TBP Balochi

سر بیتگیں ھالانی رد ءَ روکپتی بلوچستان ءِ دمگ چھبار ءَ ایرانی چیریں ادارھاں چاگردی باسکے آوار جنگ ءَ پد گوں وت برتگ –

آوار جنگ بیتگیں مردم ءِ پجار کاظم ھوت ءِ نام ءَ زانگ بیتگ، کاظم ھوت گوستگیں روچ ءَ چیریں ادارھاں سیستان و بلوچستان ءِ تیابدپی شھر چھبار ءَ آوار جتگ ءُ برتگ –

ھالانی تہ ءَ گوشگ بیتگ کہ کاظم ھوت باز رند ءَ پیسر ءَ ھم آوار جنگ ءُ برگ بیتگ ءُ اے رندی چیریں ادارھاں آوار جنگ ءَ پد بنجاھی شھر دزاپ ءَ زاھر کتگ –

ھالانی تہ ءَ گوشگ بیتگ کاظم ھوت یک چاگردی باسکے ءِ ھواری ءَ سیستان و بلوچستان ءَ انسانی ھکانی واستا کار ءَ بیتگ –

سیکورٹی ادارھاں کاظم ھوت ءِ آوار جنی ءِ بارو ءَ تنی وھدی دگہ گپ دیم ءَ نیاؤرتگ اَنت-

بلوچستان ءِ تیابدپی شھر گوادر ءَ برجاھیں سَے روچی کتب میلہ آسر بیتگ – بلوچستان ءَ ھوار دگہ ھوار دگہ جاھاں زانتکار ءُ دگہ مھلوک ءَ بازیں کچے ءَ بھر زرتگ-

کتب میلہ ءَ تلو ءَ تران کنان ءَ آر سی ڈی کونسل ءِ سروک خدا بخش ھاشم ءَ گوشتگ کتاب انسانی بنکی سنچ ءُ دودمان ءُ دگہ چاگردانی ڈولانی زندمان ءَ ھیل دنت- ما وتی لوگاں نشتگ ءُ جھان ءَ گند ایں –

آئی ءَ گوشتگ کہ کتاب یک جوانتریں ٹیکی یے تو کتاب بہ وان ءُ وتی لوگ ءَ یک کسانکیں کتابجاھے جوڑ بہ کن ھما وھد ءَ تو ایوکی سما کن ئے گڑا کتاب تئی ھمراہ اِنت تئی لوگ ءَ آوکیں تئی سنگت ءُ مھمان الم کتاب وان اَنت ءُ اشاں الم چیزے در بر اَنت-

آئی ءَ گوشتگ کہ کتابی وانگ ءُ آیانی تہ ءُ جست ءُ پرسی یے ءُ رھبندانی تہ ءَ بوت اِنت گڑا جنگِ عظیمِ دوئم نہ بوتگ اَت-

بلوچی زبان ءِ شائر ءُ ندکار پروفیسر اے آر داد ءَ وتی تران ءَ تران کنان ءَ گوشتگ اگاں من استاداں گڑا اشی ءِ ھواری ءَ من یک نودربر ءُ ھروھد ءَ علم ءِ شوھاز ءَ تچ ءُ تاگ ءَ آں ھرچی ادب ءِ شوھاز ءَ اِنت من اَنت من ءَ ھما چیز رس ایت گوادر ءِ یک کوھنیں ھوٹلے ءَ نندگ ءُ چاہ ءِ گُٹانی لزت گرگ ءَ گڑا نامداریں شائر وارس کتاب شب ھون ونتگ گڑا ابکھی بیتگ مارا اے کتاب کجا چہ رس اِتگ اے گپ اِت اَنت گوادر ءَ اتکگیں یک دانشور آصف فاروقی ءِ کتاب کجا چہ رس اِتگ-

اے آر داد گوش ایت کہ من ءَ گلگ ھست اِنت وتی سیاستداناں آ کتابانی پَٹ ءُ پول ءَ نہ کن اَنت ھمے واستا آیانی زانت کسان بیت اِنت-

اگاں مردماں دل ءُ ستک کتاب بہ ونتیناں گڑا ھچبر دومی جھانی جنگ نہ بیتگ اَت انسان نہ مرتگ اِت اَنگ کتابانی وانگی ءِ دود انگت ءَ زندگ اِنت ھما کہ کتاباں وان ایت آ جوانتریں زندگی ءِ واھند اِنت مزن مزنیں شھراں برز برزیں ماڑی مِک کنگ بیتگ اَنت بلے آیانی تہ ءَ کتابجاہ ھما آرت ءِ تہ ءَ واد ءِ بروبری اِنت-

گوادر کتب میلہ ءَ مستاگ فاؤنڈیشن ءِ ماھین عبدالواحد ءَ وتی تران ءَ گُشتگ منی پت ھروھد ءَ گوش ایت “منی چک ھرکجا تو چیزے دربرے گڑا شریں کتاب بہ وان آئی ءِ کلوھاں دومی ءَ سر بہ کن –

ھما علم ءَ دیمروئی بیت اِنت ءُ مارا علم دیم ءَ برگی اِنت آئی ءَ شریں جاھے دیگی اِنت چریشی ءَ ما علم ءِ شریں دروشم ءَ سر بیت کن ایں چریشی ءَ پیسر آئی ءَ گُشتگ اَت کتب میلہ ءَ مروچی مردینانی ھواری ءَ زالبول ھم ھمکوپگ اَنت اے کساس ءَ بھر زورگ ءَ ھمے منانک بیت اِنت آ وتی براتاں کم نہ اَنت-

