TBP Balochi

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُپنچ سد ءُشست ءُ چار روچ سرجم بوتگ – بلوچ یکجہتی کمیٹی ءِ کنوینر بانک آمنہ بلوچ ڈپٹی کنوینر عبدالوہاب بلوچ، سیاسی ءُ چاگردی باسک میر سہیل بلوچ ءَ بنجلے تر ءُ تاب کتگ ءُ دلپدردی درشانتگ –

ھمے وھد ءَ وی بی ایم پی ءِ رھشون ماما قدیر بلوچ گوشتگ کہ ریاستی تاکتاں بلوچستان ءَ ھون ءُ آس ءِ دوزہ جوڈ کتگ ھمک روچ نوکیں داب ءَ زلم زوراکی کنگ ءَ انت بازیں دمگے وڈ وڈیں رپک ءُ ھنراں گیش ءَ چہ گیش نشانگ بوھگ ءَ انت –

آئی ءَ گوشتگ کہ پوج ءُ چیریں ادارھانی لشکر کشی ءَ بلوچانی زورانسری آوار جنی ءُ بیگواھیں مردماں زندانانی تہ ءَ ازیت دئیگ ءَ پد آھانی زانگولیں جونانی دست کپگ ھمک روچی کار ءِ جوڈ بوتگ-

نبشتانک: چیزے دانک پہ شھید کمانڈر خالد حیدر ءَ

نبشتہ کار: کار خان تگرانی

دی بلوچستان پوسٹ

لھتے یات انت ھمگرنچیں اگاں پدریچگ بہ بنت کتاب ءِ سرجم بیت منی وڑیں بے واک ءُ بے تھمبلیں مردم ءِ وس ءَ چہ ڈن انت بیبگر جان پھیل کن من ھردیں ند ءَ چست کناں تئی داتگیں دیمونیاں نبشتہ ءَ بکناں درستاں شموشاں بیھال باں اچ منی وس ءَ چے ڈن انت کہ شھیدانی کربانیاں دیم ءَ بیاراں شمئے داتگیں کربانی بے ھساب انت ءُ راجدپتر ءِ تاک پر بنت-

