TBP Balochi

بلوچستان لبریشن فرنٹ ءِ جارکش میجر گھرام بلوچ ءَ رسانکدراں شنگ کُتگیں درشان ءِ تہءَ پاکستان نیوی کیمپ ءِ سرءَ دستی بمب تراک ءِ زمہ واری من اِتگ۔

بی ایل ایف جارکش میجر گھرام ءَ گُشتگ کہ گوستگیں شپ ءَ ادار دہ ءُ چِل ءَ سرمچاراں گوادر سربندب ءَ پاکستان نیوی ءِ کیمپ سرءَ دستی بمب ءَ گوں اُرش کُتگ ۔ اُرش ءِ آسر ءَ قوضہ گیریں لشکرءَ جانی ءُ مالی تاوان رس اِتگ۔

آئی ءَ گُشتگ کہ اُرش ھما وھدءَ کنگ بیتگ کہ پاکستانی صدر عارف علوی، بلوچستان ءِ وتگڑیں سر وزیر ءُ گورنر دو روچی ترءُتاب ءَ گوادر ءَ جاڑیگ بیتگ اَنت۔

میجر گھرام بلوچ ءَ گیشتر گُشتگ کہ زوراکیں پاکستانی پوج ءِ سرءَ اُرش ایردستیں بلوچستان ءِ آجوئی ءَ داں برجاہ مان اَنت۔

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ نیول اسٹیشن ءِ سرءَ بیتگیں اُرش ءِ زمّہ واری منّ اِتگ ءُ گوشتگ کہ گوستگیں روچ ءَ مئے سرمچاراں تربت ءَ برجاھیں زورگیریں پاکستانی پوج ءِ نیول اسٹیشن ءِ سر ءَ بی ایم 12 گولہ آس داتگ، کہ ٹارگٹ ءِ سر ءَ کپتگ انت، تراک ءَ چہ زورگیریں پوج ءَ جانی ءُ مالی تاوان ءِ دیمپانی بوتگ –

جارکش ءَ گوشتگ کہ اُرش ءَ پد زورگیریں پوج ءَ چاریں نیمگاں بازیں مارٹر گولہ آس داتگ بلے پدا ھم بلوچ سرمچار گوں جوانیں شوربندیاں اودا درآھگ ءَ سوبمند بوتگ اَنت –

جارکش ءَ گوشتگ کہ اُرش ءِ زمہ واری بی ایل اے منّ ایت ءُ زورگیریں پوج ءِ سرجمی ءَ در آھگ ءَ تاں مئے جھد برجاہ مانیت –

سربوتگیں ھالانی رِد ءَ بلوچستان ءِ تیاب دپی دمگ گوادر ءَ ناشناسیں مردماں پاکستانی نیوی پوج ءِ بنجل ءِ سر ءَ اُرش کُتگ –

اُرش گوادر ءِ دمگ سربندن ءَ زِر ءِ کَش ءَ برجاھیں پاکستان ءِ میرین بنجل ءِ سر ءَ کنگ بوتگ – ھالانی رِد ءَ ناشناسیں مردماں پوج بمب تراک اُرش ءِ نشانگ جوڈ کتگ –

اھوالکار رِد ءَ اُرش ءِ آسر ءَ پوج ءَ جانی ءُ مالی تاوان ءِ دیمپانی بوتگ بلے تنی وھدی پکائیں ھال نیست ءُ ناکہ سرکار ءِ نیمگ ءَ اے درگت ءَ چیزے گوشگ بوتگ –

زانگ بہ بیت اے اُرش ھما وھد ءَ بوتگ کہ پاکستان ءِ صدر عارف علوی ءُ بلوچستان ءِ مزن وزیر ءُ گورنر دو روچ ءِ ترءُتاب ءَ گوادر ءَ ساڈی بوتگ انت –