اے کتب میلہ ءَ بلوچستان چیف سیکرٹری ھم گڈی روچ ءَ ھوار بیتگ-

مطھر نیاز رانا ءَ گوشتگ علم ءُ ادب ءُ ازمکارانی سبب ءَ دودمان دیمروئی کن اَنت مارا زھگ ادب ءُ ازمکاری ءِ تکاں برگ لوٹ اَنت ءُ کتاب ءَ آیانی مھر کنگی اِنت-

آئی ءَ گوشتگ کہ ھما چاگرد ءَ ادب ءِ سیاھگ برز اِنت ھما چاگرد ءَ انسان ءِ نھاد زانگ بیت اِنت-

آئی ءَ گوشتگ کہ آر سی ڈی کونسل گوادر ءَ اوپن ائیر تھئیٹر ءَ ھوار جتا جتائیں جارانی ستک ءُ پی سی ون جوڑ کنگ ءِ کڈن کنگ بیتگ اَنت اے وھد ءَ آر سی ڈی کونسل گوادر ءِ سروک ناصر رحیم سھرابی ءَ مھمانی دیم ءَ گوادر ءِ ازمکار، گوادر ء عید میلہ ءُ چاگردی ءُ دودمانء گلانی بارو ءَ دزبندی پیش کتگ اَنت-

چریشی ءَ پد چیف سیکریٹری بلوچستان ءَ کتاب میلہ ءَ دراھیں اسٹالانی چار ءُ ٹپاس کتگ ءُ کتاب، برن آرٹ ءُ دزکاری ھم زرتگ اَنت-

دستونک: ندر پہ هوشاپ ءِ شهیداں آصف ءُ آئی سنتگانی نام ءَ

شائر: سلیم ناز

دی بلوچستان پوسٹ

هلو هالو کن ات ڈیھ ءِ شهیداں
زمین اوبادگ ءُ چمّانی دیداں

شُتاں سالونکیں سر پہ راج ءِ باندات
مئے ماتاں موتکی یاں روچ ءِ ائیداں

اے هوناں الم ءَ گون انکلابے
جتگ جاه بزگر ءُ جانشو ءُ میداں

همک کرن ءَ بداں گوں جنگ بیتگ
وتی پہ لج ءُ ننگ ءَ یل کن زَیداں

دو سد سال ءَ بلوچ ءِ بیر نوک انت
همک راجدپتراں دود ءُ ربیداں

میار جلی مئے هوناں هوار انت
بداں پہ کست ءُ کینگ درچکے بیداں

سلیم جنگ ءَ بدار دان گڈی تیر ءَ
سر ءَ بکش ءَ مچار تو هون ءُ هیداں

بید; درچکے نام انت

اسپینش فٹبال لیگ لالیگا ءَ یکشمبے ءَ ھشت ٹیمانی میان ءَ گوازی کنگ بوتگ کہ آھانی تہ ءَ ویل رئیل ءَ پنچ، سیویلا ءَ دو، رئیل سوسائیڈ یک ءُ بارسلونا ءَ چار گول ءَ گوازی کٹ اِتگ انت – دومی نیمگ ءَ پریمئیر لیگ گوازی ءَ دوشی شپ ویسٹ ہام ءُ ولووز ءِ میان ءَ گوازی کنگ بوتگ کہ ویسٹ ہام ءَ یک گول ءَ گوازی کٹ اِتگ –

ولووز ءُ ویسٹ ہام میان ءَ بوتگیں گوازی ءَ ولووز ءِ نیمگ ءَ چہ ھچ گول اسکور کنگ نہ بوتگ وھدیکہ ویسٹ ہام ءِ لیبی توماس ءَ پنجاہ ءُ نھمی ملٹ ءَ یک گول ءِ اسکور کتگ گوازی وتی ٹیم ءِ نام ءَ کتگ –

اسپینش فٹبال لیگ لالیگا ءِ یکشمبے روچ ءَ بوتگیں اولی گوازی وئل رئیل ءُ اسپینیول ءِ میان ءَ بوتگ کہ وئل رئیل ءَ پنچ گولاں چہ گوازی کٹ اِتگ- اسپینیول ءِ نیمگ ءَ چہ یک گول ءِ اسکور کنگ بوتگ –

اسپینیول ءُ وئل رئیل میان ءَ بوتگیں گوازی ءَ وئل رئیل ءِ لیبی وائی.فینو ءَ پد ماں پد چار گول اسکور کتگ چارمی گول ءَ پد اسپینیول ءِ لیبی کے بار ءَ دومی ھاپ ءَ بس یک گول ءِ اسکور کنگ ءَ سوبین بوتگ ءُ پدا رند بی.دیا ءَ وئل ءِ نیمگ ءَ یک دگہ گول ءِ اسکور کتگ –