بیبگر جان ترا یات بیت 2014 سوچکان ءِ ماہ ات من پیسرا اوتاگ ءَ اتاں تو دگہ سنگتے شمارا اومر گون ات اوتاگ ءَ اتک ات اے وھد ءَ استاد کمبر اوتاگ ءِ سرکماش ات شما نوک 15 سنگت پہ ھیلکاری ھنر یات گرگ ءَ اتکگ اِت استاد ءَ من ءَ زمہ واری دات کہ سنگتاں ٹریننگ ھیلکاری یات دے ما شما سھب ءَ مہلہ پاد اتک ءُ شت اِنت سبزیں سکے ءَ ھمک روچ ٹریننگ کت ءُ سھب ءِ 9 ءَ اتک ءُ چاہ وارت ءُ استاد ءَ سرکل دات ءُ ھرکس وتی کاراں دلگوش ات ترا یات بیت استاد ءَ شمارا سوگند دات اکس کش اَنت تو وتی مسام ءُ سوگند پیلہ کت باریں مئے ھال چے بیت بسترے مرگ یا شھادت نسیب بیت تاں بیست روچ گوست ما پہ کارے درکپتیں شھر ءَ دو روچ رند ءَ شما من ءَ گوانکو کت استاد ءَ بگش مارا موکل دنت کہ پشپد ءِ مردم پریشان انت من پون کت شمئے موکل گپت ما شما شھر ءَ ھوار وتی دائمی کاراں دست بند اتیں من تو ھمک شپ شان ءَ پہ وپسگ ءَ شتیں تو منی سرا زھر ات ئے کہ تو دیر روے پہ وپسگ ءَ من گشت پل ھنچیں وھدے کیت کہ منی تئی سر زامران ءَ کپ ایت ترا بلکیں یات انت کہ من تو سندات بست کہ سھب ءَ مارا ھیلی مگند انت ھما سنداتوک انگت ھست انت گڑا یک روچے تو من ءَ پون کت کہ من بارڈر ءَ روگ ءَ آں وتی ھیال ءَ بدار سنگتے بر گوں ایوک ءَ مہ وپسءُ منی بیگ ءَ بیار گوں منی برات ءِ دست ءَ دے من بلکیں دیراں مھتل باں گڑا وھد گوازان ءُ جاور نگیگ ات اَنت ھمک شپ پوج ءَ بیڑ برت ءُ لوگ ءُ جاگھ سوچان کت انت مئے برات ءُ مردم گپت انت 2017 مولمان ءِ ماہ ءَ من زامران ءَ اوتاگ ءَ شتاں دہ ءُ پانزدہ روچ ءَ رند موکل گپت ءُ ڈیلکیک ءَ اتکاں تئی سر ءَ گوانکوے جت کہ من موکل اتگ وتی دمگ ءَ رواں تو من ء مکن کت کہ ایوک ءَ مرو ھمراھی ءَ رویں بیا مئے نیمگ ءَ ترا یکے بارت من گوشت شر من اتکاں جاور سک نگیگ ات اَنت چہ شھر ءَ لڈ ءُ بار کت ترا گاڑی ءِ گون ات مرز ءَ شت ءُ اتکے من مزدوری کت 2017 ءَ شما یوبی اے ءَ ھوار کپتے ءُ اوگانستان ءَ شت ات واتر کت یو بی اے کمان گچین کنگ بیت من ءَ ھم سلاہ اش جت کہ گوں ما بیا من گوشت من دگہ نیمگے کول ءُ مسام کتگ تو سنگت زرت انت زامران ءَ کیمپ کت اے وھداں پوج ءِ زوراکی گیش ات ھمک روچ تو پوج ءِ سر ءَ ارش کت پوج ءَ دار دپ ءَ داتگ ات من شمارا ھمے گوشت کہ پل پوج پہ کشگ نہ ھلیت ھوش ءُ گوش پہ سبر ءُ تھبل کار کن ات تو ھمے پسہ دات کہ چہ شھراں مارا گلینتگے کوہ ءَ مارا نئیلیت 2020 تاکشان ءِ ماہ ءَ مئے سر پہ شمئے اوتاگ ءَ کپت شپ ءَ ما شما ھور مجلس کت دومی روچ ءَ ما در کپگے ارادہ کت تو مارا سلاہ جت کہ شما منی گورا بدار ات سنگو دپ مان انت شوم زبان ئے ھرکس کہ شتگ واتر نہ بیتگ ما گوشت ما ارادہ کتگ وتی منزل ءَ رویں تئی چیزے سنگت گوں ما ھمراہ بیتاں تاں کلبر ءَ دگہ نیمگے شتاں ما واتری ءَ پد ءَ تئی اوتاگ ءَ دوشپ داشت تو سھب ءَ سنگتے راہ دات کہ پس ءِ بیار ات کشین وریں ما درکپتیں سنگتاں اشتاپ کت شپ ءَ ناچ ءُ سھبت شیر ءَ شائری کت سھب ءَ درکپتیں بلے من چیزے مار ات کہ شمئے اندر ءَ چیزے است بلے تو گوں ما راز چیر دات دریگتے من شمارا پولتیں بلے ما ھمے سرپد بیتیں کہ پارٹی رازے وت ماں وت ٹھیت تو مارا نیم راہ ءَ سر کت تو من ءَ انگت چیزے لبز دات کہ من کایاں ترا دیان ئے ما اتک ءُ لوگ ءَ سر بیتیں ماہ ءُ نیم ءِ گوست ھمے نہ وشیں ھال اتک کہ سنگت شھید بیتگ انت شھید ماجد شھید جلال ءُ شھید کمانڈر بیبگر دژمن ئے دیم پہ دیمی میڑھے بیتگ اے ھال ءَ مارا درستیں سنگتاں چہ اندر ءَ تھکش کت بلے زاھری وت ءَ ڈڈ کت کہ انچیں راھے کربانی راہ انت پھر کنگ لوٹ ایت دل ءَ کپگی نہ انت چراگ بے تیلءَ نہ بلیت آجوئی چراگ ھون لوٹ ایت شھیدی یک ابد مانی ایت پنچ ءُ شش روچ پرس ءُ سوگ ءَ رند مارا ھال ءَ سر بیت کہ سنگتانی وت ماں وتی جیڑھے سوب ءَ سنگت شھید بیتگ انت پھیل کن سنگت وتی ھکاں دریگتے شپ ءِ منی واب ءَ بیتکینے وتی سرجمیں کسھ بیارتین کہ چونیں سوبے بیت سنگتاں دروہ کت یا گرانیں بار ءِ سر ءَ کپت کہ سگ ات نہ کت تئی داتگیں دیمونی شموشگ نہ بنت شھیدی مراد بات بیا ترا ھالے دیاں کہ کیمپ ءِ سنگت شنگ ءُ شانگ سر بیتگ انت کاروائی اوشت ءِ آماچ انت اچ تو پد بازیں سنگتے لگور بیت بلے تو پہ وشنامی شتے انگت تئی ارواہ ءَ جنگ ءَ انت سرمچارانی دروشم ءَ وتن پھازانی دروشم ءَ دگھ ھالے ءَ سھی ئے سنگتاں دو سئے کیمپ دستی کتگ براس ءُ تگران ءَ کیمپ ءِ گپتگ سلاہ برتگ انت بی آر اے ءُ مرید یکجاہ بیتگ انت یک گلے جوڑ کتگ BN A نام ءَ –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اکس کمانچر بلوچ