تنی وھدی اے اُرش ءِ زمہ واری ھم ھچ گل ءِ نیمگ ءَ منّگ نہ بوتگ –

اکس کمانچر بلوچ

نبشتانک: بلوچی زبان ءِ تہ ءَ نبشتہ کنگ آسان اِنت

نبشتہ کار: شاھد اھمد

دی بلوچستان پوسٹ

بلوچ ءَ بلوچی زبان ءِ تہ ءَ نبشتہ کنگ پرچا چوں ارزان اِنت چیاکہ اول ما بلوچ اِنت ءُ بلوچی زبان پہ ما وانگ ھچ گران نہ اِنت بلے ما بس اشتاپ کن ایں ءُ درونتاں ھورتی ءَ نہ چار ایں ءُ شری ءِ سر ءَ نہ وان ایں۔

بلوچی زبان ءِ تہ ءَ نبشتہ کنگ ءَ پیسر مارا لھتیں کار کنگ لوٹ ایت بہ چار نبشتہ کنگ وَ ارزان اِنت من وَ نہ گْوشگ ءَ آں کہ سک ارزان اِنت تئی کر ءَ گال گنج بہ بیت ءُ گال ءُ آئی ءِ مانا ترا الم یات بہ بنت ایشی ءَ چہ ابید کمے ایشی ءِ واست ءَ کار کنگ المی اِنت کار چے اَنت؟ ترا بلوچی وانگجاھاں ھور بوگ لوٹ ایت یک روچے الم ترا یک درونتے یات بہ بیت پد ءَ ھمے درونتانی سر ءَ ھمل ھم کنگ لوٹ ایت انچوشکہ تو ردی کن ئے ءُ وانگجاھے تہ ءَ استادے تئی ردیاں راست کنان کنت ءُ ترا وتی ردی چارگ لوٹ اَنت ءُ پد ءَ بہ چار تو چہ کُجا ردی کُتگ گڑا تو پَھم ئے انچوش میزان میزان ءَ دربران کن ئے ءُ پُوہ بہ ئے کسان کسانیں نبشانک ھم نبیسان کن ھمئے درگت ءَ تو سرپد بوھان کن ئے بلے ترا وتی ردیانی سر ءَ ھمل کنگ لوٹ ایت ءُ اشتاپ مہ کن بیدے استاد ءَ تو ھچ در نہ برئے یک برے تو پَھم اِت گڑا تو وت استادے جوڑ بَہ ئے دگہ نودربرانی ردیاں راست کنان کن ئے۔

اگاں چہ ترا ردی ءِ بیت گڑا تو وتی ردیاں دربر ئے ءُ پَھم ئے کہ تو چہ کُجا ردی کنگ ءَ ئے۔ بلوچی مئے شَھدیں زبان اِنت ایشی ءِ دربرگ پہ ما ارزان اِنت بس درونت وانگ لوٹ اَنت۔ تو چہ بلوچی زبان ءِ استادے ءَ دربرئے۔ من چہ استاد ابدلستار بلوچ ءَ بلوچی زبان دربرتگ۔ من مار اتگ اَت اگاں من بلوچے آں ءُ بلوچی زبان مئے وتی ماتی زبان اِنت گڑا من پرچا بلوچی زبان وانگ نہ زان آں ھمے ساھت ءَ منی جبین ءَ مارشتے ودی بوت پد ءَ من ھمے سوڑگ کُت من الم بلوچی زبان ءَ الم دربر آں۔

وھدے کہ مارا وت ءَ زبانے ھست اِنت گڑا پرچا دگرانی زباناں وانگ ءُ دربرگ ما وت ءَ پَھر بند ایں کہ ما انگریزی زبان ءَ زَبر ایں من نہ گْوش آں تو دری زبانانی زبان ءَ مہ وان بہ وان بلے وتی ماتی زبان بے ھال مہ کن اِت چیاکہ ما بلوچیں پیسر ءَ وتی ماتی زبان ءَ دربرگ ءِ جُھد ءَ بہ کن اِت۔ بہ بکش اِت منی گپانی مول ءُ مراد بلوچی زبان ءِ تہ ءَ نبشتہ کنگ ارزان اِنت۔

من وت دربرتگ تو ھم دربرئے۔
بلوچی زبان دیم ءَ دیمروئی بہ کنات۔ سلامت بات اِت بلوچ راج ءُ بلوچستان۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءَ پاکستانی لشکریاں کماشیں مردمے دزگیر کنگ ءَ پد بیگواہ کُتگ۔

