TBP Balochi

توار ءِ ایرموش کنگ ءِ ھاتر ءَ زورانسری آوار جنیانی تہ ءَ گیشی آرگ بوتگ – ماما قدیر

بلوچستان ءَ زورانسری آوار جنگ بوتگیں مردمانی پانکجنیں گل وائس فار بلوچ مسنگ پرسنز ءِ بنجل ءَ کراچی ءَ چہ شال ءَ برگ بوتگ – مروچی زھرشانی بنجل ءَ چار ھزار ءُ پنچ سد ءُ نود ءُ نھمی روچ ءَ برجاہ بوتگ –

ھرتبک ءِ مردماں بنجل ءَ اتکگ ءُ بیگواھیں مردمانی کھولانی گوم ءَ دلپدردی درشانتگ ءُ آھاں زورانسری آوار جنگ بوتگیں مردمانی یل کنگ ءِ لوٹ کُتگ –

گل ءِ کمک سرکماش ماما قدیر بلوچ ءَ وتی ھیال درشان کتگ گوشتگ کہ بلوچستان ءَ زورانسری آوار جنی ءِ تُرس ءِ برجم داشتگ ءُ آئی ءِ تہ ءَ گیشی آرگ بوتگ –

آئی گوشتگ کہ اے وھدی ھزارانی کچ ءَ سیاسی باسک آوار جنگ ءُ بیگواہ کنگ بوتگ انت کہ آھانی تہ ءَ گیشتریں کچ نودربرانی انت – آئی ءَ گوشتگ کہ پاکستان ءِ جتا جتائیں دمگاں وانوکیں نودربر وتی گسانی آھگے میان ءَ آوار جنگ ءُ بیگواہ کنگ بوتگ انت –

ماما قدیر بلوچ ءَ گوشتگ کہ اے وڈیں تُرس ودّینگ نہ بیت بلکنہ مردمانی تہ ءَ زانت آھگ ءَ اِنت کہ آھانی دوستیگیں مردم پرچا زورانسری آوار جنگ بوھگ ءَ انت –

آئی ءَ گوشتگ کہ ما مدامی اے گپ گوشتگ کہ سیاسی جیڑھاں تاکت ءِ زور ءَ گیش گیوار کنگ ءَ جیڑہ گیشتر ھراب بنت –

بلوچستان لبریشن فرنٹ ءَ جھاؤ ءَ دو پاکستانی پوجی کارندھانی کُشگ ءُ دو ٹپی کنگ ءِ زمہ واری منّ اِتگ اَنت-

بی ایل ایف ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ آواران ءِ جھاؤ ءِ دمگ چنال گزی ءَ سرمچاراں زیک بیگاہ ءَ پاکستانی پوج چیرکتگیں شورواں گوں نشانگ کتگ-

جارکش ءَ گْوشتگ سرمچاراں پوجی چوکی ءِ تہ ءَ شورو کل کتگ کہ آھاں یک اُرشے ءَ پد ھالیگ کتگ، زی بیگاہ ءَ پوجیانی آیگ ءَ سرمچاراں چوکی ءِ تہ ءَ شورو کل کتگ اَنت- پوجیانی پترگ ءَ چہ شورو ترکیتگ اَنت چریشی ءِ آسر ءَ دو کارندہ مرتگ ءُ دو ٹپی بوتگ اَنت-

میجر گْوھرام بلوچ ءَ گْوشتگ کہ اے اُرش داں زورگپتگیں بلوچستان ءِ وتواجھی ءَ برجاہ بنت-

بلوچستان ءِ دمگ کیچ ءَ لشکریاں سَے مردم دزگیر کنگ ءَ بیگواہ کُتگ اَنت۔

بیگواہ بیتگیں مردم گوستگیں روچءَ تمپ ھنکین ءَ چہ دزگیر کنگ بیتگ اَنت کہ اشانی پجار اخلاق ء نبی بخش، بلال ء حینف ءُ بلال ء سدیر ءِ ناماں زانگ بیتگ اَنت۔