دومی گوازی رئیل بیٹس ءُ سیویلا ءِ میان ءَ بوتگ کہ دو پہ یک گول ءَ گوازی کٹ اِتگ – رئیل سوسائیڈ اوساسونا میان ءَ بوتگیں سیمی گوازی ءَ رئیل سوسائیڈ ءَ یک گول ءَ چہ گوازی کٹ اِتگ- اوساسونا ءِ نیمگ ءَ چہ ھچ گول اسکور کنگ نہ بوتگ وھدیکہ رئیل سوسائیڈ ءِ لیبی ایلسٹونڈو ءَ پنجاہ ءُ دومی ملٹ ءَ گول اسکور کتگ گوازی وتی ٹیم ءِ نام ءَ کتگ –

لالیگا ءِ چارمی گوازی بارسلونا ءُ ایتلیٹک کلب ءِ میان ءَ بوتگ کہ بارسا ءَ چار گولاں گوازی کٹ اِتگ –

بارسا ءُ ایتلیٹک ءِ میان ءَ بوتگیں گوازی ءَ ایتلیٹک ءِ نیمگ ءَ ھچ گول اسکور کنگ نہ بوتگ وھدیکہ بارسا ءِ لیبی ایمیرک، اوسمانے، ایل ڈی جونگ، ایم.دیپے ءَ یک یک گول ءِ اسکور کتگ گوازی کٹ اِتگ –

دی بلوچستان پوسٹ اھوال پتر ءَ سربوتگیں ھالانی رِد ءَ دلیپ بلوچ نامی نودربرے آوار جنی ءَ پد بیگواہ کنگ بوتگ –

کھول ءِ رِد ءَ گوستگیں شپ ءَ بلوچستان ءِ بنجاھی شھر شال ءَ رؤگے وھد ءَ نیم راہ ءَ دلیپ بلوچ آوار جنگ ءُ بیگواہ کنگ بوتگ –

دلیپ بلوچ ءِ برات ءِ رِدءَ آ اسلامیہ شھدربرجاہ بہاولپور پنجاپ ءَ انگلش لیٹریچر ءِ تہ ءَ ماسٹر کنگ ءَ بوتگ ءُ وتی چُٹیانی گوازینگ ءَ شال ءَ پیداک بوتگ کہ نیم راہ ءَ بیواٹا چیک پوسٹ رکنی بارکھان ءَ زورانسری آوار جنگ ءُ بیگواہ کنگ بوتگ –

آئی ءَ گوشتگ کہ ما درسیں انسانی ھکانی ادارہ ءُ انسان دوستاں چہ لوٹ کناں کہ منی برات ءِ ھاتر ءَ توار چست بہ کن انت –

زانگ بہ بیت ھمے سال ءَ فروری ءِ ماہ ءَ بلوچستان ءَ سدانی کچ نودربرانی زورانسری آوار جنی ءِ ھال اتکگ اَنت- انسانی ھکانی گل ءُ بلوچ گل اے زورانسری آوار جنی ءِ بھتام ءَ پاکستان ءِ چیریں ادارھانی سر ءَ لڈگ ءَ اَنت۔

ھمے ماہ ءَ پنجاپ ءِ بازیں زانشجاھاں وانوکیں بلوچ ءُ پشتون نودربراں دی بلوچستان پتر ءَ ھال سرکتگ کہ پاکستان ءِ چیریں ادارہ آھاں تُرسینگ ءَ اَنت ءُ آھانی موبائیل چیک کنگ بوھگ ءَ اَنت –

بلوچ لبریشن آرمی ءِ جارکش جیئند بلوچ ءَ رسانکدراں شنگ کُتگیں وتی درشان ءِ تہ ءَ حب چوکی ءَ بیتگیں تراک ءِ زمہ واری زرتگ ءُ گشتگ کہ بی ایل اے ءِ سرمچاراں مروچی یکشمبے ءَ پاکستانی پوج ءُ چیریں ادارھانی جوڑ کتگیں ڈیتھ اسکواڈ ءِ سروک حبیب شاہ بمب تراک ءَ نشانگ کتگ ءُ کُشتگ-

جیئند بلوچ ءَ گُشتگ کہ بی ایل اے ءِ اسپیشل ٹیکٹیکل آپریشنز اسکواڈ ( ایس ٹی او ایس) ءِ سرمچاراں گاڑی ءَ سواریں حبیب شاہ شاکر ھوٹل ءِ نزیک ءَ نشانگ کتگ، چریشی ءِ آسر ءَ آ ھما دمان ءَ مرتگ وھدے کہ آئی پھازوکیں دو لیویز کارندہ ٹپی بوتگ اَنت-

جارکش ءَ گُشتگ کہ بلوچ جُھد ءَ چہ لگور بیتگیں حبیب شاہ ءَ 2016 ءَ دُژمنیں پوج ءِ دیم ءَ سلاہ چگل دیگ ءَ پد چیریں ادارھانی چیردستی ءَ گوستگیں پنچ سالاں چہ قلات ءَ ضیالانگو ءِ چیردستی ءَ ڈیتھ اسکواڈ ءِ سروکی ءَ کنگ ءَ بوتگ-

جیئند بلوچ ءَ گُشتگ کہ حبیب شاہ قلات ءُ شور پارود ءِ دمگاں بلوچ سرمچارانی دلاری، شھیدی، لَس مھلوک ءِ بیگواہ کنگ ءَ تچکی ءَ گون بوتگ وھدے کہ اے دمگاں لشکر کشی، راجی جنگی مڈیاں دُژمن ءَ پیشدارگ ءِ راجی جرم ءَ ھم ھوار بوتگ-