بیگواہ بیتگیں مردمے پجار ابوالحسن ء یار مھمد ءِ نام ءَ بیتگ۔

اھوالانی ردءَ ابوالحسن ھپدہ جنوری ءَ لشکریاں چہ کیچ ءِ ھنکین زامران ءَ زیاض ء فتح مھمد، نثار ء فتح مھمد، مدی ء کھدہ سھراب ءُ بشام ءِ ھمرائی ءَ دزگیر کنگ ءَ پد بیگواہ کُتگ اَت کہ رندءَ ایندگہ مردم یل کنگ بیتگ اَنت بلے ابوالحسن داں انگت بیگواہ اِنت۔

زانگ بہ بیت کہ بلوچستان ءَ زورانسری بیگواھیانی وئیلاں یک ترسناکیں جاورھال ءِ ودی بیتگ وھدیکہ وی بی ایم پی اے زورانسری بیگواھیانی ھلاپ ءَ گوستگیں یک دھک ءَ چہ یکشل ءَ زھرشانی کنگ ءَ اِنت۔

کاونٹرٹیررزم ڈیپارٹمنٹ(سی ٹی ڈی) ءَ رسانکدراں ٹاہ داتگ بلوچستان ءِ دمگ کوھلو ءَ بازیں کچے ءَ زمین ءَ کلیں سلاہ دستیگ کتگ اَنت آیانی تہ ءَ تراکناکیں شورو ھم ھوار بیتگ –

سی ٹی ڈی ءِ جارکش ءِ رد ءَ پوج ءَ کوھلو ءَ یک بیڑے ءِ وھد ءَ ناشرکارانی کلیں سلاہ دستیگ کرتگ اَنت-

گیشیں اھوالانی تہ ءَ سی ٹی ڈی ءِ جارکش ءَ اے ٹاہ داتگ پوج ءَ 40 گولہ، 140 فیوز، 65 مارٹر گولہ، 20 دزبمب، 5راکٹ لانچر، 170 راکٹ گولھاں ھوار بازیں کچے ءَ انٹی ایئرکرافٹ تیر دزکپتگ اَنت-

کاؤنٹر ٹیرزم ڈیپارٹمنٹ ءَ اے ٹاھانی رد ءَ اے سلاہ ءُ شورو بلوچ سلاہ بنداں چیر داتگ اَنت –