اھوالانی ردءَ سَئیں مردم گوستگیں روچاں تمپ ءَ کوھاڈ ءِ ھند ءَ دزگیر کنگ بیتگ اَنت کہ داں انگت بیگواہ اَنت۔

بلوچستان ءَ زورانسری بیگواھیانی وئیلانی یکشلی برجاہ اِنت ھمے زورانسری بیگواھیانی ھلاپ ءَ تُربت سول سوسائٹی ءِ رھشون گلزار دوست اے وھدءَ تُربت ءَ چہ شال ءَ دراجیں لانگ مارچ ءِ کنگ ءَ اِنت وھدیکہ دومی نیمگ ءَ لشکریانی نیمگ ءَ مردم زورانسری بیگواہ کنگ بیگ ءَ اَنت۔

گوستگیں روچاں بارکھان ءَ چہ بیگواہ بیتگیں نودربر دلیپ داس ءِ زورانسری بیگواھی ءِ ھلاپ ءَ چاگردی رسانکدرانی تندجاہ ٹوئیٹرءَ دوروچاں چہ ٹرینڈ جنزینگ ءَ اَنت۔

یات بہ بیت کہ دلیپ اسلامیہ شھدربرجاہ بھاولپور پنجاب ءَ انگلش لٹریچر ءِ تہءَ ماسٹر کنگ ءَ اِنت۔

دلیپ بلوچ ءِ برات ءَ گُشتگ کہ آ وتی چھٹیانی گوازینگ ءَ شال ءَ آیگ ءَ بیتگ کہ چہ نیمراہ ءَ بیواٹا چیک پوسٹ رکنی بارکھان ءَ چہ زورانسری بیگواہ کنگ بیتگ۔

بلوچی ءِ بنگیجی درونت

ٹی بی پی درونت

ششمی درونت

پہ بلوچی زبان ءِ نوک باھندیں وانوکانی ھاترءَ دی بلوچستان پوسٹ ءَ یک درونتی لڑے بندات کرتگ کہ چریشی ءَ بلوچی زبان ءَ ھُب داروکیں مردم چرے درونتاں چہ بلوچی زبان ءِ راست نبیسگ ءَ ھیل کُت کن اَنت-

مئے ششمی درونت پہ وانوکاں شنگ بیگ ءَ اِنت، پہ بلوچی زبان ءَ بیوکیں ھمک جھد کہ بیت چُش کہ بلوچی نبشتانک ءُ شائراں آیانی چاپ کنگ ءَ ھوار نِی مئے وانوکاں درونت ھم دزکپت کن اَنت چریشی ءَ نبشتہ کنوکیں مردم گیشتر وتی سیاھگ ءَ راست ءُ تچکی ءَ نبشتگ کت کن اَنت-

نہ، نا، ناں، ما، مہ، ماں ءُ اوشت ءِ نشان –

نہ: پہ کارے ءِ نہ کنگ یا نہ بیگ ءَ کارمرز بیت انچوشکہ (ا۔ک) ما جھلی گالرِدں وان ایں۔
1:تو لیلہ ءِ لوگ ءَ نہ رو ئے۔
2: اِنّا، تو وَ شریں مردمے نہ ئے!
3: شُما چکاس ءِ تیاری نہ کنگ ءَ اِت۔

نا: اے انگریزی ءِ “Un ءُ In یا Im” ءِ بزانت ءَ دنت ا۔ک:- نااِنساپی، نادْراہ، ناسرجم، ناگُمان، ناسرپد ءُ ناوشی۔

ناں ءُ نیکہ: Neith or nor
1:شُما ناں وت بزگیں راج ءِ کُمک کن اِت ءُ نَیکہ کسے ءَ پہ کُمک ءِ کنگ ءَ سکین دے اِت۔
2:ما ناں شُمئے جیڑہ ءَ ھوار ات ایں ءُ نَیکہ ما شُمئے زاتی جیڑھاں دلگوش کنگ لوٹ ایں۔