بی ایل اے جارکش ءَ گُشتگ کہ اے مرد پاکستانی چیریں ادارھانی جوڑ کتگیں پارٹی “باپ” پُشت ءَ وت ءَ چیردیگ ءَ بوتگ وھدے کہ آ قلات ءِ جتائیں راھاں چوکی جوڑ کنگ ءُ زرگرگ ءَ ھوار بوتگ-

جیئند بلوچ ءَ گُشتگ بی ایل اے ءَ اے گپ پیسر ءَ ھم تچکی ءَ پدر کتگ کہ راجی گداری ءَ ھواریں مردم ھچ وڑ پھل کنگ نہ بنت، ما لیویز کارندھاں مکن کنگ لوٹ ایں آ حبیب شاہ ءِ وڑیں ریاستی کارندھانی پھازگے ھاتر ءَ ڈیوٹی دیگ ءَ مکن بہ کن اَنت اگاں ناں آ وتی ھرچ وڑیں جانی ءُ مالی تاوان ءِ زمہ وار وت بنت-

بی ایل اے جارکش ءَ گُشتگ کہ مئے گل بلوچ لبریشن آرمی ءِ سرمچاراں 20 فروری ءَ قلات سٹی ایریا ءَ ریاستی کارندہ کوھی خان مینگل ءِ لوگ ءِ تھی دروازگ ءَ اوشتوکیں گارڈز گوں دست بمب ءَ نشانگ کتگ، سرمچاراں اُرش ھما وھد ءَ کتگ وھدے کوھی خان ءِ نائب دروازگ ءَ سر بوتگ، تراکءِ آسر ءَ دو کارندہ ٹپی بوتگ اَنت-

جیئند بلوچ ءَ گُڈسرءَ گُشتگ کہ بلوچ لبریشن آرمی ءِ اُرش داں بلوچستان ءِ وتواجھی ءَ برجاہ بنت-

بلوچستان ءِ باپاری شھر ھب ءَ مروچی یکشمبے ءِ شپ ءَ بمب تراک ءِ اشکنگ بوتگ، اھوالکار ءِ رِد ءَ تراک بازار ءَ شاکر ھوٹل ءِ دیم ءَ گاڑی ءِ سر ءَ بوتگ –

ھالانی رِد ءَ گاڑی ءَ سواریں حبیب شاہ تراک ءَ مُرتگ وھدیکہ آئی ءِ گاٹ ءَ ھوار دو مردم سک باز زدگ بوتگ انت کہ ھب ءِ سول نادراھجاہ ءَ سرکنگ بوتگ انت –

دمگی مردمانی رِد ءَ بمب گاڑی ءَ گوں بندوک بوتگ کہ شاکر ہوٹل ءِ نزیک ءَ بلاسٹ بوتگ –

اھوالکار ءِ رِد ءَ حبیب شاہ ءِ سیادی بلوچستان ءِ دمگ کلات ءَ بیتگ ءُ اے مرد سرکار ءِ جوڈ کرتگیں ڈیت اسکواڈ ءِ جُنزینگ ءَ بوتگ –

نبشتانک: مات گریوگ ءَ اِت انت

نبشتہ کار: تالِب کاموش

دی بلوچستان پوسٹ

من چہ شال ءَ دیم پہ تُربت ءَ وتی چُٹّیانی گْوازینگ ءَ پیداک اِت آں من ءَ دِگہ دو ھمراہ گون اَت کہ ما یکیں مزن شھدربرجاہ ءَ وانگ ءَ اِت انت ما چہ شال ءَ ھشت ءِ ساھت ءَ در اتک ایں ءُ ساھت ءِ یازدہ ءَ ما سوراب ءَ سر بوت ایں سوراب ءَ بس ءَ پہ پیشاپ ءَ داشت چو آ دِگہ مساپِرانی وڑ ءَ من ءُ دِگہ یک سنگتے ھم ایر کپت ءُ پیشاپ کُت یک سنگتے واب اَت۔ایشی ءَ ابید،سنگت ءَ کش ءِ دُکان ءَ چِہ اسٹِنگے آورت ءُ من ءَ سلاہ جت کہ بْور من یک ءُ دو گُٹّ اسٹِنگ وارت ءُ پد ءَ ڈبُک سنگت ءِ دست ءَ دات ما بس ءِ کِرّ ءَ اوشتات ءُ سوراب ءِ بابت ءَ گپ ءُ تْران ءَ اِت ایں کہ بس ءَ ھارِنے جت مئے گپ ءُ تران انگت برجم اَت-

وھدیکہ دُرستیں مُساپِر سوار بوت انت گُڑا من ءُ سنگت ءَ ھم وتی گپ ءُ تران ءِ پتر بوتک ءُ بس ءَ جمّاز بوت ایں پد ءَ ھما ھاموشی ءُ سپر اَت دُرست ھاموش اِت انت، تھنا بس کُوکار کناں اَت ءُ منزل ءَ نزیک کنان اَت۔

