بلوچستان شاھدربرجاہ ءَ بیگواھیں نودربرانی یل کنائینگے ھاتر ءَ زھرشانی

بلوچ نودربر آلائنس نیمگ ءَ مروچی بلوچستان ءِ بنجاھی شھر شال ءَ بلوچستان شاھدربرجاہ ءَ چہ زورانسری آوار جنگ بوتگیں نودربر سھیل بلوچ ءُ فیصیح بلوچ ءِ یل کنائینگے ھاتر ءَ زھرشانی کنگ بوتگ –

مروچی چارشمبے روچ ءَ شال پریس کلب ءِ دیم ءَ بیگواھیں سنگتانی یل کنائینگے زھرشانی ءَ نودربر، سیاسی ءُ چاگردی گلانی باسکاں ھوار بیگواھیں مردمانی کھولاں ھم بھر زرتگ –

زھرشانی کنوکانی دست ءَ بیگواھیں مردمانی اکس پلے کارڈ بوتگ انت وھدیکہ زھرشانی ءَ مچ ءَ چہ زورانسری آوار جنگ بوتگیں ودود ساتکزئی ءِ گھار ھم ھوار بوتگ –

زھرشانی ءَ ترانکارانی گوشگ ات کہ بلوچستان شاھدربر جاہ ءَ سیکورٹی پوج ءِ دست ءَ زورانسری آوار جنگ ءُ بیگواہ بوتگیں سھیل بلوچ ءُ فصیح بلوچ ءَ شاھدربر جاہ ءَ آوار جنگ بلوچستان ءَ نودربرانی بگیری ءَ ریاستی کریک ڈاؤن ءِ درچ ئے – دو ماہ پر گوستگ بلے شاھدربرجاہ ءَ آوار جنگ بوتگیں نودربر زاھر کنگ نہ بوتگ انت –

ترانکارانی گوشگ ات کہ شاھدربرجاہ ءَ سنگتانی زورانسری آوارجنی ءِ بگیری ءَ نودربرانی الائنس نیمگ ءَ کنگ بوتگیں زھرشانی سرکار دروگ بستگ ءُ ھلاس کنائینگے کوشست کتگ وھدیکہ سرکار ءِ نیمگ ءَ نودربرانی یل کنگے ڈیڈلائن ہم ھلاس بوتگ بلے مئے آوار جنگ بوتگیں سنگت یل کنگ نہ بوتگ انت –

زھرشانی کنوکانی گوشگ ات کہ سوبائی وزیر عبدالرحمن کھیتران زھرشانی کنوکیں نودربرانی گوم ءَ باز رند ءَ گند نند کتگ ءُ سرکار ءِ نیمگ ءَ باور کنائینگ ءَ پد وھدیکہ زھرشانی ھلاس بوتگ انت گڈا سوبائی وزیر نیمگ ءَ جیڑہ سر ءَ ھچ گوشگ نہ بوتگ – نودربراں گوشتگ کہ بیگواھیں نودربر دانکہ دیم ءَ آرگ نہ بنت زھرشانیانی درچ برجاہ بیت اتنت –

زھرشانی ءَ ھواریں مچھ ءَ چہ پوج ءِ دست ءَ زورانسری آوار جنگ بوتگیں ودود ساتکزئی ءِ گھار ءَ گپ جنان ءَ گوشتگ کہ آئی برات ودود ساتکزئی ءِ زورانسری آوار جنی ءَ شش ماہ سرجم بوتگ برات ءِ یل کنائینگے ھاتر ءَ بازیں زھرشانی کنگ ءَ ھوار کمیشن ءِ گور ءَ کیس ءِ جمع کنگ ءَ ابید ھم برات دیم ءَ آرگ نہ بوتگ –

ودود ساتکزئی گھار گل زادی بلوچ ءِ گوشگ ات کہ ودود ساتکزئی دمگی دلار ءَ ڈن ءَ لوٹارینتگ دمگی مردمانی دیم ءَ پوج ءِ دست ءَ داتگ – گل زادی ءَ لوٹ کتگ گوشتگ کہ آئی برات ودود ساتکزئی دیم ءَ آرگ بہ بیت کانودی وڈو ڈول ءَ آئی ھک دئیگ بہ بیت –

زھرشانی ءَ پشتون تحفظ مومنٹ باسک ھم ھوار بوتگ انت زھرشانی کنوکاں سوبائی سرکار ءَ چہ لوٹ کتگ شاھدربرجاہ ءَ آوار جنگ بوتگیں نودربر زوت دیم ءَ آرگ بہ بنت ءُ یل کنگ بہ بنت –

زانگ بہ بیت سھیل بلوچ ءُ فصیح بلوچ ءِ زورانسری آوار جنی ءِ بگیری ءَ زھرشانی میان ءَ گوستگیں بازیں روچاں بلوچستان شاھدربرجاہ ھم بند کنگ بوتگ وھدیکہ زھرشانی کنوکاں گوشتگ کہ اگاں مئے نودربریں سنگت دیم ءَ ارگ نہ بوتاں گڑا نودربر الائنس وتی زھرشانیاں برجاہ داریت –