ءَ یک ڈیسکے دیگ بیتگ-

ھمے وڑ سیمسرانی کار ءُ بار ءِ سر ءَ بندش دور کنگ ءُ سیکورٹی پوجی چیک پوسٹاں مھلوک ءِ کمشرپی دور گیر کانونی چیک پوسٹ دور کنگ بنت –

بلے دان انگت ءَ حق دو تحریک ءِ رد ءَ ھچ رنگیں لوٹانی سرجمی نہ بیتگ ءُ بلوچستان ءِ سرکار وتی زبان ءَ بجیتگ –

پاکستان ءِ اُستان پنجاپ ءِ بنجاھی شھر لاھور ءَ مروچی پشمبے ءِ روچ ءَ یک تراکے بیتگ، تراک ءِ زمہ واری بلوچ آجوئی دوستیں سلاہ بندیں گل بلوچ نیشنلسٹ آرمی ءَ منّ اِتگ –

تراک لاھور ءَ انار کلی بازار ءَ بیتگ، ایم ایس میو ھسپتال ءِ رد ءَ تراک ءَ دوازدہ زدگ بیتگیں مردم ھسپتال ءَ آرگ بیتگ اَنت کہ چریشانی تہ ءَ پنچ کسانی جاور ناگیگ گوشگ بیتگ اَنت ءُ ریسکیو ءِ نیمگ ءَ گیش زدگ بیتگیں مردم ھسپتال ءَ آرگ بیگ ءَ اَنت –

ایم ایس ءِ گوشگ اَت زدگ بیتگیں مردمانی کچ گیش بوگ ءِ گمان اِنت چریشی ءَ ھسپتال گامگیج زورگ ءَ اِنت-

بلوچ نشنلسٹ آرمی ءِ جارکش مرید بلوچ ءَ چاگردی رسانکجاہ ٹوئٹر ءَ یک کسانیں درشانے ءِ تہ ءَ اے تراک ءِ زمہ واری منّ اتگ ءُ گوشتگ اُرش ءِ نشانگ بینک بیتگ –

بلوچستان ءِ دمگ کوھلو ءِ ھند کاھان ءَ دو ماہ ءَ پیسر آوار جنگ بیتگیں ورنا انگت ءَ یلو کنگ نہ بیتگ-

دمگی مردماں ٹی بی پی ءَ گوں گپ کنان ءَ گوشتگ گوستگیں سال ءِ ھژدہ نومبر ءَ کاھان ءِ دمگ پھش ءَ پوجی لشکر کشی ءَ پاکستان ءَ بھڈا نامیں ورنایے دزگیر کرتگ ءُ ناشناسیں جاھے ءَ برتگ چریشی ءَ آئی ءِ بارو ءَ ھچ رنگیں سرپدی نہ بیتگ-

آوار جنگ بیتگیں ورنا شوانگے ءُ لوگ ءِ یکیں والینوک بیتگ-

ورنا ءِ کھول ءَ سیاسی پاٹی ءُ انسانی ھکانی گلاں گوں دزبندی کرتگ ءُ گوشتگ ورنا ءِ یل کنگ ءَ وتی کرد ءَ پیلو بہ کن اَنت-

لوٹ ءُ تلب واھشت ھزار کربان کتگ

لچہ: سراج ساحر

دی بلوچستان پوسٹ

لوٹءُ تلب واھشت ھزار کُربان کتگ
ما کہ زمین زرتگ وتی ایمان کُتگ

اے ھاک کہ شان ءُ مڑاہ ئے پتّریں
اے ھاک مئے ھُونانی نکشیں دپتریں
اے ھاک پمّا چو تِلاہ ءُ گوھریں
چو سُرمگءَ اے ھاک ما چمّان کتگ

اے کوہ کہ مِکّاں چو بولان ایں سراں
اے کوہ ازل پمّا چو جنگی سنگراں
اے کوھاں پاسپان ایں زمینءِ کُنگراں
چو آھو ءَ ھر نیمگ ءَ تِردّان کتگ