مئے بس شر پہ سلامتی دیم پہ منزل ءَ جُنزان اَت کساس یک ءُ نیم یا دو ءِ ساھت ءَ ما بسیمہ ءِ آسر ءَ سر بوت اِنت ما کہ بسیمہ ءِ آسر ءَ بوت اِنت داں بس اوشتات ما ھیران بوت ایں کہ اِد ءَ بس ءَ پرچا داشت؟ اِے انچیں جاھے اَت کہ اِد ءَ ھِچ بر ردی ءَ اوں بس نہ دار انت نہ اِد ءَ آپے ءُ نئے کہ دِگہ ھاسیں چیزے من بس ءِ کانچانی تہ ءَ چِہ چاراں ءَ دیست کہ ٹریپک جام اِنت روڈ بند اِنت چی ءَ بند اِنت ءُ کے ءَ بند کُرتگ؟ ھِچ نزانت ما ھمے جُستانی پسّھانی زانگ ءِ ھاتِر ءَ چہ وتی بس ءَ درکپت ایں ایر کپگ ءَ گوں منی چمّاں لھتیں جنین آدم دیست کہ تچان ءَ دگ ءِ نیمگ ءَ پیداک اِت انت ما دیم ءَ جُنزان کُت تاکہ بُنکی جیڑہ ءَ پوہ بہ بنت انچو کہ ما دیم روان بوت ایں،نِدارگ شوکیں رنگے ءَ چمّاں نکش بواں بوت وڑ وڑیں ھیال جیڑگ ءَ اِت ایں اندازگ جناں ءَ من گْوشت کہ بِگندئے مردمانی لوگاں برک (بجلی) ءُ آپ نیست یا دِگہ انچیں سُبکیں جیڑھے بیت پمیشکا ایشاں دگ جام کُرتگ تاکہ مئے جیڑہ گیش ءُ گیوار بہ بنت بلے منی دُرائیں جیڑگ چپ ءَ شُت انت وھدے من جنین آدمانی گْریوگانی توار اِش کُت انت نوں من زانت کہ جیڑہ آپ ءُ برک یا دِگہ سُبکیں جیڑاھے نہ اِنت بلے چی اِنت؟ انگت ھِچ نزانت انچو کہ ما دیم ءَ جُنزان کُت،من دیست کہ ھک ءَ مات گْریوگ ءَ انت لھتیں بے وسیں مات نِشتگ ءُ سر ءَ ھاک مان کنگ ءُ گْریوگ ءَ اَت،لھتیں اوشتگ ءِ جاہ ءَ گْریوگ ءَ اَت۔لھتیں تچگ ءُ گْریوگ ءَ اَت ھرکس وڑے نا وڑے ءَ گْریوگ ءَ اَت ایشی ءَ پد،منی چم دگ ءِ چپیں نیمگ ءَ اوشتاگیں بس ءَ کپت انت کہ دیم ءِ کانچ ئِے پُرشتگ اَت اِے “ارباز ٹرانسپورٹ” ءِ بسے اَت نوں من کمّو پوہ بوت انت کہ دگ ءِ وئیلے بوتگ پد ءَ منی چم “اسپیتیں ٹبل ڈورے” ءَ کپت انت کہ دگ ءِ راستیں دست ءَ چپّی دیم اَت ما ھِمدا چہ یک راھگوزی بچکے ءَ جُست گپت کہ چی بوتگ؟ بچک ءَ ھِچ پسّو نہ دات من دل ءَ جیڑ اِت بگندئے سنگت ءَ منی گپ نہ پھمت انت پمیشکا ھِچ ئِے نہ گْوشت ھیر، من اِنگو آنگو چمّاں شانک دیاں بوت آں کہ وتی نزیکیں سنگتے دیست آ مارا چِہ ساری ھمود ءَ اوشتاتگ اَت من چہ سنگت ءَ پُرس اِت کہ چی بوتگ؟ آ من ءَ سرپد کنان بوت۔آئی ءَ گْوشت کہ “دگ ءِ وئیلے بوتگ۔ارباز ءِ بس ءَ آ اسپیتیں ڈبل ڈور جتگ بس ڈبل ڈور ءِ پُشت ءَ چِہ آیگ ءَ بوتگ ڈبل ڈور ءَ پُشت ءِ بتّیانی روک کنگ ءَ ابید راستیں نیمگ ءَ وتی میتگ ءِ موڑ گپتگ راستیں نیمگ ءَ دست ءَ ٹال کناں ءَ سنگت ءَ گْوشت کہ آ ڈبل ڈور والا ءِ میتگ اِنت بس ءَ پُشت ءَ چِہ ڈبل ڈور ءَ را جتگ ءُ پد ءَ وت اوشتاتگ ڈبل ڈور ءَ را سے مُردم سوار بوتگ،چریشاں یکّے وَ ھما وھد ءَ مُرتگ ءُ دو زدگ بوتگ چہ دوئیں زدگاں یکّے کمّو ٹپّی بوتگ بلے دومی سک باز دوئیں ٹپّی پہ الاج ءِ ھاتِر ءَ پنجگور ءَ برگ بوتگ انت ءُ میّت پہ شودگ ءَ برگ بوتگ گُڑا ایشی ءَ پد اِے میتگ ءِ مُردم اتکگ انت ءُ دگ اِش بند کُرتگ نوں اِے مردم گْوشگ ءَ انت تاں ھما وھد ءَ دگ بند اِنت کہ ما اِے بس نہ سوتکگ بس ءِ کانچ اِش ھم پُرشتگ انت۔ایشاں انچو اِرادہ کُرتگ کہ بس ءَ بُن دے ایں،پوج اتکگ ءُ بس ئِے بُن دیگ ءَ نہ اِشتگ نوں ھمیش اِنت پارٹی زھرشانی کنگ ءَ اِنت کہ بس مئے دُژمن اِنت،ما بس ءَ ھر رنگ ءَ بُن دے ایں۔”سنگت ءَ مارا شّریں دُروشمے ءَ سرپد کُت کہ چوں اِے وئیل بوتگ ءُ چریشی ءَ چنچو تاوان بوتگ۔ ایشی ءَ پد، منی چم پد ءَ وتی بے چارگیں مات ءُ گُھاراں کپت انت کہ گْریوگ اِت انت۔آہ ءُ زاری کنگ ءَ اِت انت۔پریات کنگ ءَ اِت انت۔دست اِش بُرز ءَ اِت انت۔چمّاں شانک دیاں ءَ من پیریں بلُّکے دیست کہ زمین ءَ کُورّاں ءُ گْریوگ ءَ اَت بزّگ سک گْریوگ ءَ اَت۔چہ بلُّک ءِ گْریوگ ءُ ھاکشانی ءَ مُردم ءَ را انچو گُمان بوت کہ اسپتیں ڈبل ڈور ءَ بُلّک ءِ وتی ساہ ءُ جان سوار بوتگ انت۔بلُّک ءِ دنیا ءَ تھار بوتگ اَت آئی کِرّ ءَ گْریوگ ءَ ابید،دِگہ ھِچ پشت نہ کپتگ اَت۔آ گوں پیلوئیں میتگ ءَ تھنا گْریوگ ءَ اَت۔