ما، مہ ءُ ماں
1: ما بلوچ ایں ءُ ما ماہ چارگ ءَ ایں
2:ما نودربر ماں بلوچی وٹس ایپی وانگجاھے ءَ وت ماں وانگ ءَ ایں۔
3: باید اِنت ما وت ماں وت مہ مِڑ ایں۔

اوشت ءِ نشان: اے بلوچی سُرینوکے کہ آب ءَ اوشتین ایت بزاں آب ءَ اشتاپ وانین ایت۔ لھتیں درور جھل ءَ نبشتگ اَنت
گوش: Ear
گْوش: Tell or Speak
درد: Pain
دْرد: Heavy Rain
بْرمش، پْراہ، پْروش، دْروت، نادْراہ، دْرپشگ، دْروہ، گْوادر، بْرات، گْوھار، گْوات، سْیاد، شْوانگ، تْرُند، تْرمپ، تْرونگل ءُ سْرپگ ءِ وڑیں گال اَنت کہ بے اوشت ءِ نشان رَد وانگ بنت۔

1: دْریگتیں ما نادْراہ شریں نادْرھجاھے ءَ بُرتیں۔
2: شُما مارا دْروت ءُ سلام بہ کُتیں۔
3: دْریگتیں ما گُلام ما بوتین ایں۔

بلوچستان ءِ دمگ اوتھل ءَ یک وئیلے ءَ سَے مردم بیران بیتگ اَنت ءُ بازینے زدگ بیتگ اَنت-

گیشیں ھالانی رد ءَ کراچی ءَ گوادر ءَ رؤکیں مسافر وئیل ءِ آماچ بیتگ اَنت چریشی ءَ سَے مردم بیران بیتگ اَنت ءُ بازینے زدگ بیتگ اَنت-

بس اوتھل ءِ ھند کنڈملیر ءَ وئیل ءِ آماچ بیتگ ءُ چریشی ءَ سَے مردم بیران بیتگ اَنت –

زدگ ءُ بیران بیتگیں مردم اوتھل ءِ ھسپتال ءَ برگ بیتگ اَنت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں شنگ کرتگیں درشانی ءَ گوشتگ کہ بیست ءُ ھشت فروری ءِ شپ ءِ ساھت نُھ ءَ سرمچاراں پنجگور ءِ دمگ چتکان ءَ ھستیں پوجی ھیڈ کوارٹر ءِ سنگر ءِ سر ءَ دزبمبے چگل داتگ، بمب سنگر ءِ تہ ءَ کپتگ چریشی ءَ یک کارمندے مرتگ ءُ یکے زدگ بیتگ –