اے زِر کہ چو ھونانی لھڑیں چؤل جنت
اے زِر دگہ ھمّل ھزار پیداک کنت
روچے سراج آجوئیءِ بوجیگ تچنت
قولءُ کسم ھاکءِ وتی پئیمان کتگ

چارشمبے ءِ روچ ءَ بوتگیں یورپئین پریمئیرلیگ فٹبال گوازی ءَ ٹوٹنھم ءَ لسسٹر سٹی ءِ دیم ءَ سَے پہ دو ءُ مانچسٹر یونائیٹڈ ءَ برینٹفورڈ ءِ دیم ءَ سَے پہ یک گولے ءَ گوازی کٹ اِتگ –

ٹوٹنہم ءُ لسسٹر سٹی ءِ میان ءَ بوتگیں گوازی ءَ بوتگیں گوازی ءَ ھردو ٹیمانی لیبیاں جوانیں لیب پیش داشت ءُ گوازی ءِ گڑی ءَ ٹوٹنہم ءِ نیمگ ءَ چہ سیمی گول اسکور کنگ بوتگ – لسسٹر سٹی ءِ نیمگ ءَ چہ دو گول اسکور کنگ بوتگ کہ لسسٹر لیبی پی. ڈاکا ءُ جے.میڈسن ءَ داتگ انت وھدیکہ ٹوٹنہم ءِ نیمگ ءَ چہ سَے گول اسکور کنگ بوتگ کہ یک گولے ایچ کینے ءَ داتگ دو گول اسٹیون ءَ اسکور کتگ ءُ گوازی وتی ٹیم ءِ نام ءَ کتگ –

پریمئیر لیگ ءِ دومی گوازی برینٹفورڈ ءُ مانچسٹر یونائیٹڈ ءِ میان ءَ کنگ بوتگ کہ مانچسٹر یوناٹیڈ ءَ دو گول ءَ گوازی کٹیتگ وھدیکہ برینٹفورڈ نیمگ ءَ چہ یک گول اسکور کنگ بوتگ –

مانچسٹر یونائیٹڈ نیمگ ءَ چہ اے.ایلنگا، ایم.گرینووڈ ءُ ایم. رشفورڈ ءَ یک یک گولے اسکور کتگ برینٹفورڈ ءِ نیمگ ءَ چہ لیبی آئی.ٹونی ءَ گول اسکور کتگ –

بلوچ آجوئی لوٹوکیں سلاہ بندیں گل بلوچ نیشنلسٹ آرمی ءِ جارکش مُرید بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مروچی مئے سرمچاراں بیگاہ ءِ ادار چار ءَ کیچ ءِ دمگ کولواہ کڈ ہوٹل کریم بخش بازار ءَ زورگیریں پاکستانی پوج ءِ کاروان ءِ سر ءَ اُرش کتگ –

جارکش ءَ گوشتگ کہ نوکتریں ءُ وتکاریں سلاھانی گوم ءَ زورگیریں پاکستانی پوج ءِ سر ءَ ھما وھد ءَ اُرش کتگ وھدیکہ پہ لشکرکشی ءَ بازار ءَ رؤگ ءَ بوتگ اُرش ءِ آسر ءَ پوج ءِ چار کارمند مُرتگ ءُ بازینے زدگ بوتگ اَنت وھدیکہ پوج ءِ گاڑیاں سک باز تاوان رس اتگ –

جارکش ءَ گوشتگ کہ ترندیں اُرش ءَ پد زورگیریں پوج ءَ تربت ءَ بالگرد وتی کمک ءَ لوٹارینتگ انت زوگیریں بالگردانی شیلنگ ابید ھم مئے سرمچار وش ءُ سلامتی جنگ جاہ ءَ چہ درآجگ ءَ سوبمند بوتگ انت –

جارکش ءَ گڈسر ءَ وتی درشان ءِ تہ ءَ گوشتگ کہ اے دابیں اُرش بلوچستان ءِ آجوئی ءَ تاں برجاہ مان انت –

بلوچ نودربر آلائنس نیمگ ءَ مروچی بلوچستان ءِ بنجاھی شھر شال ءَ بلوچستان شاھدربرجاہ ءَ چہ زورانسری آوار جنگ بوتگیں نودربر سھیل بلوچ ءُ فیصیح بلوچ ءِ یل کنائینگے ھاتر ءَ زھرشانی کنگ بوتگ –