نبشتانک: بھادنی سفر

نبشتہ کار: شعیب دُرا

دی بلوچستان پوسٹ

منی زند ءِ گیشتر وھد سفر ءِ توک ءَ گوستگ کہ بَرپیں شال ءُ تُربت منی مدامی ہمسفر بوتگ اَنت مدام سفر ءَ بندات ءَ ساری من ھمے جِیڑ اتگ کہ کہ باریں بس ءِ توک ءَ بلوچی سوت گوشدارگ بیت اگاں ناں بلے مدامی وڑ ءَ کوئٹہ ءں ڈرائیور پٹھان بیتگ اَنت ءُ اِشاں یک روچے ھم منی سفر ءِ توک ءَ بلوچی شوکیں سوتے ھم پر نہ کُتگ سفر ءِ توک ءَ منی مدام ھمے وَاھگ بیتگ کہ بس ھراب بہ بیت یا تو ٹاھر ءِ پنچر بہ بیت بیت کہ من وتی زمین (ڈیھ،ھَلک)ءَ شری ءِ سر ءَ بہ پَھماں بلے منی ھمے وَاھگّ ھچبر سرجم نہ بیتگ اَنت-

سفر ءِ توک ءَ مدام مردم وپس آں بلے کول ءِ ھما مرد ئیگ ءَ اے وڑ گومن نہ بیت من مدام وتی سفر پہ جِدّوابی گُوازینتگ آں بلے مروچیگیں سفر چہ اندیگاں سفر آں چہ سک باز دگہ وڑ اَت ءُ اے سفر ءِ توک ءَ موسم ءَ سفرار ءَ دو شش کتگ اَت ھمے جمبراں مھراستان ءِ کوھانی برمش ھتم کتگ ءُ الوت پرماتگ ءُ مھراستان ءِ ار ندارگ چو نوک سوریں بانور ءَ اَت مھراستان ءَ ار ندارگ گوں وت گپ ءُ تران کنگ ءَ اَت ءُ یک دمانے ءِ واستا منی دل ءَ ترانے چست بوت کہ ھمیں شوکیں نِدارگ آں گوں من دیوان بہ کُت اِنت ءُ ایشانی گوما وتی دل ءِ زنگ ءَ بوششتیناں بلے ھمیں رستر کہ منی مھراستان ءَ شوکیں نِدارگانی نیام ءَ چُو مَستیں لِیڑوا تَرانج کنگ ءَ اَنت من ءَ چہ ھمیشان بیم بوت کہ ایں من ءَ ورانت-