آئی ءَ گوشتگ زورگریں سر ءَ اُرش بلوچستان ءِ آجوئی ءَ داں برجاہ بنت-

نبشتانک: ولودیمر زلینسکی روس راج ءِ راجدْروہ اِنت

نبشتہ کار: آئشہ بلوچ

دی بلوچستان پوسٹ

روس ءُ یوکرین ءِ جیڑہ سرپد بوگ ءَ پیسر ما ھمے بِزان ایں کہ اے روس، یوکرین ءُ بیلاروس کَے اَنت؟ زاناں کُجام راج ئیگ مھلوک اَنت۔ چوناھا اے یکیں راج سے مُلک اَنت، ایشانی رواج، دود ءُ ربیدگ یک اَنت۔ ایشانی نیکراھی رھبند ءُ زُبان ھم یک اَنت۔ اے سَے ئیں مُلکانی مھلوک یکیں راج ئیگ اِنت کہ اے دْراہ روسی اَنت، اے چہ شش ھزار سال ءَ روسی اِت اَنت بلے نی چہ سی سال ءَ کسے وت ءَ یوکرینی ءُ کسے وت ءَ بیلاروسی گْوش ایت۔ کسے وت ءَ کازاکِستان ءُ کِرگِستان گُڑا کسے وت ءَ روسی گْوش ایت۔ چوناھا ایشانی میان ءَ ھچ دگِری نیست کہ ایشانی پیروکاں وت یکیں راجے لیکھ اتگ۔ ولادمِر لینین ءُ جوسپ سٹالین ءِ وڑیں راجی بامرداں وتی راجی یکمُشتی ءُ تپاکی ءِ آسر ءَ روسی راج ءَ بے کساس دیمروئی داتگ۔ ایشاں مُدام گوں وتی زُبان، راج ءُ بامردی ءِ سر ءَ ناز کُت۔ گُڑا مرچاں ایشاں چونین بدبھتی بوتگ۔

1917 ءَ روسی آشوبی بامرد ولادمر لینین ءِ سروگانی ءَ روس راج ءَ وتی زالمیں بادشاہ زار ءِ ھلاپ آشوبے ودی کُت ءُ ماں روس ءَ بادشاھی سرکار ھلاس کُت۔ ھمے روسی آشوب ءَ رند روس ءَ ماں سوشلسٹ راجمستری ءَ کارجاھی ءُ کارزانشتی ءِ پِڑ ءَ بلاھیں سپرے بِنا کُت۔ لس مھلوک ءَ اِنساپ، پوریاگِری ءُ راجدوستی ءَ سرجمیں روسی زُبان ءِ راج یکجاہ کُتگ اَت۔ اول یوکرین ءُ بیلاروس گوں روس ءَ ھوار بوت ءُ یکجاھیں مُلک ءِ نام یو ایس ایس آر(یونین آپ سویت سشلسٹ رپبلک) دات۔ پد ءَ ایشانی سرکاری رھبند ءُ دیمروئی ءِ سان ءَ یورپ ءُ دِگہ کِر ءُ کش ءِ ملک گوں ایشاں وت ھوار بوگ ءَ اِت اَنت چہ ایشی ءَ سویت روس مزن بوگ ءَ اَنت۔ اے تُرس ءَ امریکہ ءُ دِگہ بازیں یورپین مُلکاں سویت روس ءِ ھلاپ ءَ 1949 ءَ ناٹو جنگی گلے اڈ دات کہ ھما وھد ءَ نیٹو ءِ باسک کساس 12 اِت اَنت۔

بزاں اول سویت روس ءِ ھلاپ ءَ دُژمنی ءِ سر امریکہ ءُ یورپی مُلکاں زُرت۔ پد ءَ سویت روس ءَ ناٹو ءِ ھلاپ ءَ 1955 ءَ واسار جنگی گل اڈ کُت چریشی ءَ دُنیا ءِ تہ ءَ کست ءُ کینگی ءِ کولڈ وار ءِ بے جنگی زمانگے بِندات بوت کہ چہ ھمے زمانگ ءَ دُنیا ءِ ھمُک مُلکاں وڑیں سِلاہ جوڑ کنگ بندات کُت کہ ایشی ءَ آرم ریس گْوش اَنت۔ 1986-90 سویت روس ءَ گوں امریکہ ءُ یورپ ءَ وتی جیڑھانی ھلاس کنگ ءِ جُھد کُت، گوں امریکہ ءُ یورپ ءَ سویت روس ءَ باز جْوان ءُ وشیں منّگ نامھانی سر ءَ تپاکی ھم بوت۔ وھدے کہ سویت یونین ءَ گوں امریکہ ءُ یورپ ءَ وتی دُژمنی ھلاس کُت اَنت پد ءَ سویت روس ءُ آئی ءِ باسکاں ناٹو ءِ ھلاپ ءَ جوڑ بوتگیں وارسا گل ھم پْروشینت۔ 1991 ءِ گُڈی ماہ ءَ سوت یونین ءِ بُندری باسک یوکرین، روس ءُ بیلا روس ءِ سیاسی جیڑھانی آسر ءَ سوت یونین ءَ وت ھلاس کنگ ءِ جار جت ءُ پد ءَ ھرکس ءَ وتی جُتائیں مُلک گوں بے کساسیں دیمرویاں رس ات۔