مروچی چارشمبے روچ ءَ شال پریس کلب ءِ دیم ءَ بیگواھیں سنگتانی یل کنائینگے زھرشانی ءَ نودربر، سیاسی ءُ چاگردی گلانی باسکاں ھوار بیگواھیں مردمانی کھولاں ھم بھر زرتگ –

زھرشانی کنوکانی دست ءَ بیگواھیں مردمانی اکس پلے کارڈ بوتگ انت وھدیکہ زھرشانی ءَ مچ ءَ چہ زورانسری آوار جنگ بوتگیں ودود ساتکزئی ءِ گھار ھم ھوار بوتگ –

زھرشانی ءَ ترانکارانی گوشگ ات کہ بلوچستان شاھدربر جاہ ءَ سیکورٹی پوج ءِ دست ءَ زورانسری آوار جنگ ءُ بیگواہ بوتگیں سھیل بلوچ ءُ فصیح بلوچ ءَ شاھدربر جاہ ءَ آوار جنگ بلوچستان ءَ نودربرانی بگیری ءَ ریاستی کریک ڈاؤن ءِ درچ ئے – دو ماہ پر گوستگ بلے شاھدربرجاہ ءَ آوار جنگ بوتگیں نودربر زاھر کنگ نہ بوتگ انت –

ترانکارانی گوشگ ات کہ شاھدربرجاہ ءَ سنگتانی زورانسری آوارجنی ءِ بگیری ءَ نودربرانی الائنس نیمگ ءَ کنگ بوتگیں زھرشانی سرکار دروگ بستگ ءُ ھلاس کنائینگے کوشست کتگ وھدیکہ سرکار ءِ نیمگ ءَ نودربرانی یل کنگے ڈیڈلائن ہم ھلاس بوتگ بلے مئے آوار جنگ بوتگیں سنگت یل کنگ نہ بوتگ انت –

زھرشانی کنوکانی گوشگ ات کہ سوبائی وزیر عبدالرحمن کھیتران زھرشانی کنوکیں نودربرانی گوم ءَ باز رند ءَ گند نند کتگ ءُ سرکار ءِ نیمگ ءَ باور کنائینگ ءَ پد وھدیکہ زھرشانی ھلاس بوتگ انت گڈا سوبائی وزیر نیمگ ءَ جیڑہ سر ءَ ھچ گوشگ نہ بوتگ – نودربراں گوشتگ کہ بیگواھیں نودربر دانکہ دیم ءَ آرگ نہ بنت زھرشانیانی درچ برجاہ بیت اتنت –

زھرشانی ءَ ھواریں مچھ ءَ چہ پوج ءِ دست ءَ زورانسری آوار جنگ بوتگیں ودود ساتکزئی ءِ گھار ءَ گپ جنان ءَ گوشتگ کہ آئی برات ودود ساتکزئی ءِ زورانسری آوار جنی ءَ شش ماہ سرجم بوتگ برات ءِ یل کنائینگے ھاتر ءَ بازیں زھرشانی کنگ ءَ ھوار کمیشن ءِ گور ءَ کیس ءِ جمع کنگ ءَ ابید ھم برات دیم ءَ آرگ نہ بوتگ –

ودود ساتکزئی گھار گل زادی بلوچ ءِ گوشگ ات کہ ودود ساتکزئی دمگی دلار ءَ ڈن ءَ لوٹارینتگ دمگی مردمانی دیم ءَ پوج ءِ دست ءَ داتگ – گل زادی ءَ لوٹ کتگ گوشتگ کہ آئی برات ودود ساتکزئی دیم ءَ آرگ بہ بیت کانودی وڈو ڈول ءَ آئی ھک دئیگ بہ بیت –

زھرشانی ءَ پشتون تحفظ مومنٹ باسک ھم ھوار بوتگ انت زھرشانی کنوکاں سوبائی سرکار ءَ چہ لوٹ کتگ شاھدربرجاہ ءَ آوار جنگ بوتگیں نودربر زوت دیم ءَ آرگ بہ بنت ءُ یل کنگ بہ بنت –