منزل نزدیک بوان بوت ھمے دمان اَت گوران رس اِت ءُ پنجگور ءَ زمستانی کوش ھم کشگ ءَ اَت ءُ مھراستان ءَ کوھاناں یک یک سوگاتے پہ من گون اَت بلے منی وڑیں نزانت کار ءُ لگور اے سوگات ءَ قابل نیت ءَ ءُ ھمے دمان ات کہ جمبر ءَ مارا نیم را دوریت پد ءَ سفر دیما جنزان بوت ءُ جمبر پد ءَ گوں ماں ہمسفر بوت گاڑی ءِ کانچ ءَ نمب ءَ گپت او انچوں گمان بوت کہ جمبر ھور کنت دیم ءَ ھمیں دمان ات کہ بس ھراب بوت بلے منی وھگ سرجم نہ بیت بس جلدی شر بوت ءُ موڑ ءِ ھراب کُت سفر ءِ توک ءَ من ھمے جیڑ اِت کہ منی وڑیں گنوک دگہ مھراستان ءَ است کہ منی وڑا بیچڑی ءُ منی وڑیں بہ مانائیں نبشتہ بکنت ءُ وتی لگوری ءَ زنگ ءَ بجنت-

مھرستان منی بے مھریں دشتار ءِ وڑ ءَ انت کہ ناکو گوش ایت تو مھرستان ءِ قابل نہ اِت ءُ تو یک لگوری ءِ تو پہ چُنڈیں نان ءَ چمدارے گڑا من گوشت من چے بکناں من ءَ منی مھرستان رس ایت گوش ایت کہ مھرستان ءِ چمدار باز انت ءُ مھرستان سانکل آں گون بستگ نو تو وت ءَ پہ مھرستان ءِ قابل بکن ءُ چہ اے سانکل آں آزادے بکن
من ءَ مھرستان ءِ گلامی ءِ سر ءَ سک درد بیت بلے منی وڑیں لگور ھچ کُت نہ کنت مھرستان ءَ کہ دنیا ءُ جھان ءِ مال ءُ مَڈی است بلے اے دُزگ ءُ برگ بوگ ءَ انت بس ھمیں گلامیں چاگرد ءَ نَمیرانیں چئیرمین غلام محمد ءِ وڑیں لیڈرے لوٹ ایت کہ غلامی ءِ ھلاپ ءَ اواز چست بکنت-

منزل ھمنچو نزدیک بوت ھنچوں جمبر گیشتر بوت اَنت ءُ چیزیں وھد ءَ پد منزل ھم سرجم بیت ءُ ھمسپر آں ھم مارا دُروھِت ھَر یکے ءِ گوں وت ءَ روت وھد گوزان اَت سفر ءُ گڈی منزل ءَ ماں لکپاس ءَ سر بوت اِنت ءُ جمبراں ھم شال جلواہ گیشتر کتگ اَت ءُ کُوھانی سر ءَ برپ کپتگ ات ھمے کوہ سک زیبدار ات اَنت ءُ یکیں دومی ءِ زیباھی ءِ کسّہ آرگ ءَ ات دور یک کوھے گوں ارسیں چماں پریاد کنگ ءَ اَت من کہ چم دیم پہ ھمے کوہ ءَ شانگ دات اَنت کوہ ءَ من ءَ دیست گوشتے بالاچ کُج انت من پسّہ دات کہ بالاچ نمیران انت گڑا پد ءَ پریاد ءَ شرو بوت من گوشت کہ تو پریاد چی ءَ کنگ ءَ ئے گڑا جوابے دات ھمے بھارگاہ ءَ نی بھارگاہ بُزگل ءُ گورم ءَ نی چراگاہ ابیتک انت پہ شوانگیں بالاچ ءِ گمیگ انت پہ نرمازیریں شیراں ھمے کوھانی گپاں رند من ھچ نگوشت ءُ وتی سر جھل کُت ءُ چیڑگ ءَ شرو بیت آں ءُ من وت ءَ را جُست کُت کہ تَھنا من ھمے کُوھانی گپ آں سَرپد ءُ اِشکُنگ آں یہ دگہ ھم است من ءَ منی ھمے جُست ءِ پَسو نہ رس ات من ھمے نِدارگّانی تَھا گار بوت اَنت نو من ءَ نبشتہ کنگ ھم تُرس ایت ءُ من وتی موبائل ھم بند کُت ءُ تَھنا گوں ملوری ءَ پورا من ءَ سیاھی ءَ مانشان اِت ءُ نو بھارانی سفر ھم سرجم بوت گوں شال ءَ زیبائی ءَ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ جتا جتائیں جاھاں گوستگیں 24 ادارانی تہ ءَ زھگاں ھوار نُھ مردم بیران ءُ ھپت زدگ بیتگ اَنت –