نی بچار کہ ناں سویت یونینے ھست ءُ نَیکہ یورپ ءُ امریکہ ءِ ھلاپ ءَ وارسا ءِ وڑیں جنگی گلے ھست پمیشکا باید اِنت ناٹو ھم ھلاس بہ بوتیں یا ناٹو ءَ روس ءِ ھلاپ دُژمنی برجاہ مہ داشتیں۔چوناھا سویت روس ءَ گوں ناٹو باسکاں وتی دُژمنی ھلاس کُتگ اَت پمیشکا سویت روس ءِ ھلاپ ءَ جوڑ بیتگیں ناٹو بے بستار اَت۔ گِند ئے یات بہ بیت کہ 1992 ءَ ناٹو ءِ باسک 12 اِت اَنت بلے مرچی باسک وَ 30 اَنت ئِے، بژن انت پد ءَ ناٹو ءَ کْوھنیں وارسا ءِ یورپی مُلک کہ ساری ءَ روس ءِ دوست ات اَنت ناٹو ءَ وتی جنگی گل ھوار کُتگ اَنت چریشی ءَ روس وت بے پھریز مارگ اِنت۔ ایشی ءَ ابید ناٹو ءَ روسی زُبان ءِ یوکرین ءِ ھوار کنگ ءِ تیاری کُتگ کہ آئی ءَ گوں امریکہ، کینیڈہ ءُ دگہ برتانیہ ءُ پرانس ءِ وڑیں ملکاں ھچ سْیادی نیست انت۔ یوکرین چہ ھزاریں سالاں اول روسی اَنت، آیانی دود، ربیدگ، رواج ءُ زُبان گوں روس ءَ یک ءُ سْیاد اَنت۔ یوکرین ءِ راجی ھستی ءُ مِکائیل گوربیجوّ وڑیں پیروک سوت یونین ءِ مھتر بیتگ اَت۔ یوکرین ءَ مرچیگیں دیمروئی چہ سویت روس ءَ رستگ ناں کہ چہ یورپ ءَ رستگ ئِے۔ ھمے امریکہ ءُ نیٹو ءَ گوں ویتنام، کُرد ءُ اوگانستان راج ءَ دْراہ کُتگ گُڑا یوکرین ءَ گوں چون وپاداری کن اَنت۔

اگاں مئے بلوچستان ءِ دمگی کوڑائیں میر ءُ سردار کہ پہ پاکستان ءِ ھک ءَ گپ کن اَنت گُڑا ما آیاں راجدروہ گْوش ایں۔ گِند ئے ما بلوچ کس نہ لوٹ ایں کہ بلوچستان گوں پنجابی ءَ ھوار بہ بیت۔ ما چہ ھزارانی سال ءَ بلوچ ءُ بلوچستان ئیگ ایں، مئے رواج ءُ زُبان گوں اے پنجابی ءَ ھچ وڑیں سْیادی یے نہ دار ایت گُڑا باید انت ما وتی سرڈگار ءِ وتواجہ وت بِہ بَہ ایں۔ ھمے پیم ءَ یوکرین باید اِنت گوں روس ءُ بیلاروس ءَ سْیادی بہ دار ایت کہ اے دْراہ یکیں راج اَنت ناں کہ یوکرین روس ءِ دُژمنیں جنگی گل ناٹو ءِ باسکے جوڑ بہ بیت ءُ پد ءَ روس ءِ سیمسر (باڈر) ءَ ناٹو ءِ پوج روس ءَ تُرس بہ دے اَنت۔ یوکرین ءِ مھتر ولودیمر زلینسکی ءَ ماں یوکرن ءَ روس ءِ پلہّ مُرزیں یوکرینی سیاستدان دْراہ ماں زندان ءَ بند کُتگ اَنت کہ آ ناٹو ءَ ھوار بوگ ءِ ھلاپ اَنت۔ منی ھیال ءَ یوکرین ءِ مھتر ولودیمر زلینسکی سرجمیں روس راج ءِ دُژمن ءُ سرجمیں روسی راج ءِ راجدْروھے، یوکرین ءِ بیرانی ءِ زمہ وار یوکرین ءِ مھتر ولودیمر زلینسکی اِنت۔ ھُدا وت رھم بہ کنت انچوچکہ من ءَ لگ ایت کہ اے جنگ انگا دیم ءَ روت اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اکس کمانچر بلوچ