سی ٹی ڈی ءِ رد ءَ اے سلاھاں بلوچ سلاہ بند پوج ءِ سر ءَ کارمرد کنگی بیتگ اَنت-

نبشتانک: گُلامیں راج ءِ بے سریں کار پد

نبشتہ کار: جلال اهمد

دی بلوچستان پوسٹ

اے گپ ءَ سرجمیں دُگنیا سرپد اِنت کہ بلوچ راج یک گُلامیں راجے ءُ بلوچ وتی زمین ءِ وتواجہ نہ اِنت، بلوچ ءَ سر ءَ اُرش کنگ بُوتگ ءُ آیانی زمین چہ آیاں پُلگ بُوتگ چریشی ءَ ابید بلوچ راج ءَ را بهر ءُ بانگ کنگ بُوتگ کہ بلوچ راج تاوان بهر بہ بیت ءُ ایشانی زبان ءُ دُود گار ءُ بیگواه بہ بنت۔ اے وَ زاهریں گپے کہ اگاں یک راجے ءَ دُود ءُ زبان گار بہ بیت گُڑا آ راج ءِ جِند هم اے دُگنیا ءَ نہ مان ایت بلکیں گار بیت۔ اے دُگنیا ءَ توک ءَ باز انچیں راج هست کہ آیاں مرچی ءُ باندات جِند نہ مان ایت ءُ نام ءُ نِشان نیست اِت۔ نوں اِد ءَ ”یک سوالے چِست بیت کہ راج چیا گار ءُ بیگواه بنت”
وهدے کہ مزنین ءُ تاکتوریں راجے یک کمزوریں راجے ءِ سر ءَ اُرش کنت ءُ آیاں وتی گُلام جُوڑ کنت گُڑا آ راج تاوان بهر بیت چیا کہ آ وتی تاکت ءَ کمزوریں راج ءِ سر ءَ پیش دار ایت ءُ وڑ وڑیں پندل ساز ایت کہ راج هرچ وڑ ءَ ڈالچار بہ بیت ءُ گار بہ بیت۔ راج کہ گُلام بیت گُڑا آ راج وتی جُهد ءَ یل مہ کنت بلکیں هچبر گار نہ بیت۔ چیا کہ جُهد یک انچیں چیزے کہ ایشی ءِ مُز هر کسے ءَ را رس ایت کس چریشی ءَ بہ مُز نہ بیت، وهدے کہ راجے دْژمن ءِ زُوراکیں پندلاں گوں وت ءَ هوار مہ دنت ءُ آئی ءِ هکم ءِ منّوگر مہ بیت گُڑا آ راج اے دُگنیا ءَ مان ایت ءُ اَلّم کامیات بیت زُورگِریں دْژمن ءِ هکم ءِ رَد کنگ ءِ واست ءَ لس مهلوک ءَ را تِپاک بُوگ لوٹ ایت۔ چہ دُرساں مستریں چیز تِپاکی اِنت ءُ تِپاکی راجاں یک مُشت کنت ءُ چہ تاواناں رکّین ایت –
نوں ما بِچار ایں کہ مارا چینچو وهد اِنت کہ ما گُلام ایں ءُ روچ پہ روچ مئے سر ءَ زُلم گِیش بُوان اِنت ءُ نوں زُوراکی هما هدّ ءَ سر اِنت کہ دْژمن مئے مات ءُ گْوهاراں بے ننگ کنگ ءَ اِنت۔ زُلم انچوش تاکت ور اِنت کہ بلوچ راج ءِ زالبُولاں کم شرپ کنگ ءَ اِنت ءُ بلوچ ءِ دُوداں تاوان بهر کنگ ءَ اِنت ، بلے زُلم ءَ مستریں سبب اِش اِنت کہ ما وت ماں وت تِپاک نہ ایں ءُ وتی بلوچیں براتاں دْژمن ما وت ایں۔ ما انچوش وت ءَ وت کم شرپ کتگ کہ ما چاگرد ءَ ٹُوهیں ردیاں گوں وت ءَ هوار کتگ ءُ دْژمن ءَ پائدّگ دیگ ءَ ایں پہ چار کلدار ءَ واست ءَ ۔۔۔۔!

اگاں ما وتی هپت پُشت ءَ بِچار ایں گُڑا مارا همے سما بیت کہ مئے وهدی مردم چینچو راج دوست بُوتگ ءُ ما وتی راج ءَ را چِن کس تاوان دیگ ءَ ایں-
نوں آ سرجمیں گپاں وئیل کن ما انچو وت ءَ گُلام کتگ ءُ دْژمن ءَ هما زُوراکیں کار پد زُرتگ اَنت۔ البت ءَ ما انچو وتی مجگ ءَ را گُلام جُوڑ کتگ کہ ما وانگجاھانی توک ءَ هم نودربراں لٹ ءُ کُٹ کن ایں.

باید ما وت یک گُلامیں چاگردے ءِ واهُند ایں ، ما وتی راج ءِ باندات ءَ لٹ ءُ کُٹ مہ کن ایں پہ اِزّت ءُ شرپ آیان سرپدی بدئے ایں۔ تاکہ باندات روچ آ وتی گُلامی ءَ بہ مار اَنت ءُ وتی آجوئی ءَ جُهد بہ کن اَنت-

وهدے کہ ما وتی راج ءِ بانداتءِ سر ءَ دْژمن ءِ کارپداں کامرز کن ایں گُڑا راج ءِ باندات دلپْروش بنت ءُ مجگی گُلام جُوڑ بنت. نوں مارا انچیں کار پد کامرز کنگی اِنت کہ راج ءِ آؤکیں ورناه پہ راج ءِ زبان ءَ هاتر ءَ جُهد بکن اَنت ءُ آسُدگ بہ بنت-