زانگ بہ بیت سھیل بلوچ ءُ فصیح بلوچ ءِ زورانسری آوار جنی ءِ بگیری ءَ زھرشانی میان ءَ گوستگیں بازیں روچاں بلوچستان شاھدربرجاہ ھم بند کنگ بوتگ وھدیکہ زھرشانی کنوکاں گوشتگ کہ اگاں مئے نودربریں سنگت دیم ءَ ارگ نہ بوتاں گڑا نودربر الائنس وتی زھرشانیاں برجاہ داریت –

بلوچستان ءَ زورانسری آوار جنگ بوتگیں سیاسی باسکانی پانکجنیں گل وائس فار بلوچ مسنگ پرسنز ءِ سرکماش نصراللہ بلوچ ءَ وتی شنگ کرتگیں درشان ءِ تہ ءَ گوشتگ کہ ھژدہ جنوری ءَ بوتگیں بلوچستان اسمبلی اجلاس ءِ کاروائی چارگے ھاتر ءَ من ھمود ءَ سوبائ اسمبلی ءِ گلیری ءَ ساڈی بوتگ انت کہ اودا وزیر داخلہ گوشتگ کہ وائس فار بلوچ مسنگ پرسنز ءَ سَے سد ءُ نود مردمانی کیس داتگ انت ءُ آھانی تہ ءَ سَے سد ءُ بیست مردم یل کنگ بوتگ –

آئی ءَ وزیر داخلی درشان راست کنان ء گوشتگ کہ سال دوھزار نوزدہ ءَ تاں روچ مروچی آئی ءَ سوبائی سرکار ءَ ھشت سد ءُ ھپتاد راستیگیں کیس داتگ انت کہ اے میان ءَ چار سد ءُ نود ءُ پنچ مردم یل کنگ بوتگ –
نصراللہ بلوچ ءَ گوشتگ کہ سال دوھزار نوزدہ ءَ گل ءِ نیمگ ءَ چہ سوبائی سرکار ءِ گون ءَ گند نند بوتگ گڑا سوبائی سرکار ءَ گوشتگ کہ ھما بیگواھیں مردمانی کھول کہ شمے گور ءَ اتکگ انت گڈا آ بیگواھیں مردمانی درگت ءَ جوڈ کنگ بوتگیں وی بی ایم پی فارم ءَ پُر بہ کن انت ءُ آھانی کھول ءِ دزنشان ءَ بہ جن انت سوبائی سرکار ءَ سر بہ کن انت- سوبائی سرکار آھانی یل کنگ ءَ وتی کرد پیلو کنت – گڈا اے درگت ءَ گل ءَ بیگواھیں مردمانی کیسانی یک راستیگیں امل ءِ بندات کتگ کہ ھنگت برجاہ انت ءُ ھر وھد ءَ سرکار ءَ آھانی کیس دئیگ ھم بوھگ انت –

نصراللہ بلوچ ءَ گوشتگ کہ گل ءَ 5128 بیگواھیں مردمانی لڑ ءِ بلوچستان نیشنل پاٹی ءِ سرکماش سردار اختر مینگل ءَ ھم داتگ کہ آئی ءَ پاکستان اسمبلی ءَ وتی تران ءِ میانءَ قومی اسمبلی اسپیکر داتگ کہ نوں قومی اسمبلی ءِ ریکارڈ ءِ بھرے جوڈ بوتگ کہ آھانی تہ ءَ ھمے زوتاں قومی اسمبلی ءِ نیمگ ءَ اولی بر ءَ کساس ھشت سد کیس بیگواھیں مردمانی درگت ءَ جوڈ کنگ بوتگ ءُ کمیشن ءَ دئیگ بوتگ کہ آھانی تہ ءَ یک سد ءُ سِی ءُ شش بیگواھیں مردمانی کیس ءِ پیشی شال ءَ سَے جنوری ءَ بندات بوتگ کہ بیست ءُ نُھ جنوری ءَ تاں برجاہ بیت اتنت –