من کہ ایشاناں گْریوگ ءَ دیست،چہ سپر ءَ بے ھال بوت آں۔دل ءَ لوٹ اِت کہ ایشانی زھرشانی ءَ ھوار بہ باں بلے واہ بے سِرنگی کہ ایشانی زھرشانی زُوت ھلاس کنگ بوت ایشاناں سروک نیست اَت ایشانی یک مُردمے ءَ گْوشت دگ ءَ بند کن ات بلے دومی ءَ نہ منّ اِت یک ءُ دو مُردم ءَ کش،آ دِگہ کُل گْوشگ ءَ اِت انت کہ دگ ءَ پچ کن ایں۔ھمے مُردم کہ دگ ءِ پچی ءَ وش نہ اِت انت،کس ایشاناں مُردنی بِھ کنگ ءَ نہ اَت دگ پچ کنگ بوھگ ءَ اَت دگ ءِ سر ءِ سِنگ دُور کنگ بوگ ءَ اِت انت ھِمدا یک ماتے ءَ دل ءِ سوک ءَ براہوئی ءَ زاھے دات ءُ گْوشت کہ دگ ءَ پرچا پچ کنگ ءَ اِت؟ من کہ مات جھ جنگ ءَ دیست گل بوت آں کہ دیم ءَ کیت ءُ زھرشانی ءَ برجم دار ایت بلے ھمے مات اِش ھم بِھ نہ کُت ءُ دگ ءِ سر ءِ آیگ ءَ نہ اِشت مات ھم پہ ارمانے بےوس بوت ءُ پُشت ءَ شُت۔زھرشانی ھلاس بوتگ اَت دگ پچ کنگ بوت کسان ءُ مزنیں تیوگیں گاڑی ءُ بس روان بوت انت چو آ دِگہ مُساپِراں ما اوں وتی بس ءَ سوار بوت ءُ دیم پہ منزل ءَ جُنزان بوت ایں بلے بلے مات گْریوگ ءَ اِت انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: بالاچ مُدام کوھاں ھوکانی شکار ءَ کنت

نبشتہ کار: سمیہ بلوچ

دی بلوچستان پوسٹ

مرچی ءَ چہ بیست ءُ چار سال پیسر شپ ءِ گُڈی پاس آسر بوان اَت کروس بانگ دیگ ءَ اِت انت، بام نوکی وتی سُھری ءَ شنگ ءُ تالان کنگ ءَ دلمانگ اَت کہ ناکو دل مراد ءِ گس ءَ بچکیں چُکے ءَ وتی چم پچ کُت اَنت۔ ناکو دل مراد ءِ لوگی زرینہ چک ءِ نام ءَ بالاچ ایر کنت کھول ءِ مردم سک باز گل ءُ شات بہ اَنت چیا کہ بالاچ شش گْوھار ءَ چہ پد ودی بیتگ ات بلے آ وھد ءَ کس ءَ نہ زانت کہ یکروچے انچیں کیت کہ بالاچ پہ دُژمن ءَ آچے بیت- بالاچ ءِ مات بالاچ ءَ گوں جنگی کسہ ءُ شئیراں رودین ایت ءُ مزن کنت مُدام بالاچ ءَ پہ اے شئیر ءَ نازین ایت-