سر بیتگیں ھالانی رد ءَ شال ءِ دمگ پشتون آباد ءَ لوگے ءِ کپگ ءَ شش مردم بیران بیتگ اَنت –

ھالانی تہ ءَ گوشگ بیتگ پشتون آباد ءَ ھورانی گوارگ ءَ لوگے ءِ چھت کپتگ ءُ چریشی ءَ لوگ ءَ جاڑیگیں یکیں کھول ءِ شش مردم بیران بیتگ اَنت –

ھمے وڑ بلوچستان ءِ دمگ اوستہ مھمد گنداخہ تھانہ ءِ ھد ءَ ناشناسیں مردمان استاد مھمد افضل انڑ نامیں مردمے ءِ سر ءَ تیرگواری کرتگ ءُ کُشتگ ءُ تتکگ اَنت-

پولیس ءِ رد ءَ اوستہ مھمد ءَ تیرگواری کشگ بیتگیں مردم باغ ٹیل ءَ واتر وتی لوگ گوٹھ نوشکی ءَ روگ ءَ بیتگ کہ آ سھرانی گوٹھ ءِ نزیک ءَ تیرگواری کنگ ءُ کشگ بیتگ –

پولیس ءَ لاش چست کرتگ ءُ ھسپتال ءَ رسینتگ ءُ پولیس ءِ رد ءَ وئیل کوھنیں دشمنی ءِ سبب ءَ پیش اتکگ –

یک دگہ وئیلے سَے شمبے ءِ روچ ءَ شاہ نورانی ءَ چہ کراچی ءَ روکیں مساپر بریں بس مھبے فقیر لاھوت ءِ نزیک ءَ ڈرائیور ءِ دست ءَ لگوشتگ ءُ کپتگ-

شاہ نورانی وئیل ءَ یک زالبولے ءَ ھوار شش مردم زدگ بیتگ ءُ آ درمان کنگ ءَ نزیکین نادراہ جاہ ءَ برگ بیتگ اَنت –

چہ ھزدار ءَ شال ءَ روکیں گاڑی مستونگ ءِ نزیک ءَ وئیل ءِ آماچ بیتگ ےُ چریشی ءَ یونس زنگیجو بیران ءُ گوستھیں زکواہ آفیسر ھزدار عبدالحمید زدگ بیتگ ءُ آ دمگی نادراہ جاہ ءَ سر کنگ بیتگ اَنت-

ھمے وڑ ءَ ھرنائی ءَ نادر سینٹر ءِ نزیک ءَ ٹرک ءِ ٹکر ءَ زھگے بیران بیتگ ءُ ٹرک ڈرائیور تتکگ –

پاکستان ءِ بنجاھی شھر اسلام آباد ءَ جماعت اسلامی خیبر پختونخوا ءِ امیر ءُ سینیٹر مشتاق احمد ءَ سینٹ ءِ نیاد ءَ بلوچستان ءُ خیبرپختوانخوا ءَ زورانسری آوار جنھ بیتگیں مردمانی درگت ءَ چیئرمین سینٹ ءُ ہیومین رائٹس کمیٹی ءِ دلگوش وتی نیمگ ءَ کنان ءَ گوشتگ وائس فار بلوچ مسنگ پرسنز ءِ زھرشانی اے موسم ءَ پریس کلب ءِ دیم ءَ برجاہ اِنت –