نبشتانک: اُردلیں شَارل

نبشتہ کار: سیپ بلوچ

دی بلوچستان پوسٹ

بے تاهیریں ترانگے ءَ گوں ابیتکیں نگاهاں گوں مروچی دل گْوش اِیت بہ کند ،بلے پرچا هچ نزاناں ، همے کہ زندگی چو شَپ کپتگیں مساپرے ءَ کیت پادوم ءَ اوشت ایت گڑا وسریں کندگے چہ زبان ءَ درکیت گڑا من کنداں هنچو کنداں کہ رهگْوزی همے کشک ءِ رَؤکیں مردم من ءَ گنداں آ اوں کند اَنت –

یار گپے زان ئے اے تئی ترانگاں بلے زی تئی میتگ ءَ شتاں تئی دشتار من دیست ، شمئے پیشگاهے نزیک ءَ کہ من اتک آں گوں هما جنک ءَ گد دوچگ ءَ اَت کَرگین ءِ چیر ءَ مَشک دْرنگ ءَ درتکگ اَت آپ پٹ پٹ ءَ رچگ ءَ اِت آں ، ماسی گِدان ءَ نان پچگ ءَ اَت ، شارل آرتاں چانگ چنگ ءَ اَت دستانی منگلیکے توار ءَ اِت آں تئی دشتار اوں نشتگ اَت گوں شارل ءِ دزگوهار ءَ، یار تئی دشتار چونیں شررنگےمرچی زردیں گُدے گْور ءَ اَت سک ڈولدار اَت، همے کہ من اتک آں اَبکہ بوت نیم چمے چار اِت ئِے، کمو گمیگ بوت ، نزاناں پرچے ءَ؟پد ءَ من پوه بوتاں کہ من ءَ پجا نیاورتے ، من کہ دیم ءَ چہ ماسک دور کت گڑا کند اِت ئِے گپے زان ئے منی دستے گپتاں ، لنککے سک ڈولدار اِت آں-

شارل ءِ دزگوهار ءَ وتی دیم بست ، نزاناں پرچا ؟ من کندگے جت شارل ءَ اش کرت چہ گدان ءَ در اتک ، دستے آرتین اِت آں، گوشان ءِ گٹ ءَ اَت ، ابکہ بوت یکبرے ماتی ءَ جست کت ، شارل ، او شارل کے اِنت ، شارل ءَ گشت اما ، لالا ءَ ایں اتکگ ،گڑا ماتی ءَ پسو ندات نزاناں پرچے ءَ ؟بوت کنت گمیگ بوت یا تئی ترانگ ءَ کپت ، گڑا منی چمانی ارس در اتک آں همے کہ شارل ءَ دیست ، گڑا من کند اِت زبان ءَ همے گپ در اتک اڑے کربان ، شارل جان تو چوں زیبا ئے ، گپے زان ئے شارل نی رستگ ات ، مزن ات پیش ءَ کہ من اتکگاں شارل اتکگ تچان ءَ بڑ ءَ من بڑا کتگ گُب چک اِتکگاں ، گپ جتگ کندگ اِتگ-