“بچیگ منی  بچیگ منی”
“بچیگ منی چمے چراگ”
“بالاچ منی زرد ءِ مراد “

بالاچ رودیت ءُ مزن بیت وانگ ءِ اُمر ءَ کیت گُڑا آئی ءِ پت بالاچ ءَ وانگجاہ ءَ بارت ءُ وانگ ءَ کنت ۔ بالاچ پہ ھُب ءُ واھگ وانگجاہ ءَ روت ءُ وان ایت لھتے وھدانی گوزگ ءَ چہ پد یک روچے زورگریں لشکر آئی ءِ وانگجاہ ءَ انگیر ءَ کن اَنت، آئی ءِ استاد ءَ آئی ءِ چمانی دیم ءَ جن اَنت دست ءُ چماں بند اَنت ئِے ءُ گاڑی ءِ تھ ءَ دَور دے اَنت ءُ گوں وت ءَ براَنت ئِے۔ بالاچ درستیں ندارگاں چارگ ءَ بیت۔ آئی ءِ زھرگ جَھ جنت بلے آئی ءِ دست پہ ھچ ءَ نرس ایت آ بس گوں زھری نگاہ ءَ لشکر ءَ چارگ ءَ بیت کہ لشکر ءِ کرنل بالاچ ءَ برزیں آواز ءَ گون جُست کنت تمہارا نام کیا ہے؟ آ پسو دنت: بالاچ کرنل پد ءَ جست گیپت یہ نام کس نے رکھا اور کیوں رکھا؟ آ کرنل ءِ چمانی تہ ءَ چار ایت درائینیت میری امی جان نے رکھا بالاچ اور وہ ہمیشہ کہتی ہے کہ تم بالاچ جیسا بنو –
بالاچ بیرگیراے گپ ءِ اِش کنگ ءَ گوں کرنل ءَ ھتر دات شھماتے بالاچ ءِ گُب ءَ آئی ءِ گُب سُھر تر اِت بلے بالاچ ءَ اُفے ھم دپ ءَ چہ نہ کش اِت انگت زھر زھر ءَ کرنل ءَ چارگ اَت بلے آ روچ ءَ دُژمن ءَ نہ زانت اے شھمات یک روچے بیرے بیت ءُ منی سر ءَ کپ ایت-
بالاچ ءِ اُستاد ءِ گار ءُ بیگواھی ءَ پد وانگ جاہ ویران بیت پرچا کہ اے میتگ ءِ یکیں وانگجاہ اَت ءُ آئی ءِ ماسٹر ھم ھمے یکین اَت۔ چونائی ءَ پہ پگار گرگ ءَ ماسٹر باز اِت انت بلے ایماندار، تچکیں مردم ھمے یکیں ماسٹر اَت کہ پہ دل ءُ ستک زھگاں وانینگ ءَ اَت۔ اے میتگ ءِ درستیں گونڈو آئی ءَ وتی زھگ سمجتگ اِت انت ماسٹر ءِ گار ءُ بیگواھی ءَ سال سرجم بوتگ اَت کہ یکروچے جنگل ءَ تیرانی توار بوت دیر نہ گوست ھال میتگ ءَ شنگ ءُ تالان بوت کہ میتگ ءِ ماسٹر زورگریں لشکر ءَ تیر جتگ ءُ شھید کُتگ ءُ پد ءَ ھمے ٹاپار جتگ کہ دیم پہ دیمی میڑے ءَ من سرمچارے جتگ ھما روچ ءَ کہ بالاچ ءِ ماسٹر برگ ءُ گار ءُ بیگواہ کنگ بوت ھما روچ ءَ چہ بالاچ ءَ وتی ءُ وتی راج ءِ بزگی ءُ گلامی مار اِت پد ءَ ھما روچ ءَ کہ آئی ءِ ماسٹر شھید کنگ بوت گُڑا بالاچ ءَ زانتگ اَت کہ نی من ءَ چی کنگی اِنت وھد ھمے داب ءَ گوزان بوت، روچ پہ روچ لشکر ءِ زوراکی گیش بوان بیت اَنت ءُ وھد گوزان بوت پد ءَ ھمے وانگجاہ ھم لشکر ءَ وتی بُنجل جوڑ کُت بالاچ ھم رُدان اَت ورناہ بوان اَت، اُمر ءِ پجیگ ءَ آئی ءِ سما ءُ سسا ھم گیش بوان اَت۔
آئی ءِ باتن ءِ تہ ءَ لھتے انچیں درد اِت انت کہ آئی ءِ شپانی وابے ھم پُل اِتگ اَت آئی ءَ درست یات اِت انت، مکھیں مات ءِ گپ ءُ کسہ، ماسٹر ءِ گار ءُ بیگواھی ءَ چہ پد لاش ءِ دست کپگ درست آئی ءِ زھن ءِ تہ ءَ یک یک ءَ نبشتہ ات انت بازیں جیڑگ ءُ چار ءُ بیچار ءَ چہ پد، یک روچے بالاچ مات ءَ رکست کنت ءُ گش ایت اماں تئی داتگیں پنتانی پد ءَ من روگ ءَ آں، من ءَ وتی شیر ءُ پاساں پھل کن مات میر کمبر ءِ شیئر ءَ گوں دست ءَ وتی بچ ءِ بڈ ءَ جنت ءُ آئی ءَ رھادگ کنت-

“شیر ترا پھل اِنت بچ منی”
“شیر اِت پھل اِنت ھَپت بر ءَ”
“من پہ تئی رودینگ ءَ”
“باز کش اِتگ جُھد ءُ جپا”
“آستیگ سُھیل دیمپان کُتگ”
“بچیگ ءَ سُھیلیی مہ بیت”
“بند پہ ھمے روچاں جتگ “