آئی ءَ گُشتگ بلوچستان ءَ سعیدہ حمید زھری وتی پس ءِ یل کنائینگ ءَ زھرشانی ءَ نشتگ –

بلوچ، پختون مسنگ پرسنز ءُ سرجمیں پاکستان ءَ بیگواھیں مردمانی یل کنائینگ ءِ ھاتر ءَ سینیٹر مشتاق احمد ءَ سرکار ءِ پاکستان ءُ ہیومین رائٹس کمیٹی ءِ دلگوش گور کنگ گوشتگ-

چہ کراچی ءَ بیگواھ بیتگیں ھزدار ءِ دمگ زھری ءِ جھمنندیں عبدالحمید زھری ءِ کھول ءِ رد ءَ گوستگیں سال ءِ دَہ اپریل ءَ دمگی پولیس ءُ لس پوشاکی مردماں کراچی ءَ آیانی لوگ ءِ سر ءَ شپ ءِ نسپ ءَ بیڑ برتگ لوگ ءَ جاڑیگیں عبدالحمید زھری ء شکر خان گوں وت اش برتگ –

بیگواھیں عبدالحمید زھری ءِ لوگ بانک ءِ رد ءَ وئیل ءَ پد دمگی پولیس ءُ دگہ ادارھاں لوگ ءَ ابید ءِ وارنٹ ءَ بیڑ برگ ءُ عبدالحمید زھری ءِ دزگیری ءِ درگت ءَ شتگ اِنت گڑا دمگی پولیس ءَ اے گپ رد کتگ –

زانگ بہ بیت بیگواھیں عبدالحمید زھری ءِ کھول گوستگیں بازیں ھپتگاں زھرشانی ءَ نشتگ اَنت ءُ کراچی ءَ گوستگیں ھپتگ ءَ دو روچی شدھرتال ءَ نشتگ بیتگ اَنت-

پرویز جان ڈومکی ءِ مات پوج ءَ پہ زانت شھید کُتگ، آئی ءَ ھچ وڑیں مزاھمت نہ کُتگ – دوستین بلوچ

بلوچ آجوئی لوٹوکیں سلاہ بندیں گل بلوچ ریپبلکن گارڈز ءِ جارکش دوستین بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ گوستگیں شپ ءَ سبی ءِ دمگ لونی ءَ پوج ءِ گوم ءَ میڑ ءَ پد گل ءِ ریجنل کماندار پرویز جان ڈومکی وتی مات ءِ ھمراھی ءَ شھید بوتگ –

جارکش ءَ گوشتگ کہ دوشی شپ ءَ بوتگیں جنگ ءَ کماندار پرویز ڈومکی ءَ راجدپتری جنگے کتگ ءُ دژمن پوج ءِ یک مزنیں افیسر ءَ ھوار ھپت کارمند کُشتگ ءُ وتی گڈی تیر ءِ فلسفہ ءِ سر ءَ امل کنان ءَ یک تیر ءِ وتی سر ءَ وت جتگ –

جارکش ءَ دیمتر ءَ وتی درشان ءِ تہ ءَ گوشتگ کہ شھید پرویز ڈومکی سال دوھزار سینزدہ ءَ چہ بلوچ راجی سلاہ بندیں جھد ءَ گوں ھوار بوتگ ءُ آئی سبی، جعفرآباد ھوار دگہ کش ءُ کری دمگاں زورگیریں فوج ءِ سر ءَ بازیں کامیاتیں اُرش کُتگ آ یک کامیابیں شھری سرمچار ءِ بوتگ، آئی جوانیں کارکردگی ءِ سوب ءَ پنچ سال ساری ریجنل آپریشنل کماندار ءِ اگدہ داتگ – شھیدی ءَ تاں آئی ءَ وتی زمہ واری جوانی ءَ پیلو کُتگ، گل آئی دیمونیاں سھر چکیں دروت ندر کنت –