بلے اے بری مدتے گْوستگ ات کہ شارل ندیستگ اَت من مرچی کہ دیست ، هنچوش گمان بوت کہ من درامدے آں ، شارل دودانی سانکلاں بستگ ، مئے دودانی تہ ءَ جنک کہ رس ات مزن بوت جندے هون اوں بہ بیت مردم دستے جت نہ کنت پمیشکا، دل ءَ گشت مرچی شارل ءَ سک مهر بدے گڑا شارل ءَ دست ششت ءُ اتک ، نزاناں چے ءَ گریتے من ءَ بگلہ کت ئِے برے گریتے برے کند اِت ئِے ، گڑا ما دست ماں دست بوت ایں واتر پہ کرگین ءِ چیر ءَ شت ایں، تئی دشتار گوں وتی دزگوهار ءَ نشتگ اَت ، ما بازیں گپ جت کند اِت مات دیراں اتک ، دستے گپتاں وش اتک کرت ئِے ، بلے اے جستے نہ کت تئی باره تو چون ئے ، پمیشکا من چہ زندگی ءَ لگور بوتگیں بامرد ءَ سر جهل بوت آں ، بلے یار تئی جتائی ءَ چاگرد رنجینتگ اَت-

من کہ سگریٹے کش ات بُندات ، تئی دشتارے چمانی ارس در اتک آں ، من چم شانک دات تئی دشتار ءِ نیمگ ءَ تئی دشتارے کوشیں رنگ گیمرتگ اَت ، گڑا تئی دشتارے دزگوهار ءَ منی نیمگ ءَ چار اِت هیران بوت ، شارل ءَ ورگ آؤرت آں دل ءَ گشت مرچی سیر ءَ نان ور آں بلے چاگردے ارس دیست اَنت دل پُر ات بالاد تیر وارتگیں جون ءَ ات شارل ءَ گشت لالا، مرچی من نان گوں تو هور ور آں بلے آئی ندیاں گوں ، کند اِت ئِے شارل ءَ کندگے جت ، پد ءَ گوشی لالا گپے زان ئے سمل ءِ دوشی سانگ بندی بوتگ ارسے چمانی دراتکاں اتک منی کٹ ءَ وت ءَ دورے دات من زار کت ، یار تو کجا شتے ، شارل مرچی من تئی گماں کجا برداشت کت کن آں ، شارل ءَ گشت ، لالا ءِ دشتار اوں وتی وجاں دوچگ ءَ اِنت پرچا کہ لالا ءِ ودار آسر بوت من زان آں نہ ایت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پتر ءَ سربوتگیں ھالانی رِد ءَ بلوچستان بلوچستان ءِ دمگ سبی ءَ ناشناسیں سلاہ بندیں مردمانی تیر گواری ءَ دو پولیس کارمنداں ھوار سَے مردم زدگ بوتگ انت –

پولیس ءِ سر ءَ سبی ءِ دمگ حمبل بابا ءِ نزیک ءَ تیرگواری کنگ بوتگ وھدیکہ یک راھگوز ءِ ھم تیرانی زدگ ءَ اتکگ ءُ زدگ بوتگ –

پولیس ءِ سپرینٹنڈنٹ دوستین دشتی ءَ وئیل ءِ ھال راست کتگ ءُ اھوالکاراں گوں تران کنان ءَ آئی ءَ گوشتگ کہ پولیس گوستگیں سب انسپکٹر ءِ گس ءَ چاپہ جنگ ءَ روگ ءَ بوتگ کہ کتکاراں پولیس سر ءَ اُرش کُتگ –

دوستین دشتی ءِ رِد ءَ تیرگواری ءَ پولیس اے ٹی ایف ٹولی ءِ کارمند شوکت مرغزانی ءُ ریاض زدگ بوتگ انت وھدیکہ اے وئیل ءَ علی نواز نامی راھگوز ءِ ھم زدگ بوتگ –