زانگ بہ بیت کہ کمیشن چیردستی ءَ سماعت ءِ اے کیس ریگولراں کیساں چہ جتا انت –

نصراللہ بلوچ ءَ گوشتگ کہ ھژدہ جنوری ءِ اجلاس ءَ ایم پی اے نواب اسلم رئیسانی ءَ سوبائی اسمبلی ءِ اسپیکر، بلوچستان ءِ وزیر اعلی ءُ مشیر داخلہ دلگوش بلوچستان ہائی کورٹ ءِ شانزدہ نومبر دوھزار بیست ءُ یک ءِ آرڈر نیمگ ءَ ترینتگ کہ آمیدگس ءَ سوبائی سرکار ءَ سرکار داتگ کہ بیگواھیں یل کنگ ءُ آھانی کھول ءَ جیڑہ جنجالانی گیشگیواری درگت ءَ یل بااختیاریں جوڈ کنگ بہ بیت اسپیکر ءَ رولنگ داتگ کہ آمیدگس ءِ ھکم ءَ پد سوبائی سرکار ءِ زمہ واری بیت کہ زوتاں زوت پارلیمانی کمیٹی اڈ بہ دنت گڑا مشیر داخلہ میر ضیا لانگو ءَ اسپیکر باور کنائینتگ کہ کہ سوبائی سرکار سَے روچ ءِ تہ ءَ کمیٹی ءَ اڈ دنت اے درگت وزیر اعلی بلوچستان میر قدوس بزنجو ھم ایوان باور کنائینتگ کہ بیگواھیں مردمانی یل کنگ ءَ وتی کرد ءَ پیلو کنت کہ جوانیں املے ءُ ما آئی قدر نگاھاں چاریں ءُ امیت کنیں کہ سوبائی سرکار بیگواھیں مردمانی یل کنائینگ ءَ ءُ زورانسری اوار جنیانی وتی کرد ءَ پیلو کنت ءُ گمزدگیں کھولاں چہ اے ازاب ءَ رکینیت-

روکپتی بلوچستان ءِ دمگ ایرانشھر ءَ پھزداری تیرگواری ءَ دو کس زدگ بیتگ اَنت –

گیشیں ھالانی رد ءَ روکپتی بلوچستان ءِ دمگ ایرانشھر ءَ ایرانی انٹی نارکوٹکس ءَ تیرگواری کرتگ ءُ چریشی ءَ شھری زدگ بیتگ اَنت-

ھالانی تہ ءَ گوشگ بیتگ کہ ایرانی انٹی نارکوٹکس ءَ لس پوشاکی مردمی گدانی تہ ءَ اے دومردمانی رندگیری کنان ءَ اے ھردوک تچگ ءَ دلمانگ بیتگ اَنت بلے چریشی ءَ پیسر آ بہ تچ اَنت ایرانی انٹی نارکوٹکس ءَ تیرگواری کرتگ ءُ زدگ کرتگ –

وئیل ءَ زدگ بیتگیں مردمانی بارو ءَ انٹی نارکوٹکس ءِ گوشگ اِنت اے مردمانی گون ءَ نشہ ءِ بھتام ءَ ما آیانی رندگیری کرتگ ءُ چریشی ءَ آ تچگ ءَ دلمانگ بیتگ اَنت گڑا ما آیانی سر ءَ تیرگواری کرتگ –

زدگ بیتگیں مردمانی گور ءَ چوشیں مواد دز نہ کپتگ چریشی ءَ آیانی ءَ سر ءَ دارگ ءِ بھتام ءَ تیرگواری بہ بیت بلے زدگ بیتگیں مردمانی گوشگ اِنت ما ھمے واستا تچگ ءَ دلمانگ بیتگ اِنت بلکیں اے دُز اَنت ءُ چریشی ءَ وتی رکینگ ءَ تچگ ءِ شوربندی کرتگ –

ایرانی اے سال ءَ روکپتی بلوچستان ءَ چوشیں بیتگیں وئیلانی تہ ءَ دَہ درسد گیشی گندگ ءَ اتکگ کہ آیانی تہ ءَ تیل کشانی سر ءَ تیرگواری ءَ ھوار دگہ وئیل ھوار اَنت –