دُوا اِنت گوں هُداوندیں پاک ءَ شالا بلوچ راج تِپاک ءُ یک مُشت بات ءُ زُوت آجو بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ بلوچستان ءِ دمگ کیچ ءَ پاکستانی نیوی بنجل ءِ سر ءَ اُرش کنگ بوتگ –

اھوالکار ءِ رِد ءَ مروچی پنچ شمبے شپ ءَ نیوی بنجل ءِ سر ءَ بی ایم راکٹ گولہ آس دئیگ بوتگ –

بنداتی ھالانی رِد ءَ راکٹ اُرش ءَ چہ ھچ وڈیں جانی تاوان ءِ ھال نیست ءُ ناکہ پوج ءِ نیمگ ءَ اے درگت ءَ دنیگت ءَ ھچ گپ دیم ءَ نہ اتکگ-

زانگ بہ بیت چدو پیش ھم کیچ ءَ پاکستانی پوج ءُ آئی ءِ بنجل ءُ پانگسانی سر ءَ راکٹ اُرش بوتگ کہ آھانی زمہ واری بلوچ اجوئی لوٹوکیں سلاہ بندیں گلاں منّ اِتگ انت بلے مروچی بوتگیں اُرش ءِ زمہ واری تنی وھدی ھچ گل ءَ نہ منّ اِتگ-

لاھور ءِ تراک زورگیریں پاکستانی پوج ماں بلوچستان ءَ زھگ ءُ زالبولانی کُشت ءُ کوشانی پَسّو ءَ کتگ۔ مرید بلوچ

بلوچ آجوئی لوٹوکیں سلاہ بندیں گل بلوچ نیشنلسٹ آرمی ءِ جارکش مرید بلوچ ءَ رسانکدراں وتی شنگ کرتگیں درشان ءِ تہ ءَ لاھور ءَ بوتگیں ریموٹ کنٹرول بمب تراک ءِ زمہ واری ءَ مَنّ اِتگ-

جارکش مرید بلوچ ءَ وتی درشان ءِ تہ ءَ گوشتگ کہ تراک ءِ راستیں نشانگ پاکستانی بینک ءِ کارمنداں ھوار پولیس کارمند اوں بوتگ اَنت کہ تراکءِ زدءَ اتکگ اَنت ءُ چہ آیاں گیشتر مرتگ ءُ زدگ بوتگ اَنت-

آئی ءَ گوشتگ کہ ما جھان ءَ ھوار زند ءِ تک ءُ پھناتاں سیادی داروکیں بنی آدماں پہ اے ھبر ءَ تچک کنگ لوٹیں کہ مئے اے تراک ءِ مول ءُ مراد ھمے بوتگ کہ ماں بلوچستان ءَ پاکستانی پوج ءِ بلوچ زھگ ءُ زالبولانی بگیری گَندگیں لَٹ ءُ کٹ ءُ شھیدی آنی سرا زھرشانی یے دیما بیاریں ءُ ما وتی مکسد ءَ سوبین بوتگیں-

جارکش ءَ گوشتگ کہ ما دنیا ءَ اے گشگ لوٹیں کہ پاکستانی پوج بلوچ راجی جھد ءِ لپاشگ ءِ ھاترا مئے گلزمین ءِ سرا سَکّیں گَندگیں دروشمے ءَ مئے پدریچ کُشی ءَ دزگٹ اِنت ءُ اے رَستریں لشکرکشی ءِ کمانداری چہ لاھور ءُ پنڈی ءَ بوھگ ءَ اِنت- داں کہ زورگیریں پاکستانی شیتانیں لشکر بلوچ راجی آجوئی ءُ لشکری لَڈءُ بارءُ در آھگ ءِ بابتءَ ھَکّی ئیں راجی رھشون ءَ گوں پُر بزانتیں گپ ءُ تران نہ کنت ما پاکستان ءِ دراھیں شھراں آئی ءِ مالی ، بیپاری ءُ پوجی نپ ءُ سیتّ آں دیمتر ءَ اوں نشانگ کن ایں۔

گڈسر ءَ جارکش ءَ وتی درشان ءِ تہ ءَ گوشتگ کہ مئے اُرش بلوچستان ءِ آجوئی تاں برجاہ مان انت –