پد ءَ بالاچ اَت، کوہ اَت، سنگت اِت انت، جنگ اَت، پند اَت۔ اے سپر ءَ بالاچ ءَ بازیں درد، گُژن، تُن سنگتانی شھیدی، سنگتانی سِدگ، لوگانی ماندارگ، مات ءُ پتانی در پہ دری ءُ دگہ بازیں چیزے دیستگ ات انت بلے! بلے آ نہ پُرشتگ ات ، بلکیں گیش مُھکم بوتگ اَت، آ انگت چو تمرد ءَ اُوشتاتگ اَت، آئی ءِ ایمان، لیکہ، جزبگ گیش بوتگ اِت انت-
دُژمن آئی ءِ نام ءَ چہ لرز اِت، آ پہ وتی میتگ، بلکیں سرجمیں بلوچستان ءِ کسان سالیں ورنایانی دلدوستیں کارست ءِ جوڑ بوتگ اَت۔ ھر کُجا بالاچ ءِ ستاہ اَت، آئی ءِ جنگانی کسہ اَت۔
بلے مروچی جنگ اَت تیر ءُ ٹوپانی توار اَت مزنیں کچے ءَ کمانڈو ءُ دگہ بازیں لشکری مُچ بوتگ اَت انت ءُ بُرز ءَ ھپت ءُ ھشت بالگرداں گیش ھمے کوھانی میان ءَ تیر گواری کنگ ءَ اِت انت، شپ ءِ بندات بیتگیں جنگ دومی شپ ءَ سر بوتگ اَت، بازیں کچے ءَ لشکری مُردار بوتگ اَت، ھمے میان ءَ آئی ایس پی آر ءَ رسانکدر ءَ اھوالکاراں گوں ھالتران کُت ءُ گُشت کہ من پلان کوھی دمگ ءَ آپریشن کُتگ کمانڈر بالاچ گوں چار ھمراھاں جتگ ءُ مئے شش پوجی ھم بیران بیتگ، چو مُدامی رنگ ءَ وتی لشکریانی مرگ ءَ چیر دیگ ءَ اَت۔ بلے ھما بازار ءِ مردم ءَ دیستگ اَت کہ سدانی کچ ءَ گاڑی چہ لاش ءَ سر چکار اِت انت ءُ آھاں برگ ءَ اِت انت- پد ءَ سرجمیں بلوچستان ءَ بالاچ ءِ نمیران بوگ ءِ ھال شنگ بوت۔
بالاچ نمیران اِنت بالاچ سلاہ بندیں بالاچ مُدام کوھاں ھوکانی شکار ءَ کنت ھو بالاچ نمیران بوت، آئی ءَ وتی سپر ھلاس کُت ءُ پہ مُدامی گُلزمین ءِ دلبند ءَ واب کپت، بلے آئی ءِ رِتکگیں ھوناں چہ دگہ ھزاراں بالاچ ودی بوت۔ انگت بالاچ ودی بیت انت پرچا کہ اے دیار بالاچانی دیار اِنت، داں اے گُلامی ءِ سیاہ ءُ تھاریں شپ ھست اِنت بالاچ ودی بوان بنت –

“آ مُرگ کہ شپاں نیم بال اَنت”
“بالاچ ءِ کمان ءِ تیر اَنت”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ بارکھان ءَ زورانسری آوار جنی ءِ آماچیں سَے چاگردی باسکانی زورانسری آوار جنی ءِ ھلاپ ءَ مروچی شھر ءَ ھرتال کنگ بیتگ –

بلوچستان ءِ دمگ بارکھان ءَ گوستگیں ھپتگ ءَ سَے چاگردی باسک زورانسری آوار جنی ءِ آماچ کنگ بیتگ اَنت کہ انگت ءَ بیگواہ اَنت اشانی تہ ءَ بارکھان ورنا اتھاد ءِ سروک شاہ زین بلوچ، نسیم بلوچ ءُ ڈاکٹر جمیل بلوچ ھوار اَنت –

دمگی مردمانی گوشگ اِنت زھرشانی ءَ ھر سئیں ورنایانی درگت ءَ کنگ ءَ ایں آ سرکاری ادارھاں آوار جتگ ءُ برتگ ءُ بیگواہ کتگ اَنت-

اشانی تہ ءَ شاہ زیب کھیتران ءُ آئی ءِ سنگت نسیم بلوچ گوستگیں شپ ءَ بیگواہ کنگ بیتگ اَنت ءُ ھمے وڑ ڈاکٹر جمیل یک روچے ءَ پیسر آوار جنگ بیتگ –

اے گرگ بیتگیں ورنایانی آوار جنی ءِ ھلاپ ءَ چاگردی ءُ سیاسی پاٹیاں بندوکیں مردم ایر جنی ءِ ھواری ءَ زھر ءِ درشان ءَ کنگ ءَ اَنت-

دمگی مردمانی رد ءَ اے ورنایاں نان لوکل ڈومیسائل ءِ جیڑہ ءِ سر ءَ توار چِست کنگ ءِ پژدر ءَ آوار جنگ بیتگ اَنت بلے داں انگت ءَ واکداراں اے درگت ءَ ھچ گپ دیم ءَ نیاؤرتگ –