جارکش دوستین بلوچ ءَ گوشتگ ما رسانکدراں اے گپ ءَ تچکی ءَ گوشگ لوٹیں جنگ ءِ میان ءَ زورگیریں پوج ءَ پرویز جان ءِ مات دزگیر کُتگ بوتگ کہ وتی پوجیانی مرگ ءَ پد پہ زانت تیر جتگ ءُ شھید کُتگ کہ زورگیریں پوج ءِ پروش ورگ ءَ پدر کنت –

جارکش ءَ گڈسر ءَ وتی درشان ءِ تہ ءَ گوشتگ کہ ما سبی ءَ ھوار دمگی رسانکدراں مکن کنیں کہ آ زورگیریں پوج ءِ ترجمانی ءَ پھریز بہ کن انت اگاں ناں آ ھما نگاھاں چارگ بنت کہ زورگیریں پوج چارگ بیت اتنت ءُ آ نشانگ کنگ بنت –

بلوچستان ءِ دمگ کیچ ءِ کوھی دمگ کلبر ءُ مزن بند ءَ بازیں کچے ءَ پوجی لشکر کشی برجاہ اَنت ءُ چریشی ءَ پندی پوجیاں ھوار جنگی بالگرد ھم بھر زورگ ءَ اَنت-

سر بیتگیں اھوالانی رد ءَ گوستگیں روچ ءَ کلبر ءَ بندات بیتگیں پوجی لشکر کشی انگت ءَ برجاہ اَنت کہ چریشی ءَ پوجی بالگرداں ھوار بازیں کچے ءَ پندی پوجی بھر زورگ ءَ اَنت –

دمگی مردمانی رد ءَ بازیں جاھاں پوجی بالگرداں تیرگواری کرتگ ءُ ھمے وڑ بازیں جاھاں گولہ باری ءُ تیرگواریانی رد ھم وھد وھد ءِ سر ءَ برجاہ اَنت-

تنی وھدی لشکر کشی ءِ وھد ءَ دگہ ھچ وڑیں جانی تاوانی ھال نہ بیتگ اَنت-

دومی نیمگ ءَ مزن بند ءَ اے ھال اِنت کہ مروچی سھب ءَ بندات بیتگیں پوجی بیڑ ءَ بازیں کچے ءَ پندی پوجی بھر زورگ ءَ اَنت ءُ کوھانی تہ ءَ روگ ءَ گندگ بیتگ اَنت –

نبشتانک: وانگ پہ پنڈگے ءَ دربرت

نبشتہ کار: شاھد اھمد

دی بلوچستان پوسٹ

یک نودربرے ءِ واست ءَ پنڈگ ھیبے نہ اِنت بازیں نیزگاریں نودربر ھست اَنت کہ پینڑ اَنت کَسے ءَ پنڈگ نسیب ءَ نہ بیت ءُ وانگ ءَ ڈلگچار بیت ءُ بازینے ءَ زر نہ بوگ ءِ سبب ءَ وانگ یل داتگ اَنت ءُ شد ءُ تُن ءِ آماچ بوگ ءُ ڈنّی مُلکاں شُتگ اَنت-

بلے من مار اِتگ اَت بیدے وانگ ءَ شُد مارا گنتر گار کنت اتاشاد ڈگری کالج ءَ من وتی وانگ بندات کُت پروپیسر اِلائی بکش ساب ءَ من ءَ سک باز کمک کُتگ اَت آئی ءَ من ءَ وانگ ءِ مول ءُ مراد سوج دات کہ چے اِت؟ گڑا من واجھے گپ زُرت ءُ پہ نیک نیت ءَ وانگ بندات کُت ءُ اتاشاد ڈگری کالج ءِ سجھیں اُستاداں دل بڑی داتگ اَت کہ شاھد بہ وان زلور یک نہ یک روچے تو الّم دیم ءَ رو ئے ءُ اُمیت کن ایں تو وتی راج ءِ واستا شریں کارے کُت بہ کن ئے۔