دوستین دشتی ءِ رِد ءَ کتکار پولیس ءِ کارمند ہدایت اللہ ءَ بازیں کیساں شال ءِ پولیس آئی شوھاز ءَ بوتگ کتکار وئیل ءَ پد تتکگ –

واکداراں دیمتر ءَ گوشتگ کہ وئیل ءَ زدگ بوتگیں کارمند نادراھجاہ ءَ سر کنگ بوتگ انت وھدیکہ وئیل ءَ ھواریں کتکار ءِ پٹ پول برجاہ انت –

بلوچستان ءِ دمگ کیچ ءِ بنجاھی شھر تربت ءَ گوستگیں روچ ءَ یکشمبے ءَ در اتکگیں گلزار دوست ءَ پاد شپاد پنجاہ کلومیٹر راہ گوازینتگ ءُ شاپک ءَ سربوتگ – بی بی نسیمہ ءُ سید بی بی ءِ منت ءُ زاری ءَ پد گڈسر ءَ گلزار دوست چمپلانی پاد ءَ کنگ ءُ پند جنگ ءَ رازی بوتگ –

مروچی یک ٹولی ءَ کہ آھانی تہ ءَ بلوچ کلمکار ءُ پلم ساچ حنیف شریف ءِ مات نسیمہ بلوچ ءُ گھار سید بی بی ءَ ابید آل پاٹی کیچ ءِ کنوینر خان محمد جان، گلام یاسین بلوچ، انجمن تاجران تربت ءِ سرکماش حاجی کریم بخش، گلام اعظم دشتی، عبدالصمد بلوچ، بی ایس او ءِ دمگی سرکماش بالاچ طاہر، کریم شمبے، تربت سول سوسائیٹی جمیل عمر ءُ رسانکدرانی اھوالکار ھوار بوتگ ءُ شاپک ءَ شُتگ انت –

آھاں شاپک ءُ شُتگ ءُ گلزار دوست ءَ گوں دچار کپتگ انت ءُ آھاں دراجیں پند ءِ ھلاس کنگے لوٹ کتگ بلے پدا ھم گلزار دوست ءَ سیاسی رھشونانی منت گپتگ ءُ بلے آھانی گپ نہ منّ اِتگ ءُ گوشتگ کہ آئی ءَ وتی ھکانی لوٹ ءَ اے کول کُتگ کہ پاد شپاد پند جناں ءُ شال ءَ پاور کوریڈور رواں زھرشانی ننداں –

بلے پدا ھم ڈاکٹر حنیف شریف ءِ مات بی بی نسیمہ ءُ سید بی بی آ چمپلانی پاد ءَ کنگ گوشتگ نہ منّگے سوب ءَ نسیمہ ءُ سید بی بی ھم پاد شپاد پند بھر زورگے جار جتگ گوشتگ کہ آ ھم پادشپاد شال ءَ تاں پند ءَ آئی ءِ ھمراھی ءَ روانت –

گلزار دوست ءَ زالبول شرپ بکشتگ ءُ دیمتر ءَ چمپلاں پاد ءَ کنگ ءُ پند جنگے پیسلہ کتگ –

ھمے وھد ءَ آئی ءَ رسانکدراں گوں تران کنان ءَ گوشتگ کہ آ چار لوٹانی ھمراھی ءَ شال ءَ رؤگ انت کہ لوٹانی تہ ءَ بلوچستان ءَ پوج ءِ دست ءَ زورانسری آوار جنی ءِ ھلاسی، درسیں بیگواھیں مردمانی پہ وش سلامتی یل بوھگ، سرجمیں بلوچستان ءَ نشہ ءِ ھلاس کنگ ءُ انگریز زمانگے کانود لینڈ ریکوزیشن ایکٹ 1894 ءِ رِد ءَ بلوچستان ءُ سند ءَ بلوچانی زمینانی سر ءَ کبزہ کنگے لوٹ ھوار انت –