اے ساھت ءَ من سجھیں روچ لائیبری ءَ کپت آں ءُ منی ھمراھیں سنگت ھم منی گوما وانگ ءَ اِت اَنت آیاں ھم منی وڑ ءَ وتی ھمت نہ پروشت ءُ پہ وانگ ءِ ھاترا سک باز جُھد کنگ ءَ اِت اَنت۔

یک روچے ما دْرواھیں سنگت آمب ءِ چیرا نیشتگ اِت ایں ءُ شالا وانگ ءِ ھاترا سوڑگ کنگ ءَ اِت ایں یک سنگتے ءَ درائینت کہ من وَ رو آں لاھور ءَ پہ وانگ ءَ ءُ دومی سنگت ءَ گْوشت من شال ءَ رو آں ایکنومکس کن آں بازیں سنگتاں سوڑگ کُتگ اَت ءُ جاڑی اِت اَنت رو اَنت شالا پہ وانگ ءِ ھاترا بلے من جیڑ اِت۔

ھمے ساھت ءَ من پاد اَتک آں سنگت ءَ درّائینت شاھد کُجا روگ ءَ ئے من گْوشت آپ ءِ ور آں کایاں چوناھا من ءَ آپ نوشگی نہ اَت بلکیں من وتی بزگی ءَ مارگ ءَ اِت آں کہ چَہ کُجا پہ وانگ ءِ ھاترا زر شوھاز بہ کن آں، چَہ کُجا؟

دو سَے شپ من ءَ واب پیداک نہ اَت کہ من سک تکانسر اِت آں پدا من جیڑگ بندات کُت اد ءَ کَے کرا بہ رو آں پہ وانگ ءِ ھاترا زر وام بہ کن آں زر وَ ھست اَت انچیں مردمانی کرا زر ھست اَت بلے وتی جند ءِ چُک وانگ ءَ نہ اِت اَنت من ھیران بوت آں واجہ ھدا چونیں جھانے جوڑ کُتگ ھما نودربر اگاں وانگ بہ لوٹ اِیت گڑا آئی ءِ کرا پہ وانگ ءِ ھاتر زر نیست بلے تو انچیں مردماں زر داتگ کہ وتی جند ءِ چُکاں وانینت کُت نہ کن اَنت بس اد ءَ میٹیریلسٹکیں مردماں گیشتر شرپ ھست اَت اے چاگرد ءِ تہ ءَ یک استادے ءِ ءُ نودربرے ءَ ازت نیست۔ اد ءَ چَہ گیشاں گیش نَشہ بَھا کنوک ءَ شرپ ھست اَنت من ءَ وتی بزگی بازیں جیڑگے پرمائینگ ءَ اَت۔

من ءَ بس وانگی اَت بلے کمک نیست اَت۔ ا۔ک : یونیورسٹی آپ تربت ءَ جار بوت بیا کہ اد ءَ شھدربرجاہ پَچ بوگ ءَ اِنت من شُت آں آھود ءَ داکِلہ زُرت مینیجمنٹ ڈپارٹمنٹ ءَ آسراتی کمیں کساسے ءَ ھست بے ھچ نہ اَت من ءَ لائیبری ءِ زلورت اَت بلے سک کم نودربر وانگ ءَ اتگ اِت اَنت بلے ریسرچ کم ، رَٹا گیشتر اَت منی ھیالاں اتاشاد ءَ گیشتر منی کریٹیوٹی ھست اَت پرچاکہ اد ءَ شھدربرجاہ ءَ گیشتر نودربر گْوتّگ اَنت اد ءَ چَہ گیشاں گیش مکابل ءَ ھست اَت اد ءَ امین زامن ءِ وڑیں مردماناں ھم شرپ نیست اَت ھر یک نودربرے واجہ ءَ استادے نہ پھمگ ءَ اِت اَنت گڑا من مار اِت شالا پہ وانگ ءَ پنڈگ ءَ ھیبے مہ پھم۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